25 November 2016 Written by 

మరో పెను విషాదం

train accidentవారి జీవిత ప్రయాణం అనుకోకుండానే ఆగిపోయింది.. గమ్యం చేరకుండానే ముగిసిపోయింది. అనేకమందిని నిద్రలోనే కబళించి మృత్యురాకాసి తన కర్కశత్వాన్ని చాటుకుంది. ఏమి జరిగిందో తెలుసుకునేలోగానే జరగకూడని దారుణమంతా జరిగిపోయింది.

ఉత్తరప్రదేశ్‌లో జరిగిన ఈ ఘోర రైలు ప్రమాదం బాధిత కుటుంబాలను శోకసముద్రంలో ముంచివేసింది. దేశప్రజలకు తీరని వేదన కలిగించింది. ఇండోర్‌ నుంచి పట్నాకు వెళ్తున్న ఇండోర్‌-పట్నా ఎక్స్‌ప్రెస్‌ రైలు మార్గమధ్యంలో కాన్పూర్‌కు సుమారు నూరు కిలోమీటర్ల దూరంలోని దేహత్‌జిల్లా పుఖ్రయా వద్ద ఘోరప్రమాదానికి గురైంది. దాదాపు 146 మంది ప్రాణాలు బలితీసుకున్న ఈ ప్రమాదం భారతీయ రైలు ప్రమాదాల చరిత్రలో మరో పెనువిషాదంగా నమోదైంది. అంతేకాదు, మరో 200 మందికి పైగానే ప్రయాణీకులు గాయాల పాలయ్యారు. రైలు పట్టాలు తప్పడంతో 14 బోగీలు పట్టాలు పట్టుతప్పి బోల్తా కొట్టాయి. వీటిలో కొన్ని బోగీలు తునాతునకలయ్యాయి. మరికొన్ని నుజ్జునుజ్జయ్యాయి. ప్రమాదంలో చనిపోయినవారు చనిపోగా, చేతులు విరిగి కాళ్ళు తెగి.. అనేకమంది గాయాలతో విలవిలలాడారు. మృత్యువుకు గురైన వారి మృతదేహాలు నెత్తుటి చారికలతో చెల్లాచెదరుగా పడిపోయాయి. ప్రమాదం జరిగిన సమయంలో ప్రయాణీకులంతా గాఢనిద్రలో వున్నారు. చిమ్మ చీకటిలో.. వేకువన 3గంటల ప్రాంతంలో జరిగిన ఈ దుర్ఘటనతో ప్రయాణీకుల హాహాకారాలు.. ఆర్త నాదాలు మిన్నుముట్టాయి. కలదెలుసుకునేసరికి ఆ ప్రాంతమంతా భీతావహంగా మారింది. ఈ దుర్ఘటనలో దాదాపు 146 మంది ప్రయాణీకులు మృతిచెందడం అత్యంత బాధాకరం. తెల్లవారేసరికి వారి జీవితాలు తెల్లవారిపోవడం విషాదకరం. పట్టా విరగడం వల్లనే ఈ ప్రమాదం సంభవించి వుంటుందని భావిస్తున్నా, కుట్ర కోణం లోనూ ఉన్నతాధికార యంత్రాంగం దర్యాప్తు చేపట్టింది. ఈ దుర్ఘటనకు అసలు కారణాలేమిటో దర్యాప్తులో నిర్ధారణ కావాల్సివుంది. ఈ దారుణానికి బాధ్యులైనవారిపై కఠిన చర్యలు తీసుకుంటామని రైల్వేమంత్రి సురేశ్‌ప్రభు ఎంతో గట్టిగా చెప్పారు. ఆ దృఢత్వం ఏళ్లతరబడిగా లేనందువల్లే రైల్వేకి ఈ దురవస్థ దాపురించిందేమో!.. ఇప్పుడే కాదు, దేశంలో ఎన్నో ఏళ్ళుగా రైళ్ళ పట్టాలు ఎంతోమంది ప్రాణాలను బలిగొంటూనే వున్నాయి. గతంలోనూ అనేక ఘోరమైన రైలు ప్రమాదాలు జరిగాయి. ఒక్క ఉత్తరప్రదేశ్‌ విషయానికి వచ్చినా ఆ రాష్ట్రంలో ఇదేమీ మొదటిది కాదు. 1988లో కర్నాటక ఎక్స్‌ప్రెస్‌ పట్టాలు తప్పి 75 మంది మృతిచెందారు. 1995లో ఉత్తరప్రదేశ్‌లోని ఫిరోజాబాద్‌ రైల్వేస్టేషన్‌లో కాళిందీ ఎక్స్‌ప్రెస్‌ను, మరో ఎక్స్‌ప్రెస్‌ రైలు ఢీకొట్టడంతో నాలుగువందల మందిదాకా మరణించారు. 1996లో కూడా ఉత్తరప్రదేశ్‌లోని డోనేంగడ్‌ వద్ద ఆగివున్న గూడ్స్‌ను ఎక్స్‌ప్రెస్‌ రైలు ఢీకొనడంతో 60 మంది ప్రాణాలు కోల్పోయారు. తాజాగా జరిగిన ఈ ప్రమాదం గత ఐదేళ్ళలో అతిపెద్ద రైలు ప్రమాదం కావడం గమనార్హం. దేశవ్యాప్తంగా రైల్వే భద్రతకు రైల్వేశాఖ నిరంతరం అనేక కట్టుదిట్టమైన చర్యలు తీసుకుంటున్నప్పటికీ, ఎక్కడో ఒకచోట ప్రమాదాలు జరుగుతూ వుండడమే దురదృష్టకరం. ఎంతగా పకడ్బందీ చర్యలు తీసుకుంటున్నా, తీసుకోవాల్సిన చర్యలు ఇంకా బోలెడన్ని మిగిలే వుంటున్నా యనేందుకు ఈ ప్రమాదమే ఒక తాజా ఉదాహరణ. మన భద్రతా వ్యవస్థలో లోపాల వల్లనే ఇలా తరచూ ప్రమాదాలు జరుగుతూనే వున్నాయని, ప్రయాణీకుల భద్రత గాలిలో దీపంలాగే వుంటోందని ప్రయాణీకుల ఆవేదన. ప్రపంచంలో అమెరికా, రష్యా, చైనాల తర్వాత భారత్‌దే అతిపెద్ద రైల్వే వ్యవస్థ. అయితే, ప్రయాణ భద్రతలో మనం ఇంకా ఎంతో వెనుకబడే వున్నాం. అత్యంత అధునాతనమైన సాంకేతిక పరిజ్ఞానం ప్రపంచవ్యాప్తంగా అందుబాటులోకి వచ్చినా, ఆ పరిజ్ఞానాన్ని అందిపుచ్చుకుని ప్రమాదాలు నివారించడంలో మన రైల్వేవ్యవస్థ ఇంకా ఆశించిన స్థాయికి చేరుకోలేకపోతోంది. దాదాపు 160 ఏళ్లకు పైగా చరిత్ర వున్న మన రైల్వేవ్యవస్థ ఇప్పటికీ భద్రతా పరమైన లోపాలతోనే సతమతమవుతుండడం విచార కరం. రైలు పట్టాలను నవీకరించుకోవాలని, వ్యవస్థను ఆధు నీకరించుకోవాలని ప్రయాణీకుల భద్రత, శ్రేయస్సే లక్ష్యంగా గతంలో నిపుణులు చేసిన సిఫారసులు ఎన్నో వున్నా అవన్నీ అటకెక్కిపోతున్నాయే తప్ప ఆచరణలోకి రాకపోవడాన్ని ఏమనుకోవాలి?.. భద్రతా వ్యవస్థను మెరుగుపరచేందుకు గతంలో అనిల్‌ కకోద్కర్‌, శ్యాంపిట్రోడా నేతృత్వంలో రెండు వేర్వేరు కమిటీలు నివేదికలు సమర్పించినా అవన్నీ బుట్టదాఖలే కావడం విచారకరం. ఈ నేపథ్యంలో, మనమెక్కిన రైలు మనల్ని గమ్యం చేరుస్తుందో.. లేదోననే భీతితో.. అభద్రతతో ప్రయాణం చేయాల్సిరావడం ఎంత దురదృష్టకరం. ఇకనైనా, రైల్వేవ్యవస్థ మరింత అప్ర మత్తం కావాలి. ప్రయాణీకులను గమ్యం చేర్చే పట్టా లను ప్రాణప్రదంగా చూసుకునేందుకు తగిన యంత్రాంగాన్ని సమకూర్చుకోవాలి. అవసరమైన సిబ్బందిని తక్షణం నియమించుకోవాలి. అటు కేంద్రం, ఇటు రాష్ట్రాలు సంయుక్తంగా కలసి, రైల్వేవ్యవస్థను ఒక భద్రమైన వ్యవస్థగా పరిపుష్టం చేయాలి. పట్టాలపై తరచూ జరుగుతున్న అగ్నిప్రమాదాలు, బోగీలు తప్పి బోల్తా కొట్టడాలు, రైల్వే క్రాసింగ్‌ల వద్ద రైళ్ళు ఢీకొట్టడాలు, రైళ్ళకు రైళ్ళే ఢీకొట్టుకోవడాలు వంటి అన్నిరకాల ప్రమాదాలను వెంటనే నివారించేందుకు కేంద్రం, రైల్వేశాఖ పటిష్టమైన చర్యలు తీసుకోవాలి.

ఏదేమైనా..ప్రయాణం ప్రమాదంగా మారకూడదు. ప్రయాణీకుల గమ్యం..ఎప్పటికీ మృత్యుద్వారం కాకూడదు. రైలు పట్టాలు..ప్రాణాలు తీసే మృత్యువుకు రాస్తాలు కాకూడదు. అన్నిరకాల ప్రమాదాలను పూర్తిస్థాయిలో నివారించినప్పుడే ప్రయాణీకుల భద్రతకు భరోసా వుంటుంది. ఆ దిశలో ప్రభుత్వాలు గట్టి చర్యలు తీసుకున్నప్పుడే పట్టాలపై ప్రయాణం భద్రంగా సాగుతుంది.



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com Email This email address is being protected from spambots. You need JavaScript enabled to view it.

newsbottomad

ఎక్కువగా చదివిన వార్తలు

  • బ్రదర్స్‌ దారెటు?
    ఏ.సి.సుబ్బారెడ్డి, ఆనం వెంకటరెడ్డి... ఆనం వంశంలో మొదటి తరం. ఆనం సంజీవరెడ్డి, ఆనం భక్తవత్సలరెడ్డి, ఆనం వివేకా, ఆనం రామనారాయణ రెడ్డి, ఆనం జయ, ఆనం విజయ... వీళ్ళంతా రెండోతరం నాయకులు... ఇప్పుడు మూడోతరం కూడా రంగంలో వుంది. ఆనం వెంకటరమణారెడ్డి,…
  • సైకిల్‌ దిగినట్లే! వైసిపిలో చేరడానికి ఇంకా కుదరని ముహూర్తం
    దాదాపు రెండు నెలలుగా ఒక వార్త జిల్లా రాజకీయాలలోనే కాదు, రాష్ట్ర రాజకీయాలలో కూడా హల్‌చల్‌ చేస్తోంది. అదే మాజీమంత్రి ఆనం రామనారాయణరెడ్డి తెలుగుదేశం పార్టీని వీడనున్నాడని... వైయస్సార్‌ కాంగ్రెస్‌పార్టీలో చేరనున్నాడని. ఇవన్నీ మీడియాలో మాత్రమే వచ్చాయి. ఆనం వివేకానందరెడ్డి మరణానికి…
  • నగర కిరీటం జయకేనా?
    జిల్లాలో తెలుగుదేశం పార్టీ స్థితిగతుల గురించి అధిష్టానం నాలుగేళ్ళుగా పట్టించుకో లేదు. ఇష్టం వచ్చిన రీతిలో పదవులు ఇచ్చు కుంటూ పోయారు. ఒక వర్గాన్ని తొక్కడమే లక్ష్యంగా పనిచేసారు. రాజకీయాలలో ఎక్కడం, తొక్కడం లాంటివి మంచిది కాదని ఇప్పుడు తెలుసుకున్నారు. అందుకే…
  • గుంతలా!..మత్యు గుహలా!..
    జిల్లాలోని చెరువులు దొరువుల్లో, నీటి గుంతల్లో మృత్యువు పొంచివుంటోంది. ఆ మృత్యువు ఎప్పుడు ఎవరిని కాటేస్తుందో తెలియడం లేదు. ఇటీవల సెలవుల్లో సరదాగా ఈతకు దిగిన పలువురు చిన్నారులను, యువకులను మృత్యువు పొట్టనబెట్టుకుంది. చెరువుల్లో ఎక్కడంటే అక్కడ నిబంధనలకు విరుద్ధంగా గుంతలు…
  • నారా కుటుంబానికి నందమూరి శాపం - భేతాళకథ
    పట్టువదలని హైటెక్‌ విక్రమార్కుడు ఎర్లీ మార్నింగ్‌ ఎయిట్‌ఫార్టీ ఫైవ్‌ కల్లా నిద్ర లేచాడు. ఒంట్లో కొవ్వు 250మిల్లీగ్రాములుందని, రోజూ వాకింగ్‌ చేయమని డాక్టర్‌ 2500 రూపాయలు తీసుకుని చెప్పివుండడంతో ఆరోజుకు తన కర్తవ్యంగా 250మీటర్ల వాకింగ్‌ను పూర్తి చేసాడు. రూమ్‌లో నీట్‌గా…

Newsletter