23 December 2016 Written by 

అమ్మ జీవితం హిస్టరీ... మరణం మిస్టరీ !

jayalalithaఈ భూమ్మీద పడ్డ తొలిరోజుల్లో జయరామన్‌ కోయల వల్లి... పసిప్రాయంలో సినిమాల్లో చేరాక జయరామన్‌ జయలలిత... సినిమాలు వదిలి రాజకీయాల్లోకి వచ్చాక పురచ్చితలైవి జయలలిత... తమిళనాడు సిఎం అయ్యి అనేక ప్రజాసంక్షేమ పథకాలు చేపట్టాక అమ్మ జయ లలిత... మనిషి ఒక్కరే, కాని పేర్లు మారాయి. పదవులు మారాయి. ప్రజల మనసుల్లో, ఆలోచనల్లో, వారి భావాల్లో ఆమె స్థానం మారుతూ వచ్చింది. ఒక భర్తకు భార్య కాలేకపోయినా, ఒక బిడ్డకు అమ్మ కాలేకపోయినా కోట్లాదిమంది ప్రజల చేత అమ్మ అని పిలిపించుకున్న భాగ్యం బహుశా చరిత్రలో మథర్‌థెరిస్సా తర్వాత జయలలితకే దక్కిందేమో! జయలలిత... ఒక పేరు కాదు ఒక చరిత్ర! నడిచిన చరిత్ర... నడుస్తున్న చరిత్ర కూడా!

నిజంగా ఆమె జీవితం ఒక హిస్టరీనే! ఎందుకంటే ఆమె తండ్రి పండిట్‌ జవహర్‌లాల్‌ నెహ్రూలా ప్రధా ని కాదు, షేక్‌ అబ్దుల్లాలా ముఖ్యమంత్రి కాదు. కాబట్టి ఆమెకు రాజకీయ నేపథ్యం వారసత్వంగా రాలేదు. ఫ్రీగా రాలేదు. పోరాడితే వచ్చింది. ఆమె తన జీవితంలో తండ్రి ఎలా ఉంటాడో చూడలేదు. అలాగే బిడ్డనూ చూసే అదృష్టం దక్కలేదు. కాబట్టి ఆమె జీవితంలో ఆ రెండుపాత్రలకు స్థానం లేకుండా పోయింది. తన వ్యక్తిగత జీవితంలో ఆమె అతి దగ్గరగా చూసిన పాత్ర అమ్మ. ఆ పాత్ర నుండే ఆమె ప్రేమను పొందింది. అందులోని మాధుర్యాన్ని చవిచూసింది. కాబట్టే తన జీవితంలోనూ అమ్మపాత్రను అద్భుతంగా మలచుకుని కోట్లాదిమందికి 'అమ్మ'లా మారింది. తన సినిమా, రాజకీయ జీవితంలో ఎన్నో ఎత్తుపల్లాలను చూసినా, ఆమెకు మిగిలింది, ఆమె జీవితానికి పరిపూర్ణత చేకూర్చింది ఆమె కనుమూసిందని తెలియగానే అమ్మా, అమ్మా అంటూ రోదించిన కోట్ల గొంతుల్లోని వేదనలే!

తన జీవితాన్నే ఒక హిస్టరీగా మలచిన ఈ 'అమ్మ' మరణం మిస్టరీ కావడం విశేషం. చావుపుట్టుకలు మానవజీవితంలో సహజమే అయినా ఆమె మరణంలోని కొన్ని అసహజ సంఘటనలే అనుమానాలకు తావిస్తున్నాయి. ఆమె మరణంపై అనుమానాలు లేవనెత్తుతూ కొందరు ఏకంగా ప్రధానమంత్రికే లేఖలు వ్రాసే స్థాయికి పరిస్థితి చేరింది. తీవ్రమైన జ్వరం, డీహైడ్రేషన్‌తో ఆసుపత్రిలో చేరిన మనిషి మృతదేహంగా బయటకు రావడాన్ని అభిమానులు జీర్ణించుకోలేకపోతున్నారు. ఇందిరాగాంధీ, రాజీవ్‌గాంధీలు ఉగ్రవాద ఘాతుకానికి బలయ్యారు. వై.యస్‌.రాజశేఖరరెడ్డి లాంటి నేత హెలికాఫ్టర్‌ ప్రమాదంలో మరణించారు. ఇవి వూహించని మరణాలు. హఠాత్తుగా గుండెపోటు రావడంతో మరణించడం వేరు. క్యాన్సర్‌ లాంటి వైద్యం లేని వ్యాధులతో మరణిస్తే ఆ సంగతి వేరు! కాని జయలలిత విషయం అది కాదు. ఆమె మరణంలో బి.పి, షుగర్‌లు ప్రధానపాత్ర పోషించాయి. ఇవి కంట్రోల్‌లో లేకపోవడం వల్లే ఆమెలో మూత్రపిండాలు, కిడ్నీ, కాలేయం వంటి సమస్యలు ఉత్పన్న మయ్యాయి. ఆసుపత్రిలో వుండగా తీవ్రమైన గుండెపోటుకు కారణం కూడా షుగర్‌, బిపిలే! మరి ఒక ముఖ్యమంత్రికి బి.పి, షుగర్‌లు కంట్రోల్‌ చేయలేనంతగా తమిళనాడు ప్రభుత్వ వైద్య విభాగం అధ్వాన్నస్థితిలో వుందా? లేక ఎవరైనా కావాలనే ఆమెలో బి.పి, మధుమేహం స్థాయిని పెంచారా? ఇవి సమాధానాలు చిక్కని ప్రశ్నలుగా మారాయి. అదీగాక జయలలిత వయసు కూడా అంత పెద్దదేం కాదు. 68ఏళ్లు. క్రమం తప్పకుండా వైద్యపరీక్షలు చేయించుకుంటుంటే, ఆహార అలవాట్లు అన్నీ నియంత్రణలో వుంటే ఆరోగ్యాన్ని చాలా జాగ్రత్తగా కాపాడుకుని వుండొచ్చు. ఒకవేళ సీఎంగా జయలలిత తీరికలేని పనిలో వున్నా ఆమె బాధ్యత చూసుకునే వాళ్లు ఆమె ఆరోగ్యం పట్ల శ్రద్ధపెట్టి ఉండాలి. కాని ఎవరు కూడా ఆమె ఆరోగ్యంపై అంత శ్రద్ధ పెట్టలేదనే అనుమానాలున్నాయి.

ఈ ఏడాదిలో జరిగిన ఎన్నికలకు ముందే ఆమె ఆరోగ్యంపై అనేక వదంతులువచ్చాయి. ఎన్నికలలోనూ ఆమె చాలా తక్కువ సభల్లోనే పాల్గొన్నారు. ఎన్నికల నాటికే ఆమె భారంగా నడిచే వారు. అంతలా ఆమె ఆరోగ్యం దెబ్బతింటుంటే పక్కన వున్నోళ్లు పట్టించుకోకపోవడం శోచనీయంగా తోస్తుంది.

జయకు చిన్నప్పుడే తండ్రి చనిపోగా, సినిమాల్లో ఉండగానే తల్లి చనిపోయింది. ఆ తర్వాత ఆమె బంధువులకు దూరంగా పెరిగింది. ఒక దశలో సోదరుడు జయకుమార్‌ కుటుంబాన్ని పొయెస్‌ గార్డెన్‌లోనే పెట్టుకుంది. కాని అక్కడ జయ నెచ్చెలి శశికళ ఆధిపత్యం దెబ్బకు జయకుమార్‌ కుటుంబం అక్కడనుండి బయటకొచ్చేసింది. అప్పటి నుండి కుటుంబసభ్యులెవరూ ఆమెకు దగ్గరగా లేరు. 30ఏళ్లుగా శశికళ, ఆమె బంధువులు మాత్రమే జయను చుట్టుముట్టి వున్నారు. ప్రభుత్వ వ్యవహారాలలోనూ వీరిదే కీలకపాత్ర. శశికళ కోటరీ మితిమీరిన జోక్యం వల్ల తమిళనాడుకు రావాల్సిన కొన్ని పరిశ్రమలు ఇతర రాష్ట్రాలకు వెళ్లాయని, ఇది తెలిసి జయలలిత కొంతకాలం శశికళను దూరం పెట్టారని తెలుస్తోంది. అయితే ఆ తర్వాత శశికళ క్షమాపణ చెప్పడంతో జయ ఆమెను దగ్గర చేర్చుకున్నా, బంధువర్గాన్ని మాత్రం రానీయలేదు. శశికళ భర్త నటరాజన్‌ను కూడా పొయెస్‌ గార్డెన్‌లోకి అడుగుపెట్టనీయలేదు. ఒకటైంలో ఇంట్లో వంటమనిషి దగ్గర నుండి ప్రతిఒక్కరూ శశికళ మనుషులే వుండేవాళ్ళు!

పొయెస్‌ గార్డెన్‌ను ఇంతలా అల్లుకుపోయిన శశికళ తనకు తాను కలలో కూడా వూహించనంతటి జీవితాన్ని అందించిన జయ ఆరోగ్యం క్రమక్రమంగా క్షీణిస్తుంటే, నడవలేని పరిస్థితి దాకా వస్తే ఎందుకు ఉపేక్షిందనే అనుమానాలు లేకపోలేదు. జయలలిత తలచుకుంటే విదేశాలకు వెళ్లి వైద్యచికిత్స చేయించుకుని ఉండొచ్చు. వ్యాధి అంత ముదిరే దాకా ఎందుకు రానిచ్చారన్నదే ప్రశ్న!

ఇక అపోలో ఆసుపత్రిలో చేర్చిన తర్వాత అక్కడి వైద్యులు తమ శాయశక్తులా ఆమెకు వైద్యసేవలందించారు. ఒక దశలో కోలుకుందని ఆనందపడ్డా, ఆ తర్వాత గుండెపోటు రూపంలో మృత్యువు ముంచుకొచ్చి జయలలితను ఈ లోకం నుండి తీసుకుపోయింది.

అయితే జయలలిత మరణం తర్వాత శశికళ బంధువర్గమంతా మళ్ళీ ఆమె మృతదేహం చుట్టూ మూగింది. జయ దూరంగా పెట్టిన నటరాజన్‌ తిరిగి పొయెస్‌ గార్డెన్‌లో ప్రత్యక్షమయ్యాడు. ప్రాణ స్నేహితురాలి మృతదేహం పక్కనే శశికళ రాజకీయ పావులు కదిపింది. స్నేహితురాలు లేదనే బాధకంటే కూడా అన్నాడిఎంకె పార్టీని తన చేతు ల్లోకి తీసుకోవాలని, తన మనిషిని ముఖ్యమంత్రిని చేసుకోవాలన్న తపనే ఎక్కువుగా కనిపించింది. దీంతో స్వతహాగానే అనుమానాలు తలెత్తాయి. అన్నాడిఎంకె న్యాయవ్యాది కృష్ణమూర్తి, జయ మేనకోడలు దీపా జయకుమార్‌ ఆరోపణలు చేసినా, తెహల్కా డాట్‌కామ్‌ ప్రత్యేక కథనాల్ని వెల్లడించినా, సినీనటి గౌతమి జయమృతిపై అనుమానాలు తేల్చాలంటూ ప్రధానికి లేఖ వ్రాసినా... ఇవన్నీ జయ మృతిలో శశికళ పాత్ర ఏంటో తేల్చాలని డిమాండ్‌ చేస్తున్నవే! జయ జీవితం భావితరాలకు హిస్టరీగా మిగిలిపోవాలేగాని, ఆమె మరణం ఒక మిస్టరీగా మారకూడదనే ఉద్దేశ్యమే వీరి ఆందోళనలల్లో కనిపిస్తోంది.



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com Email This email address is being protected from spambots. You need JavaScript enabled to view it.

newsbottomad

ఎక్కువగా చదివిన వార్తలు

  • ఇప్పుడిప్పుడే పుంజుకుంటున్న రియల్‌
    వై.యస్‌.రాజశేఖరరెడ్డి మరణం తర్వాత నెల్లూరుజిల్లాలో రియల్‌ మార్కెట్‌ పడిపోయింది. ఆ తర్వాత కూడా రియల్‌ రంగానికి అన్నీ ఎదురుదెబ్బలే! వై.యస్‌. మరణంతో జిల్లాలో పారిశ్రామికాభివృద్ధి కుంటుపడడం, ఆ తర్వాత వచ్చిన సీఎంల పాలనలో వేగం లేకపోవడంతో రియల్‌ మార్కెట్‌లో ప్రతిష్టంభన ఏర్పడింది.…
  • మేజర్‌లు... మున్సిపాల్టీలయ్యేనా?
    నెల్లూరుజిల్లాలో కొత్త మున్సిపాల్టీల ఏర్పాటులో కదలిక వచ్చినట్లుగా తెలు స్తోంది. రాష్ట్ర ప్రభుత్వం పట్టణీకరణలో భాగంగా పలు మేజర్‌ పంచాయితీలను మున్సిపాల్టీలుగా మార్పు చేయాలనుకుంది. ఈమేరకు మున్సిపాల్టీలుగా మార్చగల పంచాయితీ పేర్లను ప్రతిపాదించాలని కలెక్టర్లను ఆదేశించడం జరిగింది. నెల్లూరుజిల్లా కలెక్టర్‌ ఛైర్మెన్‌గా…
  • వెంకటగిరి... నా ఊపిరి!
    నెల్లూరుజిల్లా రాజకీయ చరిత్రలో గుర్తుండిపోయే నాయకుడు స్వర్గీయ నేదురుమల్లి జనార్ధన్‌రెడ్డి. ఒకే జెండాను, ఒకే అజెండాను, ఒకే సిద్ధాంతాన్ని, ఒకే రాజకీయ మార్గాన్ని ఎంచుకుంటే సామాన్యులు సైతం అత్యున్నత స్థానాలకు ఎదుగుతారనడానికి రెండు ఉదాహరణలు ఈ జిల్లా నుండే వున్నాయి. తొలినుండి…
  • నానుతున్న నారాయణ
    చాలాకాలంగా మంత్రి నారాయణ పేరు జిల్లాలో నానుతుంది. వచ్చే ఎన్ని కల్లో ఆయన పోటీ చేస్తాడనే ఊహాగా నాలు వినిపిస్తున్నాయి. పలుసార్లు ఆయన తాను పోటీ చేయనని చెప్పినప్పటికీ ఆ ప్రచారం మాత్రం ఆగడం లేదు. మొదటినుండి నెల్లూరు నగరం నుండి…
  • అయోమయంలో ఆనం
    నెల్లూరుజిల్లాలో బలమైన రాజకీయ కుటుంబానికి చెందిన ఆనం రామనారాయణరెడ్డి ఇప్పుడు వినూత్న సమస్యలో చిక్కుకుని వున్నాడు. తన రాజకీయ భవిష్యత్‌ దృష్ట్యా ఎటువైపు అడుగులు వేయాలో తెలియని సందిగ్ధ స్థితిలో ఉన్నాడు. ఇటీవలే ఆనం రామనారాయణరెడ్డి తెలుగుదేశంపార్టీని వీడుతున్నట్లు జోరుగా ప్రచారం…

Newsletter