06 January 2017 Written by 

విష రాజకీయాలకు విరుగుడు

lawఓటుబ్యాంకు రాజకీయాలతో భారతదేశ లౌకికవాద స్పూర్తిదీప్తులు నానాటికీ మసకబారిపోతున్న సమయంలో ఎన్నికల యజ్ఞానికి పవిత్రత చేకూరేలా రాజ్యాంగ ధర్మాసనం తాజాగా ఇచ్చిన తీర్పు ఎంతైనా సంచలనం..చరిత్రాత్మకం. మతం, కులం, జాతి, వర్గం భాష ప్రాతిపదికగా ఓట్లను అభ్యర్థించడం ఎన్నికల నిబంధనావళి ప్రకారం అవినీతి కిందికే వస్తుందని సర్వోన్నత న్యాయస్థానం ఇచ్చిన ఈ తీర్పు దేశంలో కలకలం కలిగించడమే కాక, కులమతాల నుంచి రాజకీయాలను వేరుచేసే దిశగా ఇచ్చిన ఈ తీర్పుపై సర్వత్రా ప్రజల నుంచి హర్షం వెల్లడవుతోంది. వ్యక్తికి-మతానికి వున్న సంబంధం వ్యక్తిగతమైనదే నని, ఎన్నికల ప్రక్రియ అనేది లౌకికపరమైన ప్రక్రియ కనుక ప్రజాప్రతినిధుల పనితీరు కూడా లౌకికంగానే వుండాలని, అందువల్ల ఎన్నికల ప్రక్రియలో మతానికి తావు లేదని స్పష్టం చేయడంతో ఈ తీర్పుకు మరింత విశిష్టత చేకూరినట్లయింది. భారతావనిలో ఎన్నికల మహాక్రతువు స్వచ్ఛంగా.. మరింత పారదర్శకంగా జరిగేందుకు ఇది మేలుబాటలు పరచినట్లయింది. రెండు దశాబ్దాల క్రితం నాటి 'హిందూత్వ తీర్పు'ను పున:సమీక్షించిన సుప్రీం కోర్టు తాజాగా ఈ సంచలన తీర్పు వెలువరించింది. ఇది కొన్ని రాజకీయపార్టీలకు, కొంతమంది నాయకులకు అయిష్టంగానే వుండవచ్చునేమో కానీ, రాజ్యాంగ ధర్మాసనం మాత్రం ఈ విషయంలో తాను చెప్ప దలచుకున్నదంతా స్పష్టంగానే చెప్పింది. ప్రధాన న్యాయమూర్తి జస్టిస్‌ టిఎస్‌ ఠాకూర్‌తో సహా ఏడుగురు సభ్యులతో కూడిన ధర్మాసనం మెజారిటీ న్యాయ మూర్తుల అభిప్రాయం మేరకు ఇచ్చిన ఈ తీర్పు అన్ని విధాలా ఎంతో విశుద్ధమైనది.. శ్రేష్టమైనదని చెప్పవచ్చు. ఎన్నికల్లో కులం, మతం, వర్గం పేరిట ఏ అభ్యర్ధి ఓట్లు అడిగినా ప్రజాప్రాతినిధ్య చ ట్టం-1951 లోని 123 (3) సెక్షన్‌ ప్రకారం అది అవినీతి కిందికే వస్తుందని రాజ్యాంగ ధర్మాసనం ఈ సందర్భంగా స్పష్టం చేసింది. 'హిందూత్వ' గురించి ఇప్పటికే చాలా చర్చ జరిగిందని, అందుకే 'ఎన్నికల్లో మతం పేరుతో ఓట్లు అడగవచ్చా-లేదా?'.. అనే అంశానికే పరిమితమై తాము తీర్పు ఇస్తున్నామని పేర్కొంది. మనది లౌకకరాజ్యాంగ విధానం కనుక, మతాన్నీ..రాజకీయాలను కలపరాదని, ఎన్నికలు లౌకిక విధానానికి అనుగుణంగానే జరగాలని తీర్పు చెప్పింది. ఇలాంటి విషయాల్లో లౌకికవాదాన్ని దృష్టిలో పెట్టుకోవాలని, అభ్యర్థి, ఎన్నికల ఏజెంట్‌, ప్రత్యర్థి ఓటర్ల మతాల పేరుతో ఓట్లు కోరడం చట్టం ప్రకారం అవినీతి కిందికే వస్తుందని స్పష్టం చేసింది. అంతేకాదు, ''రాజ్య వ్యవహారాలను మతంతో కలపడానికి వీల్లేదని, లౌకకరాజ్యం ఏ మతంతోనూ గుర్తింపు పొందకూడదని, లౌకిక ప్రక్రియ అయిన ఎన్నికల్లో మతానికి చోటు లేదని''..ఖరాకండిగా చెప్పింది. మతం పూర్తిగా వ్యక్తిగతం అంటూనే సంకుచిత రాజకీయాలతో ఎన్నికల ప్రచారాలు నిర్వహించి అధికార పదవులను అందుకోవడం నేరమేనని ఈ తీర్పు ద్వారా సుస్షష్టం కావడంతో ఈ తీర్పుకు మరింత ప్రాధాన్యత వచ్చినట్లయింది. సంకుచిత రాజకీయ ప్రక్షాళనకు దోహదం చేసేందుకు ఈ తీర్పు ఓ మంచి మార్గం వేసిందనే అభిప్రాయాలు సర్వత్రా వినవస్తున్నాయి. సమాజంలో రానురాను కులమత వర్గ ప్రాంత రాజకీయాలు వేళ్ళూనుకున్న నేటి పరిస్థితుల్లో సుప్రీం తీర్పు ఎంతో ప్రాధాన్యత సంతరించుకున్నదే. అయితే, ఇప్పటికే దేశంలో ప్రత్యేకించి కుల రాజకీయాలు సమాజాన్ని మరింతగా భ్రష్టుపట్టిస్తూనే వున్నాయి. ఇక, మతపరమైన శక్తులతో రాజకీయాలు కలిస్తే ఎంత ప్రమాదమో అందరికీ తెలిసిందే. అందుకే, కులమతాలకు, వర్గాలకు-ప్రాంతాలకు అతీతంగా..సమాజాన్ని మంచిదారిలో.. మహోన్నతమైన రీతిలో తీర్చిదిద్దాలని ఎందరో మహనీయులు కలలు కన్నప్పటికీ, ఆ కలలను సాకారం చేసే దిశలో ఇంతదాకా ఏ ప్రయత్నమూ చేయని దుర్దశలో..ఇలాంటి తీర్పులు ఎంతైనా కనువిప్పు కలిగించేవనడంలో ఎలాంటి సందేహం లేదు. సమాజం పట్ల వ్యక్తిగత బాధ్యత, సమాజసేవాభిలాష, ప్రజల సమస్యలపట్ల అవగాహన, శ్రద్ధ, మంచి ఆదర్శాలు, మానవత్వం..సేవాభావం, నాయకత్వ పటిమ, ఆయా నాయకుల కార్యదీక్షా దక్షత ఇలాంటివన్నిటినీ పరిగణనలోకి తీసుకునే రోజులు పోయి, ఏ కులమో-మతమో ప్రాతిపదికగా ఓట్లు చేజిక్కించుకోవాలనే దుర్గతి రాజకీయాల్లో వచ్చేసింది. ఆ దుస్థితి ఇకనైనా వైదొలగిపోవాలన్నది అందరి ఆకాంక్ష. నేటికీ దేశంలో ఎంతోమంది విద్యాధికులు, అనేక వర్గాలవారు, ఎందరో నాయకులు.. ఉన్నత స్థాయివారు సైతం ఇంకా కులం కుంపట్లలోనే మగ్గి పోతున్నారన్నది బహిరంగ రహస్యమే. ఎంతోకాలంగా కులతత్వంతో రాజకీయాలు సైతం కుళ్ళిపోతూనే వున్నాయి. ఏ కులం వారిని ఎలా ఆకట్టుకోవాలన్నదే ప్రణాళికగా నాయకులు ఎన్నికల రంగంలోకి దిగుతుండడం అలవాటైపోయింది. కొన్నిచోట్ల ఓట్లే కాదు..సీట్లు కూడా కులతత్వంతోనే ముడిపడివుంటా యనే విమర్శలూ లేకపోలేదు. కులాల పేరుతో ప్రజలను రెచ్చగొట్టి ఓట్లు మళ్ళించుకోవడం..కులం గొప్పతో గొప్పనాయకునిగా తమను తామే ముద్రించుకోవడం..తద్వారా ప్రజలను ప్రభావితం చేస్తూ అడ్డదారి రాజకీయాల్లో అందలం ఎక్కాలని చూడడం..ఇవన్నీ సరైన మార్గాలు కానే కాదని నాయకగణం ఈ తీర్పుతోనైనా గుర్తించుకోవాల్సి వుంది.

ఏదేమైనా, కులాలు-మతాలవారీగా ప్రజలను విభజించి పాలించే రాజకీయాలకు ఇక చెల్లుచీటీ ఇస్తూ రాజ్యాంగ ధర్మాసనం ఇచ్చిన తీర్పు సర్వదా శిరోధార్యం. ఈ తీర్పు అందరికీ కనువిప్పు అవుతుందనే ఆశిద్దాం!. ఎవరికి వారు నిబంధనావళిని అనుసరిస్తూ.. స్వచ్ఛంధంగా, నీతినిజాయితీలతో వ్యవహరించిన నాడే జాతి ప్రగతితో పల్లవిస్తుంది. భారతావని ఇకనైనా విభజన రాజకీయాలకు కాక.. విశుద్ధమైన రాజకీయాలకు వేదికగా వుంటూ ప్రపంచానికే ఆదర్శం కావాలి. అందుకు మేలుబాటగా ఇచ్చిన ఈ తీర్పు ఎంతైనా అభినందనీయం.. అందరికీ అనుసరణీయం!...



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com Email This email address is being protected from spambots. You need JavaScript enabled to view it.

newsbottomad

ఎక్కువగా చదివిన వార్తలు

  • నెల్లూరు నగరాభివృద్ధికి... నాలుగు స్థంభాలు
    కన్నతల్లిని జన్మభూమిని ఎప్పుడూ మరచిపోకూడదని మన కేంద్రమంత్రి యం.వెంకయ్యనాయుడు ప్రతి సభలోనూ చెబుతుంటారు. మరి ఎంతమంది ఆ మాటను చెవికెక్కించుకుంటారన్నది వేరే విషయం. కాని ఆయన చెప్పే మాట ప్రతి ఒక్కరికీ వర్తిస్తుంది. కన్నతల్లిని జన్మభూమిని మరువవద్దని ఆయన చెబుతున్న మాటలను…
  • తీరంకు సిఇజడ్‌ హారం
    డాక్టర్‌ వై.యస్‌.రాజశేఖరరెడ్డి పాలనలో జిల్లాలో పారిశ్రామిక ప్రగతి పరుగులు పెట్టింది. కృష్ణపట్నం పోర్టు అత్యంత వేగంగా నిర్మాణం పూర్తి చేసు కుంది. వై.యస్‌. అనే నాయకుడు మర ణించకపోయి వుంటే కృష్ణపట్నం పోర్టు ఈరోజు దేశంలోనే ప్రముఖ పారిశ్రామిక హబ్‌గా అవతరించి…
  • ఆర్టీసీని... ఆధునీకరించడం కాదు... తరలించడమే ఉత్తమం
    నెల్లూరులోని ఆర్టీసీ బస్టాండ్‌కు నాలుగు దశాబ్దాల పైబడిన చరిత్ర ఉంది. అప్పట్లో ఈ బస్టాండ్‌ నగరానికి దూరంగా ఉన్న ట్లుండేది. ఈ నాలుగు దశాబ్దాల కాలంలో నగరం నలువైపులా విస్తరించింది. దీంతో ఆర్టీసీ బస్టాండ్‌ నగరానికి నడిబొడ్డులో వున్నట్లయ్యింది. కొన్నేళ్ల క్రితం…
  • నాయుడుపేట టు పూతలపట్టు... ఆరులైన్లకు ఆమోదం
    ఏపిలోనే అత్యంత రద్దీ ఉన్న రహదారులలో ప్రధానమైనది నాయుడు పేట - బెంగుళూరు రోడ్డు. ఏపి నుండి తమిళనాడు, కేరళ, కర్నాటక రాష్ట్రాలలోని పలు ప్రాంతాలను కలిపే ప్రధాన మార్గమిది. అంతేకాదు, ప్రముఖ ఆథ్యాత్మిక క్షేత్రాలన్నీ కొలువైన రహదారి. శ్రీకాళహస్తి, తిరుమల,…
  • జిల్లాలో వైకాపా... బలముంది... బలమైన నాయకత్వమే కావాల్సివుంది
    రాష్ట్రంలోనే వైయస్సార్‌ కాంగ్రెస్‌పార్టీ బలంగా వున్న జిల్లాల్లో నెల్లూరొకటి. కడప, కర్నూలు తర్వాత నెల్లూరుజిల్లానే వైసిపికి కంచుకోట! ఇంకోరకంగా చెప్పాలంటే ఆ రెండు జిల్లాల్లో వైసిపి నుండి గెలిచిన ఎమ్మెల్యేలు ఎక్కువ మంది తెలుగుదేశంలోకి జంప్‌ అయినా, నెల్లూరుజిల్లాలో మాత్రం ఒకే…

Newsletter