24 February 2017 Written by 

ఆనం ఆటకు చెక్‌

anam brosతెలుగుదేశం, కాంగ్రెస్‌పార్టీ కావొచ్చేమో... చంద్రబాబు నాయుడు మాత్రం వై.యస్‌.రాజశేఖర్‌రెడ్డి కాలేడు... తెలుగుదేశం పార్టీలో చేరిన నాయకులందరికీ ఈ పాటికి ఈ విషయం అర్ధమై ఉంటుంది. ఆనం సోదరులకు కాంగ్రెస్‌ నుండి తెలుగుదేశంలో చేరే ముందే ఈ విషయం తెలిసినా చంద్రబాబుతో వున్నచనువు కొద్ది మా విషయంలో మినహాయింపు ఉంటుందిలే అని అనుకున్నారు. చంద్రబాబు ఎవర్నీ నెత్తికెక్కించుకోడు... ఎవర్ని ఎక్కడ తొక్కాలో అక్కడ తొక్కుతుంటాడు. ఎవరినైనా వాడుకోవడంలో మంచి ఎక్స్‌పర్ట్‌. అతనిముందు రాజకీయాలలో తలపండిన ఆనం సోదరుల ఆటలు సాగడం లేదు. జిల్లా తెలుగుదేశం పార్టీ పెత్తనాన్ని తమ చేతుల్లోకి తీసుకోవాలనుకున్న వారి కలలు నెరవేరడం లేదు.

ఆనం సోదరుల రాజకీయ చరిత్రను ఒక సినిమాగా చూస్తే 60ఏళ్ల చరిత్రను ఒక పార్ట్‌గా తీసుకోవచ్చు, 2014 నుండి ఈ మూడేళ్ళ చరిత్రను రెండోపార్ట్‌గా అనుకోవచ్చు. 2014కు ముందు వాళ్ళు ఏ పార్టీలో వున్నా రాజకీయంగా కింగ్‌లే! క్రిందపడ్డా, నిలబడ్డా ఎప్పుడూ చక్రం మాత్రం తిప్పుతుండేవాళ్ళు. ఎక్కువకాలం వారి రాజకీయ ప్రయాణం కాంగ్రెస్‌పార్టీలోనే కొనసాగింది. మరీ ముఖ్యంగా 1999 నుండి 2014 మధ్యకాలంలో నెల్లూరుజిల్లా కాంగ్రెస్‌లో వారు ఆడిందే ఆట, పాడిందే పాట అన్నట్లుగా సాగింది. వై.యస్‌.తో ఏర్పడ్డ సాన్నిహిత్యంతో జిల్లా కాంగ్రెస్‌లో వారిని తిరుగులేని నాయకులుగా చేసింది. నేదురుమల్లి జనార్ధన్‌రెడ్డి అంతటివాడు అడ్డంపడ్డప్పటికీ 1999లో వివేకాకు నెల్లూరు అసెంబ్లీ టిక్కెట్‌ వచ్చింది. 2004 ఎన్నికలొచ్చేసరికి నేదురుమల్లి అంతటి వాడు నెల్లూరు అభ్యర్థిగా వివేకానే సమర్ధుడు అంటూ కితాబిచ్చే పరిస్థితి వచ్చింది. 2009 ఎన్నికల నాటికి ఆనం సోదరులిద్దరికీ టిక్కెట్లు తెచ్చుకోవడమేకాదు, ఇంకా కొన్ని నియోజకవర్గాల అభ్యర్థుల ఎంపికలో వీరి మాటకు ప్రాధాన్యత ఏర్పడింది. 2004-2009 ఎన్నికల మధ్యలో జిల్లా కాంగ్రెస్‌లో నేదురుమల్లిపై ఆనందే పైచేయి అయ్యింది. ఒకనాడు రాష్ట్ర కాంగ్రెస్‌ పార్టీనే శాసించిన నేదురుమల్లి చివరకు తన వెంకటగిరి సీటుకు మాత్రమే పరిమితమయ్యే పరిస్థితి వచ్చింది. వై.యస్‌. ఇచ్చిన ఫ్రీహ్యాండ్‌తో జిల్లా కాంగ్రెస్‌లో ఆనం సోదరులు తిరుగులేని నాయకులయ్యారు. వై.యస్‌. మరణం తర్వాత కూడా పార్టీలో వారికి అదే ప్రాధాన్యత లభించింది. 2014 ఎన్నికల దాకా జిల్లాలో వారి హవానే సాగింది. ఆ ఎన్నికల తర్వాత ఈ రాష్ట్రంలోనే కాదు, ఇక తమ గుండెల్లోనూ కాంగ్రెస్‌కు స్థానం లేదనుకున్నారు. కాంగ్రెస్‌పార్టీని వదిలేసి తెలుగుదేశంలో చేరారు. ఇక్కడితో సినిమా ఇంటర్వెల్‌ అనుకోవచ్చు.

రెండోపార్ట్‌లో చూస్తే నలుగురు బ్రదర్స్‌లో అప్పటికే ఒక బ్రదర్‌ ఆనం జయకుమార్‌రెడ్డి విడిపోయి వున్నాడు. ఎన్నికలకు ముందు 'జై సమైక్యాంధ్ర' పార్టీలో చేరిన ఆయన, ఎన్నికల తర్వాత ఆదాల ప్రభాకర్‌రెడ్డి నాయకత్వంలో తెలుగుదేశంలోకి మారాడు. మరో తమ్ముడు ఆనం విజయకుమార్‌రెడ్డి తెలుగుదేశంలో చేరిన తన బ్రదర్స్‌తో విభేదించి వైయస్సార్‌ కాంగ్రెస్‌పార్టీలో చేరాడు. ఆనం వివేకా, ఆనం రామనారాయణరెడ్డిలు మాత్రం చంద్రబాబు నాయకత్వాన తెలుగుదేశంతో కొత్త ప్రయాణం మొదలుపెట్టారు.

తెలుగుదేశం కాంగ్రెస్‌ అయ్యింది... అంటే ఇది పాత తెలుగుదేశం కాదు. 1983లో ఆనం కుటుంబమున్నప్పటి తెలుగుదేశం కాదు. ఇక్కడ సీనియార్టీతో పాటు సిన్సియార్టీకి విలువ లేదు. క్యాష్‌పార్టీల హవానే ఎక్కువుగా నడుస్తుంది. ఒకప్పుడు తమ విద్యాసంస్థలలో డెమాన్‌స్ట్రేటర్‌గా పనిచేసి, తమ చేతుల మీదుగా జీతం తీసుకున్న నారాయణ, ఇప్పుడు చంద్రబాబు కుడి భుజం. మంత్రి కూడా! తెలుగుదేశం పార్టీలో తమకు ఏ అవసరం వచ్చినా ఆనం సోదరులు పోయి నారాయణను కలవాల్సివస్తోంది. తమ ముందు చెడ్డీ లేసుకుని తిరిగిన ఎమ్మెల్సీ అభ్యర్థి వేమిరెడ్డి పట్టాభిరామిరెడ్డిని వీరుడు, శూరుడు అంటూ పొగిడి ప్రచారం చేయాల్సి వస్తోంది. కాంగ్రెస్‌లో ఉన్నప్పుడు స్థానిక ఎమ్మెల్సీ అభ్యర్థిని ఆనం సోదరులే నిర్ణయించే పరిస్థితి. ఇప్పుడు తమకు ఎమ్మెల్సీ టిక్కెట్‌ కావాలని చంద్రబాబును అడుక్కునే దుస్థితి. అది కూడా ఆయన చేత కాదు, వీలుకాదు అనిపించుకునే దౌర్భాగ్యం. పార్టీలో మీకంటే మేం సీనియర్లం అంటూ వారిని చూసి మేయర్‌ అబ్దుల్‌ అజీజ్‌ వంటి ఛోటా నాయకులు కూడా కాలరెగరేస్తున్నారు. ఇదంతా ఎలా వుందంటే... 'సమరసింహారెడ్డి' సినిమాలో హీరో బాలకృష్ణ ఒక కాకా హోటల్‌లో కప్పులు కడిగే పనిలో వుంటాడు. అతని ఫ్లాష్‌బ్యాక్‌లోకి వెళితే అరివీరభయంకరమైన ఫ్యాక్షనిస్టన్న మాట! ఆనం రాజకీయ చరిత్ర కూడా ఇక ఆ సినిమాలో ఫ్లాష్‌బ్యాక్‌లాగా ఘనంగా మిగిలిపోతుందేమో?



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com Email This email address is being protected from spambots. You need JavaScript enabled to view it.

newsbottomad

ఎక్కువగా చదివిన వార్తలు

  • నెల్లూరు నగరాభివృద్ధికి... నాలుగు స్థంభాలు
    కన్నతల్లిని జన్మభూమిని ఎప్పుడూ మరచిపోకూడదని మన కేంద్రమంత్రి యం.వెంకయ్యనాయుడు ప్రతి సభలోనూ చెబుతుంటారు. మరి ఎంతమంది ఆ మాటను చెవికెక్కించుకుంటారన్నది వేరే విషయం. కాని ఆయన చెప్పే మాట ప్రతి ఒక్కరికీ వర్తిస్తుంది. కన్నతల్లిని జన్మభూమిని మరువవద్దని ఆయన చెబుతున్న మాటలను…
  • తీరంకు సిఇజడ్‌ హారం
    డాక్టర్‌ వై.యస్‌.రాజశేఖరరెడ్డి పాలనలో జిల్లాలో పారిశ్రామిక ప్రగతి పరుగులు పెట్టింది. కృష్ణపట్నం పోర్టు అత్యంత వేగంగా నిర్మాణం పూర్తి చేసు కుంది. వై.యస్‌. అనే నాయకుడు మర ణించకపోయి వుంటే కృష్ణపట్నం పోర్టు ఈరోజు దేశంలోనే ప్రముఖ పారిశ్రామిక హబ్‌గా అవతరించి…
  • ఆర్టీసీని... ఆధునీకరించడం కాదు... తరలించడమే ఉత్తమం
    నెల్లూరులోని ఆర్టీసీ బస్టాండ్‌కు నాలుగు దశాబ్దాల పైబడిన చరిత్ర ఉంది. అప్పట్లో ఈ బస్టాండ్‌ నగరానికి దూరంగా ఉన్న ట్లుండేది. ఈ నాలుగు దశాబ్దాల కాలంలో నగరం నలువైపులా విస్తరించింది. దీంతో ఆర్టీసీ బస్టాండ్‌ నగరానికి నడిబొడ్డులో వున్నట్లయ్యింది. కొన్నేళ్ల క్రితం…
  • నేలటూరువాసులకు సివిఆర్‌ జ్యోతులు
    ఈ నెల 20వ తేదీన కృష్ణపట్నం పోర్టు సివిఆర్‌ జ్యోతి పథకంలో భాగంగా ముత్తుకూరు మండలం నేలటూరులోని 150మంది మత్స్యకార కుటుంబాల వారికి ఉచితంగా గ్యాస్‌స్టౌలను అందించారు. కేంద్ర పర్యావరణ, అటవీశాఖ, వాతావరణ మార్పు శాఖ అధికారులు దీపక్‌ శ్యామ్యూల్‌, భూమత్‌…
  • నాయుడుపేట టు పూతలపట్టు... ఆరులైన్లకు ఆమోదం
    ఏపిలోనే అత్యంత రద్దీ ఉన్న రహదారులలో ప్రధానమైనది నాయుడు పేట - బెంగుళూరు రోడ్డు. ఏపి నుండి తమిళనాడు, కేరళ, కర్నాటక రాష్ట్రాలలోని పలు ప్రాంతాలను కలిపే ప్రధాన మార్గమిది. అంతేకాదు, ప్రముఖ ఆథ్యాత్మిక క్షేత్రాలన్నీ కొలువైన రహదారి. శ్రీకాళహస్తి, తిరుమల,…

Newsletter