11 March 2017 Written by 

హక్కులకు టాటా... అవస్థల్లో వాటా

womensమార్చి 8

అంతర్జాతీయ మహిళా దినోత్సవం..

ఇది ఎంతో గొప్ప సందర్భం.

మహిళాలోకానికి సాధికారత కల్పించాలన్నదే ఐక్యరాజ్యసమితి ప్రధాన లక్ష్యం. 2030 నాటికి అన్ని రంగాల్లో సమానత సాధించాలన్న ఐరాస ఆశయం ఎంతో గొప్పది. అయితే. మన దేశంలో మాత్రం ఆ పరిస్థితి ఏమాత్రం కనిపించకపోవడమే బాధాకరం. దేశానికి స్వాతంత్య్రం వచ్చి 70 ఏళ్ళవుతున్నా స్త్రీలకు సమానత్వం కాదు కదా..కనీసం స్వేచ్ఛ కూడా లేదు. స్త్రీ విద్య కోసం, సమానహక్కుల కోసం..సమన్యాయం కోసం నేటికీ మహిళాలోకం అలుపెరుగని పోరాటం చేస్తూనే వుంది. మహిళా సాధికారతను సాధించడంలో మన పాలకులు, ప్రభుత్వాలు తీసుకుంటున్న చర్యలు నామమాత్రం. మహిళల జీవనం నిత్యం సమస్యలూ..సవాళ్ళతోనే ప్రారంభం.. దేశంలో రోజూ మహిళల పట్ల జరుగుతున్న అకృత్యాలకు అఘా యిత్యాలకు లెక్కే లేదు. అడుగడుగునా లైంగిక వేధింపులు, రకరకాల అవమానాలు.. అనుమానాలు, మహిళలపై దాడులు, హత్యలు, మానభంగాలు.. దౌష్ట్యాలకు అసలు అంతే వుండడం లేదు. ఆకాశంలో సగం, అవకాశాల్లో సగం, ఉద్యోగాల్లో రిజర్వేషన్లు.. ఆస్తుల్లో వాటాలు.. అభివృద్ధి పథకాల్లో ప్రధాన భాగాలు.. ఇలా చెప్పేవన్నీ మాటల నీటిమూటలే తప్ప, ఆచరణలో ఆడవారికి దక్కే భాగ్యం అంతంత మాత్రమే. భద్రత లేని బతుకులతో, స్వేచ్ఛ లేని జీవితంతో ఎంతోమంది స్త్రీలు సమాజంలో నిత్యం నానా రకాల బాధలు పడుతూనే వున్నారు. చివరికి. కట్టుకున్న భర్తలే కాలయముళ్ళవుతున్న వైనాలు, అబల అని కూడా చూడకుండా, మహిళలపై ఘోరాలకు అంతూపొంతూ వుండడం లేదు. ఒక బిడ్డగా..ఒక అక్కగా..చెల్లిగా..ఇల్లాలిగా..తల్లిగా..స్త్రీ తన జీవిత దశల్లో ఆత్మీయతానురాగబంధాలను పెనవేస్తూ..ప్రేమైకభావంతో కుటుంబ వ్యవస్థను అనుక్షణం కంటికి రెప్పలా కాపాడుకుంటూ వస్తున్నా, కనీస కృతజ్ఞత కూడా లేని దురహంకారంతో, పురుషాధిక్యతతో మగవారు పెడుతున్న రకరకాల గృహహింసలకు కూడా అంతే వుండడం లేదు. కాస్తంత అభిమానంతో ప్రోత్సాహమిస్తే చాలు..అత్యద్భుతమైన ప్రతిభాపాటవాలతో రాణించగల ధీర నారీమణులు ఎందరో వున్నా...అడుగడుగునా వారి ప్రతిభకు అడ్డుకట్ట వేసే మగమహానుభావులకు మనదేశంలో కొదవే లేదు. మహిళలపై అకృత్యాల నివారణకు మహిళా చైతన్యమే సరైన సమాధానం. అయినా, మహిళా రిజర్వేషన్లం టారే కానీ..ఎక్కడున్నాయో అవి. అన్నీ ఆకాశపుష్పాలే!..మహిళాభ్యున్నతికి భలేభలే పథకాలంటారు.. ఏవీ.. అన్నీ నేతిబీరలే. 33 శాతం మహిళా రిజర్వేషన్లలో ఎస్సీఎస్టీ ఓబిసిలకు 20 శాతం రిజర్వేషన్లు కల్పించాలనే డిమాండ్‌కు ప్రధానమైన రాజకీయపార్టీలు ఎలాంటి చొరవ తీసుకోకపోవడం వల్లనే కదా మహిళా బిల్లుకు నేటికీ మోక్షం లేకపోవడం?..మాటలకు చేతలకు పొంతనలేని చేష్టల వల్ల ఎవరికి ప్రయోజనం? మరోవైపు నానాటికీ వ్యాపారసంస్కృతి, పాశ్చాత్య ధోరణులు ప్రబలిపోతూ, అశ్లీల సంస్కృతి వీరవిహారం చేస్తోంది. ఆడపిల్లల బతుకులకు భద్రత కరువైపోయింది. మహిళలకు భద్రత కల్పిస్తామని, మహిళాభ్యున్నతికి అనేక పథకాలు ప్రవేశపెడుతున్నామని పాలకులు, ప్రభుత్వాలు గొప్పలు చెప్పుకుంటున్నా ఆచరణలోకొచ్చేసరికి అన్నీ శూన్యహస్తాలు..శుష్కవాగ్దానాలే. రాత్రనక పగలనక అటు కుటుంబానికి, ఇటు సమాజాభ్యున్నతికి అహరహం కృషిచేసే స్త్రీమూర్తులపై మగరాయుళ్ళ పెత్తనం పెరిగిపోతూనే వుంది. మమతల పందిరి వేసి, కుటుంబాల్లో ప్రేమాభిమానాలకు పాదులు వేసి, సమాజాన్ని.. కుటుంబ వ్యవస్థను అనురాగమయం చేసే త్యాగమయి.. మహిళ. అలాంటి మహిళాలోకానికి ఎన్ని జన్మలెత్తినా మనం రుణం తీర్చుకోలేం. అయినా వారి స్వేచ్ఛకు సంకెళ్ళు వేసి, వారి జీవితాన్ని బందిఖానాగా చేసి వికృతహాసం చేస్తున్నా..నేటికీ ఎందరో మహిళలు అన్నిటినీ మౌనంగానే భరిస్తూ.. తమ జీవితాలను ఆయా కుటుంబాల శ్రేయస్సుకే అర్పిస్తూ తమ గొప్పదనాన్ని చాటుకుంటూనే వున్నారు. 'స్త్రీమూర్తి' అనే అమృతమయమైన పదానికి సార్థకతను చేకూరుస్తూనే వున్నారు. మరోవైపు మహిళలకు సమానావకాశాలు కల్పించడంలో, మహిళాభ్యున్నతికి కృషిచేయడంలో మన ప్రభుత్వాలు ఇంకా సన్నాయినొక్కులు నొక్కు తూనే వున్నాయి. అనేకమంది మహిళామణులు ఎంతో ధైర్యసాహసాలతో, ప్రతిభా పాటవాలతో అనేక రంగాల్లో ముందుకు సాగుతున్నప్పటికీ, మహిళలకు ఆయా రంగాల్లో తగినంత అవకాశాలు కరువవుతూనే వున్నాయి. ముఖ్యంగా నిరుపేదలైన బాలికలు, మహిళలది నిత్యం జీవన పోరాటమే. కార్మికులు, వ్యవసాయ కూలీల పరిస్థితి మరెంతో దయనీయం. ఒకవైపు పేదరికం..మరోవైపు అనారోగ్యం..ఇంకోవైపు కుటుంబ బాధ్యతలు.. మహిళలోకానికి ఈ సమస్యల కొలిమినుంచి విముక్తి ఎప్పుడో?!..

ఏదేమైనా, అటు ప్రభుత్యాలు, పాలకులు..ఇటు కుటుంబసభ్యులు.. అందరూ కలసి మహిళల పట్ల సరైన అవగాహనతో వుండాలి. వారి అభ్యున్నతికి చేయూతనివ్వాలి. అందుకు ముందుగా మగవారు మారాలి...పురుషాధిక్య మనస్తత్వం మారాలి. మహిళల పట్ల సానుకూల దృక్ఫధం అలవరచుకోవాలి. మానవత్వంతో పరిమళిస్తూ.. మహిళలను సాటి మనుషులుగా.. మన తల్లిగా.. చెల్లిగా..ఆత్మీయులుగా.. మానవతామూర్తులుగా భావించి గౌరవించాలి..ఆదరించాలి. వారి అభ్యున్నతికి చిత్తశుద్ధితో బాటలు వేయాలి. అప్పుడే.. అటు మహిళా సాధికారతకైనా..ఇటు మహిళా దినోత్సవాలకైనా.. నిజమైన సార్ధకత! ఆ దిశగా అడుగులు వేద్దాం...!



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com Email This email address is being protected from spambots. You need JavaScript enabled to view it.

newsbottomad

ఎక్కువగా చదివిన వార్తలు

  • రాజకీయమా? రక్త సంబంధమా?
    నెల్లూరుజిల్లాలో బెజవాడ, మేకపాటి, సోమిరెడ్డి, నల్లపరెడ్డి, నేదురుమల్లి వంటి రాజకీయ కుటుంబాలున్నాయి. అన్ని కుటుంబాలలో కూడా పదవుల వద్దో, ఆస్తుల దగ్గరో మనస్పర్ధలు, విభేదాలు వచ్చాయి. సొంత అన్నదమ్ములే విరోధులుగా మారారు. అయితే ఈ కుటుంబాలన్నింటితో పోలిస్తే ఆనం సోదరుల మధ్యే…
  • పంచాయితీలకు ప్రమోషన్‌!
    జిల్లాలో ఇప్పటికే నెల్లూరు కార్పొరేషన్‌గా ఉండగా గూడూరు, కావలి, వెంకటగిరి, సూళ్లూరుపేట, ఆత్మకూరు, నాయుడుపేటలు మున్సిపాల్టీలుగా ఉన్నాయి. వై.యస్‌. రాజశేఖర్‌రెడ్డి హయాంలోనే సూళ్లూరుపేట, ఆత్మకూరు, నాయుడుపేట మేజర్‌ పంచాయితీలను మున్సిపాల్టీలుగా మార్చడం జరిగింది. కాగా, జిల్లాలో మరో 9 మేజర్‌ పంచాయితీలను…
  • చుక్కలు చూపించిన జగన్‌
    ఉత్తరాన నదీ ప్రవాహం, ఈశాన్యంలో నీళ్ళు వంటి పక్కా వాస్తు చూసి చంద్రబాబు అమరావతి రాజధానిని ఎంపిక చేశారు. ఆయన వాస్తు పిచ్చికి పాత రాజధాని హైదరాబాద్‌లోనే కాదు, అమరావతిలోనూ కొన్ని కోట్లు ఖర్చు పెట్టాల్సి వచ్చింది. ఇన్ని కోట్లు ఖర్చుపెట్టి…
  • ఆనంకు 'హై'షాక్‌
    వందేళ్ళకు పైగా చరిత్ర... లక్షలాది మంది విద్యార్థులను తీర్చిదిద్దిన ఘనత... ఒకే ప్రాంగణంలో ఆరో తరగతి నుండి న్యాయవాద విద్య, పీజీ కోర్సుల వరకు... అతి తక్కువ ఖర్చుతో చదువు పూర్తి చేసుకునే వేదిక... నెల్లూరులోని వి.ఆర్‌. విద్యాసంస్థలు... వాస్తవానికి వెంకటగిరి…
  • నెంబర్‌ గేమ్‌లో నెగ్గేదెవరు?
    బేరాలు... రాయబారాలు... క్యాంపులో మందు కంపు... పెరుగుతున్న ఓటు రేటు... ఎత్తులు... పైఎత్తులు... పార్టీ అధినేతల స్వీయ పర్యవేక్షణ... వ్యూహాలు... ప్రతివ్యూహాలతో 'స్థానిక' ఓటర్లకు గాలాలు... మాకు రెండు చేపలు పడ్డాయంటే, మా వలలో మీవి నాలుగు చేపలు పడ్డాయంటూ పోటాపోటీగా…

Newsletter