26 May 2017 Written by 

బ్రిటన్‌పై ఉగ్ర పంజా

london atackఉగ్రవాదానికి ప్రాంతాలతో పనిలేదు..ప్రాణాలు తీయడమే పని. అది ఏ ప్రాంతమైనా సరే, జనంపై పంజా విసరడం, అందినంతమందిని పైశాచికంగా మట్టుబెట్టడం..అదే పెద్ద ఘనకార్యంగా తన భుజాలు తానే చరుచుకోవడం ఉగ్రమూకల నైజం. దేశమేదైనా, ప్రాంతమేదైనా సరే.. ఎక్కడికక్కడ ఆత్మాహుతి దళాలను పంపి, అమాయకులను చంపి వారి నెత్తురుని అత్తరులా చల్లుకొని ఆనందించే రాక్షసత్వమే

ఉగ్రవాదం. ఈ ఉగ్రవాదోన్మాదానికి ప్రపంచవ్యాప్తంగా ఎంతోమంది బలి అయిపోతూనే వున్నారు. ఈ విషసర్పాన్ని అంతం చేస్తామని, ప్రపంచంలో దాని ఉనికే లేకుండా చేస్తామని ఇలాంటి ఘటనలు జరిగినప్పుడల్లా అగ్రరాజ్యాలు భీషణ ప్రతిజ్ఞలు చేస్తున్నా, తీరా ఆచరణలోకి వచ్చేసరికి ఉగ్రవాదం బుసలకు తట్టుకోలేక డీలా పడిపోతున్నాయి.

మొన్నటికి మొన్న ప్రపంచ అగ్రరాజ్యాల్లో ఒకటైన బ్రిటన్‌ పరిస్థితి కూడా ఇదే. బ్రిటన్‌లోని మాంచెస్టర్‌లో ప్రపంచ ప్రఖ్యాత అమెరికన్‌ పాప్‌స్టార్‌ అరియానా గ్రాండే సారధ్యంలో అత్యద్భుతంగా నిర్వహించిన సంగీత విభావరి ప్రాంతంలో మరణమృదంగం మోగించాలని ఇస్లామిక్‌ స్టేట్‌ అనే ఉగ్రవాద సంస్థ వ్యూహం పన్నింది. అనుకున్నదే తడవుగా ఆత్మా హుతి దాడితో ఆ ప్రాంతాన్ని రక్తసిక్తం చేసింది. ఏకంగా 22 మంది ప్రాణాలను బలితీసుకుని, మరో 120 మందిని తీవ్ర గాయాలపాలు చేసి ఉగ్రవాదో న్మాదం వికటాట్టహాసం చేసింది. బ్రిటన్‌పై ఇస్లామిక్‌ స్టేట్‌ జరిపిన తొలి ఆత్మాహుతి దాడి ఇదే. ఈ ఘటనతో అక్కడి ప్రజలు బెంబేలెత్తిపోతున్నారు. ఈ ఉగ్రవాద రక్కసుల వల్ల ప్రపంచంలో ఎక్కడ ఎలాంటి భీభత్సం జరుగుతుందో.. ఎందరు ప్రాణాలు పోగొట్టు కోవాల్సివస్తుందో అర్ధం కాక ప్రపంచ మానవాళి సైతం భయకంపితమవుతోంది. అత్యద్భుతమైన అరియానా గ్రాండే సంగీతం విని తన్మయులై ఆ సంగీత విభావరి పూర్తికాగానే ఆనందోత్సాహాలతో ప్రజలు ఇళ్ళకు తిరిగి బయలుదేరేందుకు బయటకు రాగానే, వేదికకు కొద్దిదూరంలోనే జరిగిన ఈ ఆత్మాహుతి దాడితో ఒక్కసారిగా అక్కడి వాతావరణ మంతా భీభత్సంగా మారిపోయింది. హాహాకారాలతో, ఆర్తనాదాలతో.. అరుపులు కేకలతో ఆ ప్రాంతమంతా దద్దరిల్లిపోయింది. ఈ మారణకాండ ఉదంతం తెలిసి అరియానా గ్రాండే నిలువెల్లా కంపించిపోయింది.. నోట మాట రాక కన్నీటిపర్యంతమైంది. ఈ దాడి జరిగిన మాంచెస్టర్‌ ఎరీనా హాలు యూరప్‌లోనే అతిపెద్దది కావడం విశేషం. ఇందులో ప్రవేశం ఎంతో కట్టుదిట్టంగా వుంటుంది. అయినా ఒకే ఒక్క ఉగ్రవాది అక్కడకు చేరుకుని, ఆత్మాహుతి దాడి చేయడానికి ఆ ప్రాంతంలోకి అడుగుపెట్టగలిగాడంటే ఉగ్రవాదులు ఎంత పక్కా వ్యూహంతో వుంటారో తేటతెల్లమవుతోంది. ఉగ్రవాదం పట్ల ఏ ప్రాంతం వారైనా సరే, ఏమాత్రం ఏమరుపాటుగా వున్నా క్షణాల్లోనే ఎంత ఘోరం జరిగిపోతుందో ఈ సంఘటన ప్రపంచానికి చాటి

చెప్తోంది. అందులోనూ ఈ సంగీత విభావరికి వచ్చిన జనమంతా అత్యధికశాతం మంది యువకులు.. చిన్నారులే. అందులోనూ, అరియానా గ్రాండే అంటే ఎంతో అభిమానం కలిగిన ఎనిమిదేళ్ళ చిన్నారి సఫీ రోజ్‌ ఆ పాటలు వినేందుకు వచ్చింది. గ్రాండే సంగీతం విని ఎంతో ఆనందించి, చిరునవ్వులతో బయటకు వస్తుండగా ఈ భయంకరమైన ఉగ్రదాడి జరగడం.. ఆ చిన్నారి కూడా క్షణాల్లోనే ఈ దాడికి బలి కావడం... ఎంత దారుణం! ఆ చిన్నారి మరణంతో పాటు, ఈ దుర్ఘటన ప్రపంచ ప్రజలను కంటతడి పెట్టించింది. బిడ్డలను కోల్పోయిన తల్లిదండ్రులు, తల్లిదండ్రులను కోల్పోయిన బిడ్డలు, ఆత్మీయులను సహచరులను కోల్పోయినవారి వేదనా రోదనలతో...ఆ ప్రాంతం శోకసంద్రంగా మారింది.

అయినా, ఎవరెంతగా రోదించినా.. ఎవరెంత కన్నీరు కార్చినా, ఎంతమంది ప్రాణాలు కోల్పోయినా ఉగ్రవాద రాక్షసమూకలకు లెక్కే లేదు. ఆ కిరాతకులకు కావాల్సింది కూడా ఇలాంటి రోదనలే. తమ

ఉన్మాదానికి ఎంతమంది బలైతే అంత సంతోషం ఆ రాక్షసులకు. ఒక్క బ్రిటన్‌లోనే కాదు, దాదాపు అన్నిదేశాల్లోనూ, అన్ని ప్రాంతాల్లోనూ..ముఖ్యంగా జనం ఎక్కడ ఆనందంగా వుంటే అక్కడంతా

ఉగ్రదాడులకు తెగబడుతూ వారు తమ రాక్షసత్వం చాటుకుంటూనే వున్నారు... ప్రపంచాన్ని నిత్యం భయకంపితం చేస్తూనే వున్నారు. రెండేళ్ళ క్రితం ఫ్రాన్స్‌లో సాకర్‌పోటీ సమయంలో ఉగ్రవాదులు దాడులుచేసి 128 మందిని హతమార్చారు. గతంలో స్పెయిన్‌లోనూ రైళ్ళలో బాంబులు పేల్చి 200 మంది ప్రాణాలు తీశారు. ఉగ్రవాదుల దాడుల లెక్కవేసు కుంటూపోతే లెక్కకే అందనంతగా వుంటోంది. మాంచెస్టర్‌లో ఈ పైశాచికత్వం తమదేనని, 'మీ పిల్లలను చంపేశాం..ఇంకా చంపుతాం' అంటూ ఐఎస్‌ ప్రకటించడం చూస్తుంటే, ఆ ఉగ్రవాద రక్కసి ఎంత నీచమైనదో..ఎంతగా బరితెగించివుందో.. ప్రపంచా నికి ఎంత ప్రమాదకారిగా మారిందో అర్ధమవుతుంది. ఈ ఆధునిక యుగంలో శాస్త్ర సాంకేతిక పరిజ్ఞానం ఎంతో విస్తరించిపోతోందని ప్రపంచం సంబరపడిపోతుంటే, మరోవైపు ఆ సాంకేతిక విజ్ఞానాన్నే ఉగ్రవాదులు అందిపుచ్చుకుని ఇంటర్‌నెట్‌, యూట్యూబ్‌, వాట్సాఫ్‌, ఫేస్‌బుక్‌ తదితర మాధ్యమాల్లో ఉగ్రవాదాన్ని ప్రచారం చేసుకుంటున్నారు. తద్వారా ప్రపంచమంతా విషబీజాలు నాటుతున్నారు.

ప్రపంచవ్యాప్తంగా ఎంతోమందిని పొట్టనపెట్టుకుంటూ అమాయక ప్రజల ఉసురుపోసుకుంటున్న ఈ ఉగ్రవాదపు విషవృక్షాన్ని కూకటివేళ్ళతో సహా కూల్చివేసి ప్రపంచానికి శాంతిని..కాంతిని అందించే రోజు ఎప్పుడు వస్తుందోనంటూ ప్రపంచ మానవాళి అంతా నిరీక్షిస్తూనే వుంది. ప్రధాని మోదీ చెప్పినట్లు, ప్రపంచదేశాలన్నీ ఒకేవేదిక మీదకు వచ్చి ఉగ్రవాదంపై సమిష్టిపోరుకు సమాయత్తమైతే తప్ప ఈ ఉగ్ర వాదం పీడ విరగదు. అందుకు ప్రపంచవ్యాప్తంగా వున్న మేధావులు..దేశాధినేతలంతా కలసిరావాలి..

ఉగ్రవాదం పీచమణచడమే తక్షణ కర్తవ్యంగా.. అన్ని దేశాలు కలసి తగు కార్యాచరణ పథకంతో ముందుకు రావాలి. అప్పుడే ఈ పిశాచి పీడ విరగడవుతుంది. ఆరోజు త్వరలోనే వస్తుందని ఆశిద్దాం!...



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com Email This email address is being protected from spambots. You need JavaScript enabled to view it.

newsbottomad

ఎక్కువగా చదివిన వార్తలు

  • ఉదయగిరిలో... 'రెడ్డి' కోసం 'దేశం' అన్వేషణ
    రాజకీయ చైతన్యానికి పేరుపడ్డ నియోజకవర్గంలో రాజకీయ పార్టీలకు గెలుపు పెద్దసవాల్‌! పార్టీ ప్రభంజనాల కంటే పోటీచేసే అభ్యర్థి ప్రభావమే ఇక్కడ ఓటర్లపై బలంగా వుంటుంది. అభ్యర్థి సమర్ధత, వ్యక్తిత్వాన్ని బట్టే ఇక్కడ గెలు పోటములుంటాయి. గత మూడున్నర దశాబ్దాల రాజకీయ చరిత్రను…
  • 'నిప్పో'కు రైట్‌ రైట్‌
    గత కొద్దికాలంగా రాజకీయ నాయకుల నోళ్ళలో నానుతూ రాజకీయ అంశంగా మారిన 'నిప్పో' పరిశ్రమకు సంబంధించిన 13.02 ఎకరాల భూమి కన్వర్షన్‌కు సంబంధించిన అంశం ఎట్టకేలకు నెల్లూరు నగరపాలక సంస్థ ఆమోదం పొందింది. 12వ తేదీ జరిగిన కార్పొరేషన్‌ కౌన్సిల్‌ సమావేశంలో…
  • రెండు నెలల్లో... ట్రెండ్‌ మారింది
    రాజకీయాలలో పరిస్థితులు తారుమారు కావడానికి ఎంతో కాలం పట్టదు. నాలుగేళ్ళ పదినెలలు సమర్ధవం తంగా పని చేసిన ఒక ప్రభుత్వం ఒక చిన్న తప్పు చేస్తే ఒక్క నెలలోనే గబ్బు పట్టొచ్చు. దాని మూలంగానే ఎన్నికల్లో ఓడిపోవచ్చు. నాలుగేళ్ళ పది నెలల…
  • ఆ ఒక్కడే వణికిస్తున్నాడు!
    నాలుగు దశాబ్దాల రాజకీయ అనుభవం... ముఖ్యమంత్రిగా 13ఏళ్ళ సర్వీసు... రెండుసార్లు మంత్రి... ఏడుసార్లు ఎమ్మెల్యే... జాతీయ రాజ కీయాలలో గిర్రున చక్రం తిప్పిన నేర్పరితనం... యునైటెడ్‌ ఫ్రంట్‌ కన్వీనర్‌... ఇన్ని వున్న చంద్రబాబునాయుడును నిండా 45ఏళ్ల వయసుండని వై.యస్‌. జగన్మోహన్‌రెడ్డి ముప్పతిప్పలు…
  • 'ఆనం' సరే.. మరి ఆదాల...?
    ఇది నిజంగా ఆశ్చర్యం గొలిపే పరిణామం. నెల్లూరుజిల్లాలో ''ఆనం'' రాజకీయ ప్రస్థానంలో ఇదో అనూహ్య మజిలి. తెలుగుదేశం ఆ తరువాత కాంగ్రెస్‌ మళ్ళీ తెలుగుదేశం ప్రస్తుతం వై.యస్‌.ఆర్‌ కాంగ్రెస్‌పార్టీ. జిల్లాలో 'ఆనం' అంటే బలమైన పేరుంది. ఆనం వర్గం అంటూ వారికి…

Newsletter