30 June 2017 Written by 

ఈ బంధం... మరింత ధృఢంగా...

modiప్రపంచంలోనే రెండు అతిపెద్ద ప్రజాస్వామ్యదేశాల అధినేతలు ఎంతో ఆనందంతో.. ఆత్మీయతతో కలుసుకుని పరస్పరం గౌరవం, ప్రేమాభిమానాలను పంచుకున్న దృశ్యం.. ఎంతైనా అపూర్వం, చరిత్రాత్మకం. భారత ప్రధాని నరేంద్రమోడీ అమెరికా పర్యటన సందర్భంగా, అగ్రరాజ్యమైన అమెరికా అధ్యక్షుడు డొనాల్డ్‌ ట్రంప్‌, మోడీని ఘనంగా స్వాగతించి.. చిరునవ్వులు చిందిస్తూ కరచాలనం చేసి ఆత్మీయంగా ఆలింగనం చేసుకోవడం, పరస్పర ప్రేమానుబంధంతో ఇరువురు దేశాధినేతలు సంతోష కరమైన వాతావరణంలో ఇరుదేశాల ప్రగతికి దోహదం చేసే అనేకవిషయాలు ముచ్చటించుకోవడం విశేషం. అగ్రరాజ్యమైన అమెరికా నుంచి గతంలో ఎన్నడూ లేనివిధంగా భారత ప్రధాని నరేంద్రమోడీకి శ్వేతసౌధంలో ఎంతో ఘనంగా.. ఆత్మీయంగా ఘనస్వాగతం లభించడం.. ఓ అద్భుత ఘట్టమనే చెప్పవచ్చు.

పొరుగుదేశాల్లోకి ఉగ్రవాదాన్ని ఎగుమతి చేస్తున్న పాకిస్తాన్‌ క్షుద్ర వ్యూహాలను ఈ సందర్భంగా భారత్‌ అమెరికాలు తీవ్రంగా గర్హించడం, సీమాంతర ఉగ్రవాదానికి తన భూభాగాన్ని ఎవరూ ఉపయో గించుకోకుండా చూసుకోవాలని పాక్‌కు సూచించడం, ఉగ్రమూకలను ఉపేక్షిస్తే సహించేది లేదంటూ హెచ్చ రించడం ద్వారా భారత్‌-అమెరికాలు ఉగ్రవాదంపై ఉమ్మడిపోరుకు మరింత సంకల్పదీక్షతో కంకణం కట్టుకున్నట్లే. దీంతోపాటు అనేక అంశాలపై సాను కూల చర్చల ద్వారా మోడీ అమెరికాతో మైత్రీభావాన్ని మరింతగా పెంపొందించడం విశేషం. అదేవిధంగా అమెరికా అధ్యక్షుడు ట్రంప్‌ కూడా మోడీ పట్ల ఎంతో ఆదరణ చూపడం హర్షదాయకం. మోడీ రాక కోసం శ్వేతసౌధంలో స్వాగతం పలికేందుకు తామంతా ఎదురుచూస్తున్నట్లు అమెరికా అధ్యక్షుడు డొనాల్డ్‌ ట్రంప్‌ ముందస్తుగానే ట్వీట్‌ చేయడం దగ్గరనుంచి మోడీ అమెరికా పర్యటన పూర్తయ్యేదాకా ట్రంప్‌- మోడీల ఆత్మీయతానుబంధం విశ్వవ్యాప్తంగా అందరినీ మంత్రముగ్ధుల్ని చేసిందంటే అతిశయోక్తి కాదు. అమెరికా అధ్యక్షునిగా డొనాల్డ్‌ ట్రంప్‌ బాధ్యతలు స్వీకరించాక తొలిసారిగా ఆ దేశ పర్యటనకు వెళ్ళిన ప్రధాని మోడీ రాకపట్ల ట్రంప్‌, ఆయన సతీమణి మెలానియా ఎంతో ఆత్మీయత వ్యక్తం చేయడమే కాక, మోడీ తనకు అసలైన మిత్రుడని, ఒక నిజమైన మిత్రుడితో ముఖ్యమైన వ్యూహాత్మక అంశాలను చర్చించబోతున్నామని ట్రంప్‌ ట్వీట్‌ చేయడం ఎంతో విశేషం. ఒక్క మాటలో చెప్పాలంటే భారత ప్రధాని మోడీకి అమెరికాలో అంచనాలకు మించిన ఆదరణే లభించింది. ఈ పరస్పర స్నేహానుబంధమే ఇరుదేశాల సుదృఢ మైత్రి మరింత బలోపేతం అయ్యే దిశగా సాగింది.

అంతేకాదు, పాక్‌ ప్రేరేపణతో ఉగ్రకార్యకలాపాలు నిర్వహిస్తున్న కశ్మీర్‌ ఉగ్రవాద సంస్థ హిబ్జుల్‌ ముజాహిదీన్‌ అధినేత సయ్యద్‌ సలాహుద్దీన్‌ను అంతర్జాతీయ ఉగ్రవాదిగా అమెరికా విదేశీవ్యవహారాలశాఖ ప్రకటించడం, మోడీ అమెరికాలో అడుగుపెట్టకముందే ఈ ప్రకటన రావడం మోడీకి అమెరికా ఇచ్చిన ఒక ముందస్తు చిరుకానుకే అనుకోవచ్చు. భారత్‌, అమెరికా రెండూ ఉగ్రవాద ముప్పును ఎదుర్కొంటున్న దేశాలే కనుక, ప్రపంచంలో ఉగ్రవాదం ఎక్కడ, ఏ రూపంలో వున్నా నిలువునా పాతరేసేందుకు రెండు దేశాలూ ఈ సందర్భంగా కంకణం కట్టుకోవడం అన్నిటికన్నా ఆనందదాయకమైన ముఖ్యవిశేషం. అందుకే, భారత్‌ అమెరికాల మధ్య వున్న వ్యూహాత్మక సంబంధాల తర్కం వివాదరహితమైనదని, ప్రపంచాన్ని

ఉగ్రవాదం, విప్లవభావజాలం, సంప్రదాయేతర దాడుల నుంచి రక్షించడంపై రెండు దేశాలూ అత్యంత శ్రద్ధ తీసుకుంటున్నాయని, అమెరికాకు చెందిన వాల్‌స్ట్రీట్‌ జర్నల్‌ దినపత్రికలో ప్రధాని మోడీ రాసిన వ్యాసంలో పేర్కొన్నారు. అగ్రరాజ్యమైన అమెరికా, అతిపెద్ద ప్రజాస్వామిక దేశమైన భారత్‌ల మధ్య స్నేహానుబంధం వృద్ధి చెంది భాగస్వామ్య స్థాయికి ఎదిగిందని, పౌర అణురంగం, రక్షణ రంగం, శాస్త్ర సాంకేతిక రంగాల్లోను, ఆర్ధిక వాణిజ్య రంగాల్లోనూ సహకారానికి, ఉగ్రవాదంపై పోరు విషయంలోనూ ఉమ్మడిగా కలసి పనిచేసేందుకు మార్గం సుగమమైందని, ఈ రెండు దేశాలు కలసి పనిచేస్తే ప్రపంచానికెంతో ప్రయోజనకరమని ప్రధాని మోడీ స్పష్టం చేయడం ప్రపంచవ్యాప్తంగా అందరి దృష్టినీ ఆకర్షిస్తోంది. ప్రపంచాన్ని వణికిస్తున్న ఉగ్రవాదాన్ని అంతమొందించే విషయంలో ఇరుదేశాలు కృత నిశ్చయంతో వున్నాయని స్పష్టంగా చెప్పడం ద్వారా ఉగ్రవాదులకు ప్రధాని మోడీ గట్టి హెచ్చరికే చేశారు. ఇలా..అడుగడుగునా మంచి నిర్ణయాలతో, భారత్‌- అమెరికాల మధ్య సుదృఢబంధాన్ని పెనవేస్తూ మోడీ పర్యటన ఎంతో హూందాగా సాగింది. ప్రధాని మోడీకి అమెరికా అధ్యక్షుడు ఇచ్చిన అపూర్వమైన గౌరవ మర్యాదలు, ఆత్మీయతతో అతిథ్యం ఇచ్చిన తీరు ప్రపంచంలో మనదేశం ప్రాధాన్యత బాగా పెరుగు తోందనడానికి చక్కని నిదర్శనమనే అనుకోవచ్చు. అయితే, అమెరికాలో భారతీయులకు సమస్యగా మారిన హెచ్‌1 బి వీసాలపైనా, భారతీయుల ఉద్యో గాలపైనా ఈ సందర్భంలో ఇరుదేశాల నేతల మధ్య చర్చకు వచ్చి ఏదైనా వెసులుబాటు కలుగుతుందేమో అని ఆశించినవారి ఆశలు నిరాశలే అయ్యాయి. ఈ విషయం అసలు ప్రస్తావనకే రాకపోవడం నిరాశాజనకమే అయింది. అయితే, భవిష్యత్తులోనైనా ఇరు దేశాధీశుల సంప్రదింపుల్లో ఈ సమస్య ఒక కొలిక్కివస్తుందని అందరూ ఆశతో ఎదురుచూస్తున్నారు.

ఏదేమైనా, అమెరికా అధ్యక్షుని సాదరపూర్వక ఆదరణతో, అనేక అంశాల పట్ల ఇరుదేశాల సౌహార్ద్ర పూరితమైన చర్చలతో ప్రధాని మోడీ అమెరికా పర్యటన ఆసాంతం దిగ్విజయమైంది. అమెరికాతో మన అనుబంధం మరింత గాఢంగా పెనవేసుకున్నట్లయ్యింది. ఈ పరిణామాలు భారత్‌కు ఎంతో శ్రేయోదాయకం.. అంతేకాదు, భవిష్యత్‌లోనూ ఈ స్నేహానుబంధం భారత్‌కు ఎంతైనా... శుభదాయకమే నని వేరే చెప్పనక్కర లేదు.



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com Email This email address is being protected from spambots. You need JavaScript enabled to view it.

newsbottomad

ఎక్కువగా చదివిన వార్తలు

  • ఉదయగిరిలో... 'రెడ్డి' కోసం 'దేశం' అన్వేషణ
    రాజకీయ చైతన్యానికి పేరుపడ్డ నియోజకవర్గంలో రాజకీయ పార్టీలకు గెలుపు పెద్దసవాల్‌! పార్టీ ప్రభంజనాల కంటే పోటీచేసే అభ్యర్థి ప్రభావమే ఇక్కడ ఓటర్లపై బలంగా వుంటుంది. అభ్యర్థి సమర్ధత, వ్యక్తిత్వాన్ని బట్టే ఇక్కడ గెలు పోటములుంటాయి. గత మూడున్నర దశాబ్దాల రాజకీయ చరిత్రను…
  • 'నిప్పో'కు రైట్‌ రైట్‌
    గత కొద్దికాలంగా రాజకీయ నాయకుల నోళ్ళలో నానుతూ రాజకీయ అంశంగా మారిన 'నిప్పో' పరిశ్రమకు సంబంధించిన 13.02 ఎకరాల భూమి కన్వర్షన్‌కు సంబంధించిన అంశం ఎట్టకేలకు నెల్లూరు నగరపాలక సంస్థ ఆమోదం పొందింది. 12వ తేదీ జరిగిన కార్పొరేషన్‌ కౌన్సిల్‌ సమావేశంలో…
  • రెండు నెలల్లో... ట్రెండ్‌ మారింది
    రాజకీయాలలో పరిస్థితులు తారుమారు కావడానికి ఎంతో కాలం పట్టదు. నాలుగేళ్ళ పదినెలలు సమర్ధవం తంగా పని చేసిన ఒక ప్రభుత్వం ఒక చిన్న తప్పు చేస్తే ఒక్క నెలలోనే గబ్బు పట్టొచ్చు. దాని మూలంగానే ఎన్నికల్లో ఓడిపోవచ్చు. నాలుగేళ్ళ పది నెలల…
  • ఆ ఒక్కడే వణికిస్తున్నాడు!
    నాలుగు దశాబ్దాల రాజకీయ అనుభవం... ముఖ్యమంత్రిగా 13ఏళ్ళ సర్వీసు... రెండుసార్లు మంత్రి... ఏడుసార్లు ఎమ్మెల్యే... జాతీయ రాజ కీయాలలో గిర్రున చక్రం తిప్పిన నేర్పరితనం... యునైటెడ్‌ ఫ్రంట్‌ కన్వీనర్‌... ఇన్ని వున్న చంద్రబాబునాయుడును నిండా 45ఏళ్ల వయసుండని వై.యస్‌. జగన్మోహన్‌రెడ్డి ముప్పతిప్పలు…
  • 'ఆనం' సరే.. మరి ఆదాల...?
    ఇది నిజంగా ఆశ్చర్యం గొలిపే పరిణామం. నెల్లూరుజిల్లాలో ''ఆనం'' రాజకీయ ప్రస్థానంలో ఇదో అనూహ్య మజిలి. తెలుగుదేశం ఆ తరువాత కాంగ్రెస్‌ మళ్ళీ తెలుగుదేశం ప్రస్తుతం వై.యస్‌.ఆర్‌ కాంగ్రెస్‌పార్టీ. జిల్లాలో 'ఆనం' అంటే బలమైన పేరుంది. ఆనం వర్గం అంటూ వారికి…

Newsletter