13 October 2017 Written by 

'తండ్రి'ని వీడి... 'తల్లి' వద్దకు సత్యకుమార్‌

satya kuగత 24 సంవత్సరాలుగా వెంకయ్యకు తోడుగా ఆయన నీడగా నిత్యం ఆయనను వెన్నంటి వుండిన ఆయన వ్యక్తిగత కార్యదర్శి సత్యకుమార్‌ భారత ఉపరాష్ట్రపతి ప్రత్యేక అధికారిగా తన పదవికి రాజీనామా చేశాడు. తండ్రి లాంటి పెద్దాయనను వదిలి ఆయనిప్పుడు తల్లి లాంటి పార్టీ సేవకు శ్రీకారం చుట్టాడు. పార్టీకి సేవ చేయాలి, పార్టీ కోసం పరితపించాలి అన్న సత్య మనోగతాన్ని గమనించిన భారతీయ జనతాపార్టీ జాతీయ అధ్యక్షుడు అమిత్‌షా అక్టోబర్‌ 1వ తేదీ సత్యకుమార్‌ను పిలిపించి పార్టీ కార్యకలాపాలలో భాగస్వామ్యం కావాలని ఆహ్వానించడంతో సత్యకుమార్‌ ఇప్పుడు పూర్తిస్థాయి భారతీయ జనతాపార్టీ కార్యకర్తగా అవతరించాడు.

అక్టోబర్‌ 2వ తేదీ నుండి భారతీయ జనతాపార్టీ ఆధ్వర్యంలో కేరళలో ప్రారంభమైన ''జనరక్షన్‌ యాత్ర'' సమన్వయకర్తగా వ్యవహరించవలసిందిగా అమిత్‌షా కోరడంతో వెంటనే వెంకయ్యనాయుడిని కలిసి ఆయన ఆశీస్సులు తీసుకుని 'కేరళ' వెళ్ళిపోయాడు.

కేరళకు జాతీయ స్థాయి నాయకులను రప్పించడం, స్థానికంగా వున్న నేతలు, కార్యకర్తలతో సమావేశమై కార్యక్రమాన్ని సజావుగా నడిపించడం, సమన్వయ పరచడంతో పాటుగా మీడియా వ్యవహారాలను చూసే బాధ్యతల్లో ప్రస్తుతం 'సత్య' తలమునకలై వున్నాడు.

వెంకయ్యనాయుడిని వీడి తాను పార్టీ సేవకై వెళ్లవలసిన తరుణంలో ''సామాజిక మాధ్యమంలో'' సత్యకుమార్‌ ఆంగ్లంలో పోస్ట్‌ చేసిన ''అంతరంగాన్ని'' 'లాయర్‌' పాఠకుల కోసం తెలుగులో తర్జుమా చేసి యధావిధిగా అందిస్తున్నాం.

సత్య అంతరంగం ఆయన మాటల్లోనే...

జీవితం అంటే ఎంపిక ద్వారా నిర్ణయాలు తీసుకోవడమే. నా జీవితంలో క్లిష్టమైన సమయాలలో ప్రతిసారీ ఎన్నుకోవడం ద్వారా నేను నిర్ణయం తీసుకోవలసి వచ్చింది. నేను ఎన్నుకున్న ప్రతి మార్గం సరైనదే అని కాలం రుజువు చేసింది. అలా ఎంపిక చేసుకుని తీసుకున్న నిర్ణయాలలో ఓ గొప్ప నిర్ణయమే ప్రస్తుత భారత ఉపరాష్ట్రపతి వెంకయ్యనాయుడి గారితో నా ప్రస్థానానికి నాంది. దాదాపు పాతికేళ్ల పాటు ఆయనతో నా ప్రయాణం, ఆయనతో మెలిగిన సుదీర్ఘ అనుభవం నా వ్యక్తిత్వంలోను, నా మనస్తత్వం లోనూ ఎన్నో మంచి మార్పులకు దోహదం చేసింది. ఆయనతో గడిపిన అమూల్యమైన సమయాన్ని వర్ణించడానికి నా దగ్గర మాటలు లేవు.

క్రమశిక్షణ, కష్టపడి అనుకున్నది సాధించడం వంటి అంశాలను ఆయనలో దగ్గరగా చూసి ఎన్నో విషయాలను నేర్చుకుని నన్ను నేను మనిషిగా మలచుకున్నాను. ఈరోజు నేను ఏ ఉన్నత స్థితిలో వున్నా నా అభ్యున్నతికి ఈనాటి నా ఈ స్థితికి ముమ్మాటికీ ఆయనే నాకు స్ఫూర్తి. నేను బట్రాజును కాదు.. నాకు పొగడ్తలు రావు, కాని ఒక్క విషయం మాత్రం చెప్పగలను. ఆయన గురించి ఎవరో ఒక్క మాటలో చెప్పమంటే ఇలా చెప్పినట్లు గుర్తు... ''నేను పెద్దగా మతతత్వవాదిని కాదు, గుళ్ళు గోపురాలకు పెద్దగా వెళ్ళను, అయితే ఎందుకంటే నిత్యం నా కళ్లెదురుగా వుండే నాయుడు గార్నే నేను దేవుడిగా చూసేవాడిని, అందుకే ఆయన నాకు 'కనిపించే దైవం'''.

గత వారం నేనో కష్టతరమైన నిర్ణయం తీసుకోవలసి వచ్చింది. రాజకీయాలలో చురుకైన పాత్ర పోషించాలని నిర్ణయించు కున్నాను. ఈ తరుణంలో భారత ఉపరాష్ట్రపతికి ప్రత్యేక అధికారిగా నా పదవికి రాజీనామా చేయవలసి వచ్చింది. నా అభిప్రాయాన్ని, నిర్ణయాన్ని ఆయనకు చెప్పవలసి వచ్చింది. నా జీవితంలో ఇంతటి ఇబ్బందికర పరిస్థితి ఎప్పుడు నాకు రాలేదు. ఆయన ఎంతో అభిమానంతో నా నిర్ణయాన్ని అర్ధం చేసుకుని అందుకుగల కారణాలను కూడా అవగతం చేసుకుని నన్ను ఆశీర్వదించారు. ఆ వెంటనే నా రాజీనామా ఆమోదించడం నేను ప్రత్యేక అధికారి పదవి నుండి తప్పుకోవడం జరిగిపోయాయి.

నేను ఇప్పుడు భారతీయ జనతాపార్టీకి అంకితభావం కలిగిన ఓ కార్యకర్తని. నేను కళాశాల విద్యార్థిగా వున్న రోజుల నుండే నాకు పార్టీతో అనుబంధం ఏర్పడింది. అప్పట్లో నేను చిత్తశుద్ధి కలిగిన ఏబివిపి కార్యకర్తని. వెంకయ్యనాయుడు గారిని తొలిసారిగా జాతీయ ప్రధాన కార్యదర్శిగా భారతీయ జనతా పార్టీ నియమించినప్పుడు, ఆయన తన కోసం అలాగే పార్టీ కోసం పూర్తి సమయం పనిచేయగల ఓ సమర్ధవంతమైన ఏబివిపి కార్యకర్త కోసం వెతుకుతున్నారు. ఆ సమయంలో నా అదృష్టం కొద్ది ఆయన కళ్ళల్లో నేను పడడం, వెంటనే ఆయన నన్ను తన దగ్గర చేర్చుకోవడం జరిగిపోయింది. ఈ అనుబంధం, ఆత్మీయ బంధం దాదాపు పాతికేళ్ల పాటు కొనసాగింది. ఈ రెండున్నర దశాబ్దాల కాలంలో నేను ఎన్నో విలువైన విషయాల్ని నేర్చుకుని నా జీవితాన్ని మలుచుకున్నాను. ఈ సుదీర్ఘ ప్రయాణంలో సంస్థాపరంగా కానీ, పార్టీ పరంగా కానీ, పార్లమెంటు వ్యవహారాలలో కానీ, ప్రభుత్వ సంబంధిత పనులలో కానీ లేదా ఆయన వ్యక్తిగత విషయాలలో కానీ నాకు చేతనైన వరకు శక్తివంచన లేకుండా పనిచేసి ఆయనకు ఉపక రించడంలో నా బాధ్యతను ఎప్పుడూ విస్మరించలేదు. ఇక నేనిప్పుడు నా మాతృ సంస్థకు వచ్చేసాను. వెంకయ్యగారి ఆశీస్సులతో పూర్తిస్థాయి కార్యకర్తగా పని చేయాలనుకుంటున్నాను.

''కృతజ్ఞత అన్నది ఓ అనుభూతి, అది ఓ భావోద్వేగంతో కూడిన మాటలలో చెప్పలేని భావన''. ఎంతో కృతజ్ఞతతో నేను ఆయనకి రుణపడి వున్నాను. ఈరోజు నా ఈ ఉన్నతికి ఎన్నటికీ కారణం ఆయనే. నేనెప్పటికీ ఆయనకి బద్దుడనై వుంటాను.

ఉషమ్మ గారు, హర్ష, రాధమ్మ, దీపమ్మ, వెంకట్‌ గారు, ఇతర కుటుంబసభ్యులతో పాటు నాయుడు గారి మిత్రులు, పార్టీ సభ్యులు, సహచరులు అందరూ నన్నెప్పుడూ ఓ కుటుంబ సభ్యుడిగానే చూశారు. అన్ని వేళల్లో వారందించిన మద్దతు, స్ఫూర్తి ప్రతి క్లిష్ట సమయంలో ఇచ్చిన చేయూత నా జీవితంలో విలువైనవి. వారి ప్రేమానురాగాలతో తన్మయత్వం చెందాను. నా హృదయాంతరాల్లో నుండి వారందరికీ నా ధన్యవాదాలు. నాకు పిల్లలతో గట్టి బంధం వుంది. విష్ణు, నిహారిక, సుష్మ, వైష్ణవి మేమందరం మిత్రుల్లా వుండేవాళ్ళం. ఒకరి అనుభూతులను ఒకరం పంచుకునేవాళ్ళం. ఎంతో సహజంగా కలిసిపోయే వాళ్ళం. కొలబద్దత లేని వారి ప్రేమాభిమానాలు ఎన్నోసార్లు నా హృదయాన్ని తాకాయి. వారందరికీ నా హృదయపూర్వక ఆశీస్సులు.

నాయుడు గారు ఆయన అమూల్యమైన ఆశీస్సులతో ఇన్నాళ్ళు నన్ను ముందుకు నడిపించారు. ఒక స్ఫూర్తి ప్రదాతగా, ఒక దిక్సూచిగా, ఓ మార్గదర్శకుడిలా నాకు దశా దిశా నిర్దేశించారు. ఆయనకి ఆయురారోగ్యాలతో కూడిన నిండు జీవితం ప్రసాదించాలని, ఆ కుటుంబంలో సుఖసంతోషాలు వెల్లివిరియాలని ఆ భగవంతుని ప్రార్థిస్తున్నాను.

- వై.సత్యకుమార్‌

భారతీయ జనతాపార్టీ కార్యకర్త.



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com Email This email address is being protected from spambots. You need JavaScript enabled to view it.

newsbottomad

ఎక్కువగా చదివిన వార్తలు

  • కొండమీద కొత్త రూటు...
    ఒక చిన్న వంతెన, కొద్ది దూరం ఘాట్‌రోడ్డు నిర్మాణంతో నెల్లూరు - ఆత్మకూరు మధ్య ముంబై రహదారిలో వెళ్ళే ప్రయాణీకులకు దాదాపు ఐదు కిలోమీటర్ల ప్రయాణ దూరం తగ్గబోతోంది. ఇంకో నెల రోజుల్లోపే వాహనదారులకు ఈ ఘాట్‌రోడ్డు అందు బాటులోకి రాబోతోంది.…
  • యువతకు ఒప్పుకునేనా?
    తెలుగుదేశం పార్టీలో జిల్లా కమిటీలన్నీ దాదాపు భర్తీ అయ్యాయి. పార్టీ అనుబంధ కమిటీలలో కీలకమైన 'యువత' ఎంపికే ఇంకా ప్రశ్నార్థకంగా వుంది. కాంగ్రెస్‌ నుండి టీడీపీలోకి వచ్చారని చెప్పి ఆనం సోదరులను సంతృప్తి పరచడానికి ఆనం వివేకా తనయుడు, కార్పొరేటర్‌ ఆనం…
  • సోమిరెడ్డి కలలకు కార్యరూపం
    కండలేరు ఎత్తిపోతల ద్వారా మెట్ట ప్రాంతాలైన రాపూరు, వెంకటగిరిలలో 30వేల ఎకరాలకు సాగునీరు అందించా లన్న రాష్ట్ర వ్యవసాయ శాఖ మంత్రి సోమి రెడ్డి చంద్రమోహన్‌రెడ్డి కల నెరవేరింది. కండలేరు జలాశయంపై 60కోట్ల వ్యయంతో నిర్మించిన ఎత్తిపోతల పథకాన్ని ఈ నెల…
  • ఇప్పుడన్నా ఇస్తారా?
    తెలుగుదేశం అధికారంలోకి వచ్చింది... మరి పార్టీ ప్రతి పక్షంలో వున్న పదేళ్ళ పాటు పార్టీ జెండాలు మోసిన వారికి ఏమిచ్చింది... నెల్లూరుజిల్లా తెలుగుదేశం పార్టీ నాయకుల్లో నెలకొన్న అసంతృప్తి ఇది. పార్టీ అధికారంలోకి వచ్చినప్పటి కంటే ప్రతిపక్షంలో వున్నప్పుడే తమకు విలువ…
  • 'దేశం'లో... పాదయాత్ర ప్రకంపనలు
    ప్రజా సమస్యలపై, ప్రభుత్వ వైఫల్యాలపై దండెత్తుతూ ప్రతిపక్ష నేత, వైకాపా అధినేత వై.యస్‌.జగన్మోహన్‌రెడ్డి వై.యస్‌.ఆర్‌ జిల్లా ఇడుపుల పాయ నుండి మొదలుపెట్టిన ప్రజాసంకల్ప పాదయాత్ర ప్రభంజనం సృష్టిస్తోంది. అధికార తెలుగుదేశం పార్టీలో ప్రకంపనలు సృష్టిస్తోంది. జగన్‌ పాదయాత్రను తెలుగుదేశం వాళ్ళు మొదట…

Newsletter