29 December 2017 Written by 

గిట్టుబాటు కాని సేద్యం

rytuఅది ఏ వ్యాపారమైనా సరే, వస్తువు ఉత్పత్తి ధర కన్నా, వినియోగదారునికిచ్చే ధర అధికంగానే ఉంటుంది. కారణం, అందులో ఖర్చులు పోను కొంత ఆదాయానికే ఆ వస్తువును విక్రయిస్తుంటారు. అందువల్ల వ్యాపారం ఎప్పుడూ మూడుపువ్వులు ఆరు కాయలుగానే ఉంటుంది. కానీ, ఇక్కడలా కాదు. ఇది వ్యవసాయం. స్వేదంతో కలిపి చేసే సేద్యం. ఆరుగాలం కష్టపడి, తొలికోడి కూయకముందే పంటపొలాల్లోకి వెళ్ళి రాత్రనక, పగలనక శ్రమిస్తేనే ధాన్యం గింజలు రాలేది. అన్నదాతలైన రైతన్నల నిరంతర శ్రమే పంటపొలాల్లో మొలకలెత్తుతుంది. అందరికీ అన్నం పెట్టేది ఆ గింజలే. అయితే, ఇక్కడ మాత్రం రైతన్నకు ఎలాంటి గిట్టుబాటు ధరలూ ఉండవు. పంటచేలల్లో అత్యంత తక్కువ ధరతో పంటలు కొనుగోలు చేసేసి, రైతన్నలకు టోపీ పెట్టేసి, మార్కెట్లో ఎంత వీలైతే అంత ఎక్కువ ధరకు ఆ పంటను అమ్మేసుకోవడం..అదొక వ్యాపారం. పంటచేలో ఉత్పత్తులు, మార్కెట్లోకి వస్తే వ్యాపారవస్తువులైపోతాయి. దళారులు, వ్యాపారులు రైతులను బురిడీ కొట్టించి పంటలను కొనుగోలు చేసుకుపోవడం అనాదిగా వస్తున్నదే. దీనికి అంతెక్కడ?.. ప్రభుత్వాలు మారినా, పాలకులు మారినా రైతుల తలరాతలు మాత్రం మారడం లేదు. బక్కచిక్కిన బడుగు రైతులు పంటలు పండించుకోవడమే ఒక పెద్ద యాతనగా మారిన నేటి రోజుల్లో పొలం దున్నుకోవడం, విత్తనాలు తెచ్చుకోవడం, నాట్లేసుకోవడం, పంటలు పండేదాకా ఆకాశం కేసి ఆశగా చూస్తూనే ఉండడం, ఈలోగా ఏ అకాల వర్షాలో, మాయదారి వరదలో వచ్చి పంటల్ని ముంచేయడం, తెచ్చుకున్న అప్పులు కాస్తా పెరిగి పోయి, జీవితాలు సాగక చివరికి.. ఆత్మహత్యల దారి పట్టడం.. ఇది కూడా ఎంతోకాలంగా వస్తున్నదే. దేశా నికి వెన్నెముక రైతులేనని ఒకవైపు పొగుడుతూనే, మరోవైపు వారికి ఎలాంటి చేయూతను అందివ్వక నిర్లిప్తంగా వ్యవహరిస్తుండడం వల్లనే రైతులు సేద్యంపై విరక్తి పెంచుకుంటున్నారు. రైతులను ఆదు కునేందుకు అటు కేంద్రం నుంచి ఇటు రాష్ట్రం నుంచి అనేకానేక పథకాలున్నా అవి రకరకాల నిబంధనలతో ఉండడం వల్ల అసలైన నిరుపేద, బడుగు బలహీనవర్గాల రైతులకు అందడమే లేదన్నది బహిరంగ రహస్యమే. ఈ కష్టాలన్నీ చాలవన్నట్లు మరోవైపు కల్తీ విత్తనాలు, కల్తీ ఎరువులు, నాశిరకం పురుగుమందులు ఇలాంటివన్నీ రైతును నష్టాల పాలుచేసేందుకు నిత్యం ఎదురుచూస్తూనే ఉంటాయి.

రైతు ఎంతో కష్టపడి పండించిన పంటలకు కనీస మద్దతు ధర ఇప్పించాలంటూ రైతులు ఎంతోకాలం నుంచి కోరుకుంటున్నా ప్రభుత్వాల నుంచి ఆశించిన స్పందన ఉండడం లేదు. దేశవ్యాప్తంగా రైతన్నలకు ఇదొక శాపం. సరైన గిట్టుబాటు ధరలు లేక, వ్యవసాయం అప్పులమయంగా మారి కుటుంబాలను పోషించుకోలేని దుస్థితిలో నిత్యం నానా బాధలు పడుతున్నారు. కష్టపడి పంటలు పండించుకున్నా ఆశించిన ఫలింపు లేక, ఫలింపు వచ్చినా అనుకున్న ధరలు లేక దిగాలుపడిపోతున్నారు. అన్ని ఆటుపోట్లను, ప్రకృతి విపత్తులను దాటుకునివచ్చినా, చివరికి ఇక ఎటూ తప్పించుకోలేరంటూ దళారులు వికటాట్టహాసం చేస్తుంటారు. దళారుల మాయాజాలంతో రైతన్నలు తీవ్రంగా నష్టపోతూనే ఉన్నారు. వ్యవసాయం కుదేలైపోయి, రైతన్నలు దిగాలైపోయి గత రెండు దశాబ్దాల్లో కనీసం మూడు లక్షల మందికిపైగానే పేదరైతులు ఆత్మహత్యల దారి వెతుక్కున్నట్లు అంచనాలు చెప్తూనే ఉన్నాయి. పరిస్థితి ఇంత తీవ్రంగా ఉన్నా పట్టించుకునేవారు లేకపోవడం బాధాకరం. తెలుగు రాష్ట్రాల్లో ఇటీవల పత్తి, మిరప పంటల ధరల తగ్గింపుతో రైతులు కనీసం 6వేల కోట్లకు పైగానే నష్టపోయారని, అదేవిధంగా మిరప ధరలు తగ్గిపోవడంతో కనీసం మూడున్నర వేల కోట్లకు పైగానే రైతులకు నష్టాలు వాటిల్లాయని గణాంకాలు చెప్తున్నాయి. ఇది ఒక ఉదా హరణ మాత్రమే. రైతులకు మద్దతు ధర ఇవ్వాలంటూ ఉత్తరప్రదేశ్‌, మహారాష్ట్ర, పంజాబ్‌, కర్నాటక రాష్ట్రాల్లో రైతులు రోడ్లెక్కి అరిచినా ప్రయోజనం శూన్యం. దేశవ్యాప్తంగా రైతులకు కనీస మద్దతు ధర

ఉండాలని, లేకుంటే రైతుల కష్టాల నుంచి గట్టెక్కలేరని అనేక కమిటీలు సూచించినా వినేవారెవరు?.. రైతు సంక్షేమమే దేశ సౌభాగ్యమని, రైతు హాయిగా ఉంటేనే వ్యవసాయానికి మనుగడ ఉంటుందని డా.స్వామినాధన్‌ సూచించినా ఎవరూ చెవికెక్కించు కోవడం లేదు. సరికదా అమానవీయంగా, అమాను షంగా పంటల ధరలను తగ్గించివేస్తుండడం ఇంకా దారుణం. దేశంలో దాదాపు 30 కోట్ల మంది రైతులు, వ్యవసాయంపై ఆధారపడిన వారు, ఇంకా లెక్కకు మించిన రైతు కుటుంబాల వారు ఉన్నారు. వారందరి సంక్షేమం చూడాల్సిన గురుతర బాధ్యత కేంద్ర, రాష్ట్ర ప్రభుత్వాలది. అయితే, రైతులకు అందని పథకాలు పెట్టి, ఇవ్వాల్సిన గిట్టుబాటు ధరలు ఇవ్వకుండా, ఎప్పటికప్పుడు లేనిపోని హామీలతో కాలయాపన చేసుకుంటూపోతే చివరికి వ్యవసాయం కూడా దిక్కులేనిదైపోతుంది. వ్యవసాయమే లేకుంటే దేశం ఏమైపోవాలి?.. అందుకే, రైతు కన్నీరు పెట్టకుండా చూసుకోవాలి. వారికి ఏ కష్టాలు, నష్టాలు లేకుండా వారిని కలకాలం చల్లగా చూసుకోవడం అందరి బాధ్యత ముఖ్యంగా ప్రభుత్వాలు, పాలకులు అందుకు కంకణబద్ధులు కావాల్సి ఉంది. దేశవ్యాప్తంగా పంటలు సక్రమంగా పండేందుకు ఉన్న అన్నిరకాల వనరులను పటిష్టవంతం చేయాల్సి ఉంది. రైతుకు ప్రాణప్రదమైన గిట్టుబాటు ధరలను సక్రమమైన పద్ధతిలో సత్వరం సరికొత్తగా రూపొందించాల్సిన అవసరం ఎంతైనా ఉంది. స్వేదంతో చేసే సేద్యం.. చివరికి స్వేదాన్నే మిగిలిస్తే రైతన్నలు ఇక ఎలా బతకాలి?... వ్యవసాయ రంగంలో ఇకనైనా రైతు భద్రతకు, రైతు సంక్షేమానికి కొంగ్రొత్త విధానాలను ప్రవేశపెట్టి, చిత్తశుద్ధితో కార్యాచరణ పథకాలను అమలుచేయడమే తక్షణ కర్తవ్యంగా ప్రభుత్వాలు గుర్తించాలి. భారతదేశం సౌభాగ్యవంతమైన దేశం. ఆ సౌభాగ్యం వీడిపోకుండా... తన వెన్నెముకతో ఎల్లకాలం నిలబెట్టేది సాక్షాత్తూ అన్నదాతే. అందుకే, అన్నదాతలు దేశసౌభాగ్య ప్రదాతలు. వారికి కష్టకాలం రాకూడదు. రైతన్నలు కన్నీరు పెట్టుకోకుండా, వారికి అన్నివిధాలా చేయూతను అందించే పవిత్రమైన బాధ్యతను ఎట్టిపరిస్థితుల్లోనూ పాలకులు, ప్రభుత్వాలు విస్మరించకూడదు.



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com Email This email address is being protected from spambots. You need JavaScript enabled to view it.

newsbottomad

ఎక్కువగా చదివిన వార్తలు

  • ఉదయగిరిలో... 'రెడ్డి' కోసం 'దేశం' అన్వేషణ
    రాజకీయ చైతన్యానికి పేరుపడ్డ నియోజకవర్గంలో రాజకీయ పార్టీలకు గెలుపు పెద్దసవాల్‌! పార్టీ ప్రభంజనాల కంటే పోటీచేసే అభ్యర్థి ప్రభావమే ఇక్కడ ఓటర్లపై బలంగా వుంటుంది. అభ్యర్థి సమర్ధత, వ్యక్తిత్వాన్ని బట్టే ఇక్కడ గెలు పోటములుంటాయి. గత మూడున్నర దశాబ్దాల రాజకీయ చరిత్రను…
  • 'నిప్పో'కు రైట్‌ రైట్‌
    గత కొద్దికాలంగా రాజకీయ నాయకుల నోళ్ళలో నానుతూ రాజకీయ అంశంగా మారిన 'నిప్పో' పరిశ్రమకు సంబంధించిన 13.02 ఎకరాల భూమి కన్వర్షన్‌కు సంబంధించిన అంశం ఎట్టకేలకు నెల్లూరు నగరపాలక సంస్థ ఆమోదం పొందింది. 12వ తేదీ జరిగిన కార్పొరేషన్‌ కౌన్సిల్‌ సమావేశంలో…
  • ఆ ఒక్కడే వణికిస్తున్నాడు!
    నాలుగు దశాబ్దాల రాజకీయ అనుభవం... ముఖ్యమంత్రిగా 13ఏళ్ళ సర్వీసు... రెండుసార్లు మంత్రి... ఏడుసార్లు ఎమ్మెల్యే... జాతీయ రాజ కీయాలలో గిర్రున చక్రం తిప్పిన నేర్పరితనం... యునైటెడ్‌ ఫ్రంట్‌ కన్వీనర్‌... ఇన్ని వున్న చంద్రబాబునాయుడును నిండా 45ఏళ్ల వయసుండని వై.యస్‌. జగన్మోహన్‌రెడ్డి ముప్పతిప్పలు…
  • హోదా పోరుతో... వ్యతిరేకత పోగొట్టుకున్నారు
    నెల్లూరుజిల్లాతో సంబంధం వున్న లోక్‌ సభ సభ్యులు మేక పాటి రాజమోహన్‌ రెడ్డి(నెల్లూరు), వెలగ పూడి వరప్రసాద్‌ (తిరుపతి)లు ప్రత్యేక హోదా ఉద్యమంలో కీలకపాత్ర పోషించారు. హోదా ఉద్యమంలో చురుకుగా పాల్గొనడం ద్వారా తమ తమ నియోజకవర్గాలలో తమ పట్ల నెలకొన్న…
  • నడిచినా... నిద్రించినా... ఏడాదంతా ప్రజల మధ్యే...
    ప్రజలే దేవుళ్ళు, వారి ఇళ్ళే తనకు గుళ్ళు అని భావించి అనుక్షణం వారి మధ్యే వుంటూ వారి సమస్యలు తెలుసుకుంటూ వారి కష్ట సుఖాలలో తోడుండాలని కోరు కునే ప్రజా నాయకుడు నెల్లూరు గ్రామీణ ఎమ్మెల్యే కోటంరెడ్డి శ్రీధర్‌రెడ్డి. నిద్ర లేచింది…

Newsletter