16 March 2018 Written by 

విళంబి పంచాంగము

ugadiజ్యోతిశ్శాస్త్రమునందు లోక వ్యవహారము కొరకు మన దేశమున చంద్ర సూర్య బృహస్పతి మానవులను మూడుగా ప్రధానముగా విభజించారు. తిరుమలగిరికి దక్షిణ ప్రాంతము సౌరమానమని, తిరుమల గిరి- వింధ్య పర్వతముల మధ్య ప్రాంతమును చాంద్ర మానమని, వింధ్య పర్వతములకు ఉత్తర ప్రాంతము బార్హస్పత్యమానమని ప్రచారములోనున్నది. చాంద్ర, సౌరమానముల వారికి విళంబి నామ సంవత్సరము జరుగుతుంది. బార్హస్పత్యమానము వారికి విరోధికృత్‌ నామ సంవత్సరము జరుగుతుంది.

ప్రభవాది అరవై సంవత్సరములలో 32వది విళంబి నామ సంవత్సరము. యుగమనగా సంవత్స రము(కాలము). యుగము యొక్క ఆది అనగా ప్రారంభము 'యుగాది' అయినది. వ్యవహారములో 'ఉగాది'గా పిలవబడుతున్నది. ఉగాదినాడు వారి వారి వర్ణాచారముల ప్రకారము మంగళస్నానము చేసి, దైవాన్ని చిత్తశుద్ధితో ఆరాధించి, షడ్రుచులు కల వేప ప్రసాదాన్ని స్వీకరించి పంచాంగ విషయాన్ని తెలుసు కొనవలసి ఉంటుంది. పంచాంగ ఎందుకు వినటం.. తెలిసికొనడం జరగాలంటే..

శ్రీ కల్యాణ గుణావహం రిపుహరం

దుస్స్వప్నదోషాపహం

గంగాస్నాన వివేష పుణ్యఫలదం

గోదాన తుల్యం నృణాం

ఆయుర్వుృద్ధిద ముత్తమం శుభకరం

సంతాన సంపత్ప్రదమ్‌

నానాకర్మ సుసాధనం సముచితాం

పంచాంగ మాకర్ణ్యతాం.

విళంబి సంవత్సర ఫలితము :

విషమ బుద్ధులు, దుష్ట ప్రవర్తనలు దేశమంతటా విస్తరించును. ఉపద్రవములు, ప్రాణనష్టము ఎక్కువగా నుండును. సస్యరక్షణలో ధాన్యరక్షణలో ఇబ్బందులుండును. జనంలో రోగబాధితుల సంఖ్య పెరుగుతుంది. ధరలు సూచీ పెరుగును. జీవనం కొరకు జనులు విదేశ, దేశములందు సంచరించెదరు. ప్రభుత్వముల మధ్య వైషమ్యములు పెరుగును. సంపద దోపిడీ పెరుగును. పారిశ్రామిక రంగం అభివృద్ధి చెందును.

బార్హస్పత్యమాన విరోధికృత్‌ సంవత్సర ఫలితములు:

ప్రజావైరుధ్యము పెరుగును. అతివృష్టి బాధలు, వాహన ప్రమాదములుండను. పంటలు సుమారుగా పండును. కేంద్రప్రభుత్వముపై ప్రజల ఆదరణ తగ్గును. పారిశ్రామిక రంగం అభివృద్ధి చెందును. ఎండల తీవ్రత పెరుగును.

నవనాయక ఫలితములు :

ప్రతి సంవత్సరము నవనాయకులని, 21 మంది ఉపనాయకులను పిలవబడుతూ గ్రహములు కాలానికి శుభాశుభ పలితములనిస్తాయి. చైత్ర శుక్ల పాఢ్యమి వారాధిపతి రాజు, రవి మేషరాశి ప్రవేశ వారాధిపతి మంత్రి, రవి సింహరాశి ప్రవేశ వారాధిపతి సేనాధిపతి, రవి కర్కాటక సంక్రమణ ప్రవేశ వారాధిపతి సస్యాధి పతి, ధనుర్మాస ప్రవేశ వారాధిపతి ధాన్యాధిపతి, మిధున సంక్రమణ ప్రవేశ వారాధిపతి అర్ఘాధిపతి, ఆర్ద్రకార్తె ప్రవేశ వారాధిపతి మేఘాధిపతి, తులా ప్రవేశ సమ యమ వారాధిపతి రసాధిపతి, మకర ప్రవేశ వారాధిపతి నీరసాధిపతి అని నవనాయకులు. సహాయకులైన 21 మంది ఉపనాయకులని పిలవబడుతారు. ముందుగా ఫలితాలు చూస్తూ ఈ విధంగా ఉన్నాయి.

రాజు-రవి :

ప్రభువులకు పరస్పర విరోధము, అల్పవృద్ధి, ప్రజలకు ప్రభుత్వ వ్యక్తుల వల్ల శస్త్రముల వల్ల బాధలుండును. పంటలు తక్కువ. చోరాగ్ని బాధలు ఎక్కువ. అధికారవర్గంలో వైరుధ్యాలుంటాయి. రాజ కీయ పరివర్తనలు, రాజకీయ కల్లోలములుండును. మెట్ట, మాగాణి, ధాన్యాల, రత్నాల, మణుల, కలప, ఎర్రని పదార్ధాముల నిర్మాణరంగ సామగ్రి, సుగంధ ద్రవ్యాలు, చముర్ల ధరలు పెరుగును. తీవ్రవాదులతో పోరాటములుండును. ప్రభుత్వ నేతలు ప్రజలను మభ్యపెట్టుట జరుగును.

మంత్రి-శని :

వర్షములు తగ్గుట, పంటలు తగ్గుట, చెడు బుద్ధులు ప్రవర్తనలు పెరుగుతాయి. అధికార యంత్రాంగము వల్ల ఇబ్బందులు, కష్టములు పెరుగును. రుజుప్రవర్తన ఉండదు. ధరలు పెరుగును. ప్రభుత్వ నిర్ణయాలపై న్యాయపీఠం నుండి అభిశంస నలుండును.

సేనాధిపతి-శుక్రుడు:

సైనిక సామర్ధ్యము బాగుండును. సైన్యమునకు ఆర్ధికసమృద్ధి, ఆయుధ సమృద్ధి బాగుండను. ఆహారధాన్యల ధరలు స్వల్పముగా పెరుగును. స్త్రీ పురుషులు కామాసక్తులై సంచరించెదరు. అప్పు డప్పుడు యుద్ధ పరిస్థితులు నెలకొని సర్దుబాటగును. వ్యాపార వాటాల ధరలు, వెండి, బంగారు ధరలు పెరిగియుండును. ప్రజలకు సైనిక సేవా సహకార ములు బాగుండును.

సస్యాధిపతి-కుజుడు:

పూర్వ సస్యాధిపతి కుజుడగుటలచే కందులు, మిర్చి, వేరుశనగ, ఎర్రని ధాన్యములు, ఎర్రనేలలు మొదలగు మెట్ట పంటలు పండును. పూల ఉత్పత్తి బాగుండును.

ధాన్యాధిపతి-రవి :

రవి ధాన్యాధిపతి అగుటచే వర్షములు పంటలు తక్కువ. ప్రభుత్వం వత్తిడితో అదుపుచేసే పరిస్థితులుండి ధాన్యముల ధరలు సరసముగా నుండవు. మిర్చి, ఉలవలు, కందులు, వేరుశనగ బాగా పండును. కొబ్బరికాయలు, మామిడి, పనస, అరటి, నారింజ ఫలాలు బాగా పండును. వడగండ్ల వానల వల్ల పంటలు బాగా దెబ్బతినును.

అర్ఘాధిపతి-శుక్రుడు :

ధాన్యముల వెలలు స్వల్పముగా పెరిగి స్థిర పడును. వెండి, బంగారు, ఇనుము, కలప, గృహ నిర్మాణ సామగ్రి ధరలు పెరుగును. పెట్రోలు, డీజలు, కిరోసిన్‌, వంటనూనెల ధరలు స్వల్పముగా పెరుగును. బియ్యం, రాగి, దూది, పొగాకు ధరలు యధాతథంగా ఉంటాయి. షేర్‌మార్కెట్‌ లాభదాయముగా

ఉండును.

మేఘాధిపతి-శుక్రుడు :

దక్షిణ దేశంలో అల్పవృష్టి. ఉత్తర దేశంలో అతివృష్టి ఉండును. ధరలు సంతృప్తికరం. అల్పపీడన వాయు గుండముల వలన కొంత సంపద, స్వల్ప జననష్టం కలుగును. పశుసంపద, క్షీరసంపద బాగుండును.

రసాధిపతి-గురువు :

నెయ్యి, పాలపదార్ధములు, బెల్లం, పంచదార, రసవస్తువులు సమృద్ధిగా నుండును. పాడిపంటలు బాగుండును. పండ్లతోటలు, పూలతోటలు బాగుగా పండును.

నీరసాధిపతి-కుజుడు :

బంగారు, వెండి, ఎర్రచందనం, కట్టెలు, బొగ్గుల ధరలు పెరుగును. మిర్చి, పొగాకు, ఇనుము, ఉక్కు, రాగి, ఇత్తడి, కంచు యంత్ర పరికరాల ధరలు పెరుగును. గృహనిర్మాణ సామగ్రి, పరికరముల ధరలు స్వల్పముగా పెరుగును. టెక్నాలజీకి సంబంధించిన వస్తువుల ధరలు తగ్గును. విద్యుత్‌ ఉత్పత్తి పెరుగును.

వర్షలగ్న జగల్లగ్నము :

వర్షలగ్నము కన్య ద్వితీయమున గురువు, చతుర్ధమున శని, కుజులు పంచమమున కేతువు, సప్తమమున రవి చంద్ర శుక్ర బుధులు, లాభమున రాహువు.

గ్రహగతుల స్థితిని పరిశీలించినచో రాష్ట్రప్రభు త్వములు రెండును బలిష్టమైన స్థితిలోనుండును. ప్రభుత్వముపై ప్రజలకు మంచి నమ్మకముండును. అయినా, ఇతర కారణాల వల్ల ప్రభుత్వము ఒడి దుడుకులనెదుర్కొని నిలబడును. కొన్ని అనుకోని సంఘటనల వల్ల ఆర్ధిక స్థితి కొంత ఇబ్బందుల నెదు ర్కొనగలదు. ఇతర దేశాల తోడ్పాటు బాగుండును. వస్తునిల్వలు వృద్ది చెందును. వ్యవసాయ రంగములో పెనుమార్పులుండును. వ్యాపార సంస్థలు, వ్యాపార వర్గముల ఆదాయము పెరుగును. చతుర్ధ శని కుజుల వలన గృహనిర్మాణ రంగము వేగముగా వృద్ధి చెందును. పర్యాటక రంగములోను, రవాణా రంగము లోను సమర్ధవంతమైన పర్యవేక్షణతో ముందంజవేసి వృద్ధి పొందును. మరియు ద్వితీయ గురు, చతుర్ధ శని కుజుల వలన పాడిపరిశ్రమ పంచాయతీరాజ్‌, భూగర్భవనరులు అభివృద్ధి పథములో దూసుకుని పోవును. పెనుమార్పులతో విద్యారంగము వృద్ధి వేగమందుకొనును. దశమాధిపతి బుధునకు దోష గ్రహయుతి అనగా అష్టమ వ్యయాధిపతుల కలయిక వల్ల ప్రభుత్వంలో అధికారవర్గ అవినీతి బాగుండను. పంచమమునకు కేతు రాహు సంబంధము చేత సాంఘిక సంక్షేమ కళారంగాలు అంత తృప్తికరంగా ఉండవు. క్రీడారంగంలో రాష్ట్రానికి గుర్తింపు బాగుం డును. దశమ భావమునకు గురు శని కుజ దృష్టి వలన పోలీస్‌, రక్షణ శాఖలు సమర్ధవంతముగా గుర్తింపు పొందును. నేరచరిత్ర కొంత అదుపులోనుండును. మరియు ఉద్యోగుల సంక్షేమమునకు ప్రభుత్వము శ్రద్ధ చూపును. సప్తమమున చంద్ర బుధ శుక్రులు

ఉండుటవలన ప్రేమ వివాహాలు, స్త్రీలపై వేధింపు లుండును. అయితే, వాణిజ్యరంగము, పెట్టుబడులు వేగముగా వృద్ధిపొందును. గురువుకు ద్వితీయస్థితి వలన దేవాదాయ శాఖ దైవ కార్యక్రమాలను బాగా నిర్వహించును. యజ్ఞయాగాదుల ప్రోత్సాహముం డును. ప్రస్తుత ప్రభుత్వాలు మరొకమారు కొనసాగును.

జగల్లగ్నమునందు మిధున లగ్నము ద్వితీయ మున రాహువు, పంచమమున గురువు, సప్తమమున శని కుజులు, అష్టమ కేతువు, దశమమున చంద్ర బుధులు, లాభమున రవి శుక్రులున్నారు. ఈ గ్రహస్థితిని పరిశీలింపగా (1) కేంద్ర రాష్ట్ర ప్రభుత్వాలు సామరస్య ధోరణిలో సహరించుకొనును. కేంద్ర ప్రభుత్వము సమర్ధవంతముగా పాలించును. (2) ప్రభుత్వ ఆదాయము పెరుగును. స్టాక్‌మార్కెట్ల వృద్ధి మెల్లగా సాగును. (3) రవాణా రంగము, పర్యాటక రంగము, రహదారుల నిర్మాణము వేగవంతమగును. ఆదాయము బాగుండను. సమాచార ప్రసార శాఖలు సమర్ధవంతంగా పనిచేస్తూ అక్రమాలను బయటకు లాగును. (4) రెవిన్యూ సంస్కరణలు, విద్యా వైజ్ఞానిక అంతరిక్ష విజ్ఞాన సంస్థలు వేగవంతముగా సాగును. (5) రక్షణ రంగములో సైనిక పాటవము పెరుగును. కవ్వింపు చర్య వల్లన ప్రజా, సైనిక నష్టములు జరుగును (7) ప్రపంచ దేశాల సహకార పొందుట, ఆర్ధిక సంస్కరణల వేగవంతమగుట జరుగును. (8) ప్రకృతి వైపరీత్యాలు ఈ సంవత్సరము దేశములోను, ప్రపంచమంతటా పెరుగును. (9) వాహన ప్రమా దాలు, తుఫాన్ల వలన నష్టాలు, అకాల వర్షముల వల్ల నష్టాలుండును. (10) ప్రస్తుత దేశ ప్రభుత్వము మరొకసారి కొనసాగును. మెజారిటీ స్వల్పముగా గలదు. (11) సేవా, కళారంగాలు, క్రీడారంగాలలో మంచి ఖ్యాతి ఉండును. (12) ప్రజాక్షేమము, దేశ ఆర్ధికాభివృద్ధి సంతృప్తికరముగ నుండును.

తామ్రపర్ణి (భీమరధి) నది పుష్కరములు :

గురువు వృశ్చిక రాశి ప్రవేశ సమయము నుండి 12 రోజుల పటు తామ్రపర్ణి పుష్కరమలు జరుగు తాయి. తేది. 11.10.2018 ఆశ్వీయుజ శుక్ల తదియ గురువారం రాత్రి 1.48 గంటలకు గురువు వృశ్చిక రాశి యందు ప్రవేశించును. సూర్యాస్తమయానంతరం కాబట్టి 12.10.2018 శుక్రవారం నుండి 23.10.2018 వరకు తామ్రపర్ణి పుష్కరాలు జరుగును. నదిలో సంకల్ప పూర్వకముగా స్నానమాచరించి జప తర్పణ కార్యక్రమాలు, పితృదేవతలకు పిండ ప్రదానములు చేయుటవలన పునీతులై కుటుంబ వృద్ధి పొందగలరు.

కర్తరీ నిర్ణయము :

తేది 04.05.2018 నుండి డొల్లు కర్తరీ ప్రారంభము. తేది 11.05.2018 శుక్రవారం నుండి తేది 28.05.2018 సోమవారం వరకు నిజకర్తరి. ఈ కర్తరిలో 'మృచ్ఛిలాదారు కర్మాణి వర్జయేత్‌' అను ప్రమాణము వలన మట్టి, రాయి, కొయ్యతో కూడిన నిర్మాణములు పనికిరాదు.

మౌఢ్యములు :

సూర్యునకు అత్యంత సమీపమున ఏ గ్రహము వచ్చినను అస్తంగత దోషము కలుగును. శుభ గ్రహములగు గురు శుక్రులు రవి సమీపమునకు వచ్చినచో అస్తంగతులగదురు కాబట్టి గురు శుక్ర మౌఢ్యములుగా చెప్పబడినవి. ఏ రకములైన శుభ కార్యములు కూడా చేయరాదని ధర్మశాస్త్ర, జ్యోతిశ్శాస్త్ర ప్రమాణము.

తేది 21.10.2018 ఆశ్వీయుజ శుక్ల ద్వాదశి ఆదివారము నుండి తేది 31.10.2018 ఆశ్వీయుజ బహుళ సప్తమి బుధవారం వరకు శుక్రమౌఢ్యమి జరుగును. తేది :12.11.2018 కార్తీక శుక్ల పంచమి సోమవారం నుండి తేది 10.12.2018 మార్గశీర్ష శుక్ల తదితయ సోమవారం వరకు గురుమౌఢ్యమి జరుగును.

అధిక జ్యేష్టమాసం:

ఏ తెలుగు నెలలో శుక్ల పాఢ్యమి నుంచి అమా వాస్య వరకు మధ్యలో సూర్యసంక్రమణం జరగదో, అది తరువాత నెలకు సంబంధించిన అధికమాసం అగును. ఏ రకమైన శుభముహూర్తములు అధిక మాసంలో ఉండవు.

గ్రహణములు :

తేది : 27.07.2018 అషాఢపూర్ణిమ శుక్రవారం రాత్రి 11.54 గంటల నుంచి 3.49 వరకు సంపూర్ణ చంద్రగ్రహణము. ఉత్తరాషాఢ, శ్రవణ నక్షత్రముల వారు చూడరాదు. ఇది కేతుగ్రస్త సంపూర్ణ చంద్ర గ్రహణం. భారతదేశమంతటా కనిపించును. సూర్య గ్రహణములు లేవు.

అర్థ్ర కార్తె ప్రవేశము:

నిజ జ్యేష్ఠ శుక్ల దశమి శుక్రవారం తేది 22.06.2018 రాత్రి 7.14 గంటలకు రవి ఆర్ద్రా ప్రవేశము. దీనివల్ల ప్రజలకు సుఖ సౌఖ్యములు, ధాన్యవృద్ధి, యుద్ధ వాతావరణము, ప్రజలకు అనారోగ్య బాధలుండును. అధికారవర్గాలు పరస్పరం విభేదాలకు కలహించుకొనుట జరుగును. దేశమంతటా వానలు సంతృప్తికరము.

మకర సంక్రాంతి :

తేది. 14.01.2019 నవమి సోమవారం రాత్రి 1.11 గంటలకు సూర్యుడు మకరరాశిలో ప్రవేశించును. దీనినే మకర సంక్రాంతి అని పిలుస్తారు. ఉత్తరాయణ పుణ్యకాల ప్రారంభ సమయము. కాబట్టి తేది. 15.01.2019 సంక్రాంతి పండుగ అగును.

దక్షిణాయనగే భానౌ కలికాలే నరై: కృతమ్‌

పాపం మూర్తీభవత్సర్వం బహిర్వ్యాప్యుత్తరాయణే

దక్షిణాయనంలో జనులు చేసిన పాపములన్ని ఘోరం రూపంలో మకర సంక్రమణ సమయంలో సూర్యాంశ గ్రహతారులు ప్రత్యక్షమగు రూపమే మకర సంక్రాంతి పురుషరూపము. అందుకే పితృదేవతలను పూజిస్తారు.

మకర సంక్రాంతి పురుష లక్షణాలను పరిశీలిస్తే శుక్లపక్షం కాబట్టి అక్కడక్కడా క్షామపరిస్థితులు. నవమి తిథి-ఈతిబాధలు, మంగళవారం-ప్రజా దు:ఖం మరియు జననష్టం. అశ్వని నక్షత్రం-ప్రభుత్వాల మధ్య సఖ్యత తక్కువ. రాత్రి సమయం-నటులకు, రాజకీయ, సామాజిక శాస్త్రజ్ఞులకు హాని, మహోదరనామమము- ఆర్ధిక దోపిడీలు, రక్తవస్త్రధారణ-రోగదాయకము, రక్తఛత్రధారణ-యుద్ధ పరిస్థితుల వల్ల ఆందోళన, వ్యాఘ్రవాహనం-అరణ్య జంతునాశనం, దక్షిణాది ప్రయాణం- ఆ దిక్కున గల దేశాలకు అరిష్టం.

ఆదాయ వ్యయమలు - రాజపూజ్య అవమానములు: ఆ వ్య రా అ

మేషం 2 14 5 7

వృషభం 11 5 1 3

మిధునం 14 2 4 3

కర్కాటకం 8 2 7 3

సింహం 11 11 3 6

కన్య 14 2 6 6

తుల 11 5 1 2

వృశ్చికం 2 14 5 2

ధను: 5 5 1 5

మకరం 8 14 4 5

కుంభం 8 14 7 5

మీనం 5 5 3 1



Lawyer

Sub Editor, Internet Edition , Lawyer Telugu Weekly

Website: www.lawyerteluguweekly.com

newsbottomad

ఎక్కువగా చదివిన వార్తలు

  • ప్రశాంతతే.. మా లక్ష్యం!
    సుప్రీంకోర్టు ఆదేశాల మేరకు, నిందితులను ఇక నుండి వీడియో కెమెరాల ముందు ప్రవేశపెట్టబోమని జిల్లా ఎస్పీ పిహెచ్‌డి రామకృష్ణ స్పష్టం చేశారు. మనుబోలు పోలీస్‌స్టేషన్‌ను ఎస్పీ ఈనెల 4న ఆకస్మికంగా తనిఖీ చేశారు. ఈ సందర్భంగా ఆయన విలేకరులతో మాట్లాడుతూ, జిల్లాను…
  • నెల్లూరు పోలీస్‌ కార్యాలయాలకు హైటెక్‌ సొగసులు
    మనం హైదరాబాద్‌కు వెళ్ళినప్పుడు సైబరాబాద్‌ కమిషనరేట్‌, పంజాగుట్ట, జూబ్లీహిల్స్‌ పోలీసుస్టేషన్‌లు చూసినప్పుడు... ఇలాంటి పోలీసుస్టేషన్‌లు మనకు కూడా వస్తే ఎంత బాగుండు అనుకుంటాం... ఎందుకంటే అవి పోలీసుస్టేషన్‌ల మాదిరిగా వుండవు. కార్పొరేట్‌ కంపెనీల ఆఫీసుల్లాగా వుంటాయి. ఈమధ్య ఉత్తమ పోలీసుస్టేషన్‌గా కూడా…
  • రాజకీయ దారులు వేరవుతాయా?
    నెల్లూరుజిల్లా రాజకీయాలంటే అగ్రవర్ణ నాయకులదే పెత్తనం. బెజవాడ, నల్లపరెడ్డి, ఆనం, నేదురుమల్లి, మాగుంట, మేకపాటి వంటి రాజకీయ కుటుంబాలు బలంగా వున్న ఈ జిల్లాలో ఓ దళిత మహిళ 5సార్లు వరుసగా నెల్లూరు లోక్‌సభ టిక్కెట్‌ తెచ్చు కుని అందులో నాలుగుసార్లు…
  • 2019... రేస్‌ గురాల్రు వీళ్ళే!
    ఐదేళ్ళకోసారి ఎన్నికలొస్తుంటాయి. అలాగే ప్రతి ఎన్నికలకు కొందరు కొత్త నాయకులు వస్తుంటారు. కొందరు నాయకులు తెరమరుగవుతుంటారు. ప్రతి ఎలక్షన్‌ ఎంతోకొంతమంది కొత్తవారిని మనకందిస్తూనేవుంటుంది. 2014 ఎలక్షన్‌ ఇలాంటిదే! ఆ ఎన్నికల్లో నెల్లూరు ఎంపీగా గెలిచిన మేకపాటి రాజమోహన్‌రెడ్డి, కోవూరు, వెంకటగిరి ఎమ్మెల్యేలుగా…
  • ఆనంతో... అదనపు బలం!
    మాజీమంత్రి ఆనం రామనారాయణరెడ్డి వైయస్సార్‌ కాంగ్రెస్‌లో చేరడం లాంఛనమే! ఇటీవల శంషాబాద్‌ ఎయిర్‌పోర్టులో వైకాపా అధినేత వై.యస్‌.జగన్మోహన్‌రెడ్డితో ఆయన భేటీ అయ్యాడు. జిల్లా రాజకీయాలపై చర్చించాడు. వైసిపిలో ఏ తేదీన చేరాలనుకునేది ఇక ఆనం రామనారాయణరెడ్డే నిర్ణయించుకోవాల్సి వుంది. ఆనం పార్టీలోకి…

Newsletter