నెల్లూరులో నేడు (135)

peena barrageక్రిందట జిల్లా మంత్రి పి.నారా యణ చెప్పారు. ఆయన మంత్రయ్యాక ఒకటికి నాలుగుసార్లు ఈ బ్యారేజీల నిర్మాణాన్ని పరిశీలించారు. నెల్లూరు బ్యారేజీ పనులను చీకట్లో చూడ్డానికి వెళ్లినప్పుడే ఎమ్మెల్సీ బీద రవిచంద్ర కాలుజారి గాయపడ్డాడు. పోయినసారి తనిఖీలప్పుడే మార్చికల్లా ఈ బ్యారేజీల నిర్మాణం పూర్తవుతుందని, బ్యారేజీల మీద బండ్లు కూడా పోవచ్చని చెప్పారు. ఇప్పుడు జనవరి నెల. ఇంకో పదిరోజులు దాటితే ఫిబ్రవరి కూడా వస్తుంది. మరి మార్చికి ఎలా ఇవి పూర్తవుతాయో తెలియడం లేదు. మంత్రి మాటల్లో

ఉన్నంత ఊపు చేతల్లో ఉండడం లేదు. ఇప్పటికే ఈ బ్యారేజీల నిర్మాణానికి 170కోట్ల దాకా ఖర్చయ్యింది. ఇంకో 120కోట్ల దాకా ఖర్చుందని అంచనా! గతంలో ముఖ్యమంత్రి చంద్రబాబు జిల్లా పర్యటనకు వచ్చి ఈ బ్యారేజీలను పరిశీలించి, వీటిని తొందరగా పూర్తి చేయాలని, లేకుంటే బ్లాక్‌లిస్టులో పెడతా మని కాంట్రాక్టర్లను హెచ్చరించారు. కాంట్రాక్టర్లు తమ సమస్యలను చెబితే... వాటిని పరిష్కరిస్తానని కూడా ముఖ్య మంత్రి హామీ ఇచ్చారు. ఇటీవల ఈ పనులకు సంబంధించి కొన్ని బిల్లులు కూడా మంజూరు చేశారు. అయితే సీఎం గాని, మంత్రి గాని ఈ బ్యారేజీలపై మాటల్లో చూపించినంత శ్రద్ధ చేతల్లో చూపడం లేదు. గట్టిగా ఇంకో మూడు నెలలు పనిచేస్తే నెల్లూరు బ్యారేజీ, అయి దారు నెలలు పనిచేస్తే సంగం బ్యారేజీ పూర్తవుతాయి. ఈ రెండు బ్యారేజీల ఖర్చు కూడా భారీఎత్తున లేదు. మంత్రి చొరవ తీసుకుంటే మార్చికి కాకున్నా 2017 ఏడాది పోకముందే వీటిని పూర్తి చేసుకుని ప్రారంభించుకోవచ్చు.

msrపేద గర్భిణీ స్త్రీలు నగరంలో ఎక్కడికి వెళ్ళాలన్నా ఆటోల కోసం పడుతున్న ఇబ్బందులను గమనించి, నెల్లూరులోని మాగుంట శరత్‌చంద్రారెడ్డి యువజన సేవా సమితి ఆధ్వర్యంలో పేద గర్భిణీ స్త్రీలకు ఉచితంగా అయిదు ఆటోలను కేటాయించేందుకు నిర్ణయించుకున్నారు. ఆ ఆటోలను యువజన సేవాసమితి వ్యవస్థాపకుడు మాగుంట శరత్‌చంద్రారెడ్డి ప్రారంభించారు. ఈ కార్యక్రమానికి శ్రీకారం చుట్టిన ప్రసాద్‌ను ఆయన అభినందించారు. ఈ ఉచిత ఆటోలు నగరమంతా తిరుగుతాయని, వాటిపై ఫోన్‌ నంబరు కూడా వుంటుందని, అవసరమైనవారు ఫోన్‌ చేస్తే వెంటనే తమ ఆటో వస్తుందని నిర్వాహకులు ఈ సందర్భంగా తెలిపారు. ఈ కార్యక్రమంలో నాగేంద్ర, ప్రసాద్‌, దారా మహేష్‌, మాదా బాబు, జైరాజ్‌, రమేష్‌, నాగార్జున, సాయి తదితరులు పాల్గొన్నారు.

Friday, 06 January 2017 12:25

బూడిదైన బతుకులు

Written by

fire accident2016 పోతూ పోతూ నెల్లూరుజిల్లాలో ఓ 17 కుటుంబాలలో చీకటి నింపి పోయింది. ఇక కొన్ని గంటల్లోనే కొత్త సంవత్సరంలోకి అడుగు పెట్టబోతుండగా, కొందరికి కొత్త సంవత్సరాన్ని చూసే ఆశ, అవకాశం లేకుండా చేసింది. అనునిత్యం ప్రజల సంతోషాలలో భాగమైన బాణాసంచాను తయారుచేసే కార్మికుల బ్రతుకుల్లో చీకటిని చిమ్మింది.

పోలీసుల నిర్లక్ష్యం, అధికారుల వైఫల్యం, కొందరు వ్యాపారుల దురాశ... వెరసి ఒక పెను ప్రమాదానికి దారి తీసాయి. 2016 డిసెంబర్‌ 31వ తేదీన నెల్లూరుజిల్లా చరిత్రపుటలో పెద్దప్రమాదం చోటు చేసుకుంది. నెల్లూరు సమీపంలోని పెన్నా పొర్లుకట్ట వద్ద వున్న బాణాసంచా గోడౌన్‌లో అగ్ని ప్రమాదం సంభవించింది. అక్కడికక్కడే ఇద్దరు మృతి చెందగా, గురువారానికి ఆసుపత్రిలో చికిత్స పొం దుతూ మరో 8మంది మరణించారు. మిగిలినవారు 80శాతం గాయాలతో నారాయణ ఆసుపత్రిలో చికిత్స పొందు తున్నారు. మొదట బాధితులను పెద్దాసు పత్రికే తీసుకెళ్లారు. కాని అక్కడ వైద్య సదుపాయాలు ఎంత ఘోరంగా అఘో రిస్తున్నాయో తెలిసిందే కదా! అక్కడ వారికి సరైన వైద్యసదుపాయం అందించే అవకాశం లేకపోవడంతో జిల్లా కలెక్టర్‌ ముత్యాలరాజు చొరవ తీసుకుని వారిని వెంటనే నారాయణ ఆసుపత్రికి తర లించారు. ప్రమాదం సంభవించింది అనుమతి లేని బాణాసంచా గోడౌన్‌లో! 50గజాల గోడౌన్‌లో 17మంది కార్మికులు పని చేస్తుండడమే ఇక్కడి పరిస్థితులకు అద్దం పడుతుంది. యం.వి.రమణయ్యశెట్టి అనే అతను ఈ బాణాసంచా గోడౌన్‌ నిర్వ హిస్తుండగా భాస్కర్‌ అనే గుమస్తా దీని వ్యవహారాలు చూస్తుంటాడు. నూతన సంవత్సర వేడుకలతో పాటు, సంక్రాంతి సంబరాలకు బాణాసంచా అమ్మకాలు ఎక్కువుగా వుంటాయనే ఉద్దేశ్యంతో కూలీ లను పెట్టి బాణాసంచా తయారు చేయిస్తు న్నారు. ప్రమాదం జరిగిన సమయంలో నిర్వాహకుడు భాస్కర్‌ అక్కడే వున్నాడు. ప్రమాదం తీవ్రత ఎక్కువుగా ఉండడంతో అతను పరారుకాగా తర్వాత పోలీసులు అరెస్ట్‌ చేశారు.

ఎక్కువమంది యువకులే...

ఈ ప్రమాదంలో చిక్కుకున్న వారిలో ఎక్కువమంది పాతికేళ్ళలోపు యువకులే ఉండడం విచారకరం. నూనూగు మీసాల వయస్సులోనే వారికి నూరేళ్ళు నిండాయి. అందరూ గిరిజన యువకులే! ఇతర పనులకు పోవడంకంటే ఇక్కడైతే నీడపట్టున కూర్చుని పనిచేయవచ్చనే బాణాసంచా గోడౌన్‌లకు వస్తుంటారు. రోజు కూలీ కూడా రూ.500లు ఇస్తుండడంతో ఇక్కడ పనిచేయడానికి ఆసక్తితో వస్తారు. కడుపు నింపుకోవ డానికి ఏదో ఒక పని అని వస్తే... ఆ పనే వీరి పాలిట మృత్యువుగా మారింది.

ఎస్‌బి హెచ్చరికలు బేఖాతరు...

దీపావళి సమయంలో స్పెషల్‌ బ్రాంచ్‌ పోలీసులు నెల్లూరు సమీపంలోని అన్ని బాణాసంచా గోడౌన్‌లలో తనిఖీలు నిర్వహించారు. అనుమతులు లేని బాణాసంచా గోడౌన్‌లను గుర్తించి, వాటిని తొలగించాల్సిందిగా ఆయా పోలీస్‌స్టేషన్‌లకు సమాచార మిచ్చారు. ఆ గోడౌన్‌లలో ప్రమాదం జరిగిన భాస్కర్‌ గోడౌన్‌ కూడా వుంది. అయితే మూడో నగర పోలీసులు దీనిపై పెద్దగా స్పందించలేదు. వూరికే హెచ్చరించి వదిలేసారని తెలిసింది. ఇప్పుడు అదే గోడౌన్‌లో ప్రమాదం సంభవించడంతో మూడోనగర పోలీసుల మెడకు చుట్టుకుంది. జిల్లా ఎస్పీ విశాల్‌గున్నీ అప్పటి త్రీటౌన్‌ ఎస్‌ఐ రామకృష్ణను సస్పెండ్‌ చేయడంతో పాటు ప్రస్తుత సిఐ రామారావు సస్పెండ్‌కు సిఫారసు చేస్తూ ఐజికి లేఖ వ్రాసారు.

మొత్తానికి అధికారులు, పోలీసుల వైఫల్యం వల్ల, విధి నిర్వహణలో ఉదాసీనత వల్ల ప్రజలు ఎంతగా మూల్యం చెల్లిస్తున్నారనడానికి చితికి చిధ్రమైన ఈ బడుగుజీవుల బ్రతుకులే ఓ ఉదాహరణ.

buildingతిరిగిరాని లోకాలకు తరలి వెళ్లిన పురచ్చితలైవి కుమారి జె.జయలలితకు నెల్లూరు నగరంతో విడదీయరాని అనుబంధం ఉంది. ఆమె జనం మెచ్చిన నాయకురాలే కాదు, నెల్లూరుకు మనుమరాలు కూడా!

నెల్లూరుతో ఆమెది విడదీయరాని బంధం. రంగనాధుడి గుడి, అక్కడే వున్న చిత్రకూటం, పక్కనేవున్న పెన్నానది, తిక్కన పార్కు జయలలిత జీవిత చరిత్రలో మరపురాని జ్ఞాపకాలు. జయలలిత తల్లి సంధ్య సినీనటి! ఆమె సొంతూరు నెల్లూరే! రంగనాయకులపేటలోని చిత్రకూటం వద్ద వారిళ్లుండేది. నెల్లూరులో వున్నప్పుడే సంధ్య సినీ పరిశ్రమలోకి వెళ్లారు. అప్పుడే మైసూరు రాజా ఆస్థానంలో వైద్యుడిగా పనిచేస్తున్న జయరామన్‌ను ఆమె వివాహమాడారు. వారికి జయలలిత జన్మించింది. సంధ్య అత్తమామలు కర్నాటకలోని శ్రీరంగంలో ఉండేవారు. సంధ్య సినిమాలలో బిజీగా వున్న సమయంలో ఆమె భర్త మరణించారు. ఆ సమయంలో ఒకటిన్నర ఏడాది వయసున్న జయలలితను ఆమె నెల్లూరులోని తన తల్లి వద్ద వుంచింది. అలా 5ఏళ్ల వయ సొచ్చే దాకా జయలలిత నెల్లూరులోనే పెరిగింది. ఆ తర్వాత చెన్నైకు వెళ్ళినా సెలవుల సమయంలో నెల్లూరొచ్చి తన మేన మామల వద్ద గడిపేది. చిత్రకూటం ప్రాంతంలో చిన్నతనంలో జయలలితకు చాలామంది స్నేహితులుండేవాళ్లు. ఈ ప్రాంతాల్లో తోటి స్నేహితులతో కలసి ఆమె సరదాగా ఆడుకునేది. రంగనాథ స్వామి ఆలయంకు క్రమం తప్పకుండా వెళుతుండేది. జయలలిత సినిమాల్లోకి వెళ్లాక నెల్లూరుకు రావడం మానేసింది.

నెల్లూరీయులతో సత్సంబంధాలు

నెల్లూరుతో వున్న ప్రత్యేక అనుబంధమో ఏమోగాని నెల్లూరుకు చెందిన వ్యక్తులను ఆమె ఎంతగానో అభిమానించేవారు. ముఖ్యంగా స్వర్గీయ మాగుంట సుబ్బరామిరెడ్డి కుటుంబానికి ఆమె అత్యంత ఆప్తురాలు. 1992లో నెల్లూరు ఏ.సి స్టేడియంలో జరిగిన మాగుంట సుబ్బరామిరెడ్డి తనయుడు మాగుంట విజయ్‌రెడ్డి వివాహానికి ఆమె రావడం జరిగింది. 1995లో నక్సలైట్ల చేతుల్లో మాగుంట సుబ్బరామిరెడ్డి దారుణహత్యకు గురైనప్పుడు కూడా ఆమె నెల్లూరొచ్చి సుబ్బరామన్నకు నివాళులర్పించారు. అలాగే తమిళనాట తెలుగువారి కీర్తి బావుటాగా వున్న ప్రముఖ వైద్యులు డాక్టర్‌ సి.ఎం.కె.రెడ్డి, సీబ్రోస్‌ అధినేత సుబ్బారెడ్డి లాంటి నెల్లూరీయులతోనూ ఆమెకు సత్సంబంధాలున్నాయి. ఇలా నెల్లూరుతోనూ, నెల్లూరీయులతోనూ జయలలితకు వున్న అనుబంధం చరిత్రలో తీపిజ్ఞాపకంగా మిగిలిపోనుంది.

swamuluకంచి కామకోటి పీఠాధిపతి సద్గురు జయేంద్ర సరస్వతి, శంకర విజయేంద్రసరస్వతి స్వామీజీలు ఈ నెల 11 నుండి 14వ తేదీ వరకు నెల్లూరులో విడిది చేస్తారు. 10వ తేదీ రాత్రికే వాళ్లు నెల్లూరు చేరుకుంటారు. మూలాపేటలోని శంకరమఠంలో బస చేస్తారు. వారితో పాటు ఎంతో విశిష్టమైన పీఠాన్ని కూడా తీసుకువస్తున్నారు. శ్రీకంచి కామాక్షి చంద్రమౌళేశ్వరస్వామి దేవాలయం వద్ద కంచి స్వాముల పూజలకు ఏర్పాట్లు చేస్తున్నారు. ఈ నాలుగురోజుల పాటు కంచిపీఠం సంప్రదాయాల ప్రకారం విశేషపూజలు, చండీహోమం, పీఠానికి అభిషేకాలు నిర్వహిస్తారు. ప్రతిరోజూ స్వామీజీల ప్రవచనాలుంటాయి.

Friday, 25 November 2016 13:20

వ్యాపారాలన్నీ బంద్‌

Written by

mgbపెద్దనోట్ల రద్దుతో చిల్లర దొరక్క సామాన్య ప్రజలే కాదు వ్యాపారాలన్నీ పడిపోయి వ్యాపారస్థులు విలవిలలాడుతున్నారు. పెద్దనోట్ల రద్దు ప్రకటన వెలువడ్డాక వ్యాపార లావాదేవీలు సగానికి సగం పడిపోయాయి. వెయ్యి, 500 నోట్లు రద్దు చేశారు. కొత్తగా 2వేల నోటు విడుదల చేశారు. మార్కెట్‌లో చిల్లర లేక ఇవి చెలామణి కావడం కష్టసాధ్యంగా మారింది. వంద, యాభై, 20, 10... చిన్ననోట్ల హవా పెరిగింది. మార్కెట్‌లో ఈ నగదు శాతం తక్కువ. చెలామణిలో ఎక్కువుగా ఉన్నది 500నోట్లే! కొత్తగా 500 నోటు విడుదల కావడం ఆలస్యమైంది. దీంతో వ్యాపారస్థులకు సినిమా కష్టాలు మొదలయ్యాయి.

మొదటి దెబ్బ రియల్‌ ఎస్టేట్‌ మీద పడింది. అసలే అంతంతమాత్రంగా వున్న రియల్‌ మార్కెట్‌ పెద్ద నోట్ల రద్దుతో కుదేలయ్యింది. రియల్టర్లు డీలా పడిపోయారు. రియాల్టీ మీదనే వందల కోట్లలో వడ్డీ వ్యాపారం చేస్తున్న వడ్డీ వ్యాపారులు ఖంగుతిన్నారు. కొందరు బాకీల వసూళ్లకు పరుగులు తీస్తుంటే, ఇంకొందరు లక్షలు, కోట్లలో తిరిగి వచ్చిన అప్పులను తెల్ల ధనంగా ఎలా మార్చుకోవాలో తెలియక తంటాలు పడుతున్నారు. ఇక రియల్‌ ఆధారంగా జరుగుతున్న వ్యాపారాలన్నీ కూడా తగ్గాయి. భవన నిర్మాణ కార్మికులకు పనులు లేకుండా పోయాయి. స్టీలు, సిమెంట్‌ వ్యాపారాల్లోనూ ప్రతిష్టంభన నెలకొంది. వ్యాపారాలు లేక జిల్లాలో వేలాది లారీలు, ట్రక్కులు, ట్రాక్టర్లు ఆగిపోయాయి. ప్రజల వద్ద చిల్లర కొరతతో పాటు విచ్చలవిడిగా డబ్బులు ఖర్చుపెట్టే పరిస్థితి లేకపోవడంతో మందుబాబులు మద్యం షాపులు, బార్లకు పోవడం తగ్గించేశారు. ఇంతకుముందు రోజూ హాఫ్‌ తాగేవాళ్లు ఇప్పుడు క్వార్టర్‌ లేదా రెండు పెగ్‌లతో సరిపెట్టుకుంటున్నారు. కూరగాయలు, చిల్లర వర్తకంలోనూ జోరు తగ్గింది. నోట్ల రద్దు ప్రకటించిన పక్కరోజు బంగారు అమ్మకాలు జోరుగా సాగాయి. అయితే బంగారం అమ్మకాలపై పాన్‌కార్డు నిబంధనను పెట్టడంతో ఈ అమ్మకాలు కూడా పడిపోయాయి. చాలాచోట్ల బంగారం దుకాణాలను మూసేసారు.

ముఖ్యంగా లగ్జరీ వ్యాపారాలపై దీని ప్రభావం బలంగా వుంది. ఇంతకుముందు ఆయా ఆటోమొబైల్‌ షోరూమ్‌లలో లగ్జరీ కార్లు, చిన్న కార్లు, బైక్‌ల అమ్మకాలు తీవ్రస్థాయిలో ఉండినాయి. ముఖ్యంగా కొన్ని కంపెనీల కార్లు డెలివరీకైతే 10 నెలల దాకా గడువు పెడుతూ వచ్చారు. పెద్దనోట్ల రద్దు తర్వాత కార్లు, మోటార్‌ బైక్‌ల అమ్మకాలు బాగా తగ్గాయి. చేతిలో వున్న చిల్లరను జాగ్రత్తగా ఉంచుకోవాలనే ఉద్దేశ్యంతో ప్రజలు సినిమాలు, షాపింగ్‌లకు పోవడం లేదు. బట్టల కొనుగోళ్లు కూడా తగ్గాయి. రెస్టారెంట్లు, ఫుడ్‌ కోర్టుల వ్యాపారం కూడా సగానికి పడిపోయింది. ఆయా వ్యాపార సంస్థలైతే ఈ నెల వ్యాపారాలు లేక తమ సిబ్బందికి జీతాలు ఎలా ఇవ్వాలో తెలియని పరిస్థితుల్లో వున్నాయి. ముఖ్యంగా జీతాలు ఇవ్వడానికి కొత్త నోట్లు లేవు. పాత నోట్ల రూపంలో జీతాలు ఇవ్వలేరు. రైతులు కూడా సమస్యలు ఎదుర్కొంటున్నారు. పైర్ల సీజన్‌ కావడంతో ఎరువులు, పురుగు మందులు, ఇతర వ్యవసాయ సంబంధిత కొనుగోళ్లు ఉంటాయి. వీటి కొనుగోలుకు పాతనోట్లు తీసుకోవడం లేదు, రైతుల వద్దకు కొత్త నోట్లు రావడం లేదు. మొత్తానికి పెద్దనోట్ల రద్దు వ్యాపారుల పాలిట శాపంగా మారింది. కొత్తనోట్లు, పూర్తి స్థాయిలో చిల్లర అందుబాటులోకి వచ్చినా పడిపోయిన ఈ వ్యాపారాలన్నీ కోలుకోవడానికి చాలా సమయం పడుతుంది.

tdp jandaవైపాకా వాళ్లు 'గడప గడపకు వైకాపా' కార్యక్రమం నిర్వహిస్తుండగా, అధికార తెలుగుదేశంపార్టీ కూడా పోటీగా 'జనచైతన్యయాత్ర'లకు శ్రీకారం చుట్టింది. జిల్లాలోని 10అసెంబ్లీ నియోజకవర్గాల పరిధిలో జనచైతన్యయాత్రలు మొదల య్యాయి. కోవూరు, వెంకటగిరిలలో ఎమ్మెల్యేలు పోలంరెడ్డి శ్రీనివాసులురెడ్డి, కురుగొండ్ల రామకృష్ణ ఆధ్వర్యంలో ఈ యాత్రలు జరుగుతున్నాయి. వెంకటగిరి ఎమ్మెల్యే రామకృష్ణ తొలిరోజే కింద పడి చేతికి గాయం కావడంతో యాత్రలు ముగిసేదాకా ఇక ఆయన పాల్గొనలేక పోవచ్చు. తన నియోజకవర్గ పర్యటనకు ముఖ్యమంత్రి చంద్రబాబు వస్తున్నాడని తెలిసినా, ఆ వైపుకు రాకుండా మహా రాష్ట్రలో తన కాంట్రాక్ట్‌ పనులు చూసుకునే ఉదయగిరి ఎమ్మెల్యే బొల్లినేని రామారావు యధావిధిగా జనచైతన్య యాత్రల ప్రారంభానికి రాలేదు. ద్వితీయశ్రేణి నాయకులే ఇక్కడ జనచైతన్య యాత్రలు చేస్తున్నారు. ఆత్మకూరులో ఆనం రామ నారాయణరెడ్డి, సర్వేపల్లిలో సోమిరెడ్డి చంద్రమోహన్‌రెడ్డిల ఆధ్వర్యంలో ఎంతో హుషారుగా యాత్రలు జరుగుతున్నాయి. కావలి, గూడూరు, సూళ్లూరుపేట, నెల్లూరు నగరం, నెల్లూరురూరల్‌ నియో జకవర్గాలలో కూడా ఇన్‌ఛార్జ్‌ల ఆధ్వ ర్యంలో జనచైతన్యయాత్రలు మొదల య్యాయి. ఈ యాత్రలు మండలస్థాయి నేతలకు అగ్నిపరీక్షగా మారాయి. యాత్ర లకు జనాన్ని తీసుకొచ్చే బాధ్యత వారిదే కావడంతో ఎక్కడికక్కడ జనాలను తర లించడానికి వాళ్లు నానా తంటాలు పడుతున్నారు.

pubఇంతవరకు మహానగరాలకే పరిమితమైన పబ్‌ సంస్కృతి ఇప్పుడు నెల్లూరుకు పాకింది. నెల్లూరు ఆర్టీసీ బస్టాండ్‌ సమీపంలో పాత సింధూర బార్‌ & రెస్టారెంట్‌ ప్రాంగణంలో సింధూర పబ్‌ను ఏర్పాటు చేయడం వివాదానికి దారి తీసింది. ఎక్సైజ్‌ శాఖ అనుమతితోనే తాము పబ్‌ను ప్రారంభించామని నిర్వాహకులు చెబుతుండగా, సోమవారం నెల్లూరులో పర్యటించిన రాష్ట్ర ఎక్సైజ్‌ శాఖ మంత్రి కొల్లు రవీంద్ర మాత్రం ఈ పబ్‌పై చర్యలు తీసుకోవాలని ఎక్సైజ్‌ శాఖను ఆదేశించడం జరిగింది. తెలుగునాడు విద్యార్థి సంఘం, వైకాపా విద్యార్థి విభాగంతో పాటు పలు విద్యార్థి సంఘాలు ఈ పబ్‌ను మూసేయాలంటూ పబ్‌ ఎదుటే ఆందోళనకు దిగాయి. మంగళవారం రాత్రి నాలుగోనగర పోలీసులు ఈ పబ్‌ను ఆకస్మికంగా తనిఖీ చేసి తాత్కాలికంగా మూసేయించారు. అయితే ఎవరి అనుమతీ లేకుండానే నిర్వాహకులు ఈ పబ్‌ను ఎలా ప్రారంభించగలిగారన్నది ప్రశ్నార్ధకంగా మారింది. పబ్‌ నిర్వాహకులు మాలకొండా రెడ్డి మంగళవారం మీడియా ముందు పబ్‌కు సంబంధించిన అనుమతులంటూ కొన్ని పత్రాలు చూపించారు. అయితే ఎక్సైజ్‌ సూపరింటెండెంట్‌ బలరామకృష్ణ మాత్రం నెల్లూరు నగరంలో పబ్‌లకు అనుమతి ఇవ్వలేదని, నిబంధనలకు విరుద్ధంగా పబ్‌లు నిర్వహిస్తే, కేసులు నమోదు చేసి చర్యలు తీసుకుంటామని హెచ్చరించారు. సోమవారం ఎక్సైజ్‌ మంత్రి కొల్లు రవీంద్ర ఎక్సైజ్‌ అధికారులతో జరిపిన సమీక్షలో సైతం ఈ పబ్‌ విషయం చర్చకు వచ్చింది.

మరి ఎక్సైజ్‌ అధికారులు అనుమతు లివ్వకా? ఎక్సైజ్‌ మంత్రికీ తెలియక సింధూర పబ్‌కు ఎవరు అనుమతులిచ్చినట్లు? అసలు అనుమతి లేకుండా నిర్వాహకులు అంత ధైర్యంగా పబ్‌ను ప్రారంభించగలరా? నిజం తొందర్లోనే బయటపడొచ్చు.

drugsకేంద్రప్రభుత్వం కోట్లు ఖర్చు చేసి స్వచ్ఛభారత్‌ అంటూ ఊదరగొడుతున్నా, మరుగుదొడ్లు నిర్మించుకోవాలని పదేపదే ప్రచారం చేస్తున్నా.. ఇప్పటికీ ప్రకృతిని ఆస్వాదిస్తూ బహిర్భూమికి వెళ్ళే సంస్కృతి మన వాళ్ళది. అనాదిగా వస్తున్న ఆచారా లని, అలవాట్లని ఇప్పటికిప్పుడు మార్చుకోమంటే మార్చుకోలేని మనస్తత్వాలు మనోళ్ళవి. ఇలాంటి సంప్రదాయాలు పాటించే సమాజంలో రాత్రికి రాత్రే మార్పులు తెచ్చి సంఘ సంస్కర్తలమనే బిరుదు పొందాలని తాపత్రయపడుతుంటారు కొందరు. అలాంటి కొందరిలో ఒక్కడే నెల్లూరుజిల్లా ఔషధ నియంత్రణాధికారి.

తాను అవినీతి మచ్చలేని నిఖార్సయిన అధికారినని ముక్కు సూటిగా వెళ్ళడం తన విధానమని చెప్పుకుంటూ నియంత పోకడతో మందుల వ్యాపారులకు ఈ అధికారి చిరాకు తెప్పి స్తున్నట్లు సమాచారం. అసిస్టెంట్‌ డైరెక్టర్‌గా డ్రగ్స్‌ కంట్రోల్‌ విభాగంలో విధులు నిర్వహిస్తున్న ఈయన మనిషి మంచోడే కానీ... అంటూ మందులషాపు యజమానులు తమ యాష్టను వెళ్ళగ్రక్కుతున్నారు. ఇలాంటి మంచి అధికారిని మేమిప్పటివరకూ చూడలేదు అంటూనే తమ గోడు విన్నవిస్తున్నారు. చిన్నపాటి తప్పులకు కూడా పెద్దపెద్ద శిక్షలు వేసి మా కడుపు కొడుతున్నా డంటూ వాపోతున్నారు. నియంత్రణాధికారి నియంతలా వ్యవహ రించడం సబబుకాదని నికార్సయిన అధికారి ఇలా నిక్కచ్చిగా ప్రవర్తించడం విచారకరమంటూ బాధపడుతున్నారు.

ఆయనేం చేస్తున్నాడంటే...

- మందుల దుకాణాలలో పనిచేసేవారు ఖచ్చితంగా యాప్రాన్‌ (తెల్లకోటు) ధరించాలని అదేశిస్తున్నాడు. ఆయన దుకాణాన్ని సందర్శించినప్పుడు తెల్లకోటు వేసుకోకుండా వుంటే కనీసం 10 నుండి 15రోజులు షాపు మూసేస్తున్నాడంట. అంత చిన్న తప్పుకు ఇది అతిపెద్ద శిక్షే.

- పెద్దసైజు దుకాణాలలో ఎక్స్‌పైరి స్టాక్‌ కనీస మోతాదులో కనపడ్డా వెంటనే ఆ షాపుని 15రోజులు సీజ్‌ చేసేస్తున్నాడట. వేలాది మందులు నిలువ వుంచుకునే దుకాణాలలో ఎక్కడో ఒక్క మందు దొరికితే ఇంతపెద్ద శిక్ష వేయడం అన్యాయం అన్నది మందులషాపు యజమానుల ఆవేదన. వారంలో ఒకసారి అన్నీ పరిశీలించుకుని ఎక్స్‌పైరీ మందులను తామే తీసేస్తామని, కానీ ఈలోగానే ఈ అధికారి తమ మీద సవారీ చేస్తున్నాడన్నది వీరి వాదన.

- 5 సంవత్సరాలకోసారి మందులషాపుల లైసెన్సులు రెన్యూవల్‌ చేసుకోవాలి. రెన్యూవల్‌ సమయంలో షాపు కొలతలు సరిగ్గా వున్నాయా లేదా, షాపు యజమానికి డిఫార్మసి పట్టా వుందా లేదా అన్నది ఖచ్చితంగా గమనించాలి. అయితే షాపుకు సంబంధించిన లీజు అగ్రిమెంటు కూడా ఈ అధికారి జత చేయమనడంతో షాపు నిర్వాహకులకు భవన యజమానులతో పెద్ద సమస్య ఎదురౌతుంది. అప్పటి వరకూ 10వేలో లేక 5వేలో వున్న బాడుగను భవన యజమానులు ఒక్కసారిగా పెంచేస్తున్నారు. లీజు అగ్రిమెంటు లేకపోతే లైసెన్సు రెన్యూవల్‌ కాదన్న సాకుని అడ్డం పెట్టుకుని భవన యజమానులు షాపు నిర్వాహకులను ఇబ్బంది పెడుతున్నారు. ఈ పరిస్థితికి కూడా ఈ అధికారే కారణం కావడం గమనార్హం.

- మందుల చీటీ లేకుండా మందులు అమ్మడానికి లేదనడం మంచిదే కావచ్చు కానీ ఆచరణలో ఇది అసాధ్యమైన విషయం. దీర్ఘకాల రోగాలతో బాధపడే ఎంతోమంది గ్రామీణ ప్రాంత వాసులు నిరక్షరాస్యులు తమ వద్ద వున్న పాత మందులనే శాంపిల్‌గా తీసుకెళ్లి మళ్లీ అవే మందులు కొనుగోలు చేస్తుం టారు. వెళ్లిన ప్రతిసారీ మందుల చీటీ చూపించాలంటే వాళ్లకి చాలా కష్టం.

తప్పు నిజంగా జరిగితే తప్పు చేసినవారికి భారీ జరిమానా విధించినా ఫరవాలేదు కాని, ఇలా రోజుల తరబడి మందుల షాపులను మూసేయించడం సమంజసం కాదు. పెద్దపెద్ద నిరసనలు బంద్‌లు జరిగే సమయాల్లో కూడా మందులషాపులకు మినహాయింపు వుంటుంది. అలాంటిది ఈ అధికారి వారాల తరబడి షాపులను మూయించడం ఆయన నిరంకుశ పోకడకు అద్దం పడుతుందని దుకాణదారులు ఆవేదన చెందుతున్నారు.

రూల్‌ ఈజ్‌ రూల్‌ అంటూ తనను తాను భుజం తట్టు కుంటూ పనిచేస్తున్న ఈ అధికారి పొగతోటలో ఆసుపత్రులకు అనుబంధంగా వున్న మందులషాపుల జోలికి అస్సలు వెళ్లడం లేదు. ఎక్కువగా శాంపిల్స్‌ దొరికేది ఆ షాపుల్లోనే. అయితే ఆసుపత్రి నిర్వాహకుల పరపతి ఏ స్థాయిలో వుంటుందోనన్న భయంతో ఈయన వారి జోలికి మాత్రం పోవడం లేదు. వారిని నియంత్రించడంలో తన నియంత పోకడని చూపించడం లేదు. రూల్‌ ఎవరికైనా రూలే సార్‌...

మహానగరాలలో సైతం లేని అలవాట్లను నెల్లూరులాంటి ప్రదేశాల్లో అమలు చేయాలంటే కష్టమే. మీ నిజాయితీని నిబద్ధతలను ప్రదర్శించుకోవడానికి సామాన్య షాపు యజమాను లను ఇబ్బంది పెట్టడం సబబు కాదు. నెల్లూరులో అక్రమాల నిలయాలుగా వున్న ఎన్నో కార్పొరేట్‌ ఆసుపత్రులకు అను బంధంగా మందుల దుకాణాలున్నాయి. ఆ దుకాణాలపై దాడి చేసే ధైర్యం దమ్ము మీకుందా..? అని మందులషాపు యజ మానులు ప్రశ్నిస్తున్నారు. దీనికి మీ సమాధానం ఏమిటి...? ఒక్కసారి ఆలోచించుకోండి మన చేతిలో అధికారం వుంది కదా అని కామన్‌మేన్‌ని ఇబ్బంది పెట్టి, కార్పొరేట్‌ రంగాన్ని వదిలిపెట్టడం నిజాయితీ అనిపించుకోదు.

దొంగ మందులను, ఎక్స్‌పైరీ మందులను నియంత్రించే బాధ్యతే మీది కాని, ఇలా నియంతలా వ్యవహరించడం ఎంతవరకు న్యాయమో మీరే ఆలోచించుకోవాలి...?

cc camనెల్లూరు నగరంపై నిఘాకళ్లు వేలాడు తున్నాయి. ఎక్కడ ఏం జరిగినా, ఎక్కడ ట్రాఫిక్‌జాం అయినా, ఎక్కడ వాహన దారులు ట్రాఫిక్‌రూల్స్‌ను అధిగమించినా, ఎక్కడ అడ్డదిడ్డంగా వాహనాలను నిలిపినా జిల్లా పోలీసు కార్యాలయానికి ఇట్టే తెలిసిపోతుంది. ట్రాఫిక్‌రూల్స్‌ అతిక్ర మించిన వాహనదారుడి ఇంటికి పక్కరోజే పెనాల్టీ నోటీస్‌ వస్తుంది.

నెల్లూరు నగరంలోని ప్రధాన ప్రాం తాల్లో సి.సి కెమెరాలు ఏర్పాటు చేయాలని ఎస్పీ విశాల్‌గున్నీ నిర్ణయించారు. ఈ నేపథ్యంలో నగరాన్ని కొన్ని రింగ్‌లుగా విభజించారు. వీటిలో ప్రధానమైన రింగ్‌ కె.వి.ఆర్‌ పెట్రోల్‌ బంకు నుండి మొదలై ఆర్టీసీ, విఆర్‌సి, గాంధీబొమ్మ, ఏ.సి సెంటర్‌, బోసుబొమ్మ, ఆత్మకూరు బస్టాండ్‌, మినీబైపాస్‌ల మీదుగా బెజవాడ గోపాలరెడ్డి బొమ్మ వద్ద టర్న్‌ తిరిగి మాగుంట లే అవుట్‌ మెయిన్‌రోడ్డు గుండా తిరిగి కెవిఆర్‌ పెట్రోల్‌ బంకు వద్ద కలుస్తుంది. ఈ రింగ్‌లో సిసి కెమెరాల ఏర్పాటు పూర్తయ్యింది. ఓ ప్రైవేట్‌ కేబుల్‌ నెట్‌వర్క్‌ లైన్ల ద్వారా ఈ కెమెరాలన్నింటిని పోలీసు కార్యాలయంలోని కమాండ్‌ కంట్రోల్‌ సిస్టంకు అనుసంధానం చేశారు. ఈ రింగ్‌లోని ప్రాంతాలలో ఎటువంటి అసాంఘిక కార్యకలాపాలు చోటుచేసు కున్నా, నేరాలు జరిగినా, లేక ట్రాఫిక్‌ సమస్యలు ఎదురైనా పోలీసులు తక్షణం స్పందించడానికి అవకాశముంటుంది. అలాగే నేరగాళ్లను పట్టుకోవడానికి సి.సి కెమెరా విజువల్స్‌ బాగా ఉపయోగపడ తాయి. ముఖ్యంగా ట్రాఫిక్‌ క్రమబద్ధీకరణ సులభమవుతుంది. మొదటి రింగ్‌లో కీలక ప్రాంతాలన్నీ నిఘా పరిధిలోకి వచ్చాయి. తదుపరి మిగతా ప్రాంతాల్లో కూడా సి.సి కెమెరాలు ఏర్పాటు కొనసాగనుంది.

Page 3 of 10

newsbottomad

ఎక్కువగా చదివిన వార్తలు

  • అసలు పని వదిలేసి... అన్న క్యాంటిన్‌లు ఎందుకో?
    గుర్రం చేసే పని గుర్రం చేయాలి, గాడిద చేసే పని గాడిద చేయాలి... అని పెద్దలు చెప్పిన పాత మోటు సామెత అందరూ వినే వుంటారు. పారిశుద్ధ్య కార్మికుడి పని వీధులను శుభ్రంగా ఉంచడం... ఆ పని అతనే చెయ్యాలి. అదే…
  • తప్పెవరిది?
    నెల్లూరుజిల్లా డిఇఓగా మువ్వా రామలింగం వస్తున్నాడని తెలిసి జిల్లాలో అన్ని ఉపాధ్యాయ సంఘాలు ఆందోళనలు నిర్వహించాయి. మాకీ డిఇఓ వద్దంటూ ఉపాధ్యాయులు నెత్తి నోరు బాదుకుని చెప్పారు. 'పోకిరి' సినిమాలో మహేష్‌బాబు పోలీసు ఆఫీసర్‌ అని తెలిసాక అతని ట్రాక్‌రికార్డు గురించి…
  • ఆ పైపులతో... ఆయకట్టుకు నీళ్ళు కట్‌
    చేసే అభివృద్ధి పనులు ప్రజలకు మంచి చేసేలా వుండాలేగాని ఇంకొంచెం ఇబ్బందిగా మారకూడదు. ఒకరి సమస్య తీర్చడానికి చేస్తున్న పని ఇంకో పది మందికి సమస్య కాకూడదు. కాని, నెల్లూరు రూరల్‌ పరిధిలోని 31వ డివిజన్‌ శ్రామికనగర్‌ వద్ద కనుపూరు కాలువపై…
  • ఓటమి నేర్పిన పాఠమేంటి?
    గెలిస్తే ప్రపంచానికి నువ్వు తెలుస్తావ్‌... ఒక్కసారి ఓడిపోయి చూడు ప్రపంచమేంటో నీకు తెలుస్తుంది. రాజకీయాలలో గెలుపును ఆస్వాదించే వాడు కాదు, ఓటమిని భరించేవాడు, ఆ ఓటమితో పాఠాలు నేర్చుకునే వాడు, ఆ ఓటమిని రేపటి విజయానికి మెట్లుగా మలచుకునేవాడే నిజమైన రాజకీయ…
  • వైకాపాలోనూ... నేతలమధ్య కలతలు
    రాష్ట్రంలోనే వైయస్సార్‌ కాంగ్రెస్‌పార్టీ బలంగా వున్న జిల్లాల్లో నెల్లూరొకటి. ఒకప్పుడు కాంగ్రెస్‌కు కంచుకోట లాంటి ఈ జిల్లా ఇప్పుడు వైకాపాకు పెట్టనికోట అయ్యింది. 2014 ఎన్నికల్లో నెల్లూరు, తిరుపతి ఎంపి స్థానాలతో పాటు జిల్లాలో ఏడు అసెంబ్లీ స్థానాలను గెలుచుకుంది. ఆ…

Newsletter