నెల్లూరులో నేడు (135)

credit cardదోపిడీ అనేది ఏ రూపంలో అయినా జరిగిపోతుంటుంది. నోట్ల రద్దు తర్వాత డిజిటల్‌ కరెన్సీని పెంచాలని ప్రభుత్వం ప్రచారం చేయడం తెలిసిందే! డిజిటల్‌ కరెన్సీతో దోపిడీలు, మోసాలు, టోటల్‌గా నేరాలు తగ్గుతాయన్నది ప్రభుత్వం ఉద్దేశ్యం. ఇంట్లోనో, జేబులోనో కరెన్సీ రూపంలో నగదు వుంటే దోపిడీకి ఆస్కారం వుంటుంది. అదే డిజిటల్‌ కరెన్సీ అయితే దొంగల బాధ ఉండదనే నమ్మక ముంది. అయితే మోసగాళ్లు ఇంకా తెలివి మీరిపోయారు. డిజిటల్‌ కరెన్సీని కూడా వదలడం లేదు.

ఎల్లయ్యకు ఒక నెంబర్‌ నుండి ఫోన్‌ వచ్చింది.. ఎల్లయ్య ఫోన్‌ ఆన్‌ చేశాడు. అవతల నుండి వాయిస్‌... మేం కస్టమర్‌ కేర్‌ నుండి మాట్లాడుతున్నామండి, మీ ఏటిఎం కార్డు రెన్యూవల్‌ చేయాలి, ఒక్క సారి కార్డుపైన వున్న పిన్‌కోడ్‌ నెంబర్‌ చెబుతారా అని ఎంతో వినయంగా అడుగుతారు. ఎల్లయ్య వెంటనే కార్డు మీద నెంబర్‌ చూసి చెప్పేస్తాడు. తర్వాత సివివి నెంబర్‌, ఓటిపి నెంబర్లు కూడా అడిగాడు. ఎల్లయ్య చెప్పేసాడు. ఫోన్‌ పెట్టేయగానే ఎల్లయ్య ఫోన్‌కు మెసేజ్‌... అతని అకౌంట్‌లో 70వేలు కట్‌... ఎల్లయ్యకు పరిస్థితి ఏమీ అర్ధం కాలేదు. సైబర్‌ మోసగాళ్ళు క్షణాల్లోనే ఆన్‌లైన్‌ షాపింగ్‌ ద్వారా ఎల్లయ్య అకౌంట్‌లో వున్న 70వేల రూపాయలను ఊడ్చేసారన్నమాట. ఇది ఉదాహరణ. ఇటీవల జిల్లాలో ఇలాంటి కేసులు ఎక్కువుగానే జరిగాయి. సైబర్‌ నేరగాళ్లు ఏ పశ్చిమబెంగాల్‌ నుండో బీహార్‌ నుండో ఇలాంటి ఆపరేషన్లు నిర్వహిస్తుం టారు. అక్కడ నుండే ఇక్కడున్న వారి అకౌంట్లలో డబ్బులు ఊడ్చేస్తున్నారు. పోలీసులకు ఫిర్యాదు చేసినా పోయిన డబ్బులు తిరిగి రావనే ఉద్దేశ్యంతో బాధి తులు ఫిర్యాదు చేయడం లేదు. ముఖ్యంగా ఈ విషయంలో బ్యాంకులు, పోలీసులు, మీడియా కూడా ప్రజలను, ముఖ్యంగా క్రెడిట్‌ కార్డులు వాడే ఖాతాదారులను అప్రమత్తం చేయాల్సి వుంది. క్రెడిట్‌ కార్డు పిన్‌ నెంబర్‌ చాలా రహస్యం. ఎవరు ఫోన్‌ చేసి పిన్‌ నెంబర్‌ అడిగినా వెంటనే చెప్ప కుండా ఖాతాదారులు జాగ్రత్త పడాలి. ఖాతాదారుడి క్రెడిట్‌ కార్డు పిన్‌కోడ్‌తో బ్యాంకు అధికారులకు పని లేదు. దానికి సంబంధించిన సమస్య ఏదైనా వుంటే ఖాతాదారులు నేరుగా బ్యాంకులకే వెళ్లి మాట్లాడుకోవచ్చు. బ్యాంకులు తమ ఖాతాదారులకు ఆ విధంగా చైతన్యపర చాల్సిన అవసరం వుంది.

kotam edupuసీనియర్‌ సిటిజన్‌లు, విశ్రాంత ఉద్యోగులు సేద తీరడం కోసం, నలుగురు కలిసి మంచిచెడ్డలు చెప్పుకుంటారనే సదుద్దేశ్యంతో నెల్లూరు గ్రామీణ ఎమ్మెల్యే కోటంరెడ్డి శ్రీధర్‌రెడ్డి తన నియోజకవర్గ పరిధిలో 'పెద్దలకొలువు' పేరుతో వారికి విశ్రాంతి భవనాల నిర్మాణానికి శ్రీకారం చుట్టారు. ఇందులో భాగంగానే ఇటీవల మొదటి పెద్దల కొలువుకు నెల్లూరు, పొదలకూరురోడ్డులో ఈఎస్‌ఐ ఆసుపత్రి ముందు కొంచెం స్థలంలో సీనియర్‌ సిటిజన్స్‌ చేతుల మీదుగానే శంకుస్థాపన చేయించారు. తన స్వంత నిధులతో దీనికి స్లాబు కూడా వేయించారు. నగర కమిషనర్‌ నోటి మాట తీసుకునే ఈఎస్‌ఐ ఆసుపత్రి ముందు దీని నిర్మాణం చేపట్టాడాయన!

అయితే గత నెల 31వ తేదీ నుండి ఈ నెల 3వ తేదీ వరకు నగరంలో అక్రమ కట్టడాల కూల్చివేతలు జరగడం తెలిసిందే! ఈ కూల్చివేతల పరంపరలో ఈ నెల 3వ తేదీన కార్పొరేషన్‌ సిబ్బంది 'పెద్దలకొలువు' విశ్రాంతి మందిరాన్ని కూడా పూర్తిగా నేలమట్టం చేసేసారు. అడ్డుకోబోయిన వృద్ధులను పోలీసుల సాయంతో నెట్టేసారు. 'పెద్దలకొలువు'ను కుప్పకూల్చారన్న సంగతి ఓ పెళ్లి వేడుకకు హాజరై వున్న కోటంరెడ్డికి తెలిసింది. ఆయన వెంటనే సంఘటనా స్థలికి వచ్చారు. కుప్పకూలిన తన ఆశల సౌధం చూసి ఆయన మనసు ముక్కచెక్కలైంది. హృదయం మూగబోయింది. అక్కడే కూలబడిపోయి భోరున విలపించాడు. దాదాపు గంటసేపు మండుటెండలోనే కూర్చుని నిరసన తెలిపాడు. కార్పొరేషన్‌ కమిషనర్‌ ఢిల్లీరావు పరిస్థితి సీరియస్‌ కావడాన్ని గమనించి అక్కడకు చేరుకు న్నాడు. జరిగిన సంఘటన పట్ల విచారం వ్యక్తం చేస్తూ సమన్వయ లోపంతోనే ఇలా జరిగిందని, పెద్దల కొలువుకు తానే మాట పూర్వకంగా అనుమతినిచ్చానని ఒప్పు కున్నారు. అనుమతి లేని భవనం కాబట్టి స్లాబుకు బొక్కలు పొడవమంటే, సిబ్బంది పూర్తిగా కూల్చారని, సమన్వయలోపం వల్లే ఇలా జరిగిందని బాధపడ్డారు.

'పెద్దలకొలువు' కూల్చివేతతో ఈ ప్రాంత ప్రజల్లోనూ తీవ్ర ఆగ్రహావేశాలు వ్యక్తమయ్యాయి. ప్రభుత్వంలో, అధికా రంలో ఉన్నోళ్ళు చేయలేని పనిని ప్రతిపక్ష ఎమ్మెల్యే చేస్తుంటే, దానిని కూడా అడ్డుకో వడర ఎంత దుర్మార్గమని ప్రశ్నిస్తున్నారు.

కాగా, 4వ తేదీన కూల్చిన స్థలం లోనే తిరిగి 'పెద్దలకొలువు' పునరుద్ధర ణకు కోటంరెడ్డి శ్రీధర్‌రెడ్డి శ్రీకారం చుట్టాడు. ఈసారి ఇక కార్పొరేషన్‌ వాళ్ళు దానిజోలికి పోకపోవచ్చు. ఎందుకంటే ఒక్కసారికే కోటంరెడ్డి అంటే ఏంటో వాళ్ళు చూశారు.

busesఫిట్‌నెస్‌ సర్టిఫికేట్లకు వెళ్తే... ఇన్సూరెన్స్‌ ఫిటింగ్‌...!

జిల్లా అధికారి చెప్పాడంటూ బెదిరింపులు

బెంబేలెత్తుతున్న వాహన యజమానులు

అతడు కేవలం కానిస్టేబుల్‌. హెడ్‌కానిస్టేబుల్‌గా ప్రమోషన్‌ వచ్చినా ట్రాన్స్‌ఫర్‌ వస్తుందనే భయంతో ప్రమోషన్‌ని తిరస్కరించి ''పిట్‌నెస్‌'' విభాగ టేబుల్‌కే పదమూడేళ్ళుగా పరిమితమైపోయిన పవర్‌ఫుల్‌ కానిస్టేబుల్‌.

కుటుంబసభ్యుల పేరుతో ఇన్సూరెన్స్‌ కంపెనీ పెట్టాడు, దొడ్డిదారిలో అక్రమార్జన మరిగాడు. స్కూళ్ళ యజమానులకు చుక్కలు చూపిస్తున్నాడు. వందలాది వాహనాలకు తానే ఇన్సూరెన్స్‌ ఏజెంట్‌గా మారాడు. ఆ ఇన్సూరెన్స్‌ కంపెనీ ద్వారా దొడ్డిదారిన భారీగా అక్రమార్జనకు పాల్పడుతున్నాడనే ఆరోపణలు సర్వత్రా వినిపిస్తున్నాయి. వాహన యజమానులు, స్కూళ్ళ యజమాన్యాలూ దిక్కు తెలియక ఎవరికి మొరపెట్టుకోవాలో అర్ధంకాక సతమతమౌతున్నారు.

నెల్లూరు నగరంలో ఇప్పుడు 'టాక్‌ ఆఫ్‌ ది టౌన్‌' ఏమిటంటే, 'ఫిట్‌నెస్‌' సర్టిఫికెట్ల మాయాజాలమే. ఎక్కడ విన్నా దీనిగురించే చర్చ జరుగుతోంది. ఈ సర్టి ఫికెట్‌ల పేరుతో వాహనాల యజమాను లను నిలువుదోపిడీ చేస్తున్నారనే విషయం నగరమంతా వినిపిస్తోంది. రవాణా శాఖలో జరుగుతున్న ఈ మాయాజాలం పై ప్రజలు, వాహనాల యజమానులు జోరుగానే చర్చించుకుంటున్నారు. ఇంతకీ ఆ కథా కమామిషు ఏమిటంటే, ఆర్టీఏ కార్యాలయంలో ఓ పేరుమోసిన కాని స్టేబుల్‌ ఈ తంతు అంతా గుట్టుచప్పుడు కాకుండా కానించేస్తున్నారనే ఆరోపణలు సర్వత్రా వినిపిస్తున్నాయి. నెల్లూరు నగరంలో కనీసం వెయ్యికి పైగానే స్కూల్‌ బస్‌లు వున్నాయి. ఇవి కాక, ఆటోలు, ఇతరత్రా వాహనాలు పెద్దసంఖ్యలోనే వున్నాయి. అయితే, ఇవన్నీ ఏడాదికోసారి ఫిట్‌నెస్‌ సర్టిఫికెట్‌ తప్పనిసరిగా తీసు కోవాలి. ఇదే అదనుగా, ఆ విభాగంలో వున్న ఓ కానిస్టేబుల్‌ ధనార్జనకు మరిగి, అక్రమాలకు తెరతీసినట్లు విమర్శలు వినిపిస్తున్నాయి. గత కొంతకాలంగా జరుగుతున్న ఈ ప్రహసనం గురించి ఎవరూ పట్టించుకోకపోవడంతో ఇక ఆయనదే ఇష్టారాజ్యమైపోయిందని,

గత పదమూడేళ్ళుగా అదే సీట్‌లో పాతుకుపోయిన ఆయన, తన కుటుంబ సభ్యుల పేరుతోనే ఓ ఇన్సురెన్స్‌ కంపెనీ కూడా ప్రారంభించి, వందలాది వాహ నాలకు తానే ఇన్సురెన్స్‌ ఏజెంట్‌గా మారాడని, ఈ సర్టిఫికెట్‌ల మాయా జాలంతో రెండుచేతులా అక్రమార్జన చేస్తున్నాడని వాహనాల యజమానులు గగ్గోలు పెడుతున్నారు. తనకు హెడ్‌ కానిస్టేబుల్‌గా ప్రమోషన్‌ వచ్చినా, ఆ ప్రమోషన్‌ను అంగీకరిస్తే తానెక్కడికి బదిలీ అవాల్సివస్తుందేమోనని ప్రమో షన్‌ను కూడా తిరస్కరించిన ఘనత ఆయనకే దక్కుతుందని, ఇంతగా ఆయన అక్కడ పాతుకుపోయినా పట్టించుకునే అధికారే లేడని వారు వాపోతున్నారు. అదేమని అడిగితే, జిల్లా ఉన్నతాధికారుల పేరు చెప్పి బెదిరిస్తున్నాడని వారు ఆవేదన వ్యక్తం చేస్తున్నారు. రవాణాశాఖ పరువు పోయే విధంగా, తన విభాగాన్నే అక్ర మాల అడ్డాగా మార్చుకుని అడ్డదిడ్డంగా ముడుపులు మూటగట్టుకుంటున్నా సంబంధిత అధికారులు పట్టించుకోక పోవడం విచారకరమని వారు ఆవేదన వ్యక్తం చేస్తున్నారు.

జిల్లా ఉన్నతాధికారులైనా ఈ విష యాలు పరిశీలించి, నిజానిజాలు వెల్ల డించాలని, ఫిట్‌నెస్‌ సర్టిఫికెట్ల పేరుతో జరుగుతున్న ఈ నిలువుదోపిడి విషయాన్ని విచారించి తగు చర్యలు తీసుకోవాలని వాహనాల యజమానులు కోరుకుంటు న్నారు. వాహనాల యజమానుల పట్ల ఇలా అక్రమరీతిలో వ్యవహరించడం అన్యాయమని, ఇకనైనా వాహనాల ఫిట్‌నెస్‌ సర్టిఫికెట్ల పంపిణీలో రవాణా అధికారులు నిజాయితీగా, పారదర్శకంగా వ్యవహరించేవారిని ఆ విభాగంలో నియ మించాలని వాహనాల యజమానులు కోరుకుంటున్నారు.

pigsనెల్లూరు నగరంలో మంత్రులు, మేయర్‌, కార్పొరేటర్లు... అందరూ వందల కోట్లలో అభివృద్ధి పనుల గురించి మాట్లాడేవాళ్లే! కాని మూడేళ్లుగా చూస్తున్నాం కదా... మాటలెక్కువ, పనులు తక్కువ అన్నట్లుగా వుంది పనితీరు. నగరంలో ప్రజలకు ప్రధాన సమస్యగా మారింది పందులు, దోమలు. ఇప్పుడు కాస్తున్న ఎండల దెబ్బకు ముదురుదోమలు మలమల మాడి చస్తున్నాయి. కాని, పం దులు మాత్రం తగ్గడం లేదు. నెల్లూరులో మనుషుల కంటే పందులు సంఖ్య పెరిగి పోతోంది. కొంతమంది వీటిని కోసుకుని తింటుండబట్టి సరిపోతుంది గాని లేకుంటే నెల్లూరు రోడ్లు, వీధుల్లో మనుషులు నడవ డానికి కూడా సందులేనంతగా పందులు తిరుగుతుండేవి. నెల్లూరు నగరంలో మురికివాడల్లోనే కాదు, నెల్లూరు జూబ్లీ హిల్స్‌గా చెప్పుకునే మాగుంట లే అవుట్‌, ఆదిత్యనగర్‌ వంటి ప్రాంతాల్లో కూడా పందులు మందలు మందలుగా తిరుగు తున్నాయి. పందుల పెంపకందార్ల దెబ్బకు జడిసి పాలకులు పందుల ఏరివేత జోలికి పోవడం లేదు. కాని, కార్పొరేషన్‌ కమిషనర్‌ ఢిల్లీరావు మాత్రం పందుల విషయంలో చాలా సీరియస్‌గా వున్నాడు. 22వ తేదీ ఆయన తన ఛాంబర్‌లో శానిటేషన్‌ అధికా రులు, పందుల యజమానులతో మీటింగ్‌ పెట్టుకున్నారు. పందుల ఏరివేతకు వాళ్లకు 45రోజుల గడువిచ్చారు. ఆ గడువు తర్వాత ఏ సందులో పంది కనిపించినా కాల్చివేస్తామని గట్టిగానే వార్నింగ్‌ ఇచ్చారు. ఈ విషయంలో కమిషనర్‌ గట్టిగానే వున్నట్లు కనిపిస్తోంది. ఆయన వార్నింగ్‌ పనిచేస్తే 45రోజుల తర్వాత మనకు నగరంలో చూద్దామనుకున్నా పందులు కనిపించకపోవచ్చు.

kotamరోడ్డు ప్రమాదాలకు కేరాఫ్‌ అడ్రస్‌గా మారిన బుజబుజనెల్లూరు జాతీయ రహదారి ప్రాంతంలో సర్వీస్‌రోడ్డు ఏర్పాటుకు కేంద్రప్రభుత్వం జి.ఓ జారీ చేసింది. దీంతో ఈ ప్రాంతవాసులు ఆనందభరితు లవుతున్నారు. నెల్లూరు నగరం ట్రంక్‌రోడ్డు జాతీయ రహదారిలో కలిసే చోట నుండి బుజబుజనెల్లూరు ప్రాంతం మొదటి భాగం వరకు సర్వీస్‌రోడ్డు లేదు. నెల్లూరులో నుండి బుజబుజనెల్లూరులోకి వాహనాలలో వెళ్లే వాళ్ళు చుట్టూ తిరుక్కుని పోలేక రాంగ్‌రూట్‌లో హైవే మీదనే పోతున్నారు. దీంతో అత్యంత వేగంగా వచ్చే వాహనాల వల్ల పలు ప్రమాదాలు జరిగాయి కూడా! నెల్లూరు గ్రామీణ ఎమ్మెల్యే కోటంరెడ్డి శ్రీధర్‌రెడ్డి ఈ సర్వీస్‌ రోడ్డు యొక్క ప్రాధాన్యతను గుర్తించారు. నగరంలో సర్వీస్‌ రోడ్డు, అండర్‌పాస్‌ బ్రిడ్జిలు ఏర్పాటు చేయాలంటూ 5 నెలలుగా పోరాడుతున్నాడు. ఈ సమస్యను కేంద్రమంత్రి యం.వెంకయ్యనాయుడు ద్వారా కేంద్ర ఉపరితల రవాణాశాఖ మంత్రి నితిన్‌గడ్కరీ దృష్టికి కూడా తీసుకెళ్లారు. తద్వారా వారి నుండి సర్వీస్‌రోడ్లు, అండర్‌ పాసింగ్‌ బ్రిడ్జిలకు హామీ సాధించారు. ఆయన కృషి ఫలితమే ఇప్పుడు బుజబుజనెల్లూరు సర్వీస్‌రోడ్డు పనులు మొదలయ్యాయి.

water problనెల్లూరులో తాగునీటి సమస్య నానాటికీ తీవ్రమవుతోంది. గత ఏడాది వర్షాలు లేకపోవడం మూలంగా భూగర్భ జలాలు పూర్తిగా అడుగంటిపోయాయి. బావులు, బోర్లు ఎండిపోయాయి. ఆయా కాలనీవాసులతో పాటు అపార్ట్‌మెంట్లలో వుండేవాళ్లు సైతం కార్పొరేషన్‌ నీళ్ల మీదే ఆధారపడుతున్నారు. కొన్ని ప్రాంతాల్లో పైప్‌లైన్‌లు బ్లాకై నీళ్ళు రాక ప్రజలు అవస్థలు పడుతున్నారు. హోటల్స్‌, హాస్పిటల్స్‌ వంటి వ్యాపార సంస్థలతో పాటు అపార్ట్‌మెంట్లలో వుండే వాళ్లు కూడా ట్యాంకర్ల ద్వారా నీళ్ళను కొనుగోలు చేస్తున్నారు. కార్పొరేషన్‌ ఇచ్చే నీళ్ళు తాగడానికే సరిపోకపోతుండగా, కొందరు నీటిని ఇంటి వరండాలు తడపడానికి, ఇళ్లల్లో కార్లు కడగడానికి వృధా చేస్తున్నారు. కొన్ని కొళాయిల వద్ద వాల్వ్‌లు, టాప్‌లు పోయి నీటి వృధా ఎక్కువుగా ఉంటోంది. నీటివృధాపై కూడా కార్పొరేషన్‌ అధికారులు దృష్టి పెట్టాల్సివుంది.

theifనెల్లూరు నగరంలో జూబ్లీహిల్స్‌లాగా పేరుబడ్డ మాగుంట లే అవుట్‌లో ఇప్పుడు దొంగల భయం వెంటాడుతోంది. రాత్రిళ్లు ప్రశాంతంగా కునుకుతీసే పరిస్థితి లేకుండా పోయింది. 

ఇటీవల ఈ ప్రాంతంలో చోటుచేసుకున్న వరుస సంఘటన లతో స్థానికులు ఆందోళన చెందుతున్నారు. గత పదిరోజుల్లోనే లెక్చరర్స్‌ కాలనీలోని ఓ అపార్ట్‌మెంట్‌లో అర్థరాత్రి దాటాక గుర్తు తెలియని దుండగులు ప్రవేశించేందుకు ప్రయత్నించారు. అక్కడేవున్న సెక్యూరిటీ గార్డ్‌ వారిని అడ్డగించడంతో దుండగులు అతని మీద దాడిచేసి పారిపోయారు. ఆ పక్కరోజే ఇదే కాలనీలో నివాసముంటున్న ఓ రిటైర్డ్‌ లెక్చరర్‌ ఇంటిలోకి దుండగులు ప్రవేశించారు. అయితే అలికిడికి ఆ ఇంటిలోని వారు లేచి అరవడంతో దుండగులు పరారయ్యారు. ఇవి జరిగిన పక్కరోజే మాగుంట లేఅవుట్‌ ఒకటి, రెండో వీధిల్లో వుంటున్న ఓ రెండిళ్లలో దోపిడీలకు దుండగులు స్కెచ్‌ వేశారు. సురేంద్రరెడ్డి అనే వ్యక్తి ఇంట్లోకి ప్రవేశించిన ఆగంతకులు ముందుగా అక్కడున్న సి.సి. కెమెరాలను గుడ్డలతో కప్పారు. వాచ్‌మెన్‌ రూమ్‌కు బయట గడిపెట్టి ఆ ఇంట్లోకి జొరబడాలని చూసారు. అయితే ఆ ప్రయత్నం విఫలం కావడంతో, ఆ ఇంటి వెనుకే వున్న బాలచంద్రారెడ్డి అనే వ్యక్తి ఇంట్లోకి ప్రవేశించారు. కత్తితో కిటికీకున్న మెష్‌ను కత్తిరించి లోపల తగిలించి వున్న తాళాలను తీసుకున్నారు. వెనుకవైపు నుండి తలుపులు తెరచి లోపలకు ప్రవేశించారు. బీరువాను తెరచి నగదు, నగలు దొరక్కపోవ డంతో విలువైన పట్టుచీరలను మూటగట్టారు. ఈ సమయంలో బాలచంద్రారెడ్డి భార్యకు మెళుకువ రావడం, ఇంట్లో ఎవరో దూరినట్లు ఆమె గుర్తించి అలికిడి చేయడంతో ఆగంతకులు పారిపోయారు.

మాగుంట లే అవుట్‌లో గతంలోనూ ఇంటి దోపిడీలు, చైన్‌స్నాచింగ్‌లు ఎక్కువుగానే జరిగి వున్నాయి. మాగుంట లే అవుట్‌ అండర్‌ బ్రిడ్జి వద్ద పోలీస్‌ ఔట్‌పోస్ట్‌ పెట్టినా పెద్దగా

ఉపయోగం లేదు. ఇందులో పోలీసులే ఉండడం లేదు. రాత్రి గస్తీలు అంతంత మాత్రంగా వుంటున్నాయి. దొంగతనం జరిగిందని ఫిర్యాదు చేసినా పోలీసుల నుండి వెంటనే స్పందన రావడం లేదు. పోలీసుల నిఘా కొరవడడం వల్లే దొంగలు యధేచ్ఛగా రెచ్చిపోతున్నారు. మాగుంట లే అవుట్‌లో రాత్రి గస్తీలు ముమ్మరం చేస్తేనేగాని ఈ ప్రాంత ప్రజలు ప్రశాం తంగా ఉండలేరు.

mangoesకృత్రిమ రసాయ నాలతో పండ్లను మాగ బెట్టి ప్రజల ఆరోగ్యాన్ని చెడగొడితే సహించేది లేదంటూ న్యాయస్థానాలు చేసిన హెచ్చరికలు సత్ఫ లితాలనే ఇస్తున్నట్లుంది. ఎండాకాలం అంటే మామిడిపండ్ల సీజన్‌. వీటితో పాటు పుచ్చ, కర్బూజా, ద్రాక్ష, నేరేడు వంటి కాయలు మార్కెట్‌లోకి వచ్చినా ఈ సీజన్‌లో మామిడిపండే కింగ్‌! ఈ కాలంలో మామిడి పండు తినని మనిషంటూ ఉండడు. మామిడిపండ్లకు ఉన్న డిమాండ్‌ను దృష్టిలో పెట్టుకుని వ్యాపారులు ప్రతి ఏడాది కాయ కాపుకు రాకముందే చెట్ల నుండి కోసి రసాయనాలతో మగ్గబెట్టేవాళ్ళు. దీనిమూలంగా పండు పైతొక్క నిగనగలాడుతుండేది, కోసి చూస్తే లోపలంతా చెడిపోయి ఉండేది. ఇలాంటి పండ్లు రుచిగా కూడా వుండవు. ఎవరైనా ఆరోగ్యం కోసం పండ్లు తింటారు. కాని రసాయనాలతో మాగేసిన మామిడిపండ్లను తింటే అనారోగ్యాలను కొని తెచ్చుకున్నట్లుండేది. న్యాయస్థానం దీని మీద చాలా సీరియస్‌గా స్పందించడమే కాక ఒకట్రెండు కేసుల్లో ఇలాంటి అకృత్యాలకు పాల్పడిన వ్యాపారులకు శిక్షలు కూడా వేసింది. దీంతో రసాయనాలతో మాగేసే విధానం తగ్గిపోవడంతో మార్కెట్‌లో మామిడి పండ్లు చాలా తక్కువుగా కనిపిస్తున్నాయి. లేకుంటే ఇదివరకే మామిడి పండ్లు మార్కెట్‌లో గుట్టలు గుట్టలుగా ఉండేవి.

ycpవరల్డ్‌కప్‌ జరుగుతున్నా పందేలే... ఐపిఎల్‌ మ్యాచ్‌లు జరుగుతున్నా పందేలే... కబడ్డీ పోటీలు, టెన్నిస్‌ ఆటలు, బ్యాడ్మింటన్‌ ట్రోఫీలు... ఇలా బెట్టింగ్స్‌ అనేవి క్రీడలకు బాగా పాకిపోయాయి. అవే బెట్టింగ్స్‌ రాజకీయాలలోనూ హల్‌చల్‌ చేస్తున్నాయి. క్రికెట్‌ మ్యాచ్‌లు జరుగుతున్నా, ఎక్కడ ఎలక్షన్‌లు జరుగుతున్నా పందేల రాయు ళ్ళకు పండుగే!

మొన్ననే ఐదు రాష్ట్రాల ఎన్నికల మీద భారీగానే పందేలు జరిగాయి. ముఖ్యంగా ఉత్తరప్రదేశ్‌లో బీజేపీ గెలుస్తుంది, గెల వదు అన్న పాయింట్‌ మీద కోట్ల రూపా యల్లో పందేలు కాసారు.

తాజాగా రాష్ట్రంలో జరిగిన మూడు స్థానిక ఎమ్మెల్సీ ఎన్నికలకు సంబంధించి భారీగానే పందేలు పెట్టినట్లు తెలుస్తోంది. నెల్లూరుజిల్లాలో పోటీపై పందేలు బాగా జరిగాయి. తెలుగుదేశం అభ్యర్థి వాకాటి గెలుపు మీద కొందరు, వైసిపి అభ్యర్థి ఆనం విజయకుమార్‌రెడ్డి గెలుపు మీద కొందరు వేల నుండి లక్షల్లో పందేలు కాసారు. 20వ తేదీ ఫలితాలు వచ్చాయి. తెలుగు దేశం అభ్యర్థి గెలిచాడు. వైసిపి గెలుపు మీద పందేలు కాసినవాళ్ళు డబ్బులు పోగొట్టుకున్నారు. దీన్ని బట్టి చూస్తే వైసిపికి పందేలు కలిసిరావడంలేదనిపి స్తోంది. 2012లో కోవూరు ఉపఎన్నికలు జరిగాయి. వైకాపా అభ్యర్థిగా నిలబడ్డ నల్లపరెడ్డి ప్రసన్నకుమార్‌రెడ్డిపై కోట్లాది రూపాయల పందేలు జరిగాయి. అయితే ఆరోజు ఆయన గెలుపుపై పందేలు కాయ లేదు. మెజార్టీ పాతికవేలు దాటుతుందని, దాటదనే అంశాలపై మాత్రమే పందేలు కాసారు. ఆ ఎన్నికల్లో ఆయన గెలిచినా పాతికవేల మెజార్టీకి 1500ఓట్ల దూరంలో ఆగిపోవడంతో వైసిపి మీద పందేలు కాసిన వాళ్ళందరూ డబ్బులు పోగొట్టుకున్నారు. మళ్ళీ 2014 ఎన్నికల్లోనూ వైసిపి విజయం మీద పందేలు కాసినోళ్ళు నష్టపోయారు. వైసిపి అధికారంలోకి వస్తుందని అప్పుడు భారీగా బెట్టింగ్‌లు పెట్టారు కాని అది జరగలేదు. అలాగే ఇప్పుడు స్థానిక ఎమ్మెల్సీ ఎన్నికల్లోనూ వైసిపిపై పందేలు కాసినవాళ్ళు నష్టపోయారు.

Saturday, 11 March 2017 09:27

భళా... తెలుగు మహిళ

Written by

anuradhaఆడోళ్ళు కడుపులో ఏదీ దాచుకోరు... ఆనందం వచ్చినా పట్టలేము, ఆగ్రహం వచ్చినా తట్టుకోలేము... ఏదీ ఆపుకోలేరు. వారిని చూసి జిల్లా తెలుగుదేశం మగనాయకులు సిగ్గుపడాలి. అవమానంతో తలదించుకోవాలి. జిల్లా తెలుగుదేశం నాయకుల్లో ఒకరంటే ఒకరికి పడదు. ఒకరి వెనుక ఒకరు గోతులు తవ్వుకుంటుంటారు. అయినా ఎదురెదురు పడితే ఆప్యాయంగా మాట్లాడుకుంటారు. కడుపుల్లో కత్తులు పెట్టుకుని కౌగిలించుకుంటారు. మేం మగనాయకులు మాదిరిగా కాదు... లోపల ఒకటి పెట్టుకుని బయట ఇంకోటి చేయలేం, ఏదైనా ఓపెన్‌ ఫైట్‌ అంటూ జిల్లా తెలుగు మహిళలు తమ సత్తా చూపారు. అంతర్జాతీయ మహిళా దినోత్సవం రోజున నెల్లూరులోని జిల్లా తెలుగుదేశం పార్టీ కార్యాలయాన్ని తమ విభేదాలకు వేదికగా మలిచారు.

వివరాల్లోకి వెళితే.. జిల్లా తెలుగుదేశం పార్టీలో నాయకులకు మధ్య విభేదాలున్నట్లే నాయకురాళ్ళ మధ్య కూడా విభేదాలున్నాయి. అయితే నాయకుల మధ్య విభేదాలున్నా బయటపడలేరు. నాయకురాళ్ళు మాత్రం బయటపడ్డారు. 8వ తేదీ పార్టీ రాష్ట్ర ప్రధానకార్యదర్శి, మాజీ మున్సిపల్‌ ఛైర్‌పర్సన్‌ టి.అనూరాధ ఆధ్వర్యంలో టీడీపీ ఆఫీసులో అంతర్జాతీయ మహిళా దినోత్సవం జరిగింది. దీనికి మున్సిపల్‌ మంత్రి పి.నారాయణ అతిథిగా వచ్చి మాట్లాడిపోబోయారు. అంతలో జిల్లా తెలుగు మహిళ అధ్యక్షురాలు పొత్తూరు శైలజ, రాష్ట్ర మహిళా ఆర్ధిక సహకార సంస్థ డైరెక్టర్‌ మల్లి నిర్మలలు ఇంకొందరు మహిళలతో వచ్చారు. మంత్రి నారాయణ ముందే అనూరాధతో మల్లి నిర్మల, శైలజలు గొడవకు దిగారు. తమకు తెలియకుండా తమను పిలవకుండా పార్టీ ఆఫీసులో కార్యక్రమాలు ఎలా నిర్వహిస్తారంటూ నిలదీశారు. దీంతో అనూరాధ వైపు మహిళలు కూడా అరుపులకు లేచారు. మంత్రి వారికి సర్ధిచెప్పి అక్కడ నుండి జారుకున్నాడు. మంత్రి వెళ్ళాక ఇరువర్గాల మధ్య గొడవ ఇంకొంచెం ఎక్కువైంది. ఈ రచ్చ భరించలేక పార్టీ ఆఫీసు ఇన్‌ఛార్జి శీనయ్య మంత్రికి ఫోన్‌ ద్వారా విషయం చెప్పాడు. పార్టీ ఆఫీసు నుండి అందర్నీ పంపించేయమని మంత్రి చెప్పడంతో శీనయ్య అదే పని చేసాడు. మొత్తానికి కడుపులో కసిపెట్టుకుని పెదాలపై చిరునవ్వులు చిందించడానికి మేం నాయకులం కాదు... నాయకురాళ్ళం అని నిరూపించారు తెలుగు మహిళా నేతలు.

Page 2 of 10

newsbottomad

ఎక్కువగా చదివిన వార్తలు

  • అసలు పని వదిలేసి... అన్న క్యాంటిన్‌లు ఎందుకో?
    గుర్రం చేసే పని గుర్రం చేయాలి, గాడిద చేసే పని గాడిద చేయాలి... అని పెద్దలు చెప్పిన పాత మోటు సామెత అందరూ వినే వుంటారు. పారిశుద్ధ్య కార్మికుడి పని వీధులను శుభ్రంగా ఉంచడం... ఆ పని అతనే చెయ్యాలి. అదే…
  • తప్పెవరిది?
    నెల్లూరుజిల్లా డిఇఓగా మువ్వా రామలింగం వస్తున్నాడని తెలిసి జిల్లాలో అన్ని ఉపాధ్యాయ సంఘాలు ఆందోళనలు నిర్వహించాయి. మాకీ డిఇఓ వద్దంటూ ఉపాధ్యాయులు నెత్తి నోరు బాదుకుని చెప్పారు. 'పోకిరి' సినిమాలో మహేష్‌బాబు పోలీసు ఆఫీసర్‌ అని తెలిసాక అతని ట్రాక్‌రికార్డు గురించి…
  • ఆ పైపులతో... ఆయకట్టుకు నీళ్ళు కట్‌
    చేసే అభివృద్ధి పనులు ప్రజలకు మంచి చేసేలా వుండాలేగాని ఇంకొంచెం ఇబ్బందిగా మారకూడదు. ఒకరి సమస్య తీర్చడానికి చేస్తున్న పని ఇంకో పది మందికి సమస్య కాకూడదు. కాని, నెల్లూరు రూరల్‌ పరిధిలోని 31వ డివిజన్‌ శ్రామికనగర్‌ వద్ద కనుపూరు కాలువపై…
  • ఓటమి నేర్పిన పాఠమేంటి?
    గెలిస్తే ప్రపంచానికి నువ్వు తెలుస్తావ్‌... ఒక్కసారి ఓడిపోయి చూడు ప్రపంచమేంటో నీకు తెలుస్తుంది. రాజకీయాలలో గెలుపును ఆస్వాదించే వాడు కాదు, ఓటమిని భరించేవాడు, ఆ ఓటమితో పాఠాలు నేర్చుకునే వాడు, ఆ ఓటమిని రేపటి విజయానికి మెట్లుగా మలచుకునేవాడే నిజమైన రాజకీయ…
  • వైకాపాలోనూ... నేతలమధ్య కలతలు
    రాష్ట్రంలోనే వైయస్సార్‌ కాంగ్రెస్‌పార్టీ బలంగా వున్న జిల్లాల్లో నెల్లూరొకటి. ఒకప్పుడు కాంగ్రెస్‌కు కంచుకోట లాంటి ఈ జిల్లా ఇప్పుడు వైకాపాకు పెట్టనికోట అయ్యింది. 2014 ఎన్నికల్లో నెల్లూరు, తిరుపతి ఎంపి స్థానాలతో పాటు జిల్లాలో ఏడు అసెంబ్లీ స్థానాలను గెలుచుకుంది. ఆ…

Newsletter