deekshaపోరాడి సాధించుకున్న తెలం గాణలో మాత్రం ఆ రాష్ట్ర అవతరణ వేడుకలను ఒక్కరోజులో ముగిస్తు న్నారు. సంబరాలు ఆరోజే జరుపుకుం టున్నారు. మిగతా రోజులు యధావిధిగా పనుల్లో పడుతున్నారు. రాష్ట్రం సాధించుకున్నందుకు వాళ్ళు ఒక్కరోజు పండుగ చేసుకుంటుంటే, రాష్ట్ర విభజన రూపంలో దారుణాతి దారుణంగా నష్టపోయిన మనం మాత్రం ప్రతి సంవత్సరం రాష్ట్ర విభజన జరిగిన జూన్‌ 2వ తేదీ నుండి వారం రోజుల పాటు నవ నిర్మాణ దీక్షల పేరుతో సంతాపసభలను నిర్వహించుకుంటున్నట్లుగా వుంది. మానిన గాయాలను మళ్ళీ పుండ్లుగా రేపుకుంటున్నట్లుంది.

నవనిర్మాణదీక్షల పేరుతో ఈ సంతాప సభలేంటి? రాష్ట్ర విభజనతో నష్టం జరిగిపోయిందని ఎన్ని సంవత్సరాలు ఏడుద్దాం. అసలు అమరజీవి పొట్టి శ్రీరాములు ప్రాణత్యాగంతో ఆంధ్రప్రదేశ్‌ అవతరించిన నవంబర్‌ 1వ తేదీని వదిలేసి, ఆంధ్రుల గుండెల్లో చిచ్చు రగిల్చిన జూన్‌ 2వ తేదీ నాడు ఈ సభలేంటి, ఈ జాతరలేంటి? ఇంకా ఆనాటి ఏడుపులేంటి? అసలు నవనిర్మాణదీక్షలంటూ వారంరోజుల పాటు ఈ తిరునాళ్ళేంటి? ఏం చేయడానికి, ఎవరిని ఉద్ధరించడానికి ఇవి చేస్తున్నట్లు? నవనిర్మాణ దీక్షల పేరుతో వారంరోజుల పాటు జరిగిన జాతర రాష్ట్ర వ్యాప్తంగా అధికారుల్లోనే కాదు, ప్రజల్లోనూ, ఆఖరుకు తెలుగుదేశం పార్టీ నాయకుల్లోనూ అసంతృప్తిని రగిల్చింది. ఏదన్నా ఒకరోజు సభ అంటే జనం వస్తారు. అధికారులు వుంటారు. కార్యకర్తలు వింటారు. రోజూ అదే సభ... అదే ప్రసంగాలు... ఊకదంపుడు ఉపన్యాసాలు... ఎంతసేపని వింటారు... ఎన్నిరోజులని వింటారు. ఎవరికి మాత్రం విసుగురాకుండా వుంటుంది.

ముఖ్యంగా ముఖ్యమంత్రి చంద్రబాబు చెప్పే సోదితో జనం విసుగెత్తిపోతున్నారు. ఈరోజొక మాట, రేపొక మాట చెప్పడం మా ఇంటా వంటా లేదన్నట్లుగా ఆయన ఈరోజు ఏం చెప్పాడో, మరుసటిరోజూ అదే చెబుతున్నాడు. జనం ఒకరోజు వింటారు, రోజూ వినాలంటే వారికి మాత్రం ఓపిక ఉండొద్దా? తెలంగాణ అభివృద్ధి నా పుణ్యమే, హైదరాబాద్‌ను అభివృద్ధి చేసింది నేనే... హైటెక్‌ సిటీని కట్టింది నేనే... చంద్రబాబు స్కోత్కర్ష! అరిగిపోయిన రికార్డిది. ఇంకా ఎంతకాలం వేస్తారు. అమరావతి రాజధాని, పోలవరం ప్రాజెక్ట్‌... దేవుడు ఆదేశించాడట... చంద్రబాబు కడుతున్నాడట! ఏం మాటలివి? ప్రజలు కోరుకున్న పనులు చేయరా? ప్రజల సమస్యలు పరిష్కరించరా? దేవుడు ఆదేశించిన పనులు మాత్రమే చేస్తారా? గతంలో ప్రధానులుగా, ముఖ్యమంత్రులుగా పనిచేసినవాళ్లు దేవుడు ఆదేశించినప్పుడు మాత్రమే ప్రాజెక్టులు కట్టారా? ప్రగతి పనులు చేపట్టారా? ప్రజాస్వామ్యంలో ప్రజలకు మించిన దేవుళ్ళు లేరు. వాళ్ళు ఆదేశించడం లేదు, వారి ఆశలకు తగ్గట్లన్నా పని చేస్తేనే మంచి పరిపాలకులనిపించుకుంటారు.

చంద్రబాబు ఈ మూడేళ్ల పాలనలో ప్రచారం జాస్తిగాను, ప్రగతి నాస్తిగానూ ఉండడం తెలిసిందే! ఈ మూడేళ్లలో మనకు ఘనంగా జరిగాయని చెప్పుకునే పనులేంటంటే గోదావరి, కృష్ణ పుష్కరాలు, పట్టిసీమ. ఈ మూడింటి వల్ల ప్రజలకు ఒరిగిందేమీ లేదు. మూడేళ్ల నుండి సింగపూర్‌ లాంటి అమరావతి రాజధాని అంటూ డప్పుకొడుతున్నారు. సింగపూర్‌ రాజధాని రంగేమిటో మొన్న అమరావతిలో కురిసిన ఒక్క పదును వానతో తేలిపోయింది. సింగపూర్‌ టెక్నాలజీతో భవనాల నిర్మాణం అంటే భవనాలు పగుళ్లివ్వడం, గదుల్లోకి వర్షపు నీళ్లు కారడమేమోనని జనం అనుకుంటున్నారు.

జరగాల్సిన అభివృద్ధిపై దృష్టి పెట్టడంకంటే కూడా జరగని అభివృద్ధిపై ప్రచారం చేసుకోవడం, సభలు పెట్టి చెప్పుకోవడం చంద్రబాబుకు అలవాటైపోయింది. రాష్ట్ర విభజన తేదీలను కూడా ఆయన వారోత్సవాల మాదిరిగా నిర్వహిస్తున్నాడంటే జనానికి ఇంతకుమించిన హింస ఇంకోటి లేదు.

chand tdpఇప్పుడున్న తెలుగుదేశం నందమూరి తారకరామారావు కాలం నాటి తెలుగుదేశం కాదు. కనీసం 1995-2004ల మధ్య కాలం నాటి చంద్రబాబు తెలుగుదేశం కూడా కాదు. ఇది మారిన తెలుగుదేశం. చంద్రబాబు ఏ విధంగా నేను మారానని చెప్పుకుంటున్నాడో... తెలుగుదేశం కూడా అదే విధంగా మారింది! కాంగ్రెస్‌, వైయస్సార్‌ కాంగ్రెస్‌ సమ్మిళితంగా ఈ పార్టీ మారింది. కాబట్టే పార్టీపై అధినేత చంద్రబాబుకు పట్టు తప్పడమే కాదు, అసలు పూర్తిగా పార్టీయే పట్టాలు తప్పి అడ్డదిడ్డంగా పోతోంది.

ఎన్టీఆర్‌ హయాంలో తెలుగుదేశంపార్టీ క్రమశిక్షణకు కేరాఫ్‌ అడ్రస్‌గా వుండేది. ఎన్టీఆర్‌ మాటే పార్టీలో శిలాశాసనం. ఆయన ఆదేశాలను ఎవరూ ధిక్కరించే వాళ్ళు కాదు. ఆయన నేతృత్వంలో మంత్రులు, ఎమ్మెల్యేలు కూడా ఎంతో నిబద్ధతగా పనిచేసేవాళ్ళు. పార్టీని దాటి ఎవరూ బయట కూడా మాట్లాడేవాళ్ళు కాదు. తన క్యాబినెట్‌ నుండి 28మంది మంత్రులను ఒకేసారి తొలగించినప్పుడు కూడా ఏ ఒక్కరూ ధిక్కరించలేదు. ఆయన చేసిన పనిని వేలెత్తి చూపలేదు. పార్టీపై ఆయన కమాండింగ్‌ అలాంటిది. 1995లో చంద్రబాబు చతికిలబడే వరకు కూడా ఎన్టీఆర్‌ పార్టీపై తిరుగులేని ఆధిపత్యాన్ని చెలాయించారు. చంద్రబాబు ఇచ్చిన ఒకే ఒక షాక్‌తో పార్టీయే అతని చేతుల్లో లేకుండా పోయింది. పార్టీని తన చేతుల్లోకి తీసు కున్నాక చంద్రబాబు పార్టీపై అదే ఆధిపత్య ధోరణి కొనసాగిం చాడు. 2004వరకు పార్టీపై చంద్రబాబు పెత్తనానికి తిరుగు లేకుండా పోయింది. ఆ తర్వాత వరుసగా పదేళ్ళు పార్టీ అధికా రంలో లేకపోవడంతో చంద్రబాబు నాయకత్వం బలహీనపడింది.

వై.యస్‌. మరణం, ఏపి విభజన చంద్రబాబుకు రాజకీయంగా పునర్జన్మనిచ్చాయని చెప్పుకోవచ్చు. 2014లో అధికారం కోసం చంద్రబాబు ఎన్ని అడ్డదారులు తొక్కాలో అన్నీ తొక్కాడు. అడ్డమైన వాళ్లందర్నీ పార్టీలో చేర్చుకున్నాడు. ఓట్ల కోసం పార్టీకి సంబంధం లేని వాళ్ళ ముందు మోకరిల్లాడు. కాంగ్రెస్‌ నాయకులకైతే పార్టీ గేట్లు బార్లా తెరిచాడు. అధికారం కోసం ఒక మెట్టు కాదు, చాలామెట్లే చంద్రబాబు దిగాడు.

2014లో చంద్రబాబు సీఎం అయ్యాడంటే అది ఒక్క ఒరిజి నల్‌ తెలుగుదేశంపార్టీ కేడర్‌ వల్లే సాధ్యం కాలేదు, కాంగ్రెస్‌తో పాటు ఇతర పార్టీల నుండి తెలుగుదేశంలోకి వచ్చిన వారివల్ల, లేదంటే బయట వుండి మద్దతునిచ్చిన వారి వల్లే సాధ్యమైంది. ఇక్కడే పార్టీపై చంద్రబాబు పట్టు కోల్పోయాడు. పార్టీ కూడా సైద్ధాంతిక పట్టాలను తప్పింది. పార్టీలో ఎవరిష్టం వచ్చినట్లు వాళ్ళు మాట్లాడుతున్నారు. జేసీ దివాకర్‌రెడ్డి ఏదంటే అది వాగు తాడు. చింతమనేని ప్రభాకర్‌రావు అధికారులను యధేచ్ఛగా కొడతాడు, ఒక ఎమ్మెల్యే ఎస్‌ఐనే నిర్భందిస్తాడు. ఒక పార్టీలో వున్న ఫ్యాక్షనిస్టులు ఒకర్నొకరు చంపుకుంటుంటారు. ఒక ఎమ్మెల్యే బహిరంగంగానే రౌడీయిజం చేస్తాడు. ఒక ఎంపీ రాష్ట్ర స్థాయి అధికారుల మీదనే దౌర్జన్యానికి దిగుతాడు. మొన్న చూసాం... మంత్రి పదవులు రాని నాయకులు చంద్రబాబుపైనే మంటలు కక్కడం. ఇలాంటి పరిణామాలు గతంలో ఎప్పుడూ తెలుగు దేశంలో కనిపించేవి కావు. కాని ఇప్పుడు పార్టీలో అవి మాత్రమే ప్రధానంగా కనిపిస్తున్నాయి.

పార్టీలో చంద్రబాబు అంటే భయమూ, భక్తి పోయింది. ఆయన నాయకత్వం మీద నమ్మకం పోతోంది. మొన్నటి ఎన్నికల్లో మోడీ ఇమేజ్‌, పవన్‌కళ్యాణ్‌ ప్రచారం, చంద్రబాబు అబద్దాల తోనే గెలిచామనే ఓ బలమైన నమ్మకం పార్టీ కేడర్‌లో పాతుకు పోయింది. కాబట్టే పార్టీ చంద్రబాబు గుప్పిట్లో లేదు. చంద్రబాబు, పార్టీ... ఇద్దరు కూడా ఇతరుల చేతుల్లో వున్న పరిస్థితులు నెలకొన్నాయి.

chandraఅసలు ఢిల్లీలో ఏం జరిగింది? ఏం జరుగుతోంది? ఏం జరగబోతోంది? నాకిప్పుడే తెలియాలి అన్నంత ఉద్వేగానికి లోనవుతున్నాడు ముఖ్యమంత్రి చంద్రబాబు నాయుడు. వైసిపి అధినేత జగన్‌కు ప్రధాని నరేంద్రమోడీ అపాయింట్‌మెంట్‌ ఇవ్వడాన్ని ఆయన ఓ పట్టాన జీర్ణించు కోలేకపోతున్నాడు. ఆయన అమెరికాలో ఉండగానే ప్రధానిని జగన్‌ కలిసాడన్న వార్త చెవిన పడింది. అక్కడే మనశ్శాంతిగా ఉండలేకపోయాడు. అమెరికా నుండి నేరుగా వచ్చి ఢిల్లీలో దిగగానే తన వెంటవున్న వారిని హైదరాబాద్‌ పంపించేసాడు. తాను మాత్రం ఏడు గంటలపాటు ఎవరికీ అందుబాటులో లేకుండా గడిపాడు. జగన్‌ ప్రధానిని ఎందుకు కలిసాడు, ఏం చెప్పాడు, అసలు అర్ధాంతరంగా జగన్‌కు అపాయింట్‌మెంట్‌ ఇవ్వడం వెనుక ఆంతర్యమేమిటన్నది తెలుసుకోవడం కోసమే ఆయన ఆ కొన్ని గంటలు అజ్ఞాతంలో గడిపినట్లు తెలుస్తోంది.

ఒకప్పుడు చంద్రబాబుకు ఢిల్లీలో కూడా గట్టి నాయకుడనే పేరుండేది. 1996లో 13రోజుల ప్రధాని వాజ్‌పేయిని దించేసి యూనైటెడ్‌ ఫ్రంట్‌ కూటమిని కట్టించింది చంద్రబాబే! ఆ తర్వాత 1998, 1999లలో ఏర్పడ్డ ఎన్డీఏ ప్రభుత్వాల లోనూ కీలక భాగస్వామిగా వున్నాడు. 2002 గుజరాత్‌ అల్లర్ల సమయంలో ఆ రాష్ట్ర ముఖ్యమంత్రిగా వున్న ప్రస్తుత ప్రధాని నరేంద్రమోడీని జైలులో పెట్టాలంటూ నినదించిన ధైర్యశాలి. గత చరిత్రను చూస్తే జాతీయ రాజకీయాలలో చంద్రబాబు ట్రాక్‌ రికార్డు బాగానే వుంది. అంత పలుకుబడి కలిగిన నాయకుడు జగన్‌ ప్రధానిని కలిసాడని తెలియగానే చలి జ్వరం వచ్చినట్లు వణికిపోయాడు. రాజకీయాలలో ప్రధానిగా వున్నవారిని ఏ పార్టీ నేత అయినా కలవవచ్చనే పద్ధతిని మరచి, జగన్‌కు ప్రధాని అపాయింట్‌మెంట్‌ ఎలా ఇస్తారని మాట్లాడారు. జగన్‌కు అపా యింట్‌మెంట్‌ ఫిక్స్‌ చేసిన పిఎంఓ కార్యా లయాన్నీ చంద్రబాబు ప్రశ్నించినట్లయ్యింది.

అయినా జగన్‌కు మోడీ అపాయింట్‌ మెంట్‌ ఇస్తే చంద్రబాబు ఇంతగా ఆక్రోశం చెందాల్సిన అవసరం ఏముంది? తను ఏదో అభద్రతాభావంతో ఉండబట్టే ఇలా నోరు పారేసుకుంటున్నాడు. ఏపిలో జరిగిన, జరుగుతున్న అక్రమాలను మోడీకి జగన్‌ చెవిలో వూదాడనే కోపంతోనే ఆయన ఈ అరుపులు అరుస్తున్నాడు.

వాస్తవంలోకి వస్తే చంద్రబాబు అంటే మోడీకి ఏమంత నమ్మకం, గౌరవం లేదు. అవసరాన్ని బట్టి చంద్రబాబు రాజకీయ రంగులు మారుతాయని తెలుసుకోలేనంత అమాయకుడు కాడు మోడీ! ఈరోజు తమతో అవసరం వుంది కాబట్టి అణిగి మణిగి వుంటున్నాడు. రేపు బీజేపీకి రెండు చోట్ల పరాభవాలు ఎదురై, మోడీ క్రేజ్‌ తగ్గిందంటే ఇదే చంద్రబాబు దేశంలోని బీజేపీ వ్యతిరేక పార్టీలన్నింటిని కలిపి తృతీయ ఫ్రంట్‌ అనే టెంట్‌ను వేస్తాడు. రాజకీయ స్నేహానికి చంద్రబాబు నమ్మ కస్తుడు కాడు. కాని ఇచ్చిన మాట కోసం సోనియాగాంధీనే ఎదిరించి, 16నెలలు జైలులో గడిపిన జగన్‌ను రాజకీయంగా నమ్మొచ్చు. అదీగాక జగన్‌కు రాష్ట్రం తప్పితే జాతీయ రాజకీయాల మీద ఆశ, ఆసక్తి ఉండదు. కాబట్టే బీజేపీలో జగన్‌ పట్ల సానుకూల ధోరణి కనిపిస్తోంది.

బీజేపీకి జగన్‌ జత కలిస్తే రాష్ట్రంలో తనకు చుక్కలు చూపిస్తారనే భయం చంద్రబాబుకు పట్టుకుంది. ముఖ్యంగా 'ఓటు-నోటు' కేసు బాబు మెడ మీద కత్తిలా వేలాడుతోంది. ఈ కేసును ముందుకు సాగనీయకుండా ఇప్పటివరకు కేంద్రమే ఆదుకుంటోంది. ఈ కేసులో చంద్రబాబు వాయిస్‌ రికార్డర్‌ కూడా పక్కా సాక్ష్యంగా వుంది. ఇక అమరావతి రాజధాని భూముల సేకరణ దగ్గర్నుండి, పుష్కరాలకు వేలకోట్లు తగలేయడం, పోలవరం పూర్త యితే పనికిరాని పట్టిసీమ, పురుషోత్తమ పట్నం వంటి ప్రాజెక్ట్‌లు కేవలం డబ్బు కోసం చేపట్టినవేననే విషయం తెలియంది కాదు. ఏ రాష్ట్రంలోనైనా మోడీ తాను కాలు పెట్టాలనుకుంటున్నప్పుడు అక్కడ ముందుగా సిబిఐ దాడులు జరగడం చూస్తున్నాం. ప్రస్తుతం మోడీ ఏపిని టార్గెట్‌ చేసాడు. ఇక్కడ బీజేపీకి జగన్‌ లక్ష్యం కాదు. చంద్రబాబును నిర్వీర్యం చేయడమే అసలు ఉద్దేశ్యం. ఈ మూడేళ్లలో చంద్ర బాబుకు కేంద్రం వట్టి మాటలు చెప్పడం తప్ప ఎలాంటి సాయం చేయలేదు. విభజన బిల్లులో చెప్పిన ప్రత్యేకహోదా విషయంలో కూడా ఆయన రాజీపడడం ప్రజల్లో చంద్రబాబు నాయకత్వ స్థాయిని దిగజార్చింది. కేంద్రం ద్వారా చంద్రబాబు రాష్ట్రానికి ఏ పనులూ సాధించలేక పోయాడు, సరికదా అసలే అప్పుల్లో వున్న రాష్ట్రంలో ఈయన చేసిన ఆర్భాటపు పను లన్నీ కూడా ప్రజలకు పని కొచ్చేవి కావు. రాష్ట్ర ప్రభుత్వంలో జరిగే అవినీతి, అక్ర మాలపై సిబిఐ విచారణ చేయిస్తే ఎన్నో లొసుగులు బయటపడతాయి. చంద్రబాబు సర్కార్‌ను ప్రజా బోనులో దోషిగా నిల బెట్టడం ఇప్పుడున్న పరిస్థితుల్లో మోడీకి ఏమంత కష్టం కూడా కాదు.

ఏపిలో తెలుగుదేశాన్ని నిర్వీర్యం చేయాలన్నా, చంద్రబాబును బలహీన పరచాలన్నా మోడీకి చిటికెలో పని. తన విషయంలో మోడీ ఆ పని చేయకపోవ చ్చని చంద్రబాబుకు ఇంతకాలం బలమైన నమ్మకం ఉండేది. కాని మోడీని జగన్‌ కలిసొచ్చాక, మోడీ చేతికి అతను చంద్ర బాబు గారి అక్రమాల చిట్టా పద్దులు ఇచ్చి వచ్చాక ఆ నమ్మకం కూడా పోయింది. మోడీ ఎక్కడ ఎప్పుడు తనకు ఎసరు పెడ తాడోననే ఆందోళన బాబులో కనిపిస్తోంది.

Page 1 of 8

newsbottomad

ఎక్కువగా చదివిన వార్తలు

  • నెల్లూరు నగరాభివృద్ధికి... నాలుగు స్థంభాలు
    కన్నతల్లిని జన్మభూమిని ఎప్పుడూ మరచిపోకూడదని మన కేంద్రమంత్రి యం.వెంకయ్యనాయుడు ప్రతి సభలోనూ చెబుతుంటారు. మరి ఎంతమంది ఆ మాటను చెవికెక్కించుకుంటారన్నది వేరే విషయం. కాని ఆయన చెప్పే మాట ప్రతి ఒక్కరికీ వర్తిస్తుంది. కన్నతల్లిని జన్మభూమిని మరువవద్దని ఆయన చెబుతున్న మాటలను…
  • తీరంకు సిఇజడ్‌ హారం
    డాక్టర్‌ వై.యస్‌.రాజశేఖరరెడ్డి పాలనలో జిల్లాలో పారిశ్రామిక ప్రగతి పరుగులు పెట్టింది. కృష్ణపట్నం పోర్టు అత్యంత వేగంగా నిర్మాణం పూర్తి చేసు కుంది. వై.యస్‌. అనే నాయకుడు మర ణించకపోయి వుంటే కృష్ణపట్నం పోర్టు ఈరోజు దేశంలోనే ప్రముఖ పారిశ్రామిక హబ్‌గా అవతరించి…
  • ఆర్టీసీని... ఆధునీకరించడం కాదు... తరలించడమే ఉత్తమం
    నెల్లూరులోని ఆర్టీసీ బస్టాండ్‌కు నాలుగు దశాబ్దాల పైబడిన చరిత్ర ఉంది. అప్పట్లో ఈ బస్టాండ్‌ నగరానికి దూరంగా ఉన్న ట్లుండేది. ఈ నాలుగు దశాబ్దాల కాలంలో నగరం నలువైపులా విస్తరించింది. దీంతో ఆర్టీసీ బస్టాండ్‌ నగరానికి నడిబొడ్డులో వున్నట్లయ్యింది. కొన్నేళ్ల క్రితం…
  • నేలటూరువాసులకు సివిఆర్‌ జ్యోతులు
    ఈ నెల 20వ తేదీన కృష్ణపట్నం పోర్టు సివిఆర్‌ జ్యోతి పథకంలో భాగంగా ముత్తుకూరు మండలం నేలటూరులోని 150మంది మత్స్యకార కుటుంబాల వారికి ఉచితంగా గ్యాస్‌స్టౌలను అందించారు. కేంద్ర పర్యావరణ, అటవీశాఖ, వాతావరణ మార్పు శాఖ అధికారులు దీపక్‌ శ్యామ్యూల్‌, భూమత్‌…
  • నాయుడుపేట టు పూతలపట్టు... ఆరులైన్లకు ఆమోదం
    ఏపిలోనే అత్యంత రద్దీ ఉన్న రహదారులలో ప్రధానమైనది నాయుడు పేట - బెంగుళూరు రోడ్డు. ఏపి నుండి తమిళనాడు, కేరళ, కర్నాటక రాష్ట్రాలలోని పలు ప్రాంతాలను కలిపే ప్రధాన మార్గమిది. అంతేకాదు, ప్రముఖ ఆథ్యాత్మిక క్షేత్రాలన్నీ కొలువైన రహదారి. శ్రీకాళహస్తి, తిరుమల,…

Newsletter