తనను, తన అన్నను మోసం చేసిన తెలుగుదేశంకు గుడ్‌బై చెప్పాలని మాజీమంత్రి ఆనం రామనారాయణ రెడ్డి నిర్ణయించుకోవడం తెలిసిందే! అయితే ఆయన ఏకపక్షంగా పార్టీ మారాలన్న నిర్ణయం తీసుకోలేడుగా! ఇంతకాలం తనతో కలసివచ్చిన అనుచరులతోనూ సంప్రదింపులు జరిపాకే నిర్ణయం తీసుకోవాలనుకున్నాడు. ఆనం అనుచరులు కేవలం ఆత్మకూరులోనో, నెల్లూరులోనో మాత్రమే లేరు. ఉదయగిరి నుండి సూళ్ళూరుపేట దాకా అన్ని నియోజవర్గాలలోనూ వున్నారు. కాబట్టే ఆయన గత కొన్నిరోజులుగా జిల్లా వ్యాప్తంగా వున్న తన అనుచరులను పిలిపించుకుని మాట్లాడుతున్నాడు. తెలుగుదేశంలో తమకెదురైన పరిస్థితులను వివరిస్తున్నాడు. కాని ఆయనకంటే ముందే ఆయన అనుచరులు జై జగన్‌ అంటున్నారు. తెలుగుదేశం వీడడానికి, వైసిపిలో చేరడానికి సంసిద్ధమంటున్నారు. ఆనం అనుచరులలో చాలా తక్కువమంది మాత్రమే టీడీపీని వీడాలన్న నిర్ణయాన్ని వ్యతిరేకిస్తున్నట్లుగా తెలుస్తోంది. ఆత్మకూరు నియోజకవర్గంలో మెజార్టీ అనుచరుల అభిప్రాయం వైసిపిలో చేరాలనే! అనుచరుల అభిప్రాయ సేకరణ అనే మర్యాదపూర్వక ప్రక్రియ దాదాపు పూర్తికావొచ్చినట్లు తెలుస్తోంది. ఇక టీడీపీకి రాజీనామా లేఖ టైప్‌ చేయడం మిగిలింది. అన్నీ కుదిరితే వై.యస్‌. జయంతి రోజైన జూలై 8వ తేదీ ఆయన వైసిపిలో చేరొచ్చని తెలుస్తోంది!
రాష్ట్ర రాజకీయాలలో అధికార తెలుగుదేశం, ప్రతిపక్ష వైసిపి విషయాలలో క్లారిటీ వుంది. 2014లోనే కాదు వచ్చే ఎన్నికల్లోనూ ఈ రెండు పార్టీల మధ్యే ప్రధాన పోటీ వుంటుంది. ఈ రాష్ట్ర ప్రజలు కాంగ్రెస్‌, బీజేపీలకు ఎలాగూ ఓట్లేయరు, కాబట్టి అవి డమ్మీలే! ఇవి పోటీలో వున్నా వచ్చేది నామమాత్రపు ఓట్లే!
అదికాకుండా ఇప్పుడు జనాలకు అర్ధం కాని పజిల్‌ పవర్‌స్టార్‌ పవన్‌కళ్యాణ్‌, మాజీ సిబిఐ జేడీ లక్ష్మీనారాయణ. వీళ్ళిద్దరూ రాష్ట్రంలో తిరుగుతున్నారు. పవన్‌కళ్యాణ్‌ జనసేన జెండా పట్టుకుని ప్రత్యక్షంగానే రాజకీయ యాత్రలు చేస్తున్నాడు. లక్ష్మీనారాయణే ఇంకా ఏ జెండా పట్టుకోలేదు. అతని అజెండా ఏంటో కూడా తెలియడం లేదు. కాని వచ్చే ఎన్నికల్లో బీజేపీకో లేదా టీడీపీకో పనిచేసే అవకాశముంది. లేదంటే పవన్‌కు తోడుగా జతకావచ్చు కూడా! గత ఎన్నికలకు రేపటి ఎన్నికలకు తేడా ఇదే! 2014 ఎన్నికల్లో పొత్తులో భాగంగా టీడీపీకి పడ్డ బీజేపీ ఓట్లను ఈసారి ఆ పార్టీ చీల్చుకోవచ్చు. ఈ రూపంలో నష్టం ఎంతుండొచ్చో అప్పుడే చెప్పలేం. మరి లక్ష్మీనారాయణ, పవన్‌కళ్యాణ్‌లు ఎవరిని ముంచడానికి సిద్ధంగా వున్నారో తేలాల్సివుంది. లక్ష్మీనారాయణ ఏ పార్టీలో చేరినా, ఏ పార్టీకి ప్రచారం చేసినా వైసిపికి వచ్చే నష్టం ఏమీ లేదు. జగన్‌ వ్యతిరేకులే లక్ష్మీనారాయణ అభిమానులవుతారు. ఆయన ఇంకా జనసేనకో, బీజేపీకో మద్దతునిస్తే ఎంతో కొంత తెలుగుదేశంకే నష్టం. 2014లో పవన్‌కళ్యాణ్‌ ఓటు తెలుగుదేశానికే పడింది. కాబట్టే ఉభయగోదావరి, ఉత్తరాంధ్ర జిల్లాల్లో తెలుగుదేశం భారీగా సీట్లు సాధించి అధికారంలోకి రాగలిగింది. ఈసారి ఎన్నికల్లో జనసేన సొంతంగానే పోటీ చేయబోతోంది. మరి పవన్‌కళ్యాణ్‌ ఓట్లు తెలుగుదేశం, జనసేనల మధ్య చీలితే ఎవరికి నష్టం? పవన్‌ వల్ల జగన్‌కు కొత్తగా వచ్చే నష్టమేమీ లేదు. వచ్చే ఎన్నికల్లో కూడా పవన్‌ టీడీపీకే మద్దతు నిస్తే వైసిపికి నష్టం. పవన్‌ విడిగా పోటీ చేస్తే వైసిపికి కొంత లాభం. అసలు వైసిపికే మద్దతునిస్తే తెలుగుదేశాన్ని సులభంగా పడగొట్టొచ్చు. మొత్తంమ్మీద వీళ్ళిద్దరి వల్ల ఎవరికి మూడనుందో చూడాలి!
దాదాపు రెండు నెలలుగా ఒక వార్త జిల్లా రాజకీయాలలోనే కాదు, రాష్ట్ర రాజకీయాలలో కూడా హల్‌చల్‌ చేస్తోంది. అదే మాజీమంత్రి ఆనం రామనారాయణరెడ్డి తెలుగుదేశం పార్టీని వీడనున్నాడని... వైయస్సార్‌ కాంగ్రెస్‌పార్టీలో చేరనున్నాడని. ఇవన్నీ మీడియాలో మాత్రమే వచ్చాయి. ఆనం వివేకానందరెడ్డి మరణానికి ముందే టీడీపీపై ఆనం సోదరులు అసంతృప్తితో వున్నారన్న వార్త గుప్పుమంది. ఇది తెలిసి ముఖ్యమంత్రి చంద్రబాబు అప్పటికప్పుడు జాగ్రత్త పడ్డారు. హైదరాబాద్‌లో ఆసుపత్రిలో వున్న సమయంలో వివేకాను పరామర్శించడానికి వెళ్ళారు. వివేకా అంత్యక్రియలు రోజున నెల్లూరొచ్చారు. ఆనం కుటుంబసభ్యులతో దాదాపు ముప్పావుగంట చర్చించి రాజకీయంగా మీకు అండగా వుంటానని భరోసా ఇచ్చారు. పార్టీలో తగిన గౌరవం కల్పిస్తానని హామీ ఇచ్చాడు. ఆనం సోదరులు పార్టీని వీడిపోయే పరిస్థితి దాకా ఎందుకు తీసుకొచ్చారంటూ జిల్లా మంత్రులిద్దరినీ పార్టీ జిల్లా అధ్యక్షుడిని చంద్రబాబు తిట్టారు. నచ్చజెప్పి ఆనంను పార్టీలో నిలబెట్టుకున్నా మనుకునేంతలోనే కథ అడ్డం తిరిగింది. గత నెలలో నిర్వహించిన ఆత్మకూరు, నెల్లూరురూరల్‌ నియోజకవర్గాల మహానాడుల్లో పాల్గొన్న ఆనం రామనారాయణరెడ్డి తెలుగుదేశం ప్రభుత్వంతో పాటు జిల్లా మంత్రి సోమిరెడ్డి చంద్రమోహన్‌రెడ్డి మీద విమర్శలు ఎక్కుపెట్టాడు. తెలుగుదేశం పార్టీ పరంగా ఆయన పాల్గొన్న చివరి కార్యక్రమా లవే! ఆ తర్వాత నెల్లూరులో జరిగిన జిల్లా మహానాడుకు గాని, విజయవాడలో జరిగిన రాష్ట్ర స్థాయి మహానాడుకు గాని ఆయన హాజరు కాలేదు. దాంతోనే ఆయన ఇక తెలుగుదేశంలో వుండడనే విషయం అర్ధమైంది.
బొత్సనే వారధి...
వాస్తవానికి ఆనం సోదరులను పార్టీలో చేర్చుకోవడానికి వైసిపి అగ్ర నాయకత్వంలో అంతగా ఆసక్తి లేదు, ఎందుకంటే గతంలో వై.యస్‌ కుటుంబంపై వారు చేసిన వ్యక్తిగత విమర్శలే కారణం. అయితే 2014లో ఇలా పట్టించుకుని కొందరిని పార్టీలోకి తీసుకోక పోబట్టే నష్టపోయామని, రాజకీయాలలో ఇవన్నీ కామన్‌ అని బొత్స వంటి నాయకులు జగన్‌కు నచ్చజెప్పి ఆనంకు వైసిపిలో లైన్‌క్లియర్‌ చేసారు. టీడీపీలో వున్నా ఆనం రామనారాయణరెడ్డి ఆత్మకూరులో వైసిపికి బలమైన ప్రత్యర్థి అవుతాడు. అతనిని వైసిపిలోకి లాక్కుంటే టీడీపీకి బలమైన అభ్యర్థే వుండడు. ఈ లాజిక్‌తోనే ఆయనకు గ్రీన్‌ సిగ్నల్‌ ఇచ్చినట్లుగా తెలుస్తోంది.
రాజీనామానే తరువాయి...
తాను పార్టీ మారడంపై రెండు నెలలుగా వూహాగానాలు జరుగుతున్నా ఆనం రామనారాయణరెడ్డి ఎక్కడా దీనిపై బహిరంగంగా మాట్లాడలేదు. కాని 13వ తేదీ తొలిసారిగా మీడియా ముందు నోరు విప్పాడు. తెలుగుదేశం పార్టీలో ఇమడలేక పోతున్నామని చెప్పకనే తన ఉద్దేశ్యాన్ని చెప్పాడు. ఈ విషయమై ఆత్మకూరు నియోజక వర్గంలోని తన అనుచరులతో పాటు జిల్లా వ్యాప్తంగా వున్న తన అనుచరులు, మిత్రు లతో సంప్రదింపులు జరుపుతున్నాడు. త్వరలోనే టీడీపీకి రాజీనామా చేసే అవకాశా లున్నాయి. మరి వైకాపాలో ఎప్పుడు చేరుతాడన్నది నిర్ణయం జరగాల్సివుంది. జూలై 8వ తేదీ వై.యస్‌. జయంతి రోజు ఒకవేళ జగన్‌ సమక్షంలో ఆయన పాదయాత్రలో ఎక్కడుంటే అక్కడకు వెళ్ళి చేరే అవకాశాలున్నాయి.
ఏ సీటు నుండి పోటీ...
ఆనం రామనారాయణరెడ్డిని వైసిపిలోకి తీసుకోవాలన్న ఆలోచనకు బీజం వేసింది ఆత్మకూరు ఎమ్మెల్యే మేకపాటి గౌతంరెడ్డి. వైసిపి అధికారంలోకి రావాలని, జగన్‌ సీఎం కావాలనే లక్ష్యంతో వున్నాడు. అందుకే ఆనం పార్టీలోకి వస్తే ఆత్మకూరు సీటును వదులుకోవడానికి సిద్ధమన్న సంకేతాలు ఇచ్చాడు. అయితే... పార్టీ అధికారం లోకి వచ్చే అవకాశాలున్న సమయంలో సిటింగ్‌ సీటు వదులుకోవడం ఎందుకని కుటుంబసభ్యులు చేసిన సూచనతో తాను ఆత్మకూరు నుండే పోటీ చేస్తానని మళ్ళీ స్టేట్‌మెంటిచ్చాడు. ఇప్పుడు రామనారాయణరెడ్డికి సీటు ఎక్కడా అన్నది మేకపాటి గౌతం నిర్ణయంపై కూడా ఆధారపడి వుంటుంది. మేకపాటి కుటుంబసభ్యులకు 2014ఎన్నికల్లో లోక్‌సభ, రెండు అసెంబ్లీ సీట్లిచ్చారు. ఈసారి కూడా వారికి మూడుసీట్లే ఇస్తే రామనారాయణరెడ్డికి వెంకటగిరి నుండి పోటీ చేసే ఛాన్స్‌ వుంటుంది. గౌతం ఆత్మకూరును వదులుకుంటే ఆనం ఆత్మకూరు నుండే పోటీ చేయాల్సి రావచ్చు. ఇది కాకుండా మేకపాటి కుటుంబసభ్యులు అసెంబ్లీల వరకే పోటీచేసినా లేదా ఒకరు నరసారావు పేట లోక్‌సభకు వెళ్ళినా ఆనంకు నెల్లూరు లోక్‌సభకు పోటీ చేసే అవకాశం కలగొచ్చు.
టీడీపీలో ఎవరి వైఫల్యం...
2015లో ఆనం సోదరులు తెలుగుదేశంలో చేరారు. ఆరోజు అవసరం లేక పోయినా ఆ నిర్ణయం తీసుకున్నారు. ఈ మూడేళ్ళు కూడా కాంగ్రెస్‌పార్టీలోనే ఉం డుంటే వారి మీద గౌరవంగా వుండేది. చంద్రబాబుతో పాటు జిల్లా మంత్రి నారాయణ కూడా వారిని టీడీపీలోకి తీసుకెళ్ళడంలో ప్రధానపాత్ర పోషించారు. ఆరోజు మంత్రిగా కాదు, ఎమ్మెల్సీగా కూడా లేనటువంటి సోమిరెడ్డికి ఈ విషయంలో ఎటువంటి పాత్ర లేదు. ఆనంకు ఇచ్చిన హామీలను నెరవేర్చడంలో చంద్రబాబు, నారాయణలు విఫల మయ్యారు. కాని, ఆనం మాత్రం పార్టీని వదిలే ముందు సోమిరెడ్డిని తిట్టిపోతున్నాడు. ఇదే పెద్ద కామెడీ!
మొత్తానికి ఆనం పార్టీ మార్పుపై సందేహాలు తొలగిపోయాయి. క్లారిటీ వచ్చింది. వైసిపిలో చేరే తేదీనే ఖరారు కావాల్సివుంది.
లాయర్ , జాతీయ తెలుగు వార పత్రిక . గత 25 సంవత్సరములకు పైగా నెల్లూరు ప్రజల పక్షాన నూతన అభ్యుదయ సమాజం కోసం పోరాడుతుంది