assemblyబాహుబలిని కట్టప్ప ఎందుకు చంపాడన్న ప్రశ్నకు బాహుబలి-2లో సమాధానం లభించింది. చంద్రబాబు అమరావతి రాజధాని పేరుతో ఏం చేస్తున్నాడన్నదానికి ఈ దశాబ్దంలో సమాధానం లభించేటట్లు లేదు. చైనా-భారత్‌ల మధ్యం డోక్లాం, ఇజ్రాయిల్‌-పాలస్తీనాల మధ్య జెరూసలేం సమస్యలకు పరిష్కారం లభించినా కూడా అమరావతి అనే జడపదార్ధం ప్రజలకు అర్ధమయ్యేటట్లు లేదు. అసలు లేని నగరం పేరుతో ఇన్ని డ్రామాలు సృష్టించి, ఇన్ని దేశాలు తిరిగి, ఇన్ని కోట్లు తగలేయడం బహుశా చంద్రబాబుకు ప్రత్యేకంగా తెలి సిన విద్యేననుకోవాలి.

ఈ టీవీ, మా టీవీ, జెమిని టీవీలలో సీరియల్స్‌ వస్తుంటాయి. ఏళ్ల తరబడి సాగుతూనే వుంటాయి. అక్కడ సబ్జెక్ట్‌ ఏమీ ఉండదు. అంతా జీడిపాకంలాగా సాగతీయడమే! ఆ సీరియల్స్‌లో వుండే స్టోరీనే సినిమాగా మలిస్తే రెండు గంటలు... అది కూడా బోనస్‌గా అయిదారు పాటలు పెట్టుకోవచ్చు. అమరావతి రాజధానిని కూడా సినిమా లెవల్లో ఫినిష్‌ చేసి వుండొచ్చు. రాజధాని కట్టాలనుకుంటే అయిదారు వేల ఎకరాల భూమి సేక రించడం, రైతులకు దానికి తగ్గ పరిహారం చెల్లించడం, ప్రభుత్వ పరిపాలనకు అవసరమైన అసెంబ్లీ, సచివాలయం, మంత్రులు, ఎమ్మెల్యేల నివాసాలు, వివిధ ప్రభుత్వ శాఖల కార్యాలయాలు, ఉద్యోగుల కాలనీలు, వారికి అవసరమైన మౌలిక వసతులు... ఇంత వరకు తీసుకుని వుంటే ఇదివరకే రాజధాని రూపం ఓ కొలిక్కి వచ్చి ఉండేది. కాని, చంద్రబాబు అమరావతిని సినిమాగా క్లోజ్‌ చేయాలనుకోలేదు. 'మొగలిరేకులు' సీరియల్‌ లాగా సాగదీస్తున్నాడు. సీరియల్‌ మొదలుకావడమే అందరికీ తెలుసు. ఎప్పుడు ఎండ్‌ అవుతుందో ఎవరికీ తెలియదు. సింగపూర్‌ లాంటి రాజధానితో మొదలైంది అమరావతి సీరియల్‌. ఆ తర్వాత బీజింగ్‌ అని, కొలంబో అని, టోక్యో అని, మిలాన్‌, మాస్కో, వాషింగ్టన్‌, కౌలాలంపూర్‌... ఇలా అన్ని దేశాల ప్రధాన నగరాలను చుట్టేసింది. సింగపూర్‌, ఆస్ట్రేలియా, జపాన్‌ దేశస్థులు ఇచ్చిన రాజధాని డిజైన్‌లు అన్నీ మూలనపడ్డాయి. చివరకు లండన్‌కు చెందిన నార్మన్‌ పోస్టర్‌ చేతికి రాజధాని డిజైన్‌ వెళ్ళింది. మొదట్లో వాళ్ళు గీసిన డిజైన్‌లు కూడా చంద్రబాబుకు నచ్చలేదు. వాళ్ళకు సలహాలిచ్చేందుకు బాహుబలి సినిమా డైరెక్టర్‌ రాజమౌళిని తీసుకెళ్లాడు. ఎట్టకేలకు నార్మన్‌పోస్టర్‌ సంస్థ రెండు డిజైన్‌లకు తుది రూపకల్పన చేసి ఇచ్చింది. దర్శకుడు రాజమౌళి సూచనలు, సలహాలను పక్కనపెట్టి ఆ సంస్థ ఈ డిజైన్‌లను రూపొందించింది. డైమండ్‌ ఆకారంలో ఒకటి, టవర్‌ ఆకారంలో ఒకటి! టవర్‌ ఆకారం డిజైన్‌ను 70మీటర్ల ఎత్తుతో, 70 అంతస్థులతో రూపొందించారు. ఈ టవర్‌లో క్రింద అసెంబ్లీ వుంటుందట, టవర్‌ పైకి పర్యాటకులను పంపిస్తారట! ఇది అసెంబ్లీ భవనాన్ని కడుతున్నట్లు, రాజధాని నిర్మాణం చేస్తున్నట్లుగా లేదు, హాయ్‌ లాండ్‌, వండర్‌వరల్డ్‌, కోరల్‌ ఐలాండ్‌ వంటి పర్యాటక వ్యాపార కేంద్రాలను పెడుతున్న ట్లుగా వుంది. చంద్రబాబు విధానాలు పరిపాలన కంటే కూడా ప్రజలను ఆకర్షించేలా టూరిస్ట్‌ స్పాట్‌లను అభివృద్ధి చేయడానికే ప్రాధాన్యతనిస్తున్నట్లుగా వుంది. అమరావతికి ఇంతవరకు నాలుగుసార్లు శంకుస్థాపనలు చేశారు. వేలకోట్లు ఖర్చు పెట్టి తాత్కాలికంగా వర్షం వస్తే ఉరిసే భవనాలు కట్టారు. రాజధాని పేరుతో వేలకోట్లు తగలేస్తున్నారు. మళ్ళీ దీనిమీద రాజమౌళి చేత 'అమరావతి' సినిమా తీయిస్తారట. ఇది సినిమా కాదు... ఇప్పటివరకు 'అమరావతి రాజధాని' పేరుతో జరిగిన కథనంతా సీరియల్‌గా తీస్తే అయిదారేళ్లకు సరిపడా ఎపిసోడ్‌లను టీవీలలో వేసుకోవచ్చు. అమరావతి సినిమా కంటే సీరియల్‌ బెటర్‌... ఆలోచించండి.

mekapatiనెల్లూరు లోక్‌సభ అభ్యర్థిగా మేకపాటి రాజ మోహన్‌రెడ్డి మూడుసార్లు వరుసగా విజయం సాధించి హ్యాట్రిక్‌ కొట్టాడు. నెల్లూరుజిల్లా రాజకీయ చరిత్రలో ఆయన పేరిట ఇదో రికార్డు. 2009లో జరిగిన నియోజకవర్గాల పునర్విభజన వల్ల ఎస్సీ రిజర్వుడ్‌లో ఉన్నటువంటి నెల్లూరు లోక్‌సభ జనరల్‌లోకి మారడం జరిగింది. నెల్లూరు లోక్‌సభ నుండి తాను పోటీ చేయాలన్న ఆశతో అప్పుడు డీ-లిమిటేషన్‌ కమిటీలో సభ్యుడిగా వున్న స్వర్గీయ నేదురుమల్లి జనార్ధన్‌రెడ్డి నెల్లూరును ఆనుకుని వుండే సర్వేపల్లి నియోజకవర్గాన్ని తిరుపతి పార్లమెంటులోకి నెట్టేసి, నెల్లూరుకు 120కిలోమీటర్ల దూరంలో వున్న కందుకూరును నెల్లూరు లోక్‌సభ పరిధిలోకి తెచ్చారు. ఇంత కష్టపడ్డా కూడా 2009లో ఆయనకు నెల్లూరు లోక్‌సభ టిక్కెట్‌ ఇవ్వకుండా రాజ్యసభకు పంపించారు.

నెల్లూరు లోక్‌సభ జనరల్‌ అయ్యాక తొలి ఎంపీ మేకపాటి రాజమోహన్‌రెడ్డి. 2009లో వై.యస్‌. అనుకూల గాలిలో గెలిచాడు. 2012లో తిరిగి వైకాపా అభ్యర్థిగా నెల్లూరు లోక్‌సభకు జరిగిన ఉపఎన్నికలలో దాదాపు 3లక్షల మెజార్టీతో గెలిచాడు. 2014లో తిరిగి వైకాపా అభ్యర్థిగా మూడోసారి ముక్కీ మూలిగి 13వేల మెజార్టీతో గెలిచాడు. అది కూడా ఆత్మకూరులో ఆనం రామనారాయణరెడ్డి ఎలక్షన్‌ వదిలేయబట్టి ఎంపీగా ఈయన బయటపడ్డాడు. అంటే ఆ రెండేళ్లలోనే ఎంపీగా ఆయనపై వ్యతిరేకత బాగా పెరిగింది. లోక్‌సభ పరిధిలోని 7 అసెంబ్లీలో 5 నియోజకవర్గాలలో వైసిపి గెలిచింది. ఎంపీగా ఆయన మెజార్టీ లక్ష దాటాలి. కాని, క్రాస్‌ ఓటింగ్‌ బాగా జరిగి ఆయన మెజార్టీ 13వేలకు పడిపోయింది. 2014లోనే అంత నెగటివ్‌ వుంటే ఇంకో ఐదేళ్ల తర్వాత ఇంకెంత వ్యతిరేకత ఉం డాలి. కాబట్టి వచ్చే ఎన్నికల్లో నెల్లూరు లోక్‌సభ అభ్యర్థిగా కొత్తవారిని తెరమీదకు తేవాలనే ప్రయత్నాలు జరుగుతున్నట్లు తెలుస్తోంది. మేకపాటిని ఒంగోలుకో, నరసారావుపేటకో పంపించొచ్చు. ఆ రెండు చోట్లా మేకపాటికి మంచి పేరే వుంది. నెల్లూరు లోక్‌సభ పరిధిలో పంట రెడ్ల ఆధిపత్యం ఎక్కువ. వీళ్లకు ఆయన సెట్‌ కాడు. కాబట్టి ఆయన మెట్ట లోక్‌సభ లకు పోవడమే మేలు. ఈసారి పార్లమెంట్‌ అభ్యర్థుల సామర్ధ్యం కూడా అసెంబ్లీలపై ప్రభావం చూపుతుంది. పార్లమెంటు అభ్యర్థి గట్టోడైతే అది అసెంబ్లీ అభ్యర్థులకు కూడా కలిసొస్తుంది. కాబట్టి నెల్లూరు లోక్‌సభ అభ్యర్థిగా సరైన నాయకుడి కోసం అన్వేషణ జరుగుతున్నట్లు తెలుస్తోంది.

elections2014 ఎన్నికల్లో వైకాపా ఓటమికి ప్రధాన కారణాలు... చంద్రబాబు ఋణ మాఫీ, టీడీపీకి పవన్‌ కళ్యాణ్‌ మద్దతు పలకడం, నరేంద్రమోడీ ఆకర్షణ, కాంగ్రెస్‌ సీనియర్‌ నేతలంతా జగన్‌ కాదంటే టీడీపీలోకి వెళ్లడం, మతపరమైన ముద్రవల్ల బ్రాహ్మణులు, వైశ్యులు పూర్తిగా వైసిపిని వ్యతిరేకించడం, పచ్చ మీడియా వ్యతిరేక ప్రచారం, ఆర్ధికంగా టీడీపీ పైచేయిలో ఉండడం, ఎల్లోమీడియా విషప్రచారం వల్ల రాజులు దూరం కావడం, విభజన నేపథ్యంలో అనుభవజ్ఞుడైన చంద్రబాబు సీఎం అయితేనే సక్రమంగా జీతాలన్నా వస్తాయని ఉద్యోగులు భావించడం... కర్ణుడిచావుకు సవాలక్ష కారణాలన్నట్లు... వైకాపా ఓటమికి ఇన్ని కారణాలున్నాయి. ఇవే కాదు, వైకాపా ఓటమిలో టీడీపీ గెలుపులో న్యాయస్థానంకు సైతం పరోక్ష పాత్ర వుంది.

అంతకుముందున్న కాంగ్రెస్‌ ప్రభుత్వం స్థానిక సంస్థల ఎన్నికలను వాయిదా మీద వాయిదాలేసుకుంటూ వచ్చింది. 2014లో కొత్త ప్రభుత్వం ఏర్పడ్డాక స్థానిక ఎన్నికలకు పోవాలనే పరిస్థితి ఉండింది. అయితే హైకోర్టు అందుకు ఒప్పుకోలేదు. అసెంబ్లీ ఎన్నికలకు ముందే స్థానిక ఎన్నికలు జరపాలని ఆదేశించింది. దీంతో పంచాయితీలు, జిల్లా పరిషత్‌, మున్సిపల్‌ కార్పొరేషన్‌ల ఎన్నికలను అప్పటికప్పుడు హడావిడిగా జరిపారు. ఈ స్థానిక ఎన్ని కలు ముందుగా జరపడం వైకాపాకు తీరని నష్టం కలిగించింది. స్థానిక ఎన్నికలు జరక్కముందు గ్రామాలలో ఆ వర్గం ఈ వర్గం అని లేకుండా ప్రజలు సాధారణ స్థితిలో జగన్‌కు సానుభూతి పరులుగా వున్నారు. ఎప్పుడైతే స్థానిక ఎన్నికలు జరి గాయో అప్పుడు గ్రామాలలో గ్రూపులు సెట్‌ అయిపోయాయి. గ్రామాలలో పం తాలు, పట్టింపులు ఎక్కువ. ఒక నాయ కుడు ఒక పార్టీకి మద్దతు తెలిపితే ప్రత్యర్థి నాయకుడు అవతలిపార్టీ వైపు పోవడం సర్వసాధారణం. దీంతో వై.యస్‌.జగన్‌ సానుభూతిపరులు గ్రామాలలో వర్గ రాజకీయాల కారణంగా అసెంబ్లీ ఎన్ని కల్లోనూ వాళ్ళు తెలుగుదేశం వైపే వుండి పోయారు. ముందుగా స్థానిక ఎన్నికల కారణంగా జగన్‌కు ఓటేయాలన్న ప్రజ లలోని ఉత్సాహం అక్కడ కొంతవరకు తీరిపోయింది. అంత ఊపు అసెంబ్లీ ఎన్ని కలలో లేకుండా పోయింది.

అప్పుడంటే కోర్టు ఆదేశాల వల్ల అసెంబ్లీ ఎన్నికలకు ముందు స్థానిక ఎన్ని కలను జరపాల్సి వచ్చింది. ఈసారి ఒక సారి స్థానిక ఎన్నికలను వాయిదా వేసినా అసెంబ్లీ ఎన్నికల తర్వాతే జరపొచ్చు. అప్పుడైతే ఏ సమస్యా ఉండదు. అధికారం లోకి ఏ పార్టీ వస్తే స్థానిక ఎన్నికల్లోనూ ఆ పార్టీ మద్దతుదారులే ఎక్కువుగా గెలు స్తారు. అభ్యర్థులకు పెద్దగా డబ్బు ఖర్చు కూడా వుండదు. ఎక్కువ స్థానాలు ఏక గ్రీవమయ్యే అవకాశం కూడా వుంది.

కాని, చంద్రబాబు స్థానిక ఎన్నికలను వాయిదా వేయాలనుకోవడం లేదు. అసెంబ్లీ ఎన్నికలకు ముందే జరపాలను కుంటున్నాడు. అసెంబ్లీ ఎన్నికలు పూర్తిగా ఎలక్షన్‌ కమిషన్‌ కంట్రోల్‌లో జరుగు తాయి. స్థానిక ఎన్నికలైతే అధికారాన్ని

ఉపయోగించుకోవడానికి అవకాశముం టుంది. అధికారముంది, కావాల్సినంత డబ్బుంది కాబట్టి మెజార్టీ స్థానిక సంస్థలను చేతిలోకి తీసుకోవచ్చు. స్థానిక సంస్థల్లో పైచేయి సాధిస్తే, వైకాపా కేడర్‌లో నిరు త్సాహం వస్తుంది. అసెంబ్లీ ఎన్నికల్లోనూ టీడీపీయే గెలుస్తుందన్న సంకేతాలు పం పొచ్చు. వైసిపికి బలమైన అభ్యర్థులు లేకుండా చేసి గెలుపును సులువు చేసుకో వచ్చు. ఒకవేళ స్థానిక ఎన్నికల్లో ప్రభుత్వ వ్యతిరేకత కనిపిస్తే అసెంబ్లీ ఎన్నికలనాటికి దానిని సరిదిద్దుకునే మార్గాలు వెదకొచ్చు. స్థానికసంస్థల ఎన్నికల ద్వారా రెండు విధాలుగా తనకే ప్రయోజనం ఉండడంతో చంద్రబాబు అసెంబ్లీకంటే ముందే స్థానిక ఎన్నికలకు ఉత్సాహం చూపుతున్నట్లు తెలుస్తోంది.

Page 8 of 62

newsbottomad

ఎక్కువగా చదివిన వార్తలు

  • నెల్లూరులో పోస్టింగా? వద్దంటే వద్దు!
    ఒకప్పుడు నెల్లూరులో పోస్టింగ్‌ అంటే ఎవరైనా ఎగిరి గంతేసేవారు. పైరవీలు చేసుకుని మరీ ఇక్కడకు పోస్టింగ్‌ చేయించుకుంటుంటారు. పోలీసు శాఖలో వారికి అయితే నెల్లూరులో పనిచేయడం చాలా ఇష్టం. ఇక్కడ నుండి కదలాలంటే కష్టం. ఇక్కడ టెర్రరిజం లేదు, రౌడీయిజం లేదు,…
  • వేగమందుకున్న ప్రయాణం
    సంగం వద్ద కొండల మధ్యలో నుండి వేసిన కొత్త రహదారి ప్రయాణీకులకు గమ్మత్తుగా వుంది. ఈ కొండ రహదారితో ముంబై జాతీయ రహదారిపై వాహన దారులకు ప్రయాణం చాలా సులభంగా అనిపిస్తోంది. నెల్లూరు-ఆత్మకూరుల మధ్య ముంబై రహదారిని సిమెంట్‌ రోడ్డుగా మార్చడం…
  • ఎవరెవరెక్కడ?
    రాష్ట్రంలోనే వైయస్సార్‌ కాంగ్రెస్‌పార్టీ బలంగా వున్న జిల్లాలలో నెల్లూరు అగ్రస్థానంలో ఉంటుంది. బలమైన రాజకీయ కుటుంబాలన్నీ తెలుగుదేశం పార్టీలో వున్నప్పటికీ ఈ జిల్లాలో ప్రజలు మాత్రం వైకాపాకే వెన్నుదన్నుగా వున్నారు. 2014 ఎన్నికల్లో ఈ జిల్లా ప్రజలు వైకాపాకు జైకొట్టారు. రెండు…
  • టీడీపీ నుండి... లోక్‌సభకెవరో?
    1983లో తెలుగుదేశం పార్టీ ఆవిర్భవించాక అప్పటి నుండి ఇప్పటివరకు నెల్లూరు లోక్‌సభకు 10సార్లు ఎన్నికలు జరిగాయి, 2012లో జరిగిన ఉపఎన్నికను కూడా కలుపుకుంటే! ఈ పదిసార్లలో తెలుగుదేశం పార్టీ గెలిచింది రెండంటే రెండుసార్లే! ఏ లోక్‌సభ స్థానంలో కూడా తెలుగుదేశం పార్టీకి…
  • అజీజా... నిన్నొదలా...!
    నెల్లూరు మేయర్‌ అబ్దుల్‌ అజీజ్‌ వివాదా లతో సహజీవనం చేస్తున్నట్లుగా వుంది అది వ్యాపారంలోనైనా... ఇటు రాజకీయాలలోనైనా! అజీజ్‌ మేయర్‌ అయ్యింది మొదలు నెల్లూరు కార్పొరేషన్‌లో ఎన్నో వివాదాలు చూసాం. ఏ కమిషనర్‌తోనూ ఆయనకు పడేది కాదు. ఇలా పడకనే గత…

Newsletter