jaganరాజకీయాలలో పరిస్థితులు తారుమారు కావడానికి ఎంతో కాలం పట్టదు. నాలుగేళ్ళ పదినెలలు సమర్ధవం తంగా పని చేసిన ఒక ప్రభుత్వం ఒక చిన్న తప్పు చేస్తే ఒక్క నెలలోనే గబ్బు పట్టొచ్చు. దాని మూలంగానే ఎన్నికల్లో ఓడిపోవచ్చు. నాలుగేళ్ళ పది నెలల పాటు సమర్ధవంతంగా పనిచేయని ప్రతిపక్షం ఒక్క నెలలో పుంజుకుని అధికారంలోకి రావొచ్చు. రాజకీయాలలో ఏదైనా సాధ్యమే!

ఇలాంటి ట్రెండే ఇప్పుడు ఆంధ్రప్రదేశ్‌ రాజకీయాలలో నడుస్తోంది. రెండు నెలల క్రితం దాకా కూడా రాష్ట్ర రాజకీయా లలో ఒక విధమైన వాతావరణం వుండింది. 2019 ఎన్నికల్లోనూ తిరిగి తెలుగుదేశమే అధికారంలోకి వస్తుందని, చంద్రబాబు అనుభవజ్ఞుడని, ఆయన తిమ్మిని బమ్మిని చేసైనా పార్టీని గెలి పించుకోగలడని నమ్ముతూ వచ్చారు. ముఖ్యంగా జగన్‌ ఎంత అరచి గీపెట్టుకున్నా రాయలసీమ, నెల్లూరు, ప్రకాశం జిల్లాల్లో తప్పితే గుంటూరు నుండి శ్రీకాకుళం దాకా వైసిపికి పెద్దగా సీట్లు రావని, చంద్రబాబే మళ్ళీ సీఎం అంటూ విశ్వసించారు. దీనికితోడు చంద్రబాబు అనుకూల మీడియా కూడా ఆయనకే బాకా ఊదసాగింది.

కాని రాష్ట్ర రాజకీయాలలో కేవలం రెండు నెలల కాలంలోనే పెనుమార్పులు చోటుచేసుకున్నాయి. జగన్‌ తీసుకున్న స్థిరమైన నిర్ణయాలు ప్రజల్లో వైకాపా ఇమేజ్‌ను పెంచగా, చంద్రబాబు 'యూ టర్న్‌' రాజకీయాలు ఆయన పార్టీకి పెద్ద డామేజీ అయ్యాయి. ఏపికి ఎంతో ప్రయోజనం చేకూర్చే ప్రత్యేకహోదా విషయంలో చంద్రబాబు వైఖరి ప్రజలకు నచ్చలేదు. ముఖ్యంగా యువత విశ్వాసాన్ని ఆయన కోల్పోయాడు. ఓటర్ల జాబితా నుండి వృద్ధులు తొలుగుతుంటారు, యువత కొత్తగా చేరుతుంటుంది. ప్రత్యేక హోదా ఉద్యమం యువత కోసమే. కాబట్టే వాళ్ళు జగన్‌ పట్ల అభిమానం చూపుతున్నారు. హోదా ఉద్యమంలో జగన్‌ దూకుడు ప్రజల ఆమోదం పొందింది. ప్రత్యేకహోదాను మొదట వ్యతి రేకించి తర్వాత హోదానే కావాలన్న చంద్రబాబు డ్రామాలను ప్రజలు అంగీకరించడం లేదు.

దీనికితోడు ఎన్డీఏ నుండి బయటకొచ్చాక టీడీపీ ప్రభుత్వ అవినీతిపై విమర్శలు పెరిగాయి. చంద్రబాబు అవినీతిని లెక్కలతో సహా వివరిస్తామని బీజేపీ నాయకులు పేపర్లు పట్టుకుని తిరుగు తున్నారు. మరోపక్క జనసేన పవన్‌కళ్యాణ్‌ చేసిన అవినీతి ఆరోపణలు కూడా తెలుగుదేశంను అతలాకుతలం చేసాయి. ఇక నాలుగేళ్ళ చంద్రబాబు పాలనలో అన్నీ వైఫల్యాలే. ఒక్క విజయమూ లేదు. చెప్పుకోదగ్గ పని ఒక్కటీ లేదు.

చంద్రబాబుపై నమ్మకం సడలిపోయింది. అదే సమయంలో జగన్‌పై ప్రజలలో నమ్మకం పెరుగుతోంది. ప్రత్యేకహోదా ఉద్య మంలో ఒకే మాట, ఒకే బాట అంటూ నాలుగేళ్ళుగా జగన్‌ సాగించిన పోరాటం ఆయనకు మైలేజీని పెంచింది. ఇక ప్రజా సంకల్పయాత్ర అంటూ ఇడుపులపాయ నుండి ఇచ్ఛాపురం దాకా ఆయన మొదలుపెట్టిన పాదయాత్ర జైత్రయాత్రలాగా సాగుతోంది. వైసిపికి పట్టున్న కర్నూలు, కడప, చిత్తూరు, నెల్లూరు, ప్రకాశం జిల్లాల్లోనే కాదు, టీడీపీ కంచుకోటలు గుంటూరు, కృష్ణా జిల్లాల్లోనూ జగన్‌ పాదయాత్ర ప్రభంజనంలా మారింది. రాష్ట్రంలో రాజకీయ విశ్లేషణలు సైతం మారిపోయాయి. కొద్ది నెలల క్రితంవరకు మళ్ళీ తెలుగుదేశందే అధికారం అంటున్న గొంతులు కూడా ఇప్పుడు పెగలడం లేదు. 2014 ఎన్నికల్లో తెలుగుదేశానికి ఓటేసిన ప్రతి పదిమందిలో ఐదుమంది ఆ పార్టీ పనితీరుపై అసంతృప్తితో వున్నారు. కాని, అదే ఎన్నికల్లో వైసిపికి ఓటేసిన ప్రతి పదిమందిలో తొమ్మిదిమంది వైసిపితోనే వున్నారు.

కరెక్ట్‌గా ఇంకో ఏడాదిలో ఎన్నికలు... ఎలక్షన్‌ ట్రెండ్‌ మొద లైనట్లే! ఇక్కడనుండే ఎత్తులు, పైఎత్తులు మొదలవుతాయి. ఇప్పటికైతే రాష్ట్రంలో వైసిపికి అనుకూల వాతావరణముంది. చంద్రబాబు సరిదిద్దుకోలేనంత వ్యతిరేకత తెచ్చుకున్నాడు. శత్రువు బలహీనతనే జగన్‌ తన బలంగా మలచుకుంటే ఇదే ట్రెండ్‌ ఎలక్షన్‌లలో ఉపయోగపడుతుంది.

jaganనాలుగు దశాబ్దాల రాజకీయ అనుభవం... ముఖ్యమంత్రిగా 13ఏళ్ళ సర్వీసు... రెండుసార్లు మంత్రి... ఏడుసార్లు ఎమ్మెల్యే... జాతీయ రాజ కీయాలలో గిర్రున చక్రం తిప్పిన నేర్పరితనం... యునైటెడ్‌ ఫ్రంట్‌ కన్వీనర్‌... ఇన్ని వున్న చంద్రబాబునాయుడును నిండా 45ఏళ్ల వయసుండని వై.యస్‌. జగన్మోహన్‌రెడ్డి ముప్పతిప్పలు పెడుతున్నాడు.

వై.యస్‌.జగన్మోహన్‌రెడ్డి చంద్రబాబు చేత రోజుకో మాట మాట్లాడిస్తున్నాడు. వారానికో వేషం వేసేలా చేయిస్తున్నాడు. ఇన్నేళ్ళ తన రాజకీయ జీవితంలో చంద్రబాబు మర్రి చెన్నారెడ్డి, కోట్ల విజయభాస్కర్‌రెడ్డి, నేదురుమల్లి జనార్ధన్‌రెడ్డి, వై.యస్‌.రాజశేఖరరెడ్డి, కె.రోశయ్య, నల్లారి కిరణ్‌కుమార్‌రెడ్డి వంటి ప్రతిపక్ష ప్రత్యర్థులను చూసాడు. కాని, జగన్‌ లాంటి ప్రతిపక్ష నేత చంద్రబాబు 40ఏళ్ల రాజకీయ చరిత్రలో ఇంతవరకు ఎదురుకాలేదు. చంద్రబాబును అసమర్ధ నేతగా అవినీతిపరుడిగా, రోజుకో మాట మార్చే రాజకీయ ఊసరవెల్లిగా, మాట మీద నిలబడని వ్యక్తిగా, పచ్చి అవకాశవాదిగా ప్రజల ముందు నిరూపించడంలో జగన్‌ చాలావరకు సక్సెస్‌ అయ్యాడు.

చంద్రబాబుకున్నంత రాజకీయ అనుభవం లేకున్నా, కుట్రలు, వ్యూహాలు పన్నే తెలివితేటలు లేకున్నా... కేవలం ఒకే మాటకు కట్టుబడి ఒకే మార్గాన్ని ఎంచుకుని ఈరోజు ప్రజాక్షేత్రంలో వై.యస్‌.జగన్‌ హీరో అయ్యాడు. 2019 ఎన్నికల్లో ఎవరు గెలుస్తారు, ఎవరు ఓడుతారు అన్నది పక్కనపెడదాం. ప్రస్తుతం ఏపిలో సెగలు రేపుతున్న అంశం ప్రత్యేకహోదా ఉద్యమం. ఈ సబ్జెక్ట్‌లో జగన్‌ ఏరోజూ మాట తప్పలేదు. నాలుగేళ్ళుగా ప్రత్యేకహోదా కోసం పోరాడుతున్నది జగనే! ఈ ఉద్యమాన్ని సజీవంగా నిలబెట్టింది జగనే! కేంద్ర ప్రభుత్వం ఏపికి ప్రత్యేకహోదా ఇచ్చేది లేదని ఒకటికి నాలుగుసార్లు చెప్పినా పట్టు విడవకుండా హోదా కోసం పోరాట బాట పట్టింది వైకాపానే! తన రాజకీయ చరిత్రలో చంద్రబాబు ఎప్పుడూ పట్టనంతగా గబ్బు పట్టింది ఈ ప్రత్యేకహోదా విషయంలోనే! గతంలో అవినీతి ఆరోపణలు, అక్రమాల సంఘటనలున్నా అవి బయటకు కనిపించేవి కావు. కాని హోదా విషయంలో ఆయన నిజస్వరూపం ప్రజల కళ్ళకు కట్టి నట్లయ్యింది. కేంద్రం ప్రత్యేకహోదా లేదు, ప్యాకేజీ ఇస్తామన్నప్పుడు సంతోషంగా స్వాగతించింది ఆయనే! ప్రత్యేకప్యాకేజీ ఇచ్చినందుకు కేంద్రానికి కృతజ్ఞతలు చెప్పిందీ ఆయనే! ప్రత్యేకహోదాపై ఉద్యమాలు చేసిన వాళ్ళ మీద కేసులు పెట్టించింది ఆయనే! నిండు సభలో ప్రత్యేకహోదా వస్తే ఏమొస్తాయయ్యా... హిమాచల్‌ ఏమయ్యింది... నార్త్‌ ఈస్ట్‌ రాష్ట్రాలలో ఏమొచ్చాయి, అక్కడ డెవలప్‌మెంట్‌ ఎక్కడుంది అని గద్దించింది ఆయనే! ఇన్ని అన్న ఆయనే ఈరోజు ప్రత్యేకహోదా కావాలంటున్నా, ప్రత్యేకహోదా కోసం సైకిల్‌యాత్రలు, బస్సు యాత్రలు, విమానం యాత్రలు చేయాలంటున్నా దానికి కారణం జగనే! ప్రత్యేకహోదా ఉద్యమం ఇప్పుడొక ఒలింపిక్‌ రేస్‌ మాదిరిగా మారింది. మొదటినుండి ఈ పోరాటం జెండా పట్టుకుని నడుస్తున్నది జగనే. తన లోక్‌సభసభ్యుల చేత రాజీనామాలు చేయించి దీక్షకు కూర్చో బెట్టాడు. ఏపి ప్రజలు జగన్‌ పోరాటాన్నే నమ్ముతున్నారు. చంద్రబాబు జగన్‌ను కాపీ కొడుతున్నాడనే ప్రచారం వచ్చేసింది. జగన్‌ అవిశ్వాస తీర్మానం పెడితే ఈయన కూడా అవిశ్వాస తీర్మానం అన్నాడు. జగన్‌ నిరాహారదీక్షలు పెడితే ఈయన సైకిల్‌యాత్రలు పెట్టాడు. వైసిపి ఎంపీలు అక్కడ రాజీనామా చేస్తే, తన ఎంపీల చేత ప్రధాని ఇంటి వద్ద డ్రామాలేయించాడు. ఇదంతా చూస్తుంటే ప్రత్యేకహోదా పోరాటంలో జగన్‌ పాత్ర ఒరిజినల్‌ గాను, చంద్రబాబు పాత్ర డూప్‌గాను కనిపిస్తోంది. జగన్‌ పిల్లకాకి... నా అనుభవం ముందు బచ్చా అని భ్రమపడ్డ చంద్రబాబుకి ఈరోజు ఆ ఒక్కడే... చుక్కలు చూపిస్తున్నాడు.

modi andhraఈమధ్య సినిమా యాక్టర్‌ శివాజీ ఆపరేషన్‌ గరుడ, ఆపరేషన్‌ ద్రవిడ, ఆపరేషన్‌ పెరుగువడ అంటూ అయ్యవారు లాగా బ్లాక్‌బోర్డు మీద వ్రాసిమరీ విలేకరులకు వివరించాడు. శక్తివంతమైన ఇంటలిజన్స్‌ విభాగానికి సైతం అందని సమాచారం తనకు అందినట్లు ఆయన ఫోజిచ్చాడు. అయితే ఆపరేషన్‌ గరుడ, పెరుగువడ సంగతేమోగాని, త్వరలోనే కేంద్ర ప్రభుత్వం ఆంధ్రప్రదేశ్‌లో తన మిషన్‌ను ఆపరేషన్‌ను అమలు చేయడం మాత్రం గ్యారంటీగా కనిపిస్తోంది. బహుశా కర్నాటక ఎన్నికలు ముగిసాక బీజేపీ పెద్దలు ఏ.పి రాజకీయాలపై దృష్టిపెట్టే అవకాశాలు పుష్కలంగా కనిపిస్తున్నాయి.

కమలదళం ఆపరేషన్‌ మొదలుపెట్టడమంటే మొదట ఈ నాలుగేళ్ళ పాలనలో చంద్రబాబు అక్రమాల చిట్టాను బయటకు తీయడమే! ఒకటా రెండా... ఈ నాలుగేళ్ళ పాలనలో ఎన్నో లొసుగులున్నాయి. ఎన్నో వేలకోట్ల దుర్వినియోగం వుంది. దుబారా వుంది. లెక్కలేనంత అవినీతి వుంది. ఈ దేశంలో 29రాష్ట్రాలుంటే సగానికిపైగా రాష్ట్రాలలో కుంభమేళా, పుష్కరాలు జరుగుతుంటాయి. కాని, ఏ రాష్ట్రంలో కూడా వేలకోట్లు పెట్టి పుష్కరాలను చేయలేదు. కేవలం దోపిడీ పథకంలో భాగంగానే ఏపిలో గోదావరి, కృష్ణ పుష్కరాలను నిర్వహించినట్లుగా వుంది. పుష్కరాలప్పుడు చేసిన పనులు, వాటి అంచనాలు, లెక్కలు బయటకు తీస్తే ఆశ్చర్యపరిచే బొక్కలు బయటపడతాయి. పట్టిసీమ ప్రాజెక్ట్‌ పేరుతో ఎంత దోచుకున్నారన్నది బీజేపీ నాయకులు లెక్క లతో సహా చెబుతున్నారు. ఈ ప్రభుత్వంలో పోలవరం పెద్ద స్కాం. 16వేల కోట్ల అంచనాలను ప్రభుత్వం 58వేల కోట్లకు తీసుకుపోయింది. ఈ ప్రాజెక్ట్‌ నిర్మాణానికి వేసిన అంచనాలను చూస్తే కళ్ళు బైర్లు కమ్మక తప్పదు. ఈ ప్రభుత్వంలో అతిపెద్ద బూటకం అమరావతి రాజధాని. మూడు పైర్లు పండే 35వేల ఎకరాల మాగాణి పొలాలను రాజధాని కోసం తీసుకున్నారు. నాలుగేళ్ళుగా విదేశీయాత్రలు, గ్రాఫిక్‌ డిజైన్‌లు తప్పితే రాజధాని నిర్మాణంలో అడుగు ముందుకు పడింది లేదు. 700 కోట్లు పెట్టి తాత్కాలిక భవనాలను కట్టు కున్నారు. అది కూడా చదరపు అడుగు 8వేల రూపాయల ఖర్చుతో! ప్రపంచంలోనే ఇంత రేటు ఎక్కడా ఉండదేమో! రాజధాని నిర్మాణానికంటూ కేంద్రం ఇచ్చిన నిధులను దారి మళ్ళించారు. కట్టని భవనాలను కట్టినట్లుగా యూసీలు పంపారు. రాజ్యాంగ విలువలను తుంగలో తొక్కి ప్రతిపక్ష పార్టీ ఎంపీలను, ఎమ్మెల్యేలను కొన్నారు. ఓటు నోటు కేసు ఎలాగూ పెండింగ్‌లో ఉంది.

ఇక నోట్ల రద్దు తర్వాత అన్ని రాష్ట్రాల కంటే కరెన్సీ మన రాష్ట్రానికే ఎక్కువుగా వచ్చింది. అయితే ఇప్పటికీ ఏ రాష్ట్రంలో లేని విధంగా మన రాష్ట్రంలోనే కరెన్సీ కొరత ఏర్పడుతోంది. వచ్చే ఎన్నికల కోసం తెలుగుదేశం నాయకులే కరెన్సీని డంప్‌ చేస్తున్నారనే సమాచారం కేంద్రం వద్ద వుంది. టీటీడీ బోర్డు మెంబర్‌ శేఖర్‌రెడ్డి ఇంట్లో భారీ ఎత్తున కరెన్సీ కట్టలు దొర కడం తెలిసిందే! ఆయన ఇంటికి కరెన్సీ కట్టలు తరలిపోవడం వెనుక తెలుగుదేశం పెద్దల సహకారం వుందనేదానిపై కూడా అనుమానాలున్నాయి. ఈ నాలుగేళ్ళలో ఇవే కాదు, ఇంకా అనేక లొసుగులున్నాయి. ఇటీవల కాగ్‌ రిపోర్ట్‌ కూడా ఏపి ప్రభుత్వ లెక్కలను కడిగిపెట్టింది. ఇక అవినీతిలోనూ ప్రతి ఏటా రాష్ట్రం అగ్రస్థానంలో నిలుస్తూ వస్తోంది. వీటిలో దేనిమీద విచారణకు ఆదేశించినా చంద్రబాబుకు సమస్యలు మొదలవడం ఖాయం.

ప్రభుత్వంతో ఏ సంబంధం లేక పోయినా, అధికారికంగా ఏ పదవీ లేకున్నా జగన్‌ మీద అక్రమ ఆస్తుల కేసులు బనా యించి 16నెలలు జైలులో వుంచారు. ఈ నాలుగేళ్ళ తెలుగుదేశం ప్రభుత్వ పాలనపై ఎటువంటి విచారణకు ఆదేశిరచినా చంద్రబాబు ఎక్కడోచోట అధికారికంగానే దొరుకుతాడనే చర్చ జరుగుతోంది. కాబట్టే ఆయన భయపడుతున్నాడని సమాచారం.

కర్నాటకలో గెలిచినా ఓడినా బీజేపీ వాళ్ళు ఏపిలో తమ ఆపరేషన్‌ను ప్రారం భించడం ఖాయం. మొదటిది చంద్రబాబు అక్రమాలపై విచారణ జరిపించి వాటి నిగ్గు తేల్చి ప్రజల ముందు పెట్టడం, ప్రజల్లో చంద్రబాబును అవినీతి నాయ కుడిగా చూపించడం.. ఇక రెండోది ఏపి ప్రజల్లో బీజేపీపై వున్న వ్యతిరేకతను తొలగించుకోవడం, దీనికి ప్రధానమార్గం రాష్ట్రానికి ప్రత్యేకహోదా ప్రకటించడం. కర్నాటక ఎన్నికల కోసమే ఇంతకాలం ఏపికి కేంద్రం ప్రత్యేకహోదాను ప్రకటించ లేకపోయిందని తెలుస్తోంది. ఏపికి ప్రత్యేక హోదా ఇస్తే ఆ ప్రభావం కర్నాటక మీద పడుతుంది. కర్నాటకలో పెట్టాల్సిన పెట్టు బడులు ఏపికి తరలివచ్చే అవకాశం వుంది. కర్నాటకలో కాంగ్రెస్‌కు ఇది కలిసిరావచ్చు. బీజేపీకి అక్కడ అధికారం లోకి రావడానికి అవకాశాలున్నాయి. కాబట్టే కర్నాటక ఎన్నికల వరకు ఏపికి కఠినంగానే మొండిచేయి చూపిస్తూ వచ్చింది. కర్నాటక ఎన్నికల తర్వాత ఆ పార్టీ ఏపికి ప్రత్యేక హోదా ప్రకటించవచ్చు. 2019 ఎన్నికల్లో బీజేపీకి ఈ రాష్ట్రంలో సీట్లు, ఓట్లు రాకపోయినా తెలుగుదేశం అధికారంలోకి రాకూడదన్నది టార్గెట్‌. ఆ ఎన్నికల్లో టీడీపీ ఓడిపోతే ఆ స్థానంలోకి బీజేపీ రావచ్చు. భవిష్యత్‌లో బలపడ వచ్చు. ఈ దిశగానే బీజేపీ ఏపి ఆపరేషన్‌ ఉండబోతున్నట్లు సమాచారం.

Page 1 of 7

newsbottomad

ఎక్కువగా చదివిన వార్తలు

  • నారాయణను వదలని అనిల్‌
    మున్సిపల్‌ మంత్రి నారాయణకు ఎవరితోనూ సమస్యలు లేవు. ప్రతిపక్ష నాయకులు కూడా ఆయనపై పెద్దగా విమర్శలు చేయరు. కాని, నెల్లూరు నగర ఎమ్మెల్యే పి.అనిల్‌కుమార్‌యాదవ్‌ మాత్రం నారాయణకు చుక్కలు చూపిస్తున్నాడు. ఆయనకు కొరుకుడు పడని కొయ్యగా మారాడు. ఈ నాలుగేళ్ళలో మంత్రి…
  • వేసవి సెలవులు... వినోదం కావాలే గాని విషాదం కాదు
    వేసవి సెలవులు వచ్చేస్తున్నాయి. ఇప్పటికే టెన్త్‌, ఇంటర్‌ పరీక్షలు ముగిసాయి. వీళ్ళతో పెద్ద సమస్య లేదు. టెన్త్‌ వ్రాసిన వాళ్ళు ఇంటర్మీ డియట్‌కు, ఇంటర్‌ వ్రాసిన వాళ్ళు ఎంసెట్‌కు ప్రిపేరవడంతోనే సెలవులు దాటిపోతాయి. లోయర్‌ క్లాస్‌లకు ఈ నెలాఖరు నుండే సెలవులు.…
  • ఉదయగిరిలో... 'రెడ్డి' కోసం 'దేశం' అన్వేషణ
    రాజకీయ చైతన్యానికి పేరుపడ్డ నియోజకవర్గంలో రాజకీయ పార్టీలకు గెలుపు పెద్దసవాల్‌! పార్టీ ప్రభంజనాల కంటే పోటీచేసే అభ్యర్థి ప్రభావమే ఇక్కడ ఓటర్లపై బలంగా వుంటుంది. అభ్యర్థి సమర్ధత, వ్యక్తిత్వాన్ని బట్టే ఇక్కడ గెలు పోటములుంటాయి. గత మూడున్నర దశాబ్దాల రాజకీయ చరిత్రను…
  • 'నిప్పో'కు రైట్‌ రైట్‌
    గత కొద్దికాలంగా రాజకీయ నాయకుల నోళ్ళలో నానుతూ రాజకీయ అంశంగా మారిన 'నిప్పో' పరిశ్రమకు సంబంధించిన 13.02 ఎకరాల భూమి కన్వర్షన్‌కు సంబంధించిన అంశం ఎట్టకేలకు నెల్లూరు నగరపాలక సంస్థ ఆమోదం పొందింది. 12వ తేదీ జరిగిన కార్పొరేషన్‌ కౌన్సిల్‌ సమావేశంలో…
  • వైసిపి వైపు నేతల చూపు
    నవ్యాంధ్రలో శరవేగంగా చోటుచేసుకుంటున్న రాజకీయ మార్పు ప్రభావం నెల్లూరుజిల్లాపై కూడా ఎక్కువగానే కనిపిస్తోంది. ఇప్పటివరకు స్తబ్ధుగా వున్న జిల్లా రాజకీయం ఇప్పుడిప్పుడే ఊపందుకుని వేసవి తాపంతో పాటు వేడెక్కుతోంది. జిల్లాలోని పది నియోజకవర్గాలలో వైసిపికి ఇప్పటికే సమన్వయకర్తలున్నారు. వారే రేపు రాబోయే…

Newsletter