kamala dalapathiఅరుణాచల్‌ ప్రదేశ్‌, అస్సోం, త్రిపుర వంటి ఈశాన్య రాష్ట్రాలలోనే తమ పార్టీ జెండాను పాతిన బీజేపీ అంతో ఇంతో అనువుగా వుండే ఆంధ్రప్రదేశ్‌ను వదిలిపెడు తుందా? ఈ రాష్ట్రంలో పాతుకుపోవడానికి ప్రయత్నించకుండా వుంటుందా? ఎట్టి పరిస్థితుల్లోనూ ఆంధ్రాను వదిలిపెట్టదు. ఇప్పుడు కాకపోతే రేపు... ఏపిలో పట్టు సాధిస్తామనే ధీమా ఆ పార్టీలో వుంది. రేపు పట్టు సాధించాలంటే ఈరోజే అడుగు వేయడం మొదలుపెట్టాలి.

ఆ దిశగానే బీజేపీ ప్రయత్నాలు మొదలయ్యాయి. రెండు ప్రాంతీయ పార్టీలు బలంగా వుండే రాష్ట్రంలో ఒక జాతీయ పార్టీ బలం పెంచుకోవాలంటే సాధ్యమయ్యే విషయం కాదు. రెండు ప్రాంతీయపార్టీలలో ఒక పార్టీని తెరమరుగు చేస్తేనే ఆ స్థానంలో జాతీయపార్టీ రావడానికి ఆస్కారం ఉంటుంది. ఆ ప్రణాళికనే బీజేపీ ఏపిలోనూ అమలు చేయడానికి శ్రీకారం చుట్టింది. ఇందులో భాగంగానే పొమ్మన కుండానే టీడీపీకి పొగబెట్టి ఎన్డీఏ నుండి ఆ పార్టీని బయటకు నెట్టింది. 2019 ఎన్నికల్లో అధికారంలోకి రావాలనే ఆశ బీజేపీకి లేదు, కాకపోతే తెలుగుదేశం ఓడిపోవాలనేది వాళ్ళ టార్గెట్‌! వైసిపి అధికారంలోకి వస్తే జగన్‌ రాష్ట్ర రాజకీయాలకు మాత్రమే పరిమితం అవుతాడు. అదే చంద్రబాబు మళ్ళీ గెలిస్తే జాతీయ రాజకీయాలలో కూడా బీజేపీకి పుండు అవుతాడు.

టిడిపి ఓడిపోవాలన్నదే లక్ష్యం

రాష్ట్రంలో బీజేపీ బలపడాలి, టీడీపీ బలహీనపడాలి. ఇందుకోసం మొదట తీసుకున్న నిర్ణయం చంద్రబాబుకు అభి మానపాత్రుడిగా వున్న తమ పార్టీ రాష్ట్ర అధ్యక్షుడు కంభంపాటి హరిబాబును అధ్యక్ష పదవి నుండి తప్పించడం... ఆ పనైపో యింది. ఇప్పుడు కొత్త అధ్యక్షుడిగా కాపు సామాజికవర్గానికి చెందిన వాళ్ళను పెట్టడం. ఇందులో భాగంగానే సోము వీర్రాజు, కన్నా లక్ష్మీనారాయణ, పైడి కొండల మాణిక్యాల రావుల పేర్లు తెరమీద కొచ్చాయి. అలాగే ఎన్టీఆర్‌ కుటుంబానికి చెందిన మాజీ కేంద్రమంత్రి దగ్గుపాటి పురంధేశ్వరి పేరు కూడా ప్రధానంగా రేస్‌లో వున్నట్లు తెలుస్తోంది. టీడీపీని నిర్వీర్యం చేసి తాము బలపడాలనేది బీజేపీ అనుసరించనున్న వ్యూహం! ఇం దుకు ఎన్టీఆర్‌ కుటుంబాన్ని వాడుకుం టుందో? లేదా కాపు సామాజికవర్గాన్ని మార్గంగా ఎంచుకుంటుందో త్వరలోనే తేలబోతోంది!

bjp2014 ఎన్నికలప్పుడు బీజేపీతో పొత్తు అంటే ప్రాంతీయ పార్టీలు ఎగబడే పరిస్థితి. నరేంద్ర మోడీ మేనియా అప్పట్లో ఆ స్థాయిలో వుండింది.

ఏపి, తెలంగాణలోనూ టీడీపీతో పొత్తు పెట్టుకోకుండా ఒంటరిగానే ఎన్నికలకు వెళ్ళాలని ఆనాడు ఇరు రాష్ట్రాల బీజేపీ నాయకులు భావించారు. కాని, చంద్రబాబు నాయుడు తెలివిగా పావులు కదిపాడు. నరేంద్ర మోడీ ఇమేజ్‌ను ఎలాగైనా వాడు కోవాలనిచెప్పి తన రాజకీయ గురువు రామోజీరావు ద్వారా రిలయన్స్‌ అంబానిని రంగంలోకి దించి, ఢిల్లీ స్థాయిలో పైరవీలు నడిపించి ఎట్టకేలకు ఆనాడు మోడీని టీడీపీతో పొత్తుకు ఒప్పించారు. దాని ఫలితాన్ని 2014 ఎన్నికల్లో చంద్రబాబు అందుకున్నాడు. అనుభవిస్తున్నాడు.

అప్పుడు అందరి కళ్ళకు బీజేపీ ఐశ్వర్యారాయ్‌... అవే కళ్ళకు ఇప్పుడు కల్పనారాయ్‌లా కనిపిస్తుంది. దేశంలో నరేంద్రమోడీ వ్యతిరేక ఓటు పెరుగు తోంది. ఏపికిచ్చిన ప్రత్యేకహోదా హామీని తుంగలో తొక్కిన నేపథ్యంలో ఈ రాష్ట్రంలో అది ఇంకా ఎక్కువుగా వుంది. వచ్చే ఎన్నికల్లో బీజేపీతో పొత్తు పెట్టుకునే ఏ పార్టీ అయినా సరే ఓట్ల రూపంలో చాలా నష్టపోవాల్సి వుంటుంది. ప్రత్యేకహోదా ఇవ్వకపోవడంతో పాటు నోట్లు రద్దు, జిఎస్టీ వంటి అంశాలు ఈ రాష్ట్ర ప్రజల్లో బీజేపీపై వ్యతిరేకతను పెంచాయి. కాబట్టి రాష్ట్రంలో ఆ పార్టీతో ఎవరు పొత్తు పెట్టుకున్నా ఆ పార్టీపై ఈ వ్యతిరేకత పడుతుంది.

'ఓటు-నోటు' కేసు లేకుంటే చంద్ర బాబు బీజేపీతో ఎప్పుడో తెగదెంపులు చేసుకుని వుండేవాడు. ఆ కేసు భయం వల్లే వారితో కలిసుంటున్నాడు. ఇప్పుడైనా జగన్‌ ప్రత్యేకహోదా ఉద్యమాన్ని ఉధృతం చేసాడు కాబట్టి, బీజేపీ మీద తాను కూడా ఫైట్‌ చేస్తున్నానని చెప్పడానికి తన ఇద్దరు కేంద్రమంత్రుల చేత రాజీనామా చేయిం చాడు. ఆ కేసు భయంతోనే ఇంకా ఎన్డీఏను పూర్తిగా వదిలి రాలేదు. ఎన్నికల నోటిఫికే షన్‌ రాగానే ఆ పని కూడా చేసేస్తాడు. అప్పుడు కేసుల భయం అంతగా వుండదు కదా! చంద్రబాబు బీజేపీతో తెంచుకోవ డానికి ఇప్పుడు ఇంకా ఎక్కువ శ్రద్ధ చూపు తాడు. ఎందుకంటే మొన్న యూపి ఉప ఎన్నికల్లో బీజేపీకి కంచుకోటల్లాంటి రెండు లోక్‌సభ స్థానాల్లో ఆ పార్టీ ఘోరంగా ఓడిపోయింది. బీజేపీపై ప్రజా వ్యతిరేకతకు ఈ ఫలితాలు నిదర్శనం. కాబట్టి బీజేపీతో కలిసి పయనించడానికి ఇక చంద్రబాబు సాహసం చేయకపోవచ్చు.

టీడీపీ వదిలేస్తే బీజేపీని వైసిపి తగులుకుంటుందని చాలాకాలం నుండి వూహాగానాలున్నాయి. ఈ పరిస్థితుల్లో ఏపిలో బీజేపీతో పొత్తు పెట్టుకోవడమంటే దారినపోయే దరిద్రాన్ని కేకేసి పిలవడమే! జగన్‌ అలాంటి పని చేయడు. అదీగాక ముస్లింలు, క్రిస్టియన్‌లే వైసిపికి పెద్ద ఓటుబ్యాంక్‌. ఎన్నికలకు ముందే బీజేపీతో పొత్తు పెట్టుకుంటే ఆ ఓటు బ్యాంకులో కొంత నష్టం తప్పదు. కాని జగన్‌ ప్రత్యేక హోదాను ఎవరైతే ఇస్తారో వారికి మద్దతు తెలుపుతామని ప్రకటించివున్నాడు. అది ఎన్నికల తర్వాత కావచ్చు... లేదంటే ఎన్ని కల ముందు కూడా కావచ్చు. అయితే వైసిపితో పొత్తు కోరుకుంటే ఎన్నికలలోపే కేంద్రం ఏపికి ప్రత్యేకహోదా ఇచ్చే అవ కాశం వుంది. జగన్‌ పోరాటం వల్లే మేం దిగొచ్చి ఏపికి ప్రత్యేకహోదా ఇచ్చామని కేంద్రం ప్రకటించినా ఆశ్చర్యపోనక్కర్లేదు. అప్పుడు బీజేపీతో వైసిపి పొత్తు పెట్టుకున్నా ఇబ్బంది ఉండదు. రాష్ట్రానికి ఇచ్చిన హామీలను నెరవేర్చినందు వల్లే బీజేపీతో కలుస్తున్నామని జగన్‌ చెప్పొచ్చు.

ప్రస్తుతానికైతే రాష్ట్ర రాజకీయాలలో టీడీపీ, బీజేపీలు తన్నుకుంటున్నాయి. వైసిపి మాత్రం ప్రత్యేక హోదా ఇచ్చేవారికే మా మద్దతు అనే స్టాండ్‌ మీద వుంది. బీజేపీతో టీడీపీ పొత్తు ఎన్నికల దాకా అనుమానమే! ప్రత్యేకహోదా ఇవ్వకుంటే ఆ పార్టీతో వైసిపి కూడా కలవదు. కాబట్టి వచ్చే ఎన్నికల్లో భాజపాది ఒంటరి పయనమా? లేక జంట ప్రయాణమా? అన్నది చూడాలి!

tripuraత్రిపురలో కమలం విరిసింది. బిజెపిలో ఆనందం వెల్లివిరిసింది. కమ్యూనిస్టు (మార్క్సిస్టులు)ల కోటగా ఉన్న ఈ రాష్ట్రంలో ఎవరూ ఊహించని రీతిలో కమల పతాకం రెపరెపలాడింది. త్రిపుర అంటే కమ్యూనిస్టులకు పెట్టిన కోట. దాదాపు రెండున్నర దశాబ్దాలుగా అక్కడ కమ్యూనిస్టులు అప్రతిహతంగా రాజ్యమేలుతున్నారు. అయినా, ప్రజల తీర్పు ఈసారి బిజెపినే వరించింది. ఇన్నేళ్ళు పాలించినా ప్రజల ఆశలు ఆకాంక్షలు ఫలించకపోవడంతో విసిగి వేసారి తాజాగా జరిగిన ఎన్నికల్లో కమ్యూనిస్టుల పాలనకు తెరదించారు. నూతనోత్తేజంతో అక్కడి ప్రజలు బిజెపిని స్వాగతించారు. బిజెపి తన భాగస్వామి పక్షమైన ఐపిఎఫ్‌టితో కలసి మూడింట రెండువంతులకు పైగానే ఆధిక్యాన్ని సాధించి తన సత్తా చాటుకుంది. అయిదేళ్ళ క్రితం ఇక్కడ జరిగిన ఎన్నికల్లో కేవలం రెండుశాతం కన్నా కూడా తక్కువ ఓట్లు దక్కించుకున్న బిజెపి, ఇప్పుడు చరిత్ర తిరగరాసింది. తనకు తిరుగేలేదనిపించింది. త్రిపురలో ఎన్నికలు జరిగిన 59 స్థానాల్లో ఏకంగా 43 స్థానాలు బిజెపి కూటమికి లభించడం తిరుగులేని రికార్డు. విజయానికి అవసరమైన స్థానాలకంటే అధికంగా 35 స్థానాలు గెలుచుకోవడ మంటే చిన్నవిషయమేమీ కాదు. అందులోనూ ఇక్కడ అప్పటిదాకా ఉన్న ముఖ్యమంత్రి మాణిక్‌సర్కార్‌ అంటే నిజంగా రాజకీయ రంగంలో మాణిక్యమే.. ఓ మేలిమి ఆణిముత్యమే. ఒక్క మాటలో చెప్పాలంటే దేశ వామపక్షాల చరిత్ర లోనే మాణిక్‌ సర్కార్‌ది ఒక ప్రత్యేక చరిత్ర. అంతటి నిజాయితీపరుడు.. నిరాడంబరుడాయన. అవినీతి మకిలి అంటని రాజకీయ యోధుడు. ఆయనకు ఎలాంటి ఆస్తులు, ఆడంబరాలు లేవు. అవి ఆయనకు నచ్చని విష యాలు కూడా. అటు రాజకీయంగా కానీ, వ్యక్తి గతంగా కానీ ఆయన్ను విమర్శించడానికి ఎలాంటి విషయాలూ లేని మచ్చ లేని మంచి నేత మాణిక్‌ సర్కార్‌. అయితే, ఆయన పాలనలో సగటు మనిషి బాధలు మాత్రం తీరలేదు. రాష్ట్రంలో పెరుగుతున్న పేదరికం, ప్రజలకు కనీస మౌలిక సదుపాయాలు లేకపోవడం, పారిశ్రామిక ప్రగతి ఆశించిన స్థాయిలో లేకపోవడం, నిరుద్యోగం ప్రబలిపోవడం వంటి సమస్యలతో త్రిపుర కుదేలైపోయింది. రాష్ట్రంలో పాలనాపరంగా ఎన్నో సమస్యలున్నా ఏళ్ళ తరబడిగా అవి తీరనే లేదు. నాయకుడు ఎంత మంచివారైనా, నిజాయితీపరుడే అయినా ప్రజలు కోరుకునేది అభివృద్ధినే కదా!... నిజాయితీగా ఉంటూనే... ప్రజల సమస్యలు తీరుస్తూ రాష్ట్రాభివృద్ధి సాధించినప్పుడే ప్రజలు ఆదరిస్తారు. కాలానుగుణంగా సిద్ధాంతాలను మార్చుకుని ప్రజల ఆకాంక్షలు నెరవేర్చేందుకు సంకల్పించక తమ దారే తమది.. అదే గొప్పది అన్నట్లుగా మొండిగా వ్యవహరిస్తుండబట్టే వామపక్షాలు, వాటి కూటములు జనచైతన్యం వెల్లివిరుస్తున్న నేటి అధునాతన కాలంలో.. తమకు తామే పరాజయాల గుంతలు వెతుక్కుని మరీ అందులో పడుతున్నాయి. అప్పటికీ గత పాతికేళ్ళుగా కమ్యూనిస్టు కోటగానే త్రిపుర ఉండిందంటే ఎప్పటికప్పుడు ప్రజలు తమ కలలు నెరవేరుతాయనే ఆశతోనే ఇంత కాలం ఓపిక పట్టారు. అయినా, ఫలితం లేకపోయేసరికి ప్రత్యామ్నాయం వైపు మొగ్గు చూపారు. ఆ రాష్ట్రంలో ఉద్యోగాలు లేక యువత ఎన్నో బాధలు పడుతుండడం, ఉద్యో గులకు జీతాలు పెరగక ఆర్ధిక ఇబ్బందుల్లో ఉండడం వంటివన్నీ కలసివెరసి బిజెపికి కలసివచ్చాయి. తమ ప్రభుత్వం వస్తే ఇలాంటి సమస్యలేమీ ఉండవని, అభివృద్ధిలో త్రిపురను అగ్రగామిని చేస్తామని బిజెపి వాగ్దానాలు చేయడంతో.. సరిగ్గా ఇలాంటి మార్పు కోసమే ఎదురుచూస్తున్న ప్రజానీకమంతా గుంపగుత్తగా బిజెపికి ఓట్లు వేసి కమలనాధులకు ఘన విజయం సాధించిపెట్టారు. 8 జిల్లాలు, 37 లక్షల మంది జనాభా ఉన్న చిన్న రాష్ట్రమైన త్రిపురలో కమ్యూనిస్టుల పాలనకు స్వస్తి పలికారు. కమ్యూనిస్టుల కోటగా ఉన్న పశ్చిమబెంగాల్‌లోనూ 2011లో ఇదే జరిగింది. త్రిపురలో గతంలో జరిగిన పది అసెంబ్లీ ఎన్నికల్లోనూ ఏ ఒక్కసారీ ఒక్క సీటును కూడా సాధించలేని బిజెపి ఇప్పుడు ఏకంగా రికార్డుస్థాయిలో 43 శాతం ఓట్లు సాధించిందంటే అద్భుతమే. అసాధ్యాన్ని సైతం సుసాధ్యం చేసి కమలనాధులు తమ ప్రతిభను చాటుకున్నారు. 'అభివృద్ధికి పచ్చజెండా ఊపాలంటే..ఎర్రజెండాల్ని తొలగించాలంటూ' ప్రధాని ఎన్నికల్లో చేసిన ప్రచారాలు ప్రజల్ని బాగా ప్రభావితం చేశాయి. కనుకనే, ఇంతటి విజయం ఇక్కడ లభించిందను కోవచ్చు. దీంతో బిజెపి సైద్ధాంతికంగా కూడా కమ్యూనిస్టులపై ఘనవిజయం సాధించినట్లయింది. భిన్నధృవాలుగా ఉన్న బిజెపి-కమ్యూనిస్టుల ఎన్నికల సమరాంగణంలో ఇది బిజెపికి తిరుగులేని విజయ మేనని చెప్పకతప్పదు. ఒక్క మాటలో చెప్పాలంటే త్రిపురలో బిజెపి శూన్యం నుంచి శిఖరస్థాయికి ఎది గింది. కమ్యూనిస్టుల కోట కూలిపోయింది. ఇదంతా ప్రజల నుంచి వచ్చిన మార్పు. కాలం చెల్లిన సిద్ధాంతా లతో కమ్యూనిస్టుల ఉనికి ప్రశ్నార్థకంగా మారుతోంది. ఒక్క త్రిపురలోనే కాదు, నాగాలాండ్‌, మేఘాలయ ఎన్నికల ఫలితాలు కూడా బిజెపికి మరింత ప్రతిష్టను చేకూర్చాయి. ఈ ఎన్నికల్లో ప్రధాని మోడీ, బిజెపి సారధి అమిత్‌షాల ప్రచారాలు ప్రజల్ని బాగా ప్రభావితం చేశాయి. ఇప్పటికే అస్సాం, మణిపూర్‌, అరుణాచల్‌ప్రదేశ్‌లలో పాలన చేపట్టిన బిజెపి, తాజాగా త్రిపుర, నాగాలాండ్‌, మేఘాలయల్లోనూ తన సత్తా చాటుతోంది. త్రిపురలో మూడింట రెండువంతుల స్థానాలను తానే గెలుచుకున్న బిజెపి, నాగాలాండ్‌లో భాగస్వామ్యపక్షంతో కలసి ప్రభుత్వం ఏర్పాటుచేయనుంది. అదేవిధంగా, మేఘాలయలో కాంగ్రెస్‌కు అధికస్థానాలు వచ్చినా, అక్కడ కూడా స్థానికంగా బలంగా

ఉన్న ఓ పార్టీతో కలసి బిజెపి ప్రభుత్వం ఏర్పాటు చేయబోతోంది.

ఏదేమైనా, ఈశాన్యభారతంలో ఆయా రాష్ట్రాల ప్రజలు బిజెపి పట్ల, ముఖ్యంగా ప్రధాని నరేంద్ర మోడీ పట్ల ఎంతో అభిమానం చూపుతున్నారనేందుకు, బిజెపికి పూర్తిస్థాయిలో తమ మద్దతు ఇస్తున్నారనేందుకు ఇటీవల ఈశాన్యభారతంలో జరిగిన ఈ ఎన్నికలే తాజా నిదర్శనం. ఈ ప్రభావం రానున్న కర్నాటక, కేరళ, పశ్చిమబెంగాల్‌ ఎన్నికలపై కూడా తప్పకుండా ప్రభావం చూపుతుందనడంలో ఎలాంటి సందేహం లేదు.

Page 1 of 15

newsbottomad

ఎక్కువగా చదివిన వార్తలు

  • ఉదయగిరిలో... 'రెడ్డి' కోసం 'దేశం' అన్వేషణ
    రాజకీయ చైతన్యానికి పేరుపడ్డ నియోజకవర్గంలో రాజకీయ పార్టీలకు గెలుపు పెద్దసవాల్‌! పార్టీ ప్రభంజనాల కంటే పోటీచేసే అభ్యర్థి ప్రభావమే ఇక్కడ ఓటర్లపై బలంగా వుంటుంది. అభ్యర్థి సమర్ధత, వ్యక్తిత్వాన్ని బట్టే ఇక్కడ గెలు పోటములుంటాయి. గత మూడున్నర దశాబ్దాల రాజకీయ చరిత్రను…
  • 'నిప్పో'కు రైట్‌ రైట్‌
    గత కొద్దికాలంగా రాజకీయ నాయకుల నోళ్ళలో నానుతూ రాజకీయ అంశంగా మారిన 'నిప్పో' పరిశ్రమకు సంబంధించిన 13.02 ఎకరాల భూమి కన్వర్షన్‌కు సంబంధించిన అంశం ఎట్టకేలకు నెల్లూరు నగరపాలక సంస్థ ఆమోదం పొందింది. 12వ తేదీ జరిగిన కార్పొరేషన్‌ కౌన్సిల్‌ సమావేశంలో…
  • ఆ ఒక్కడే వణికిస్తున్నాడు!
    నాలుగు దశాబ్దాల రాజకీయ అనుభవం... ముఖ్యమంత్రిగా 13ఏళ్ళ సర్వీసు... రెండుసార్లు మంత్రి... ఏడుసార్లు ఎమ్మెల్యే... జాతీయ రాజ కీయాలలో గిర్రున చక్రం తిప్పిన నేర్పరితనం... యునైటెడ్‌ ఫ్రంట్‌ కన్వీనర్‌... ఇన్ని వున్న చంద్రబాబునాయుడును నిండా 45ఏళ్ల వయసుండని వై.యస్‌. జగన్మోహన్‌రెడ్డి ముప్పతిప్పలు…
  • నడిచినా... నిద్రించినా... ఏడాదంతా ప్రజల మధ్యే...
    ప్రజలే దేవుళ్ళు, వారి ఇళ్ళే తనకు గుళ్ళు అని భావించి అనుక్షణం వారి మధ్యే వుంటూ వారి సమస్యలు తెలుసుకుంటూ వారి కష్ట సుఖాలలో తోడుండాలని కోరు కునే ప్రజా నాయకుడు నెల్లూరు గ్రామీణ ఎమ్మెల్యే కోటంరెడ్డి శ్రీధర్‌రెడ్డి. నిద్ర లేచింది…
  • హోదా పోరుతో... వ్యతిరేకత పోగొట్టుకున్నారు
    నెల్లూరుజిల్లాతో సంబంధం వున్న లోక్‌ సభ సభ్యులు మేక పాటి రాజమోహన్‌ రెడ్డి(నెల్లూరు), వెలగ పూడి వరప్రసాద్‌ (తిరుపతి)లు ప్రత్యేక హోదా ఉద్యమంలో కీలకపాత్ర పోషించారు. హోదా ఉద్యమంలో చురుకుగా పాల్గొనడం ద్వారా తమ తమ నియోజకవర్గాలలో తమ పట్ల నెలకొన్న…

Newsletter