chandraఅసలు ఢిల్లీలో ఏం జరిగింది? ఏం జరుగుతోంది? ఏం జరగబోతోంది? నాకిప్పుడే తెలియాలి అన్నంత ఉద్వేగానికి లోనవుతున్నాడు ముఖ్యమంత్రి చంద్రబాబు నాయుడు. వైసిపి అధినేత జగన్‌కు ప్రధాని నరేంద్రమోడీ అపాయింట్‌మెంట్‌ ఇవ్వడాన్ని ఆయన ఓ పట్టాన జీర్ణించు కోలేకపోతున్నాడు. ఆయన అమెరికాలో ఉండగానే ప్రధానిని జగన్‌ కలిసాడన్న వార్త చెవిన పడింది. అక్కడే మనశ్శాంతిగా ఉండలేకపోయాడు. అమెరికా నుండి నేరుగా వచ్చి ఢిల్లీలో దిగగానే తన వెంటవున్న వారిని హైదరాబాద్‌ పంపించేసాడు. తాను మాత్రం ఏడు గంటలపాటు ఎవరికీ అందుబాటులో లేకుండా గడిపాడు. జగన్‌ ప్రధానిని ఎందుకు కలిసాడు, ఏం చెప్పాడు, అసలు అర్ధాంతరంగా జగన్‌కు అపాయింట్‌మెంట్‌ ఇవ్వడం వెనుక ఆంతర్యమేమిటన్నది తెలుసుకోవడం కోసమే ఆయన ఆ కొన్ని గంటలు అజ్ఞాతంలో గడిపినట్లు తెలుస్తోంది.

ఒకప్పుడు చంద్రబాబుకు ఢిల్లీలో కూడా గట్టి నాయకుడనే పేరుండేది. 1996లో 13రోజుల ప్రధాని వాజ్‌పేయిని దించేసి యూనైటెడ్‌ ఫ్రంట్‌ కూటమిని కట్టించింది చంద్రబాబే! ఆ తర్వాత 1998, 1999లలో ఏర్పడ్డ ఎన్డీఏ ప్రభుత్వాల లోనూ కీలక భాగస్వామిగా వున్నాడు. 2002 గుజరాత్‌ అల్లర్ల సమయంలో ఆ రాష్ట్ర ముఖ్యమంత్రిగా వున్న ప్రస్తుత ప్రధాని నరేంద్రమోడీని జైలులో పెట్టాలంటూ నినదించిన ధైర్యశాలి. గత చరిత్రను చూస్తే జాతీయ రాజకీయాలలో చంద్రబాబు ట్రాక్‌ రికార్డు బాగానే వుంది. అంత పలుకుబడి కలిగిన నాయకుడు జగన్‌ ప్రధానిని కలిసాడని తెలియగానే చలి జ్వరం వచ్చినట్లు వణికిపోయాడు. రాజకీయాలలో ప్రధానిగా వున్నవారిని ఏ పార్టీ నేత అయినా కలవవచ్చనే పద్ధతిని మరచి, జగన్‌కు ప్రధాని అపాయింట్‌మెంట్‌ ఎలా ఇస్తారని మాట్లాడారు. జగన్‌కు అపా యింట్‌మెంట్‌ ఫిక్స్‌ చేసిన పిఎంఓ కార్యా లయాన్నీ చంద్రబాబు ప్రశ్నించినట్లయ్యింది.

అయినా జగన్‌కు మోడీ అపాయింట్‌ మెంట్‌ ఇస్తే చంద్రబాబు ఇంతగా ఆక్రోశం చెందాల్సిన అవసరం ఏముంది? తను ఏదో అభద్రతాభావంతో ఉండబట్టే ఇలా నోరు పారేసుకుంటున్నాడు. ఏపిలో జరిగిన, జరుగుతున్న అక్రమాలను మోడీకి జగన్‌ చెవిలో వూదాడనే కోపంతోనే ఆయన ఈ అరుపులు అరుస్తున్నాడు.

వాస్తవంలోకి వస్తే చంద్రబాబు అంటే మోడీకి ఏమంత నమ్మకం, గౌరవం లేదు. అవసరాన్ని బట్టి చంద్రబాబు రాజకీయ రంగులు మారుతాయని తెలుసుకోలేనంత అమాయకుడు కాడు మోడీ! ఈరోజు తమతో అవసరం వుంది కాబట్టి అణిగి మణిగి వుంటున్నాడు. రేపు బీజేపీకి రెండు చోట్ల పరాభవాలు ఎదురై, మోడీ క్రేజ్‌ తగ్గిందంటే ఇదే చంద్రబాబు దేశంలోని బీజేపీ వ్యతిరేక పార్టీలన్నింటిని కలిపి తృతీయ ఫ్రంట్‌ అనే టెంట్‌ను వేస్తాడు. రాజకీయ స్నేహానికి చంద్రబాబు నమ్మ కస్తుడు కాడు. కాని ఇచ్చిన మాట కోసం సోనియాగాంధీనే ఎదిరించి, 16నెలలు జైలులో గడిపిన జగన్‌ను రాజకీయంగా నమ్మొచ్చు. అదీగాక జగన్‌కు రాష్ట్రం తప్పితే జాతీయ రాజకీయాల మీద ఆశ, ఆసక్తి ఉండదు. కాబట్టే బీజేపీలో జగన్‌ పట్ల సానుకూల ధోరణి కనిపిస్తోంది.

బీజేపీకి జగన్‌ జత కలిస్తే రాష్ట్రంలో తనకు చుక్కలు చూపిస్తారనే భయం చంద్రబాబుకు పట్టుకుంది. ముఖ్యంగా 'ఓటు-నోటు' కేసు బాబు మెడ మీద కత్తిలా వేలాడుతోంది. ఈ కేసును ముందుకు సాగనీయకుండా ఇప్పటివరకు కేంద్రమే ఆదుకుంటోంది. ఈ కేసులో చంద్రబాబు వాయిస్‌ రికార్డర్‌ కూడా పక్కా సాక్ష్యంగా వుంది. ఇక అమరావతి రాజధాని భూముల సేకరణ దగ్గర్నుండి, పుష్కరాలకు వేలకోట్లు తగలేయడం, పోలవరం పూర్త యితే పనికిరాని పట్టిసీమ, పురుషోత్తమ పట్నం వంటి ప్రాజెక్ట్‌లు కేవలం డబ్బు కోసం చేపట్టినవేననే విషయం తెలియంది కాదు. ఏ రాష్ట్రంలోనైనా మోడీ తాను కాలు పెట్టాలనుకుంటున్నప్పుడు అక్కడ ముందుగా సిబిఐ దాడులు జరగడం చూస్తున్నాం. ప్రస్తుతం మోడీ ఏపిని టార్గెట్‌ చేసాడు. ఇక్కడ బీజేపీకి జగన్‌ లక్ష్యం కాదు. చంద్రబాబును నిర్వీర్యం చేయడమే అసలు ఉద్దేశ్యం. ఈ మూడేళ్లలో చంద్ర బాబుకు కేంద్రం వట్టి మాటలు చెప్పడం తప్ప ఎలాంటి సాయం చేయలేదు. విభజన బిల్లులో చెప్పిన ప్రత్యేకహోదా విషయంలో కూడా ఆయన రాజీపడడం ప్రజల్లో చంద్రబాబు నాయకత్వ స్థాయిని దిగజార్చింది. కేంద్రం ద్వారా చంద్రబాబు రాష్ట్రానికి ఏ పనులూ సాధించలేక పోయాడు, సరికదా అసలే అప్పుల్లో వున్న రాష్ట్రంలో ఈయన చేసిన ఆర్భాటపు పను లన్నీ కూడా ప్రజలకు పని కొచ్చేవి కావు. రాష్ట్ర ప్రభుత్వంలో జరిగే అవినీతి, అక్ర మాలపై సిబిఐ విచారణ చేయిస్తే ఎన్నో లొసుగులు బయటపడతాయి. చంద్రబాబు సర్కార్‌ను ప్రజా బోనులో దోషిగా నిల బెట్టడం ఇప్పుడున్న పరిస్థితుల్లో మోడీకి ఏమంత కష్టం కూడా కాదు.

ఏపిలో తెలుగుదేశాన్ని నిర్వీర్యం చేయాలన్నా, చంద్రబాబును బలహీన పరచాలన్నా మోడీకి చిటికెలో పని. తన విషయంలో మోడీ ఆ పని చేయకపోవ చ్చని చంద్రబాబుకు ఇంతకాలం బలమైన నమ్మకం ఉండేది. కాని మోడీని జగన్‌ కలిసొచ్చాక, మోడీ చేతికి అతను చంద్ర బాబు గారి అక్రమాల చిట్టా పద్దులు ఇచ్చి వచ్చాక ఆ నమ్మకం కూడా పోయింది. మోడీ ఎక్కడ ఎప్పుడు తనకు ఎసరు పెడ తాడోననే ఆందోళన బాబులో కనిపిస్తోంది.

3చంద్రబాబు పక్కా రాజకీయనాయకుడు. కాబట్టే ప్రజానాయకుడు కాక పోయినా ఈ రాష్ట్ర చరిత్రలో అత్యంత ఎక్కువకాలం ముఖ్యమంత్రిగా పరిపాలించిన రికార్డును సొంతం చేసుకున్నాడు. రాష్ట్ర రాజకీయాలను ఔపాసన పట్టిన నాయకుడు. ఎప్పుడు ఏమి చేయాలో తెలి సిన నాయకుడు. ప్రజల్లో బలం లేక పోయినా, ఆ ప్రజల మద్దతు ఎలా పొం దాలో, ఎన్ని మార్గాలలో రాబట్టాలో తెలిసిన నాయకుడు. అలా తెలిసినవాడు కాబట్టే 2014లో పార్టీ పనైపోయిందను కున్న వాతావరణంలో ఉన్న తెలుగుదేశం పార్టీని అధికారంలోకి తీసుకురాగలిగాడు.

ఈరోజు రాష్ట్రంలో తెలుగుదేశం ప్రభుత్వం పట్ల ప్రజల్లో తీవ్ర వ్యతిరేకత వుంది. ప్రజలు కట్టకట్టుకుని ఓట్లేసేంత మంచిపనులేవీ చంద్రబాబు చేయలేదు. ఈ మూడేళ్లలో చేసినవన్నీ కూడా సొం తంగా ఆర్ధిక వనరులు కూడగట్టుకోవ డానికి చేసినవే! ప్రజల్లో వ్యతిరేక వాతా వరణం బాగానే కనిపిస్తోంది. అయినా కూడా రాష్ట్రంలో ఈసారి ఎన్నికలు ఏక పక్షంగా జరగాలనే కాంక్ష చంద్రబాబులో కనిపిస్తోంది. ఇందుకు ఆయన ఎంచుకున్న మార్గాలు మూడు.

మొదటిది రాష్ట్రంలో నియోజకవర్గాల సంఖ్యను 175 నుండి 225కు పెంచడం. ఇలా చేస్తే తెలుగుదేశంలో వున్నోళ్లకు, కాంగ్రెస్‌, వైకాపాల నుండి చేరినోళ్లందరికీ సీట్లొస్తాయి. డబ్బు ఖర్చుపెట్టే అభ్యర్థులకు తెలుగుదేశంలో లోటు లేదు. కాని వైకాపాకు అలాంటి అభ్యర్థుల కొరత ఉంటుంది. ఇక్కడ ప్రతిపక్షం మొదటి దెబ్బ తింటుంది. తెలుగుదేశం తరపున అన్ని నియోజక వర్గాలలోనూ బలమైన అభ్యర్థులు నిల బడతారు.

రెండోది... పవన్‌ కళ్యాణ్‌ ద్వారా ప్రభుత్వ వ్యతిరేక ఓటును చీల్చడం. 2014లో చంద్రబాబు అధికారంలోకి రావడంలో ప్రధాన కారణాలలో పవన్‌ కళ్యాణ్‌ ఒకడు. ఆరోజు ఆయన బీజేపీతో పాటు రాష్ట్రంలో తెలుగుదేశంకు కూడా మద్దతు పలికాడు. దీంతో పవన్‌ అభిమా నులతో పాటు కాపుల ఓట్లు కూడా తెలుగుదేశంకు పడ్డాయి. ఈ మూడేళ్లలో కాపులు చంద్రబాబుకు వ్యతిరేకమయ్యారు. కాపులకు బి.సి రిజర్వేషన్‌లు అమలు చేస్తామన్న బాబు మాట గాలిమూటే అయ్యింది. కాపు రిజర్వేషన్‌ ఉద్యమాలను చంద్రబాబు బలంగానే అణచివేసాడు. ఈసారి కాపుల ఓట్లు తెలుగుదేశంకు పడవని చంద్రబాబుకు తెలుసు. అయితే ఆ ఓట్లు వైకాపాకు పోతే చంద్రబాబుకు డేంజర్‌. వాటిని డైవర్ట్‌ చేయాలి. అందుకు ఆయన ముందున్న మార్గం పవన్‌ కళ్యాణ్‌ జనసేన చేత పోటీ చేయించడం. దీనివల్ల కాపుల ఓటును వైకాపాకు పోకుండా చేయడంతో పాటు ప్రభుత్వ వ్యతిరేక ఓటును వైకాపా, జనసేనల మధ్య చీల్చి తెలుగుదేశాన్ని లబ్దిపొందేలా చేయడం.

ఇక మూడోమార్గం అందరికీ తెలి సిన డబ్బు. ఎన్నికలంటేనే దీని పాత్ర ప్రధానమైపోయింది. ఇప్పుడు తెలుగుదేశం నాయకుల దగ్గర ఇది పుష్కలంగా వుంది. మొన్న స్థానిక సంస్థల ఎన్నికలలోనే ఒక్కో జిల్లాలో ఎన్నేసికోట్లు ఖర్చుపెట్టారో చూసాం. 2014 ఎన్నికల్లోనూ తెలుగు దేశం గెలుపులో డబ్బు ప్రభావం బాగానే పనిచేసింది. ఐదేళ్లు అధికారంలో ఉం డడం వల్ల తెలుగుదేశంపార్టీ ఆర్ధికంగా ఇంకా పుంజుకుంటుంది. కాబట్టి వచ్చే ఎన్నికల్లో చంద్రబాబు ఆర్ధిక శక్తులను బాగానే ప్రయోగిస్తాడు.

ప్రజల్లో బలం లేకున్నా, ప్రజాకర్షక పథకాలు ఏవీ లేకున్నా, అవినీతి అక్ర మాలు పోటెత్తుతున్నా, రాష్ట్రంలో కరువు విలయతాండవం చేస్తున్నా... చంద్ర బాబుకు వచ్చే ఎన్నికలో మనదే అధికారం అని బల్లగుద్ది చెప్పడానికి బలమైన కారణం ఈ మూడుమార్గాలను బలంగా నమ్ము తుండడమే!

cm chandraవలస వచ్చిన నాయకులు... అడ్డదారుల్లో పోగేసిన కోట్ల కొద్ది డబ్బు... అనుకూల మీడియా ప్రచారం... వచ్చే ఎన్నికలలోనూ తమను ఇవే గెలిపిస్తాయని చంద్రబాబు నమ్ముతున్నాడా? వచ్చే ఎన్నికలు వన్‌సైడ్‌గా జరగాలి, ప్రతిపక్షం ఉనికి ఉండకూడదు అన్నట్లుగా ఆయన మాట్లాడడం చూస్తుంటే చంద్రబాబు పైవాటిని బలంగానే నమ్ముతున్నట్లుగా వుంది.

ఏ ప్రభుత్వానికైనా లేదా ఏ నాయకుడిని చూసైనా ఓటేయాలంటే ఒక్కటైనా బలమైన కారణముండాలి. 1983లో కేవలం కాంగ్రెస్‌ మీద వ్యతిరేకత, సినీ గ్లామర్‌ కారణంగా ఎన్టీఆర్‌ అధికారంలోకి వచ్చాడు. 1985లో జరిగిన మధ్యంతర ఎన్నికల్లో ఎన్టీఆర్‌ గెలుపుకు ఇవి దోహదపడలేదు. ఆ రెండేళ్లలో ఆయన రెండురూపాయల కిలో బియ్యంతో పాటు మరికొన్ని సంక్షేమ పథకాలను అమలు చేసారు.రెండు రూపాయల కిలో బియ్యం పథకం ప్రజల్లోకి బలంగా వెళ్లింది. ఎన్టీఆర్‌కు మళ్ళీ ఓట్లేసేలా చేసింది.

2004లో చంద్రబాబు వ్యతిరేకత మీద కాంగ్రెస్‌ అధికారంలోకి వచ్చింది. ముఖ్యమంత్రిగా వై.యస్‌.రాజశేఖరరెడ్డి రాష్ట్ర చరిత్రలో ఏ ముఖ్యమంత్రి చేపట్ట నన్ని ప్రజా సంక్షేమ అభివృద్ధి కార్యక్రమాలు చేపట్టారు. రాజీవ్‌ ఆరోగ్యశ్రీ, ఫీజు రీయం బర్స్‌మెంట్‌, 108 అంబులెన్స్‌, పింఛన్‌లు, డ్వాక్రా ఋణాలు, ఇరిగేషన్‌ ప్రాజెక్టుల నిర్మాణం, సెజ్‌ల ఏర్పాటుతో విరివిగా ఉపాధి అవకాశాలు... ఇవన్నీ కూడా వై.యస్‌.కు ఓట్లు కురిపించాయి. 2009 ఎన్నికల్లో తిరిగి కాంగ్రెస్‌ను గెలిపించాయి. అంతేకాదు, వై.యస్‌ అయిదేళ్ల పాలనలో పన్నులు పెంచి ప్రజలపై భారం మోపిన దాఖలాలు లేవు. వై.యస్‌. ఇంత చేసినా కూడా 2004తో పోలిస్తే 2009కి కాం గ్రెస్‌కు కొన్ని సీట్లు తగ్గాయి. గత మూడు దశాబ్దాల రాజకీయ చరిత్రను పరిశీలిస్తే రాష్ట్రంలో ఒక ముఖ్యమంత్రిగా వై.యస్‌. చేసినంత అభివృద్ధి, అమలు చేసినన్ని పథకాలు ఇంకే ముఖ్యమంత్రీ చేయలేదు. ఆయన అంత చేస్తేనే సీట్లు తగ్గాయి. మరి ఇంతవరకు ఏమీ చేయని చంద్రబాబు పరిస్థితి ఎలా ఉండబోతుంది?

ఈ మూడేళ్లలో ప్రజలు ఫలానా పథకం వల్ల ప్రయోజనం పొందారని చెప్పే పథకం ఒక్కటీ లేదు. ఏ పథకం మీద కూడా చంద్రబాబు బ్రాండ్‌ లేదు. తెలుగు దేశంకు అదనంగా ఓట్లు తెచ్చే ఒక్క స్కీంను కూడా కొత్తగా తేలేకపోయారు. గతంలో వై.యస్‌. ప్రవేశపెట్టిన ఆరోగ్యశ్రీ, ఫీజు రీయంబర్స్‌మెంట్‌లు కూడా అంతంత మాత్రంగా నడుస్తున్నాయి. చంద్రబాబు ప్రతిష్టాత్మకంగా చేపట్టిన అమరావతి రాజధాని నిర్మాణం వల్ల కోట్లు పోతు న్నాయో గాని ఓట్లు రావు. ఈ రాజధాని ప్రజల సబ్జెక్ట్‌ కాదు. మా రాజధాని వాషిం గ్టన్‌లా ఉండాలని, సింగపూర్‌లా ఉండా లని ప్రజలు కోరుకోవడం లేదు. చంద్ర బాబు ప్రతిష్టాత్మకంగా చేపట్టిన మొదటి పని ఇదే! దీనివల్ల ఓట్లు రావడం మాటేమో గాని, రాజధాని రూపంలో భూములు కోల్పోయిన రైతుల ఓట్లు పోయే అవకాశా లున్నాయి. అలాగే రాష్ట్రంలోని పలు ప్రాంతాల్లో సెజ్‌ల పేరుతో సాగిస్తున్న భూ దోపిడీ మూలంగా రైతుల్లో తీవ్ర వ్యతిరేకత వస్తుంది. అంతేకాదు, గత ఎన్నికల్లో చంద్రబాబు చేసిన ఋణ మాఫీ వాగ్ధానం అట్టర్‌ఫ్లాప్‌ అయ్యింది. చంద్రబాబు అమలు చేసిన అరకొర ఋణమాఫీ వల్ల లాభపడ్డ వాళ్లకంటే ఆశపడి భంగపడ్డ వాళ్ళే ఎక్కువ! విఫలమైన ఋణమాఫీ విషయంలో చంద్రబాబుకు ఓట్ల నష్టం కలుగనుంది. డ్వాక్రా ఋణాల మాఫీని గాలిలో పెట్టడంతో మహిళలు వ్యతిరేక మయ్యారు. ఇక నిరుద్యోగ భృతి లేదు, కొత్తగా ఉద్యోగాలు లేవు. అన్నింటికి మించి చంద్రబాబే స్వయంగా రాష్ట్రానికి ప్రత్యేక హోదాను వ్యతిరేకిస్తుండడంతో యువతలో, నిరుద్యోగుల్లో తెలుగుదేశం పట్ల తీవ్ర వ్యతిరేకత పెరిగింది. అన్నింటికి మించి విచ్చలవిడి అవినీతి, యధేచ్ఛగా తెలుగు తమ్ముళ్ళ దోపిడీ వంటివి కూడా తెలుగు దేశం ఓటు బ్యాంకుకు చిల్లు పెట్టాయి.

2014 ఎన్నికల్లో తెలుగుదేశం, వైకాపాకు మధ్య ఓట్ల తేడా కేవలం 5లక్షలే! ఈ మూడేళ్లలో వైకాపా నుండి ఎమ్మెల్యేలు, నాయకులు వచ్చి తెలుగు దేశంలో చేరారు. కాని వారితో పాటు పెద్దగా జనం రాలేదు. వీళ్ళ మూలంగా తెలుగుదేశంకు కలిసే ఓట్లు తక్కువ. కాని 2014 ఎన్నికల్లో చంద్రబాబు నాయ కత్వాన్ని, ఆయన అనుభవాన్ని, ఆయన సమర్ధతను నమ్మి ఉద్యోగులు, యువత, వ్యాపారులు, నిరుద్యోగులు, కాపులు, వైశ్యులు, బ్రాహ్మణులు తెలుగుదేశంకు మద్దతుగా నిలిచారు. 2014లో వైకాపాకు మద్దతుగా నిలిచిన ఓటర్లలో పెద్ద మార్పుం డదు. కాని తెలుగుదేశంకు ఓటేసిన వర్గాల ప్రజల్లో మాత్రం మార్పు ఉంటుంది. వారిలో సగం మంది చంద్రబాబును వ్యతి రేకిస్తే చాలు... అధికారం తలక్రిందులే!

చంద్రబాబు ప్రజాదరణ పొందే ఏ ఒక్క కార్యక్రమాన్ని కూడా ఇంతవరకు అమలు చేయలేదు. వచ్చే ఎన్నికల్లో వై.యస్‌ సానుభూతి, తన ఆకర్షణ జగన్‌కు ప్రచారాస్త్రాలు కాదు... చంద్రబాబు వైఫ ల్యాలే జగన్‌ ఆయుధాలు!

Page 1 of 4

newsbottomad

ఎక్కువగా చదివిన వార్తలు

  • ముగ్గురు మొనగాళ్లు
    ఒక ఎమ్మెల్యే సమర్ధవంతంగా పనిచేస్తే ఒక నియోజకవర్గం బాగుపడుతుంది. అదే ఒక కలెక్టర్‌ సమర్ధవంతంగా పనిచేస్తే... ఒక ఎస్పీ కార్యదక్షత చూపిస్తే... ఒక కమిషనర్‌ పట్టుదలతో పనిచేస్తే... ఒక జిల్లా, ఒక నగరమే బాగుపడుతుంది. అదే ఈ ముగ్గురు కలిసి పనిచేస్తే…
  • సినీ పరిశ్రమకు... అనువైన వేదిక నెల్లూరు!
    కేసీఆర్‌ ఛీ... ఛా... అని ఛీదరించుకుని ఉమ్మేసినా కొందరు సినీ ప్రముఖులు హైదరాబాద్‌ను వదిలేది లేదంటున్నారు. ఇలాంటి వాళ్లది సినీ పరిశ్రమపై ప్రేమ కాదు! అక్కడ పోగేసిన వేలకోట్ల ఆస్తులపై ప్రేమ. అవెక్కడ పోతాయోననే బాధ. అక్కడ నుండి సినీ పరిశ్రమను…
  • సిటింగ్‌లకు... కటింగ్‌ వేస్తాడా?
    రాబోయే ఎన్నికల్లో జిల్లాలోని తెలుగుదేశం పార్టీ సిటింగ్‌ ఎమ్మెల్యే లకు చంద్రబాబు తిరిగి సీట్లు ఇవ్వడనే ప్రచారం జోరుగా వుంది. ఒక్క సిటింగ్‌ స్థానాలలోనే కాదు, జిల్లాలోని అన్ని అసెంబ్లీ నియోజక వర్గాల నుండి కొత్త అభ్యర్థులను రంగంలోకి దించుతారని టాక్‌!…
  • పాదయాత్రతో మరో చరిత్ర
    గతానికి భిన్నంగా, గతంకంటే ఉత్సాహంగా ఆంధ్రప్రదేశ్‌ నడిబొడ్డు గుంటూరు కేంద్రంగా రెండు రోజుల పాటు జరిగిన వైయస్సార్‌ కాంగ్రెస్‌పార్టీ ప్లీనరీ సమావేశాలు ప్రభుత్వంపై ప్రజల్లో వున్న వ్యతిరేకతకు, ప్రజానేత జగన్‌పై వున్న నమ్మకానికి నిదర్శనంగా నిలిచాయి. ప్రతిఏటా ఇడుపులపాయలో వైసిపి ప్లీనరీలు…
  • 'పీకే'దేమీ లేదు
    జగన్‌ అంటే జనంలో అపార అభిమానముంది. వై.యస్‌. కుటుంబంతో తెలుగు లోగిళ్ళకు అపురూప అనుబంధముంది. ''రాజన్న''న్నా ఆయన కుమారుడన్నా ప్రాణాలిచ్చే అభిమానులు తెలుగు నాటంతా వున్నారు. ఎవరు చెప్పినా ఎవరు చెప్పకపోయినా రాజశేఖరరెడ్డి కోసం ఆయన కుటుంబం కోసం పనిచేసే నాయకులు,…

Newsletter