galpikaఢిల్లీలోని ప్రధానమంత్రి కార్యాలయం. ప్రధాని నరేంద్ర మోడీతో బీజేపీ అధ్యక్షుడు అమిత్‌షా, కేంద్రమంత్రులు అరుణ్‌జైట్లీ, రాజ్‌నాథ్‌సింగ్‌, ఉమాభారతి, సుష్మాస్వరాజ్‌, స్మృతి ఇరానీలు సమావేశమైవున్నారు. మొదట మోడీ మాట్లాడుతూ... రాష్ట్రపతి, ఉపరాష్ట్రపతి ఎన్నికల్లో మన పార్టీ వాళ్లంతా బాగా పనిచేసారు. బాధ్యతలను సక్రమంగా నిర్వర్తించారు. మీ అందరికీ నా అభినందనలు అని చెప్పాడు. అమిత్‌షా అందుకుని... ముఖ్యంగా ఉపరాష్ట్రపతిగా వెంకయ్యనాయుడును ఎన్నుకోవడం మన పార్టీకి పెద్ద మైలేజీ కానుంది. రాజ్యసభలో ఇంత కాలం మనం డిఫెన్స్‌లో వుంటుండేవాళ్లం. ఇప్పుడు అది మారబో తోంది. రాజ్యసభలోనూ చక్రం తిప్పబోయేది మన వెంకయ్యే అని చెప్పాడు. వారు అలా పిచ్చాపాటి మాట్లాడుకుంటుండగా... మోడీ టీవీ ఆన్‌ చేసి 'రిపబ్లిక్‌' ఛానెల్‌ పెట్టాడు. అందరూ టీవీ వైపు చూసారు... స్క్రీన్‌పై వస్తున్న ఫ్లాష్‌ న్యూస్‌ చూసి అందరూ షాకయ్యారు. 'ఉపరాష్ట్రపతి పదవికి రాజీనామా చేయనున్న వెంకయ్యనాయుడు, మరికొద్ది సేపట్లో రాష్ట్రపతికి తన రాజీనామాను సమర్పించనున్న ఉషాపతి...' అని బ్రేకింగ్‌ న్యూస్‌ వస్తున్నాయి. మోడీతో పాటు అక్కడున్న వారందరికీ తల తరిగినంత పనయ్యింది. ముందుగా మోడీ తేరుకుని... ముందు అర్జంట్‌గా వెంకయ్యజీ వద్దకు వెళదాం పదండి అంటూ అందర్నీ తీసుకుని వెంకయ్యనాయుడు ఇంటి వద్దకు వెళ్లాడు. అక్కడ వెంకయ్యనాయుడు అచ్చతెలుగులో రాజీనామా లేఖను వ్రాస్తున్నాడు. అది చూసి మోడీ... ఏమైంది వెంకయ్యాజీ, ఎందుకు రాజీనామా చేయాలనుకుంటున్నారు అని ప్రశ్నించాడు. అందుకు వెంకయ్య... నాకు ఉపరాష్ట్రపతిగా కంటే ఉషాపతిగా ఉండడమే హాయిగా వుంది. నన్ను రాజీనామా చేయనివ్వండని కోరాడు. అమిత్‌షా అందుకుని... దీని వెనుక ఏదో బలమైన కారణమే వుంది. ఎందుకు రాజీనామా చేయాలనుకుంటున్నారో కారణం చెప్పండని బ్రతిమ లాడాడు. అప్పుడు వెంకయ్య... మొన్న నెల్లూరెళ్లాను కదా... అప్పటినుండే రాజీనామా చేయాలని డిసైడ్‌ అయ్యానన్నాడు. నెల్లూరులో ఏం జరిగిందని అమిత్‌షా అడిగాడు. అందుకు వెంకయ్య... ఇది నోటితో చెబితే అర్ధమయ్యేది కాదు... అంటూ వేలితో గాల్లో స్క్రీన్‌ గీసి ఫ్లాష్‌బ్యాక్‌ ప్లే చేసాడు.

------

అది ఐఆర్‌ 20-420 మున్సిపల్‌ కార్పొరేషన్‌ ముదురుదోమలకు ప్రసిద్ధిగాంచిన నెల్లూరు నగరంలోని పోలీస్‌ పరేడ్‌ మైదానం. విఆర్‌సి గ్రౌండ్‌లో తన కోసం ఏర్పాటు చేసిన ఆత్మీయ అభినందన సభలో పాల్గొనేందుకు వెంకయ్యనాయుడు అప్పుడే హెలికాఫ్టర్‌లో దిగాడు. వెంకయ్య దిగగానే అక్కడున్న అభిమానులు, బీజేపీ కార్యకర్తలు... ''వెంకయ్యనాయుడు జిందాబాద్‌'' అంటూ నినాదాలు చేయసాగారు. ఉపరాష్ట్రపతి ప్రోటోకాల్‌ అధికారులు నినాదాలు చేస్తున్న కార్యకర్తలతో... సార్‌ ఇప్పుడు ఉపరాష్ట్రపతి... మీరిలా జిందాబాద్‌లు కొట్టకూడదని వారించారు. వెంకయ్యకు అది కొంచెం ఇబ్బందనిపించింది. ఈ కార్యకర్తలు అభిమానంతో కొట్టే జేజేలకు ఇక నేను దూరంగా ఉండాల్సిందేనా? అని మనసులో బాధ ఏర్ప డింది. అయినా తమాయించుకుని అక్కడ గుమికూడిన జనాన్ని...ఏం పుల్లయ్య బాగున్నావా... ఏం గురవారెడ్డి... పిల్లలు ఏం చేస్తున్నారు అంటూ పేరు పేరునా పలకరించసాగాడు. ప్రోటోకాల్‌ ఆఫీసర్‌ వచ్చి... సార్‌, మీరిప్పుడు ఉపరాష్ట్రపతి. జనంలోకి మరీ ఇంతగా దూసుకుపోకూడదని చెప్పాడు. వెంకయ్య చేసేదేమీ లేక కారు ఎక్కాడు. రోడ్డు పొడవునా విద్యార్థులు జాతీయ పతకాలతో స్వాగతం పలుకుతుండగా ఆయన పోలీస్‌ ఆఫీసు రోడ్డు మీదుగా పోసాగాడు. కరెక్ట్‌గా కస్తూర్భా కళాక్షేత్రం జంక్షన్‌ వద్దకు వెళ్లేసరికి ఆ సందులో నుండి బోండాలు కాలుస్తున్న వాసన వచ్చింది. వెంకయ్య జింకపిల్ల మాదిరిగా కారు నుండి దూకేసి బోండాలు కాలుస్తున్న టిఫిన్‌ కొట్టు వద్దకు వెళ్లాడు. అక్కడ వేడి వేడిగా కాల్చిన బోండాలను పెట్టుకుని తినబోతుండగా, ప్రోటోకాల్‌ ఆఫీసర్‌ వచ్చి సార్‌, ఇప్పుడు మీరు ఉపరాష్ట్రపతి... ఎక్కడపడితే అక్కడ ఏ చెత్తంటే ఆ చెత్త తినకూడదు అన్నాడు. ఇది చెత్తేంటి, నాకిష్టమైన ఆహారం... నేను చిన్నప్పటి నుండి పులిబొంగరాలు తినే పెరిగానని వెంకయ్య అన్నాడు. దానికతను... నిన్నటిదాకా మీరు ఏం తిని పెరిగారో మాకు అన వసరం, ఇకనుండి మేం సూచించిన ఆహారమే మీరు తీసుకోవాలి అని చెప్పారు. కెవిఆర్‌ పెట్రోల్‌ బంకు సెంటర్‌కు వెళ్లాక...

ఉదయగిరి నుండి వచ్చిన పాత స్నేహితులు కనిపించారు. దాంతో వెంకయ్య కారు దిగి, వారితో క్షేమ సమాచారాలు ముచ్చటించు కుంటూ నడవసాగాడు. వాళ్లతో కలిసి నడుస్తుంటే వెంకయ్యకు 1978-83 ప్రాంతంలో ఉదయగిరి పల్లెల్లో నడిచి ప్రచారం చేసిన సంఘటనలు గుర్తుకు రాసాగాయి. ఆయన మనసుకు అది ఎంతో హాయిగా వుంది. అప్పుడే ప్రోటోకాల్‌ అధికారి వచ్చి... సార్‌, మీరిప్పుడు ఉపరాష్ట్రపతి... రాజకీయ నాయకుడి మాదిరిగా రోడ్డుమీద నడవకూడదు, ముందు కారెక్కండి అని చెప్పాడు. వెంకయ్య అయిష్టంగా కారెక్కాడు. అలా కాన్వాయ్‌ సర్వోదయ కాలేజీ వద్దకు వచ్చింది. అక్కడ కాలేజీ గ్రౌండ్‌లో కొందరు పిల్లలు కబడ్డీ ఆడుతున్నారు. ఆ సీన్‌ చూడగానే వెంకయ్యకు చిన్ననాటి జ్ఞాపకాలు గుర్తుకు వచ్చాయి. వెంకయ్య కారు దిగి చెంగు చెంగున ఎగురుకుంటూ సర్వోదయ గ్రౌండ్‌ లోకి వెళ్లాడు. ఓ జట్టు వైపు చేరి అడ్డపంచె ఎగ్గట్టి ''కబడ్డీ... కబడ్డీ'' అంటూ కూతకు పోయాడు. మంచి హుషారు మీద అటు ఇటూ తిరుగుతూ కూతపెడుతున్నాడు. అంతలో ఓ ఆటగాడు వెంకయ్య కాలును పట్టుకోబోయాడు. అతన్ని తప్పించుకునే సమయంలో వెంకయ్యకు తన పంచె అడ్డమొచ్చి పడబోయాడు. దాంతో, వెంటనే అక్కడకు ప్రోటోకాల్‌ ఆఫీసర్‌ వచ్చి... సార్‌, మీరిప్పుడు ఉపరాష్ట్రపతి... ఇలా ఎక్కడపడితే అక్కడ గేమ్స్‌ ఆడకూడదు. ముఖ్యంగా మీరు ఈ పంచె తీసేసి సూటూ, కోటు వేసు కోవాలి. ఈ అడ్డపంచె వల్ల చాలా ఇబ్బంది ఉందన్నాడు. అప్పటికే లోలోపల రగిలిపోతున్న వెంకయ్యకు అతని మాటలతో నషాళానికంటింది. పదవినైనా వదులుకుంటాను గాని, నా ఆంధ్రా పంచెకట్టును వదులుకునే ప్రశ్నే లేదు. ఈ దేశంలో రాష్ట్రపతి, ఉపరాష్ట్రపతి, ప్రధాని వంటి పదవులు పుట్టక ముందే ఈ పంచెకట్టు పుట్టింది. నాకు పదవి కంటే పంచే ముఖ్యం... నా పంచెకట్టు అడ్డమనుకుంటే ఇప్పుడే ఉప రాష్ట్రపతి పదవికి రాజీనామా చేసేస్తాను అంటూ వెంకయ్య రుసరుసలా డుతూ కారెక్కాడు. వెంకయ్య నోటి నుండి రాజీనామా మాట రాగానే 'ఉపరాష్ట్రపతి పదవికి వెంకయ్య రాజీనామా' అంటూ మీడియా కోడై కూయసాగింది.

----

వెంకయ్య వేలితో గీసిన ఎయిర్‌స్క్రీన్‌పై సీన్‌లు ఇక్కడితో అయిపో యాయి. జరిగింది ఇది సార్‌, ఉపరాష్ట్రపతి పదవినైనా వదులుకోవడానికి నేను సిద్ధమేగాని, నా పంచెకట్టును నేను వదులుకోను అని వెంకయ్య చెప్పాడు. అందుకు మోడీ... ఈ దేశ ప్రజలు తొలిసారిగా తెలుగు పంచెకట్టును చూడబోతున్నారు. ఉపరాష్ట్రపతి పదవికి మీ పంచె అడ్డం కాదు... అందం అని చెప్పి శాంతింపజేశాడు.

galpikaఅది కర్నూలు జిల్లా నంద్యాల. ఎక్కడ చూసినా రోడ్ల పనులు జరుగుతున్నాయి. కమ్యూనిటి హాల్స్‌, దేవాలయాలు, మసీదులు, చర్చీలు కడుతున్నారు. సైడ్‌ కాలువలు నిర్మిస్తున్నారు. అమరావతి రాజధానిలో కంటే కూడా నంద్యాలలోనే అభివృద్ధి పనులు ఎక్కువుగా జరుగుతున్నట్లుంది వాతావరణం. నంద్యాల ఉపఎన్నికల నేపథ్యంలో తెలుగు దేశం యంత్రాంగమంతా నంద్యాలలో దిగి పోయింది. రెండు వారాలుగా అక్కడే తిష్టేసి ఓట్ల కోసం ఇళ్లిళ్లు తిరుగుతున్న హైటెక్‌రత్న చంద్రబాబు రోడ్‌షో చేసుకుంటూ అప్పుడే బస్టాండ్‌ సెంటర్‌కు వచ్చాడు. అక్కడ గుమి కూడివున్న జనాన్ని చూసి ఆయనకు ఎక్కడ లేని హుషారొచ్చి మైకు తీసుకుని... తమ్ముళ్ళూ... నేనిచ్చిన రేషన్‌ బియ్యంతో అన్నం వండుకుంటున్నారు, నా హెరిటేజ్‌ షోరూమ్‌లో కూరగాయలు, పాలు తెచ్చుకుని కూరలు, పెరుగు చేసుకుంటున్నారు. నేను వేసిన రోడ్లపైన నడుస్తున్నారు. నేనిచ్చే పింఛన్‌ తీసుకుంటున్నారు. మీరు నాకు ఓట్లేయక ఇంకెవరికి వేస్తారు అని అన్నాడు. అంతలో అక్కడేవున్న ఓ మందుబాబు... సార్‌, మీరు మమ్మల్ని చిన్నచూపు చూస్తున్నారని ప్రశ్నిస్తు న్నాడు. అతన్ని చూసి చంద్రబాబుకు చిర్రెత్తు కొచ్చింది. ఎవడ్రా నువ్వు? తాగి వచ్చావా? జగన్‌ డబ్బులిచ్చి తాగించి పంపాడా? నా నలభైఏళ్ల రాజకీయ జీవితంలో నీలాంటి వాళ్లను వందలమందిని చూసాను, ఆ జగన్‌ నిన్ను గొడవచేయమని పంపించాడు కదా అని అడిగాడు. అందుకు ఆ మందుబాబు... నాబోటి వాళ్లను వందలమందిని చూడ్డానికి 40ఏళ్ల సర్వీసు అవసరం లేద్సార్‌... నాలుగు నిముషాలలో నాలుగు బెల్టుషాపుల వద్దకు పోతే చాలు... వందలమంది కనపడతారు. మేం కూడా మీరిచ్చిన మందునే తాగుతున్నాం సార్‌, మా తాగుబోతుల ఓట్లడగరా? వాళ్లంటే మీకు లెక్కలేదా? రాష్ట్రంలో వున్న తాగుబోతు లంతా ఒక్కసారి గాలివూదితే, ఆ గాలిలో మీరు కొట్టుకుపోతార్సార్‌... అని అరవ సాగాడు. రేయ్‌, నేను ప్రజలను, ప్రతిపక్షాన్ని కంబైన్డ్‌గా టెన్షన్‌ పెడతాను, నువ్వేమో నన్నే టెన్షన్‌ పెడుతున్నావ్‌, ముందు వాణ్ణి పక్కకు లాగండిరా అని చంద్రబాబు సెక్యూరిటీని ఆదేశించి మూడ్‌ చెడిపోవడంతో గెస్ట్‌హౌస్‌కు పోయాడు. అక్కడ మంత్రులు దేవినేని ఉమ, కళా వెంకట్రావ్‌, పత్తిపాటి పుల్లారావులతో సమావేశమయ్యాడు. నంద్యాలలో ఎలక్షన్‌ టెన్షన్‌గా వుంది. ఇక్కడ కనుక ఓడిపోతే పరువుపోతుంది. అంతేకాదు, ఇక్కడనుండే మన డౌన్‌ ట్రెండ్‌ స్టార్టవుతుంది. ఇవి ఖచ్చి తంగా గెలవాల్సిన ఎన్నికలు. గెలవడానికి ఏం చేయాలో చెప్పండని కోరాడు. అందుకు దేవినేని... సార్‌, ఎలక్షన్స్‌ చేయడంలో నెల్లూరువాళ్లు ఎక్స్‌పర్ట్స్‌. మొన్న కడప స్థానిక ఎమ్మెల్సీ ఎన్నికలప్పుడే నెల్లూరు నాయకుడు సోమిరెడ్డి టాలెంట్‌ చూసాను. నంద్యాలలో వాళ్లను దించండి, ఎదురుగా ఎట్లాంటి వాళ్లున్నా చీల్చి చెండాడుతారని సలహా ఇచ్చాడు. అందుకు చంద్రబాబు సరేనన్నాడు.

-----

హైదరాబాద్‌లోని వైకాపా కార్యాలయం. వై.యస్‌.జగన్‌తో విజయసాయిరెడ్డి, ఆళ్ల రామకృష్ణారెడ్డి, అంబటి రాంబాబులు సమా వేశమై వున్నారు. నంద్యాల ఎలక్షన్‌లో చంద్రబాబు నెల్లూరు నాయకులను దించు తున్నాడంట. నెల్లూరు నాయకులతో భలే డేంజర్‌. మనమేం చేద్దామని జగన్‌ అడిగాడు. దానికి విజయసాయిరెడ్డి... మా నెల్లూరు నాయకుల టాలెంట్‌ నాకు బాగా తెలుసు. ముల్లును ముల్లుతోనే తీయాలి. వజ్రాన్ని వజ్రంతోనే కోయాలి. కాబట్టి నెల్లూరు నుండి మనమూ మెరికల్లాంటి నాయకులను దించు దాము... తెలుగుదేశం వాళ్లకు చుక్కలు... చుక్కలు చూపిస్తాము అంటూ చిటికెలు వేస్తూ చెప్పాడు. అయితే ఇక ఆలస్యం ఎందుకు, వెంటనే ఫోన్‌చేసి దించు అని జగన్‌ చెప్పాడు. సరేనని విజయసాయిరెడ్డి లేచాడు.

---------

నంద్యాల పట్టణంలో మెయిన్‌రోడ్డు... ఓవైపు నుండి తెలుగుదేశం అభ్యర్థి భూమా బ్రహ్మానందరెడ్డితో కలిసి నెల్లూరు లెజండ్స్‌ సోమిరెడ్డి చంద్రమోహన్‌రెడ్డి, పి.నారాయణ, బీద రవిచంద్ర, పోలంరెడ్డి శ్రీనివాసులురెడ్డి ప్రచారం చేసుకుంటూ వస్తున్నారు. వారితో పాటు కర్నూలు జిల్లా నాయకులు అఖిలప్రియ, ఎస్‌.వి.మోహన్‌రెడ్డి, ఏ.వి.సుబ్బారెడ్డి, కె.ఇ. ప్రభాకర్‌ వంటి వారు కూడా వున్నారు. ఇంకోవైపు నుండి వైసిపి అభ్యర్థి శిల్పా మోహన్‌రెడ్డితో కలిసి నెల్లూరు లయన్స్‌ కోటంరెడ్డి శ్రీధర్‌రెడ్డి, కాకాణి గోవర్ధన్‌రెడ్డి, పి.అనిల్‌కుమార్‌యాదవ్‌, కిలివేటి సంజీ వయ్యలు ప్రచారం చేసుకుంటూ వస్తున్నారు. కర్నూలుజిల్లా నాయకులు బుగ్గన రాజేంద్రరెడ్డి, ఐజయ్య, శ్రీదేవమ్మలు వారిని అనుసరిస్తు న్నారు. ఇరు పార్టీల వారు కొద్దిసేపటికి దగ్గరగా వచ్చారు. సోమిరెడ్డి వైపు కాకాణి

ఉద్రేకంగా చూసాడు... సోమిరెడ్డి కూడా కాకాణి వైపు ఉగ్రరూపంతో చూసాడు. అప్పుడే ఒకావిడ పచ్చిగడ్డి మోపును నెత్తిన పెట్టుకుని వాళ్ల మధ్యలోకి వచ్చింది... అంతే ఆ పచ్చగడ్డి నిలువునా మండిపోయింది. అది చూసి కర్నూలు జిల్లా నేతలు షాకయ్యారు. నెల్లూరు నాయకుల మధ్య కక్ష్యలు ఇంతగా వుంటాయా అని ఆశ్చర్యపోయారు. మొదట కాకాణి మాటల యుద్ధం మొదలుపెట్టాడు. ఉట్టినెక్కలేనమ్మా, స్వర్గానికెగిరిందట... సర్వే పల్లిలో నా మీద గెలవలేనివాడివి, ఇక్కడకు ఏం పీకుదామని వచ్చావ్‌ అని సోమిరెడ్డిని

ఉద్దేశించి అన్నాడు. అప్పుడు సోమిరెడ్డి... బుల్లెట్‌ చూడ్డానికి నాలాగే వుంటుంది... కాని దిగితే తెలుస్తుంది దాని పవరేంటో... తుపాకీని చూడు... కాని అందులోని బుల్లెట్‌ను చూడాలనుకోకు అని హెచ్చరించాడు. అప్పుడు కాకాణి... ఫ్లూటు జింక ముందు ఊదు, ఈ సింహం ముందు కాదు అని అన్నాడు. వెంటనే సోమిరెడ్డి... నేను గట్టిగా తొడ కొట్టానంటే ఆ సౌండ్‌కే మీరు నెల్లూరు పరుగెడుతారు... మీరా, నా ఎదురుగా నిల బడి మాట్లాడేది అని మాట్లాడాడు. అందుకు కాకాణి... కత్తులతో కాదు, కాళ్లకు వేసుకున్న సాక్స్‌తో మీకు చుక్కలు చూపించగలను... మాటలాపి ఇక పోండి అని అన్నాడు. అప్పుడు బీద రవిచంద్ర జోక్యం చేసుకుని... ఈ నంద్యాల సందుల్లో కాదు... రాత్రికి వూరి చివరనున్న డాబా వద్దకు రండి చూసు కుందాం... మీ ప్రతాపమూ, మా ప్రతాపమూ అని చెప్పాడు. అందుకు కాకాణి గ్యాంగ్‌ కూడా సరేననడంతో ఎవరిదారిన వాళ్లు వెళ్లారు. నెల్లూరు నాయకుల ఆగ్రహావేశాలను చూసి ఎప్పుడూ ఫ్యాక్షన్‌ మధ్య తిరిగే కర్నూలు జిల్లా నేతలకే దడపుట్టింది.

-----------

ఆరోజు రాత్రి... నంద్యాల ఊరి చివరన డాబా... నెల్లూరు నాయకుల మధ్య రక్తపాతం జరిగే అవకాశం వుందన్న సమాచారంతో ఆ డాబా పరిసరాలలో పెద్దఎత్తున పోలీసులను మోహరించారు. వీళ్ల గొడవల్లో మనమెందు కని చెప్పి టీడీపీ, వైసిపిలకు చెందిన కర్నూలు నాయకులు ఊపిరి బిగపట్టి డాబాకు దూరంగా వుండి అక్కడ ఏం జరుగుతుం దోనని చెప్పి టెన్షన్‌తో చూడసాగారు. అప్పుడే డాబా వద్ద రెండు కార్లు ఆగాయి. ఒక కారులో సోమిరెడ్డి, నారాయణ, బీద, పోలంరెడ్డి దిగారు. ఇంకో కారులో కాకాణి, కోటంరెడ్డి, అనిల్‌, కిలివేటి సంజీవయ్యలు దిగారు. ఇక వీళ్లు తన్నుకోవడం ఖాయం అని కర్నూలు నాయకులు ఉత్కంఠగా ఎదురు చూస్తున్నారు. ఏ క్షణంలో అయినా గొడవ మొదలుకాగానే సర్దుబాటు చేయడానికి పోలీసులు అలర్ట్‌ అయ్యారు. నెల్లూరు టీడీపీ, వైసిపి నాయకులు ఒకొర్నొకరు చూసుకున్నారు. అందరూ దగ్గరగా వచ్చారు. సోమిరెడ్డి, కాకాణి, నారా యణ, అనిల్‌, బీద, కోటంరెడ్డి, పోలంరెడ్డి, సంజీవయ్యలు ఒకర్నొకరు ఆలింగనం చేసుకున్నారు. సరదాగా షేక్‌హ్యాండ్లిచ్చుకుని ఒకే టేబుల్‌ వద్ద కూర్చున్నారు. అందరూ కలిసి భోజనం ఆర్డర్‌ ఇచ్చారు. అప్పుడు అందరితో బీద... మనం నంద్యాల ఊరిలో వున్నంత సేపు శత్రువుల్లాగానే వుందాం... రాత్రయితే ఇలా ఎక్కడో చోట కలుద్దాం... కక్షలు, కార్ప ణ్యాలతో నరుక్కోవడానికి, చంపుకోవడానికి మనమేమన్నా కర్నూలు వాళ్లమా? మేధస్సుకు పుట్టినిల్లయిన నెల్లూరోళ్లం అని అన్నాడు. ఎలక్షన్‌ అయ్యేదాకా మనం పగలు అలా, రాత్రి ఇలా వుందామని కాకాణి చెప్పాడు. అందరూ అందుకు సరేనన్నారు. చాటు మాటుగా వారి మాటలు విన్న కర్నూలు జిల్లా నాయకులు అక్కడే స్పృహతప్పి పడిపోయారు.

galpikaఢిల్లీలోని బీజేపీ కార్యాలయం. ప్రధాని నరేంద్ర మోడీ, బీజేపీ అధ్యక్షుడు అమిత్‌షా, సీనియర్‌ నేత అద్వానీ, కేంద్రమంత్రులు వెంకయ్య నాయుడు, అనంతకుమార్‌, స్మృతి ఇరాని, నిర్మలా సీతారామన్‌, సురేష్‌ ప్రభు, అరుణ్‌జైట్లీ, సిద్ధార్ధనాథ్‌సింగ్‌, రాజ్యవర్ధన్‌ రాధోడ్‌, ఉమాభారతి తదితరులున్నారు. రాష్ట్రపతిగా ఉత్తరభారతదేశానికి చెందిన వ్యక్తిని ఎన్నుకున్నాం, కాబట్టి ఉపరాష్ట్రపతిగా దక్షిణ భారతదేశానికి చెందిన వ్యక్తిని నియమించాలని భావిస్తున్నాం. మీరేమంటారని అమిత్‌షా అందర్నీ ఉద్దేశించి అడిగాడు. అందుకు వెంటనే వెంకయ్యనాయుడు స్పందించి... ఒట్టి దక్షిణ భారతదేశంకు చెందిన వాడంటే కుదరదు... దేశంలోని అన్ని భాషలు వచ్చుండాలి. ముఖ్యంగా దక్షిణాది వస్త్రధారణ ఉట్టిపడేలా అడ్డపంచె కట్టేవాడై వుండాలి అని చెప్పాడు. దాంతో అమిత్‌షా, మోడీలతో పాటు అందరు కూడా... ఆ అర్హతలు నీకు కాక ఇంకెవరికి ఉన్నాయన్నట్లుగా వెంకయ్య వైపు చూడసాగారు. వాళ్ల చూపులతో వెంకయ్యకు గుండెల్లో రాయిపడ్డట్లయ్యింది. అనవసరంగా నోరు జారి ఇరుక్కున్నానే అని మనసులో అనుకుంటూ... నావైపేంటి అలా చూస్తున్నారు. నేను మోడీని రెండోసారి కూడా ప్రధానిగా చూడాలనుకుంటున్నాను. కాబట్టి నేను ఆయనను వదిలిపోయే ప్రసక్తే లేదు. కావాలంటే దక్షిణాది నుండి నేనే కొన్ని పేర్లు చెబుతాను అని చెప్పి విద్యాసాగర్‌రావు, సదాశివం, ఒ.రాజగోపాల్‌... ఇంకా కొన్ని పేర్లు చెప్పాడు. అమిత్‌షా వుండి... రాజ్యసభ కంట్రోల్‌ చేయాలన్నా, ఉపరాష్ట్రపతి పదవికి వన్నె తేవాలన్నా నువ్వే కరెక్ట్‌. కాబట్టి మీరొప్పుకోవాల్సిందే అని పట్టుబట్టాడు. సముద్రంలో వున్న చేపను మీరు వాటర్‌ బౌల్‌లో పెట్టాలనుకుంటున్నారు... నాకు నోరు, కాలు ఆడనిదే బాగుండదు, ఆరోగ్యం కూడా సరిగా వుండదు. నన్ను వదిలేసి ఇందాక పదిమంది పేర్లు చెప్పాను కదా వారిలో ఒకరిని సెలెక్ట్‌ చేయొచ్చు కదా అని వెంకయ్య కోరాడు. అప్పుడు మోడీ జోక్యం చేసుకుని... దీనికి పేచీ ఎందుకు, మీరు ప్రతిపా దించిన పదిమంది పేర్లతో పాటు మీ పేరును కూడా చీటీ వ్రాసి లాటరీ తీస్తాం. లక్కీడిప్‌ ద్వారా ఎవరి పేరు వస్తే వాళ్లే ఉప రాష్ట్రపతి అభ్యర్థి అని చెప్పాడు. గుడ్డిలో మెల్ల... ఇదే నయం. పదకొండు మందిలో ఒకడిని... నా పేరు వచ్చేదానికి పది శాతమే అవకాశం ఉంటుందనుకుని వెంకయ్య సరేనన్నాడు. అమిత్‌షా చెప్పిన పేర్లను వ్రాసి స్మృతిఇరానీ ఓ డబ్బాలో వేసింది. ఇందులో ఓ చీటీ తీయమని సుష్మాస్వరాజ్‌కు చెప్పారు. ఆమె అందులో నుండి ఓ చీటీ తీసి నరేంద్ర మోడీ చేతిలో పెట్టింది. ఆయన దానిని విప్పి పేరు ప్రకటించాడు... యం.వెంకయ్యనాయుడుజీ అని. తన పేరు వినగానే వెంకయ్య షాక్‌కు గురయ్యాడు. తల్లి తన చేతిని బల వంతంగా విదిలించుకున్నంత ఫీలింగ్‌కు గురయ్యాడు. ఆయన దిగ్భ్రాంతిలో ఉండగానే మిగతావాళ్లు ఎవరిపాటికి వాళ్లు వెంకయ్యకు విషెష్‌ చెప్పి వెళ్లిపోయారు. వెంకయ్య ఒక్కడే మిగిలాడు. కొద్ది సేపటికి తేరుకుని, నా పేరే ఎలా వచ్చిందబ్బా అని ఆలోచిస్తూ అక్కడే డబ్బాలో వున్న మిగతా చీటీలను తెరిచి చూసాడు. అంతే ఆయన కళ్లు బైర్లు కమ్మాయి. అన్ని చీటీల మీద వెంకయ్యనాయుడు పేరే వ్రాసుంది. అమ్మనా... అమిత్‌షా. స్మృతిఇరానీ, నువ్వు కలిసి ఇలా నన్ను ఇరికించారా అని అనుకున్నాడు. కాని జరగాల్సింది జరిగిపోవడంతో ఇంకేమీ చేయలేక నేరుగా ప్రధాని ఇంటికి వెళ్లాడు. సార్‌, ఉపరాష్ట్రపతి ఎన్నికల లోపే ఒక్కసారి నేను మా ఊరుదాకా వెళ్లొస్తానని అడిగాడు. అందుకు మోడీ సరేనన్నాడు.

--------

ఐఆర్‌ 20-420 మున్సిపల్‌ కార్పొరేషన్‌ ముదురుదోమలకు ప్రసిద్ధి గాంచిన నెల్లూరు నగరం. రైల్వేస్టేషన్‌లో అప్పుడే జి.టి ఎక్స్‌ప్రెస్‌ ఆగింది. బీజేపీ నాయకులు, కార్యకర్తలు చాలామంది ఫస్ట్‌క్లాస్‌ ఏసి బోగి వద్ద దండలు పట్టుకుని నిలబడి వెంకయ్య నాయుడు కోసం చూస్తున్నారు. కాని, వెంకయ్య మాత్రం దానిపక్కనే వున్న జనరల్‌ బోగీలో నుండి దిగాడు. అది చూసి బీజేపీ నాయకులు షాకయ్యారు. ఏం సార్‌, జనరల్‌ బోగీలో దిగారు అని కర్నాటి ఆంజనేయరెడ్డి అడిగాడు. అందుకాయన... ఇక ఐదేళ్లు యుద్ధ విమానాలు, ఆర్మీ హెలికాఫ్టర్లు ఎక్కుతుండాలి కదా... వాటిలో పోతే రైలు జనరల్‌ బోగీలో వెళ్లిన ఫీలింగ్‌ ఎక్కడ వస్తుంది అని, ఇంతకీ మీరంతా ఎవరని ప్రశ్నించాడు. ఆ ప్రశ్నతో అందరూ అవాక్కయ్యారు. కొద్దిసేపటికి తేరుకుని... సార్‌, మేము బీజేపీ కార్యకర్తలం. మీ శిష్యులం అని చెప్పారు. బీజేపీ వాళ్లయితే పోయి మీ పార్టీ జెండాలు కట్టుకోండి... నా వద్దకు ఎందుకు వచ్చారు... నాకు ఏ పార్టీ జెండా లేదు. ఎవరి అజెండా లేదు... పోండి... పోండి... అని తరిమేసాడు. తర్వాత ఆయనొక్కడే బయటకొచ్చి, ట్రంకురోడ్డుకు ఒక ఆటోను 50రూపాయలకు బేరమాడి మాట్లాడుకున్నాడు. ఆటో ఎక్కి సీమా సెంటర్‌లో దిగాడు. ఆ సెం టర్‌లో వున్న వేపచెట్టును తనివితీరా చూసాడు. కళ్లల్లో నీళ్లు సుడులు తిరిగుతుండగా చెట్టును గాఢంగా కౌగిలించుకున్నాడు. అప్పుడు విద్యార్థిగా వున్నప్పటి సంఘటనలన్నీ ఆయన కళ్లముందు స్క్రీన్‌ కట్టినట్లు కనిపించాయి. పాత జ్ఞాపకాల చిత్రాలు పూర్తయ్యాక ఆయన సీమా కేఫ్‌లో ఓ టీ తాగాడు. తర్వాత విఆర్‌సి దాకా వెళ్లాడు. కాలేజీని చూసాడు. అక్కడనుండి 'జైహింద్‌ స్వీట్స్‌'కు వచ్చాడు. అక్కడ నాలుగు మలైకాజాలు, పావుకిలో మిక్చర్‌ తిన్నాడు. అక్కడ నుండి కోమల విలాస్‌కు వెళ్లాడు. కడుపునిండా భోజనం చేసాడు. తర్వాత ఒక ఆటోను మూడుగంటలపాటు అద్దెకు మాట్లాడుకుని... నెల్లూరు నగరంలోని రోడ్లన్నీ తిరగసాగాడు. అలా శెట్టిగుంటరోడ్డులోకి వెళ్లినప్పుడు సలసల కాగుతున్న నూనెలో వేస్తున్న బోండాలను చూసి ఆయన మనసు లాగేసింది. ఆటోను ఆ టిఫిన్‌ కొట్టు వద్ద ఆపి పది బోండాలు శెనగల చట్నీ, కారప్పొడి వేసుకుని తిన్నాడు. తర్వాత వినాయక సినిమాహాల్‌లో 'బాలనాగమ్మ' సినిమా ఫస్ట్‌షో చూసి, రిత్విక్‌ఎన్‌క్లేవ్‌లోని ఇంటికి చేరుకున్నాడు. బెడ్‌రూంలోకి వెళ్లి స్నానం చేసి బెడ్‌మీద వాలిపోయాడు.

సరిగ్గా అర్థరాత్రి రెండు గంటల ప్రాంతం... వెంకయ్య సతీమణి ఉషమ్మకు లీలగా ఏదో మాటలు వినిపించడంతో కళ్లు తెరచి పక్కకు చూసింది... డేరింగ్‌... డాషింగ్‌... క్యాలిబర్‌, కెపాసిటీ, డైవర్శిటి... క్రికెట్‌లో నాటౌట్‌... అసెంబ్లీలో వాకౌట్‌... బ్యాంకుల్లో అప్పు... కట్టకుంటే నిప్పు... ఉప్పు, చెప్పు, తప్పు, కాఫీ కప్పు... ఈ ప్రభుత్వంలో అన్నీ అప్పులే... ఎయిర్‌ కనెక్టివిటి, వాటర్‌ కనెక్టివిటి, రోడ్‌ కనెక్టివిటి... ఒకప్పుడు జైళ్లలో సెల్‌లు ఉండేవి... ఇప్పుడు అందరి చేతుల్లోనూ సెల్‌లు వుంటున్నాయి... ఇదీ మోడీ మహిమ... వెంకయ్యనాయుడు చేతులను గాల్లో తిప్పుతూ నిద్రలోనే ప్రాసలను మాట్లాడేస్తున్నాడు. అదంతా చూసిన ఉషమ్మ... కళ్ల నిండా నీళ్లు పెట్టుకుని... ఎలాంటి మనిషికి ఎలాంటి కష్టం వచ్చింది... పగవాడికి కూడా ఇలాంటి బాధ వద్దురా దేవుడా... వసపిట్ట చేత ఎవరన్నా మౌనవ్రతం చేయిస్తారా... నోరు విప్పకుండా ఈయన ఎన్నిరోజులుండగలడో... అని శంకిస్తూ బాధపడసాగింది.

Page 1 of 37

newsbottomad

ఎక్కువగా చదివిన వార్తలు

  • వెనక్కి తగ్గేదే లేదు!
    పోలీస్‌స్టేషన్‌కు వెళితే ఎస్‌ఐ మా మాట వినడం లేదు... ఎస్‌ఐ చేత పని చేయించుకోలేకుంటే నా అనుచరుల ముందు నా పరువు పోతుంది.. ఎస్‌ఐ వద్దే పరపతిలేనోడివి... నువ్వేం నాయకుడివని అనుచరులు నన్ను వదిలిపోతున్నారు.... ఓ మండల స్థాయి నాయకుడు తన…
  • ఉంటారా? వెళ్ళిపోతారా?
    రాజకీయాలు చాలా విచిత్రంగా ఉంటాయి. ఎప్పుడు ఎవరు కింగ్‌లవుతారో, ఎవరు తెరమరుగవుతారో అంతే పట్టదు. రాజకీయాలలో ఎల్లకాలం వెలగడం అన్నది ఎవరికీ శాశ్వతం కాదని చాలామంది నాయకుల చరిత్రను పరిశీలిస్తే అర్ధమవుతుంది. నెల్లూరుజిల్లాలో సుధీర్ఘ రాజకీయ చరిత్ర ఉం డేది ఆనం…
  • వర్గాన్ని కాపాడుకోవడమా..? నియోజకవర్గాన్ని వదులుకోవడమా?
    జిల్లాలో పసుపు కొనుగోలు అక్రమాల సంగతేమోగాని దీనిమూలంగా ఉదయగిరి ఎమ్మెల్యే బొల్లినేని రామారావుకు పెద్ద చిక్కొచ్చిపడింది. పసుపు కొనుగోలు వ్యవహారాన్ని పెద్దకుంభకోణంగా చిత్రించిపెట్టారు. దీనిపై రాష్ట్ర ప్రభుత్వం సీరియస్‌ అయ్యింది. విచారణకు ఆదేశించి భారీ ఎత్తున ఉద్యోగులను సస్పెండ్‌ చేసింది. ఈ…
  • వారి ఆశలపై... నీళ్ళు చల్లారు!
    రాష్ట్రంలో అసెంబ్లీ నియోజకవర్గాలు 175 నుండి 225కు పెరుగు తాయనే ప్రచారం మొన్నటివరకు బలంగా వుండింది. ఈమధ్యనే కేంద్ర ప్రభుత్వం ఆ ప్రచారానికి తెరదించుతూ ఈ ఎన్నికలకే కాదు, ఆ తర్వాత ఎన్నికల నాటికి కూడా సీట్ల పెంపు ఉండదని కుండబద్ధలు…
  • నేరం మా వాళ్ళది కాదు
    రాజకీయ ఒత్తిళ్లకు లొంగి అడ్డదారులు తొక్కితే, రాజకీయ నాయకుల మాటలు నమ్మి వారు చెప్పినట్లు నడుచుకుంటే పరిస్థి తులు ఎలా వుంటాయో ఇప్పుడు ఉదయగిరి నియోజకవర్గం లోని అధికారులకు తెలిసొచ్చింది. ఇటీవల పసుపు కొనుగోలు వ్యవహారం జిల్లాలో సంచలనం కావడం తెలిసిందే!…

Newsletter