galpikaఢిల్లీలోని ప్రధాని కార్యాలయం. ప్రధాని నరేంద్రమోడీతో పాటు బీజేపీ అధ్యక్షుడు అమిత్‌షా, కేంద్రమంత్రులు అరుణ్‌జైట్లీ, రాజ్‌నాథ్‌సింగ్‌, అనంతకుమార్‌, స్మృతి ఇరాని, నిర్మలా సీతారామన్‌ తదితరులున్నారు. నరేంద్రమోడీ వుండి వారితో... మన ప్రభుత్వ లక్ష్యాలు ప్రధానంగా రెండు... ఒకటి కాంగ్రెస్‌ రహిత భారత్‌. రెండు క్యాష్‌ రహిత భారత్‌. మొదటి విషయంలో చాలావరకు విజయం సాధించాం. కాంగ్రెస్‌పార్టీ బాధ్యతలను రాహుల్‌గాంధీకి అప్పగించేసారు కాబట్టి, మిగతాది ఆయన చూసుకుంటాడు. రెండోది క్యాష్‌ రహిత భారత్‌. ఇది ఎంతవరకు వచ్చిందని ప్రశ్నించాడు. అప్పుడు అరున్‌జైట్లీ... సార్‌, నోట్ల రద్దు ద్వారా చాలామంది వద్దవున్న నగదును ఊడ్చేసాం. ఇక లలిత్‌మోడీ, నీరవ్‌ మోడీ, విజయ్‌మాల్యా వంటి వాళ్ళు బ్యాంకుల వద్ద నగదును ఊడ్చేసే పనిలో వున్నారు. కార్పొరేట్‌ కంపెనీలకు, నీరవ్‌ మోడీ లాంటివాళ్ళకు ఫ్రీహ్యాండ్‌ ఇస్తే దేశంలో వున్న బ్యాంకులన్నీ క్యాష్‌లెస్‌ బ్యాంకులుగా మారుతాయి. ఇక జిఎస్టీ దెబ్బకు చాలామంది వద్ద డబ్బులేకుండా పోయింది. మనం పారిశ్రామికవేత్తలకు ఇలానే వేలకోట్లు ఋణాలు ఇచ్చుకుంటూ పోతే, జిఎస్టీ చట్టాన్ని ఇలాగే కఠినంగా అమలు చేసుకుంటూపోతే త్వరలోనే మనం క్యాష్‌ రహిత భారత్‌ను చూడగలం సార్‌. ఆ నమ్మకం నాకుంది అని చెప్పాడు. దానికి మోడీ... సరే ఆ ఇష్యూను మీరు హ్యాండిల్‌ చేయండి, ఇక ఏపి వాళ్ళ ప్రత్యేకహోదా గొడవ ఎంతవరకు వచ్చింది అని అడిగాడు. దానికి జైట్లీ... ఏపికి ప్రత్యేకహోదా కోసం తన ఎంపీల చేత రాజీనామా చేయిస్తానని వై.యస్‌.జగన్మోహన్‌రెడ్డి ప్రకటించాడు. అంతేకాదు, తన పోరాటానికి కలిసి రావాలని చంద్రబాబు, పవన్‌కళ్యాణ్‌లకు కూడా పిలుపునిచ్చాడు అని చెప్పాడు. జగన్‌ అంత మాటన్నాడా అంటూ నరేంద్రమోడీ కళ్ళు తిరిగి కుర్చీలోనే కూలబడ్డాడు.

----------

విజయవాడ రైల్వేస్టేషన్‌... 7వ నెంబర్‌ ఫ్లాట్‌ఫారం మీద ఢిల్లీకి వెళ్ళే స్పెషల్‌ ట్రైన్‌ ఆగివుంది. అన్ని భోగీల నిండా టీడీపీ, వైసిపి, జనసేన, వామపక్షాల కార్యకర్తలున్నారు. అప్పుడే హైటెక్‌రత్న చంద్రబాబు వచ్చాడు. బ్యాక్‌ గ్రౌండ్‌లో 'తెలుగు వీర లేవరా... ప్రత్యేకహోదాకై పోరాడరా' అనే పాట పెట్టారు. చంద్రబాబు బి2 భోగీ వద్ద నిలబడ్డాడు. మంత్రి సోమిరెడ్డి వచ్చి... సార్‌, మీరు ఎక్కి కూర్చోండి అని అడిగాడు. అందుకాయన... ఇంకా జగన్‌ రాలేదు, ఆ అబ్బాయి కూడా వస్తే కలిసి ఎక్కుదాం అని చెప్పాడు. అప్పుడే ఫ్లాట్‌ఫారం మీదకు జగన్‌ వచ్చాడు. వెనుక వేలాదిమంది కార్యకర్తలు బ్యాక్‌గ్రౌండ్‌లో 'జగనన్నా జగనన్నా జగమంతా నువ్వన్నా... ప్రత్యేకహోదాకై పదరన్నా...' అనే పాట వచ్చింది. జగన్‌ నేరుగా బి2 భోగీ వద్దకు వెళ్లాడు. చంద్రబాబు ఎంతో అభిమానంగా జగన్‌ను కౌగిలించుకుని... జగన్‌ మన రాష్ట్రానికి ప్రత్యేకహోదా ఇచ్చేవరకు ఢిల్లీ నుండి కదిలేదిలేదన్నాడు. దానికి జగన్‌... నేనెప్పుడో సిద్ధం... అందుకోసం ఓ పదిజతల బట్టలు కూడా తెచ్చుకున్నాను అని చెప్పాడు. ఈలోపల వామపక్షాల నాయకులు మధు, నారాయణ, రామకృష్ణ, లోక్‌సత్తా జేపి,

ఉండవల్లి అరుణ్‌కుమార్‌లు కూడా వచ్చి అదే భోగీ ఎక్కారు. అప్పుడే సిగ్నల్‌ ఇవ్వడంతో రైలు కదలసాగింది. ఇక ఎక్కు జగన్‌ అని చంద్రబాబు అన్నాడు. మన పవన్‌ ఇంకా రాలేద్సార్‌ అని జగన్‌ చెప్పాడు. పవన్‌ ఫ్లైట్‌కేమన్నా వస్తాడేమోలే అని చంద్రబాబు అన్నాడు. లేదు, మనతో పాటే రైలులో వస్తానన్నాడు. మనతో కలిసే జర్నీ చేయాలని ఉందంట అని జగన్‌ చెప్పాడు. చైన్‌ అన్నా లాగి ట్రైన్‌ను ఆపుదామా అని చంద్రబాబు అడిగాడు. అడుగో వచ్చేస్తున్నాడు. ఫర్వాలేదు. ఇక ఎక్కేయండి అని జగన్‌ చెప్పాడు. చంద్రబాబు, జగన్‌లు ట్రైన్‌ ఎక్కి డోర్‌ వద్ద నిలబడ్డారు. పవన్‌ భుజాన బ్యాగ్‌తో పరుగెత్తుకుంటూ భోగీ వద్దకు వచ్చాడు. జగన్‌ డోర్‌ వద్ద నిలబడే చేయి చాచాడు. పవన్‌ ఆ చేయి పట్టుకుని ట్రైన్‌లోకి జంప్‌ చేశాడు. ఢిల్లీ వైపు ట్రైన్‌ దూసుకుపోసాగింది. బి2 భోగీలో ఏపి నేతలందరూ ఒకరితో ఒకరు సరదాగా వుండ సాగారు. జగన్‌ తాను తెచ్చుకున్న వేరుశెనగ ముద్దలను అందరికీ పంచితే, చంద్రబాబు బాదంపప్పు, జీడిపప్పు, హెరిటేజ్‌ మజ్జిగ ప్యాకెట్లను అందరికీ ఇచ్చాడు. పవన్‌, జగన్‌లైతే ట్రైన్‌ ఢిల్లీకి వెళ్ళే వరకు కూడా ఒకరి భుజాలపై ఒకరు చేతులేసుకుని ఎంతో స్నేహంగా వుంటూ ఏపికి ప్రత్యేకహోదా మీదనే చర్చించుకోసాగారు. రైలు ఢిల్లీకి చేరింది. నాయకులు, కార్యకర్తలు అందరూ ప్రధాని కార్యాలయం ముందు నిరాహారదీక్షకు కూర్చున్నారు. చంద్రబాబు వుండి... మోడీ, ఇక్కడితో నీ వేషాలు ఆపు... మమ్మల్ని ప్యాకేజీతో మభ్యపెట్టాలని చూసావో ఖబడ్దార్‌... ఏపికి ప్రత్యేకహోదా ఇచ్చేవరకు ఇక్కడినుండి కదిలేది లేదు. నాలో జాలి, దయ ఎక్కువుగా వుండబట్టి ఇప్పటిదాకా నీ జోలికి రాలేదు, నేను కేంద్రంలో చక్రం తిప్పడం మొదలుపెట్టానో నీ చక్రం ఆగిపోతుంది. అని హెచ్చరించాడు. తర్వాత జగన్‌, పవన్‌, ఉండవల్లి, జెపి, మధులు కూడా మాట్లాడి హోదా ఇవ్వకుంటే మిమ్మల్ని గోదాట్లో కలిపేస్తామని వార్నింగ్‌ ఇచ్చారు. వెంటనే అక్కడ కూర్చున్న కార్యకర్తలందరు కూడా ''హోదా ఇవ్వాలి... హోదా ఇవ్వాలి'' అంటూ పెద్ద పెట్టున నినాదాలు చేయసాగారు.

ప్రత్యేకహోదా ఇవ్వడం కుదరదు. లెక్కలు చెప్పి ప్యాకేజీ తీసుకోండి. మీ చంద్రబాబు అవినీతి పరుడు. మేం ఇచ్చిన నిధులన్నింటిని జల్సా చేస్తున్నాడు. మీరెంత అరిచినా హోదా ఇవ్వను, హోదా ఇవ్వను... అని ప్రధాని నరేంద్రమోడీ కలవరించసాగాడు. రాజ్‌నాథ్‌సింగ్‌ వెంటనే టేబుల్‌ గ్లాస్‌లో వున్న నీళ్ళను మోడీ ముఖాన చల్లాడు. అప్పుడు మోడీ కళ్ళు తెరిచాడు. అప్పటిదాకా తనకు వచ్చింది కల అని తెలుసుకోవడానికి అతనికి పది నిముషాలు పట్టింది. మోడీ ఈ లోకంలోకి వచ్చి... ప్రత్యేకహోదా పోరాటానికి కలిసిరావాలని చంద్రబాబును జగన్‌ కోరాడని చెబితిరి... ఆ షాక్‌తో కళ్ళు తిరిగి పడిపోయాను. అప్పుడే ఏపి నేతలంతా కలిసి ఢిల్లీ వచ్చి పోరాడుతున్నట్లు కల వచ్చింది అని చెప్పాడు. అప్పుడు జైట్లీ... సార్‌, వాళ్ళలో అంత యూనిటీ వుంటే అసలు ఏపినే విడిపోయేది కాదు, భూమి ఆకాశాలు కలవవన్నది ఎంత నిజమో, ఏపి సమస్యల కోసం ఆ రాష్ట్ర నేతలు కలవరన్నది అంత నిజం. వీళ్ళు తమిళనాడు లాంటి డేంజర్స్‌ కాదు, మనం హాయిగా వుండొచ్చు అని చెప్పి లేచాడు.

galpikaఅది ఢిల్లీలోని పార్లమెంటు భవనం. పార్లమెంటు బయట తెలుగుదేశం ఎంపీలు మాగంటి బాబు, తోట నర సింహం, గల్లా జయదేవ్‌, మురళీమోహన్‌, కేశినేని నాని, సుజనాచౌదరి, సీఎం రమేష్‌, కంభంపాటి రామ్మోహన్‌రావు, గరికపాటి మోహన్‌రావు తదితరులు న్నారు. అందరి చేతుల్లోనూ 'ఆంధ్రాకు న్యాయం చేయండి' అంటూ తెలుగులో వ్రాసిన ప్లకార్డ్స్‌ వున్నాయి. అప్పుడే చిత్తూరు ఎంపీ శివప్రసాద్‌ వచ్చాడు. ఒంటిమీద చొక్కాలేదు. గోచీకట్టి చేతిలో కొరడా పెట్టుకుని పెద్దగా కేకలు పెడుతూ ఒళ్ళు వాతలు తేలేలా కొట్టుకోసాగాడు. తర్వాత రెండు పోల్స్‌ను రోడ్డుపై నిలబెట్టి వాటి మధ్య తాడు కట్టారు. శివప్రసాద్‌ ఆ తాడు మీద బ్యాలెన్స్‌ చేస్తూ నడిచాడు. ఈ ఫీట్‌లను చూస్తూ దారిన పోయే జనాలు ఎక్కడికక్కడ ఆగిపోయారు. తర్వాత ఆయన నిటారుగా నిలబెట్టిన కర్రపై పద్మాసనం వేసుకుని కొద్దిసేపు కూర్చున్నాడు. ఈ ఫీట్లన్నీ బ్రతుకుతెరువు కోసం పడుతున్న పాట్లేమోననుకున్న జనాలు తలో పదిరూపాయలు అక్కడ ధర్మం కింద వేసేసి పోసాగారు. అది చూసి తోట నరసింహం... ఓ శివప్రసా దన్నా, ఇక్కడ మనం బడ్జెట్‌లో ఆంధ్రాకు జరిగిన అన్యాయం మీద పోరాటం చేస్తున్నామని ఎవరూ అనుకోవడం లేదు. ఏదో సాపాటు కోసం చేస్తున్న ఫీట్లు అనుకుంటున్నారు. మనల్ని అడుక్కునే వాళ్ళు మాదిరిగా చూస్తున్నారు. ఈ పోరాడేదేదో పార్లమెంట్‌ హాల్‌లోకి వెళ్ళి పోరాడుదాం రండి... ఆ మోడీని, జైట్లీని నిలువునా కడిగేద్దాం పదండీ అని అన్నాడు. అప్పుడు సుజనాచౌదరి.... ఆ అంటావ్‌... నీదేం పోయింది. పార్ల మెంటు లోపల మోడీని గట్టిగా మాట్లా డితే ఆ తర్వాత ఎఫెక్ట్‌ వుండేది మా మీదే అని అన్నాడు. దానికి ఎస్పీవై రెడ్డి, బుట్టా రేణుక, కొత్తపల్లి గీతలు కూడా... అవును మీదేం పోదు... పార్టీ ఫిరాయిం చారని చెప్పి ముందు మా మీదే వేటు వేస్తారని తమ బాధ చెప్పుకున్నారు. అప్పుడు సీఎం రమేష్‌... పార్లమెంటు లోపల పోరాడాలంటే మోడీ భయం... అలాగని పోరాడకపోతే ఆంధ్రా ప్రజలు ఛీ కొడుతారు... ఎలా చేయాలబ్బా... ఈ సమస్యకు హైటెక్‌ మేధావి చంద్ర బాబునాయుడే పరిష్కారం చూపగలడు అనుకుంటూ ఆయనకు ఫోన్‌ చేసాడు. చంద్రబాబు ఫోన్‌లోనే ఏదో ఐడియా చెప్పాడు. అది విని సీఎం రమేష్‌ సంతో షంగా ఫోన్‌ పెట్టేసాడు.

-------

పార్లమెంట్‌ సెంట్రల్‌హాల్‌... ప్రధాని నరేంద్రమోడీ, ఆర్ధికమంత్రి అరుణ్‌జైట్లీ, కాంగ్రెస్‌ అధినేత్రి సోనియా, రాహుల్‌, ఇంకా కేంద్రమంత్రులు, పలువురు ఎంపీలు వచ్చి కూర్చున్నారు. స్పీకర్‌ సుమిత్రా మహాజన్‌ వచ్చి తన స్థానంలో కూర్చున్నారు. వైసిపితో సహా ఇతర పార్టీల ఎంపీలెవరూ సభలో లేరు. సభ మొద లైంది. టీడీపీ ఎంపీ గల్లా జయదేవ్‌ లేచాడు. అధ్యక్షా, ఏమనుకుంటున్నారు మా చంద్రబాబు నాయుడు గారి గురించి... మౌనంగా ఉంటున్నాడు కదా అని ముని అనుకుంటున్నారా? ఓటు- నోటు కేసులో బుక్కయ్యాడు, ఏం చేయ లేడు అనుకుంటున్నారా? అగ్ని పర్వతం బద్ధలైనా, చంద్రబాబు ఆవేశం కట్టలు తెంచుకున్నా మీరు నిలవలేరు. చంద్ర బాబు మూడోకన్ను తెరవక ముందే మేలుకోండి... ఆంధ్రా పట్ల మీరు చేసిన తప్పును తెలుసుకుని వెంటనే న్యాయం చేయండి అని గద్దించాడు. గల్లా జయ దేవ్‌ హెచ్చరికలతో మోడీ, జైట్లీలు బిక్క మొహం వేశారు. వారి రెండు చేతులు బిగుసుకుపోయి వణికిపోసాగాయి. వెంటనే సుజనాచౌదరి లేచాడు. ఏం తమాషాలు చేస్తున్నారా? చేతులకు గాజులు తొడుక్కున్నామనుకుంటున్నారా? మీరు కుక్కలకు బిస్కెట్లు వేసినట్లు మాకు నిధులిస్తే మేం తోక ఊపుకుంటూ తీసు కోవాల్నా? మీ ఆటలు, మీ డ్రామాలు ఇక కట్టిపెట్టండి. మా చంద్రబాబు నాయుడు తలచుకుంటే ఇప్పటికిప్పుడు కేంద్రంలో మీ ప్రభుత్వం కూలిపోతుంది. ఇంతకాలం మీరెంతగా అవమానించినా సహించాం... ఇక సమరం తప్ప, సహనం లేదు. ఇప్పటికైనా మీరు చేసిన తప్పును సరిదిద్దుకో లేదో 'ఖబడ్దార్‌' అంటూ గట్టిగా తొడ చరిచాడు. ఆ సౌండ్‌కు భయపడి మోడీ ఒక్క క్షణం గుండెను గట్టిగా పట్టుకున్నాడు. తర్వాత ఎంపీ ఎన్‌.శివప్రసాద్‌ లేచి శివాలెత్తాడు. ఇప్పటికైనా మించిపోయింది లేదు మోడీ... వెళ్ళి ఆ చంద్రబాబు శరణు కోరండి... ఆయన శాంతిలో కరుణా మయుడు, దానగుణంలో దయా మయుడు... చేసిన తప్పుకు వెళ్ళి ఆయ నను క్షమాపణ కోరండి... లేదో భూమి ఆకాశాలు బద్ధలవుతాయి అని హెచ్చ రించాడు. వారి హెచ్చరికలతో జడిసి మోడీ, జైట్లీలు తమ స్థానాలలో నుండి లేచి సుజనాచౌదరి దగ్గరకు వెళ్ళారు. ఆయన చేతులు పట్టుకుని... చౌదరి గారు... ఇప్పటిదాకా తెలిసో తెలియకో తప్పులు చేసాం... మా తప్పు తెలుసు కున్నాం. మీకు న్యాయం చేస్తాం... దయ చేసి చంద్రబాబు గారిని మూడోకన్ను తెరవొద్దని చెప్పండి. ప్లీజ్‌... ప్లీజ్‌.... ప్లీజ్‌... అని వేడుకోసాగారు.

అప్పుడే సరిగ్గా కట్‌ కట్‌ కట్‌ అంటూ దర్శకుడు రాజమౌళి వచ్చాడు. అక్కడ ఆయనతో పాటు చంద్రబాబు, లోకేష్‌, మంత్రులు సోమిరెడ్డి, నారాయణ, పత్తిపాటి పుల్లారావులు కూడా వున్నారు. చంద్రబాబుతో రాజమౌళి... సార్‌, పార్ల మెంట్‌ సీను బాగానే వచ్చింది, మన ఎంపీలు కూడా బ్రహ్మాండంగా యాక్ట్‌ చేశారు. అమరావతిలో పార్లమెంటు సెట్టింగ్‌కు నాలుగు కోట్లయ్యింది. ఇక మోడీ, జైట్లీ, సోనియా, రాహుల్‌ పాత్రల కోసం డూప్‌ యాక్టర్‌లను తెచ్చాం. వారి పోలికలకు దగ్గరగా వుండే ఆర్టిస్టులే దొరికారు. స్పీకర్‌ సుమిత్రా మహాజన్‌ పాత్రధారికి పది లక్షలు, మిగతా ఆర్టిస్టు లకు ఒక్కొక్కరికి ఐదు లక్షలు... అంతా బిల్లు 10కోట్ల దాకా కావచ్చని చెప్పాడు. అప్పుడు చంద్రబాబు... లోకేష్‌తో... సాయంత్రం ఈ సీన్‌ సి.డిలన్నింటిని ఏబిసిడి, ఎఫ్‌బి, టీవీ 10.5, టీవీ 9I9=99, కళాజ్యోతి, ఏనాడులకు పంపించు.. పార్లమెంటులో విరగదీసిన తెలుగుదేశం ఎంపీలు... అని కథనాలు రావాలి అని చెప్పాడు. లోకేష్‌ వుండి... ఈ సీన్‌లో వైకాపా ఎంపీలు లేరు కదా నాన్నారు... చూసేవాళ్ళకు అనుమానం వస్తుందేమో అని ధర్మసందేహం వ్యక్తం చేశాడు. అందుకు చంద్రబాబు... ఆంధ్రాకు న్యాయం చేయాలని టీడీపీ ఎంపీలు పోరాడుతుంటే పత్తాలేకుండా పోయిన వైసీపీ ఎంపీలని వ్రాసుకో మనం డని చెప్పి అక్కడనుండి బయల్దేరాడు.

galpikaప్రపంచంలోని 116 మేటి నగరాలను మిక్సీలో వేసి గ్రైండ్‌చేసి తీసిన అమరావతి నగరమది. ఉండవల్లిలోని హైటెక్‌రత్న, ముఖ్యమంత్రి చంద్రబాబు నివాసం. అప్పుడే పార్లమెంటులో కేంద్ర బడ్జెట్‌ను ప్రవేశపెట్టారు. బడ్జెట్‌లో ఏపికి మొండి చేయి చూపించారు. ఈ పరిణామంపై సానుభూతి తెలపడం కోసంగా మంత్రులు సోమిరెడ్డి చంద్రమోహన్‌రెడ్డి, అయ్యన్నపాత్రుడు, పి.నారాయణ, పత్తిపాటి పుల్లారావు, దేవినేని ఉమామహేశ్వరరావు, కేంద్రమంత్రి సుజనాచౌదరి, ఎంపీలు రాయపాటి సాంబశివరావు, సీఎం రమేష్‌లు కూడా వచ్చారు. అప్పుడే ఏ టివి, ఏబిసిడి చానెల్‌, టీవీ 9I9=99, టీవీ 2.5 ఛానెల్స్‌ ప్రతినిధులు వచ్చారు. ఇక అప్పుడు చంద్రబాబు తన విశ్వరూపం చూపడం మొదలుపెట్టాడు. అసలు ఏమనుకుంటున్నారు ఈ బీజేపీ వాళ్ళు... బడ్జెట్‌లో మనకు మొండిచేయి చూపిస్తారా? ఇప్పటివరకు నన్ను ఒక వైపే చూసారు. రెండోవైపు చూడాలనుకోవద్దు... తట్టుకో లేరు... మాడి మసైపోతారు. సింహంతో వేట... ఈ చంద్రబాబుతో ఆట వద్దు... నా మౌనాన్ని చేతగానితనంగా తీసుకోవద్దు... నా మౌనం తుఫాన్‌ ముందర ప్రశాంతతలాంటిది. నాదెబ్బకు పి.వి. నరసింహారావు, వాజ్‌పేయిలే పంచెలు తడుపుకున్నారు. ఈ మోడీ, అమిత్‌షాలు ఒక లెక్క... ఇక చెప్పండి ఆ మోడీకి... నిన్నటివరకు ఒక లెక్కా... ఈరోజునుండి ఒక లెక్క... నాతో గేమ్స్‌ ఆడాలను కున్నారో... ఖబడ్దార్‌ అంటూ గట్టిగా తొడ చరిచాడు. ఆ సౌండ్‌కు సోమిరెడ్డి కొంచెం షేకయ్యి అటు ఇటూ వూగాడు. చంద్రబాబు ఆవేశపు డైలాగ్‌లు, హెచ్చరికలను షూట్‌ చేసిన ఏబిసిడి ఛానెల్‌ వాళ్లు అప్పటికప్పుడు బ్రేకింగ్‌ న్యూస్‌ మొదలుపెట్టారు. బడ్జెట్‌పై ఆగ్రహించిన చంద్రబాబు... పతనానికి చేరువలో ఎన్డీఏ ప్రభుత్వం... బాబు వార్నింగ్‌తో జడుసుకుంటున్న మోడీ... చంద్రబాబును ప్రసన్నం చేసుకునేందుకు దూతలుగా రాష్ట్రపతి, ఉపరాష్ట్రపతి... సహనం, సంయమనం పాటించాలని, దేశంలో శాంతిభద్రతలను కాపాడాలని చంద్రబాబును కోరిన ఎన్డీఏ మిత్రపక్షాలు... ఏబిసిడి ఛానెల్‌లో ఇలా చంద్రబాబు గురించి ప్రత్యేక కథనాలే ప్రసారం కాసాగాయి.

బడ్జెట్‌పై ప్రెస్‌కు స్టేట్‌మెంట్లిచ్చాక చంద్రబాబు తన గదిలో కొచ్చి కూర్చున్నాడు. అప్పుడే ఆయన ఫోన్‌ రింగయ్యింది. ఆయన ఎడమకన్ను అప్పుడే అదిరింది. ఇది ఖచ్చితంగా ఢిల్లీ ఫోనే అను కుంటూ ఫోన్‌ తీసి ఆన్‌ చేశాడు. అవతల నుండి అమిత్‌షా... ఏం చంద్రబాబు గారు బాగున్నారా, ఇప్పుడే ఏబిసిడి ఛానెల్‌లో మీ ఇంటర్వ్యూ చూసాను సూపర్‌... మాకు భలే వార్నింగ్‌ ఇచ్చారు. మీరిచ్చిన వార్నింగ్‌తో మోడీకి జ్వరం వచ్చి ఇంట్లో ముసుగేసుకుని పడుకుని వున్నాడు. నాకైతే దడ తగ్గలేదు. ఏదో మీ ముందు చిన్న పిల్లలం. మమ్మల్ని అలా బెదిరిస్తే ఎలా సార్‌... అని వెటకారంగా అన్నాడు. అందుకు చంద్రబాబు... మీరు మరీ అంత వెటకారంగా మాట్లాడొద్దు సార్‌, మీ నుండి రియాక్షన్‌ ఉంటుందని తెలుసు... కాని ఏం చేయమంటారు, బడ్జెట్‌లో అసలు ఏపి ప్రస్తావనే లేకపోయే... కనీసం ఈ మాత్రం యాక్షన్‌ అన్నా చేయకపోతే... మరీ నన్ను మా వాళ్ళే చేతకానివాడనుకుంటారు సార్‌, నేను ఇలా మాట్లాడానని ఏమీ అనుకోవద్దు. మోడీ గారిని కూడా ఇవేమీ మనసులో పెట్టుకోవద్దని చెప్పండి... ప్లీజ్‌ అని వేడుకున్నాడు. సరేలే అని అమిత్‌షా ఫోన్‌ కట్‌ చేసాడు.

అంతలో మళ్ళీ చంద్రబాబు ఫోన్‌ మోగింది. మళ్ళీ మోడీ ఏమన్నా చేసాడా అనుకుంటూ ఫోన్‌ వైపు చూసాడు. ఐఎస్‌డి కాల్‌... ఒబామానో, బిల్‌గేట్సో, బిల్‌క్లింటనో అయ్యుంటాడను కుంటూ ఫోన్‌ ఆన్‌ చేసాడు. అవతల నుండి... నాన్న నేను లోకేష్‌ని, న్యూజెర్సీ నుండి అని అన్నాడు. ఏరా లోకేష్‌... ఏంటి విశేషాలు అని చంద్రబాబు అడిగాడు. మీరు అర్జంట్‌గా ఆంధ్రప్రదేశ్‌, తెలంగాణలలో తెలుగుదేశం పార్టీని మూసేసి అమెరికాకు వచ్చే యండి అని అన్నాడు. ఆ మాటకు చంద్రబాబు తల పదివేల కిలోమీటర్ల వేగంతో తిరగసాగింది. పది నిముషాలకుగాని చంద్రబాబు తేరుకోలేక పోయాడు. ఏమైందిరా లోకేష్‌ అంత మాటన్నావు అని చంద్రబాబు అడిగాడు. నాన్నారు... అమెరికాలో మన పార్టీ పరిస్థితి బాగుంది. ఇక్కడ ఎలక్షన్స్‌లో పోటీ చేస్తే మనమే అధికారంలోకి వచ్చేటట్లున్నాం. మీరు అమెరికా అధ్యక్షు డైతే మోడీలాంటి వాళ్ళంతా మీ చుట్టూనే వుంటారు. ప్రపంచమే మీ చుట్టూ తిరుగుతుందని లోకేష్‌ చెప్పాడు. ఆ మాటలతో చంద్రబాబుకు మైకం కమ్మేసింది. డబ్‌ అంటూ అక్కడే సోఫాలో పడిపోయాడు.

-----

లోకేష్‌ కోరిక మేరకు చంద్రబాబు అమెరికాలో కాలుపెట్టాడు. వాషింగ్టన్‌ వేదికగా తెలుగుదేశం పార్టీ కార్యాలయాన్ని ప్రారంభిం చారు. ట్రంప్‌ను వ్యతిరేకించే డెమోక్రాట్లు తమ పార్టీని తెలుగు దేశంలో విలీనం చేసారు. బిల్‌క్లింటన్‌, ఒబామా, హిల్లరీ క్లింటన్‌లు కూడా తెలుగుదేశంలో చేరి పచ్చకండువాలు కప్పుకున్నారు. ఆమెరికా తెలుగుదేశం పార్టీ జాతీయ అధ్యక్షుడిగా చంద్రబాబు, యువజన విభాగం అధ్యక్షుడిగా నారా లోకేష్‌, ప్రధాన కార్యదర్శిగా ఒబామా, ఉపాధ్యక్షుడిగా బిల్‌క్లింటన్‌, మహిళా విభాగం అధ్యక్షు రాలిగా హిల్లరీ క్లింటన్‌, మహిళా విభాగం ప్రచార కార్యదర్శిగా కండోలిజారైస్‌లను నియమించారు. అమెరికా అధ్యక్ష ఎన్నికలకు ఇక టైం దగ్గర పడుతుందనగా అమెరికా ప్రజల సమస్యలు తెలుసుకోవడానికి, వారి కన్నీళ్ళు తుడవడానికి చంద్రబాబు లాస్‌ఏంజల్స్‌ నుండి 10వేల కిలోమీటర్ల 'నవ శంఖారావ పాదయాత్ర'కు శ్రీకారం చుట్టాడు. చంద్రబాబు పాదయాత్రకు విశేష స్పందన... అమెరికన్లు బ్రహ్మరథం పట్టసాగారు. అన్ని సర్వే సంస్థలు కూడా అమెరికా అధ్యక్ష ఎన్నికల రేస్‌లో దూసుకుపోతున్న చంద్రబాబు... ట్రంప్‌ కంటే ఆధిక్యంలో వున్న తెలుగువాడు... అని ముందస్తు ఫలితాలనిస్తున్నాయి. ముందస్తు సర్వేలను చూసి ట్రంప్‌కు భయమేసింది. వెంటనే ఆయన మోడీకి ఫోన్‌ చేసి... సార్‌, దయచేసి ఆ చంద్రబాబును మీ ఇండియాకు పిలిపించుకోండి... ఆయన ఇక్కడ వుంటే నా కుర్చీకే ఎసరొస్తుంది. అమెరికన్‌లంతా ఆయనకే జై కొడుతున్నారు. ప్లీజ్‌ నా కోసం ఆ చంద్ర బాబును ఇక్కడ ఎన్నికల్లో పోటీ చేయకుండా చూడండి అని ఏడుస్తూ అడిగాడు. నేను ట్రై చేస్తాను అని మోడీ ఫోన్‌ పెట్టేసి, వెంటనే చంద్ర బాబుకు చేసాడు. అవతల ఫోన్‌ ఎత్తగానే చంద్రబాబూజీ... మా మీద మనసులో ఏమీ పెట్టుకోవద్దు... మీపట్ల గతంలో మేం చేసిన తప్పులను మన్నించండి... దయచేసి అమెరికా నుండి వచ్చేయండి... మీరు అక్కడేవుంటే ఆ ట్రంప్‌కు పిచ్చి ఎక్కువై చచ్చేటట్లున్నాడు అని ప్రాథేయపడ్డాడు. అది విన్న బాబు... ఇదే చంద్రబాబు పవర్‌ అంటే... నన్నే తక్కువ అంచనా వేస్తావా... హ... హ... హ... అంటూ బిగ్గరగా నవ్వసాగాడు. అలా నవ్వుతుండగానే ఎవరో ముఖం మీద నీళ్ళు చల్లినట్లుండడంతో... టక్కున కళ్లు తెరిచాడు. ఎదురుగా తన శ్రీమతి భువనేశ్వరీ దేవి... చేతిలో చెంబు... అమెరికాకు నువ్వెప్పుడొచ్చావని చంద్రబాబు ఆమెను అడిగాడు. అందుకామె... నేను అమెరికా రావడం కాదు... మీరే అమరావతిలో వున్నారు... సోఫాలో పడుకుని కలవ రిస్తున్నారు అని చెప్పింది. అప్పుడర్ధమైంది చంద్రబాబుకు... లోకేష్‌ ఫోన్‌ కాల్‌ ఎఫెక్ట్‌తో అప్పటిదాకా జరిగిందంతా కల అని.

Page 1 of 45

newsbottomad

ఎక్కువగా చదివిన వార్తలు

  • కేడర్‌ని... కదనరంగంవైపు నడిపిస్తున్న జగన్‌
    నాయకుడంటే ఓ నమ్మకం... నాయకుడంటే ఓ భరోసా... నాయకు డంటే ఓ ధైర్యం. తన పార్టీలో లీడర్లకు, తన పార్టీ కేడర్‌కు అలాంటి నమ్మకాన్ని, అలాంటి ధైర్యాన్ని కల్పించడంలో విజయం సాధించాడు వైకాపా అధినేత వై.యస్‌.జగన్మోహన్‌రెడ్డి! నెల్లూరుజిల్లాలో వై.యస్‌.జగన్మో హన్‌రెడ్డి చేపట్టిన…
  • అజీజా... నిన్నొదలా...!
    నెల్లూరు మేయర్‌ అబ్దుల్‌ అజీజ్‌ వివాదా లతో సహజీవనం చేస్తున్నట్లుగా వుంది అది వ్యాపారంలోనైనా... ఇటు రాజకీయాలలోనైనా! అజీజ్‌ మేయర్‌ అయ్యింది మొదలు నెల్లూరు కార్పొరేషన్‌లో ఎన్నో వివాదాలు చూసాం. ఏ కమిషనర్‌తోనూ ఆయనకు పడేది కాదు. ఇలా పడకనే గత…
  • ఉదయగిరిలో... పాత పోరా? కొత్త నీరా?
    జిల్లాలోని పది అసెంబ్లీ నియోజకవర్గాలలో 9అసెంబ్లీలది ఒక దారి అయితే ఉదయగిరి అసెంబ్లీది మాత్రం ఇంకో దారి! మెట్టప్రాంతమైనప్పటికి ఇక్కడి ప్రజలు రాజకీయ చైతన్యవంతులు. పార్టీ ప్రభంజనాలు, నాయకుల పట్ల సానుభూతి వంటి వాటికంటే కూడా ఇక్కడ పోటీ చేసే అభ్యర్థుల…
  • సుధాకర్‌ బాబా(య్‌).. కొంప ముంచాడు బాబోయ్‌
    దయ చేసి వినండి... దయచేసి వినండి... మంత్రాలకు చింతకాయలు రాలవు... అని ఎందరు చెబుతున్నా వింటారా? వినరు? దయ చేసి బురిడీ బాబాలను నమ్మొద్దని మేధావులు మొత్తు కుంటుంటారు... అయినా వింటారా? వినరు! మోసం చేసేవాడికి మోసపోయే వాడెప్పుడూ లోకువే. మీరు…
  • చంద్రుడి డైరక్షన్ లో పవన్ యాక్షన్ థ్రిల్లర్ జె.ఏ.సి
    రాష్ట్ర రాజకీయాలలో చంద్ర బాబుకు అవసరమైనప్పుడు మాత్రమే తెరమీదకొస్తాడని పేరున్న పవర్‌స్టార్‌ పవన్‌ కళ్యాణ్‌ మరోసారి సరికొత్త యాక్షన్‌ థ్రిల్లర్‌ స్క్రీన్‌ప్లేతో తెరమీద కొచ్చాడు. దీనిపేరు జాయింట్‌ యాక్షన్‌ కమిటి! తెలంగాణ ఉద్యమ సమయంలో జేఏసీల పాత్రేమిటో చూసాం. తెలం గాణ…

Newsletter