galpikaతన కలల రాజధాని అమరావతిలోని సచివాలయం నుండి ఉండవల్లిలోని తన ఇంటికి అప్పుడే చేరుకున్నాడు హైటెక్‌రత్న, నవ్యాంధ్ర సీఎం చంద్రబాబునాయుడు. చంద్రబాబు హాల్‌లోకి రాగానే మనుమడు దేవాన్ష్‌ బుడిబుడి అడుగులు వేసుకుంటూ వచ్చి తన తాత చేతికి టీవీ రిమోట్‌ అందిం చాడు. చంద్రబాబు టీవీ ఆన్‌ చేసి తనకు పెద్దగా ఇష్టంలేని ఏబిసిడి న్యూస్‌ఛానెల్‌ పెట్టాడు. అందులో ఎంపీ టీజీ వెంకటేష్‌, కేంద్రమంత్రి సుజనాచౌదరి, రాష్ట్రమంత్రి పత్తిపాటి పుల్లారావులు మీడియాతో మాట్లా డుతున్న దృశ్యాలు వస్తున్నాయి. మొదట టి.జి. మాట్లాడుతూ మా నాయకుడు చంద్రబాబు గారు దేశానికి ఎంతో సేవచేశారు. దేశం అంటే తెలుగుదేశం అనుకునేరు, భారతదేశం కన్నమాట... ఆయన సేవలను దృష్టిలో పెట్టు కుని ఆయ నను రాష్ట్రపతిని చేయాలి, అలాగే లోకేష్‌ను ఇంకో క్షణం కూడా ఆలస్యం చేయకుండా ముఖ్యమంత్రిని చెయ్యాలి అని చెప్పాడు. తర్వాత సుజనారాం మాట్లా డుతూ... చంద్రబాబును రాష్ట్రపతి, లోకేష్‌ను సీఎంగా చేయడంతో పాటు దేవాన్ష్‌ను కూడా మంత్రి వర్గంలోకి తీసుకోవాలి, మంత్రి కావడానికి దేవాన్ష్‌కు అన్ని అర్హతలున్నాయని చెప్పాడు. పత్తిపాటి పుల్లారావు మాట్లాడుతూ... మా చంద్రబాబు గాంధీమహాత్ముడంతటి వాడు. కాకపోతే ఆయన గోచీ పెట్టుకుం టాడు, ఈయన ఫ్యాంటు, షర్టు, లోపల బనియన్‌ వేసుకుంటాడు... అంతే తేడా అని చెప్పాడు. పత్తిపాటి తనను గాంధీతో పోల్చే సరికి చంద్రబాబుకు కళ్ళల్లో నీళ్ళు తిరిగాయి. వాళ్ల మాటలకు కడుపు నిండిపోవడంతో పుల్కాలు తినకుండా తన బెడ్‌రూంలోకి వెళ్లి గోడకు వేలాడదీసివున్న గాంధీఫోటోను చూస్తూ... ఓ శాంతిదూత... నాలాగే మా పార్టీ నాయకులు కూడా మీ ఆశయాలను పాటించేలా ఆశీర్వదించండి స్వామి అని మన సులో వేడుకుంటూ నిద్రలోకి జారుకున్నాడు.

----------

అది దెందులూరు నియోజకవర్గంలోని కృష్ణానది ఇసుక రీచ్‌ ప్రాంతం. అక్కడ ఎమ్మార్వో వనజాక్షి అక్రమ ఇసుక ట్రాక్టర్లను ఆపేసింది. ట్రాక్టర్ల యజమానులు ఆమెతో గొడవ పడుతున్నారు. అప్పుడే అక్కడకు కాళ్లకు చెప్పులు లేకుండా కాలినడకన ఎమ్మెల్యే చింతమనేని ప్రభాకర్‌ వచ్చాడు. ఎమ్మార్వో వనజాక్షితో గొడప పడుతున్న తన అను చరులను... నాయనా, మహిళలను గౌర వించండి, వారి పట్ల మర్యాదగా ప్రవర్తిం చండి, వారిని దూషించడం తగదు అని హితబోధ చేసాడు. కాని, వారిలో ఓ వ్యక్తి... బోచెప్పొచ్చావులే పోవయ్యా... నీ బోడి శాంతి సందేశాలు వినడానికి మేమిక్కడ గాజులు తొడుక్కుని లేం. నీ కబుర్లు చెవులు తెగినోళ్లకు చెప్పుకోపో అని కసిరాడు. అయినా చింతమనేని ప్రభాకర్‌లో ఎటువంటి కోపమూ రాలేదు. బాబూ నువ్వు ఆవేశంలో ఉన్నావు. ఆవేశం అన్నింటికి పరిష్కారం కాదు, మనసును నిజాయితీగా ఉంచుకో, అహింసను మించిన ఆయుధం లేదు, ఆ మహిళా అధికారిణికి క్షమాపణలు చెప్పి మీ దారిన మీరు వెళ్లండి, అహింసా పరమోధర్మః అని చింతమనేని అన్నాడు. వెంటనే ఇంకో వ్యక్తి... ముందు నువ్వు పక్కకు జరుగు అంటూ చింతమనేని చేయి పట్టుకుని లాగాడు. వెంటనే చింతమనేని... నాయనా, ఒక చెంపన కొడితే రెండో చెంప చూపించమని మా గురువు బాపూజీ గారు చెప్పారు. ఇప్పుడు మీరు నా కుడి చెంపను కొట్టారు, ఇదిగో ఎడమ చెంప... దీనిని కూడా కొట్టండి... కాని మీరందరూ హింసోన్మాదాన్ని వదిలేసి అహింసాయుత మార్గంలో నడవండి... జై బాపూజీ అంటూ అక్కడ నుండి వెళ్లిపోయాడు.

---------------

విజయవాడలోని రవాణాశాఖ కమిషనర్‌ కార్యాలయం. ఎంపి కేశినేని నాని, ఎమ్మెల్యే బోండా ఉమామహేశ్వరరావు, ఎమ్మెల్సీ బుద్ధా వెంకన్నలు అక్కడకు వచ్చారు. ముగ్గురు చేతుల్లోనూ గులాబీ పూలున్నాయి. ముగ్గురూ ఆ గులాబీ పూలను కమిషనర్‌ బాలసుబ్ర హ్మణ్యంకు ఇచ్చారు. ఏంటివి, నాకెందుకిస్తు న్నారని ఆయన అడిగాడు. నాని వుండి... సార్‌, 'శంకర్‌ దాదా జిందాబాద్‌' సినిమా చూడలేదా? అధికారులు సక్రమంగా పనిచేయనప్పుడు నిరసన తెలిపే పద్ధతి. మేమేదో కడుపు నింపుకోవడానికి నాలుగు బస్సులను ఎంతో నిజాయితీగా, నిబంధనలకు అనుగుణంగా నడుపుకుంటున్నాం. మాకు తెలిసిందల్లా ప్రేమ, అహింసా, భూతదయ. మేం నూరణాల గాంధీజీ ఫాలోయర్స్‌మి. మీ డిపార్ట్‌మెంట్‌ వాళ్ళు లంచాల కోసం మా బస్సులను ఆపేస్తున్నారట. అది పద్ధతికాదు సార్‌, నిజాయితీగా ఉండమనండి, సంపా దించిన దాంట్లోనే సర్దుకుని తినండి అని హితబోధ చేశాడు. అక్కడవున్న ఓ బ్రేక్‌ ఇన్స్‌పెక్టర్‌... మీరు చెప్పే సొల్లు కబుర్లు వినడానికి మేం ఖాళీగా లేం... ముందు బయటకెళ్లండి అంటూ ఆవేశంగా అరిచాడు. బోండా వుండి... సార్‌, అంత ఆవేశమెందుకు సార్‌, దేశానికి స్వాతంత్య్రం ఆవేశం వల్ల రాలేదు సార్‌, అహింసాయుత ఉద్యమం వల్ల వచ్చింది. అతిగా ఆశపడే మగాడు, అతిగా ఆవేశపడే ఆడది బాగుపడినట్లు చరిత్రలో లేదని 'నరసింహ' సినిమాలో రజనీకాంత్‌ చెప్పాడు... చూల్లేదా? రోజూ ధ్యానం, యోగా చేయండి, మనసులను ప్రశాంతంగా ఉంచు కోండి అని చెప్పాడు. బుద్దా వెంకన్న అందు కుని... ప్రశాంతంగా జీవించడంలో వున్న సుఖం ఇంకెందులోనూ లేదు, మాకు గొడవ లన్నా, వివాదాలన్నా పడవు, కాబట్టి మేం మా సమస్య చెప్పు కున్నాం, శాంతియుతంగా వెళ్ళిపోతున్నాం అంటూ వెనుదిరిగారు.

----------------

విశాఖపట్నంలో ఇంటర్నేషనల్‌ ఎయిర్‌ పోర్ట్‌. అప్పుడే ఓ కారొచ్చి ఆగింది. శాంతి స్వరూప్‌ బిరుదాంకితుడు, ఎంపి జేసీ దివాకర్‌రెడ్డి దిగాడు. నేరుగా ఇండిగో విమాన సంస్థ కౌంటర్‌ వద్దకు వెళ్లి సెల్‌ఫోన్‌లో తన టికెట్‌ బుకింగ్‌ మెసేజ్‌ చూపించి బోర్డింగ్‌ పాస్‌ అడిగాడు. అక్కడున్న సిబ్బంది... సారీ సార్‌, టైం అయిపోయింది. అయినా, ఇంత లేటుగా వచ్చారేమిటి అని అడిగారు. జేసీ తల పట్టుకుని... అయ్యో, ఈ చైనా వాచీని నమ్ముకుని ఎంత తప్పు చేసాననుకుంటూ... వారితో... సారీ తమ్ముడు... నిన్న నా ఫ్రెండ్‌ చైనా నుండి వస్తూ ఈ చేతి గడియారం తెచ్చాడు. దీంట్లో చైనా టైమే వుంది... నేను దీనిని నమ్ముకుని లేటుగా వచ్చాను. ఏం చేస్తాం, రోడ్డు గుండా వెళ్లిపోతాలే అని అన్నాడు. అందుకు అక్కడున్న సిబ్బంది... సారీ, మీరు పార్లమెంటు సభ్యులు... ఎంపీలలో మీ అంత శాంతి స్వభావులను ఇంకెక్కడా చూడలేదు, మీ కోసం కంపెనీ అధికారులతో మాట్లాడి విమానాన్ని అరగంట ఆపించే ప్రయత్నం చేస్తామన్నారు. అప్పుడు జేసీ వారి చేతులు పట్టుకుని... వద్దు తమ్ముడు, నా ఒక్కడి కోసం వందలమంది ప్రయాణికులను ఇబ్బంది పెట్టడం నాకిష్టముండదు. నేను లేట్‌గా వచ్చి తప్పు చేసాను, తప్పుకు ప్రాయ శ్చితం అనుభవించాల్సిందేనని మా గురువు గారు చెప్పారు. నేను తప్పు చేస్తే స్వర్గంలో వున్న ఆయన ఆత్మ నన్ను క్షమించదు. మా దివాకర్‌ గాడేందిరా ఈ పనిచేసాడనుకుం టాడని అన్నాడు. ఎవరు సార్‌ ఆ గురువుగారు అని సిబ్బంది అడిగారు. ఇంకెవరు గాంధీజీ అని జేసీ చెప్పాడు. ఆయనకు మీకు సంబం ధమేంటని సిబ్బంది అడిగారు. ఐదో తరగతిలో ఆయన గురించి వచ్చిన పాఠం చదువుకున్నాలే... అప్పటినుండి ఆయనతో నాకు మంచి ఫ్రెండ్‌షిప్‌... హేరామ్‌ అని అరిచాడు... అంతే ఆ క్షణంలోనే హేరామ్‌ హేరామ్‌ అంటూ చంద్రబాబు అరవసాగాడు. ఆ అరుపుకు ఉలిక్కిపడి భువనేశ్వరీదేవి లేచింది. హేరామ్‌ అని పదే పదే అరుస్తున్న చంద్రబాబు ముఖం మీద నీళ్లు చల్లింది. దెబ్బకు ఆయన లేచి కూర్చున్నాడు. ఏమైంది... ఎందుకు 'హేరామ్‌' అంటూ అరిచారు అని ఆమె అడిగింది. చంద్రబాబు తేరుకోవడానికి పది నిముషాలు పట్టింది. చింతమనేని ప్రభాకర్‌, కేశినేని నాని, జేసీ దివాకర్‌రెడ్డి సంఘటనలన్నీ తనకు కలలో వచ్చాయని గ్రహించాడు. అప్పుడు ఆయన భువనేశ్వరీదేవితో... రాత్రి గాంధీ గారిని గురించి ఆలోచిస్తూ పడుకున్నాను. మన పార్టీ నాయకులందరూ గాంధీ బాటలో నడుస్తు న్నట్లు కల వచ్చిందని చెప్పాడు. అది విని భువనేశ్వరీ... మీ మైండ్‌సెట్‌కు సెట్‌కాని వ్యక్తుల గురించి ఆలోచిస్తే ఇలాంటి కలలే వస్తాయి. బంగారం లాంటి నిద్రను చెడగొట్టారు, ఇక పడుకోండి అని చెప్పి ఆమె తిరిగి నిద్రలోకి జారుకుంది. చంద్రబాబు మాత్రం పడుకుంటే మళ్ళీ కలలో ఎలాంటి ఘోరాలు చూడాల్సి వస్తుందోనని అలాగే మేల్కొని జాగారం చేశాడు.

galpikaఉండవల్లిలోని హైటెక్‌రత్న, సింగపూర్‌ సింహా చంద్రబాబు నివాసం. మనువడు దేవాన్ష్‌తో చంద్రబాబు బూచి ఆట ఆడు కుంటున్నాడు. వాళ్ళ ఆనందానికి అడ్డుకట్ట వేస్తూ అప్పుడే అక్కడకు స్పీకర్‌ కోడెల శివప్రసాద్‌రావు, మంత్రులు కె.ఇ.కృష్ణ మూర్తి, పి.నారాయణ, సోమిరెడ్డి చంద్రమోహన్‌రెడ్డి, పత్తిపాటి పుల్లారావు, పరిటాల సునీతలు వచ్చారు. వాళ్ళ ముఖాలు సీరియస్‌గా వున్నాయి. అందరిలోనూ టెన్షన్‌ వుంది. వాళ్లను చూసి చంద్రబాబు ఏంటలా వున్నారని అడిగాడు. కోడెల రొప్పుతూ... అవతల మన పరువు పోతుంటే ఇక్కడ మీరు తీరిగ్గా బూచి ఆట ఆడుకుంటున్నారా? అని ఆవేశంగా అన్నాడు. ఏమైందని చంద్రబాబు అడిగాడు. ముందు టీవీ ఆన్‌ చేసి 'ఆత్మసాక్షి' ఛానెల్‌ పెట్టండి, ఏమైందో మీకే తెలుస్తుందని కోడెల ఇంకా ఆవేశంగా చెప్పాడు. కోడెల నోటి నుండి ఆ మాటను విన్న వెంటనే కంప్యూటర్‌ బ్రైన్‌ కలిగిన దేవాన్ష్‌ అక్కడే వున్న రిమోట్‌ తీసుకుని టీవీ ఆన్‌ చేసి నెంబర్లు నొక్కి 'ఆత్మసాక్షి' ఛానెల్‌ పెట్టేసాడు. ఆ బుడతుడు చేసిన పనికి అందరూ ఆశ్చర్యపోతూ... ఇతను తాతను మించే మనువడు కాదు తాతను ముంచే మనుమడు అవుతాడని మనసులో అను కున్నారు. 'ఆత్మసాక్షి' ఛానెల్‌లో వెలగపూడిలోని అసెంబ్లీ, సచివాలయం భవనాలను చూపిస్తున్నారు. కొద్దిపాటి వర్షానికే ఉరుస్తున్న అసెంబ్లీ సచివాలయం, ప్రతిపక్ష నేత ఛాంబర్‌లోకి నీళ్లు, అసెంబ్లీ జలమయం... రాజధాని రోడ్లపై పడవల్లో తిరుగుతున్న ఎమ్మెల్యేలు... అంటూ యాంకర్‌ స్వప్న అసెంబ్లీ హాల్‌లో గొడుగు వేసుకుని తిరుగుతూ చెబుతోంది. అప్పుడే అక్కడకు ప్రతిపక్ష ఎమ్మెల్యేలు చెవిరెడ్డి భాస్కర్‌రెడ్డి, ఆర్‌.కె. రోజా, పిన్నెల్లి రామకృష్ణారెడ్డి, పి.అనిల్‌కుమార్‌యాదవ్‌లు చేరుకున్నారు. ప్రతిపక్ష నేత జగన్‌ ఛాంబర్‌లో నీళ్లలో కాగితాల పడవలను వదిలి ఆడుకోసాగారు. ఆత్మసాక్షి ఛానెల్‌ రిపోర్టర్‌ దానిని షూట్‌ చేస్తుండగా యాంకర్‌ స్వప్న... చంద్రబాబు ఘోషించిన సింగపూర్‌ టెక్నాలజీ ఇదేనేమో... నిన్నగాక మొన్న కట్టిన సచివాలయంలో అప్పుడే పగుళ్లు... ప్రతిపక్ష నేత ఛాంబర్‌లో నీళ్ళు... ఆ నీళ్ళలో కాగితం పడవలతో ఆడుకుంటున్న ఎమ్మెల్యేలు... సింగపూర్‌ అసెంబ్లీ కూడా ఇలాగే ఉంటుందా? అక్కడ ప్రజాప్రతినిధులు కూడా ఇలాగే ఆడుకుంటారా? ఇన్ని వందల కోట్లు తగలేసి ఈ భవనాలు కట్టింది నీళ్లలో కాగితం పడవలు తిప్పుకోవడాని కేనా? అని ఆవేశంగా ప్రశ్నించింది. 'ఆత్మసాక్షి' ఛానెల్‌లో... అసెంబ్లీ, సచివాలయాలలో కుండపోత దృశ్యాలను చెన్నై, కర్నూలు వరదల కంటే భయంకరంగా ప్రసారం చేయ సాగారు. ఆ దృశ్యాలను చూస్తుంటే చంద్రబాబుకు చిర్రెత్తు కొచ్చింది. తాత ముఖంలో ఫీలింగ్స్‌ గమనించిన దేవాన్ష్‌ వెంటనే రిమోట్‌తో టీవీ ఆఫ్‌ చేసేసాడు. అప్పుడే పై అంతస్థులో నుండి లోకేష్‌ హాల్‌లోకి వచ్చాడు. లోకేష్‌ను చూడగానే పత్తిపాటి పుల్లారావు... చూసావా బాబు ఆ ఆత్మసాక్షి టీవీ వాడు ఎంత ఘోరంగా చూపిస్తున్నాడో... కొద్దిపాటి వర్షానికే సచివాలయం ఉరుస్తుందంటా... బిల్డింగ్‌ లన్నాక నీళ్ళు కారకుండా ఉంటాయా? అడుగుకు కేవలం 10వేల రూపాయలే ఖర్చుపెట్టి కట్టాం... అంతకంటే నాణ్యంగా భవనాలు కావాలంటే ఎట్లా వస్తాయని బాధ పడ్డాడు. అది విని లోకేష్‌... నేను పైన టీవీలో అంతా చూసాను, జరిగిందంతా కూడా మన మంచికే జరిగింది. వర్షాకాలంలో సచివాలయం, అసెంబ్లీ భవనాలను టార్బాలిన్‌ పట్టలతో కప్పి ఉంచుదాం, అలాగే ఈ రెండు భవనాలలో ఉరుస్తున్న చోట్ల నీటిని పట్టేందుకు పదివేల బకెట్లు కొందాం. వీటికి ఒక వంద కోట్లు మంజూరు చేస్తే సరి... మనోళ్లకు కూడా పని కల్పించినట్లుంటుందన్నాడు. లోకేష్‌ ఆలోచనకు అందరూ ఆశ్చర్యపోయారు. అంతా విన్న చంద్రబాబు... ముందు అక్కడకు వెళ్ళి పరిస్థితిని చూద్దాం పదండి... అంటూ బయటకొచ్చాడు. అక్కడ కాన్వాయ్‌లో కార్లకు బదులు పడవలున్నాయి. ఏంటివి అని చంద్రబాబు అడి గాడు. మనమిప్పుడు సచివాలయం వద్దకు పోవాలంటే ఇవే గతి అని సోమిరెడ్డి చెప్పాడు. దాంతో అందరూ నాలుగు పడవల్లో తెడ్లు వేసుకుంటూ సచివాలయం వద్దకు చేరు కున్నారు. చంద్రబాబు అసెంబ్లీ సచివాలయాన్ని చూసొచ్చాడు. వర్షపు నీళ్ళు ఎక్కడ కారుతున్నాయి, ఎక్కడ కారడం లేదన్నది పరిశీలనగా చూసొచ్చాడు. చంద్రబాబు బయటకు రాగానే మీడియా వాళ్లు చుట్టుముట్టేసారు. అసెంబ్లీలో కుండపోతపై మీ సమాధానం ఏంటంటూ కుండబద్ధలు కొట్టినట్లు అడిగారు. చంద్రబాబు ఆవేశంగా... ఆ సింగపూర్‌ కంపెనీ వాళ్ళను పిల వండి అని ఆదేశించాడు. వెంటనే సింగపూర్‌ మంత్రి ఈశ్వరన్‌ మీడియా ముందుకు వచ్చాడు. ఇందులో చంద్రబాబు గారి తప్పేమీ లేదు. మేము వర్షాలను దృష్టిలో పెట్టుకుని బిల్డింగ్‌లు కట్టలేదు. చంద్రబాబు సీఎంగా వుంటే వర్షాలు పడవని చాలా మంది అంటుంటే మేం దానిని నిజమనుకున్నాం. కానీ, ఇలా ఉన్న ఫళంగా వర్షం వస్తుందనుకోలేదు. వెంటనే వీటిని పడగొట్టి కొత్తవి కడతాం. కాకపోతే ఈసారి అడుగుకు 15వేలిస్తే సరిపో తుందని చెప్పాడు. అప్పుడే అక్కడకు యువరత్న బాలకృష్ణ వచ్చాడు. ఏంది గోల... ఏంది ఈ గొడవంతా అని అడిగాడు. వర్షం వల్ల వచ్చిన తలనొప్పి అని చంద్రబాబు చెప్పాడు. అప్పుడు బాలయ్య... ఓస్‌ అంతేనా? నేను గట్టిగా తొడ కొడితే వచ్చే వర్షం కూడా మధ్యలోనే అగిపోతుందన్నాడు. వెంటనే నారాయణ అతని చేతిని గట్టిగా పట్టుకుని... బాబూ... మీరు తొడ కొడితే వర్షం ఆగితే ఫర్వాలేదు... కాని ఆ సౌండ్‌కు అంతంత మాత్రంగా కట్టిన ఈ భవనాలు కూలిపోతే మీ బావగారు తలను సింగపూర్‌ సముద్రంలో దించుకోవాల్సిందే అని బ్రతిమలాడుకోసాగాడు.

galpikaఅది ప్రపంచంలోని పాతిక మేటి నగరాలను మిక్సీలో వేసి రుబ్బితే వచ్చిన అమరావతి రాజధాని నగరం. హైటెక్‌రత్న, ముఖ్యమంత్రి చంద్ర బాబు నివాసం. మంత్రులు దేవినేని ఉమామహేశ్వరరావు, పత్తిపాటి పుల్లారావు, కొల్లు రవీంద్ర, సోమిరెడ్డి చంద్రమోహన్‌రెడ్డి, శిద్ధా రాఘవ రావు, నిమ్మకాయల చినరాజప్ప, పీతల సుజాతలు అప్పుడే ఇంట్లోకి వచ్చారు. అప్పుడే లోకేష్‌ తన కొడుకు దేవాన్ష్‌ను భుజాల మీద కెత్తుకుని... ''చిన్నారి పొన్నారి కిట్టయ్య నిన్నెవరు కొట్టారయ్యా'' అనే పాట పాడు కుంటూ హాల్‌లోకి వచ్చాడు. అక్కడ వున్న మంత్రులను చూసి లోకేష్‌ పాట ఆపేసి, ఏం సార్‌, అందరూ ఇంత పొద్దున్నే కట్టకట్టుకుని వచ్చా రని అడిగాడు. ఈరోజు విజయ వాడ బెంజ్‌సర్కిల్‌లో నవనిర్మాణ దీక్ష వుంది కదా ఏర్పాట్ల గురించి మాట్లాడుదామని వచ్చామని ఉమా చెప్పాడు. నాన్నగారు పూజగదిలో దేవుడితో హాట్‌లైన్‌లో మాట్లాడు తున్నారు, పది నిముషాలు వెయిట్‌ చేయండని చెప్పి లోకేష్‌ లోపలకు వెళ్లాడు. చంద్రబాబు హాట్‌లైన్‌లో దేవుడుతో మాట్లాడుతున్నాడా? ఢిల్లీతో మాట్లాడుతున్నాడా? అయినా ఈ లోకేష్‌ మాటలు ఓ పట్టాన అర్ధమై చావవు అని అనుకుంటూ మంత్రులు అక్కడే కూర్చున్నారు. కొద్దిసేపటికి చంద్రబాబు అక్కడకు వచ్చాడు. సోమిరెడ్డి వుండి ఆయ నతో... మీరు దేవుడుతో మాట్లాడు తున్నారని లోకేష్‌ అన్నారు, అలాంటి పేరున్న నాయకుడు మన పార్టీలో గాని, ఎన్టీఏలోగాని ఎవరు లేరే, ఎవర్సార్‌ ఆ దేవుడు అని అడిగాడు. నేను మాట్లాడేది నిజం దేవుడు తోనే... ఆయనే ఏడుకొండలవాడు వెంకటేశ్వరుడు. ప్రతిరోజూ ఆయ నతో మాట్లాడాకే నా దినచర్య మొద లవుతుంది. నా పనులన్నీ ఆయనే చెబుతాడు. ఆయన చెప్పినవే నేను చేస్తాను. ఆ దేవుడు శాసిస్తాడు, ఈ చంద్రబాబు ఆచరిస్తాడు. అమరా వతిలో రాజధాని కట్టమంది ఆయనే, పోలవరం నిర్మించమంది ఆయనే... అని చంద్రబాబు చెప్పాడు. ఆ మాటకు ఎదురుగా వున్న మంత్రులు ఆశ్చర్యంతో నోర్లు తెరవగా, గోడ మీద పటంలో వేలాడుతున్న వెంక టేశ్వరస్వామి ఆశ్చర్యంతో నామాల మీద వేలేసుకున్నాడు. తర్వాత చంద్రబాబే వుండి.. బెంజ్‌సర్కిల్‌లో నవనిర్మాణదీక్ష ఏర్పాట్లు ఎలా జరు గుతున్నాయని అడిగాడు. అప్పుడు దేవినేని ఉమ... బెంజ్‌ సర్కిల్‌లో ప్రతిగంటకు కొన్ని వందల బస్సులు, లారీలు, కార్లు వస్తుంటాయి. వాట న్నింటిని ఆపేసి అందులోని వారిని సభలో కూర్చోబెడతాం. అలాగే సినిమా హాల్స్‌, షాపింగ్‌ మాల్స్‌ కొచ్చిన వాళ్లను కూడా ఇక్కడకు తరలించే ఏర్పాట్లు చేస్తున్నాం. నందిగామ నుండి పది బస్సులు,

ఉయ్యూరు నుండి 15బస్సులు పెడుతున్నాం. గన్నవరం నుండి 20బస్సులు, బందరు నుండి పాతిక బస్సులు పెడుతున్నాం. జనం తక్కువైతే నూజివీడు నుండి కూడా 50బస్సులు పెడతామని చెప్పాడు. మీరు బస్సులు ఎన్ని పెట్టారన్నది ముఖ్యంకాదు, జనం ఎంతమంది వచ్చారన్నదే నాకు ముఖ్యం. జనం లేకుంటే మీకు జాతరే అని చంద్ర బాబు వార్నింగ్‌ ఇచ్చాడు.

---------------

అది బెంజ్‌సర్కిల్‌. నవనిర్మాణ దీక్ష సభా ప్రాంగణం. వేలసంఖ్యలో కుర్చీలు వేసారు. పదుల సంఖ్యలో మాత్రమే కుర్చీలు నిండాయి. మంత్రులు దేవినేని ఉమ, పత్తిపాటి పుల్లారావు, కొల్లు రవీంద్రలు టెన్షన్‌తో వున్నారు. అటు వైపు ఒక్క వాహనం కూడా వెళ్లడం లేదు. ఆ సెంటర్‌లో ఒక్క మాల్‌ కూడా తెరువ లేదు. అక్కడ వున్న ఎంపీ కేశినేని నానితో దేవినేని ఉమ... ఏమైంది ఈరోజు, ఇటు వైపు ఒక్క బండి కూడా వెళ్లడం లేదని అడిగాడు. అందుకు నాని... ఈరోజు బెంజ్‌ సర్కిల్‌లో నవనిర్మాణ దీక్ష అనేసరికి ఈ రూటులో ప్రయాణాలు మాను కున్నారు. అర్జంట్‌గా పోవాల్సినవారు అడ్డదారుల్లో పోతున్నారని చెప్పాడు. అప్పుడే చంద్రబాబు వచ్చాడు. సభకు హాజరైన జనాన్ని చూసాడు. అరికాల్లో మండిందాయనకు. నిన్న బస్సులు, రైళ్లు, విమానాలని లెక్కలు చెబితిరి... ఎక్కడ జనం, ఈరోజు నవనిర్మాణ దీక్ష ఫెయిల్‌ అవుతుందని దేవుడు చెప్పాడు. అలాగే జరిగింది. కనీసం రేపటి సభకన్నా జనం బాగా వచ్చే టట్లు చూడండని చెప్పి వెళ్లి పోయాడు.

దేవినేని ఉమ, పత్తిపాటి పుల్లా రావులు సోమిరెడ్డితో సభలకు జనాన్ని తీసుకురావడం ఓ ఆర్ట్‌... రేపటి సభకన్నా జనం రాకపోతే మన పరువు పోతుంది. మీరే ఏదో ఒకటి చేయండన్నా అని అడిగారు. వెంటనే సోమిరెడ్డి ఫోన్‌ తీసి స్టైల్‌ ఆఫ్‌ సింహపురి ఆనం వివేకా(66+)కు కాల్‌ చేసి విషయం చెప్పాడు. అవ తల నుండి వివేకా... ఆ సంగతి నాకొదిలేయండి, మీరు తల మీద తడిగుడ్డ వేసుకుని నిద్రపోండని భరోసా ఇచ్చాడు.

-------------

రెండోరోజు ఏ1 కన్వెన్షన్‌ సెం టర్‌లో నవనిర్మాణదీక్ష... హాల్‌ కిక్కి రిసిపోయింది. లోపల ఎంత జనం ఉన్నారో బయట అంతకు మూడిం తల మంది వున్నారు. లోపల సీట్ల కోసం కొట్టుకుంటున్నారు. అక్కడకు వచ్చిన వారిలో మహిళలు, వృద్ధులు, పిల్లలు ఎక్కువుగా వున్నారు. అప్పుడే అక్కడకు వచ్చిన చంద్రబాబు కిక్కిరి సిన జనాన్ని చూసి దేవినేని ఉమ, పత్తిపాటి పుల్లారావులను మెచ్చుకు న్నట్లుగా చూసాడు. దాంతో వారిలో ఎనలేని ఉత్సాహం వచ్చింది. అప్పుడే అక్కడకు వచ్చిన సోమిరెడ్డితో వాళ్ళు... వివేకన్న ఏం మాయ చేసా డన్నా, ఇంతమంది జనం వచ్చారని అడిగాడు. దానికి సోమిరెడ్డి... ఏ ముంది, ఈరోజు నవ నిర్మాణదీక్ష సభలో యాంకర్లు శ్రీముఖి, రవిలచే 'పటాస్‌' ప్రోగ్రామ్‌, అనసూయ, రష్మిల ఆధ్వర్యంలో 'జబర్దస్త్‌' ప్రో గ్రామ్‌, యాంకర్‌ సుమ ఆధ్వర్యంలో 'పట్టుకుంటే పట్టు చీర' కాంపిటీషన్స్‌ జరుగుతాయని ప్రచారం చేయిం చాడు. అంతేకాదు, వాళ్లను రప్పిం చాడు కూడా! ఇంకో ఇంపార్టెంట్‌ విషయం ఏంటంటే ఈరోజు సభలో చంద్రబాబు స్పీచ్‌ వుండదని ప్రచారం చేశాడు. అందుకే జనం ఇంతగా ఎగబడ్డారని చెప్పడంతో వాళ్లు ఏమైనా మీ నెల్లూరోళ్లు అసాధ్యులన్నా అంటూ నోర్లెళ్ళబెట్టారు.

Page 1 of 51

newsbottomad

ఎక్కువగా చదివిన వార్తలు

  • నెల్లూరు నగరాభివృద్ధికి... నాలుగు స్థంభాలు
    కన్నతల్లిని జన్మభూమిని ఎప్పుడూ మరచిపోకూడదని మన కేంద్రమంత్రి యం.వెంకయ్యనాయుడు ప్రతి సభలోనూ చెబుతుంటారు. మరి ఎంతమంది ఆ మాటను చెవికెక్కించుకుంటారన్నది వేరే విషయం. కాని ఆయన చెప్పే మాట ప్రతి ఒక్కరికీ వర్తిస్తుంది. కన్నతల్లిని జన్మభూమిని మరువవద్దని ఆయన చెబుతున్న మాటలను…
  • తీరంకు సిఇజడ్‌ హారం
    డాక్టర్‌ వై.యస్‌.రాజశేఖరరెడ్డి పాలనలో జిల్లాలో పారిశ్రామిక ప్రగతి పరుగులు పెట్టింది. కృష్ణపట్నం పోర్టు అత్యంత వేగంగా నిర్మాణం పూర్తి చేసు కుంది. వై.యస్‌. అనే నాయకుడు మర ణించకపోయి వుంటే కృష్ణపట్నం పోర్టు ఈరోజు దేశంలోనే ప్రముఖ పారిశ్రామిక హబ్‌గా అవతరించి…
  • నాయుడుపేట టు పూతలపట్టు... ఆరులైన్లకు ఆమోదం
    ఏపిలోనే అత్యంత రద్దీ ఉన్న రహదారులలో ప్రధానమైనది నాయుడు పేట - బెంగుళూరు రోడ్డు. ఏపి నుండి తమిళనాడు, కేరళ, కర్నాటక రాష్ట్రాలలోని పలు ప్రాంతాలను కలిపే ప్రధాన మార్గమిది. అంతేకాదు, ప్రముఖ ఆథ్యాత్మిక క్షేత్రాలన్నీ కొలువైన రహదారి. శ్రీకాళహస్తి, తిరుమల,…
  • ఆర్టీసీని... ఆధునీకరించడం కాదు... తరలించడమే ఉత్తమం
    నెల్లూరులోని ఆర్టీసీ బస్టాండ్‌కు నాలుగు దశాబ్దాల పైబడిన చరిత్ర ఉంది. అప్పట్లో ఈ బస్టాండ్‌ నగరానికి దూరంగా ఉన్న ట్లుండేది. ఈ నాలుగు దశాబ్దాల కాలంలో నగరం నలువైపులా విస్తరించింది. దీంతో ఆర్టీసీ బస్టాండ్‌ నగరానికి నడిబొడ్డులో వున్నట్లయ్యింది. కొన్నేళ్ల క్రితం…
  • మూడేళ్ళు.... జిల్లాలో కనిపించని అభివృద్ధి ఆనవాళ్ళు!
    కలెక్షన్‌లలో వరల్డ్‌ రికార్డ్‌ సృష్టించిన 'బాహుబలి' చిత్రాన్ని చూసిన తర్వాత అదే హీరో ప్రభాస్‌ నటించిన 'బుజ్జిగాడు' సినిమాను చూస్తే ఎంత చెత్త ఫీలింగ్‌ కలుగుతుందో, 2004 నుండి 2009 వరకు బాహుబలి లాంటి వై.యస్‌. పరిపాలన చూసిన రాష్ట్ర ప్రజలకు…

Newsletter