seetaiమోచేతి నీళ్ళు తాగే ఆఫీసర్లు ఉన్నంతవరకే ప్రజాప్రతినిధులు ఏ ఆటయినా ఆడగలరు. అధికారి అడ్డం తిరిగాడంటే ప్రజా ప్రతినిధి కాదు కదా ముఖ్యమంత్రి కూడా ఏమీ చేయలేడు. అది ఏ పార్టీ అయినా... ఏ ప్రభుత్వమైనా!

అధికారులు కరెక్ట్‌గా వుంటే ప్రజాప్రతినిధులు ఎంతగా విలవిల లాడుతారో ప్రస్తుతం నెల్లూరుజిల్లాలో చూస్తున్నాం. కలెక్టర్‌, ఎస్పీ, నెల్లూరు మున్సిపల్‌ కార్పొరేషన్‌ కమిషనర్‌, డిఆర్‌డిఏ పి.డి, తెలుగుగంగ స్పెషల్‌ కలెక్టర్‌, డి.ఇ.ఓ... ఇంకా మరికొందరు... ప్రస్తుతం జిల్లాలో మంచి ఆఫీసర్లే పడ్డారు. కలెక్టర్‌ ముత్యాలరాజు పనితీరు గురించి ప్రత్యేకంగా చెప్పనవసరం లేదు. ముక్కుసూటిగా పనిచేస్తూ అధికారపార్టీ నాయకులతో పెద్దగా పేచీలు రాకుండానే పని చేసుకుంటున్నారు. తన పనితనంతో ముఖ్యమంత్రి మెప్పు కూడా పొందారు.

జిల్లాలో అధికారపార్టీ నాయకులకు మింగుడుపడని అధికారులు జిల్లా ఎస్పీ రామకృష్ణ, నెల్లూరు కార్పొరేషన్‌ కమిషనర్‌ ఢిల్లీరావులు. ఎస్పీ రామకృష్ణ జిల్లాలో బెట్టింగ్‌, ఎర్రచందనం, ఇసుక, సిలికా అక్రమ రవాణాపై ఉక్కుపాదం మోపారు. వీటిలో ఎక్కువుగా ఉండేది అధికార పార్టీ నాయకుల అనుచరులే. అధికారాన్ని అడ్డం పెట్టుకుని అక్రమంగా నాలుగు రూపాయలు సంపాదించేది ఇక్కడే కదా! ఎస్పీ చర్యలతో అక్రమ రవాణాకు గండి పడి తెలుగుతమ్ముళ్ళు విలవిలలాడుతున్నారు. ఎస్పీ ఇక్కడితో వదిలితేనా? పాత కేసులు కూడా తోడిమరీ బెండు తీస్తున్నాడు. ఎస్పీ దెబ్బకు నియోజకవర్గాలు, మండల స్థాయిలలో డిఎస్పీలు, సి.ఐలు, ఎస్‌.ఐలు కూడా అధికార పార్టీ నాయకుల మాట వినడం లేదు. వారి సిఫార్సులను పరిగణనలోకి తీసుకోవడం లేదు. ఇక్కడే కార్యకర్తల ముందు నాయకులు పలుచనైపోతున్నారు. మండల స్థాయిలో నాయకుల హవా పనిచేసేది పోలీసుస్టేషన్‌ల వద్దే! ఒక ఎస్‌.ఐ స్థాయిలోనే నాయకుడు పనిచేయించుకోలేకపోయాడంటే ఆ నాయకుడి పరపతి ఆ గ్రామాలలో పడిపోయినట్లే! ఈ ఎస్పీ మూలంగా అధికార పార్టీలో వుండి కూడా పోలీసు స్టేషన్‌లలో పనులు చేసుకోలేకపోతున్నా మంటూ టీడీపీ నాయకులు ఆక్రోశిస్తున్నారు. అందుకే కొందరు అధికార నేతలు ఎస్పీపై బహిరంగంగానే తమ అక్కసు వెళ్ళగక్కుతున్నారు.

నెల్లూరు కార్పొరేషన్‌ కమిషనర్‌ ఢిల్లీరావు అంటే కూడా ఇక్కడ అధికారపార్టీలో కొందరు నాయకులకు మింగుడుపడడం లేదు. నగరంలో ఢిల్లీరావు ఎవరి ఒత్తిళ్ళు లెక్కచేయకుండా తన పని తాను చేసుకుపోతున్నాడు. ఢిల్లీరావుకు మున్సిపల్‌ మంత్రి నారాయణ పూర్తి సహకారం వుంది. ఆక్రమణల తొలగింపు విషయంలో ఎవరి అభ్యంత రాలను పట్టించుకోవద్దని మంత్రి ఆయనకు పూర్తి పవర్‌ ఇచ్చాడు. ఢిల్లీరావు కూడా ఎవరి సిఫార్సులను ఖాతరు చేయడం లేదు. ఆక్రమణల తొలగింపు విషయంలోనే మేయర్‌ అజీజ్‌కు ఆయనకు మధ్య వివాద మొచ్చింది. మేయర్‌, కమిషనర్‌లకు చాలారోజుల నుండే పొసగడం లేదు. తాజాగా నుడా ఛైర్మెన్‌ కోటంరెడ్డి శీనయ్య కూడా కమిషనర్‌ మీద కత్తి యుద్ధం మొదలుపెట్టారు. అధికారపార్టీ కార్పొరేటర్లలోనే కమిషనర్‌ వ్యతిరేక, అనుకూల గ్రూపులు ఏర్పడ్డాయి. ఇక నిజాయితీగా పనిచేస్తున్న అధికారులను బదిలీ చేయాలని చూస్తే ఊరుకోబోమంటూ ప్రతిపక్ష వైకాపాతో పాటు టీడీపీ మిత్రపక్షమైన బీజేపీలు వార్నింగ్‌ల మీద వార్నింగ్‌లు ఇస్తున్నాయి. ఇలా ఉన్న ఫళంగా అధికారులను బదిలీచేస్తే నిజాయితీ అధికారులను బదిలీ చేయించారనే చెడ్డపేరొ స్తుందని ఓ పక్క... అలాగని ఉంచుకుంటే తమకే తలనొప్పులు వస్తు న్నాయనే బాధ ఇంకో పక్క..!

మొత్తానికి జిల్లాలోని అధికారపార్టీ నాయకులు నిజాయితీతో ముక్కుసూటిగా పనిచేసే అధికారులతో నలిగిపోతున్నారు.

kurugondla2014 ఎన్నికల్లో ఈ జిల్లాలో తెలుగుదేశంపార్టీ మూడు సీట్లే గెలవగా అందులో వెంకటగిరి ఒకటి. ఆ ఎన్నికల్లో వైకాపా అభ్యర్థిగా పోటీ చేసిన కొమ్మి లక్ష్మయ్యనాయుడు ఇంకొంచెం కష్టపడివున్నా, ఆర్ధికంగా ఇంకొంత ఉత్సాహం చూపివున్నా ఫలితం వేరుగా వుండేది. నియోజకవర్గంలోని ఇతర మండ లాలలో వైకాపా ఆధిక్యం చూపినా వెంకటగిరి పట్టణంలో తెలుగుదేశంకు గట్టి పట్టుంది. ఇక్కడున్న బలం తోనే ఆ ఎన్నికల్లో కురుగొండ్ల గెలవగలిగాడు. అదీగాక, ఆ ఎన్నికలప్పటికి అతను సిటింగ్‌ ఎమ్మెల్యే. ప్రజల్లో ఆయన పట్ల పెద్దగా వ్యతిరేకత లేకపోవడం ఆయన గెలుపుకు దోహదపడింది. అదీగాక కాంగ్రెస్‌ అభ్యర్థిగా పోటీ చేసిన నేదురుమల్లి రామ్‌కుమార్‌రెడ్డి వైకాపా ఓట్లను చీల్చి కురుగొండ్లకు పరోక్ష సహకారం అందించాడు.

జిల్లాలో ముగ్గురు టీడీపీ ఎమ్మెల్యేలు గెలిస్తే ముగ్గురి మీద కూడా వారి వారి నియోజకవర్గాల్లో వ్యతిరేకత వుందని తెలుస్తోంది. ఈ వ్యతిరేకత కురుగొండ్ల రామకృష్ణ మీద కాస్తా ఎక్కువుగా వున్నట్లు తెలుస్తోంది. ఈ మూడున్నరేళ్లలో ఆయన పేరు అభివృద్ధి పనుల పరంగా కంటే వివాదాల పరంగానే ఎక్కువుగా ప్రచారంలో వుంది. అధికారులతో వివాదాలు... సొంత పార్టీ నేతలతోనే విభేదాలు... కాంట్రాక్టర్లకు, మద్యం వ్యాపారులకు బెదిరింపులు వంటి చర్యలతో ఆయనపై తెలియని వ్యతిరేకత వచ్చేసింది. నియోజకవర్గంలో సొంత పార్టీ నేతలు ఆయన వైఖరిపై అసంతృప్తితో వున్నారు. అయితే ఇంత వ్యతిరేకత వున్నా కురుగొండ్ల మాత్రం మూడోసారి కూడా వెంకటగిరి టిక్కెట్‌ తనదేనని ప్రచారం చేసుకుంటున్నాడు. చంద్రబాబు అంత సామాన్యంగా ఎవరికీ టిక్కెట్‌ ఇవ్వడు. సర్వేలు చేయిస్తాడు, ఐవిఆర్‌ఎస్‌ ద్వారా వివరాలు రాబడతాడు. పదిమందిని పరిశీలించి, ఐదుగురిని సెలక్ట్‌ చేసి వారిలో ఒకరిని బెస్ట్‌ అని ఎంపిక చేస్తాడు. చంద్రబాబు వద్ద టిక్కెట్‌ గ్యారంటీ అన్నది వుండదు.

వెంకటగిరి టిక్కెట్‌ కోసం ఈసారి గట్టిపోటీ ఏర్పడే అవకాశం ఉంది. జిల్లా కేంద్ర సహకార బ్యాంకు ఛైర్మెన్‌ మెట్టుకూరు ధనుంజయరెడ్డి ఈ సీటు కోసం గట్టిగా ప్రయత్నిస్తున్నట్లు సమాచారం. ఈ నియోజకవర్గంలో ఆయనకు బలమైన బంధువర్గం ఉండడంతో పాటు, డీసీసీబీ ఛైర్మెన్‌గా ఈ నాలుగున్నరేళ్లలో మంచిపేరు తెచ్చుకున్నాడు. మంచి పరిచయా లున్నాయి. ఆర్ధికంగా మోటుకోగలడు. ఆయన అభ్యర్థి అయితే వ్యతిరేకత అన్న ప్రశ్నే లేదు. ఇక వెంకటగిరి రాజాల నుండి సర్వజ్ఞ యాచేంద్ర ఈసారి సీటును ఆశిస్తున్నాడని తెలుస్తోంది. పారిశ్రామికవేత్త గంగోటి నాగేశ్వరరావు కూడా రేసులో వున్నాడు. అన్నింటికి మించి నేదురుమల్లి రాజకీయ వారసుడు నేదురుమల్లి రామ్‌కుమార్‌రెడ్డి కూడా వెంకటగిరి సీటుకు ప్రయత్నిస్తున్నాడు. టీడీపీ-బీజేపీల మధ్య పొత్తు కుదిరితే జిల్లాలో ఒక సీటును బీజేపీకి కేటాయించే అవకాశాలున్నాయి. ఈసారి నెల్లూరు నగరం, రూరల్‌లో తెలుగుదేశం అభ్యర్థులను దించే పరిస్థితి కనిపిస్తోంది. కాబట్టి వెంకటగిరిని బీజేపీకి కేటాయిస్తే నేదురుమల్లి రామ్‌కుమార్‌రెడ్డి అభ్యర్థి కావచ్చు.

మొత్తానికి కురుగొండ్లకు మూడోసారి సీటు అంత సులభం కాకపో వచ్చు.

newsbottomad

ఎక్కువగా చదివిన వార్తలు

  • నారాయణను వదలని అనిల్‌
    మున్సిపల్‌ మంత్రి నారాయణకు ఎవరితోనూ సమస్యలు లేవు. ప్రతిపక్ష నాయకులు కూడా ఆయనపై పెద్దగా విమర్శలు చేయరు. కాని, నెల్లూరు నగర ఎమ్మెల్యే పి.అనిల్‌కుమార్‌యాదవ్‌ మాత్రం నారాయణకు చుక్కలు చూపిస్తున్నాడు. ఆయనకు కొరుకుడు పడని కొయ్యగా మారాడు. ఈ నాలుగేళ్ళలో మంత్రి…
  • వేసవి సెలవులు... వినోదం కావాలే గాని విషాదం కాదు
    వేసవి సెలవులు వచ్చేస్తున్నాయి. ఇప్పటికే టెన్త్‌, ఇంటర్‌ పరీక్షలు ముగిసాయి. వీళ్ళతో పెద్ద సమస్య లేదు. టెన్త్‌ వ్రాసిన వాళ్ళు ఇంటర్మీ డియట్‌కు, ఇంటర్‌ వ్రాసిన వాళ్ళు ఎంసెట్‌కు ప్రిపేరవడంతోనే సెలవులు దాటిపోతాయి. లోయర్‌ క్లాస్‌లకు ఈ నెలాఖరు నుండే సెలవులు.…
  • ఉదయగిరిలో... 'రెడ్డి' కోసం 'దేశం' అన్వేషణ
    రాజకీయ చైతన్యానికి పేరుపడ్డ నియోజకవర్గంలో రాజకీయ పార్టీలకు గెలుపు పెద్దసవాల్‌! పార్టీ ప్రభంజనాల కంటే పోటీచేసే అభ్యర్థి ప్రభావమే ఇక్కడ ఓటర్లపై బలంగా వుంటుంది. అభ్యర్థి సమర్ధత, వ్యక్తిత్వాన్ని బట్టే ఇక్కడ గెలు పోటములుంటాయి. గత మూడున్నర దశాబ్దాల రాజకీయ చరిత్రను…
  • 'నిప్పో'కు రైట్‌ రైట్‌
    గత కొద్దికాలంగా రాజకీయ నాయకుల నోళ్ళలో నానుతూ రాజకీయ అంశంగా మారిన 'నిప్పో' పరిశ్రమకు సంబంధించిన 13.02 ఎకరాల భూమి కన్వర్షన్‌కు సంబంధించిన అంశం ఎట్టకేలకు నెల్లూరు నగరపాలక సంస్థ ఆమోదం పొందింది. 12వ తేదీ జరిగిన కార్పొరేషన్‌ కౌన్సిల్‌ సమావేశంలో…
  • వైసిపి వైపు నేతల చూపు
    నవ్యాంధ్రలో శరవేగంగా చోటుచేసుకుంటున్న రాజకీయ మార్పు ప్రభావం నెల్లూరుజిల్లాపై కూడా ఎక్కువగానే కనిపిస్తోంది. ఇప్పటివరకు స్తబ్ధుగా వున్న జిల్లా రాజకీయం ఇప్పుడిప్పుడే ఊపందుకుని వేసవి తాపంతో పాటు వేడెక్కుతోంది. జిల్లాలోని పది నియోజకవర్గాలలో వైసిపికి ఇప్పటికే సమన్వయకర్తలున్నారు. వారే రేపు రాబోయే…

Newsletter