bjpసరిగ్గా నెలరోజుల క్రితం కర్నాటకలో రాజకీయ వాతావరణం కాంగ్రెస్‌కు అను కూలంగా ఉండింది. ఏ సర్వే చూసినా కాంగ్రెస్‌ తిరిగి అధికారం చేజిక్కించుకుంటుందనే చెప్పాయి. నోట్ల రద్దు, జిఎస్టీ వంటి బీజేపీ ప్రభుత్వ విధానాలపై ప్రజలు తీవ్ర ఆగ్రహంతో వున్నారని, ఈ ప్రభావం కర్నాటక ఎన్నికల్లో బీజేపీ విజయావకాశాలను దెబ్బతీస్తుందని కూడా భావించాయి.

కాని, నెలరోజుల్లోనే అక్కడ సీన్‌ను మార్చేసింది అమిత్‌షా బృందం. ప్రధాని నరేంద్ర మోడీ చేసిన ప్రచారంతో అక్కడ ట్రెండ్‌ మారింది. 21చోట్ల ప్రధాని మోడీ రోడ్‌షోలు జరిగాయి. బయట రాష్ట్రాలకు చెందిన 50వేల మంది ఆరెస్సెస్‌ కార్యకర్తలు కర్నాటకలో దిగిపోయారు. కర్నాటక ఆరెస్సెస్‌ శాఖలు వీరికి సహకరించాయి. నియోజకవర్గానికి 500మంది కార్యకర్తలను బూత్‌లెవల్‌ ప్రచారానికి వినియోగించారు. అమిత్‌షా బెంగుళూరులోనే తిష్టవేసి ఎన్నికలను పర్యవేక్షించాడు. ఆయన బృందంలోని సభ్యులు గెలుపే లక్ష్యంగా శ్రమించారు. కర్నాటకలో 222 స్థానాలుంటే తమ అభ్యర్థి కాంగ్రెస్‌, జేడిఎస్‌ల కంటే వెనుకబడి వున్నాడన్న నియోజకవర్గాలపై పెద్దగా దృష్టి పెట్టలేదు. గెలుపు ఖాయమనుకున్న స్థానాలతో పాటు రెండో స్థానంలో వున్నామని రిపోర్ట్‌ వచ్చిన స్థానాలపై ప్రత్యేకదృష్టి పెట్టారు. కాబట్టే కాంగ్రెస్‌ కంటే మొత్తంగా ఓట్లు తగ్గినా సీట్ల పరంగా మొదటి స్థానంలో నిలవగలిగారు. కేవలం వ్యూహాత్మక రాజకీయాలతోనే బీజేపీ పెద్ద పార్టీగా నిలిచింది.

దేశమంతటా ఉత్కంఠ రేపిన కర్నాటక అసెంబ్లీ ఎన్నికల ఫలితాలు 15వ తేదీ వెలువడ్డాయి. పలు సర్వే సంస్థలు ఊహించినట్లే హంగ్‌ ఫలితాలు వచ్చి కర్నాటకలో అధికార కుర్చీ ఆట మొదలైంది. బీజేపీకి 104 సీట్లు వచ్చి పూర్తి మెజార్టీకి 8సీట్ల దూరంలో ఆగింది. ఇక అధికార కాంగ్రెస్‌ 78సీట్లతో రెండో స్థానానికి పరిమితం కాగా, జేడీఎస్‌ 38సీట్లు గెలుచుకుని ప్రభుత్వ ఏర్పాటులో కీలకంగా మారింది. ఫలితాల సరళినిబట్టి ఒక దశలో బీజేపీ పూర్తి మెజార్టీ సాధిస్తుందనుకున్నప్పటికీ చివరిలో కాంగ్రెస్‌ పుంజు కోవడంతో బీజేపీ అధికారానికి 8సీట్ల దూరంలో ఆగింది.

అప్రమత్తమైన కాంగ్రెస్‌...

హంగ్‌ ఫలితాలు వచ్చాయని తెలియగానే కాంగ్రెస్‌ అప్రమత్తమైంది. గతంలో గోవా, నాగాలాండ్‌, మణిపూర్‌ వంటి రాష్ట్రాల అనుభవాలను దృష్టిలో పెట్టుకుని కాంగ్రెస్‌ నాయకత్వం అప్రమత్తమైంది. సోనియాగాంధీనే నేరుగా జేడీఎస్‌ అధినేత దేవేగౌడకు ఫోన్‌ చేసి కుమారస్వామిని ముఖ్య మంత్రిని చేస్తామని ప్రతిపాదించింది. దీంతో జేడీఎస్‌ కూడా కాంగ్రెస్‌తో చేతులు కలపడానికి సై అంది. కాంగ్రెస్‌, జేడీఎస్‌లు కలిస్తే ప్రభుత్వం ఏర్పాటు సులభమే!

రేవణ్ణకు బీజేపీ ఆఫర్‌...

అయితే బీజేపీ కాంగ్రెస్‌కు ఛాన్స్‌ ఇస్తుందా? కాంగ్రెస్‌ కుమార్‌స్వామికి గాలం వేస్తే బీజేపీ దేవేగౌడ్‌ పెద్దకొడుకు రేవణ్ణకు వల విసిరింది. జేడీఎస్‌లో కుమార స్వామి, రేవణ్ణ వర్గాలు వేర్వేరుగా వున్నాయి. తమ్ముడు సీఎం అవుతుంటే అన్న రేవణ్ణ చేతులు ముడుచుకుని వుంటాడా? బీజేపీ వాళ్ళు రేవణ్ణలో పదవీ ఆకాంక్షను రగిల్చే ప్రయత్నం చేస్తున్నారు. కర్నాటక డిప్యూటీ సీఎం లేదా కేంద్రమంత్రి పదవి ఆఫర్‌ చేస్తున్నారు. దీంతో పాటు కాంగ్రెస్‌లో వున్న లింగాయత్‌ కులానికి చెందిన ఎమ్మెల్యేలను చీల్చే ప్రయత్నాలు జరుగుతున్నాయి. జేడీఎస్‌, కాంగ్రెస్‌ల నుండి కొంతమంది ఎమ్మెల్యేలు చీలి వచ్చినా బీజేపీకి ప్రభుత్వం ఏర్పాటు చేయడం సులభమే అవుతుంది.

ప్రభుత్వం ఎవరు ఏర్పాటు చేస్తారన్నది ఇప్పుడు గవర్నర్‌ చేతిలో వుంది. పెద్దపార్టీని మొదట ప్రభుత్వ ఏర్పాటుకు ఆహ్వానిస్తే బీజేపీ పట్ల గవర్నర్‌ తన స్వామిభక్తిని చాటుకున్నట్లే! ఎందుకంటే ఇటీవలే గోవా ఎన్నికల్లో కాంగ్రెస్‌ పెద్దపార్టీగా అవతరిస్తే అక్కడి గవర్నర్‌ పెద్దపార్టీ కాంగ్రెస్‌ను ఆహ్వానించలేదు. జేడీఎస్‌ - కాంగ్రెస్‌ కూటమికి మొదటి ఛాన్స్‌ ఇచ్చేంత సాహసం గవర్నర్‌ చేయకపోవచ్చు. ఎంతైనా ఆయనా ఒకప్పటి బీజేపీ నాయకుడే కదా!

కాబట్టి మొదటి అవకాశం బీజేపీకే ఇచ్చి బలనిరూపణకు సమయం ఇవ్వొచ్చు. ఈలోపు మిగతా ఎమ్మెల్యేలను బీజేపీ నాయకులు జేడీఎస్‌, కాంగ్రెస్‌లను చీల్చి తెచ్చుకోవచ్చు.

కాంగ్రెస్‌ స్వయంకృతాపరాధం

కర్నాటకలో ఓటమి కాంగ్రెస్‌ చేజేతులా తెచ్చుకున్నదే! ఇక్కడ సిద్ధ రామయ్య ప్రభుత్వంపై ప్రజల్లో వ్యతిరేకత లేదు. సీఎంగా యడ్యూరప్ప, కుమారస్వామిలకంటే ఆయనవైపే ప్రజలు మొగ్గుచూపారు. కాని కొన్ని సొంత తప్పులే కాంగ్రెస్‌ను అధికారానికి దూరం చేసాయి. జేడీఎస్‌తో పొత్తు విషయంలో కాంగ్రెస్‌ సక్సెస్‌ కాలేకపోయింది. పొత్తు కుదిరివుంటే ఈరోజు ఫలితం ఇంకో విధంగా వుండేది. ఇక మతపరమైన సెంటిమెంట్ల జోలికి పోయి హిందువులలో వ్యతిరేకత తెచ్చుకున్నారు. ఎవరూ అడగకపోయినా టిప్పుసుల్తాన్‌ జయంతి అంటూ ఆర్భాటం చేయడం, లింగాయత్‌లను ప్రత్యేక మతంగా గుర్తిస్తూ కేబినెట్‌లో ఆమోదించడం వంటివి ఆయనపై కొన్ని వర్గాల్లో అసంతృప్తిని కలిగించాయి. బీజేపీ ఎన్నికల ప్రచారంలో వీటిని బాగానే వాడుకుంది. రాహుల్‌, సోనియాలొచ్చి ప్రచారం చేసినా కాంగ్రెస్‌కు ఉప యోగం లేకుండాపోయింది. దేశంలో కాంగ్రెస్‌ అధికారంలో వున్న పెద్ద రాష్ట్రం ఇదే! ఇప్పుడు ఈ రాష్ట్రం కూడా చేజారిపోయినట్లే!

దీంతో కాంగ్రెస్‌ ఒక ప్రాంతీయ పార్టీ స్థాయికి పడిపోయినట్లయ్యింది. పంజాబ్‌, మిజోరాం రాష్ట్రాలలో మాత్రమే కాంగ్రెస్‌ అధికారంలో వుంది. అంటే కాంగ్రెస్‌ ముక్త్‌ భారత్‌ నా లక్ష్యం అన్న మోడీ లక్ష్యం దాదాపు 90శాతం నెరవేరినట్లయ్యింది. బీజేపీ మాత్రం మిత్రపక్షాలతో కలిసి 20 రాష్ట్రాలలో వుండగా కర్నాటకలో కూడా అధికారం చేపడితే అది 21వ రాష్ట్రం అవుతుంది.

modi andhraఈమధ్య సినిమా యాక్టర్‌ శివాజీ ఆపరేషన్‌ గరుడ, ఆపరేషన్‌ ద్రవిడ, ఆపరేషన్‌ పెరుగువడ అంటూ అయ్యవారు లాగా బ్లాక్‌బోర్డు మీద వ్రాసిమరీ విలేకరులకు వివరించాడు. శక్తివంతమైన ఇంటలిజన్స్‌ విభాగానికి సైతం అందని సమాచారం తనకు అందినట్లు ఆయన ఫోజిచ్చాడు. అయితే ఆపరేషన్‌ గరుడ, పెరుగువడ సంగతేమోగాని, త్వరలోనే కేంద్ర ప్రభుత్వం ఆంధ్రప్రదేశ్‌లో తన మిషన్‌ను ఆపరేషన్‌ను అమలు చేయడం మాత్రం గ్యారంటీగా కనిపిస్తోంది. బహుశా కర్నాటక ఎన్నికలు ముగిసాక బీజేపీ పెద్దలు ఏ.పి రాజకీయాలపై దృష్టిపెట్టే అవకాశాలు పుష్కలంగా కనిపిస్తున్నాయి.

కమలదళం ఆపరేషన్‌ మొదలుపెట్టడమంటే మొదట ఈ నాలుగేళ్ళ పాలనలో చంద్రబాబు అక్రమాల చిట్టాను బయటకు తీయడమే! ఒకటా రెండా... ఈ నాలుగేళ్ళ పాలనలో ఎన్నో లొసుగులున్నాయి. ఎన్నో వేలకోట్ల దుర్వినియోగం వుంది. దుబారా వుంది. లెక్కలేనంత అవినీతి వుంది. ఈ దేశంలో 29రాష్ట్రాలుంటే సగానికిపైగా రాష్ట్రాలలో కుంభమేళా, పుష్కరాలు జరుగుతుంటాయి. కాని, ఏ రాష్ట్రంలో కూడా వేలకోట్లు పెట్టి పుష్కరాలను చేయలేదు. కేవలం దోపిడీ పథకంలో భాగంగానే ఏపిలో గోదావరి, కృష్ణ పుష్కరాలను నిర్వహించినట్లుగా వుంది. పుష్కరాలప్పుడు చేసిన పనులు, వాటి అంచనాలు, లెక్కలు బయటకు తీస్తే ఆశ్చర్యపరిచే బొక్కలు బయటపడతాయి. పట్టిసీమ ప్రాజెక్ట్‌ పేరుతో ఎంత దోచుకున్నారన్నది బీజేపీ నాయకులు లెక్క లతో సహా చెబుతున్నారు. ఈ ప్రభుత్వంలో పోలవరం పెద్ద స్కాం. 16వేల కోట్ల అంచనాలను ప్రభుత్వం 58వేల కోట్లకు తీసుకుపోయింది. ఈ ప్రాజెక్ట్‌ నిర్మాణానికి వేసిన అంచనాలను చూస్తే కళ్ళు బైర్లు కమ్మక తప్పదు. ఈ ప్రభుత్వంలో అతిపెద్ద బూటకం అమరావతి రాజధాని. మూడు పైర్లు పండే 35వేల ఎకరాల మాగాణి పొలాలను రాజధాని కోసం తీసుకున్నారు. నాలుగేళ్ళుగా విదేశీయాత్రలు, గ్రాఫిక్‌ డిజైన్‌లు తప్పితే రాజధాని నిర్మాణంలో అడుగు ముందుకు పడింది లేదు. 700 కోట్లు పెట్టి తాత్కాలిక భవనాలను కట్టు కున్నారు. అది కూడా చదరపు అడుగు 8వేల రూపాయల ఖర్చుతో! ప్రపంచంలోనే ఇంత రేటు ఎక్కడా ఉండదేమో! రాజధాని నిర్మాణానికంటూ కేంద్రం ఇచ్చిన నిధులను దారి మళ్ళించారు. కట్టని భవనాలను కట్టినట్లుగా యూసీలు పంపారు. రాజ్యాంగ విలువలను తుంగలో తొక్కి ప్రతిపక్ష పార్టీ ఎంపీలను, ఎమ్మెల్యేలను కొన్నారు. ఓటు నోటు కేసు ఎలాగూ పెండింగ్‌లో ఉంది.

ఇక నోట్ల రద్దు తర్వాత అన్ని రాష్ట్రాల కంటే కరెన్సీ మన రాష్ట్రానికే ఎక్కువుగా వచ్చింది. అయితే ఇప్పటికీ ఏ రాష్ట్రంలో లేని విధంగా మన రాష్ట్రంలోనే కరెన్సీ కొరత ఏర్పడుతోంది. వచ్చే ఎన్నికల కోసం తెలుగుదేశం నాయకులే కరెన్సీని డంప్‌ చేస్తున్నారనే సమాచారం కేంద్రం వద్ద వుంది. టీటీడీ బోర్డు మెంబర్‌ శేఖర్‌రెడ్డి ఇంట్లో భారీ ఎత్తున కరెన్సీ కట్టలు దొర కడం తెలిసిందే! ఆయన ఇంటికి కరెన్సీ కట్టలు తరలిపోవడం వెనుక తెలుగుదేశం పెద్దల సహకారం వుందనేదానిపై కూడా అనుమానాలున్నాయి. ఈ నాలుగేళ్ళలో ఇవే కాదు, ఇంకా అనేక లొసుగులున్నాయి. ఇటీవల కాగ్‌ రిపోర్ట్‌ కూడా ఏపి ప్రభుత్వ లెక్కలను కడిగిపెట్టింది. ఇక అవినీతిలోనూ ప్రతి ఏటా రాష్ట్రం అగ్రస్థానంలో నిలుస్తూ వస్తోంది. వీటిలో దేనిమీద విచారణకు ఆదేశించినా చంద్రబాబుకు సమస్యలు మొదలవడం ఖాయం.

ప్రభుత్వంతో ఏ సంబంధం లేక పోయినా, అధికారికంగా ఏ పదవీ లేకున్నా జగన్‌ మీద అక్రమ ఆస్తుల కేసులు బనా యించి 16నెలలు జైలులో వుంచారు. ఈ నాలుగేళ్ళ తెలుగుదేశం ప్రభుత్వ పాలనపై ఎటువంటి విచారణకు ఆదేశిరచినా చంద్రబాబు ఎక్కడోచోట అధికారికంగానే దొరుకుతాడనే చర్చ జరుగుతోంది. కాబట్టే ఆయన భయపడుతున్నాడని సమాచారం.

కర్నాటకలో గెలిచినా ఓడినా బీజేపీ వాళ్ళు ఏపిలో తమ ఆపరేషన్‌ను ప్రారం భించడం ఖాయం. మొదటిది చంద్రబాబు అక్రమాలపై విచారణ జరిపించి వాటి నిగ్గు తేల్చి ప్రజల ముందు పెట్టడం, ప్రజల్లో చంద్రబాబును అవినీతి నాయ కుడిగా చూపించడం.. ఇక రెండోది ఏపి ప్రజల్లో బీజేపీపై వున్న వ్యతిరేకతను తొలగించుకోవడం, దీనికి ప్రధానమార్గం రాష్ట్రానికి ప్రత్యేకహోదా ప్రకటించడం. కర్నాటక ఎన్నికల కోసమే ఇంతకాలం ఏపికి కేంద్రం ప్రత్యేకహోదాను ప్రకటించ లేకపోయిందని తెలుస్తోంది. ఏపికి ప్రత్యేక హోదా ఇస్తే ఆ ప్రభావం కర్నాటక మీద పడుతుంది. కర్నాటకలో పెట్టాల్సిన పెట్టు బడులు ఏపికి తరలివచ్చే అవకాశం వుంది. కర్నాటకలో కాంగ్రెస్‌కు ఇది కలిసిరావచ్చు. బీజేపీకి అక్కడ అధికారం లోకి రావడానికి అవకాశాలున్నాయి. కాబట్టే కర్నాటక ఎన్నికల వరకు ఏపికి కఠినంగానే మొండిచేయి చూపిస్తూ వచ్చింది. కర్నాటక ఎన్నికల తర్వాత ఆ పార్టీ ఏపికి ప్రత్యేక హోదా ప్రకటించవచ్చు. 2019 ఎన్నికల్లో బీజేపీకి ఈ రాష్ట్రంలో సీట్లు, ఓట్లు రాకపోయినా తెలుగుదేశం అధికారంలోకి రాకూడదన్నది టార్గెట్‌. ఆ ఎన్నికల్లో టీడీపీ ఓడిపోతే ఆ స్థానంలోకి బీజేపీ రావచ్చు. భవిష్యత్‌లో బలపడ వచ్చు. ఈ దిశగానే బీజేపీ ఏపి ఆపరేషన్‌ ఉండబోతున్నట్లు సమాచారం.

shakeమనం భారతదేశంలో వున్నామా? పాకిస్తాన్‌లో వున్నామా? నరేంద్ర మోడీ మన దేశానికి ప్రధాన మంత్రా? పాకిస్థాన్‌ ప్రధాన మంత్రా? ఆయనేమన్నా భారతీయులకు ఆగర్భశత్రువా? మన దేశాన్ని దోచుకోవడానికి వచ్చిన గజనీమహ్మద్‌ లాంటివాడా? మన దేశంలో బాంబులు పేల్చిన దావూద్‌ ఇబ్రహీం, కసబ్‌ లాంటి ఉగ్రవాదా? ఒక రాజ్యసభ సభ్యుడు ఆయనకు నమస్కారం చేస్తే తప్పవుతుందా?

నమస్కారం పెట్టినందుకే ఇంత రాద్ధాంతమా? ప్రధానికి దేశంలో ఇంకెవరూ నమస్కా రాలు పెట్టరా? ఆయనకు తెలుగుదేశం నాయకులు పెట్టేది మాత్రమే నమస్కారమా? వైకాపా నాయకులు పెడితే తెలుగు జాతి ఆత్మగౌరవాన్ని తాకట్టుపెట్టడమా?

పార్లమెంటు సమావేశాల సందర్భంగా చోటుచేసుకున్న సంఘటన రాష్ట్ర రాజకీయాల్లో వివాదాస్పదమైంది. పార్లమెంటులో వున్న ప్రధానికి ఎంపీలందరూ అభివాదం చేస్తున్నారు. ఎవరు ఏ పార్టీ వారైనా ప్రధాని స్థాయి నాయకుడికి అభివాదం చేయడం, ఆయన ప్రతి నమస్కారం చేయడం భారతీయ సంస్కారంలో భాగం. ఏ తల మాసినోడు కూడా ఈ సంస్కారాన్ని తప్పుపట్టడు. కాని పార్లమెంటులో ప్రధాని నరేంద్రమోడీని వైకాపా ఎంపీ విజయసాయిరెడ్డి నమస్కరించడాన్ని తెలుగుదేశం నాయకులు పెద్ద రచ్చ చేసారు. ప్రధాని కాళ్ళకు ఆయన పాదాభివందనం చేసాడని, తెలుగుప్రజల ఆత్మగౌరవాన్ని తాకట్టుపెట్టాడని ప్రచారం గుప్పించారు. పచ్చమీడియా సంగతి ఇక చెప్పనవసరం లేదు. ప్రధానికి విజయసాయిరెడ్డి పాదాభివందనం చేసాడా లేదా అనే విషయం పక్కన పెడదాం! ఒక వేళ పాదాభివందనం చేసినా అది తప్పవుతుందా? వయసులో తనకన్నా పెద్దవారికి పాదాభివందనం చేయడం మన సంస్కృతిలో తప్పెలా అవుతుంది. మరి ఇన్నేళ్ళ రాజకీయ చరిత్రలో తెలుగుదేశం నాయకులు ఎవరికీ పాదాభివందనాలు చేయలేదా? గతంలో వాజ్‌పేయి ప్రధానిగా వున్నప్పుడు అనేక సభలలో 'క్యూ'కట్టి ఆయనకు పాదాభివందనం చేసిన సంగతిని తెలుగుదేశం నాయకులు మరిచారా? ఒక వాజ్‌పేయి ఏంటి, ఎంతో మంది సీనియర్‌ నాయకుల కాళ్ళు వీళ్ళు పట్టుకోలేదా? పెద్దలకు పాదాభివందనం చేయడం తప్పు కాదు. కాళ్ళు పట్టుకున్నట్లు నటిస్తూ వాటిని లాగడమే తప్పు. తెలుగుదేశం నాయకుల మాదిరిగా విజయసాయిరెడ్డి ఆ పని చేయలేదు.

కేసుల నుండి విముక్తి కావడం కోసమే విజయసాయిరెడ్డి ప్రధాని కాళ్ళు పట్టుకున్నాడని గోల చేస్తున్నారు. అంటే వీళ్ళ మాటలు భారత న్యాయవ్యవస్థనే కించపరిచే విధంగా వున్నాయి. మరి ప్రధాని మోడీ కాళ్ళు పట్టుకోబట్టే 'ఓటు-నోటు' కేసులో చంద్రబాబు ఇంకా జైలుకు పోకుండా వున్నాడా? ఆయన కాళ్ళు పట్టుకునే తనపై వున్న అన్ని కేసుల్లో స్టేలు తెచ్చుకున్నాడా? ఆయన కాళ్ళకు మొక్కే సుజనాచౌదరి బ్యాంకులను ముంచిన కేసుల నుండి తప్పించుకు తిరుగుతున్నాడా? ప్రధాని కాళ్ళు పట్టుకోబట్టే తెలుగుదేశం ఎమ్మెల్యేలు కొందరు రాష్ట్రంలో ఎన్ని దౌర్జన్యాలు చేసినా, ఎంతగా అక్రమా లకు పాల్పడుతున్నా కేసులు నమోదు కావడం లేదా? నరేంద్ర మోడీ ఈ దేశ ప్రధానా? లేక సుప్రీంకోర్టు ప్రధాన న్యాయమూర్తా? కాళ్ళు పట్టుకుంటే కేసులు మాఫీ అయ్యేపనైతే ఎవ్వరూ కోర్టు మెట్లెక్కబల్లేదు... మోడీ కాళ్ళకు మొక్కితే చాలు. సిగ్గు, సంస్కారం వున్న వాళ్లెవరూ భారత ప్రధానికి ఒక వ్యక్తి నమస్కరించడాన్ని రాజకీయం చేయరు? రచ్చ చేయరు? ప్రధాని కాళ్ళకు వాళ్ళు మొక్కితే సంస్కారం, ఇంకొకరు నమస్కరిస్తే అపచారం అన్నట్లుంది ఈ పచ్చ నేతల వ్యవహారం.

Page 1 of 14

newsbottomad

ఎక్కువగా చదివిన వార్తలు

  • ఇప్పుడిప్పుడే పుంజుకుంటున్న రియల్‌
    వై.యస్‌.రాజశేఖరరెడ్డి మరణం తర్వాత నెల్లూరుజిల్లాలో రియల్‌ మార్కెట్‌ పడిపోయింది. ఆ తర్వాత కూడా రియల్‌ రంగానికి అన్నీ ఎదురుదెబ్బలే! వై.యస్‌. మరణంతో జిల్లాలో పారిశ్రామికాభివృద్ధి కుంటుపడడం, ఆ తర్వాత వచ్చిన సీఎంల పాలనలో వేగం లేకపోవడంతో రియల్‌ మార్కెట్‌లో ప్రతిష్టంభన ఏర్పడింది.…
  • మేజర్‌లు... మున్సిపాల్టీలయ్యేనా?
    నెల్లూరుజిల్లాలో కొత్త మున్సిపాల్టీల ఏర్పాటులో కదలిక వచ్చినట్లుగా తెలు స్తోంది. రాష్ట్ర ప్రభుత్వం పట్టణీకరణలో భాగంగా పలు మేజర్‌ పంచాయితీలను మున్సిపాల్టీలుగా మార్పు చేయాలనుకుంది. ఈమేరకు మున్సిపాల్టీలుగా మార్చగల పంచాయితీ పేర్లను ప్రతిపాదించాలని కలెక్టర్లను ఆదేశించడం జరిగింది. నెల్లూరుజిల్లా కలెక్టర్‌ ఛైర్మెన్‌గా…
  • వెంకటగిరి... నా ఊపిరి!
    నెల్లూరుజిల్లా రాజకీయ చరిత్రలో గుర్తుండిపోయే నాయకుడు స్వర్గీయ నేదురుమల్లి జనార్ధన్‌రెడ్డి. ఒకే జెండాను, ఒకే అజెండాను, ఒకే సిద్ధాంతాన్ని, ఒకే రాజకీయ మార్గాన్ని ఎంచుకుంటే సామాన్యులు సైతం అత్యున్నత స్థానాలకు ఎదుగుతారనడానికి రెండు ఉదాహరణలు ఈ జిల్లా నుండే వున్నాయి. తొలినుండి…
  • కృష్ణ పోటెత్తింది
    కడప, కర్నూలు, అనంతపురం, చిత్తూరు, నెల్లూరు, ప్రకాశం, గుంటూరు జిల్లాల్లో వై.యస్‌.జగన్‌ ప్రజాసంకల్ప పాదయాత్రకు విశేషస్పందన లభించింది. ఇది పెద్ద విషయమేమీ కాదు. ఈ జిల్లాల్లో కొన్ని వైకాపాకు కంచుకోటలు కాగా, ఇంకో రెండు జిల్లాల్లోనూ బలంగానే వుంది. కాని, అసలు…
  • వేమాలశెట్టి బావిలో... వేలుపెట్టిన వేమిరెడ్డి పట్టాభి
    నెల్లూరు, దర్గామిట్టలో టీటీడీ కళ్యాణ మండపం ఎదురుగా వున్న వేమాలశెట్టి బావి సత్రం స్థలం మరోసారి వివాదంలో కెక్కింది. మంగళవారం రాత్రి ఈ స్థలంలో మున్సిపల్‌ మంత్రి పి.నారాయణ ముఖ్య అనుచరుడు వేమిరెడ్డి పట్టాభిరామిరెడ్డి ఆధ్వర్యంలో శనీశ్వరుని విగ్రహాన్ని ప్రతిష్టించడం వివాదానికి…

Newsletter