narayanaదేశ భాషలంతు తెలుగు లెస్స... అని శ్రీకృష్ణ దేవరాయలు అంతటివాడు కీర్తించాడు. తెలుగులోని మాధుర్యాన్ని అతను ఆస్వాదించాడు కాబట్టి ఆ భాషలోని గొప్పతనాన్ని గుర్తించి చెప్పాడు. ఆయన తెలుగు భాషను లెస్స అంటే ఈనాటి పాలకులు మాత్రం 'తెలుగు లెస్‌' అంటున్నారు. అమ్మలాంటి కమ్మనైన భాషను 'మమ్మీ' అనే డమ్మీ లాంగ్వేజ్‌ మోజులో పడి నీరు గారుస్తున్నారు.

ఆంగ్లేయుడు ఈ దేశాన్ని వదిలేసినా ఆంగ్లం ఈ దేశాన్ని వదలలేదు. మన జీవనశైలిలో అదొక భాగమైంది. ఆర్ధిక వ్యవస్థలోనూ, పరిపాలనా విభాగంలోనూ ఆ భాష పాత్రే కీలకం! మన జాతీయ భాష హిందీ అయినప్పటికీ, వివిధ రాష్ట్రాల వ్యవహారాల మధ్య ఆంగ్లమే అనుసంధాన భాషగా వుంది.

ఆంగ్లాన్ని అభ్యసించడంలో తప్పు లేదు. ప్రియురాలి మోజులో పడి తల్లిదండ్రులను వదిలేసినట్లుగా, ఇంగ్లీష్‌ చదువుల వ్యామోహంలో మాతృ భాషను మృతభాషగా మార్చాలనుకోవడమే ఆందోళన కలిగించే విషయం. ఇంగ్లీష్‌ భాష కోసం ఏ దేశం కూడా తమ సొంత భాషకు పాడె కట్టలేదు. ఈరోజు అభివృద్ధిలో అమెరికాను తలదన్నేలా ఎదిగిన చైనాలో ఇంగ్లీష్‌కు పెద్దగా ప్రాధాన్యత లేదు. జర్మనీలో జర్మన్‌, రష్యాలో రష్యన్‌, జపాన్‌లో జపనీస్‌ భాషలే కీలకంగా ఉన్నాయి. ఇంగ్లీష్‌ చదువులు లేనంత మాత్రాన అవి అభివృద్ధి చెందలేదా?

సరే, వాటిని తీసేద్దాం. ఈరోజు భారతీయులు ఎక్కువుగా అమెరికా, బ్రిటన్‌, కెనడా వంటి దేశాలలో స్థిరపడుతున్నారు. మల్టీనేషనల్‌, సాఫ్ట్‌వేర్‌ కంపెనీలలో ఇంగ్లీష్‌ తప్పనిసరి అవుతుంది. కాబట్టి ఇంగ్లీష్‌ను చదువుకోవడంలో తప్పు పట్టాల్సిందేమీ లేదు. మరి ఇంగ్లీష్‌ కోసం తెలుగుకు తెగులు పట్టించడం ఎంతవరకు సబబు.

దేశంలో ఆయా రాష్ట్రాలు సైతం విద్యా విధానంలో ఇంగ్లీష్‌ను ప్రోత్సహిస్తూనే తమ మాతృభాషలను అభ్యసించడం తప్పనిసరి చేస్తున్నారు. ఆంధ్రప్రదేశ్‌లో మాత్రమే తెలుగు అంటే చులకనగా మారింది. ప్రజలు సైతం మమ్మీ, డాడీ సంస్కృతికి అలవాటు పడి తమ బిడ్డలకు తెలుగు భాషను నేర్పించడం మరచిపోతున్నారు.

చదువులు కార్పొరేటీకరణ చెందిన ఈ కాలంలో రాష్ట్రంలో ఆంగ్ల భాషే రాజ్యమేలుతోంది. తెలుగు ఎక్కడన్నా కనిపిస్తుందంటే అది మున్సిపల్‌, జడ్పీ, ప్రభుత్వ బళ్లలోనే! ప్రైవేట్‌ స్కూల్స్‌లో తెలుగు మాట్లాడడమే తప్పు అన్నట్లుగా ఉంటుంది. తెలుగు అంతో ఇంతో వినపడేది సర్కార్‌ చదువుల్లోనే! మున్సిపల్‌ మంత్రి కమ్‌ కార్పొరేషన్‌ మంత్రి నారాయణకు తెలుగు కొంచెం కూడా వినపడడం ఇష్టం లేనట్లుగా వుంది. విద్యార్థుల భవిష్యత్‌ మీద ప్రేమో, లేక తన విద్యా సంస్థలను ఇంకా విస్తరించుకోవచ్చునన్న ఆలోచనో గాని మున్సిపల్‌ బళ్లలో కూడా ఇంగ్లీష్‌ మీడియాన్ని అమలు చేయాలని జి.ఓ తెచ్చాడు. ఇది విద్యాసంవత్సరం ప్రారంభం కాదు. అర్థ సంవత్సరం పరీక్షలు జరిగాయి. అన్ని క్లాసులు సగం సిలబస్‌ అయిపోయింది. ఇప్పుడు అర్ధాంతరంగా ఇంగ్లీష్‌ మీడియం అంటే పిల్లలు ఏం కావాలి? ఉన్నఫళంగా వాళ్ళు ఇంగ్లీష్‌లో చదవగలరా? దానికి తగ్గ ఇంగ్లీష్‌ మెటీరియల్‌ వుందా? బోధనా సిబ్బంది అందుకు అనుగుణంగా ఉన్నారా? ఇవేమీ ఆలోచించకుండానే మున్సిపల్‌ స్కూళ్లలో ఇంగ్లీష్‌ మీడియాన్ని రుద్దేయాలనుకున్నాడు. మంత్రిగారి తలతిక్క నిర్ణయాన్ని ఉపాధ్యాయ, విద్యార్థి సంఘాలు తీవ్రంగా ఖండించాయి. చదువులతో వేల కోట్ల వ్యాపారం చేసేవాళ్లకు మాతృభాష విలువ ఏం తెలుస్తుంది మరి!

studentsఫ్లెమింగో ఫెస్టివల్‌ ప్రచారం కోసం ఆదివారం నెల్లూరులో విద్యార్థులతో ర్యాలీ నిర్వహించారు. ఈ ర్యాలీ బాధ్యతను జాయింట్‌ కలెక్టర్‌, నగరపాలక సంస్థ ఇన్‌ఛార్జి కమిషనర్‌ ఇంతియాజ్‌ అహ్మద్‌కు అప్పగించగా, ఆయన ఆ పనిని కార్పొరేషన్‌ మేనేజర్‌ రాజేంద్ర నెత్తిమీద పెట్టాడు. అయితే, ఆదివారం ర్యాలీ ప్రారంభ సమయానికి ఎన్‌సిసి విద్యార్థులు ఓ 50 మంది తప్పితే ఇతర విద్యార్థులు పెద్దగా రాలేదు. ఈ ర్యాలీలో పాల్గొని ఫోటోలకు ఫోజులిద్దామని వచ్చిన మంత్రికి అక్కడ విద్యార్థులు రాకపోవడం చూసి అరికాల్లో మండింది. దాని తర్వాత నారాయణ కాలేజీలో మంత్రి నిర్వహించిన సమావేశానికి జేసి ఇంతియాజ్‌ అహ్మద్‌ రాగా, ర్యాలీకి ఎందుకు విద్యార్థులను తీసుకురాలేకపోయారంటూ మంత్రి ఆయనపై చిర్రుబుర్రులాడారు.

నారాయణ విద్యాసంస్థల్లో వేలాదిమంది విద్యార్థులున్నారు. ఆ స్కూళ్ళకు బస్‌లు కూడా వున్నాయి. ఈ సారి ర్యాలీలకు, సభలకు విద్యార్థులను తీసుకురావాలంటే నారాయణ విద్యాసంస్థల విద్యార్థులనే తీసుకువచ్చేవిధంగా అధికారులు మంత్రితో ఒప్పదం చేసుకోవాలి. అప్పుడు అధికారులకు విద్యార్థులను వెదుక్కునే బాధ్యత తప్పుతుంది. నారాయణ విద్యార్థులేమో ర్యాంకులు తెచ్చుకోవాలి, సర్కారు స్కూళ్ళ విద్యార్థులు మాత్రం ర్యాలీలకు హాజరై చదువులు సంకనాకిపోవాలన్నట్లుగా వుంది మంత్రి వ్యవహారం.

narayanరాష్ట్ర మున్సిపల్‌ మంత్రిగా పి.నారాయణ జిల్లా ప్రజలకు ఏ విధంగానూ ఉపయోగపడడం లేదు సరికదా, ఆయన మూలంగా ప్రత్యక్షంగానో, పరోక్షంగానో కొందరికి అన్యాయం జరిగిపోతుంది.

జిల్లాలో పెద్దనోట్ల రద్దు వ్యవహారం కూడా ఇలాంటిదే! పెద్దనోట్లు రద్దు తర్వాత జిల్లాలోనే కాకుండా ప్రకాశం జిల్లాలోని పలు ప్రాంతాలకు చెందిన వ్యాపారుల వద్ద వున్న బ్లాక్‌మనీనంతా నారాయణ తీసుకున్నాడు. రద్దు నోట్ల ప్రకటన వెలువడగానే వ్యాపారులు రెండో ఆలోచన చేయకుండా నారాయణ ఇంటి ముందు 'క్యూ' కట్టి మరీ డబ్బులిచ్చారు. నేను బాధ్యతగల మంత్రిని, దేశంలో బ్లాక్‌మనీని అదుపు చేయాల్సిన పాలక యంత్రాంగంలో నేనూ ఒక సభ్యుడిని, పెద్దనోట్లు రద్దు చేస్తూ కేంద్రం తీసుకున్న నిర్ణయాన్ని అమలు చేయడంలో నా పాత్ర కూడా వుంది అని నారాయణ భావించలేదు. బ్యాగులు, బస్తాల కొద్ది డబ్బు వచ్చేసరికి నారాయణలో వున్న మంత్రి షేడ్‌ తొలగిపోయింది. అతనిలోని విద్యావ్యాపారి మేల్కొన్నాడు. అందినకాడికి బ్లాక్‌మనీని తీసుకున్నాడు. అతను నల్లధనం తీసుకుంటున్న సంగతి మీడియాలో రాకపోయి వుంటే ఇప్పటికి కూడా నిరభ్యంతరంగా నల్లదనం తీసుకుంటుండేవాళ్లు. నారాయణ వద్దకు మొత్తం ఎంత నల్లధనం వచ్చిందన్న దానిపై కరెక్ట్‌ లెక్కలేదు గాని, వ్యాపారులంతా కూడా తమ వద్దకు వచ్చిన డబ్బును నారాయణకే ఇచ్చారన్నది నిర్వివాదాంశం. నారాయణ గనుకే ఈ బ్లాక్‌మనీని తీసుకోకపోయినట్లైతే చాలామంది రియల్టర్లు కోలుకునేవాళ్లు. వడ్డీ వ్యాపారులందరూ కూడా రియల్టర్ల వద్దవున్న స్థలాలు, భూములను తక్కువ రేటుకు కొనడమో, లేదా తాకట్టు పెట్టుకుని తక్కువ వడ్డీకి అప్పులివ్వడమో చేసుండేవాళ్లు. రియల్టర్లు పెద్దపెద్ద వడ్డీల నుండి బయటపడడానికి తక్కువ రేట్లకే స్థలాలు అమ్ముండేవాళ్లు. కాని నారాయణ వద్ద బ్లాక్‌మనీ అంతా బ్లాక్‌ అవడంతో బయట మార్కెట్‌లో పెద్దనోట్లకు పెద్దఎత్తున డిమాండ్‌ ఏర్పడింది. సామాన్య ప్రజలు కొత్త నోట్లకు అగచాట్లు పడుతుంటే రియల్టర్లు మాత్రం తమ అప్పులు తీర్చుకోవడానికి పాతనోట్లు వున్న నల్లకుబేరులకై అన్వేషిస్తున్నారు.

Page 4 of 17

newsbottomad

ఎక్కువగా చదివిన వార్తలు

  • ప్రశాంతతే.. మా లక్ష్యం!
    సుప్రీంకోర్టు ఆదేశాల మేరకు, నిందితులను ఇక నుండి వీడియో కెమెరాల ముందు ప్రవేశపెట్టబోమని జిల్లా ఎస్పీ పిహెచ్‌డి రామకృష్ణ స్పష్టం చేశారు. మనుబోలు పోలీస్‌స్టేషన్‌ను ఎస్పీ ఈనెల 4న ఆకస్మికంగా తనిఖీ చేశారు. ఈ సందర్భంగా ఆయన విలేకరులతో మాట్లాడుతూ, జిల్లాను…
  • నెల్లూరు పోలీస్‌ కార్యాలయాలకు హైటెక్‌ సొగసులు
    మనం హైదరాబాద్‌కు వెళ్ళినప్పుడు సైబరాబాద్‌ కమిషనరేట్‌, పంజాగుట్ట, జూబ్లీహిల్స్‌ పోలీసుస్టేషన్‌లు చూసినప్పుడు... ఇలాంటి పోలీసుస్టేషన్‌లు మనకు కూడా వస్తే ఎంత బాగుండు అనుకుంటాం... ఎందుకంటే అవి పోలీసుస్టేషన్‌ల మాదిరిగా వుండవు. కార్పొరేట్‌ కంపెనీల ఆఫీసుల్లాగా వుంటాయి. ఈమధ్య ఉత్తమ పోలీసుస్టేషన్‌గా కూడా…
  • రాజకీయ దారులు వేరవుతాయా?
    నెల్లూరుజిల్లా రాజకీయాలంటే అగ్రవర్ణ నాయకులదే పెత్తనం. బెజవాడ, నల్లపరెడ్డి, ఆనం, నేదురుమల్లి, మాగుంట, మేకపాటి వంటి రాజకీయ కుటుంబాలు బలంగా వున్న ఈ జిల్లాలో ఓ దళిత మహిళ 5సార్లు వరుసగా నెల్లూరు లోక్‌సభ టిక్కెట్‌ తెచ్చు కుని అందులో నాలుగుసార్లు…
  • 2019... రేస్‌ గురాల్రు వీళ్ళే!
    ఐదేళ్ళకోసారి ఎన్నికలొస్తుంటాయి. అలాగే ప్రతి ఎన్నికలకు కొందరు కొత్త నాయకులు వస్తుంటారు. కొందరు నాయకులు తెరమరుగవుతుంటారు. ప్రతి ఎలక్షన్‌ ఎంతోకొంతమంది కొత్తవారిని మనకందిస్తూనేవుంటుంది. 2014 ఎలక్షన్‌ ఇలాంటిదే! ఆ ఎన్నికల్లో నెల్లూరు ఎంపీగా గెలిచిన మేకపాటి రాజమోహన్‌రెడ్డి, కోవూరు, వెంకటగిరి ఎమ్మెల్యేలుగా…
  • ఆనంతో... అదనపు బలం!
    మాజీమంత్రి ఆనం రామనారాయణరెడ్డి వైయస్సార్‌ కాంగ్రెస్‌లో చేరడం లాంఛనమే! ఇటీవల శంషాబాద్‌ ఎయిర్‌పోర్టులో వైకాపా అధినేత వై.యస్‌.జగన్మోహన్‌రెడ్డితో ఆయన భేటీ అయ్యాడు. జిల్లా రాజకీయాలపై చర్చించాడు. వైసిపిలో ఏ తేదీన చేరాలనుకునేది ఇక ఆనం రామనారాయణరెడ్డే నిర్ణయించుకోవాల్సి వుంది. ఆనం పార్టీలోకి…

Newsletter