modiభారతదేశ చరిత్ర మారుతోంది... కుటుంబ రాజరిక వ్యవస్థ నుండి సామాన్య జనావళి వైపుకు చరిత్ర మళ్ళుతోంది. ఇంతకాలం సంపన్న కుటుంబాలలో పుట్టిన నాయకుల చరిత్రను, తండ్రి, తాతల వారసత్వంతో రాజకీయాలను శాసించిన నాయకురాళ్ళ చరిత్రను చదువుకున్న భారతం... భారతదేశ ప్రజాస్వామ్య వ్యవస్థలో ఒక ఛాయ్‌వాలా సాధించిన తన అద్భుతాలను చరిత్రగా చదువుకోబోతుంది. ఇది నిజం.

స్వాతంత్య్రానంతరం భారత ప్రజాస్వామ్య దేశంలో మనకు అత్యంత శక్తివంతమైన నాయకులుగా పండిట్‌ జవహర్‌లాల్‌ నెహ్రూ, స్వర్గీయ ఇందిరాగాంధీలు కనిపిస్తారు. భారత రాజకీయ వ్యవస్థలో దేశంలోని అన్ని ప్రాంతాల ప్రజలను ప్రభావితం చేసింది, ప్రభంజ నాలు సృష్టించింది వాళ్ళు మాత్రమే! అయితే వీరికి ఒక బేస్‌మెంట్‌ వుంది. నెహ్రూది సంపన్న కుటుంబం. భారత స్వాతంత్య్ర సంగ్రామానికి ఆర్ధిక తోడ్పాటునందించారు. మహాత్మాగాంధీ పోరాటానికి అండగా నిలిచారు. కాబట్టే స్వాతంత్య్రం వచ్చాక గాంధీజీ కాంగ్రెస్‌పార్టీని, భారతదేశాన్ని నెహ్రూ చేతిలో పెట్టాడు. దాంతోపాటే 'గాంధీ' అన్న బ్రాండ్‌ ఇమేజ్‌ను కూడా నెహ్రూ కుటుంబానికి ధారాదత్తం చేశారు. కాంగ్రెస్సే దేశానికి స్వాతంత్య్రం తెచ్చిందన్న ఓ భావన, అలాగే గాంధీ బ్రాండ్‌ ఇమేజ్‌ నెహ్రూను దేశ రాజకీయాలలో శక్తివంతునిగా నిలిపాయి. ఆయన తర్వాత రాజకీయ వారసురాలిగా వచ్చిన ఇందిరాగాంధీ కూడా అత్యంత శక్తివంతురాలైన నాయకురాలిగా ఎదిగారు. దేశంలోని అన్ని రాష్ట్రాల ప్రజల ఆదరాభిమానాలు పొందారు. అయితే ఇందిరమ్మకు నెహ్రూ రాజకీయ వారసత్వమనే ఒక పునాది వుంది. అందుకు చివరన వున్న 'గాంధీ' అన్న పేరు కూడా వుంది. వీళ్ళిద్దరు కూడా వచ్చిన అవకాశాలను ఉపయోగించుకుని శక్తివంతమైన నేతలు కాగలిగారు. అయితే భారత రాజకీయాలలో అవకాశాలను ఉప యోగించుకుని కాదు, అవకాశాలను సృష్టించుకుని దేశమంతా ప్రభంజనం సృష్టించిన అత్యంత శక్తివంతమైన నాయకుడిగా చరిత్రలో నిలిచిపోతాడు ప్రధాని నరేంద్ర మోడీ! నిజంగా ఆయనొక చరిత్ర. ఆయన రాజకీయ ప్రస్థానం ఓ అద్భుతం. ఆయన వెనుక సంపన్న కుటుంబం లేదు, తల్లిదండ్రులు స్వాతంత్య్ర సమరయోధులు కారు, గాంధీజీ వంటి మార్గదర్శకులు లేరు. అయినా ఈరోజు దేశ రాజకీయాలను శాసిస్తున్నాడు. ఒక సాధారణ మధ్యతరగతి కుటుంబం నుండి వచ్చాడు. ఆయన కుటుంబసభ్యులు ఇప్పటికీ సాదాసీదా పనులే చేసి బ్రతుకుతున్నారు. ఆయనకు బడైనా గుడైనా ఆరెస్సెస్‌ కార్యాలయమే! క్రమశిక్షణతో కష్టపడడం, పోరాడడం, నిజాయితీగా నిలబడడం, సమస్యలను ఎదుర్కోవడం అక్కడ నుండే నేర్చుకున్నాడు. బీజేపీలో ఒక సాధారణ కార్యకర్తగా జీవితాన్ని ప్రారంభించి, ఆ తర్వాత పార్టీలో వివిధ హోదాలలో పని చేశారు. గుజరాత్‌లో కచ్‌, భుజ్‌ ప్రాంతాలలో భూకంపాలు వచ్చినప్పుడు, సంక్షోభంలో వున్న ఆ రాష్ట్రాన్ని ఆదుకోవడానికి బీజేపీ అధిష్టానం ఆయనను ఆ రాష్ట్ర ముఖ్యమంత్రిగా పంపింది.

అంతే... అక్కడ నుండి ఆయన వెనుతిరిగి చూసింది లేదు. ముఖ్యమంత్రిగా తన నాయకత్వంలో మూడుసార్లు గుజరాత్‌లో బీజేపీని గెలిపించాడు. 2014 ఎన్నికల్లో బీజేపీ ప్రధాని అభ్యర్థిగా దేశమంతా తానే అయ్యి ప్రచారం చేశాడు. భారత దేశంలోనే కాదు, ప్రపంచమంతటా కూడా మోడీ మానియాను సృష్టించాడు. 2014 ఎన్నికల్లో మోడీది ప్రభంజనమే! 337 సీట్లతో ఎన్డీఏ అధికారంలోకి వచ్చింది. 1984లో ఇందిరాగాంధీ హత్య తర్వాత వచ్చిన ఎన్నికల్లో ఆమె సానుభూతి పవనాలతో కాంగ్రెస్‌ 400కుపైగా సీట్లు గెలిచింది. అది కేవలం గాలివాటం గెలుపు. కాని 2014లో మాత్రం దేశ ప్రజలు కేవలం మోడీ అనే ఓ శక్తి మీద నమ్మకంతోనే అన్ని సీట్లిచ్చారు.

ఆ ఎన్నికల ద్వారానే మోడీ అంటే ఏమిటో అర్ధమైపోయింది. ఆ తర్వాత ఢిల్లీ, బీహార్‌ ఎన్నికల ద్వారా ఎదురుదెబ్బలు తగిలినా వాటి నుండి తేరుకోవడానికి మోడీకి ఎక్కువ సమయం పట్టలేదు. నిన్నటి ఐదు రాష్ట్రాల ఎన్నికల ఫలితాలే ఇందుకు ఉదా హరణ. ముఖ్యంగా దేశానికి పెద్దదిక్కులాంటి ఉత్తరప్రదేశ్‌లో బీజేపీకి 325సీట్లు వస్తాయని ఆ పార్టీ వాళ్ళే అంచనా వేయలేకపోయారు. యూపీలో ఏ పార్టీకీ మెజార్టీ రాదన్న మీడియా సర్వేలన్నీ కూడా పటాపంచలయ్యాయి. 403 సీట్లున్న యూపీలో 325సీట్లు బీజేపీకి దక్కడం ఒక చరిత్ర. అంతకుముందు నెహ్రూ, ఇందిరల హయాంలోనే కాంగ్రెస్‌కు ఇన్ని సీట్లు వచ్చాయి. అది కూడా అప్పుడు ఉత్తరప్రదేశ్‌ విభజన జరగలేదు. 525 అసెంబ్లీ సీట్లుండేవి. ఆ విజయాలతో పోలిస్తే, నేటి మోడీ విజయం చాలా గొప్పది. ఎందుకంటే ఈ ఎన్నికల్లో ఆయన ప్రభావం స్పష్టంగా కనిపిస్తోంది. పెద్దనోట్లు రద్దు వంటి చారిత్రాత్మక నిర్ణయం తర్వాత జరిగిన ఎన్నికలివి. దేశంలోని మిగతా పక్షాలన్నీ పెద్దనోట్ల రద్దును వ్యతిరేకించాయి. మోడీ చర్యపై విమర్శలు గుప్పించాయి. ప్రజలు కూడా తీవ్రంగా వ్యతిరేకిస్తున్నారని ప్రచారం చేసాయి. కాబట్టి మోడీ నాయకత్వ సమర్ధతకు ఈ ఎన్నికలు ఒక పరీక్షగా నిలిచాయి. ఈ ఎన్నికల్లో బీజేపీ ఓడిపోతే ఆ పార్టీలో మోడీ మీదే వ్యతిరేకత, మోడీ పీఎం సీటుకే ఎసరొచ్చే ప్రమాదం ఉంటుంది. ఇలాంటి ఎన్నికల్లో మోడీ తన సత్తా చాటాడు. ఒక ప్రధానిగా కాదు, పార్టీ ప్రచారక్‌లా పనిచేశారు. యూపీ మొత్తం తానే అన్నట్లు పని చేశాడు. ఓ పక్క మోడీని నిలువరించడానికి సమాజ్‌వాదీ కాంగ్రెస్‌తో జతకట్టింది. ఇంకో పక్క బీఎస్పీ దళిత ఓటు బ్యాంకు ప్రయోగాలు చేసింది. కుల రాజకీయాలకు కేంద్రబిందువైన యూపిలో మిగతా పార్టీలన్నీ కులం కార్డులను బాగానే ప్రయోగించాయి. మోడీ మాత్రం అభివృద్ధి కార్డును ప్రయోగించారు. పరోక్షంగా 'హిందుత్వ'కార్డును కూడా బయటకు తీసారు. దాని ఫలితంగానే యూపీలో చారిత్రాత్మక విజయం సొంతమైంది. ఒక్క యూపీలోనే కాదు, ఉత్తరాఖండ్‌లో అఖండ విజయం కూడా మోడీ ఇమేజ్‌ను పెంచాయి. అదే సమయంలో మణిపూర్‌, గోవాలలో ప్రభుత్వం ఏర్పాటుకు చాలినన్ని సీట్లు లేకున్నా అప్పటికప్పుడు లౌక్యంగా వ్యవహరించి ఇతర పక్షాల మద్దతుతో అక్కడ ప్రభుత్వాలను ఏర్పాటు చేయించిన మోడీ చాణక్యం కూడా ఆయన తిరుగులేని నాయకత్వ పటిమకు నిదర్శనం. కష్టపడి ఎదగాలనుకునే వారికి, నిజాయితీగా వుంటూ దేశ రాజకీయాలను శాసించాలనుకునే వారికి, నిబద్ధతతో వున్నా భారత ప్రజాస్వామ్య వ్యవస్థలో అత్యున్నత స్థానం అందుకోవాలనుకునే వారికి 'మోడీ' చరిత్ర ఒక అధ్యయన గ్రంథమే! ఆచరించదగ్గ మార్గమే!

modiదేశ ప్రధానిగా నరేంద్ర మోడీ వస్తే అద్భుతాలు చోటుచేసుకుంటా యని ప్రజలు ఆశించారు. అందుకే 2014 ఎన్నికల్లో నరేంద్ర మోడీకి జై కొట్టారు. బీజేపీ శ్రేణులు కూడా మోడీ ప్రచార మాయలో పడ్డాయి. బీజేపీని రెండు సీట్ల నుండి రెండొందల సీట్లకు చేర్చిన అగ్రనేత లాల్‌కిషన్‌ అద్వానీని ప్రధాని రేస్‌ నుండి పక్కనపెట్టాయి. అద్వానీ పట్ల దళ్‌(యు) నేత, బీహార్‌ సీఎం నితీష్‌కుమార్‌కున్న గురుభక్తి ఆయన పెంచి పెద్దచేసిన బీజేపీ నేతలకు లేకుండా పోయింది. కొన్ని కార్పొరేట్‌ కంపెనీలు వేలకోట్లు ఖర్చుపెట్టి సృష్టించిన మోడీ మాయా ప్రపంచంలో బీజేపీ పార్టీ చేరి పోయింది. కాబట్టే 2014 ఎన్నికల్లో మోడీ ప్రధాని అభ్యర్థి కాగలిగారు. ఎన్నికల తర్వాత ప్రధాని అయ్యారు. 2014 ఎన్ని కల్లో మోడీ మాయాజాలం లేకున్నా, ఆయనను ప్రధాని అభ్యర్థిగా ప్రకటించకపోయి వున్నా అధికారం ఎన్డీఏదే! కాకపోతే బీజేపీకి ఒక్క దానికే పూర్తి మెజార్టీ వచ్చి ఉండేది కాదు. మోడీ మార్క్‌ వల్ల బీజేపీకి కొన్ని సీట్లు పెరిగాయంతే! యూపిఏను ఇంటికి పంపించాలని దేశ ప్రజలు నిర్ణయించుకున్న తరుణంలో ముం దుగా ప్రధాని అభ్యర్థిని ప్రకటిం చకపోయి వున్నా అధికారం ఎన్డీఏ దేననడంలో ఎలాంటి సందేహం లేదు.

మోడీని ప్రధానిని చేస్తే దేశంలో అద్భుతాలు జరుగుతాయనుకున్నారు. నిజంగానే అద్భుతాలు జరుగుతున్నాయి. పెద్దనోట్ల రద్దు వంటి అద్భుతంతో దేశ ఆర్ధిక వ్యవస్థే తలక్రిందులైంది. ఎన్నో వ్యాపార రంగాలు దెబ్బతిన్నాయి. మరెన్నో పరిశ్రమలు మూతపడుతున్నాయి. ఎన్నో లక్షల మంది ఉద్యోగాలు ఊడుతున్నాయి. ఈ అద్భుతాలు చూడడానికేనా ఆయనను ప్రధానిని చేసింది.

పెద్దనోట్ల రద్దు తర్వాత దేశాన్ని స్వర్గధామంలా మారుస్తామని మోడీ చెప్పారు. మోడీ మాటను నమ్మి ప్రజలు నగదు కష్టాలను భరించారు. జనవరి 1వ తేదీన ప్రజలకు ప్రధాని కొత్త సంవత్సర కానుక ఇవ్వబోతున్నారంటూ కేంద్రమంత్రి వెంకయ్యనాయుడు ఊరించారు. తీరాచూస్తే ఆరోజు తుస్‌మనిపించారు. కనీసం ఈ ఏడాది వార్షిక బడ్జెట్‌లోనైనా పెద్దనోట్ల రద్దుతో స్థంభించిపోయిన ఆర్ధిక వ్యవస్థను తట్టి లేపుతారనుకుంటే, ఆ ఆశ కూడా లేకుండా పోయింది. 1వ తేదీ పార్లమెంట్‌లో కేంద్ర ఆర్ధికమంత్రి అరుణ్‌జైట్లీ వ్రేశపెట్టిన వార్షిక బడ్జెట్‌ పూర్తి నిరాశాజనకంగా వుంది. ఈ బడ్జెట్‌లో ఆదాయపన్ను పరిమితులు, మినహాయింపులు, తగ్గింపులను ప్రజలు ఆశించారు. అలాగే గృహనిర్మాణ వడ్డీ రేట్లు తగ్గుతాయనుకున్నారు. రియల్‌ ఎస్టేట్‌ రంగానికి ఊతమిచ్చే స్టీలు, సిమెంట్‌ ధరలు తగ్గుతాయని ఆశించారు. కాని వీటిలో ఏ ఒక్కటీ నెరవేరలేదు. పెద్దనోట్ల రద్దు తర్వాత దెబ్బతిన్న ఏ వ్యవస్థల్లోనూ తిరిగి ఉత్సాహాన్నిచ్చే రీతిలో ఈ బడ్జెట్‌ లేదు. ఇక ఆంధ్రప్రదేశ్‌ విషయానికొస్తే విభజన సమయంలో యూపిఏ ప్రభుత్వం చేసిన ద్రోహం కంటే కూడా నేటి ఎన్డీఏ ప్రభుత్వం చేస్తున్న మోసమే చరిత్రలో నిలిచిపోయేటట్లుంది. రాష్ట్ర ప్రజలు కూడా కాంగ్రెస్‌తో పాటు ఆ పార్టీ చేసిన ద్రోహాన్ని మరచిపోయారు. ఇప్పుడు కేంద్రంలోని ఎన్డీఏ చేస్తున్న ద్రోహమే రాష్ట్ర ప్రజల మనసుల్లో నిలిచిపోతుంది. ఏపికి ప్రత్యేకహోదా లేదు, విశాఖకు రైల్వేజోన్‌ లేదు, పోలవరంకు ప్రత్యేక కేటాయింపులు లేవు, దుగరాజపట్నం, రామాయపట్నం పోర్టుల ఊసే లేదు. ఇక కేంద్రం ఏ విధంగా ఏపిని ఆదుకున్నట్లు? మోడీ బదులు అద్వానీ లాంటి జాతీయ దృక్పథం వున్న నేత ప్రధాని అయ్యుంటే ఏపికి ఈ పరిస్థితి దాపురించేదా? అన్యాయమైన రాష్ట్ర విభజనను ఆరోజే పార్లమెంటులో వ్యతిరేకించాడాయన! బీజేపీ వాళ్లంతా ఆరోజు ఆ పెద్దాయన మాటలు వినుంటే ఈరోజు ఏపికి ఈ గతి పట్టి ఉండేది కాదు. మన రాష్ట్రానికే చెందిన వెంకయ్యనాయుడు లాంటి నేతలు కూడా అద్వానీ మాటలను చెవికెక్కించుకోలేదు. ఏకపక్షంగా విభజన బిల్లుకు ఆమోదం తెలిపి అన్యాయం చేశారు. ఇప్పుడు విభజన బిల్లులోని అంశాలను అమలు చేయకుండా ఇంకోసారి ద్రోహం చేస్తున్నారు. దేశం గురించి, దేశంలోని ప్రతి రాష్ట్ర ప్రజల మనోభావాలు, ఆలోచనలు, ఆర్ధిక స్థితిగతులు తెలిసిన అద్వానీయే ప్రధాని అయ్యుంటే పెద్దనోట్ల రద్దు వంటి చర్యలుండేవి కావు. ఇలాంటి నిస్సారమైన బడ్జెట్‌లు ఉండేవి కావు. ఏపికి ఇంత అన్యాయం జరిగేదే కాదు. మోడీ మోడీ అని నెత్తికెక్కించుకున్నదానికి దేశ ప్రజలకు తగిన శాస్తే జరుగుతోంది!

modiఐదు రాష్ట్రాల అసెంబ్లీ ఎన్నికల సమరానికి ఎన్నికల కమిషన్‌ పచ్చజెండా ఊపింది. ఫిబ్రవరి 4వ తేదీ తొలిదశ పోలింగ్‌తో మొదలయ్యే ఈ సంగ్రామం మార్చి 11వ తేదీ ఓట్ల లెక్కింపుతో ముగుస్తుంది. ఉత్తరప్రదేశ్‌(403), పంజాబ్‌(117), ఉత్తరాఖండ్‌(70), మణిపూర్‌(60), గోవా(40)... మొత్తం 5 రాష్ట్రాల ఎన్నికల్లో ఆయా పార్టీలు తమ భవిష్యత్‌ను తేల్చుకోబోతున్నాయి.

సాధారణంగా పార్లమెంట్‌ ఎన్నికలకు ముందొచ్చే ఇలాంటి అసెంబ్లీ ఎన్నికలను ఆయా ప్రభుత్వాలు లేదా పార్టీల పనితీరుకు రెఫరెండంగా భావిస్తుంటారు. వీటినే సెమీఫైనల్స్‌ అని కూడా అంటుంటారు. అయితే ఈసారి జరిగే ఈ ఐదు రాష్ట్రాల ఎన్నికలకు ఓ ప్రత్యేకత వుంది. పలు పార్టీలకు ఇవి సెమీఫైనల్సే కావచ్చునేమో... ప్రధాని నరేంద్ర మోడీకి మాత్రం ఇవి ఫైనల్స్‌ లాంటివే!

దేశంలో పెద్దనోట్ల రద్దు తర్వాత, పాక్‌ పై సర్జికల్‌ దాడుల తర్వాత జరుగుతున్న ఎన్నికలివి. పెద్దనోట్ల రద్దు, సర్జికల్‌ దాడుల విషయంలో ప్రభుత్వం కంటే కూడా ప్రధాని నరేంద్రమోడీ ఎక్కువ ఫోకస్‌ అయ్యారు. ఆయన వ్యక్తిగత నిర్ణయాలుగానే ఇవి ప్రచారంలోకి వచ్చాయి. సర్జికల్‌ దాడులను ప్రజలు ఆమోదిస్తారు. కాని పెద్దనోట్ల రద్దును స్వాగతించారా? దీనికి కొల మానమే ఈ ఎన్నికలు. పెద్దనోట్ల రద్దు దేశ ఆర్ధిక వ్యవస్థపై తీవ్ర ప్రభావం చూపింది. దేశంలో ఎక్కువ శాతంమంది ప్రజలు ఎంతో కొంత ఇబ్బందికి గుర య్యారు. ఈ ఇబ్బందులను అధిగమిస్తే అవినీతి, నల్లధనం లేని స్వచ్ఛభారత్‌ను నిర్మించవచ్చంటూ ప్రధాని నమ్మకంగా చెబుతూ వచ్చారు. మరి ఆయన మాటలను ప్రజలు ఎంతగా విశ్వసించారన్నది ఈ ఎన్నికల్లో తేలబోతోంది.

సాధారణంగా ఏ రాష్ట్ర అసెంబ్లీ ఎన్నికల్లోనైనా అక్కడి స్థానిక సమస్యలే ప్రభావం చూపాలి. ఫలితాలు కూడా ఆ రాష్ట్రంలో వున్న ప్రభుత్వానికి అనుకూలంగానో లేక వ్యతిరేకంగానో ఉండాలి. లోక్‌సభ ఎన్నికల ప్రాధాన్యత వేరు. అసెంబ్లీ ఎన్నికల ప్రాధాన్యత వేరుగా ఉంటుంది. 2014 లోక్‌సభ ఎన్నికల్లో బీహార్‌లో బీజేపీ అనూహ్యంగా దాదాపు అన్ని సీట్లను గెలుచుకుంది. అలాగే ఢిల్లీలోనూ 8 లోక్‌సభ స్థానాలలో ఏడింటిని గెలుచుకుంది. అయితే ఆ రాష్ట్రాల అసెంబ్లీ ఎన్నికలకొచ్చేసరికి పరిస్థితి మారిపోయింది. బీహార్‌ అసెంబ్లీలో జెడి(యు) ఆర్జేడీ కూటమి బీజేపీని తుడిచిపెట్టినందుకు కారణం అక్కడ ప్రాంతీయ పరిస్థితులు. అక్కడ ప్రజల్లో నితీష్‌ ప్రభుత్వంపై వ్యతిరేకత లేదు. నితీష్‌కు ప్రజాదరణ వుంది. కాబట్టే మోడీని దేశ ప్రధాని కావాలనుకున్న బీహార్‌ ప్రజలు లోక్‌సభ ఎన్నికల్లో బీజేపీకి ఓటేసారు. ఏడాది తర్వాత తమ ముఖ్యమంత్రిగా నితీష్‌కుమార్‌ ఉండాలని కోరుకున్న ఆ రాష్ట్ర ప్రజలు దళ్‌(యు) కూటమిని గెలిపించారు. ఢిల్లీలోనూ ఇదే సీన్‌. లోక్‌సభ ఎన్నికల్లో మోడీకి జైకొట్టిన ఢిల్లీ వాసులు, అసెంబ్లీ ఎన్నికలొచ్చేసరికి బీజేపీ కంటే ఆప్‌ వైపే మొగ్గు చూపారు.

కాబట్టి రేపు జరగబోయే ఐదు రాష్ట్రాలలో కూడా ఆయా ప్రభుత్వాల పట్ల అనుకూల, లేదా వ్యతిరేకత ప్రభావం చూపవచ్చు. దీంతోపాటు జాతీయ ప్రాధాన్యత అంశమైన నోట్ల రద్దు కూడా ఈ ఎన్నికల ఫలితాలపై ఖచ్చితంగా ప్రభావం చూపుతుంది. కేంద్ర ప్రభుత్వం తీసుకునే నిర్ణయాలు ప్రజలపై పెద్దగా ప్రత్యక్ష ప్రభావం చూపవు. కాని నోట్ల రద్దు ప్రభావం దేశంలో అడుక్కునే వారి దగ్గర నుండి అంబానీ వరకు అందరి మీదా పడింది. ప్రధాని నరేంద్ర మోడీ సైతం పెద్దనోట్ల రద్దును ఈ ఐదు రాష్ట్రాల ఎన్నికల్లో తమ ప్రచారాస్త్రంగానే వాడుకోబోతున్నారు. పెద్దనోట్ల రద్దుతో దేశ ఆర్ధిక వ్యవస్థ కుదేలైందన్న విమర్శలను ఆయన పట్టించుకోవడం లేదు. పేదల కోసమే పెద్దనోట్లు రద్దు చేసామంటూ ప్రజల్లోకి పోతున్నారు. పెద్దనోట్లు రద్దు చేసిన తర్వాత పేద ప్రజలకు ఏ విధంగా మేలు జరిగిందన్నది మాత్రం ప్రధానిగాని, ఆయన మంత్రివర్గ సహచరులుగాని, ఆర్‌బిఐ వాళ్లు గాని ఇంతవరకు వెల్లడించలేదు. తమకు ఏ రూపంలో మేలు జరిగిందో కూడా ఇంతవరకు జనానికి అర్ధం కావడం లేదు. మరి అర్ధంకాని ప్రధాని ప్రచారాన్ని ప్రజలు ఎంతవరకు ఆదరిస్తారు? ఐదు రాష్ట్రాల ఎన్నికల నేపథ్యంలో పేదల కోసం మోడీ ఏదన్నా మ్యాజిక్‌ చేయబోతున్నారా? ప్రస్తుతం ప్రజల ఆశలు కూడా ఈ ఎన్నికల పైనే!

ముఖ్యంగా యూపి ఎన్నికలు కీలకం కానున్నాయి. ఎక్కువ లోక్‌సభ స్థానాలు, ఎక్కువ అసెంబ్లీ స్థానా లతో పాటూ ఎక్కువ జనాభా వున్న రాష్ట్రం ఇది. ప్రస్తుతం బీజేపీకి ఆ రాష్ట్రంలో ప్రతిపక్ష హోదా కూడా లేదు. కాని ప్రభుత్వంపై కన్నేశారు. దీనికోసం ఎప్పటి నుండో వ్యూహరచన చేస్తున్నారు. ప్రభుత్వ వ్యతి రేకతతో పాటు, సమాజ్‌వాదీ పార్టీలో వచ్చిన అంత ర్యుద్ధం బీజేపీకి కలిసొచ్చే అంశాలు. కాబట్టి ఈ రాష్ట్రంలో బీజేపీ అధికారంలోకి వచ్చినా, లేదా పెద్ద పార్టీగా అవతరించినా అది మోడీ ఘనతే అవుతుంది. అలాకాకుండా పార్టీ రెండో స్థానానికో మూడో స్థానంలోకి వెళ్లినా అది పెద్దనోట్ల రద్దు ఎఫెక్టే అవుతుంది.

అలాగే ప్రస్తుతం ఎన్నికలు జరిగే గోవాలో బీజేపీ అధికారంలో వుంది. మణిపూర్‌లో ఇటీవలే కాంగ్రెస్‌ చీలికవర్గంతో బీజేపీ ప్రభుత్వం ఏర్పడింది. పంజాబ్‌లో మిత్రపక్షం శిరోమణి అకాళీదళ్‌తో కలిసి అధికారంలో వుంది. ఉత్తరాఖండ్‌లో మాత్రం కాంగ్రెస్‌ అధికారంలో వుంది. ఈసారి పంజాబ్‌, గోవాలలో బీజేపీ, కాంగ్రెస్‌, ఆప్‌ల మధ్య ముక్కోణపు పోటీ నెలకొంది. ఇది బీజేపీకి ఇబ్బందికర పరిణామమే!

ఉత్తరాఖండ్‌లో ప్రభుత్వ వ్యతిరేకత ఉంది కాబట్టి బీజేపీయే రావచ్చు. ఈ ఐదు రాష్ట్రాల్లో యూపితో పాటు మరో రెండు రాష్ట్రాల్లోనన్నా బీజేపీ జెండా ఎగిరితేనే మోడీ పదవి పదిలం! ఆయన నోట్ల రద్దును ప్రజలు ఆదరించినట్లు! యూపితో పాటు మిగతా రాష్ట్రాలలో బీజేపీ చతికిలబడితే మోడీ కుర్చీ

క్రిందకే నీళ్ళు ఖాయం.

Page 1 of 7

newsbottomad

ఎక్కువగా చదివిన వార్తలు

  • రాజకీయమా? రక్త సంబంధమా?
    నెల్లూరుజిల్లాలో బెజవాడ, మేకపాటి, సోమిరెడ్డి, నల్లపరెడ్డి, నేదురుమల్లి వంటి రాజకీయ కుటుంబాలున్నాయి. అన్ని కుటుంబాలలో కూడా పదవుల వద్దో, ఆస్తుల దగ్గరో మనస్పర్ధలు, విభేదాలు వచ్చాయి. సొంత అన్నదమ్ములే విరోధులుగా మారారు. అయితే ఈ కుటుంబాలన్నింటితో పోలిస్తే ఆనం సోదరుల మధ్యే…
  • పంచాయితీలకు ప్రమోషన్‌!
    జిల్లాలో ఇప్పటికే నెల్లూరు కార్పొరేషన్‌గా ఉండగా గూడూరు, కావలి, వెంకటగిరి, సూళ్లూరుపేట, ఆత్మకూరు, నాయుడుపేటలు మున్సిపాల్టీలుగా ఉన్నాయి. వై.యస్‌. రాజశేఖర్‌రెడ్డి హయాంలోనే సూళ్లూరుపేట, ఆత్మకూరు, నాయుడుపేట మేజర్‌ పంచాయితీలను మున్సిపాల్టీలుగా మార్చడం జరిగింది. కాగా, జిల్లాలో మరో 9 మేజర్‌ పంచాయితీలను…
  • చుక్కలు చూపించిన జగన్‌
    ఉత్తరాన నదీ ప్రవాహం, ఈశాన్యంలో నీళ్ళు వంటి పక్కా వాస్తు చూసి చంద్రబాబు అమరావతి రాజధానిని ఎంపిక చేశారు. ఆయన వాస్తు పిచ్చికి పాత రాజధాని హైదరాబాద్‌లోనే కాదు, అమరావతిలోనూ కొన్ని కోట్లు ఖర్చు పెట్టాల్సి వచ్చింది. ఇన్ని కోట్లు ఖర్చుపెట్టి…
  • ఆనంకు 'హై'షాక్‌
    వందేళ్ళకు పైగా చరిత్ర... లక్షలాది మంది విద్యార్థులను తీర్చిదిద్దిన ఘనత... ఒకే ప్రాంగణంలో ఆరో తరగతి నుండి న్యాయవాద విద్య, పీజీ కోర్సుల వరకు... అతి తక్కువ ఖర్చుతో చదువు పూర్తి చేసుకునే వేదిక... నెల్లూరులోని వి.ఆర్‌. విద్యాసంస్థలు... వాస్తవానికి వెంకటగిరి…
  • నెంబర్‌ గేమ్‌లో నెగ్గేదెవరు?
    బేరాలు... రాయబారాలు... క్యాంపులో మందు కంపు... పెరుగుతున్న ఓటు రేటు... ఎత్తులు... పైఎత్తులు... పార్టీ అధినేతల స్వీయ పర్యవేక్షణ... వ్యూహాలు... ప్రతివ్యూహాలతో 'స్థానిక' ఓటర్లకు గాలాలు... మాకు రెండు చేపలు పడ్డాయంటే, మా వలలో మీవి నాలుగు చేపలు పడ్డాయంటూ పోటాపోటీగా…

Newsletter