pawanనేనెందుకు పార్టీ పెట్టానో నాకే తెలి యదు, నేనెందుకు ప్రచారం చేస్తున్నానో నాకే తెలియదు, ఎన్ని సీట్లకు పోటీ చేయాలో నాకే తెలియదు... అన్నంత అజ్ఞానంలో వున్న హీరో పవర్‌స్టార్‌ పవన్‌ కళ్యాణ్‌, ఒక దశ దిశ నిర్దేశం లేకుండా రాజకీయపార్టీని స్థాపించిన వ్యక్తి. పార్టీని పెట్టి కూడా ఎన్నికల్లో పోటీ చేయని నాయకుడు పవన్‌ కళ్యాణ్‌. ఆయన ఎందుకు పార్టీ పెట్టాడన్నది ఆయనకు తెలియకపోయినా, ఈ నాలుగేళ్ల కాలంలో ఆంధ్రప్రదేశ్‌ ప్రజలకు మాత్రం తెలిసి పోయింది. కేవలం చంద్రబాబు కోసమే ఆయన రాజకీయాలలోకి వచ్చాడు. రాజ కీయ పార్టీ పెట్టాడు. తనకొక సొంత లక్ష్యం అన్నది లేకుండా, కేవలం చంద్రబాబును కాపాడడం కోసం ఆయన అప్పుడప్పుడూ ప్రజల మధ్యకు రావడం, ప్రభుత్వాన్ని వదిలేసి ప్రతిపక్షంపై విమర్శలు చేయడం వంటివి ఆయన మీద జుగుప్సా కలిగేలా చేసాయి. వైయస్సార్‌ కాంగ్రెస్‌పార్టీ వాళ్ళు మొన్నటివరకు పవన్‌ను శత్రువుగా భావించ లేదు. ఆయనపై విమర్శలకు పాల్పడలేదు. కాని పవనే అనవసరంగా వైసిపి కేడర్‌ను రెచ్చగొట్టాడు. దీంతో పవన్‌ - వైసిపిల మధ్య రాజకీయ వైరం సినిమాకు కూడా పాకింది. పవర్‌స్టార్‌ నటించిన 'అజ్ఞాత వాసి' సినిమా ఈనెల 10న విడుదల కావడం తెలిసిందే! పవన్‌ కోసం కృత జ్ఞతగా చంద్రబాబు ప్రభుత్వం ఈ సిని మాను రోజుకు ఏడు షోలు ప్రదర్శించ డానికి అనుమతినిచ్చింది. పవన్‌కు చంద్ర బాబు ఈ విధంగా సహకరించాడు. అదే సమయంలో వైసిపి శ్రేణులు, వై.యస్‌. అభిమానులు అధికారికంగా కాకపోయినా అనధికారికంగా ఈ సినిమాను చూడకూడదని ఎవరిపాటికి వాళ్ళు బహిష్కరించారు. ఈ సినిమాను చూడకూడదనే సంకేతాలు ఒకరి నుండి ఒకరికి బాగానే పాకాయి. చాలామంది పవన్‌ వైఖరికి నిరసనగా ఈ సినిమాకు స్వీయనిషేధం విధించుకున్నారు. వై.యస్‌. అభిమానులైతే ఈ సినిమా అట్టర్‌ ఫ్లాప్‌ కావాలని, హిట్‌ అయితే పవన్‌కు కొమ్ములొస్తాయని భావించారు. ఆశించి నట్లే ఈ సినిమా అట్టర్‌ఫ్లాప్‌ కావడం వైకాపా అభిమానులకు ఎనలేని ఆనందా నిచ్చింది. ఎన్టీఆర్‌ తెలుగుదేశం పార్టీని పెట్టాడు. ప్రభుత్వాన్ని ఏలాడు. రాష్ట్ర రాజకీయ చరిత్రలో ఏరోజూ ప్రజలు గాని, ఆయన రాజకీయ ప్రత్యర్థులు గాని ఆయన కుటుంబసభ్యుల సినిమాలను చూడకుండా వుండాలనుకోలేదు. రాజకీయాలను, కళ లను వేరుగా చూసారు. ఎన్టీఆర్‌కు ఒక క్లారిటీ వుంది. ఆయన లక్ష్యం క్లియర్‌గా వుంది. ఇక్కడ పవన్‌కు అది లేదు. ఎవరి కోసమో పని చేస్తున్నట్లుగా ఆయన వ్యవ హారశైలి ఉంటుండడం వల్లే రాజకీయాల లోనే కాదు, సినిమాలలో కూడా అటూ ఇటూ కాకుండా పోతున్నాడు.

pavanజీవితంలో కొందరు వ్యక్తుల వల్ల మనకు తెలియకుండానే కొన్ని సంఘటనలు జరిగిపోతుంటాయి. అవి మంచిగా ఉండొచ్చు... చెడుగా కూడా ఉండొచ్చు. 'నువ్వు నాకు నచ్చావ్‌' అనే సినిమాలో బ్రహ్మానందం తీసిన ఫోటో వల్ల హీరో వెంకటేష్‌, హీరోయిన్‌ ఆర్తిఅగర్వాల్‌లకు క్లైమాక్స్‌లో పెళ్లి సెట్‌ అవుతుంది. అంటే తన ప్రమేయం లేకుండానే బ్రహ్మానందం వాళ్ళిద్దరికీ పెళ్లి ఫిక్స్‌ చేసాడు.

ఇలాంటివి నిజజీవితంలోనూ చాలా జరుగుతుంటాయి. ముఖ్యమంత్రి చంద్రబాబునాయుడు తన ఇంట్లో ఇద్దరి ఫోటోలను పెట్టుకుని పూజించుకోవచ్చు. వారిలో మొదటి వ్యక్తి లక్ష్మీపార్వతి అయితే, రెండో వ్యక్తి పవర్‌ స్టార్‌ పవన్‌ కళ్యాణ్‌. లక్ష్మీపార్వతిని ఎన్టీఆర్‌ పెళ్ళి చేసుకోకపోయి వుంటే 1995 ఆగష్టు సంక్షోభం ఉండేదికాదు. చంద్రబాబు సీఎం అయ్యుండేవాడు కాదు. తాను

ఉన్నంత వరకు ఎన్టీఆరే పదవిలో ఉండేవారు. ఆయన తర్వాత పార్టీ ఎలా వుండేదో, ఎన్ని చీలికలై వుండేదో చెప్పే పరిస్థితి లేదు. కాని, లక్ష్మీపార్వతి మూలంగా ఆ టైంలో పార్టీ తన చేతుల్లోకి రాబట్టి చంద్రబాబు స్ట్రాంగ్‌గా నిలబడ్డాడు.

అలాగే చంద్రబాబుకు లక్ష్మీపార్వతి లాగే తోడ్పాటునందించన వ్యక్తి పవన్‌కళ్యాణ్‌. 2014 ఎన్నికలు చంద్రబాబు రాజకీయ జీవితానికి ఫైనల్స్‌ లాంటివి. అప్పటికే పదేళ్ళ నుండి అధికారానికి దూరంగా వున్నాడు. ఆ ఎలక్షన్‌లో కూడా ఓడిపోయివుంటే పరిస్థితి ఇంకా దారుణంగా వుండేది. చంద్రబాబు సెకండ్‌ ఇన్నింగ్స్‌లో పవన్‌ తన అమూల్యమైన సహకారం అందించాడు. ఆయన సహకారంతోనే 2014 ఎన్నికల్లో గెలవగలిగాడు.

చంద్రబాబు అమ్ములపొదిలో వున్న ఆయుధం పవన్‌కళ్యాణ్‌. వచ్చే ఎన్నికల్లో ఆ అస్త్రాన్ని ఎలా వాడుకోవాలన్నదే చంద్రబాబు ముందున్న ప్రశ్న! రాష్ట్రంలో కాపులు బలంగా వున్న చోటల్లా జనసేన అభ్యర్థులను నిలబెట్టాలని, తద్వారా వైకాపాకు ఓట్లు పోకుండా చూడాలని నిన్నటి వరకు ప్లాన్‌. టీడీపీ, బీజేపీ కలిసి పోటీ చేస్తాయి కాబట్టి ఈసారి జనసేన వాటితో కలవదు. కాపుల ఓట్లున్న చోటే జనసేన పోటీ చేయాలి. వైసిపి ఓట్లను దారి మళ్లించాలి.

అయితే విడిగా పోటీ చేస్తే పవన్‌ ప్రభావం ఎంత వరకుంటుందనే సందేహం కూడా వుంది. పవన్‌ అభిమానులు వేరు, ఆయన సామాజికవర్గం వేరు. పవన్‌ ఏ పార్టీకి మద్దతిచ్చినా లేదా సొంతంగా పోటీ చేసినా అభిమానులు ఆయన బాటలో నడుస్తారు. కాని, కాపులు అలా కాదు. సొంతంగా పోటీ చేస్తే మెజార్టీ ఓటర్లు పవన్‌ వైపే మొగ్గు చూపొచ్చు. అయితే కాపులకు రిజర్వేషన్లను తెరమీదకు తెచ్చిన ప్రస్తుత తరుణంలో ఆ వర్గంవాళ్ళు టీడీపీని పూర్తిస్థాయిలో వ్యతిరేకించే పరిస్థితి లేదు. 2014 ఎన్నికల్లో తెలుగుదేశంతో వెళ్ళిన కాపు సామాజికవర్గం ప్రస్తుతానికి కూడా ఆ పార్టీలోనే వుంది. మొన్న నంద్యాల, కాకినాడ ఎన్నికల ఫలితాలే దీనికి ఉదాహరణ. కాపు రిజ ర్వేషన్‌లని చెప్పి బీసీలలో వ్యతిరేకత తెచ్చుకున్నారు. ఇప్పుడు పవన్‌ కళ్యాణ్‌ చేత విడిగా పోటీ చేయిస్తే పార్టీకి మద్దతునిచ్చిన కాపుల ఓట్లు పోతాయేమోననే భయం తెలుగుదేశంలో వుంది. పవన్‌తో కలిసి పోటీ చేస్తే ఏంటి? లేక ఆయన చేత విడిగా పోటీ చేయిస్తే ఎలా వుంటుందనేదానిపై తెలుగుదేశంలో పరిశీలన జరుగుతోంది. ఏదేమైనా పవన్‌ను మరోసారి చంద్రబాబు ఏ రూపంలో వాడుకోనున్నాడో చూడాలి!

pawanరాష్ట్ర రాజకీయాలలో ఇప్పుడు ఎవరికీ అంతుచిక్కని చిక్కుముడి... పవర్‌స్టార్‌ పవన్‌ కళ్యాణ్‌. సుడిగాలి లాంటోడు. వస్తాడు... క్షణాలలో విధ్వంసం సృష్టిస్తుంటాడు... పోతుంటాడు. గత వారంరోజుల్లో ఇదే జరిగింది. ఎందుకొచ్చాడో, ఎందుకు మాట్లాడాడో, ఎందుకు పోయాడో తెలియనంత వేగంగా రావడం, మాట్లాడడం, పోవడం జరిగాయి.

రాజకీయాల్లోకి వచ్చే వాళ్ళకైనా, రాజకీయ పార్టీలు పెట్టేవాళ్ళకైనా ఒక లక్ష్యం అనేది ఉంటుంది. ఎన్టీఆర్‌ పార్టీ పెట్టినా, చిరంజీవి పార్టీ పెట్టినా, జయప్రకాశ్‌ నారాయణ పార్టీ పెట్టినా, జగన్‌ పార్టీ పెట్టినా అందరి లక్ష్యం అధికారమే! టైంపాస్‌ కోసమో, జీవనోపాధి కోసమో ఎవరూ పార్టీ పెట్టరు. ప్రతి పార్టీ స్థాపన వెనుక ఒక సిద్ధాంతం, అధికారమనే లక్ష్యం ఉంటాయి.

కాని, రాష్ట్ర రాజకీయాలలో ఒక సిద్ధాంతం, ఒక లక్ష్యం అన్నవి లేకుండా ఏర్పడ్డ పార్టీ జనసేన. మెగాస్టార్‌ చిరంజీవి ప్రజారాజ్యం పార్టీని పెట్టాక 2009 ఎన్నికల్లో రాష్ట్రంలోని అన్ని లోక్‌సభ, అసెంబ్లీ స్థానాలలో అభ్యర్థులను పెట్టారు. 2014లో పవన్‌కళ్యాణ్‌ జనసేన పార్టీని పెట్టాడు. ఆ ఏడాది జరిగిన ఎన్నికల్లో బీజేపీ, టీడీపీలతో పొత్తు పెట్టుకున్నాడు. జనసేన తరపున ఒక్క స్థానంలోనూ అభ్యర్థిని నిలబెట్టలేదు. ఈ మాత్రం దానికి పార్టీ పెట్టడమెందుకు? నేరుగా ఆ రెండు పార్టీలకు మద్దతు పలికుంటే పోయేది. పార్టీని ఆవిష్కరించాక కూడా ఎక్కడా పోటీ చేయని పార్టీగా జనసేన రాష్ట్ర రాజకీయ చరిత్ర రికార్డుల్లోకి ఎక్కింది.

సరే, ఆ ఎన్నికల్లో పోటీ అంటే చేయ లేదు. కాని, ఆ తర్వాతన్నా ఒక సిద్ధాంతం మీద, ఒక ఆశయం మీద నిలబడ్డాడా అంటే అదీ లేదు. 2014 ఎన్నికల్లో ఇచ్చిన హామీలను నిలబెట్టుకోకుంటే కేంద్రంలో బీజేపీని, రాష్ట్రంలో టీడీపీని ప్రశ్నిస్తానని ఆరోజు ఘనంగా చెప్పాడు. ఆయన మద్దతు వల్లే రాష్ట్రంలో టీడీపీ అధికారం లోకి రాగలిగింది.

అధికారంలోకి వచ్చాక బీజేపీ ప్రభుత్వం చేసిన మొట్టమొదటి పని ప్రత్యేకహోదాను తుంగలో తొక్కడం. ఈ విషయంలో రాష్ట్ర ప్రభుత్వానిది కూడా తప్పుంది. ప్రత్యేకహోదా కోసం ముఖ్య మంత్రి చంద్రబాబు పట్టుబట్టలేదు. ప్రత్యేక ప్యాకేజీ ఇస్తే చాలని సరిపెట్టుకున్నాడు. ప్రత్యేకహోదా విషయంలో కేంద్రంపై విమర్శలు చేసిన పవన్‌కళ్యాణ్‌, అదే సమయంలో 'ఓటు-నోటు' కేసుకు భయ పడి ప్రత్యేకహోదాపై రాజీపడ్డ చంద్రబాబు వైఖరిని మాత్రం ఆయన ఖండించలేక పోయాడు. ప్రధానంగా రాష్ట్ర రాజకీ యాల్లో పవన్‌కళ్యాణ్‌ ప్రశ్నించాల్సింది, విమర్శించాల్సింది ప్రతిపక్షాన్ని కాదు. ప్రభుత్వంలో వున్న అధికారపక్షాన్ని. తెలుగుదేశం ప్రభుత్వం అన్ని విధాలుగా విఫలమైంది. ఏ వర్గాల ప్రజలు సంతో షంగా లేరు. పవన్‌ ప్రశ్నించడానికి బొచ్చె బోలెడు అంశాలున్నాయి. మూడు పంటలు పండే భూములను లాక్కుని రాజధాని పేరుతో నాటకాలు, పుష్కరాల పేరుతో వేలకోట్ల నిధుల దుర్వినియోగం, పుష్కరఘాట్‌లలో తొక్కిసలాట, మహిళా అధికారి వనజాక్షిని ఎమ్మెల్యే చింతమనేని ప్రభాకర్‌ కొట్టడం, విద్యాసంస్థల్లో విద్యా ర్థుల ఆత్మహత్యలు, ఇసుక మాఫియా, పరిశ్రమల పేరుతో పచ్చటి పొలాల ఆక్ర మణ, చివరకు పోలవరంపై చేతులెత్తే యడం... పవన్‌ తాను గెలిపించిన తెలుగుదేశం ప్రభుత్వాన్ని ప్రశ్నించడానికి ఎన్నో అంశాలున్నాయి. కాని ఏ ఒక్కవాటి జోలికీ ఆయన పోడు.

కేవలం చంద్రబాబు రాజకీయ రక్షణ కోసమే ఆయన ప్రజలలోకి వస్తున్నాడు. చంద్రబాబు సమస్యల్లో పడ్డప్పుడు, చంద్ర బాబు ఆత్మరక్షణలో పడ్డప్పుడు మాత్రమే పవన్‌కళ్యాణ్‌ తెరపైకి వస్తుంటాడు. రాష్ట్రంలో వైకాపా అధినేత జగన్‌ పాద యాత్ర ప్రభంజనం సృష్టిస్తున్న తరుణంలో మళ్ళీ ఒకసారి రాష్ట్ర రాజకీయ తెరపైకి వచ్చాడు. విశాఖ, రాజమండ్రి, ఒంగోలు లలో సదస్సులు పెట్టాడు. చంద్రబాబును ఒక్క ప్రశ్న వేయలేదు. ఏ ఒక్క ప్రభుత్వ వైఫల్యాన్నీ వేలెత్తి చూపలేదు సరికదా, సీఎం కొడుకు సీఎం కావాలనుకోవడం తప్పు... జగన్‌ పై అవినీతి కేసులున్నందు వల్లే నేను మద్దతునివ్వలేదు... అంటూ మాట్లాడాడు. దీనిపై సోషల్‌ మీడియాలో అయితే పవన్‌ను దుమ్ము దులిపి వదిలారు. అన్న యాక్టర్‌ అయితే తమ్ముడు యాక్టర్‌ కావచ్చా? చిరంజీవి లేకుంటే మీరంతా ఎక్కడనుండి వచ్చేవాళ్ళు అంటూ కడిగి పెట్టారు. జగన్‌ అవినీతి పరుడని ఏ కోర్టు చెప్పింది... నిందితుడిని దోషిగా నిర్ధారించ డానికి నువ్వెవరు? ఓటు-నోటు కేసులో పబ్లిక్‌గా దొరికిన చంద్రబాబు చంక నాకుతూ జగన్‌ను వేలెత్తి చూపే అర్హత నీకుందా? అంటూ ఎడాపెడా వాయిం చారు. దాదాపు 10రోజులు పాటు సోషల్‌ మీడియా వేదికగా వైసిపి - జనసేన అభి మానుల మధ్య పెద్ద యుద్ధమే నడిచింది.

రాష్ట్రంలో పవన్‌ కళ్యాణ్‌కు సినిమా పరంగా ఒక ఇమేజ్‌ వుంది. రాజకీయాల జోలికి రాకుంటే ఆ ఇమేజ్‌ అలాగే వుం టుంది. ఒకవేళ పూర్తి స్థాయిలో రాజకీ యాల్లోకి రావాలనుకుంటే ముందు తనకు ఒక క్లారిటీ తెచ్చుకోవాలి. ప్రజల తరపున పోరాడేందుకు సిద్ధం కావాలి. అదేం లేకుండా చంద్రబాబు చొక్కాలో దాక్కుని ఇలా అప్పుడప్పుడూ రాళ్ళు విసురు తుంటే స్టార్‌ ఇమేజ్‌ వున్న పవన్‌కళ్యాణ్‌ అనే హీరో జీరోగా మారడానికి ఇంకెంతో కాలం పట్టదు. ఇక అసలు విషయానికొస్తే పవన్‌ విషయంలో వైసిపి శ్రేణులు ఇంతగా స్పందించాల్సిన అవసరం లేదు. పవన్‌ ఏంటన్నది ప్రజలకే కాదు, ఆయన అభిమా నులకు కూడా అర్ధమైపోయింది. ఆయన అభిమానులు కూడా సగం మంది రాజకీ యంగా ఆయనతో విభేదిస్తున్నారు. ఆయన చంద్రబాబు తోకలా మారాడన్న విషయం లోకజ్ఞానం తెలిసిన అభిమానులకు అర్ధ మవుతుంది. కాబట్టి అభిమానులందరు కూడా కట్టగట్టుకుని ఆయన వెంట రాజ కీయ ప్రయాణం చేసే అవకాశం లేదు. పవన్‌ అనే వ్యక్తి అప్పుడప్పుడూ వస్తుం టాడు... ఏదో ఒకటి మాట్లాడేసి పోతుం టాడు. ఆయన మాటలను వైసిపి శ్రేణులు సీరియస్‌గా తీసుకుంటే అది చంద్రబాబుకే లాభం. ఆయనకు కావాల్సింది కూడా వైసిపితో పవన్‌ అభిమానులు కలవకుండా చేయడమే! పవన్‌పైకి వైసిపి నేతలను రెచ్చగొట్టేలా చేసి ఆ పార్టీకి కాపులను దూరం చేయడమే!

పవన్‌ను చంద్రబాబు 'దూకుడు' సినిమాలో బ్రహ్మానందాన్ని మహేష్‌బాబు వాడుకున్నట్లుగా వాడుకుంటున్నాడు. ఈ విషయం పవన్‌కు అర్ధం కావడం లేదు. అర్ధమయ్యేసరికి పవర్‌స్టార్‌ పవర్‌లెస్‌ స్టార్‌గా మిగిలిపోతాడు.

Page 1 of 9

newsbottomad

ఎక్కువగా చదివిన వార్తలు

  • దండగ... పండగ...
    పర్యాటక అభివృద్ధి అంటే సంవత్సరంలో 365రోజులు జరగాల్సిన ప్రక్రియ. దానిని రెండుమూడు రోజులు జాతరగా మార్పు చేయడం సబబు కాదు. మూడురోజుల సంబడం కోసం మూడు కోట్లు తగలెయ్యడం కరెక్ట్‌ కాదు. ఆ నిధులనే పర్యాటక కేంద్రాల అభివృద్ధికి వెచ్చిస్తే సంవత్సరం…
  • సినిమానూ వదలని సెగ
    నేనెందుకు పార్టీ పెట్టానో నాకే తెలి యదు, నేనెందుకు ప్రచారం చేస్తున్నానో నాకే తెలియదు, ఎన్ని సీట్లకు పోటీ చేయాలో నాకే తెలియదు... అన్నంత అజ్ఞానంలో వున్న హీరో పవర్‌స్టార్‌ పవన్‌ కళ్యాణ్‌, ఒక దశ దిశ నిర్దేశం లేకుండా రాజకీయపార్టీని…
  • సమన్వయ లోపం... వైకాపాకు శాపం!
    2014 ఎన్నికల ప్రచారంలో జగన్‌ సభలకు జనం జాతర మాది రిగా వచ్చారు. అంతకుముందు నిర్వహించిన ఓదార్పుయాత్రలకు పోటెత్తినట్లు వచ్చారు. అదే చంద్ర బాబు సభలకు లారీలు, బస్సులు పెట్టి తోలినా జనం రాలేదు. అయినా కూడా ఆ ఎన్నికల్లో చంద్రబాబు…
  • అజీజ్‌ బ్రదర్స్‌పై కేసు
    నెల్లూరు నగరపాలక సంస్థ మేయర్‌ అబ్దుల్‌ అజీజ్‌కు షాక్‌ తగిలింది. ఆయన పైన ఆయన తమ్ముడు, కార్పొరేటర్‌ జలీల్‌ మీద చెన్నైలో చీటింగ్‌ కేసు నమోదైంది. మేయర్‌ అజీజ్‌కు చెందిన స్టార్‌ ఆగ్రో కంపెనీలో వాటా కోసం తాము ఇచ్చిన 42కోట్ల…
  • నెల్లూరుజిల్లా ప్రగతిలో... వై.యస్‌. మార్క్‌ తప్పితే... బాబు బ్రాండ్‌ ఏది?
    మొన్న కోడూరుపాటు జన్మభూమి గ్రామ సభలో ముఖ్యమంత్రి చంద్రబాబునాయుడు మాటలు కోటలు దాటాయి. గాల్లోనే మేడలు కట్టారు. 2019కల్లా దగదర్తి ఎయిర్‌పోర్టును పూర్తి చేస్తామన్నారు. కృష్ణపట్నంపోర్టులో సెజ్‌ను ఏర్పాటు చేసి పారిశ్రామికంగా అభివృద్ధి చేస్తామన్నారు. నెల్లూరు నుండి చెన్నై దాకా ఇండస్ట్రియల్‌…

Newsletter