polavaramపోలవరం జాతీయ ప్రాజెక్టు. దేశంలో 16 జాతీయ ప్రాజెక్టులు ఉంటే ఒక్క పోలవరంలోనే పనులు ఇప్పుడు వేగవంతంగా జరుగుతున్నాయి. ఇక్కడేదో మహత్తరమైన అభివృద్ధి జరిగిపోతోందనే ప్రచారంతో అందరి దృష్టీ దానిమీదే పడి 'దిష్టి' తగిలిందే ఏమో!.. మళ్ళీ ఇప్పుడు లేనిపోని వాదవివాదాలు ప్రారంభమవుతున్నాయి. రాష్ట్రానికి జీవనాడి అయిన పోలవరం ప్రాజెక్టు సత్వరం పూర్తికావాలని అందరూ ఆశిస్తున్న నేపథ్యంలో, ఈ కొత్తగా వచ్చిన ఇబ్బందులు పరిస్థితిని మళ్ళీ మొదటికి తీసుకువస్తాయేమోననే ఆందోళనకు దారితీస్తున్నాయి. ఈ ప్రొజెక్టుకు సంబంధించిన కొత్త టెండర్ల ప్రక్రియను ఆపాలని కేంద్రం తాజాగా ఆదేశించడంతో పోలవరం..మళ్ళీ 'గోల'వరంగా మారిందా అనిపిస్తోంది. వాస్తవానికి ఇప్పుడు పోలవరంలో మిగిలిన పనులు యధాతథంగా సాగుతూనే ఉన్నాయి. అయితే, సంబంధిత కాంట్రాక్టర్‌ సరిగా పనిచేయకపోతే కొంత పని తొలగించి టెండర్లు పిలిచే అధికారం రాష్ట్ర ప్రభుత్వానికి ఉంది. స్పిల్‌వే కాంట్రాక్ట్‌ పని ఇప్పటిదాకా కేవలం 11 శాతమే పూర్తయింది. పూర్తి కావాల్సిన పనులు చాలానే

ఉన్నాయి. ఈ నేపథ్యంలో, ఇప్పుడున్న కాంట్రాక్టర్‌ను తొలగించడం సరికాదని కేంద్రం భావిస్తూ, కొత్త కాంట్రాక్టర్‌ వస్తే అవసరమైన యంత్రసామగ్రి సమీక రించుకోవడానికి చాలా సమయం పడుతుంది కనుక, ఇప్పుడున్న కాంట్రాక్టర్‌ నుంచి కొత్త కాంట్రాక్టర్‌కు అవసరమైన యంత్రపరికరాల సహకారం అవసరం ఉంటుంది కనుక, ఆ మేరకు ఇప్పటి కాంట్రాక్ట్‌ స్పందన ఏమిటో అడిగితే ఇంతవరకు సమాధానం లేదని, ఒకవేళ కొత్త కాంట్రాక్టర్‌కు ప్రాజెక్టు పను లను అప్పగిస్తే వ్యయభారం ఎంత?.. ఎప్పటికి పూర్తి చేస్తారనే వివరాలను అడిగినా పంపలేదని కేంద్రం పేర్కొంటూ వీటినన్నిటినీ పరిష్కరించేదాకా టెండర్ల ప్రక్రియను నిలిపివేయాలని సూచించింది. ఇందులో అందోళన పడాల్సిందేమిటో అర్ధం కాదు.

పోలవరం అత్యంత భారీ ప్రాజెక్టు. వేలకోట్ల రూపాయలతో పని. కేవలం పునరావాసం భారతమే సుమారు 33వేల కోట్లదాకా ఉందంటే ఎంతటి వ్యయభారంతో కూడుకున్న వ్యవహారమో అర్ధమవుతుంది. పోలవరం రాష్ట్రానికి ఒక వరం. రాష్ట్రానికి ప్రాణప్రదమైన ఈ ప్రాజెక్టుకు సంబంధించిన సమస్యలను ఎప్పటికప్పుడు సామరస్యంగా పరిశీలించి కేంద్రంతో సమన్వయం చేసుకుని పరిష్కరించుకోవాలేగానీ లేనిపోని రాద్ధాంతాలకు దిగినందువల్ల ఏమాత్రం ప్రయోజనం ఉండదు.

ముఖ్యమంత్రి వంటివారు లేనిపోని ఉద్వేగాలకు గురైనంత మాత్రాన ఒరిగేదేమీ కూడా ఉండదు. మీదుమిక్కిలి గొడవ పడినందువల్ల అసలు సాధించేదేమీ ఉండదు. నిజానికి ముఖ్యమంత్రి చంద్రబాబు నాయుడు పోలవరంపై తీసుకుంటున్న శ్రద్ధ అభినందించదగినదే కానీ, ప్రతి చిన్న విషయానికీ రాద్ధాంతం చేయడం వల్ల కలిగే ప్రయోజనం కన్నా నష్టమే ఎక్కువగా ఉంటుందన్నది గ్రహించాలి. పోలవరం సాకారం కోసం రాజకీయనేతలందరూ సమిష్టిగా కృషిచేయాలే తప్ప, కేంద్రం పోలవరాన్ని నిలిపేసేందుకు ప్రయత్నిస్తోందన్న భావన కలిగేలా మాట్లాడడం సరికాదు. సంచలనాల కోసమో, రాజకీయ ప్రయోజనాల కోసమో, వ్యక్తిగత ప్రచారాల కోసమో పోలవరాన్ని ఎవరూ వేదిక చేసుకోకూడదు. ఎందుకంటే ఇది వేలాదిమంది అన్నదాతలకు, లక్షలాది మంది ప్రజలకు సంబంధించిన ప్రాజెక్టు.

కేంద్రం ఒకసారి దీనిని జాతీయ ప్రాజెక్టుగా ప్రకటించిన తరువాత, అందుకు అవసరమైన వేలాదికోట్ల నిధులతో ఆ ప్రాజెక్టును పూర్తిచేస్తుందని, ప్రజల ఆశలు, ఆకాంక్షలకు తగ్గట్టుగా ఆ ప్రాజెక్టు త్వరలోనే పూర్తవుతుందని ఆశించవచ్చు. రాజకీయనాయకుల మాటలు వదిలేసి, జలవనరులశాఖ సీనియర్‌ అధికారి ఒకరు ఇటీవల అన్నమాటలను చూడండి. ''పోలవరం వెళ్ళి చూస్తే మన భావమే మారిపోతుంది. అక్కడ ఎంత వేగంగా పనులు సాగుతున్నాయో అర్ధమవు తుంది. ఈ వేగాన్ని ఎలాగే కొనసాగించేందుకు అందరూ సహకరించాలి' అన్నారాయన. వాస్తవం కూడా ఇదే. పోలవరానికి సంబంధించిన సాంకేతిక సమస్యలను సంబంధిత అధికారులు, నాయకులు పరిశీలించి కేంద్రంతో సామరస్యంగా పరిష్కరించు కుంటే అంతా మంచే జరుగుతుంది. ఏవో వివరాలు పంపమన్నంత మాత్రాన నానా ఆగిత్యం చేయడం ఈ దశలోనే కాదు, ఏ దశలోనూ మంచిది కాదు.

అసలే, అడ్డగోలుగా జరిగిన విభజనతో రాష్ట్రం తీవ్రంగా గాయపడింది. ఆ గాయం నుంచి కోలు కునేందుకు ఎన్నేళ్ళు పడుతుందో చెప్పలేం. విభజనతో రాష్ట్రం పరిస్థితి అంతా అస్తవ్యస్తమైపోయింది. చివరికి రాజధాని నగరం కూడా లేక గుండెకాయ లేని మొండెంలా ఆంధ్ర అల్లాడింది. అప్పటి నుంచి రాష్ట్రంలో అనేక అభివృద్ధికర కార్యక్రమాలకు గండి పడింది. పాలనాపరంగా కూడా శతకోటి సమస్యలు. ముఖ్యంగా సాగునీటి కొరతతో రాష్ట్రం అల్లాడుతోంది. సేద్యం పూర్తిగా కుదేలైపోయింది. అలాంటి సమయంలో కేంద్రంలో బిజెపి ప్రభుత్వం ఏర్పడిన తర్వాత కొంతమేరకు ఊరట లభించింది. విభజన గాయంతో

ఉన్న ఆంధ్రప్రదేశ్‌కు ఎంతో స్వాంతన కలిగించే ఈ ప్రాజెక్టుకు కేంద్రం గ్రీన్‌సిగ్నల్‌ ఇచ్చి మేలు చేసింది. ఆ మేరకు పనులు కూడా సాగుతున్నాయి. ఇదంతా శుభపరిణామం. ఈ దశలో పోలవరాన్ని గోలవరంగా చేయడం ఎవరికీ మంచిది కాదు. దేనికైనా తొందరపాటు పనికిరాదు. లేనిపోని విమర్శలు కూడదు. సంయమనం పాటించాలి. ఏదేమైనా సరే, కేంద్రప్రభుత్వం నుంచి ఈ ప్రాజెక్టుకు సంపూర్ణ సహాయ సహకారాలు అందుతాయని, అంతా సవ్యంగా జరిగి..వచ్చే ఏడాది చివరినాటికి పోలవరం ప్రాజెక్టు పూర్తయి మన కళ్ళ ముందు.. ఆ కల సాకారమవుతుందని ఆశిద్దాం!....

polavaramఈ ప్రాజెక్ట్‌ నువ్వే చెయ్యాలి బాబూ అని వాళ్ళు అడగలేదు... ఆ ప్రాజెక్ట్‌ వాళ్ళ బాధ్యత... పూర్తి చేయాల్సింది వాళ్ళు... రాష్ట్ర విభజన చట్టంలో క్లియర్‌గా వుంది. ఈయన తగుదునమ్మా అంటూ వెళ్ళాడు... పోలవరం ప్రాజెక్ట్‌ నిర్మాణ బాధ్యత మేమే తీసుకుంటామన్నాడు. చిక్కిందే తడవుగా వాళ్ళు ఆయన నెత్తిన పెట్టారు. ఈయన నెలకోసారి అంచనాలు పెంచుకుంటూ పోతుంటే వాళ్ళు సంవత్సరానికోసారి కూడా నిధులు ఇవ్వడం లేదు. దీంతో ఈ ప్రాజెక్ట్‌ను నేను చేయలేనంటూ చేతులెత్తేసాడు.

గురువారం అసెంబ్లీ సాక్షిగా పోలవరం ప్రాజెక్ట్‌ను పూర్తి చేయడం తమవల్ల కాదంటూ ముఖ్యమంత్రి చంద్రబాబు ప్రక టించి తన నిస్సహాయతను చాటుకున్నారు. ఉన్న నిధులన్నింటిని పుష్కరాలకి, పండుగలకి, సింగపూర్‌ రాజధాని అని తగలేసిన ఆయన ఆంధ్రప్రదేశ్‌ ప్రజల జీవనాడి అయిన పోలవరంను మాత్రం త్రిశంకుస్వర్గంలో పెట్టాడు.

పోలవరం రాష్ట్ర ప్రజానీకానికి వరమే. కాంగ్రెస్‌ ప్రభుత్వం లోని దివంగత నేత వై.యస్‌.రాజశేఖరరెడ్డి ఈ ప్రాజెక్ట్‌ను ప్రారంభించారు. దీనికి అత్యంత అవసరమైన కాలువల తవ్వకాన్ని ముందుగానే చేయించారు. రెండో టర్మ్‌ కూడా వై.యస్‌. వుం డుంటే పోలవరంకు ఒక రూపం వచ్చివుండేది. ఆయన మర ణంతో ఈ ప్రాజెక్ట్‌ మరుగున పడగా, విభజన సమయంలో మళ్ళీ తెరమీదకొచ్చింది. రాష్ట్ర విభజన హామీలలో పోలవరం ప్రాజెక్ట్‌ ఒకటి. దీనిని పూర్తిచేసే బాధ్యత కేంద్ర ప్రభుత్వానిదే అని విభజన చట్టంలో స్పష్టంగా వుంది. 2014లో అధికారం లోకి వచ్చిన ఎన్డీఏ ప్రభుత్వం ప్రత్యేకహోదాను అటకెక్కించినా పోలవరంను మాత్రం చేస్తామంది. అయితే ప్రత్యేకహోదా వద్దని ప్రత్యేక ప్యాకేజీకి మొగ్గుచూపిన చంద్రబాబు, పోలవరం ప్రాజెక్ట్‌ నిర్మాణ బాధ్యతను కూడా తనకే అప్పగించాలని కేంద్రాన్ని కోరాడు. మా నొప్పి మీరు భరిస్తామంటే మాకేం ఇబ్బందని వాళ్ళు అలాగే ఇచ్చేసారు. పోలవరం ప్రాజెక్ట్‌ ద్వారా భారీ స్థాయిలో ప్రయోజనాలు ఆశించారు. యధేచ్ఛగా అంచనాలు పెంచుకోవచ్చని, అడిగినంత బిల్లులను కేంద్రం పంపిస్తుందని ఆశపడ్డారు. కాని అక్కడ వుండేది మోడీ... ఇసుకలో నూనె పిండే రకం. స్టీలు రేటెంత, సిమెంట్‌ రేటెంత... ఆ ప్రాజెక్ట్‌ కట్టడానికి ఎంత ఖర్చవుతుందన్నది వారికి తెలియకుండా వుం టుందా? ఈ మూడున్నరేళ్లలో పోలవరం అంచనా వ్యయాన్ని 16వేల కోట్ల నుండి 54వేల కోట్లకు తీసుకెళ్లారు. భారీగా అంచనా వ్యయం పెంచడంతో కేంద్రం నిధుల విడుదల విష యంలో ఆచితూచి అడుగులు వేయసాగింది. దీంతో ప్రాజెక్ట్‌ నిర్మాణం ముందుకు మూడడుగులు, వెనుకకు ముప్పై అడుగులు అన్నట్లుగా మారింది. ఈ మూడేళ్లలో కాపర్‌డ్యాం కూడా కాలేదు. 12వేల కోట్లు ఖర్చుపెట్టామని చంద్రబాబు చెబుతున్నాడు. ఇంకా 42వేల కోట్లు కావాలంటున్నాడు. కేంద్రం ఈయన అడిగినన్ని నిధులు ఇవ్వకపోతుండడంతో ఇప్పుడు నేను చేయలేనంటూ చేతులెత్తేసాడు.

పోలవరం విషయంలో బీజేపీ-టీడీపీ నేతల మధ్య మాటల యుద్ధం మొదలైంది. కేంద్రప్రభుత్వం సరిగా డబ్బులివ్వలేదని టీడీపీ నేతలు నిందను బీజేపీపై వేయాలని చూస్తున్నారు. కేంద్రం కడతానన్న ప్రాజెక్టును నువ్వెందుకు ఒప్పుకున్నావంటూ ప్రతిపక్షాలు చంద్రబాబును వాయిస్తున్నాయి. కేంద్రం నుండి వస్తున్న డబ్బులతో వైకాపా ఎమ్మెల్యేలను కొంటున్నావు... ఇక పోలవరం ఎక్కడ పూర్తి చేస్తావని బీజేపీ నాయకులు చంద్ర బాబుపై దాడి చేస్తున్నారు. పోలవరం విషయంలో చంద్రబాబు అనవసర అత్యాశకుపోయి రాష్ట్రానికే చేటుతెచ్చాడు. పోలవరాన్ని ప్రజలకు వరంగా కాకుండా శాపంగా మారుస్తున్నాడు.

newsbottomad

ఎక్కువగా చదివిన వార్తలు

  • నారాయణను వదలని అనిల్‌
    మున్సిపల్‌ మంత్రి నారాయణకు ఎవరితోనూ సమస్యలు లేవు. ప్రతిపక్ష నాయకులు కూడా ఆయనపై పెద్దగా విమర్శలు చేయరు. కాని, నెల్లూరు నగర ఎమ్మెల్యే పి.అనిల్‌కుమార్‌యాదవ్‌ మాత్రం నారాయణకు చుక్కలు చూపిస్తున్నాడు. ఆయనకు కొరుకుడు పడని కొయ్యగా మారాడు. ఈ నాలుగేళ్ళలో మంత్రి…
  • వేసవి సెలవులు... వినోదం కావాలే గాని విషాదం కాదు
    వేసవి సెలవులు వచ్చేస్తున్నాయి. ఇప్పటికే టెన్త్‌, ఇంటర్‌ పరీక్షలు ముగిసాయి. వీళ్ళతో పెద్ద సమస్య లేదు. టెన్త్‌ వ్రాసిన వాళ్ళు ఇంటర్మీ డియట్‌కు, ఇంటర్‌ వ్రాసిన వాళ్ళు ఎంసెట్‌కు ప్రిపేరవడంతోనే సెలవులు దాటిపోతాయి. లోయర్‌ క్లాస్‌లకు ఈ నెలాఖరు నుండే సెలవులు.…
  • ఉదయగిరిలో... 'రెడ్డి' కోసం 'దేశం' అన్వేషణ
    రాజకీయ చైతన్యానికి పేరుపడ్డ నియోజకవర్గంలో రాజకీయ పార్టీలకు గెలుపు పెద్దసవాల్‌! పార్టీ ప్రభంజనాల కంటే పోటీచేసే అభ్యర్థి ప్రభావమే ఇక్కడ ఓటర్లపై బలంగా వుంటుంది. అభ్యర్థి సమర్ధత, వ్యక్తిత్వాన్ని బట్టే ఇక్కడ గెలు పోటములుంటాయి. గత మూడున్నర దశాబ్దాల రాజకీయ చరిత్రను…
  • 'నిప్పో'కు రైట్‌ రైట్‌
    గత కొద్దికాలంగా రాజకీయ నాయకుల నోళ్ళలో నానుతూ రాజకీయ అంశంగా మారిన 'నిప్పో' పరిశ్రమకు సంబంధించిన 13.02 ఎకరాల భూమి కన్వర్షన్‌కు సంబంధించిన అంశం ఎట్టకేలకు నెల్లూరు నగరపాలక సంస్థ ఆమోదం పొందింది. 12వ తేదీ జరిగిన కార్పొరేషన్‌ కౌన్సిల్‌ సమావేశంలో…
  • వైసిపి వైపు నేతల చూపు
    నవ్యాంధ్రలో శరవేగంగా చోటుచేసుకుంటున్న రాజకీయ మార్పు ప్రభావం నెల్లూరుజిల్లాపై కూడా ఎక్కువగానే కనిపిస్తోంది. ఇప్పటివరకు స్తబ్ధుగా వున్న జిల్లా రాజకీయం ఇప్పుడిప్పుడే ఊపందుకుని వేసవి తాపంతో పాటు వేడెక్కుతోంది. జిల్లాలోని పది నియోజకవర్గాలలో వైసిపికి ఇప్పటికే సమన్వయకర్తలున్నారు. వారే రేపు రాబోయే…

Newsletter