vijay saiఆయన్నొక సాధారణ ఆడిటర్‌ అనుకున్నారు... ఆయనకు లెక్కలు తప్ప రాజకీయాల్లో ఎక్కాలు తెలియవనుకున్నారు. ఆయనను రాజ్యసభకు పంపు తుంటే... ఈ ఆడిటర్‌ పార్లమెంటుకు వెళ్ళి ఏం చేస్తాడన్నారు. వై.యస్‌.కుటుంబం పట్ల విశ్వాసం చూపినందుకే రాజ్యసభకు పంపించారన్నారు.

నిజమే... వై.యస్‌. కుటుంబం పట్ల ఆయన చూపి స్తున్నది విశ్వాసం కాదు, అంతకుమించిన ప్రేమ, అభిమానం. అంతటి అభిమానం ఉండబట్టే జగన్‌తో పాటే కేసుల్లో ఇరుక్కున్నాడు. జగన్‌తో పాటే జైలులో గడిపాడు. ఈరోజు జగన్‌ కోసమే ఢిల్లీ రాజకీయాల్లో చక్రం తిప్పుతూ ప్రత్యర్థులను షేక్‌ చేస్తున్నాడు.

ఈరోజు వరకు కూడా రాజ్యసభలో వైయస్సార్‌ కాంగ్రెస్‌కు వున్న ఒకే ఒక సభ్యుడు వి.విజయసాయిరెడ్డి. ఒక్కడైతేనేం వందమందితో సమానం. సభలోని 250 మందికి లెక్కలు చెప్పగల నైజం ఆయనది. పార్లమెంటు సమావేశాలలో తనదైన శైలిలో రాణిస్తున్నాడు. రాజకీయంగా అనుభవం లేకపోయినా, ఎంతో పరిణితి ప్రదర్శిస్తున్నాడు. 2014 ఎన్నికల్లో వైసిపి 8 లోక్‌సభ స్థానాలను గెలిచింది. ఎన్డీఏ కూటమిలో తెలుగుదేశం ఉండడం, కాంగ్రెస్‌ ప్రతిపక్ష హోదా కూడా కోల్పోవడం, బీజేపీ కంటే కాంగ్రెస్సే బద్ధశత్రువు కావడం మూలంగా జాతీయ రాజకీయాల్లో వైసిపి ప్రభావం పెద్దగా లేకుండా పోయింది.

అయితే రాజ్యసభ సభ్యుడిగా విజయసాయిరెడ్డి ఢిల్లీలో ఎప్పుడు అడుగుపెట్టాడో అప్పుడే పొలిటికల్‌ సీన్‌ మారిపోయింది. జాతీయ రాజకీయాల్లోనూ, ఢిల్లీలోనూ వైసిపికి ఒక ట్రాక్‌ ఏర్పడింది. విజయసాయిరెడ్డి పార్లమెంటులో అడుగుపెట్టనంతవరకు జగన్‌ లక్ష కోట్లు తిన్నాడన్న టీడీపీ నేతల వాయిస్సే అక్కడ వినిపిస్తుండేది. కాని, విజయసాయిరెడ్డి ఢిల్లీలో అడుగుపెట్టాక ఏపి నుండి నిజాలు మాత్రమే వెళ్ళసాగాయి. జగన్‌పై పెట్టిన కేసుల్లో దురుద్దేశ్యాన్ని, అధికారంలోకి వచ్చాక తెలుగుదేశం ప్రభుత్వం చేస్తున్న అవినీతిని కేంద్రం దృష్టికి తీసుకెళ్ళడంలో విజయసాయిరెడ్డి శక్తివంచన లేకుండా కృషి చేశాడు. చంద్రబాబు మితిమీరిన అధికార దుర్వినియోగాన్ని దుబారాను కేంద్రం దృష్టికి తీసుకువెళ్ళడం వల్లే కేంద్రం ఈరోజు ఏపికి ఇస్తున్న నిధులపై గట్టిగా లెక్కలు అడుగుతోంది. ఆ లెక్కలు అడగబట్టే తన బొక్కలు బయటపడతాయని చంద్రబాబు ప్రత్యేకహోదా సొడ్డు పెట్టి ఎన్డీఏ నుండి బయటకొచ్చాడు.

ప్రత్యేకహోదా ఉద్యమం విషయంలోనూ జగన్‌కు విజయసాయిరెడ్డి కొండంత అండగా నిలిచాడు. జగన్‌ ప్రజాసంకల్ప పాదయాత్ర ద్వారా రాష్ట్ర పరిధిలు దాటకుండా ఇక్కడే ఉద్యమానికి రూపకల్పన చేస్తుంటే, ఉద్యమ సెగలను పార్లమెంటును తాకేలా చేసింది విజయసాయిరెడ్డే! ప్రత్యేకహోదా ఇవ్వనందుకు నిరసనగా కేంద్రంపై అవిశ్వాస తీర్మానం ప్రవేశపెట్టే అంశంలోను, దానికి అన్ని పక్షాల మద్దతు కూడగట్టడంలోనూ ఆయన చేసిన ప్రయత్నాలు అనిర్వచనీయం. బీజేపీకి అమిత్‌షా, రాంమాధవ్‌, కాంగ్రెస్‌కు అహ్మద్‌పటేల్‌, గులాంనబీ ఆజాద్‌, సమాజ్‌వాదీకి ఒకప్పుడు అమర్‌సింగ్‌ లాంటి నాయకులు ఎలా ఆయువుపట్టుగా వుండేవాళ్ళో, ఇప్పుడు వైసిపికి విజయసాయిరెడ్డి ఆయువుపట్టయ్యాడు. నాడు వై.యస్‌. కుటుంబానికి, నేడు వైయస్సార్‌ కాంగ్రెస్‌ పార్టీకి నమ్మినబంటు అయ్యాడు. తనపై ఉంచిన నమ్మకాన్ని నిలబెట్టుకుంటున్నాడు. తాను కేవలం లెక్కల మాంత్రికుడినే కాదు, రాజకీయ తాంత్రికుడిని కూడా అని రుజువు చేసుకుంటున్నాడు.

cm modiనాలుగేళ్ళ చంద్రబాబు పాలనలోని పాపాలను బీజేపీ బయట పెట్టబోతోందా? బాబు విధానాలలోని వైఫల్యాలను ఎత్తి చూపనుందా? కేంద్రం ఇచ్చిన నిధులకు లెక్కలేవంటూ బొక్కలు వెదకనుందా? ఇది మీ అవినీతి చిట్టా అంటూ చీటీ చించబోతుందా? ఓటు-నోటు కేసును తిరగతోడనుందా? పోలవరం అంచనా వ్యయం పెంపులో బాబు అక్రమాలను ప్రశ్నించబోతుందా? వైరిపక్షాలతో జతకట్టి తెలుగుదేశం పార్టీని కకావికలం చేయనుందా? రాష్ట్ర రాజకీయాలలో ప్రస్తుతం వినిపిస్తున్న ప్రశ్నలివి.

నిజమే ప్రస్తుత రాజకీయ పరిణామాలను చూస్తుంటే త్వరలో వీటిలో కొన్ని ప్రశ్నలకైనా సమాధానాలు లభించే అవకాశాలు లేకపోలేదు.

బీజేపీ అధిష్టానం ఆపరేషన్‌ ఆంధ్రను మొదలుపెట్టింది. ఈ క్రమంలోనే జమ్మూ-కాశ్మీర్‌తో పాటు ఈశాన్య రాష్ట్రాలలో సైతం బీజేపీ జెండాను రెపరెపలాడించిన రాంమాధవ్‌ను ఏపి ఇన్‌ఛార్జ్‌గా నియమించింది. రాంమాధవ్‌ వెనువెంటనే రంగం లోకి దిగడం కూడా జరిగింది. ఏపిలో తెలుగుదేశం అవినీతిపై, చంద్రబాబు పాలనా వైఫల్యాలపై ఎదురుదాడి చేయండంటూ బీజేపీ అధ్యక్షుడు అమిత్‌షా నుండి రాష్ట్ర బీజేపీ నాయకులకు సందేశాలు అందాయి. రాష్ట్రంలో తెలుగుదేశంను దెబ్బకొట్టడమే లక్ష్యంగా బీజేపీ వ్యూహరచన వుండబోతోంది. అయితే రాష్ట్రంలో సొంతంగా అంత సీన్‌ బీజేపీకి లేదు. రాజకీయంగా ఆ పార్టీ చాలా తక్కువుగా వుంది. దీనికితోడు అధికారంలోకి వచ్చాక ప్రత్యేకహోదా ఇవ్వకపోవడంతో రాష్ట్ర ప్రజల్లో ఆ పార్టీపై వ్యతిరేకత పెరిగింది. జిఎస్టీ, నోట్ల రద్దు వంటి అంశాలు ఆ పార్టీపై వ్యతిరేకతను పెంచాయి. ఈ పరిస్థితుల్లో ఒంటరిగా ఆ పార్టీ తెలుగుదేశంను ఏమీ చేయలేదు. ఇందుకోసం ఆ పార్టీ ఎంచుకున్న మార్గం జనసేన. ఇటీవల గుంటూరులో నిర్వహించిన జనసేన పార్టీ ఆవిర్భావ సభలో చంద్రబాబు, లోకేష్‌లపై పవన్‌ కళ్యాణ్‌ చేసిన అవినీతి ఆరోపణలతో తెలుగు దేశం నాయకుల కళ్ళు బైర్లు కమ్మాయి. ఎందుకంటే ఆ ముందు క్షణం వరకు కూడా పవన్‌కళ్యాణ్‌ మా వాడు అనే వాళ్ళను కుంటున్నారు. పవన్‌ ఇచ్చిన ఊహించని షాక్‌తో వాళ్ళకు ఏ విధంగా ముందుకు పోవాలో తెలియలేదు. పవన్‌కళ్యాణ్‌ ఇక మనోడు కాదని, అతను బీజేపీ ట్రాప్‌లో పడ్డాడని వీళ్ళకై వీళ్ళు నిర్ధారించుకున్నాక అనుకూల మీడియా ద్వారా పవన్‌పై ఎదురుదాడి మొదలుపెట్టించారు.

బీజేపీ చర్యలు ఏ విధంగా ఉండబోతాయన్నదానిపైనే చంద్రబాబులో ఆందోళన వుంది. బీజేపీ వైపు నుండి కేవలం రాజకీయ దాడి మాత్రమే వుండదు. ఒక నాయకుడిని టార్గెట్‌ చేస్తే ఎంతలా తొక్కుతున్నాడో ఒక లాలూను, ఒక శశికళను చూస్తే అర్ధమవుతుంది. చంద్రబాబు మీద 'ఓటు-నోటు' కేసుతో పాటు పలు కేసులు కోర్టుల్లో పెండింగ్‌లో వున్నాయి. వీటన్నింటి మీద ఆయన 'స్టే'లు తెచ్చుకుని వున్నాడు. ఈ నాలుగేళ్ళలో 24మంది ఎమ్మెల్యేలను, ముగ్గురు ఎంపీలను వైసిపిలో నుండి లాగాడు. కొన్నాడని చెప్పొచ్చు కూడా! నలుగురు వైసిపి ఎమ్మెల్యేలకు మంత్రి పదవులిచ్చి రాజ్యాంగ విలువలను తుంగలో తొక్కాడు. ఇక పరిపాలనా పరంగా చూస్తే అన్నీ వైఫల్యాలే! అమరావతి రాజధాని అని చెప్పి ఎన్ని దేశాలు తిరిగాడో, ఎన్ని కోట్లు దుబారా చేసాడో లెక్కే లేదు. పోలవరం ప్రాజెక్ట్‌ను నేనే కడతానని చెప్పి 16వేల కోట్ల అంచనా వ్యయాన్ని 56వేల కోట్లకు తీసుకెళ్లాడు. కేంద్రం ఇచ్చిన నిధులను తన ఆర్భాటపు కార్యక్రమాలకు మళ్ళించాడు. కేంద్రం నిధులతో అమలు చేయాల్సిన పథకాలకు తన పేరు పెట్టుకున్నాడు. పుష్కరాలు, తాత్కాలిక ఇరిగేషన్‌ ప్రాజెక్ట్‌ల పేరుతో వేలకోట్ల అవినీతి జరిగింది. వీటన్నింటిలో దేని మీద విచారణ చేయించినా చంద్రబాబుకు ఇబ్బంది తప్పదు.

మరి బీజేపీ వూరుకుంటుందా? వారి ఆలోచనలు వారికున్నాయి. రాష్ట్రంలో పవన్‌తో కలిసి ఆ పార్టీ ఎన్నికలకు వెళ్ళే అవకాశముంది. పవన్‌ ప్రత్యేకహోదా పోరాటాలు చేస్తాడు. కర్నాటకా ఎన్నికల తర్వాత ఏపికి కేంద్రం ప్రత్యేకహోదా ప్రకటించే అవకాశా లున్నాయి. ఎందుకంటే ముందుగా ఏపికి హోదా ఇస్తే కర్నాటకా ఎన్నికల్లో ఆ ప్రభావం బీజేపీపై పడుతుంది. కాబట్టే కర్నాటక ఎన్నికల తర్వాత ఏపి ఎన్నికలకు ముందు హోదా ప్రకటన వుండొచ్చు. జగన్‌, పవన్‌ చేసిన పోరాటాల వల్లే ప్రత్యేకహోదా ఇచ్చా మనే సంకేతాలు రావచ్చు. బీజేపీ వాళ్ళు జగన్‌ జోలికైతే పోరు. ఎందుకంటే అతని మాట మీద నిలబడే నైజం వారికి ఇష్టమే. ఒక్క చంద్రబాబు నైజమే వారికి సరిపడడం లేదు. అందుకే చంద్రబాబును టార్గెట్‌ చేశారు. బీజేపీ వాళ్ళు ఎక్కడ మొదలుపెడతారో, ఎక్కడ నరుకుతారో అర్ధం కాక చంద్రబాబుకు దడ పట్టుకుంది.

railwayనెల్లూరుజిల్లా కృష్ణపట్నం - కడపజిల్లా ఓబులాపురం రైల్వేలైన్‌ నిర్మాణ పనులు చివరిదశలో ఉన్నాయి. మొత్తం రూ.1800 కోట్లతో 95కి.మీ. పరిధిలో ఈ పనులు జరుగుతున్నాయి. ఈ పనులు పూర్తయితే రాపూరు, డక్కిలి, సైదాపురం, పొదలకూరు మండలాల్లోని వందలాది గ్రామాల ప్రజల జీవన విధానం మెరుగయ్యే అవకాశాలున్నాయి. మాధవయ్యపాలెం(రాపూరు సమీపంలోని వెలిగొండల) వద్ద రైల్వే సొరంగ మార్గంలో అధునాతన యంత్రాలతో సిమెంట్‌ కాంక్రీట్‌ ప్లాస్టరింగ్‌ పనులు ముమ్మరంగా జరుగుతున్నాయి. ఈ సొరంగమార్గం సుమారు 6.634 కిలోమీటర్లు ఉంటుంది. 7.32 మీటర్ల ఎత్తు, 7.5మీటర్ల వెడల్పుతో రూ.407.29 కోట్లతో పనులు చేపట్టారు. ఈ రైల్వేలైన్‌ నిర్మాణం పూర్తయితే యూరియా, పాస్ఫేట్‌ వంటి రసాయన ఎరువుల దిగుమతి, ఇనుప ఖనిజంతో పాటు, క్వార్ట్‌ తదితర ఖనిజాలను ఎగుమతి చేసేందుకు దోహదపడుతుంది. జూన్‌ 13న రైల్వేమంత్రి జన్మదినం సందర్భంగా ట్రయల్‌రన్‌గా రైలును నిడపాలన్న సంకల్పంతో అధికారులు పనుల్ని వేగవంతం చేస్తున్నారు.

Page 1 of 20

newsbottomad

ఎక్కువగా చదివిన వార్తలు

  • ఉదయగిరిలో... 'రెడ్డి' కోసం 'దేశం' అన్వేషణ
    రాజకీయ చైతన్యానికి పేరుపడ్డ నియోజకవర్గంలో రాజకీయ పార్టీలకు గెలుపు పెద్దసవాల్‌! పార్టీ ప్రభంజనాల కంటే పోటీచేసే అభ్యర్థి ప్రభావమే ఇక్కడ ఓటర్లపై బలంగా వుంటుంది. అభ్యర్థి సమర్ధత, వ్యక్తిత్వాన్ని బట్టే ఇక్కడ గెలు పోటములుంటాయి. గత మూడున్నర దశాబ్దాల రాజకీయ చరిత్రను…
  • 'నిప్పో'కు రైట్‌ రైట్‌
    గత కొద్దికాలంగా రాజకీయ నాయకుల నోళ్ళలో నానుతూ రాజకీయ అంశంగా మారిన 'నిప్పో' పరిశ్రమకు సంబంధించిన 13.02 ఎకరాల భూమి కన్వర్షన్‌కు సంబంధించిన అంశం ఎట్టకేలకు నెల్లూరు నగరపాలక సంస్థ ఆమోదం పొందింది. 12వ తేదీ జరిగిన కార్పొరేషన్‌ కౌన్సిల్‌ సమావేశంలో…
  • ఆ ఒక్కడే వణికిస్తున్నాడు!
    నాలుగు దశాబ్దాల రాజకీయ అనుభవం... ముఖ్యమంత్రిగా 13ఏళ్ళ సర్వీసు... రెండుసార్లు మంత్రి... ఏడుసార్లు ఎమ్మెల్యే... జాతీయ రాజ కీయాలలో గిర్రున చక్రం తిప్పిన నేర్పరితనం... యునైటెడ్‌ ఫ్రంట్‌ కన్వీనర్‌... ఇన్ని వున్న చంద్రబాబునాయుడును నిండా 45ఏళ్ల వయసుండని వై.యస్‌. జగన్మోహన్‌రెడ్డి ముప్పతిప్పలు…
  • హోదా పోరుతో... వ్యతిరేకత పోగొట్టుకున్నారు
    నెల్లూరుజిల్లాతో సంబంధం వున్న లోక్‌ సభ సభ్యులు మేక పాటి రాజమోహన్‌ రెడ్డి(నెల్లూరు), వెలగ పూడి వరప్రసాద్‌ (తిరుపతి)లు ప్రత్యేక హోదా ఉద్యమంలో కీలకపాత్ర పోషించారు. హోదా ఉద్యమంలో చురుకుగా పాల్గొనడం ద్వారా తమ తమ నియోజకవర్గాలలో తమ పట్ల నెలకొన్న…
  • నడిచినా... నిద్రించినా... ఏడాదంతా ప్రజల మధ్యే...
    ప్రజలే దేవుళ్ళు, వారి ఇళ్ళే తనకు గుళ్ళు అని భావించి అనుక్షణం వారి మధ్యే వుంటూ వారి సమస్యలు తెలుసుకుంటూ వారి కష్ట సుఖాలలో తోడుండాలని కోరు కునే ప్రజా నాయకుడు నెల్లూరు గ్రామీణ ఎమ్మెల్యే కోటంరెడ్డి శ్రీధర్‌రెడ్డి. నిద్ర లేచింది…

Newsletter