ఏ సరదా అయినా..అందుకూ ఓ పరిమితి ఉంటుంది. హద్దులు దాటిపోయి మితిమీరిన ఉత్సాహంతో వళ్ళు తెలియకుండా ప్రవర్తిస్తే అది ఏ సరదా అయినా చివరికి ముప్పుగానే పరిణమిస్తుంది. ఈ అధునాతన కాలంలో యువత ముఖ్యంగా యువకులు సెల్ఫీ జోరుతో ప్రాణాల మీదికి తెచ్చుకోవడం ఎంతైనా విచారకరం. సెల్ఫీ తీసుకోవడం ఎంతో ముచ్చటైన అంశం. అయితే, అక్కడక్కడా కొన్ని సంఘటనల్లో అది బాధాకరంగా మిగులుతోంది. ఒక మధురమైన జ్ఞాపకంగా ఉండాల్సిన ఆ అంశం మరణంగా మిగులుతుండడమే విషాదం.
సెల్ఫీ తీసుకోవాలనుకుని చివరికి ప్రాణాల మీదికి తెచ్చుకుంటున్న వారి సంఖ్య ఇటీవలి కాలంలో బాగా పెరిగిపోతోంది. సంతోషంగా సెల్ఫీ తీసుకుంటామని వెళ్ళిన తమ బిడ్డలు అలానే గాల్లో కలిసిపోయేరంటే ఆ తల్లిదండ్రులు పడే బాధ ఎలా ఉంటుందో ఒక్క సారి గ్రహించండి. నది ఒడ్డున సెల్ఫీ తీసుకోవడం మంచిదే కానీ, నది మధ్యలో కెళ్ళి సరదాగా సెల్ఫీ తీసుకోవాలనుకుని నదిలో మునిగిపోతే ఏమను కోవాలి?.. సెల్ఫీ తీసుకోవడం ఎంత ఫ్యాషనైనా, దాన్ని తీసుకోవడంలో ఏమరుపాటు వహించి కొందరు ప్రమాదాల పాలవుతున్నా ఎవరూ పట్టించు కోవడం లేదు. ఇంకా మరికొందరు అదే దారిలో వెళ్ళిపోతూనే ఉన్నారు. మొన్నటికి మొన్న సూళ్ళూరు పేట నుంచి మోటార్‌బైక్‌పై అత్యంత వేగంగా వెళ్తూన్న ఇద్దరు యువకులు, ఆ వేగంలోనే సెల్ఫీ తీసుకోవాలనుకుని లారీని ఢీకొట్టి ప్రాణాలు పోగొట్టు కున్నారు. కారూరి పంచాయతీలోని కారూరిమిట్ట వద్ద జాతీయరహదారిపై ఈ నెల 8న జరిగిందీ దుర్ఘటన. చెన్నై వైపు మోటార్‌బైక్‌లో వెళ్తున్న ఆ యువకులిద్దరూ ఉత్తరప్రదేశ్‌కు చెందిన మోనో, వీరేేంద్ర అని, వీరిద్దరూ గుమ్మిడిపూండిలోని ఒక ఫ్యాక్టరీలో పనిచేసేవారని తెలిసింది. బైక్‌రైడింగ్‌ చేస్తూ.. ఆ వేగంలోనే సెల్ఫీ తీసుకోవడానికి ప్రయత్నిస్తూ కిందపడి నెత్తురుమడుగులో ఉన్న వారి మృతదేహాల పరిస్థితి అత్యంత దయనీయం. అంతేకాదు, వారి చేతిలో మద్యం సీసాలు కూడా ఉన్నాయని కేసును పరిశీలిస్తున్న పోలీసులు గుర్తిం చారు. మోటార్‌బైక్‌పై అత్యంత వేగంతో.. గాలితో పోటీ పడుతున్నట్లు వెళ్తూ..మధ్యలో బైక్‌ను వంకర్లు తిప్పడం..మద్యం మత్తులో కిందామీదా అయి పోవడం..చేతులు వదిలేసి గాల్లో ఫోజులు కొట్టడం, ఇవన్నీ చాలవన్నట్లు మళ్ళీ ఆ వేగంలోనే సెల్ఫీ తీసుకోవాలని ఒకచేత్తోనే బైక్‌ నడుపుతూ వెనక్కి తిరిగి సెల్ఫీ తీసుకోవాలని ఆరాటపడడం... చివరికి ఏమైంది?.. రోడ్డుపక్కన ఉన్న లారీని వేగంగా ఢీ కొట్టి.. కిందపడిపోయారు. తలలు పగిలిపోయాయి.. శరీరాలు నుజ్జునుజ్జు అయిపోయాయి. కొద్దిసేపట్లోనే నెత్తుటిమడుగులో విలవిలలాడుతూ అక్కడికక్కడే మృతిచెందారు. ఎక్కడ పుట్టారో.. ఎక్కడ పెరిగారో.. ఇక్కడ నడిరోడ్ల మీద వారి జీవితాలు ఇంత ఘోరంగా కడతేరిపోయాయి. వారి తల్లిదండ్రులకు ఈ దుర్ఘటన తెలిసి ఎంతగా అల్లాడిపోయుంటారో?... సెల్ఫీ సరదాలు, విచ్చలవిడి స్నేహాలు.. మద్యలో మద్యం గుటకలు.. ఇవన్నీ కలసి యువత ప్రాణా లను రకరకాలుగా తీసేస్తున్నాయి. ఎక్కడో కొండల మీదికెక్కి సర్రున జారుతూ సెల్ఫీలు తీసుకో వాలని ప్రయత్నించడం, సాహస దృశ్యాలను సెల్ఫీల్లో బంధిం చాలనుకుని తామే ఆ సాహసాలను చేసేయడం, గాల్లో పల్టీలు కొట్టడం, సముద్రాల్లో ఈత కొడుతూ సెల్ఫీలు దిగాలని ప్రయత్నించడం.. ఇలా ఒకచోటే మిటి.. వెర్రెత్తినట్లు ప్రవర్తించేవారు కొందరైతే, సెల్ఫీ దిగుదామని అనుకుంటూ ఏ సాహసమో చేస్తూ... అజాగ్రత్తతో ప్రాణాలు పోగొట్టేకునేవారు మరికొందరు. ఎక్కడైనా సరే, మితిమీరిన ఉత్సాహం, ముందు జాగ్రత్తలు తీసుకోకపోవడం కలసి వెరసి ప్రాణాలకే ముప్పు వస్తోంది. సెల్ఫీల కోసమో..లేదా సాహసం కోసమో.. బైక్‌లపై రోడ్లమీద అత్యంత వేగంతో వెళ్తూ విన్యాసాలు చేసేవారిని చూస్తే ఎవరికైనా గుండెలు అదురుతుంటాయి. వారు ఆ స్పీడ్‌లో ఏమైపోతారో?..ఎదురుగా వచ్చేవారిని ఢీ కొని మరెంత మంది ప్రాణాలు పోగొడతారోనని హడలి చస్తుంటారు చూస్తున్న జనం. జిల్లాలో, ముఖ్యంగా నెల్లూరు నగరంలో ఆ తరహా కుర్రకారు విన్యాసాలు మరీ ఎక్కువైపోతున్నాయి.
తల్లిదండ్రులో.. అధికారులో ఎవరూ పట్టించు కోకుంటే ఇలాంటి మరణాలు మరింతగా పెరిగి పోతాయి. అలాంటి బిడ్డలను అదుపులో పెట్టుకో కుంటే.. ఆ తర్వాత ఏ ప్రమాదమో జరిగిపోయాక భోరుమని విలపించి ప్రయో జనం ఏముంటుందీ?.. అయినా, సెల్ఫీలు తీసుకోవడంలో పిల్లలు అజాగ్రత్తతో ప్రమాదాలకు లోనుకాకుండా తగు జాగ్రత్తలు చెప్పు కోవాల్సింది ముందుగా వారి తల్లిదండ్రులు.. కుటుంబసభ్యులే. రోడ్లమీదికొచ్చి బైక్‌లపై వీరంగాలు చేసేవారికి తగు పాఠం చెప్పాల్సింది మాత్రం అధికా రులే!...ఏదేమైనా ముచ్చటగా తీసుకోవాల్సిన సెల్ఫీ లను.. యువత అజాగ్రత్తతో ఇలా ప్రాణాలమీదికి తెచ్చుకోవడం బాధాకరం!..ఏ సెల్ఫీ కూడా.. పది కాలాలపాటు జ్ఞాపకంగా ఉండేలా చూసుకోవాలే గానీ, వారికి అదే చివరి సెల్ఫీ కాకూడదు. ఆ పరిస్థితి ఎవరికీ రాకూడదు. అందుకే..తస్మాత్‌!..జాగ్రత్త!..
రాజకీయాలలో ఆత్మహత్యలు తప్ప హత్యలుండవనేందుకు పెద్ద ఉదాహరణ ఆంధ్రప్రదేశ్‌లో కాంగ్రెస్‌పార్టీకి పట్టిన దుస్థితి. కష్టకాలంలో కూడా కాంగ్రెస్‌పార్టీని ఆదుకున్న రాష్ట్రమిది. 1983లో ఎన్టీఆర్‌ తెలుగుదేశం పార్టీని పెట్టే ముందువరకు కూడా ఈ రాష్ట్రంలో కాంగ్రెస్‌కు ఎదురన్నది లేదు. కాంగ్రెస్‌ను, ఇందిరాగాంధీ కుటుంబాన్ని అంతగా ఆదరించారు ఆంధ్రులు. ఆదుకున్న ఆంధ్రులతోనే కాంగ్రెస్‌ అధినేత్రి సోనియాగాంధీ ఆడుకుంది. దానికి తగిన మూల్యం చెల్లించుకుంది.
ఈ దేశంలో పెద్ద రాష్ట్రాలలో కాంగ్రెస్‌ మట్టి కొట్టుకుపోయినా ఆంధ్రప్రదేశ్‌ అండగా నిలిచింది. 2004, 2009లలో కేంద్రంలో కాంగ్రెస్‌ రెండుసార్లు అధికా రంలోకి వచ్చిందంటే అందుకు కారణం ఈ రాష్ట్రం నుండి మెజార్టీ లోక్‌సభ సీట్లు అందించడమే. అలాంటి రాష్ట్రంలో కాంగ్రెస్‌ చేజేతులా ఆత్మహత్య చేసుకుంది. రాష్ట్ర విభజన అనే కొమ్మకు తన ఉరితాడు తానే బిగించుకుంది. 2014 ఎన్నికల్లోనే ఈ రాష్ట్రంలో కాంగ్రెస్‌ బ్రతుకు, భవిష్యత్‌ ఏంటన్నది అర్ధమైపోయింది. ఒక్క సీటు రాకపోగా కనీసం పోటీ చేసిన స్థానాల్లో ఒకటి, రెండు చోట్ల తప్పితే డిపాజిట్లు కూడా దక్కలేదు. 2014 ఎన్నికలలోనే కాంగ్రెస్‌పార్టీ పరిస్థితి తెలిసి ఆ పార్టీలో వున్న సీనియర్‌ నాయకులు చాలామంది తెలుగుదేశం, వైకాపాలలో చేరిపోయారు. ఎంపీలుగా, ఎమ్మెల్యేలుగా, పార్టీ పరంగా కీలకపదవుల్లో వున్న కొందరు నాయకులు మాత్రం వెంటనే కాంగ్రెస్‌ నుండి బయటకు రాలేకపోయారు.
కాని, నిన్న నంద్యాల, కాకినాడ ఎలక్షన్‌లు చూసాక మిగిలిన నాయకులెవరు కూడా కాంగ్రెస్‌లో ఉండే పరిస్థితి కనిపించడం లేదు. రాబోయే ఎన్నికల నాటికి మిగిలిన సీనియర్లు ఎవరు కూడా కాంగ్రెస్‌లో వుండకపోవచ్చు. కిరణ్‌కుమార్‌రెడ్డి,
ఉండవల్లి అరుణ్‌కుమార్‌, కెవిపి రామచంద్రరావు, పళ్లంరాజు, పనబాక లక్ష్మి, కోట్ల సూర్యప్రకాశ్‌రెడ్డి, రఘువీరారెడ్డి, చింతా మోహన్‌ వంటి నాయకులందరు కూడా వైకాపా లేదా టీడీపీలో చేరేందుకు రంగం సిద్ధం చేసుకుంటున్నారు. వీరిలో ఎక్కువ మంది నాయకులు వైకాపా వైపే మొగ్గు చూపుతున్నట్లు తెలుస్తోంది. ఏదిఏమైనా రాష్ట్రంలో కాంగ్రెస్‌ దుకాణాన్ని పూర్తిగా మూసేసే రోజులు దగ్గరపడ్డాయనే చెప్పవచ్చు.
రాజకీయాలలో పక్కా ప్లానింగ్‌, అంచనా, వాస్తవ దృష్టి, సమయస్ఫూర్తి, ప్రత్యర్థుల కోటల్లోకి సైతం జొరబడే తత్వం, ఆత్మపరిశీలన, స్థానిక పరిస్థితు లపై అవగాహన... ఇన్ని వుంటేనే రాణించగలరు. ముఖ్యంగా గాలివాటాన్ని, సానుభూతిని, ప్రభంజనాలను నమ్ముకున్న వాళ్ళు ఎక్కువకాలం రాజ కీయాలలో నిలువలేరు.
చంద్రబాబు ఎన్టీఆర్‌లా ప్రజాకర్షణ వున్న నాయకుడో, వై.యస్‌.లా ప్రజాభి మానం సంపాధించుకున్న నాయకుడో కాదు. అయినా 2014 ఎన్నికల్లో అధికా రంలోకి వచ్చాడు. కారణం రాష్ట్ర రాజ కీయాలపై ఆయనకున్న అవగాహన. సామాజిక సమీకరణలపై అతనికున్న విషయ పరిజ్ఞానం. రాష్ట్ర ప్రజల ఆలో చనా విధానాలపై అతనికున్న గురి. కాపుల ఓట్లకు రిజర్వేన్‌, పవన్‌ల గాలం, మహి ళలు, రైతుల ఓట్లకు ఋణమాఫీ వల, విద్యార్థులు, ఉద్యోగార్ధుల ఓట్లకు నిరు ద్యోగ భృతి ఎర... ఇలా ఒక్కో వర్గాన్ని ఒక్కో రకంగా బుట్టలో పెట్టి కప్పేసాడు. 2014లో ఇచ్చిన వాగ్ధానాలన్నీ అమలు చేయలేక సతమత మవుతున్నాడు. అయినా కూడా వచ్చే ఎన్నికల్లో తిరిగి అధికారాన్ని నిలుపు కోవాలి, అందుకు ఏం చేయాలి, ఆ స్టేట జీనే చంద్రబాబు అమలు చేయబోతు న్నాడు. ఏపిలో ఇప్పుడు ఎవరు అధికారం లోకి రావాలన్నా రాయలసీమ, కోనసీమ సీట్లు ముఖ్యం. 2014 ఎన్నికల్లో చంద్ర బాబు రాయలసీమలో దెబ్బతిన్నా కోన సీమలో స్వీప్‌ చేసి అధికారంలోకి రాగలి గాడు. వచ్చే ఎన్నికల్లో కోనసీమలో మళ్ళీ అవే సీట్లు అన్నే సీట్లు వస్తాయనే నమ్మకం చంద్రబాబుకు లేదు. అందుకే రాయల సీమపై ఈసారి ప్రత్యేకంగా దృష్టిపెడుతు న్నాడు. ఎంత ప్రభుత్వ వ్యతిరేకత వున్నా, సామాజిక సమీకరణలను బట్టి విజయ నగరం, శ్రీకాకుళం, విశాఖ జిల్లాల్లో టీడీపీదే పైచేయిగా వుంటుంది. ప్రభుత్వ వ్యతిరేకత పనిచేసినా సగం సీట్లయినా సాధించుకోవచ్చు. ఇక కృష్ణా, గుంటూరు లలో సామాజిక వర్గం బలంతో పాటు అమరావతి రాజధాని ప్రభావం వుం టుంది. తెలుగుదేశాన్ని తిరిగి గెలిపించు కోకపోతే రాజధాని అభివృద్ధి ఆగిపోతుం దని చెప్పి ఆ రెండు జిల్లాల ప్రజలు తమ వైపే మొగ్గు చూపుతారని తెలుగుదేశం వర్గాలు నమ్ముతున్నాయి. ఈసారి ప్రకాశం, నెల్లూరు, చిత్తూరుజిల్లాల్లో మెజార్టీ సీట్లు రాకపోయినా సమంగా తెచ్చుకోవాలి. రాయలసీమ జిల్లాలైన కర్నూలు, కడపలలో సీట్లు పెంచుకోవాలి. అనంతపురంలో మెజార్టీ సీట్లు వస్తాయి. కాబట్టి అధికారం నిలుపుకోవడానికి అవకాశం వుంది. 1983 నుండి ఇప్పటిదాకా 7సార్లు అసెంబ్లీ ఎన్నికలు జరిగాయి. ఇందులో తెలుగుదేశం పార్టీ ఆరుసార్లు గెలిచిన నియోజకవర్గాలు ఒక్క ఏపిలోనే 45 దాకా వున్నాయి. అంటే అవి పార్టీకి కంచుకోట ల్లాంటివి. అలాంటివాటితో పాటు పార్టీకి అనుకూలంగా వున్న మరో 50 నియోజక వర్గాలను సెలక్ట్‌ చేసుకుని, అక్కడ గెలుపును సునాయాసం చేసుకునే దిశగా తెలుగుదేశం నాయకులు ప్రణాళికలు సిద్ధం చేస్తున్నారు. ముఖ్యంగా ఇటీవల కడప, కర్నూలు స్థానిక సంస్థల ఎమ్మెల్సీలను గెలవడం, నిన్న నంద్యాల అసెంబ్లీని గెలవడంతో ఈసారి రాయలసీమలోనూ మెజార్టీ స్థానాలు సాధించగలమనే ధీమాను టీడీపీ నాయ కులు వ్యక్తం చేస్తున్నారు. ఇందుకోసం వీళ్ళు రాయలసీమలో బలమైన సామాజిక వర్గంగా వున్న రెడ్లను చీల్చే ప్రయత్నం చేస్తున్నారు.
ఇదే సమయంలో వైకాపా కూడా ఈసారి అధికారం సాధించాలంటే తెలుగుదేశం కోటలపై దృష్టి పెట్టాల్సిన పరిస్థితి. 2014 ఎన్నికల్లో ఆ పార్టీ కోన సీమ, ఉత్తరాంధ్రలో దారుణంగా దెబ్బ తినబట్టే అధికారానికి దూరంగా వుండి పోయింది. ఈసారి కోనసీమ జిల్లాలైన తూర్పు, పశ్చిమ గోదావరిలలో వీలైనన్ని ఎక్కువ స్థానాలు సాధించాలి. ఉత్తరాం ధ్రలో గతం కన్నా స్థానాలు పెంచుకోవాలి. ఉభయగోదావరి జిల్లాల్లో కనీసం సగం సీట్లన్నా తెచ్చుకోవాలి. నెల్లూరు, ప్రకాశం జిల్లాల్లో క్రితంసారి వచ్చిన సీట్లు వస్తే చాలు. కృష్ణా, గుంటూరు జిల్లాల్లో టీడీపీకి మెజార్టీ సీట్లు వచ్చినా, రాయలసీమ జిల్లాలపై గతంలో వున్న పట్టును నిలుపు కోగలిగితే చాలు. వైకాపా అధికారానికి మార్గం సుగమం అయినట్లే!
రాష్ట్రంలో ఇక ప్రభంజనాలు, సానుభూతులు పనిచేయవు. ప్రాంతాల వారీగా, జిల్లాల వారీగా సమీకరణలు పనిచేస్తాయి. కాబట్టి ప్రతి జిల్లాకు, ప్రతి ప్రాంతానికి ప్రత్యేక ప్రణాళికతో వెళ్ళ గలిగిన వాళ్లే వచ్చే ఎన్నికల్లో మొనగా ళ్లవుతారు.
లాయర్ , జాతీయ తెలుగు వార పత్రిక . గత 25 సంవత్సరములకు పైగా నెల్లూరు ప్రజల పక్షాన నూతన అభ్యుదయ సమాజం కోసం పోరాడుతుంది