pslvపొట్టి శ్రీరాములు నెల్లూరు జిల్లా శ్రీహరికోటలోని షార్‌ కేంద్రం నుంచి పోలార్‌ శాటిలైట్‌ లాంచ్‌ వెహికల్‌-సీ38 రాకెట్‌ ప్రయోగం విజయవంతైమంది. 28 గంటల నిరంతర కౌంట్‌డౌన్‌ ప్రక్రియ అనంతరం శుక్రవారం ఉదయం 9.29 గంటలకు రాకెట్‌ నింగిలోకి దూసుకెళ్లింది. నిర్ణీత సమయంలో నిర్దేశిత కక్ష్యలోకి 31 ఉపగ్రహాలను ప్రవేశపెట్టింది. ఇస్రో పీఎస్‌ఎల్‌వీ ఎక్స్‌ఎల్‌ మిషన్‌తో చేసిన 17వ ప్రయోగం కావడం విశేషం. ఇస్రో ఛైర్మన్‌ కిరణ్‌కుమార్‌ ఈ ప్రయోగాన్ని ప్రత్యక్షంగా పర్యవేక్షించారు. ప్రయోగం విజయవంతం కావడంతో షార్‌ శాస్త్రవేత్తలు హర్షం వ్యక్తం చేశారు. ఒకరికొకరు అభినందనలు తెలుపుకున్నారు.

gslv takeoffభారత అంతరిక్ష పరిశోధనా సంస్థ (ఇస్రో) మరో అద్భుతాన్ని ఆవిష్కరించింది. జిఎస్‌ఎల్‌వి మార్క్‌ 3 డీ-1 జీశాట్‌-19 రాకెట్‌ను విజయవంతంగా ప్రయోగించి అంతరిక్షంలో భారత కీర్తిని రెపరెపలాడించింది. ఈ విజయం భారత అంతరిక్ష ప్రయోగాల చరిత్రలోనే ఒక అద్భుతం. ఇస్రో చరిత్రలోనే ఇదొక సరికొత్త అధ్యాయం. భారత శాస్త్రవేత్తల నిరంతర కృషికి..వారి దృఢదీక్షకు, అసమాన ప్రతిభకు ఇదొక తిరుగులేని నిదర్శనం. పూర్తిగా స్వదేశీ పరిజ్ఞానంతో పిఎస్‌ఎల్‌వి, జిఎస్‌ఎల్‌వి రాకెట్లను రూపొందించి రోదసిలోకి విజయవంతంగా పంపిన ఇస్రో.. ఇప్పుడు అత్యధిక బరువు వుండే రాకెట్లను సైతం అవలీలగా అంతరిక్షంలోకి పంపడంలో తన సత్తాను నిరూపించుకుంది. ఇది భారత జాతికంతటికీ గర్వకారణం. ఈ విజయంతో భారత్‌ కీర్తి ఆకాశమంత ఎత్తుకు ఎదిగింది.

ఇటీవల ఒకేసారి నింగిలోకి 104 ఉపగ్రహాలను విజయవంతంగా పంపి ప్రపంచరికార్డు సాధించిన ఇస్రో..మళ్ళీ కేవలం నాలుగు నెలల్లోపే రోదసిలోకి అత్యంత భారీ ప్రయోగం నిర్వహించి విజయం సాధించింది.. భూ చలన వేగానికి ధీటుగా సంచలించే జియో సింక్రనస్‌ ఉపగ్రహ ప్రయోగ వాహకనౌక (జిఎస్‌ఎల్‌వి) మార్క్‌ 3-డి 1 జీశాట్‌ 19 సమాచార ఉపగ్రహాన్ని రోదసిలోకి విజయవంతంగా పంపి భారీ రాకెట్‌ ప్రయోగాల్లో భారత్‌ తన సత్తాను చాటుకుంది. శ్రీహరికోటలోని సతీష్‌ధవన్‌ అంతరిక్ష కేంద్రం (షార్‌) నుంచి ఈ చరిత్రాత్మక ప్రయోగం జరిగింది. ఇంటర్నెట్‌, టీవీ, టెలికాం రంగాలకు అవసరమైన ఎంతో సాంకేతిక నిపుణుతను ఇప్పుడు పంపిన జీశాట్‌-19 అందజేస్తుంది. అత్యంత క్లిష్టమైన క్రయోజనిక్‌ సాంకేతిక పరిజ్ఞానంతో ఇస్రో ఈ ప్రయోగం నిర్వహించి ప్రపంచదేశాల దృష్టిని ఆకర్షిస్తోంది.

సుమారు 5,80,600 కిలోల బరువున్న ఈ రాకెట్‌ రోదసిలో ప్రయాణించి, ఇందులో 3,136 కిలోల బరువున్న సమాచార ఉపగ్రహాన్ని 35,975 కిలోమీటర్ల ఎత్తులో వున్న జిటిఓ (భూ అనువర్తిత బదిలీ కక్ష్య)లోకి తీసుకువెళ్ళగలిగిందంటే మన శాస్త్రవేత్తల ప్రజ్ఞాపాటవాలు ఎంత గొప్పవో తేటతెల్లమవు తుంది. దాదాపు రెండువందల ఏనుగుల బరువుండే రాకెట్‌ను రోదసి లోకి విజయవంతంగా పంపడమంటే మాటలు కాదు. అంతటి అసాధ్యాలను సుసాధ్యం చేస్తున్న ఇస్రోకి అభినందనలు. వాణిజ్యపరంగా కూడా ఇస్రోకి ఈ విజయం మరింత మేలుబాటలు పరుస్తుంది. పూర్తిగా స్వదేశీ పరిజ్ఞానంతో ఇంతటి విజయాన్ని సాధించడం ద్వారా ఇస్రో శాస్త్రవేత్తలు రాకెట్ల ప్రయోగంలో అప్రతిహతంగా ముందుకు సాగుతున్నారు. దాదాపు రెండు దశాబ్దాలపాటు ఎన్నో వ్యయప్రయాసలు, మరెన్నో వైఫల్యాలను సైతం అధిగమించి ఇస్రో ధృఢసంకల్ప దీక్షతో, అలుపెరుగని కృషితో విజయపథాన సాగిపోతూవుండడం ఎంతైనా గర్వకారణం. అన్ని వైఫల్యాలను అధిగమిస్తూ రాకెట్ల తయారీలో ఇస్రో తన అపార శక్తిసామర్ధ్యాలను ఎప్పటికప్పుడు చాటుకుంటూనే వుంది. స్వదేశీ పరిజ్ఞానంతో సొంతంగా క్రయోజనిక్‌ ఇంజిన్‌ను తయారుచేసుకుని తాజాగా జిఎస్‌ఎల్‌వి మార్క్‌-3 డి 1ను రోదసిలోకి పంపింది. ఇది తొలి ప్రయోగంలోనే విజయవంతమై అంతరిక్ష పరిజ్ఞానంలో భారత్‌ అగ్రరాజ్యాల సరసన చేరిందంటే ఇస్రో కృషి-పట్టుదల ఎంత ఘనమైనవో తెలుస్తుంది. కాగా, అంతరిక్ష పరిజ్ఞానంతో దేశంలోని సామాజిక, ఆర్ధిక, సాంకేతిక స్థితిగతులన ఎంతో అభివృద్ధి చేసుకోవచ్చు. అందుకే ఇస్రో అందుకు అవసరమైన అన్ని మార్గాలనూ అన్వేషిస్తోంది. ఇంటర్నెట్‌ వేగాన్ని పెంచేందుకు కూడా కృషి చేస్తోంది. దేశంలో సుమా రు 45 కోట్ల మందికి పైగానే ఇప్పుడు ఇంటర్నెట్‌ వినియోగించుకుంటున్నారు. అయితే ఇంటర్నెట్‌ వేగం విషయంలో అనేక దేశాలకన్నా భారత్‌ ఇంకా వెనుకబడే ఉంది. అందువల్ల ఇంటర్నెట్‌ వేగాన్ని పెంచే మంచి సామర్ధ్యం వున్న మూడు ఉపగ్రహాలను ఇస్రో సిద్ధం చేస్తోంది. అందులో తొలిది జిఎస్‌ఎల్‌వి మార్క్‌-3 ద్వారా ఇప్పుడు పంపిన జీశాట్‌-19 సమాచార ఉపగ్రహం. ఆ తర్వాత జీశాట్‌-11, జీశాట్‌-20 అనే రెండు ఉపగ్రహాలను కూడా ఇస్రో ప్రయోగించనుంది. ఈ ప్రయోగాలతో కేవలం రెండేళ్ళలోనే సాంకేతికాభి వృద్ధి గణనీయంగా పెరిగి, నెట్‌ వేగం కూడా బాగా పెరుగుతుంది. అంతేకాదు, నాణ్యమైన ఇంటర్నెట్‌ సేవలతోపాటు, ఫోన్‌లు, టీవీ, వీడియో సేవలు మరింతగా అందుబాటులోకి వచ్చి హైస్పీడ్‌ ఇంటర్నెట్‌ యుగం త్వరలోనే ఆవిష్కృతమవుతుంది. ఒకప్పట్లో రష్యా నుంచి ఉపగ్రహాలను ప్రయోగించిన ఇస్రో ఇప్పుడు స్వయంకృషితో రష్యా ఉపగ్రహాలను సైతం రోదసిలోకి పంపే స్థాయికి ఎదిగిందంటే అంతరిక్ష రంగంలో ఇస్రో శాస్త్రవేత్తల కృషి-పట్టుదల ఎలాంటివో తెలుస్తుంది. ఇస్రో ప్రయోగిస్తున్న ఉపగ్రహాలు, చేస్తున్న ప్రయోగాలు దేశానికి ఎంతో ఉపయోగకరం. భూమిలోపల, సాగర గర్భంలోను, ఇతర గ్రహాల్లోనూ గ్రహాంతరాల్లోనూ వుండే అమూల్యమైన వనరుల సమాచారాన్ని ఉపగ్రహాలు మనకు అందిస్తున్నాయి. ప్రకృతి విపత్తులను కూడా ముందే తెలుసుకుంటున్నాయి. సమాజాభ్యుదయానికి ఎంతో ఉపకరించే ఈ ఉపగ్రహాల సేవలు జాతికి బహుళప్రయోజనాలను అందిస్తున్నాయి.

ఈ నేపథ్యంలో, జిఎస్‌ఎల్‌వి ద్వారా భారత వ్యోమగాముల్ని రోదసిలోకి పంపాలన్న ఆలోచనలు కూడా ఇస్రోకి వున్నాయి. ఆ కల సాకారమైతే, మానవ సహిత అంతరిక్ష ప్రయోగాల్లో రష్యా, అమెరికా, చైనాల తర్వాత భారత్‌కూ స్థానం లభిస్తుంది. భవిష్యత్తులో చందమామ చెంతకు చేరుకోవడం, అంగారక తదితర గ్రహాలపై మరింత విస్తృత ప్రయోగాలు జరపడం వంటి బృహత్తరమైన ఆలోచనల కార్యరూపానికి ఇస్రో ఇప్పటినుంచే సమాయత్తం అయ్యేందుకు...ఈ తాజా ప్రయోగ విజయం ఒక శుభసూచిక అని వేరే చెప్పనక్కరలేదు. విజయపరంపరలతో ముందుకు సాగుతున్న ఇస్రోకు శుభాభినందనలు.

సాహో.. ఇస్రో!.. జయహో ఇస్రో!...

gslvఅమెరికావాళ్ళు చంద్రుడి మీదకు మనుషులను పంపించారు... రష్యా వాళ్ళు అంగారకుడి మీదకు ఉప గ్రహాన్ని వదిలారు... చైనా అంతరిక్షం లోకి వ్యోమగాములను పంపింది... ఒకప్పుడు ఈ వార్తలు చదువుతుంటే అంతరిక్షమే కాదు, ఆ దేశాలు కూడా మనకు అందనంత ఎత్తున కనిపిం చేవి. ఆ దేశాల స్థాయికి మనం చేర గలమా అనిపించేది.

కాని, ఇంతవరకు నడిచిన చరిత్ర వేరే! ఇప్పుడు నడుస్తున్న చరిత్ర వేరే! అంతరిక్ష ప్రయోగాలలో అగ్రదేశాలకే సవాల్‌ విసురుతోంది భారతదేశం. ఉపగ్రహాల ప్రయోగాలలో ప్రపంచ దేశాలనే నివ్వెర పోయేలా చేస్తోంది భారత అంతరిక్ష పరి శోధనా సంస్థ ఇస్రో. అమెరికా, రష్యా దేశాల అంతరిక్ష ప్రయోగాల గురించి ఇంతవరకు మనం గొప్పగా చెప్పుకున్నాం. భవిష్యత్‌లో భారత్‌ అంతరిక్ష ప్రయోగాల గురించి ప్రపంచమే గొప్పగా చెప్పుకుం టుందన్న భరోసాను, నమ్మకాన్ని కలిగి స్తోంది మన ఇస్రో!

అంతరిక్ష ప్రయోగాలలో వైఫల్యం మాటను మరచి, గెలుపును తమ వాకిట్లో కట్టేసుకున్న 'ఇస్రో', మరో అనితర విజయాన్ని సాధించింది. ఈమధ్యనే ఒకే రాకెట్‌ ద్వారా 104 ఉపగ్రహాలను అవ లీలగా కక్ష్యలోకి నెట్టేసి అగ్రదేశాలను ముక్కు మీద వేలేసుకునేలా చేసిన ఇస్రో, ఆ దేశాలు ముక్కు మీద వేసుకున్న వేళ్ళను తిరిగి దించే పని లేకుండా మరో ఘన విజయంతో సత్తా చాటింది.

ఇస్రోకు ఇద్దరు ముద్దుబిడ్డలున్నారు. ఒకరు పిఎస్‌ఎల్‌వి, ఇంకొకరు జిఎస్‌ ఎల్‌వి. పిఎస్‌ఎల్‌వి మొదటి నుండి క్రమ శిక్షణ గల విద్యార్థిగా చెప్పిన మాట బుద్ధిగా వింటున్నాడు. ఇస్రో చెప్పింది చెప్పినట్లు చేస్తూ వరుస విజయాలతో తన మాతృసంస్థకు కీర్తిప్రతిష్టలు తెస్తున్నాడు.

ఇక రెండోవాడు జిఎస్‌ఎల్‌వి. కొంచెం మొండోడు. కాకపోతే పిఎస్‌ఎల్‌వి కంటే బలిష్టుడు. అప్పుడప్పుడు దారి తప్పేవాడు. నింగిలోకి దూసుకుపొమ్మని నిప్పు పెడితే, నీటిలో దూకి తుస్సుమనేవాడు. అయితే మెరుగు పెడితేనే రాయి అయినా వజ్రంగా మారుతుందనే పెద్దలు చెప్పిన సూక్తి మన ఇస్రో శాస్త్రవేత్తలకు తెలియంది కాదు. ఆ సూక్తితోనే ఎన్నో ఏళ్ళుగా శ్రమించారు. జిఎస్‌ఎల్‌వికి పదును పెట్టారు. లోపాలను కనిపెట్టి సరిచేసారు. సరికొత్త మెరుగులు దిద్దారు. జిఎస్‌ఎల్‌విని ఇప్పుడొక ఆణి ముత్యంగా తీర్చిదిద్దారు. ఇప్పుడు జిఎస్‌ ఎల్‌వి కూడా దారికి వచ్చింది. క్రమ శిక్షణతో అప్పగించిన బాధ్యతను సమర్ధ వంతంగా నెరవేర్చి తన మీద ఆశలు పెట్టుకున్న ఇస్రో శాస్త్రవేత్తలు, నూటపాతిక కోట్ల భారతీయుల నమ్మకాన్ని అంత రిక్షంలో నిలబెట్టింది.

అంతరిక్ష ప్రయోగాలలో భారత్‌ మరో ముందడుగు వేసింది. ఈ నెల 5వ తేదీ సాయంత్రం 5.58గంటలకు నెల్లూరు జిల్లా, శ్రీహరికోటలోని సతీష్‌ ధావన్‌ అంతరిక్ష ప్రయోగ కేంద్రం(షార్‌ సెంటర్‌) లోని రెండో ప్రయోగ వేదిక నుండి ప్రయో గించిన భారీ వాహక నౌక జిఎస్‌ఎల్‌వి మార్క్‌3-డి1 విజయవంతమైంది. ఈ భారీ రాకెట్‌ ద్వారా 3136 కిలోల భారీ బరువున్న జీశాట్‌-19 ఉపగ్రహాన్ని నిర్ణీత కక్ష్యలో ప్రవేశపెట్టారు. ఈ ప్రయోగం విజయవంతం కావడం 'ఇస్రో'కు ఒక శుభ సంకేతం. పూర్తిగా స్వదేశీ పరిజ్ఞానంతో రూపొందించిన రాకెట్‌ ఇది. క్రయోజనిక్‌ ఇంజన్‌ సాంకేతికపై ఇస్రో పూర్తి పట్టును సాధించిందనడానికి సంకేతమిది. ఇప్పటి వరకు 2500 కిలోల బరువు దాటిన

ఉపగ్రహాలను ప్రయోగించడానికి మనం అగ్రదేశాల మీద ఆధారపడుతూ వచ్చాం. ఇప్పుడు జిఎస్‌ఎల్‌వి ఇచ్చిన నమ్మకంతో ఇక 5వేల కిలోల బరువుగల ఉపగ్రహాల నైనా ప్రయోగించగలమనే ధైర్యం ఏర్ప డింది. అంతేకాదు, భవిష్యత్‌లో ఇస్రో చేపట్టదలచిన అనేక అంతరిక్ష సాహసో పేత ప్రయోగాలకు ఈ ప్రయోగమే అంకు రార్పణగా మారింది.

జిఎస్‌ఎల్‌వి మార్క్‌3-డి1 ప్రయోగం విజయవంతం కావడంతో దేశమంతా హర్షాతిరేకాలు వ్యక్తమవుతున్నాయి. భారత రాష్ట్రపతి, ప్రధానిలు ఇస్రో శాస్త్ర వేత్తలను ప్రత్యేకంగా అభినందించారు. ఈ ప్రయోగంలో భాగస్వాములైన ఇస్రో ఛైర్మెన్‌ కిరణ్‌కుమార్‌, వారి శాస్త్రవేత్తల బృందాన్ని ప్రతి భారతీయుడు అభినందిస్తున్నాడు.

Page 1 of 8

newsbottomad

ఎక్కువగా చదివిన వార్తలు

  • నెల్లూరు నగరాభివృద్ధికి... నాలుగు స్థంభాలు
    కన్నతల్లిని జన్మభూమిని ఎప్పుడూ మరచిపోకూడదని మన కేంద్రమంత్రి యం.వెంకయ్యనాయుడు ప్రతి సభలోనూ చెబుతుంటారు. మరి ఎంతమంది ఆ మాటను చెవికెక్కించుకుంటారన్నది వేరే విషయం. కాని ఆయన చెప్పే మాట ప్రతి ఒక్కరికీ వర్తిస్తుంది. కన్నతల్లిని జన్మభూమిని మరువవద్దని ఆయన చెబుతున్న మాటలను…
  • తీరంకు సిఇజడ్‌ హారం
    డాక్టర్‌ వై.యస్‌.రాజశేఖరరెడ్డి పాలనలో జిల్లాలో పారిశ్రామిక ప్రగతి పరుగులు పెట్టింది. కృష్ణపట్నం పోర్టు అత్యంత వేగంగా నిర్మాణం పూర్తి చేసు కుంది. వై.యస్‌. అనే నాయకుడు మర ణించకపోయి వుంటే కృష్ణపట్నం పోర్టు ఈరోజు దేశంలోనే ప్రముఖ పారిశ్రామిక హబ్‌గా అవతరించి…
  • ఆర్టీసీని... ఆధునీకరించడం కాదు... తరలించడమే ఉత్తమం
    నెల్లూరులోని ఆర్టీసీ బస్టాండ్‌కు నాలుగు దశాబ్దాల పైబడిన చరిత్ర ఉంది. అప్పట్లో ఈ బస్టాండ్‌ నగరానికి దూరంగా ఉన్న ట్లుండేది. ఈ నాలుగు దశాబ్దాల కాలంలో నగరం నలువైపులా విస్తరించింది. దీంతో ఆర్టీసీ బస్టాండ్‌ నగరానికి నడిబొడ్డులో వున్నట్లయ్యింది. కొన్నేళ్ల క్రితం…
  • నాయుడుపేట టు పూతలపట్టు... ఆరులైన్లకు ఆమోదం
    ఏపిలోనే అత్యంత రద్దీ ఉన్న రహదారులలో ప్రధానమైనది నాయుడు పేట - బెంగుళూరు రోడ్డు. ఏపి నుండి తమిళనాడు, కేరళ, కర్నాటక రాష్ట్రాలలోని పలు ప్రాంతాలను కలిపే ప్రధాన మార్గమిది. అంతేకాదు, ప్రముఖ ఆథ్యాత్మిక క్షేత్రాలన్నీ కొలువైన రహదారి. శ్రీకాళహస్తి, తిరుమల,…
  • జిల్లాలో వైకాపా... బలముంది... బలమైన నాయకత్వమే కావాల్సివుంది
    రాష్ట్రంలోనే వైయస్సార్‌ కాంగ్రెస్‌పార్టీ బలంగా వున్న జిల్లాల్లో నెల్లూరొకటి. కడప, కర్నూలు తర్వాత నెల్లూరుజిల్లానే వైసిపికి కంచుకోట! ఇంకోరకంగా చెప్పాలంటే ఆ రెండు జిల్లాల్లో వైసిపి నుండి గెలిచిన ఎమ్మెల్యేలు ఎక్కువ మంది తెలుగుదేశంలోకి జంప్‌ అయినా, నెల్లూరుజిల్లాలో మాత్రం ఒకే…

Newsletter