rtcనెల్లూరులోని ఆర్టీసీ బస్టాండ్‌కు నాలుగు దశాబ్దాల పైబడిన చరిత్ర ఉంది. అప్పట్లో ఈ బస్టాండ్‌ నగరానికి దూరంగా ఉన్న ట్లుండేది. ఈ నాలుగు దశాబ్దాల కాలంలో నగరం నలువైపులా విస్తరించింది. దీంతో ఆర్టీసీ బస్టాండ్‌ నగరానికి నడిబొడ్డులో వున్నట్లయ్యింది. కొన్నేళ్ల క్రితం బస్టాండ్‌లో ప్లాట్‌ఫారాలు చాలావరకు ఖాళీగా వుం డేవి. ఇప్పుడు మాత్రం ప్లాట్‌ఫారం మీద ఒక బస్సు వుంటే దానివెనుక ఇంకో రెండు బస్సులు వెయిటింగ్‌లో వుండే పరిస్థితి. ప్రస్తుతం ఆర్టీసీ బస్టాండ్‌లో 19ప్లాట్‌ఫారా లున్నాయి. అయితే పెరిగిన బస్సులకు ఈ ప్లాట్‌ఫారాలు ఏ మాత్రం సరిపోవడం లేదు. ఇటీవల తిరుమల బస్సులకు, నెల్లూరురూరల్‌ గ్రామాలకు వెళ్లే బస్సులకు ప్రత్యేక ప్లాట్‌ఫారాలు ఏర్పాటు చేశారు. అయినా కూడా బస్టాండ్‌ బస్సులతో, ప్రయాణీకులతో ఇరుకుగానే వుంటోంది. మొత్తం ఆర్టీసీ ప్రాంగణం 12ఎకరాలు. ఇందులోనే ఒకటి, రెండు డిపోలున్నాయి. ఒకప్పుడు విశాలంగా అనిపించిన బస్టాండ్‌ ఇప్పటి అవసరాలకు సరిపోవడం లేదు. బస్టాండ్‌కు వచ్చే బస్సుల సంఖ్య బాగా పెరిగింది. నైట్‌హాల్ట్‌ బస్సులు పెరి గాయి. కాబట్టి ఆర్టీసీ బస్టాండ్‌ను ఇక్కడ నుండి నగర శివారు ప్రాంతాలకు తర లించి దాదాపు 40ఎకరాల విస్తీర్ణంలో బస్టాండ్‌ను ఏర్పాటు చేస్తే బాగుంటుందనే ఆలోచనను గతంలోనే 'లాయర్‌' ప్రస్తా వించింది. దీనిమీద గతంలో జిల్లా కలెక్టర్లుగా పనిచేసిన వాళ్లు స్పందించి ప్రతిపాదనలు కూడా తయారుచేయడం జరిగింది. అయితే గతంలో వున్న ప్రజా ప్రతినిధుల నిర్లక్ష్యం మూలంగా అది ఆచరణరూపం దాల్చలేదు.

కాని, నగరంలో సగం ట్రాఫిక్‌ సమస్యకు కారణం ఆర్టీసీ బస్టాండే! ఆర్టీసీ బస్టాండ్‌కు అనుసంధానంగానే వేల సంఖ్యలో ఆటోలు, వందల సంఖ్యలో టౌన్‌ బాస్సులు నడుస్తున్నాయి. అయ్యప్పగుడి, బోసుబొమ్మల మధ్య ట్రంకురోడ్డు చాలా ఇరుకుగా మారింది. రోడ్డు మీద ఎప్పుడు చూసినా ఆటోల ర్యాలీ జరుగుతున్నట్లుగా వుంటుంది. ఆర్టీసీ బస్టాండ్‌ను ఇక్కడ నుండి మినీబైపాస్‌, జాతీయ రహదారిల మధ్యకు నగరానికి ఓ వైపు ఉండేలా మారిస్తే ట్రంకురోడ్డులో ట్రాఫిక్‌ సమస్య సగానికిపైగా తగ్గిపోతుంది.

కాని, ఇప్పుడున్న బస్టాండ్‌నే ఆధునీక రించనున్నట్లు, ఇందుకోసం 175కోట్ల రూపాయలు మంజూరు చేసినట్లుగా కూడా తెలుస్తోంది. బస్టాండ్‌లో అదనంగా 21 ప్లాట్‌ఫారాలను నిర్మించడంతో పాటు ఆర్టీసీ ప్రాంగణంలో కళ్యాణ మండపం, కమర్షియల్‌ షాపింగ్‌ కాంప్లెక్స్‌, మినీ థియేటర్‌ వంటివి ఏర్పాటు చేయడం ద్వారా ఆర్టీసీ ఆదాయాన్ని పెంచే ప్రణాళి కలు సిద్ధం చేస్తున్నారు. ఇప్పుడు 175కోట్లు పెట్టి ఆధునీకరిస్తారు, ఇంకో పదేళ్ల తర్వా తయినా మళ్ళీ ఈ బస్టాండ్‌ ఇరుకనిపి స్తుంది. అప్పుడేం చేయాలి. దీనిబదులు ఇప్పుడే బస్టాండ్‌ను నగర శివారుకు తరలించడం మంచిది.

మినీబైపాస్‌, జాతీయ రహదారికి అనుసంధానంగా మధ్యలో ప్రభుత్వానికి సంబంధించిన భూములున్నాయి. వాటిని గుర్తించి ఆర్టీసీ అక్కడకు మార్చే ప్రయత్నం చేయాలి. ప్రస్తుతమున్న ఆర్టీసీ ప్రాంగణాన్ని సంస్థ వాళ్ళు కమర్షియల్‌ కేంద్రంగా అభి వృద్ధి చేసుకుని ఆదాయం గడించవచ్చు. ఇప్పుడున్న చోట నుండి ఆర్టీసీని తరలించ డమే నగరంలో ట్రాఫిక్‌ సమస్యకు మంచి పరిష్కారం.

gunapaluఅక్రమ కట్టడాలపై నెల్లూరు నగర పాలక సంస్థ వాళ్ళు కొరడా ఝళిపిం చారు. నగరంలో గుర్తించిన అక్రమ కట్టడాలను కూల్చేసే ప్రక్రియకు శ్రీకారం చుట్టారు. మే31వ తేదీ నుండి అక్రమ కట్టడాల కూల్చివేత మొదలైంది. మొదటి రోజే ప్లాన్‌కు విరుద్ధంగా కట్టిన కట్టడాలను కూల్చారు. కట్టడాల స్లాబులపై గునపాలు దిగుతుండగా అది భవన యజమానుల గుండెల్లో దిగుతున్నట్లుగా వున్నాయి. ఆమోదించిన ప్లాన్‌లకు విరుద్ధంగా భవ నాలను నిర్మించిన యజమానులు కళ్లెదుటే కట్టడాలు కూలిపోతుండడం చూసి తట్టు కోలేకపోతున్నారు. కొందరైతే తమకు తెలిసిన కార్పొరేటర్లు, నాయకుల ద్వారా కూల్చివేతలు ఆపి వేయించేందుకు ప్రయ త్నాలు చేస్తున్నారు. కాని ఆర్‌డి ప్రదీప్‌ కుమార్‌, నగర కమిషనర్‌ ఢిల్లీరావుల పర్యవేక్షణలో అక్రమ కట్టడాల తొలగింపు ఆగడం లేదు. వేదాయపాలెం వద్ద ఓ అక్రమ కట్టడం తొలగింపు విషయంలో కార్పొరేటర్‌ రాజానాయుడుకు అధికారు లకు మధ్య వాగ్వాదం జరిగింది.

నెల్లూరులో అక్రమ కట్టడాల తొల గింపు ప్రక్రియ ఓ పెద్ద ప్రహసనంగా ఉం టోంది. అక్రమ కట్టడాలను ప్రోత్సహిస్తు న్నది, వాటికి బిపిఎస్‌, బిఆర్‌ఎస్‌ స్కీములు అమలుచేసి సక్రమం చేస్తున్నది కార్పొరేషన్‌ వాళ్ళే! ఈ స్కీములను చూసే చాలామంది ప్లాన్‌లకు విరుద్ధంగా భవనాలు కట్టుకుం టున్నారు. అనుమతి వున్నదానికంటే కూడా ఒకట్రెండు అంతస్థులు అదనంగా వేస్తున్నారు. బిఆర్‌ఎస్‌ క్రింద రెగ్యులైజ్‌ చేయించుకోవచ్చనేది వారి ధీమా! దీనికి తోడు కార్పొరేషన్‌ అధికారులు కూడా భవనయజమానుల నుండి పదో పరకో తీసుకుని, మీకెందుకు ఇష్టం వచ్చినన్ని ఫ్లోర్‌లు వేసుకోండి, మేమున్నామని భరోసా ఇస్తారు. ఇలాంటి సమయాలలో చేతులెత్తే స్తారు. కార్పొరేషన్‌ అధికారుల మామూళ్ల మూలంగానే నగరంలో చాలామంది అనుమతి పొందిన ప్లాన్‌లకు విరుద్ధంగా భవనాలను కడుతున్నారు.

అక్రమ కట్టడాలను కూల్చివేయా ల్సిందే! దీనిని ఎవరూ తప్పుబట్టరు. ఒక ఫ్లోర్‌కు అనుమతి తీసుకుని మూడు, నాలుగు ఫ్లోర్‌లు వేసేవాళ్ళ పట్ల కఠినం గానే వ్యవహరించాలి. కాని, రెండు, మూడు ఫ్లోర్‌లు అనుమతి తీసుకుని వాటర్‌ ట్యాంక్‌లు, చిన్న గదులు వంటి వాటిని కట్టుకున్నవారిని పెనాల్టీలతో సరిపెడితే బాగుంటుంది. పూర్తిస్థాయిలో నిబంధన లకు విరుద్ధంగా కట్టిన భవనాలను నేల మట్టం చేయాలి. అప్పుడే ఇంకొకరు భవన నిర్మాణాల విషయంలో నిబంధనలను అతిక్రమించకుండా వుంటారు.

nudaఅభివృద్ధి జరిగినా జరగకపోయినా కొత్త కొత్త పేర్లతో కొత్త కొత్త సంస్థలను ఏర్పాటు చేయడం చంద్రబాబుకు వెన్నతోపెట్టిన విద్య! వ్యాపారాలలో ఉండే కొందరు పనులు లేకున్నా పనులను సృష్టిస్తుంటారు. చంద్రబాబునాయుడు కూడా అంతే... ఇక్కడ రాజకీయాలలో శూన్యత ఆవరించినా తనకంటూ ఏదో ఒక పని సృష్టించుకుని, రాష్ట్రంలో ఏదో అద్భుతం జరిగిపోతుందనే భ్రమలను ప్రజలకు కల్పిస్తుంటాడు. ఈ కోవలోనే అర్బన్‌ డెవలప్‌మెంట్‌ అథారిటీలు ఏర్పడ్డాయి. రాష్ట్రంలో ఏదో ఒక డెవలప్‌మెంట్‌ చేస్తున్నామని చెప్పుకోవడానికి కొన్ని అర్బన్‌ డెవలప్‌మెంట్‌ అథారిటీలను ఏర్పాటు చేశారు. వాటిలో నెల్లూరు అర్బన్‌ డెవలప్‌మెంట్‌ అథారిటీ ఒకటి.

నెల్లూరు, చిత్తూరుజిల్లాలో నెల్లూరు కార్పొరేషన్‌తో పాటు కావలి, గూడూరు, నాయుడుపేట, సూళ్లూరుపేట మున్సిపాల్టీలను కలిపి మొత్తం కావలి కడ నుండి తడ దాకా 21మండలాలు, 156 గ్రామాలతో 'నుడా'ను ఏర్పాటు చేస్తూ ప్రభుత్వం జి.ఓను జారీచేసింది. అపాయింటెడ్‌ నోటిఫికేషన్‌ను కూడా నెల్లూరు, చిత్తూరుజిల్లాల కలెక్టర్లకు పంపించారు. నెల్లూరుజిల్లాలో జాతీయ రహదారికి ఇరువైపులా వుండే కావలి, జలదంకి, బోగోలు, దగదర్తి, అల్లూరు, కొడవలూరు, కోవూరు, నెల్లూరురూరల్‌, టీపీ గూడూరు, ముత్తుకూరు, వెంకటాచలం, మనుబోలు, గూడూరు, చిల్లకూరు, ఓజిలి, నాయుడుపేట, డి.వి.సత్రం, సూళ్ళూరుపేట, తడ మండలాల్లోని 145 గ్రామాలు, చిత్తూరుజిల్లా పరిధిలోని సత్యవేడు, వరదయ్యపాలెం మండలాలకు చెందిన 11గ్రామాలను 'నుడా'లో కలిపారు.

అపాయింటెడ్‌ తేదీ నుండి 'నుడా' అధికారికంగా మొదలైనట్లే! నెల్లూరు కేంద్రంగా 'నుడా' పనిచేస్తుంది. ప్రస్తుతానికి 'నుడా'కు పాలకవర్గాన్ని నియమించలేదు. దీనిలో ఛైర్మెన్‌ పదవి కీలకం. ముఖ్యమంత్రి ఆశీస్సులు ఎవరికి వుంటే వారికే ఈ పదవి దక్కుతుంది. ఇక స్పెషల్‌ గ్రేడ్‌ అధికారిని వైస్‌ఛైర్మెన్‌గా లేదా సిఇఓగా నిమించవచ్చు. ప్రభుత్వ శాఖల్లో మున్సిపల్‌, ఆర్ధిక, విద్యుత్‌, రోడ్లు భవనాలు, ఎన్విరాన్‌మెంట్‌ శాఖలకు చెందిన అధికారులు ప్రభుత్వం తరపున డెవలప్‌మెంట్‌ అథారిటీలో సభ్యులుగా కొనసాగుతారు.

మేయర్‌ అధికారాలకు కత్తెర

కార్పొరేషన్‌ పరిధిలో ఆదాయం వచ్చే మార్గం రియల్‌ ఎస్టేట్‌! కొత్తగా లే అవుట్‌ వేయాలన్నా, అపార్ట్‌మెంట్‌లు, భవన నిర్మాణాల ప్లాన్‌లు అప్రూవల్‌ కావాలన్నా కార్పొరేషన్‌ లేదా మున్సిపాల్టీలకే అధికారముండేది. ఇప్పుడు ఈ అధికారాలన్నీ కూడా 'నుడా'కు బదిలీ అవుతాయి. లే అవుట్‌లు వేసే వాళ్ళకు డిటిసిపి అప్రూవల్స్‌ నెల్లూరులో అందుతాయి. ఇంతకు ముందు పిటిసిపి అప్రూవల్స్‌ కోసం గుంటూరు పోవాల్సి వచ్చేది. ఆరు నెలలు తిరగాల్సి వచ్చేది.

పరిధి చాలాపెద్దది

రాష్ట్రంలో ఇప్పటికే కొన్ని అర్బన్‌ డెవలప్‌మెంట్‌ అథారిటీలున్నాయి. గతంలో కొన్ని నగరాలకే అర్బన్‌ డెవలప్‌మెంట్‌ అథారిటీలను పరిమితం చేశారు. కాని, ఇప్పుడు సువిశాల ప్రాంతాలతో అర్బన్‌ డెవలప్‌మెంట్‌లను ఏర్పాటు చేస్తున్నారు. ఇప్పుడు దాదాపు సగం నెల్లూరుజిల్లాతో 'నుడా'ను ఏర్పాటు చేసినట్లయ్యింది. జిల్లాలో అతిపెద్ద పారిశ్రామిక కేంద్రమైన కృష్ణపట్నం పోర్టు, థర్మల్‌ విద్యుత్‌ కేంద్రాలు, ఇఫ్కో సెజ్‌, చింతవరం సెజ్‌, మేనకూరు సెజ్‌, మాంబట్టు సెజ్‌, శ్రీసిటీ సెజ్‌లే కాకుండా ఇసుక, సిలికా మైకాలున్న మండలాలు, ఆక్వాసాగు చేసే మండలాలు కూడా 'నుడా' పరిధిలోకే వచ్చాయి. కాబట్టి నెల్లూరు మేయర్‌ కంటే కూడా 'నుడా' ఛైర్మెన్‌ పదవి ఎంతో కీలకమైనది, విలువైనది కూడా కాబోతోంది.

Page 1 of 6

newsbottomad

ఎక్కువగా చదివిన వార్తలు

  • అసలు పని వదిలేసి... అన్న క్యాంటిన్‌లు ఎందుకో?
    గుర్రం చేసే పని గుర్రం చేయాలి, గాడిద చేసే పని గాడిద చేయాలి... అని పెద్దలు చెప్పిన పాత మోటు సామెత అందరూ వినే వుంటారు. పారిశుద్ధ్య కార్మికుడి పని వీధులను శుభ్రంగా ఉంచడం... ఆ పని అతనే చెయ్యాలి. అదే…
  • తప్పెవరిది?
    నెల్లూరుజిల్లా డిఇఓగా మువ్వా రామలింగం వస్తున్నాడని తెలిసి జిల్లాలో అన్ని ఉపాధ్యాయ సంఘాలు ఆందోళనలు నిర్వహించాయి. మాకీ డిఇఓ వద్దంటూ ఉపాధ్యాయులు నెత్తి నోరు బాదుకుని చెప్పారు. 'పోకిరి' సినిమాలో మహేష్‌బాబు పోలీసు ఆఫీసర్‌ అని తెలిసాక అతని ట్రాక్‌రికార్డు గురించి…
  • ఆ పైపులతో... ఆయకట్టుకు నీళ్ళు కట్‌
    చేసే అభివృద్ధి పనులు ప్రజలకు మంచి చేసేలా వుండాలేగాని ఇంకొంచెం ఇబ్బందిగా మారకూడదు. ఒకరి సమస్య తీర్చడానికి చేస్తున్న పని ఇంకో పది మందికి సమస్య కాకూడదు. కాని, నెల్లూరు రూరల్‌ పరిధిలోని 31వ డివిజన్‌ శ్రామికనగర్‌ వద్ద కనుపూరు కాలువపై…
  • ఓటమి నేర్పిన పాఠమేంటి?
    గెలిస్తే ప్రపంచానికి నువ్వు తెలుస్తావ్‌... ఒక్కసారి ఓడిపోయి చూడు ప్రపంచమేంటో నీకు తెలుస్తుంది. రాజకీయాలలో గెలుపును ఆస్వాదించే వాడు కాదు, ఓటమిని భరించేవాడు, ఆ ఓటమితో పాఠాలు నేర్చుకునే వాడు, ఆ ఓటమిని రేపటి విజయానికి మెట్లుగా మలచుకునేవాడే నిజమైన రాజకీయ…
  • వైకాపాలోనూ... నేతలమధ్య కలతలు
    రాష్ట్రంలోనే వైయస్సార్‌ కాంగ్రెస్‌పార్టీ బలంగా వున్న జిల్లాల్లో నెల్లూరొకటి. ఒకప్పుడు కాంగ్రెస్‌కు కంచుకోట లాంటి ఈ జిల్లా ఇప్పుడు వైకాపాకు పెట్టనికోట అయ్యింది. 2014 ఎన్నికల్లో నెల్లూరు, తిరుపతి ఎంపి స్థానాలతో పాటు జిల్లాలో ఏడు అసెంబ్లీ స్థానాలను గెలుచుకుంది. ఆ…

Newsletter