bjpఆంధ్రప్రదేశ్‌ బీజేపీ నాయకులు మూడేళ్ళుగా ఓ సందిగ్ధావస్థలో వున్నారు. వాళ్ల మనసుల్లో వున్న భావాలను బయటకు చెప్పలేకపోతూ వచ్చారు. కేంద్రంలో మాది నీతివంతమైన పాలన అని చెప్పుకోగలిగారేగాని, రాష్ట్రంలో జరుగుతున్న ప్రభుత్వ అవినీతిని ప్రశ్నించలేకపోయారు. ప్రధానిగా నరేంద్ర మోడీ చేస్తున్న

అభివృద్ధిని చెప్పుకోగలిగారేగాని రాష్ట్ర ముఖ్యమంత్రి చంద్రబాబునాయుడు అభివృద్ధి ముసుగులో చేపట్టిన అక్రమాలను ఎదిరించలేకపోయారు. దీనికంతటికీ కారణం మిత్రపక్షం అనే ధర్మం అడ్డు రావడం. తెలుగుదేశం ప్రభుత్వంలో తామూ భాగస్వాములమై ఉండడం.

దాదాపు మూడేళ్ళుగా ఈ రాష్ట్రంలో బీజేపీ నాయకులందరు కూడా తమ నోర్లు కట్టేసుకున్నారు. రాష్ట్ర ప్రభుత్వ విధానాలు తమకు నచ్చకున్నా, చంద్రబాబు పరిపాలన ఘోరంగా వుండి ప్రజలు సమస్యలు ఎదుర్కొంటున్నా ఇంతకాలం బీజేపీ నాయకులు ప్రజల పక్షాన నిలబడి పోరాడలేకపోయారు. మిత్రపక్షం అనే ముసుగు వారి కాళ్ళకు బంధాలు బిగిస్తూ వచ్చింది. అదీగాక బీజేపీ రాష్ట్ర అధ్యక్షుడిగా ఉన్న కంభంపాటి హరిబాబు గాని, బీజేపీ నుండి మంత్రి పదవులు పొందిన కామినేని శ్రీనివాస్‌, పైడికొండల మాణిక్యాలరావులు గాని తెలుగుదేశమే మా పార్టీ, చంద్రబాబే మా నాయకుడు అన్నంతగా లీనమైపోవడంతో మిగతా బీజేపీ నాయకులకు వాయిస్‌ లేకుండా పోయింది.

అయితే ఇంతకాలం తెలుగుదేశం మీద నిలువునా రగిలిపోతూ బయటకు చెప్పుకోలేక బాధపడుతున్న బీజేపీ నాయకులకు వైకాపా అధినేత వై.యస్‌.జగన్‌ ద్వారా ఓ మంచి అవకాశం వచ్చింది. వై.యస్‌.జగన్‌కు ప్రధాని అపాయింట్‌మెంట్‌ ఇవ్వడంపై తెలుగుదేశం నాయకులు తీవ్రస్థాయిలో విమర్శలకు దిగడం తెలిసిందే!

తొలిసారిగా తెలుగుదేశంపై తిరగబడే అవకాశం బీజేపీ నాయకులకు ఈ రూపంలో వచ్చింది. ఇప్పటివరకు వున్న మిత్రపక్షం ఆంక్షలను పక్కనపెట్టేసి బీజేపీ నాయకులందరూ కూడా తెలుగుదేశంపై తీవ్ర స్థాయిలో విరుచుకుపడ్డారు. మా మోడీనే విమర్శిస్తారా? జగన్‌తో మాట్లాడకూడదని రాజ్యాంగంలో రాసుందా? ఒక ప్రతిపక్ష నేత ప్రధానిని కలిస్తే తప్పేంటంటూ పచ్చనేతలపై ముప్పేట దాడి చేశారు. ఎమ్మెల్సీ సోము వీర్రాజు, బీజేఎల్పీ నేత విష్ణుకుమార్‌రాజులతో పాటు అన్ని జిల్లాల్లోనూ బీజేపీ నేతలు టీడీపీపై విమర్శలతో విరుచుకుపడ్డారు. మన ప్రధానిని వాళ్ళు అన్నేసి మాటలంటుంటే మీరు నోరు మూసుకుని వుంటారా అని గదమాయించేసరికి బీజేపీ మంత్రులు కామినేని శ్రీనివాస్‌, మాణిక్యాలరావులు కూడా నోర్లు తెరచి దేశం నాయకుల తీరును తప్పుపట్టారు.

రాష్ట్రంలో విస్తరించాలని, పార్టీని ఇంకా శక్తివంతం చేయాలన్న స్థానిక నాయకుల ఆకాంక్షకు తెలుగుదేశంతో పొత్తే ప్రతిబంధకమవుతుంది. ఆ పార్టీతో పొత్తు లేకపోయి వుంటే ఈ పాటికి రాష్ట్రంలో బీజేపీ ఒక బలమైన పక్షంగానే ఎదిగి ఉండేది. కనీసం ఇప్పటి నుండైనా తెలుగుదేశాన్ని వదిలించుకుని రాష్ట్రంలో సొంతంగా ఎదుగుదామన్న బీజేపీ నేతల ఆశలకు జరిగిన సంఘటనలను అంకురార్పణగా చెప్పుకోవచ్చు.

vakatiనరేంద్ర మోడీ పక్కసీట్లో విమానయానం... చంద్రబాబునాయుడుతో హెలికాఫ్టర్‌ ప్రయాణం... అహ్మద్‌ పటేల్‌తో బ్రేక్‌ఫాస్ట్‌... గులాంనబీ ఆజాద్‌తో లంచ్‌... రాహుల్‌గాంధీతో డిన్నర్‌... సోనియాగాంధీతో కప్పు కాఫీ కుదిరితే నాలుగు మాటలు అన్నట్లుగా వ్యవహరించే శాసనమండలి సభ్యులు వాకాటి నారాయణరెడ్డికి ఇప్పుడు బ్రేక్‌ఫాస్ట్‌, లంచ్‌, డిన్నర్‌ అన్నీ సిబిఐతోనే జరిగిపోతున్నాయి. నేరం రుజువైతే అవన్నీ ఎక్కడ తినాల్నో వేరే చెప్పక్కర్లేదు. ఇంతకాలం నెల్లూరుజిల్లాకు ఒక లోటుండేది. విజయ్‌మాల్యా, సుబ్రతోరాయ్‌ వంటి ఆర్ధికనేరస్థులు ఒకరు కూడా జిల్లాలో లేరు. ఆర్ధిక నేరాలకు పాల్పడి సిబిఐ విచారణ ఎదుర్కొన్నవారు ఒక్కరూ లేరు. ఆ లోటును ఇప్పుడు వాకాటి నారాయణరెడ్డి తీర్చాడు.

నెల్లూరు వేదాయపాలెంలోని ఎమ్మెల్సీ వాకాటి నారాయణరెడ్డి ఇంటిలో ఇటీవల సిబిఐ సోదాలు నిర్వహించడం జిల్లా రాజకీయాలలోనే సంచలనం సృష్టించింది. నెల్లూరుజిల్లా రాజకీయాలలో ఇంతవరకు ఏ నాయకుడి మీదా ఇలాంటి మచ్చలేదు. రాజకీయాలలో సంపాదించుకున్న నాయకులున్నారు, పోగొట్టుకున్న నాయకులు వున్నారు. అయితే బ్యాంకులకు వందలకోట్లు పంగనామాలు పెట్టి సిబిఐ కేసుల్లో ఇరుక్కున్న నాయకుడు లేడు. జిల్లా రాజకీయ చరిత్రలో సిబిఐ స్థాయి ఆర్ధిక నేరస్థుడిగా నిలిచిన ఖ్యాతి వాకాటిదే అయ్యింది. వాకాటికి పలు కంపెనీలున్నాయి. ఈ కంపెనీల పేరుతో ఆయా బ్యాంకుల్లో ఋణాలు వందలకోట్లలోనే వున్నాయి. ఓ పక్క పారిశ్రామికవేత్తగా, కాంట్రాక్టర్‌గా వుంటూనే ఇంకోపక్క మూడేళ్ళ క్రితం వరకు కూడా కాంగ్రెస్‌పార్టీలో కొనసాగాడు. జిల్లాలో నేదురుమల్లికి ముఖ్య అనుచరుడిగా నడుచుకున్నాడు. వాకాటికి బిజినెస్‌ తక్కువ బిల్డప్‌ ఎక్కువ అనే పేరుంది. బ్యాంకుల నుండి తీసుకున్న వందలకోట్ల ఋణాలను వ్యాపార అవసరాలకంటే కూడా బిల్డప్‌ పనులకే ఎక్కువుగా ఖర్చు పెట్టేవాడు. నేదురుమల్లి జనార్ధన్‌రెడ్డికే ఢిల్లీలో రోజూ ఏం పని వుండదు. కాని వాకాటి మాత్రం ప్రతిరోజూ ఢిల్లీలో వుండేవాడు. అక్కడ ఏం చేసేవాడో, ఎవరిని కలిసేవాడో ఎవరికీ తెలియదు గాని, ఆయన మాత్రం పొద్దస్త మానం అహ్మద్‌పటేల్‌, గులాంనబీ ఆజాద్‌, చిదంబరంలతోనే తిరుగుతున్నట్లు చెప్పు కునేవాడు. నేదురుమల్లి జనార్ధన్‌రెడ్డి మరణించడం, రాష్ట్ర విభజన తర్వాత రాష్ట్రంలో కాంగ్రెస్‌ కూడా మరణించడం, 2014 ఎన్నికల్లో కాంగ్రెస్‌ నుండి నెల్లూరు పార్లమెంట్‌కు పోటీ చేస్తే డిపాజిట్‌ కూడా రాకపోవడం... ఇత్యాది కారణాలతో వాకాటి ఆ తర్వాత కాలంలో తెలుగుదేశంలో చేరాడు. మొన్ననే తెలుగుదేశం స్థానిక సంస్థల ఎమ్మెల్సీ టిక్కెట్‌ను తెచ్చుకుని గెలిచాడు. నారా లోకేష్‌ను గట్టిగా పట్టడంతో వాకాటికి ఎమ్మెల్సీ సీటొచ్చింది. ఈయనకు ఎమ్మెల్సీ సీటు ఇచ్చేనాటికే ఆయన బ్యాంకులకు వందలకోట్లు బకాయిలున్నాడని, బ్యాంకులు ఆయనకు నోటీసులు జారీ చేసాయనే విషయం కూడా చంద్రబాబుకు తెలుసు. వాకాటి బ్యాంకు బకాయిలపై మీడియాలో కూడా పెద్దఎత్తున కథనాలు వచ్చాయి. అయినా ఆరోజు లెక్కలు ఆరోజుకే అన్నట్లు చంద్రబాబు వాకాటికే ఎమ్మెల్సీ సీటిచ్చాడు. ఇక ఎమ్మెల్సీ ఎన్నికల సమయంలో వాకాటి బ్యాంకుల నుండి 40కోట్ల రూపాయలు డ్రా చేసి ఖర్చుపెట్టడం అతని మెడకే ఉచ్చులా తగులుకుంది. ఓ పక్క బ్యాంకుల బకాయిలు చెల్లించకుండా బ్యాంకుల నుండి 40కోట్లు ఎలా డ్రా చేస్తారంటూ భారత పారిశ్రామిక ఆర్ధిక సంస్థ చేసిన ఫిర్యాదు మేరకు సిబిఐ ఆయన మీద కేసు నమోదు చేసింది. ఈమేరకే నెల్లూరులో ఆయన నివాసంలో సిబిఐ సోదాలు నిర్వహించి కీలక డాక్యుమెంట్లను స్వాధీనం చేసుకున్నట్లు తెలుస్తోంది.

ముఖ్యంగా వాకాటి బ్యాంకుల నుండి ఋణం తీసుకునే సమయంలో గ్యారంటీగా పెట్టిన ఆస్తుల విలువను పెంచి చూపించాడని, ఉద్దేశ్య పూర్వకంగానే బ్యాంకులను మోసం చేసాడని భారత పారిశ్రామిక ఆర్ధిక సంస్థ తన ఫిర్యాదులో పేర్కొంది. ఇది నిజమే. వాకాటి బ్యాంకులకు తనఖాగా తన భూములను ఎక్కువుగా పెట్టాడు. వాస్తవంగా వున్న వాటి విలువకంటే అధిక రేట్లకు రిజిష్టర్‌ చేయించి వాటిని బ్యాంకులకు తాకట్టుగా పెట్టాడని సమాచారం. ఈరోజు అసలు, వడ్డీలు అన్నీ కలిపితే అన్ని బ్యాంకులకు కలిపి ఆయన బాకీపడ్డ మొత్తం వెయ్యికోట్లకు పైగానే ఉన్నట్లు తెలుస్తోంది. వాకాటి బ్యాంకులకు తాకట్టు పెట్టిన ఆస్తుల విలువ అందులో పదోవంతు కూడా వుండదు. బ్యాంకు బకాయిలను తీర్చడం వాకాటికి ఇప్పట్లో సాధ్యమయ్యే పని కాదు. కేవలం బ్యాంకు అప్పుల నుండి బయటపడడానికే ఆయన చంద్రబాబుకు మోకరిల్లాడు.

అయితే చంద్రబాబు, వై.యస్‌.రాజశేఖరరెడ్డి లాంటి వాడు కాదు. తప్పుడు మనిషి అని తెలిస్తే వై.యస్‌. దగ్గరకు రానీయడు. తెలియక తప్పు చేసాడని తెలిస్తే కాపాడడానికి వెనుకాడడు. బ్యాంకులకు వాకాటి వందల కోట్లు బకాయిలు వున్నాడని తెలిసినా చంద్రబాబు పార్టీలో చేర్చుకున్నాడు. ఎమ్మెల్సీ సీటు కూడా ఇచ్చాడు. అతని మీద సిబిఐ కేసు నమోదు చేసిందనగానే ఎటువంటి ముందస్తు నోటీసుగాని, విచారణ గాని లేకుండా వాకాటిని పార్టీ నుండి సస్పెండ్‌ చేశాడు. వాకాటి బురద తనకెక్కడ అంటు కుంటుందోననే భయంతోనే ఆయన ఈ పని చేశాడు.

మరి వీళ్ళ సంగతేంటి?

వాకాటి మీద సిబిఐ కేసు నమోదు చేసిందని చంద్రబాబు ఆయనను పార్టీ నుండి సస్పెండ్‌ చేశాడు. బాగానే వుంది. మరి మారిషస్‌ బ్యాంకులకు వేల కోట్ల టోపీ పెట్టి అరెస్ట్‌ వారెంట్‌ కూడా జారీ అయి వున్న కేంద్రమంత్రి సుజనాచౌదరి పరిస్థితి ఏంటి? ఆయన మీద ఏ చర్యా లేకపోగా అదనంగా కేంద్రమంత్రి పదవిలో కూడా వున్నాడు. తెలుగుదేశం జమానాలోనే రాయపాటి సాంబశివరావు, నామా నాగేశ్వరరావు, సీఎం రమేష్‌, గంటా శ్రీనివాసరావులు బ్యాంకులకు వేలకోట్లు అప్పులున్నారు. మరి వీళ్లను సస్పెండ్‌ చేసే దమ్ము చంద్రబాబుకు ఉందా? పార్టీలో వాకాటి కొక న్యాయం? మిగిలిన బ్యాంకు ఎగవేతదార్లకు ఒక న్యాయమా? అనే ప్రశ్న కూడా పార్టీ కార్యకర్తల్లోనే వ్యక్త మవుతోంది. మొత్తానికి వాకాటి ఎపిసోడ్‌ కీలక దశకు చేరుకుంది. ఒక నాయకుడు సిబిఐ చేతిలో పడ్డాడంటే అది అతని ప్రాభవానికి ఆరంభమైనా కావాలి, లేదా అంతమైనా కావాలి. ఎప్పుడూ ఢిల్లీ స్థాయిలోనే మాట్లాడే వాకాటిని అదే స్థాయికి తగ్గ కేసు పట్టుకుంది. ఆయన ఆర్ధిక నేరాలను సిఐడి, ఇంటలిజన్స్‌ వంటి సంస్థల చేత విచారణ చేయిస్తే ఆయనకు అది చిన్నతనం కూడా! వాకాటి బిల్డప్‌కు తగ్గట్లుగానే ఆయన ఆర్ధిక నేరంపై సిబిఐ కేసు విచారణ చేపట్టడం వాకాటి స్థాయిని పెంచేదే!

chandraఅసలు ఢిల్లీలో ఏం జరిగింది? ఏం జరుగుతోంది? ఏం జరగబోతోంది? నాకిప్పుడే తెలియాలి అన్నంత ఉద్వేగానికి లోనవుతున్నాడు ముఖ్యమంత్రి చంద్రబాబు నాయుడు. వైసిపి అధినేత జగన్‌కు ప్రధాని నరేంద్రమోడీ అపాయింట్‌మెంట్‌ ఇవ్వడాన్ని ఆయన ఓ పట్టాన జీర్ణించు కోలేకపోతున్నాడు. ఆయన అమెరికాలో ఉండగానే ప్రధానిని జగన్‌ కలిసాడన్న వార్త చెవిన పడింది. అక్కడే మనశ్శాంతిగా ఉండలేకపోయాడు. అమెరికా నుండి నేరుగా వచ్చి ఢిల్లీలో దిగగానే తన వెంటవున్న వారిని హైదరాబాద్‌ పంపించేసాడు. తాను మాత్రం ఏడు గంటలపాటు ఎవరికీ అందుబాటులో లేకుండా గడిపాడు. జగన్‌ ప్రధానిని ఎందుకు కలిసాడు, ఏం చెప్పాడు, అసలు అర్ధాంతరంగా జగన్‌కు అపాయింట్‌మెంట్‌ ఇవ్వడం వెనుక ఆంతర్యమేమిటన్నది తెలుసుకోవడం కోసమే ఆయన ఆ కొన్ని గంటలు అజ్ఞాతంలో గడిపినట్లు తెలుస్తోంది.

ఒకప్పుడు చంద్రబాబుకు ఢిల్లీలో కూడా గట్టి నాయకుడనే పేరుండేది. 1996లో 13రోజుల ప్రధాని వాజ్‌పేయిని దించేసి యూనైటెడ్‌ ఫ్రంట్‌ కూటమిని కట్టించింది చంద్రబాబే! ఆ తర్వాత 1998, 1999లలో ఏర్పడ్డ ఎన్డీఏ ప్రభుత్వాల లోనూ కీలక భాగస్వామిగా వున్నాడు. 2002 గుజరాత్‌ అల్లర్ల సమయంలో ఆ రాష్ట్ర ముఖ్యమంత్రిగా వున్న ప్రస్తుత ప్రధాని నరేంద్రమోడీని జైలులో పెట్టాలంటూ నినదించిన ధైర్యశాలి. గత చరిత్రను చూస్తే జాతీయ రాజకీయాలలో చంద్రబాబు ట్రాక్‌ రికార్డు బాగానే వుంది. అంత పలుకుబడి కలిగిన నాయకుడు జగన్‌ ప్రధానిని కలిసాడని తెలియగానే చలి జ్వరం వచ్చినట్లు వణికిపోయాడు. రాజకీయాలలో ప్రధానిగా వున్నవారిని ఏ పార్టీ నేత అయినా కలవవచ్చనే పద్ధతిని మరచి, జగన్‌కు ప్రధాని అపాయింట్‌మెంట్‌ ఎలా ఇస్తారని మాట్లాడారు. జగన్‌కు అపా యింట్‌మెంట్‌ ఫిక్స్‌ చేసిన పిఎంఓ కార్యా లయాన్నీ చంద్రబాబు ప్రశ్నించినట్లయ్యింది.

అయినా జగన్‌కు మోడీ అపాయింట్‌ మెంట్‌ ఇస్తే చంద్రబాబు ఇంతగా ఆక్రోశం చెందాల్సిన అవసరం ఏముంది? తను ఏదో అభద్రతాభావంతో ఉండబట్టే ఇలా నోరు పారేసుకుంటున్నాడు. ఏపిలో జరిగిన, జరుగుతున్న అక్రమాలను మోడీకి జగన్‌ చెవిలో వూదాడనే కోపంతోనే ఆయన ఈ అరుపులు అరుస్తున్నాడు.

వాస్తవంలోకి వస్తే చంద్రబాబు అంటే మోడీకి ఏమంత నమ్మకం, గౌరవం లేదు. అవసరాన్ని బట్టి చంద్రబాబు రాజకీయ రంగులు మారుతాయని తెలుసుకోలేనంత అమాయకుడు కాడు మోడీ! ఈరోజు తమతో అవసరం వుంది కాబట్టి అణిగి మణిగి వుంటున్నాడు. రేపు బీజేపీకి రెండు చోట్ల పరాభవాలు ఎదురై, మోడీ క్రేజ్‌ తగ్గిందంటే ఇదే చంద్రబాబు దేశంలోని బీజేపీ వ్యతిరేక పార్టీలన్నింటిని కలిపి తృతీయ ఫ్రంట్‌ అనే టెంట్‌ను వేస్తాడు. రాజకీయ స్నేహానికి చంద్రబాబు నమ్మ కస్తుడు కాడు. కాని ఇచ్చిన మాట కోసం సోనియాగాంధీనే ఎదిరించి, 16నెలలు జైలులో గడిపిన జగన్‌ను రాజకీయంగా నమ్మొచ్చు. అదీగాక జగన్‌కు రాష్ట్రం తప్పితే జాతీయ రాజకీయాల మీద ఆశ, ఆసక్తి ఉండదు. కాబట్టే బీజేపీలో జగన్‌ పట్ల సానుకూల ధోరణి కనిపిస్తోంది.

బీజేపీకి జగన్‌ జత కలిస్తే రాష్ట్రంలో తనకు చుక్కలు చూపిస్తారనే భయం చంద్రబాబుకు పట్టుకుంది. ముఖ్యంగా 'ఓటు-నోటు' కేసు బాబు మెడ మీద కత్తిలా వేలాడుతోంది. ఈ కేసును ముందుకు సాగనీయకుండా ఇప్పటివరకు కేంద్రమే ఆదుకుంటోంది. ఈ కేసులో చంద్రబాబు వాయిస్‌ రికార్డర్‌ కూడా పక్కా సాక్ష్యంగా వుంది. ఇక అమరావతి రాజధాని భూముల సేకరణ దగ్గర్నుండి, పుష్కరాలకు వేలకోట్లు తగలేయడం, పోలవరం పూర్త యితే పనికిరాని పట్టిసీమ, పురుషోత్తమ పట్నం వంటి ప్రాజెక్ట్‌లు కేవలం డబ్బు కోసం చేపట్టినవేననే విషయం తెలియంది కాదు. ఏ రాష్ట్రంలోనైనా మోడీ తాను కాలు పెట్టాలనుకుంటున్నప్పుడు అక్కడ ముందుగా సిబిఐ దాడులు జరగడం చూస్తున్నాం. ప్రస్తుతం మోడీ ఏపిని టార్గెట్‌ చేసాడు. ఇక్కడ బీజేపీకి జగన్‌ లక్ష్యం కాదు. చంద్రబాబును నిర్వీర్యం చేయడమే అసలు ఉద్దేశ్యం. ఈ మూడేళ్లలో చంద్ర బాబుకు కేంద్రం వట్టి మాటలు చెప్పడం తప్ప ఎలాంటి సాయం చేయలేదు. విభజన బిల్లులో చెప్పిన ప్రత్యేకహోదా విషయంలో కూడా ఆయన రాజీపడడం ప్రజల్లో చంద్రబాబు నాయకత్వ స్థాయిని దిగజార్చింది. కేంద్రం ద్వారా చంద్రబాబు రాష్ట్రానికి ఏ పనులూ సాధించలేక పోయాడు, సరికదా అసలే అప్పుల్లో వున్న రాష్ట్రంలో ఈయన చేసిన ఆర్భాటపు పను లన్నీ కూడా ప్రజలకు పని కొచ్చేవి కావు. రాష్ట్ర ప్రభుత్వంలో జరిగే అవినీతి, అక్ర మాలపై సిబిఐ విచారణ చేయిస్తే ఎన్నో లొసుగులు బయటపడతాయి. చంద్రబాబు సర్కార్‌ను ప్రజా బోనులో దోషిగా నిల బెట్టడం ఇప్పుడున్న పరిస్థితుల్లో మోడీకి ఏమంత కష్టం కూడా కాదు.

ఏపిలో తెలుగుదేశాన్ని నిర్వీర్యం చేయాలన్నా, చంద్రబాబును బలహీన పరచాలన్నా మోడీకి చిటికెలో పని. తన విషయంలో మోడీ ఆ పని చేయకపోవ చ్చని చంద్రబాబుకు ఇంతకాలం బలమైన నమ్మకం ఉండేది. కాని మోడీని జగన్‌ కలిసొచ్చాక, మోడీ చేతికి అతను చంద్ర బాబు గారి అక్రమాల చిట్టా పద్దులు ఇచ్చి వచ్చాక ఆ నమ్మకం కూడా పోయింది. మోడీ ఎక్కడ ఎప్పుడు తనకు ఎసరు పెడ తాడోననే ఆందోళన బాబులో కనిపిస్తోంది.

Page 1 of 104

newsbottomad

ఎక్కువగా చదివిన వార్తలు

  • హద్దులు మీరిన నేతలు కోటలు దాటిన మాటలు
    నోరు మంచిదైతే ఊరు మంచిదవుతుంది. పేరు నిలబడుతుంది. అదే నోరు హద్దు దాటితే దశాబ్దాల చరిత్ర కాదు, శతాబ్దాల చరిత్రకల వాళ్ళు కూడా చరిత్రగర్భంలో కలిసిపోతారు. మాట, మన్నన రాజకీయ నాయకులకు చాలా అవసరం. ప్రజలలో వారి ఔన్నత్యాన్ని పెంచేది కూడా…
  • దుగరాజపట్నం పోయింది... ఇక రామాయపట్నం మిగిలింది
    దుగరాజపట్నం పోర్టు ఇక లేదనే విషయం తేటతెల్లం కావడం తెలిసిందే! ఈ పోర్టు వల్ల లాభం లేదని కూడా 'నీతి అయోగ్‌' పేర్కొంది. దీంతో ఇప్పుడు రామాయపట్నం పోర్టు రాజకీయ నాయకుల ప్రచారాస్త్రమైంది. కావలి సమీపంలోని రామాయపట్నం పోర్టు సాధన కోసం…
  • దుగరాజపట్నం ఎత్తేసినట్లే?
    దాదాపు పదేళ్ళుగా నెల్లూరుజిల్లా ప్రజలను ఊరిస్తూవస్తున్న దుగరాజపట్నం పోర్టు అంశం ఎత్తిపోయినట్లే కనిపిస్తోంది. ఈ పోర్టు కోసం గత కొన్నేళ్ళుగా ఎన్నో ప్రయత్నాలు జరిగాయి. గత యూపిఏ ప్రభుత్వంలో రాష్ట్రంలో మూడు ప్రాంతా లను పోర్టు నిర్మాణానికి పరిశీలించి, చివ రకు…
  • ఠారెత్తిస్తున్న సూరీడు
    మే నెల... రాళ్ళు, రోళ్ళు పగిలే ఎండలు... దీనికితోడు వడగాల్పులు... పగలు లేదు రాత్రి లేదు... ఎప్పుడైనా ఉక్కపోతే. ఈ వేసవిలో 38డిగ్రీలతో మొదలైన ఉష్ణో గ్రతలు ఇప్పుడు 45డిగ్రీలను తాకాయి. 14వ తేదీ 43డిగ్రీల ఉష్ణోగ్రత నమోదు కాగా 15వ…
  • మండుటెండల్లో... వణుకుతున్న చంద్రన్న!
    అసలు ఢిల్లీలో ఏం జరిగింది? ఏం జరుగుతోంది? ఏం జరగబోతోంది? నాకిప్పుడే తెలియాలి అన్నంత ఉద్వేగానికి లోనవుతున్నాడు ముఖ్యమంత్రి చంద్రబాబు నాయుడు. వైసిపి అధినేత జగన్‌కు ప్రధాని నరేంద్రమోడీ అపాయింట్‌మెంట్‌ ఇవ్వడాన్ని ఆయన ఓ పట్టాన జీర్ణించు కోలేకపోతున్నాడు. ఆయన అమెరికాలో…

Newsletter