tomatoనెల్లూరులో గతంలో ఎప్పుడూ లేనివిధంగా కూరగాయల ధరలు ప్రజలను బెంబేలెత్తిస్తున్నాయి. కరువు కాలంలో కూడా ఇంత ధర లెప్పుడూ లేవు. ఏ కూరగాయలైనా సరే ముట్టుకుంటే మండిపో తున్నాయి. 'భలే కొన్నావులే పో'..అంటూ సామాన్యుల వైపు గుర్రు మంటూ క్రూరంగా చూస్తున్నాయి.

వంకాయల బుట్టలో వేలుపెడితే చాలు.. సర్రుమంటుంది ధర. వందరూపాయల కాయితం ఉంటే తప్ప కిలో వంకాయలు రావు. అయినా, ముక్కారు పండే నెల్లూరుసీమలో వంకాయలు వంద రూపాయలు అమ్మడం ఎప్పుడైనా విన్నామా?.. కిలో టమోటాలు 80 నుంచి 100 దాకా అమ్ముతారని కలలోనైనా అనుకున్నామా?... ఒక్క వంకాయలు, టమోటాలే కాదు అన్ని కూరగాయల ధరలూ ఇలాగే భగ్గుమంటున్నాయి. క్యారెట్‌, బీన్స్‌ వగైరాలన్నీ కూడా వందిస్తేనే సంచిలో పడేది. చివరికి బీరకాయలు కూడా కిలో 60 నుంచి 70దాకా ఉంది. 50 రూపాయలు తీసుకెళ్తే బోలెడన్ని కూరగాయలు వచ్చే రోజులు పోయి, 500 తీసుకెళ్ళినా చిన్న సంచీ కూడా నిండని దుస్థితి వచ్చేసింది. ఇది కలికాలమో.. ఆకలి కాలమో తెలియదు కానీ, అన్ని ధరలూ హాయిగా ఆకాశానికి అంటిపోతున్నా, సామాన్యుడు ఈ ధరలతో బతక లేక చస్తున్నా అటు ప్రభుత్వాలు కానీ, ఇటు పాలకులు కానీ పట్టించు కోకపోవడమే దారుణం. ఎప్పటికప్పుడు జనాన్ని ఉద్ధరించేటట్టు ఊక దంపుడు ఉపన్యాసాలే తప్ప, ప్రజలకు నిత్యావసరాలైన వస్తువుల ధరల నియంత్రణకు చేసిందేమీ ఉండడం లేదు. కొంటే కొనండి..లేకుంటే మానుకోండి..అన్నట్లుగా ఎవరికి వారు నిర్లక్ష్యంగానే ఉంటున్నారు. వర్షాల వల్ల తోటలు దెబ్బతిన్నాయని వ్యాపారులు చెప్తున్నప్పటికీ, మార్కెట్లో కొరత లేకుండా కూరగాయలు వస్తూనే ఉన్నాయి. కానీ ధరలు మాత్రమే బోలెడంత పెరుగుతున్నాయి. తూకమైనా సరిగ్గా ఉంటుందా అంటే..అదీ నమ్మకం లేదు. అదేమని అడిగితే లేనిపోని కసుర్లు..విసుర్లు.

కారణాలు ఏమైనా, వంకాయలు కిలో వంద, టమోటాలు కిలో వందరూపాయలు పెట్టి కొనాలంటే సామాన్యులు, పేదలకు సాధ్యమా?.. అని ఆలోచించేవారే లేరు. అంతంత ధరలు పెట్టి కొనాలంటే జరిగే పనేనా?.. మార్కెట్లలో ఉండే ధరలే మండిపోతుంటే, ఇక వీధుల్లో వాడల్లో వుండే చిన్న చిన్న కూరగాయల దుకాణాల్లో ఇదే అదనుగా ఆ ధరలు మరింతగా పెంచేస్తున్నారు. ధర బాగా పెరుగుతుందని తెలిసే కూరగాయలను ముందస్తుగా తెచ్చుకుని, అదనుచూసి ధరలు మరింతగా పెంచి అమ్ముకునే తెలివిగల వ్యాపారులు మరెంతో మంది. ధరెంతున్నా కొనే మారాజులు ఎలాగూ ఉంటారు కాబట్టి వారివారి వ్యాపారాలు జోరుగానే ఉంటున్నాయి కానీ, సామాన్య వినియోగదారులే రోజూ బిక్కముఖంతో దిగాలుపడిపోతున్నారు. కేవలం పది రూపాయలకే వచ్చే కూరగాయలు కూడా ఇప్పుడు 50 పైగానే ధరలు పలుకుతున్నాయి. పచ్చిమిరపకాయలు కిలో 60, ముల్లంగి కిలో 60, అల్లం కిలో 80. కొంటే కొనండి.లేకపోతే పొండి. ఇకపోతే, గోరుచిక్కుడు, మునక్కాయలు, కాకరకాయలు, బీట్రూట్‌ వంటివన్నీ కిలో 40పైమాటే. మొన్న మొన్నటి దాకా 10రూపాయలున్న కొత్తిమీర కట్ట కావాలంటే ఇప్పుడు 20 ఇవ్వాలి. పొదీనా కూడా అంతే. కరేపాకు గతంలో 5 రూపాయలిచ్చినా ఇచ్చేవారు. ఇప్పుడు పది రూపాయలు లేనిదే రావడం లేదు. ఆకుకూరలు, కూరగాయలు పోటాపోటీగా పెరుగుతూనే ఉన్నాయి. ఈ ధరలు కూడా నగరంలో ఒక్కో చోట ఒక్కో విధంగానూ, జిల్లాలో ఒక్కో ప్రాంతంలో ఒక్కో విధంగానూ ఉంటాయి. అయితే, ఎక్కడైనా మరింత పెరిగే ధరలే తప్ప తరగడమన్నది ఉండడం లేదు. ఇలా అన్నిటి ధరలూ పెరిగిపోయి సామాన్య, మధ్యతరగతి ప్రజలు, పేదలు నిత్యం నానా అవస్తలు పడుతున్నా పట్టించుకునే నాధులే లేరు. కోట్లాది రూపాయల పథకాలంటూ ప్రజలను మభ్యపెట్టడమే తప్ప, రోజూ కనీసం మంచి కూరలు తినేందుకు కూడా మొహం వాచిపోతున్న పేదల, సామాన్యుల స్థితిగతులను పట్టించుకునేవారే లేరు. రైతుబజార్లంటూ అక్కడక్కడా నామకార్ధం ఉన్నాయే తప్ప వాటి వల్ల సామాన్య జనానికి ఒరిగిందేమీ లేదు. ధరలు ఆకాశానికి అంటిపోయి ప్రజలు విలవిలలాడిపోతున్నా ఒక్క అధికారికి కానీ, నాయకునికి కానీ పట్టడం లేదంటే, వారు ప్రజ లతో ఎంత మమేకం అవుతున్నారో అర్ధమవుతూనే ఉందని, ప్రజల సమస్యలను పరిష్కరించడమే మా ధ్యేయం..అంటూ గొప్పలు చెప్పుకునే నాయకులు..ప్రజలకు నిత్యసమస్యగా మారిపోయిన కూరగాయల ధరలు ఇంతగా మండిపోతున్నా నిర్లిప్తంగానే ఉండడం ఏమిటని ప్రజలు తీవ్ర అసంతృప్తి వ్యక్తం చేస్తున్నారు. ఎప్పటికప్పుడు మార్కెట్లలో ఈ ధరలను పరిశీలిస్తూ, అనూహ్యంగా పెరిగిపోతున్న కూరగాయల ధరలను నియంత్రిస్తూ, అవసరమైతే ప్రత్యామ్నాయ ఏర్పాట్లను చేస్తూ ఎల్లవేళలా ప్రజలకు అందుబాటులో ఉండాల్సిన అధికారగణం ఎప్పుడో తనిఖీల పేరుతో హడావిడీ చేయడమే తప్ప ఈ బాధలు అసలు పట్టించుకోవడం లేదని ప్రజలు ఆవేదన వ్యక్తం చేస్తున్నారు. జిఎస్టీ వస్తే సామాన్యులకు అవసరమైన వస్తువుల ధరలు పెరగవని, కూరగాయల ధరలు కూడా పెరగవని అనుకున్నవారంతా ఆచరణలో అవి మూడింతలు నాలుగింతలు పెరగడంతో గుండెలు బాదుకుంటు న్నారు. ఏదేమైనా, భగ్గుమని మండిపోతున్న కూరగాయలను కొనలేక పేద, మధ్యతరగతి గృహిణులు పడే వేదన వర్ణనాతీతం. ఇప్పటికైనా ప్రభుత్వం, జిల్లా ఉన్నతాధికారులు ఈ మండే ధరలపై దృష్టి సారించి బాగా నియంత్రించి, ఈ ధరల బాదుడు నుంచి ప్రజలను వెంటనే ఆదుకోవాల్సి ఉంది.

pkజగన్‌ అంటే జనంలో అపార అభిమానముంది. వై.యస్‌. కుటుంబంతో తెలుగు లోగిళ్ళకు అపురూప అనుబంధముంది. ''రాజన్న''న్నా ఆయన కుమారుడన్నా ప్రాణాలిచ్చే అభిమానులు తెలుగు నాటంతా వున్నారు. ఎవరు చెప్పినా ఎవరు చెప్పకపోయినా రాజశేఖరరెడ్డి కోసం ఆయన కుటుంబం కోసం పనిచేసే నాయకులు, కార్యకర్తలు వై.యస్‌.ఆర్‌. కాంగ్రెస్‌పార్టీకి సిద్ధంగా వున్నారు. కదన రంగంలో ప్రాణాలొడ్డి పోరాడే సైనికుల్లా కార్యకర్తలుంటే వాళ్ళకి దశాదిశా నిర్ధేశించి ముందుకు నడిపించే మేజర్లలా నాయకులున్నారు. అందరి లక్ష్యం ఒక్కటే. అందరి ధ్యేయం ఒక్కటే. అందరి ఆశ, ఆశయం, ఆకాంక్ష ఒక్కటే! 2019లో వై.యస్‌. జగన్మోహన్‌రెడ్డిని ముఖ్యమంత్రిగా చూడాలి. ''రాజన్న'' ఆత్మకు నిజమైన శాంతిని చేకూర్చాలి. మరి ఇలాంటి తరుణంలో ఎవరో కొత్త వ్యక్తిని తెరపైకి తెచ్చి ఆయన మార్గదర్శకంలో పార్టీని గెలి పించుకుందాం అని పిలుపునివ్వడం సబబు కాదు.

1983లో తెలుగుదేశం పార్టీని స్థాపించిన నందమూరి తారక రామారావుకు ఎవరు వ్యూహకర్తలుగా పని చేశారు? ఎవరి సలహాలు లేకుండానే ఆయన ప్రజా ప్రభంజనం సృష్టించలేదా? 1989లో ఎటువంటి రాజకీయ వ్యూహకర్తలు లేకుండానే, కనీసం సీఎం అభ్యర్థిని కూడా ప్రకటించకుండానే ఈ రాష్ట్రంలో కాంగ్రెస్‌ పార్టీ అధికారంలోకి రాలేదా? 2004లో ఎవరి వ్యూహాలతో కాంగ్రెస్‌ అధికారంలోకి వచ్చింది? వ్యూహకర్తలతో విజయం లభించిందా? లేక వై.యస్‌. ఇమేజ్‌తో పార్టీ గెలిచిందా? అంతెం దుకు 2014 ఎన్నికల్లో తన సొంత వ్యూహాలతోనే చంద్రబాబు అధికారంలోకి రాలేదా?

గెలుపు అన్నది ఆ బ్రహ్మ వ్రాసి వుండాలి, లేదా ప్రజలు వ్రాయాలి. లేదంటే మన సొంత కృషితో మనమే తిరగరాయాలి. అంతేగాని, మన పార్టీ గెలుపు కోసం ఎవరో వచ్చి ఏదో చేస్తారని ఆశించడం కరెక్ట్‌ కాదు. ఇప్పుడు దేశమంతటా ఎన్నికలొస్తే ప్రధానంగా వినిపిస్తున్న పేరు ప్రశాంత్‌ కిషోర్‌(పీకే). 2014 ఎన్నికల్లో బీజేపీకి రాజకీయ వ్యూహకర్తగా వ్యవహరించాడు. ఆ ఎన్నికల్లో బీజేపీ ఘనవిజయం సాధించి మోడీ ప్రధాని అయ్యారు. అలాగే ఆ తర్వాత బీహార్‌ అసెంబ్లీ ఎన్నికల్లోనూ నితీష్‌కుమార్‌కు ఆయన వ్యూహకర్తగా పనిచేశాడు. ఆ ఎన్నికలలోనూ దళ్‌(యూ) ఆర్జేడీ కూటమి ఘనవిజయం సాధించాయి. దీంతో ప్రశాంత్‌ కిషోర్‌ పేరు మార్మోగిపోయింది. అయితే ఇక్కడ ఆలోచించా ల్సింది... ప్రశాంత్‌ కిషోర్‌ సహకారం లేకపోయి వుంటే 2014 లోక్‌సభ ఎన్నికల్లో బీజేపీ గెలవదా? బీహార్‌లో దళ్‌(యూ) గెల వదా? ఎవరున్నా లేకున్నా లోక్‌సభలో బీజేపీ గెలుపును, బీహార్‌లో నితీష్‌ గెలుపును ఎవరూ ఆపగలిగేవారు కారు. ఎందుకంటే యూపిఏ ప్రభుత్వాన్ని దించేయాలని ప్రజలు డిసైడైపోయారు. ప్రశాంత్‌కిషోర్‌ లేకున్నా, ప్రధాని అభ్యర్థిగా మోడీని ప్రకటించక పోయి వున్నా ఆ ఎన్నికల్లో అధికారం ఎన్డీఏదే! కాకపోతే మోడీని ప్రధాని అభ్యర్థిగా ప్రకటించడంవల్ల అధికారం బీజేపీది అయ్యింది. బీహార్‌లోనూ అంతే! నితీష్‌కుమార్‌పై ప్రజల్లో వ్యతిరేకత లేదు. ఆయన సమర్ధుడైన ముఖ్యమంత్రి. బీహార్‌ను అభివృద్ధి బాట పట్టించాడు. దానికితోడు బలమైన ఓటు బ్యాంకున్న ఆర్జేడీతో పొత్తు వుంది. ఆ ఎన్నికల్లో ప్రత్యర్థిగా వున్న బీజేపీ సమర్ధుడైన సీఎం అభ్యర్థిని చూపలేకపోయింది. మరి బీహార్‌ ప్రజలు నితీష్‌ను కాక ఇంకెవరిని గెలిపిస్తారు? మరి ప్రశాంత్‌కిషోర్‌ రాజకీయ వ్యూహాలు అంత బాగా పనిచేస్తే మొన్న ఉత్తరప్రదేశ్‌ ఎన్నికల్లో అధికారంలో వున్న సమాజ్‌ వాది పార్టీ ఎందుకు చతికిలపడింది. ఏ పార్టీ వాళ్లయినా రాజకీయ వ్యూహకర్తలను పెట్టుకోవడంలో తప్పులేదు. అయితే అది పార్టీ అంతర్గత వ్యవహారాలకే పరిమితం కావాలి. ఒక పార్టీ విజయంలో పార్టీ అధినేత నుండి నియోజకవర్గ స్థాయి నాయకులు మొదలుకొని బూత్‌ స్థాయి కార్యకర్తల వరకు అందరికృషి ఉంటుంది. ఏ పార్టీ గెలుపులో అయినా మొదటి భాగస్వాములు కార్యకర్తలే! అంతేగాని, ప్రశాంత్‌ కిషోర్‌ లాంటి వ్యూహకర్తలు కాదు. వ్యూహకర్తలే పార్టీలను అధికారంలోకి తెచ్చే టట్లుంటే భారత రాజకీయ వ్యవస్థను ఇక వాళ్లే శాసించగలరు.

వైకాపా అధ్యక్షుడు జగన్‌, ప్రశాంత్‌కిషోర్‌ను వ్యూహకర్తగా నియమించుకుని వుండొచ్చు. కాని అది పార్టీ అంతర్గత సమా వేశాలకే పరిమితమై వుండాలి. అంతేగాని ప్లీనరీ వంటి బహిరంగ వేదికలనెక్కించి, ఆయన పుణ్యాన ఇక మనం అధికారంలోకి రానున్నాం అన్నట్లు మాట్లాడకూడదు. ఈ రాష్ట్రంలో రాజకీయ పరిస్థితులు, ప్రజా సమస్యలు ప్రశాంత్‌కిషోర్‌ కంటే జగన్‌కే ఎక్కువ తెలిసుండాలి. ప్రజాసమస్యలపై జగన్‌ స్పందించాలి. వైకాపాకు వేలసంఖ్యలో నాయకులు, లక్షల సంఖ్యలో కార్యకర్తలు, కోట్ల సంఖ్యలో ప్రజలు మద్దతుగా వున్నారు. ప్రభుత్వ వ్యతిరేకత బలంగా వుంది. ఈ అవకాశాలను అనుకూలంగా మలచుకోవాలి. 2004లో ఎలాంటి ప్రశాంత్‌ కిషోర్‌లు లేకుండానే చంద్రబాబు ప్రభుత్వాన్ని మట్టికరిపించాడు వై.యస్‌.రాజశేఖరరెడ్డి. ఇప్పుడు కావలసింది వ్యూహకర్తలు కాదు, సమన్వయకర్తలు. రాజకీయాలతో సంబంధం లేని వై.యస్‌. కుటుంబ ఆప్తులను జగన్‌ 13జిల్లాల్లో సమన్వయకర్తలుగా పెట్టుకోవాలి. ఇతరులతో సంబంధం లేకుండా ఆ సమన్వయకర్తలతో నేరుగా జగన్‌ సంబంధాలు పెట్టుకోవాలి. గ్రామస్థాయి నుండి ఎక్కడ ఏ లోపాలున్నా వెంటనే సరిదిద్దుకునే ప్రయత్నం చేయాలి. ప్రతి జిల్లాలోనూ మారుతున్న సమీకరణలను ఎప్పటికప్పుడు తనకు తెలియజేయగలిగే నిస్వార్ధ వ్యక్తిగత వ్యక్తులని ఆయన 13జిల్లాల్లో ఏర్పాటు చేసుకోవాలి. గతంలో వై.యస్‌. చేసింది కూడా ఇదే. ఎక్కడ సమస్య ఉందని ఆయన దృష్టికి తీసుకెళ్లినా వెంటనే స్పందించేవాడు. ఇందుకు ఎన్నో ఉదా హరణలు ''లాయర్‌'' వద్దనే ఉన్నాయి.

''ప్రజలే దేవుళ్ళు... సమాజమే దేవాలయం'' అన్న రామా రావు సిద్ధాంతాన్నే వై.యస్‌. కూడా నమ్మాడు. అందుకే నేరుగా ప్రజల్లోనే మమేకమయ్యాడు. ఎక్కడేం జరుగుతుందో తన ఆంతరంగిక వ్యక్తుల ద్వారా తెలుసుకునేవాడు. ఎక్కడైనా సమస్య ఉంటే పరిష్కరించి పరిస్థితిని తనకు అనుకూలంగా మలచు కునేవాడు. మన రాష్ట్రం గురించి, మన ప్రజల సమస్యల గురించి మనకు అవగాహన వుంటే చాలు, వాటిని పరిష్కరిస్తామని మనం ప్రజలకు నమ్మకం ఇవ్వగలిగితే చాలు... ఎలాంటి ప్రశాంత్‌ కిషోర్‌ల అవసరం లేకుండానే విజయం సొంతమవుతుంది.

jaganగతానికి భిన్నంగా, గతంకంటే ఉత్సాహంగా ఆంధ్రప్రదేశ్‌ నడిబొడ్డు గుంటూరు కేంద్రంగా రెండు రోజుల పాటు జరిగిన వైయస్సార్‌ కాంగ్రెస్‌పార్టీ ప్లీనరీ సమావేశాలు ప్రభుత్వంపై ప్రజల్లో వున్న వ్యతిరేకతకు, ప్రజానేత జగన్‌పై వున్న నమ్మకానికి నిదర్శనంగా నిలిచాయి.

ప్రతిఏటా ఇడుపులపాయలో వైసిపి ప్లీనరీలు జరిగేవి. అయితే అక్కడ దివంగత నేత వై.యస్‌.రాజశేఖరరెడ్డి సమాధి ఉండడం తప్ప ఆ ప్రాం తంలో ఇంకెటువంటి రాజకీయ ప్రాధాన్యత లేదు. కాని, ఈసారి ప్లీనరీకి గుంటూరును ఎంచుకుని రాజకీయ వ్యూహాత్మకంగా ముందడుగు వేసాడు వై.యస్‌.జగన్మోహన్‌రెడ్డి. కొంతకాలం క్రితమే విశాఖ కేంద్రంగా తెలుగుదేశంపార్టీ వాళ్లు నిర్వహించిన మహానాడుకు, నిన్న జరిగిన వైసిపి ప్లీనరీకి తేడా కొట్టొచ్చినట్లు కనిపించింది. మహా నాడులో అధికార ఆర్భాటం స్పష్టంగా కనిపిస్తే, వైసిపి ప్లీనరీలో మాత్రం పార్టీపై అభిమానం, ప్రభుత్వం పట్ల వున్న వ్యతిరేకత స్పష్టమైంది.

గుంటూరు ప్లీనరీని ప్రతిపక్ష నేత వై.యస్‌.జగన్మోహన్‌రెడ్డి చక్కని రాజకీయ వేదికగా మలచుకున్నాడు. భవిష్యత్‌ కార్యా చరణ ప్రణాళికను స్పష్టంగానే ప్రకటించ గలిగాడు. రాష్ట్రంలో మూడేళ్ల చంద్ర బాబు పాలనను ఎండగట్టడం లోనే కాదు, తాము అధికా రంలోకి వస్తే ఏం చేస్తామన్నది కూడా ప్రజల్లోకి తీసుకెళ్లగలిగారు. ప్లీనరీలో తెలుగుదేశం ప్రభుత్వ వైఫల్యాలకే గురిపెట్టి జగన్‌ కొత్త పథకాలను ప్రకటించాడు. ఎన్నికలు ఇంకా దాదాపు రెండేళ్ల దూరంలో వున్నాయి. ఇప్పుడే ఆయన వరాలు, పథకాలు ప్రకటించాల్సిన అవసరం లేదు. కాని, రేపు జరగబోయే నంద్యాల అసెంబ్లీ ఎన్నికలను దృష్టిలో పెట్టుకునే జగన్‌ వీటిని ప్రకటించాడనిపిస్తుంది. ముఖ్యంగా రైతులను లక్ష్యంగా చేసుకున్నాడు. 5ఎకరాల లోపున్న రైతులకు సంవత్సరానికి 50వేల సాయం ప్రకటించడం రాజకీయంగా పార్టీకి ఎంతో ప్రయోజనం కలిగించేదే! తెలుగుదేశం ప్రభుత్వంలో రైతాంగం పూర్తి నిరాశకు లోనైంది. చంద్రబాబు ఋణమాఫీ వాగ్ధానం అరకొరగానే అమలైంది. పాత ఋణాలు పూర్తి స్థాయిలో మాఫీ కాకపోగా, రైతులకు బ్యాంకులు కొత్తగా అప్పులివ్వడం లేదు. సాగునీళ్ళ సమస్య... గిట్టుబాటు ధరల సమస్య... విత్తనాలు, ఎరువుల సమస్య... ఇలా నిత్యం సమస్యలతో పోరాడుతున్న రైతులకు జగన్‌ రైతు భరోసా పథకం కొత్త ఆశలు కల్పించేదే!

ఇక మూడు దశలలో మద్య నిషేధాన్ని అమలు చేస్తానన్న జగన్‌ ప్రకటన మహిళా లోకాన్ని విశేషంగా ఆకర్షించేదే! రాష్ట్రంలో మహిళలు ఎదుర్కొంటున్న ప్రధాన సమస్య ఇదే! 2014 ఎన్నికల్లో కూడా చంద్రబాబు విడతల వారీగా మద్య నిషేధాన్ని అమలు చేస్తానని చెప్పాడు. కాని, అధికారంలోకి వచ్చాక దశలవారీగా మద్యాన్ని విస్తరింపజేశాడు. ఈరోజు 30వేల జనాభా వున్న గ్రామాల్లో కూడా బార్లు పెట్టిస్తానంటున్నాడు. మద్యం విషయంలో చంద్రబాబు ప్రభుత్వంపై మహిళల్లో బలంగానే వ్యతిరేకత వుంది. ఈ అంశాలపై జగన్‌ గురిపెట్టి కొట్టాడు. ఆరోగ్యశ్రీ, ఫీజు రీయంబర్స్‌మెంట్‌, అమ్మబడి, పింఛన్‌లు వంటివి వై.యస్‌. హయాంలో మొదలుపెట్టి అమలు చేస్తున్నవే!

అయితే ఇక్కడ నాయకుల విశ్వసనీయత ముఖ్యం. చంద్రబాబు ఆడిన మాటమీద నిలబడడన్నది జనానికి అర్ధమైపోయింది. ప్రజల్లో ఆయన పట్ల విశ్వసనీయత లేదు. కాని విశ్వసనీయతకు బ్రాండ్‌ వై.యస్‌. కుటుంబం. 2004 ఎన్నికల్లో ప్రజలకు చెప్పిన వాగ్ధానాలన్నింటిని నెరవేర్చి చూపించాడు వై.యస్‌. ఆయన కొడుకుగా జగన్‌ పట్ల కూడా ప్రజల్లో అదే విశ్వసనీయత వుంది.

ప్లీనరీ వేదికగా జగన్‌ తీసుకున్న సాహసోపేత నిర్ణయం 3వేల కిలోమీటర్ల పాదయాత్ర. అక్టోబర్‌ 27న ఇడుపులపాయలో మొదలుపెట్టి ఇచ్ఛాపురం దాకా 13జిల్లాల్లో 6 నెలల పాటు పాదయాత్ర చేయాలని సంకల్పించడం జగన్‌ పట్టుదలకు నిదర్శనం. జనంలో నిలిచేవాడు, జనంతో నడిచేవాడే నాయకుడు. 2002లో మండుటెండల్లో చేవెళ్ల నుండి ఇచ్ఛాపురం దాకా 1,472 కిలోమీటర్లు దివంగత నేత వై.యస్‌.రాజ శేఖర్‌రెడ్డి నిర్వహించిన పాదయాత్ర చరిత్రలో నిలిచిపోయింది. ఆ పాదయాత్రలో ప్రత్యక్షంగా ప్రజల కష్టాలను, కన్నీళ్లను చూడబట్టే సీఎంగా బాధ్యతను చేపట్టిన వై.యస్‌. ఎన్నో ప్రజాసంక్షేమ పథకాలను ప్రవేశపెట్టారు. నాటి తండ్రి పాదయాత్రను స్ఫూర్తిగా తీసుకునే జగన్‌ 3వేల కిలోమీటర్ల పాదయాత్రకు నడుం కట్టాడు.

మొత్తానికి గుంటూరు ప్లీనరీ వైకాపా శ్రేణుల్లో ఉత్తేజం నింపింది. భవిష్యత్‌పై బలమైన ఆశలకు పునాది వేసింది. వచ్చే ఎన్నికల్లో గట్టిగా పోరాడడానికి పార్టీ కేడర్‌కు సరికొత్త శక్తినిచ్చింది.

Page 1 of 112

newsbottomad

ఎక్కువగా చదివిన వార్తలు

  • సినీ పరిశ్రమకు... అనువైన వేదిక నెల్లూరు!
    కేసీఆర్‌ ఛీ... ఛా... అని ఛీదరించుకుని ఉమ్మేసినా కొందరు సినీ ప్రముఖులు హైదరాబాద్‌ను వదిలేది లేదంటున్నారు. ఇలాంటి వాళ్లది సినీ పరిశ్రమపై ప్రేమ కాదు! అక్కడ పోగేసిన వేలకోట్ల ఆస్తులపై ప్రేమ. అవెక్కడ పోతాయోననే బాధ. అక్కడ నుండి సినీ పరిశ్రమను…
  • ప్రాణాలు తీస్తున్న పందేలు!
    బ్రతుకులు డొల్ల... భవిష్యత్‌ గుల్ల క్రికెట్‌... ఆడేవాళ్ళకు డబ్బులు, చూసేవాళ్ళకు ఆనందం... ఈ క్రికెట్‌ ప్రపంచంలో ఆడేవాళ్ళు చూసేవాళ్ళు కాకుండా ఇంకో జాతి వుంది. అదే బెట్టింగ్‌ జాతి. క్రికెట్‌ను అందరూ ఆటగా చూస్తే ఈ బెట్టింగ్‌ జాతి మాత్రం జూదంగా…
  • నోర్లు తెరిచిన బోర్లు.. మృత్యువుకు రహదార్లు
    బోర్లు నోర్లు తెరిచాయంటే.. అవి మృత్యువుకు రహదార్లనే తెలుసుకోవాలి. నిర్లక్ష్యంగా బోర్లను తవ్వి వదిలేస్తే అవే మనపాలిట మృత్యుకూపాలవుతాయి. నీళ్ళ కోసం బోర్లు తవ్వుకుంటే, అటు నీళ్ళు రాకపోగా..ఆ బోర్ల గుంతలు చావుగుంతలుగా మారుతుంటాయి. అందుకే, బోర్లు తవ్వుకునేవారు ఎంతో అప్రమత్తంగా…
  • సిటింగ్‌లకు... కటింగ్‌ వేస్తాడా?
    రాబోయే ఎన్నికల్లో జిల్లాలోని తెలుగుదేశం పార్టీ సిటింగ్‌ ఎమ్మెల్యే లకు చంద్రబాబు తిరిగి సీట్లు ఇవ్వడనే ప్రచారం జోరుగా వుంది. ఒక్క సిటింగ్‌ స్థానాలలోనే కాదు, జిల్లాలోని అన్ని అసెంబ్లీ నియోజక వర్గాల నుండి కొత్త అభ్యర్థులను రంగంలోకి దించుతారని టాక్‌!…
  • జనం మెచ్చేలా జగన్‌!
    'నాకు ఓట్లేయకుంటే నేనేసిన రోడ్ల మీద నడవొద్దు... నేనిచ్చే పింఛన్‌లు, రేషన్‌ తీసుకుంటూ నాకు ఓట్లేయరా... హైటెక్‌ సిటి నేనే కట్టించాను... హైదరాబాద్‌ను నేనే డెవలప్‌ చేసాను... కంప్యూటర్‌ కనిపెట్టింది నేనే... సత్య నాదెళ్లను మైక్రోసాఫ్ట్‌ సిఇఓను చేసింది నేనే'' అని…

Newsletter