adalaఎన్నికలు దగ్గరకొస్తున్నాయంటే చాలు... రాజకీయ వర్గాలలో ప్రధానంగా చర్చకు వచ్చే పేరు ఆదాల ప్రభాకర్‌రెడ్డి. పార్టీలకు ఈయనంటే సంక్రాంతి పందెంకోడి లెక్క. ఆయన ఏ పార్టీలో వుంటే ఆ పార్టీ అధికారంలోకి వస్తుందన్న ప్రచారం వుంది. అదే సమయంలో అధికారంలోకి వచ్చే పార్టీలోనే ఆయన చేరుతుంటాడనే వాళ్లూ లేకపోలేదు. 1999లో తెలుగుదేశం నుండి అల్లూరు అభ్యర్థిగా పోటీ చేసాడు. ఆ ఎన్నికల్లో ఆయన గెలవడమే కాదు, తెలుగుదేశం పార్టీ అధికారాన్ని నిలబెట్టుకుంది. 2004, 2009లలో సర్వేపల్లి నుండి కాంగ్రెస్‌ అభ్యర్థిగా నిలబడ్డాడు. ఆ రెండుసార్లు కూడా ఆయన గెలవడమే కాదు, కాంగ్రెస్‌ కూడా అధికారంలోకి వచ్చింది. 2014లో రాష్ట్ర విభజన తర్వాత తిరిగి తెలుగుదేశంలో చేరాడు. నెల్లూరు లోక్‌సభ నుండి పోటీ చేసాడు. లక్షకు పైగా ఓట్ల తేడాతో ఓడిపోతాడనుకున్న స్థానంలో గట్టిపోటీ ఇచ్చి కేవలం 15వేల ఓట్ల తేడాతో పరాజయం పాలయ్యాడు. అయినా కూడా తెలుగుదేశం పార్టీ అధికారంలోకి వచ్చింది. ఇలా ఆదాల ఏ పార్టీలో వుంటే ఆ పార్టీ అధికారంలోకి వస్తుందన్న సెంటిమెంట్‌ వుంది.

రాబోయే ఎన్నికలనాటికి ఆయన ఏ పార్టీలో వుంటాడన్నది చర్చనీయాంశమైంది. తన మీద వస్తున్న ఊహాగానాలకు తెరదించడానికే ఆయన ఇటీవల విలేకరుల సమావేశం పెట్టి తాను తెలుగుదేశం పార్టీని వదిలే ప్రసక్తేలేదని చెప్పుకొచ్చాడు.

ఉదయం ఆరునూరైనా పార్టీ మారేది లేదని చెప్పి, సాయంత్రానికి పార్టీ జెండాను మారుస్తున్న నాయకులున్న కాలమిది. కాబట్టి ఆదాల మాటలను నూరు శాతం నమ్మాల్సిన అవసరం లేదు. తెలుగుదేశంలో ఆయనకు సీటు ఢోకా లేదు. నెల్లూరు లోక్‌సభ కాని, లేదా ఏదో ఒక అసెంబ్లీ సీటు గాని ఆయనకు గ్యారంటీ!

అదే సమయంలో వైసిపి నుండి కూడా ఆయనకు ఆఫర్‌లు వస్తున్నట్లు తెలుస్తోంది. ఈసారి నెల్లూరు పార్లమెంట్‌కు టీడీపీ నుంచి అయితే ఆయన గట్టి పోరాటం చేయాల్సి వుంటుంది. అదే వైసిపి నుండైతే గెలుపు అవకాశాలు ఎక్కువ. అదీగాక ఈసారి నెల్లూరు పార్లమెంటు సీటును సిట్టింగ్‌ ఎంపీ మేకపాటి రాజమోహన్‌రెడ్డికి ఇవ్వకపోవచ్చు. ఎందుకంటే ఆయన మీదున్న వ్యతిరేకత లోక్‌సభ ఎన్నికలపైనే కాకుండా అసెంబ్లీ అభ్యర్థుల మీద కూడా పడే అవకాశముంది. కాబట్టి ఈసారి ఎంపీ అభ్యర్థిగా ఆయన వద్దని ఈ లోక్‌సభ పరిధిలోని అసెంబ్లీ నియోజకవర్గాల నేతలు కోరుకుంటున్నారు. ఎంపీగా ఆదాల వస్తే తమనెత్తిన పాలు పోసినట్లని, గెలుపు అవకాశాలు మెరుగవుతాయని భావిస్తున్నారు. మరి ఎన్నికల నాటికి ఆదాల ఏం నిర్ణయం తీసుకుంటాడో చూడాలి.

4గెలిచిన పార్టీని, గెలిపించిన నాయకుడిని వదిలేసారు. రాజకీయాలలో విలువలు ఎలాగూ లేవుకాబట్టి వాటిని పక్కనపెట్టేసారు. అధికారం కోసం అధికారపార్టీలో చేరారు. ఎంచక్కా మంత్రి పదవులు కూడా చేపట్టారు.

దేశ రాజకీయాలలోనే ఇంత సిగ్గుమాలిన సంఘటన ఎప్పుడూ లేదు. ఒక పార్టీలో గెలిచి ఇంకో పార్టీలో చేరాలనుకునేవాళ్లు తమ పదవులకు రాజీనామా చేసి వెళ్లాలి. కాని, 2014 ఎన్నికల్లో వైకాపా అభ్యర్థులుగా గెలిచిన 20మంది ఎమ్మెల్యేలను తెలుగుదేశం అధినేత చంద్రబాబునాయుడు నైతిక విలువలకు పాతరేసి వారిచేత ఎమ్మెల్యే పదవులకు రాజీనామాలు చేయించకుండానే తన పార్టీలో చేర్చుకున్నాడు. అంతేకాదు, ఫిరాయింపు ఎమ్మెల్యేలు నలుగురికి మంత్రి పదవులిచ్చి ఫిరాయింపుల సంస్కృతికి పట్టాభిషేకం చేశాడు. ఫిరాయింపు ఎమ్మెల్యేలలో చంద్రబాబు మంత్రివర్గంలో స్థానం పొందిన నలుగురు మంత్రులు ఆకే అమర్‌నాథ్‌రెడ్డి, భూమా అఖిలప్రియ, చప్పిడిరాళ్ల ఆది నారాయణరెడ్డి, సుజయ్‌కృష్ణ రంగారావులకు తాజాగా ఉమ్మడి హైకోర్టు నోటీసులు జారీ చేసింది. పార్టీ ఫిరాయింపుల నిరోధక చట్టం క్రింద ఈ నలుగురికి మంత్రులుగా కొనసాగే అర్హత లేదని హైదరాబాద్‌కు చెందిన పాత్రికేయుడు తంగెళ్ల శివప్రసాద్‌రెడ్డి వేసిన పిటిషన్‌ను విచారించిన ధర్మాసనం నలుగురికీ నోటీసులు జారీ చేసింది. నాలుగు వారాలలోనే తదుపరి విచారణను చేపట్టాలని నిర్ణయించింది.

పార్టీ ఫిరాయింపుల నిరోధక చట్టాన్ని పరిగణనలోకి తీసుకుని వుంటే గవర్నరే వీరిని మంత్రులుగా కాకుండా అడ్డుకుని వుండొచ్చు. చంద్రబాబు మంత్రివర్గ విస్తరణ చేపట్టినప్పుడు రాష్ట్రంలో రాజ్యాంగ సంరక్షకుడిగా వుంటున్న గవర్నర్‌ నరసింహన్‌ ఈ నలుగురు మంత్రి పదవులు చేపట్టకుండా అడ్డుపడతాడని, విలువలను కాపాడుతాడని అందరూ భావించారు. అయితే ఏ స్థాయిలో ఒత్తిడిలు పనిచేసాయో గాని ఈ నలుగురినీ మంత్రివర్గంలోకి తీసుకోవడం జరిగింది. హైకోర్టులో ఈ కేసు విచారణ త్వరగా జరిగి, పార్టీ ఫిరాయింపుల నిరోధక చట్టం ప్రకారం తీర్పు వస్తే చాలు... ఈ నలుగురికీ పదవులు పోయినట్లే!

ఇదే జరిగితే పార్టీలోనే చంద్రబాబుపై అంతర్గత తిరుగుబాటు ఖాయం. మొన్న మంత్రివర్గ విస్తరణలో వైకాపా నుండి వచ్చిన ఈ నలుగురికీ మంత్రి పదవులివ్వడాన్ని అన్ని జిల్లాల్లోని నాయకులు వ్యతిరేకించారు. గతంలో వీరి చేతుల్లో ఎదురుదెబ్బలు తిన్న కార్యకర్తలు కూడా వారికి పదవులు రావడాన్ని జీర్ణించుకోలేకపోయారు. ఆయా జిల్లాల్లో మంత్రి పదవులు ఆశించి రాక నిరాశ చెందిన సీనియర్‌ నాయకులు పార్టీ ఫిరాయింపు ఎమ్మెల్యేలకు మంత్రి పదవులు ఇవ్వడంపై తీవ్ర స్థాయిలోనే, తీవ్ర పదజాలంతోనే మండిపడ్డారు.

రేపు హైకోర్టులో ఈ నలుగురు మంత్రులకు వ్యతిరేకంగా ఏదన్నా తీర్పు వస్తే తెలుగుదేశంలోనే అసమ్మతి భగ్గుమనే అవకాశముంది. అసంతృప్తితో వున్న నాయకులు బాహాటంగానే చంద్రబాబుపై తిరుగుబాటు చేసినా ఆశ్చర్యపోనవసరం లేదు!

desamతెలుగుతేజం యం.వెంకయ్యనాయుడును ఎన్డీఏ ఉపరాష్ట్రపతి అభ్యర్థిగా ప్రకటించాక రాష్ట్రం లోని బీజేపీ నేతలు హ్యాపీగా వున్నారు. ప్రత్యర్థిగా వున్నప్పటికీ మన తెలుగోడని చెప్పి ప్రతిపక్ష వైయస్సార్‌ కాంగ్రెస్‌పార్టీ వాళ్ళు కూడా హర్షం ప్రకటించారు. ఆంధ్ర, తెలంగాణలోని వివిధ రాజకీయపార్టీల నాయకులందరూ కూడా సంతోషపడ్డారు. రెండు తెలుగు రాష్ట్రాల ప్రజలు మన తెలుగుబిడ్డ ఉపరాష్ట్రపతి అవుతున్నాడని ఆనందిస్తున్నారు.

ఆయన ఉపరాష్ట్రపతిగా వెళుతున్నందుకు ఒకే ఒక్క పార్టీ వాళ్ళు బాధపడుతున్నారు. వాళ్ళే తెలుగుదేశం పార్టీ నాయకులు. వెంకయ్య రాజకీయాలను వదిలేసి రాజ్యాంగ పదవిలోకి వెళ్లడాన్ని వాళ్ళు జీర్ణించుకోలేకపోతున్నారు. చంద్రబాబు పైకి ఆనందిస్తున్నట్లు అభినందనలు తెలుపుతున్నా, ఈ పరిణామం ఆయనకు మింగుడు పడడం లేదు. ఈ రాష్ట్రంలో తెలుగుదేశంపార్టీని రక్షించిన వారిలో వెంకయ్యనాయుడు ఒకరు. ఇందులో సందేహం లేదు. 1984లో నాదెండ్ల భాస్కర్‌రావు వెన్నుపోటుతో ముఖ్యమంత్రి పీఠం నుండి దిగిపోయి ఇంట్లో కూర్చునివున్న నందమూరి తారకరామా రావును బయటకు రప్పించి, జనాల్లో తిప్పి వెన్నుపోటుదారులపై ప్రజలు తిరుగుబాటు చేసేలా చేసింది వెంకయ్యనాయుడే! ఆరోజు ఎన్టీఆర్‌ ఇంటి నుండి బయటకు రాకపోయి వుంటే ఈరోజు తెలుగుదేశం ఉండేది కాదు. ఆ తర్వాత 1999 ఎన్నికల్లో బీజేపీతో టీడీపీకి పొత్తు పెట్టించడంలో వెంకయ్యదే కీలకపాత్ర. ఆ ఎన్నికల్లో వాజ్‌పేయి ఇమేజ్‌తో చంద్రబాబు అధికారం చేజిక్కించుకోవడం తెలిసిందే! 2014 ఎన్నికల్లోనూ ఈ రాష్ట్రంలో ఒంటరిగా పోటీ చేయాలని భావించిన బీజేపీకి తెలుగుదేశంతో ముడిపెట్టింది వెంకయ్య నాయుడే! మొన్న కూడా మోడీ ఇమేజ్‌తో తెలుగుదేశం గెలవడం తెలిసిందే!

రాష్ట్ర విభజన తర్వాత కేంద్రంలో ఆంధ్రప్రదేశ్‌ నాయకుల పరపతి బాగా తగ్గి పోయింది. అక్కడ వీళ్లను లెక్కబెట్టే వాళ్లు కూడా లేరు. ఈ దశలో మన రాష్ట్రానికి పెద్దదిక్కుగా వెంకయ్యనాయుడే వ్యవహరిస్తూ వచ్చారు. చంద్రబాబు ఢిల్లీలో ఎవర్ని కలవాలన్నా, ఎవరిని నిధులడగాలన్నా వెంకయ్య మార్గనిర్దేశంలోనే జరుగుతుండేది. రాష్ట్రానికి విభజన హామీలు నెరవేర్చడంలోగాని, ప్రత్యేకప్యాకేజీని ప్రకటించడంలో గాని వెంకయ్య ప్రధానపాత్ర పోషించారు. ఢిల్లీలో వెంకయ్యనాయుడు రాజకీయంగా కీలకపాత్రలో ఉండబట్టే చంద్రబాబుకు అన్నీ సానుకూలంగా జరుగుతూ వచ్చాయి. వెంకయ్యనాయుడు సహకారం ఉండబట్టే కొన్ని క్లిష్టమైన సమస్యల నుండి ఆయన బయటపడ్డారు. ఇప్పుడాయన రాజ్యాంగ పదవిలోకి వెళుతున్నారు. చంద్రబాబుకు ఇక రాజకీయంగా దిక్కెవరో చూడాలి!

Page 1 of 30

newsbottomad

ఎక్కువగా చదివిన వార్తలు

  • వెనక్కి తగ్గేదే లేదు!
    పోలీస్‌స్టేషన్‌కు వెళితే ఎస్‌ఐ మా మాట వినడం లేదు... ఎస్‌ఐ చేత పని చేయించుకోలేకుంటే నా అనుచరుల ముందు నా పరువు పోతుంది.. ఎస్‌ఐ వద్దే పరపతిలేనోడివి... నువ్వేం నాయకుడివని అనుచరులు నన్ను వదిలిపోతున్నారు.... ఓ మండల స్థాయి నాయకుడు తన…
  • ఉంటారా? వెళ్ళిపోతారా?
    రాజకీయాలు చాలా విచిత్రంగా ఉంటాయి. ఎప్పుడు ఎవరు కింగ్‌లవుతారో, ఎవరు తెరమరుగవుతారో అంతే పట్టదు. రాజకీయాలలో ఎల్లకాలం వెలగడం అన్నది ఎవరికీ శాశ్వతం కాదని చాలామంది నాయకుల చరిత్రను పరిశీలిస్తే అర్ధమవుతుంది. నెల్లూరుజిల్లాలో సుధీర్ఘ రాజకీయ చరిత్ర ఉం డేది ఆనం…
  • వర్గాన్ని కాపాడుకోవడమా..? నియోజకవర్గాన్ని వదులుకోవడమా?
    జిల్లాలో పసుపు కొనుగోలు అక్రమాల సంగతేమోగాని దీనిమూలంగా ఉదయగిరి ఎమ్మెల్యే బొల్లినేని రామారావుకు పెద్ద చిక్కొచ్చిపడింది. పసుపు కొనుగోలు వ్యవహారాన్ని పెద్దకుంభకోణంగా చిత్రించిపెట్టారు. దీనిపై రాష్ట్ర ప్రభుత్వం సీరియస్‌ అయ్యింది. విచారణకు ఆదేశించి భారీ ఎత్తున ఉద్యోగులను సస్పెండ్‌ చేసింది. ఈ…
  • వారి ఆశలపై... నీళ్ళు చల్లారు!
    రాష్ట్రంలో అసెంబ్లీ నియోజకవర్గాలు 175 నుండి 225కు పెరుగు తాయనే ప్రచారం మొన్నటివరకు బలంగా వుండింది. ఈమధ్యనే కేంద్ర ప్రభుత్వం ఆ ప్రచారానికి తెరదించుతూ ఈ ఎన్నికలకే కాదు, ఆ తర్వాత ఎన్నికల నాటికి కూడా సీట్ల పెంపు ఉండదని కుండబద్ధలు…
  • నేరం మా వాళ్ళది కాదు
    రాజకీయ ఒత్తిళ్లకు లొంగి అడ్డదారులు తొక్కితే, రాజకీయ నాయకుల మాటలు నమ్మి వారు చెప్పినట్లు నడుచుకుంటే పరిస్థి తులు ఎలా వుంటాయో ఇప్పుడు ఉదయగిరి నియోజకవర్గం లోని అధికారులకు తెలిసొచ్చింది. ఇటీవల పసుపు కొనుగోలు వ్యవహారం జిల్లాలో సంచలనం కావడం తెలిసిందే!…

Newsletter