viveka cigarనెల్లూరు చరిత్రను రెండు భాగాలుగా విభజిస్తే స్వాతంత్య్రానికి పూర్వం మనకు తెలిసిన రాజు మనుమసిద్ధి మహారాజు. నెల్లూరుసీమను గొప్పగా ఏలాడని పేరు. రెండో భాగంలో స్వాతంత్య్రం అనంతరం చూస్తే నెల్లూరును ఏకచత్రాధిపత్యంగా 20ఏళ్ళ పాటు ఏలిన రారాజుగా ఆనం వివేకా మనకు కనిపిస్తాడు. జిల్లా రాజకీయాలలోనే కాదు, బహుశా రాష్ట్ర రాజకీయాలలో కూడా ఇలాంటి విలక్షణ, విశిష్ట రాజకీయ లక్షణాలున్న నాయకుడు మనకు కనిపించడు.

విలక్షణం అతని లక్షణం

రాజకీయాలలో విలక్షణతకు మారుపేరు వివేకా. ఆయన రూటే సపరేటు. అందరూ నడిచిన దారిలో ఆయన నడవడు. ఆయన ముఖ్యమంత్రి కాదు... కనీసం మంత్రిగా కూడా చేయలేదు. కాని రాష్ట్ర స్థాయిలో పాపులారిటీ సంపాదించాడు. వివేకా అంటే వెరైటీ నాయకుడు అనే బ్రాండ్‌ ఇమేజ్‌ తెచ్చుకున్నాడు. దీనికి కారణం ఆయన భాష... ఆయన గెటప్‌... ఆయన సెటప్‌... ఎలాంటి డ్రెస్‌లనైనా వేయగలడు. పంచ రంగుల కళ్ళద్దాలు పెట్టగలడు. ఎలాంటి టోపీనైనా తన తలపై పెట్టుకోగలడు. చిన్నపిల్లలతో కలిసిపోగలడు, వృద్ధులతో కలిసి నడవగలడు. అందుకే అలాంటి నాయకుడు ఇక నెల్లూరుకు దొరకడం కష్టమే.

జీవితంలో ఆయనకి తోడు 9849459590

నాగార్జున హీరోగా నటించిన 'శివమణి' సినిమా చూసే వుంటారు. ఆ సినిమాలో హీరో పాత్రధారి నాగార్జున తన సెల్‌ నెంబర్‌ ప్రజలకిచ్చి.. ఏ క్షణంలోనైనా ఫోన్‌ చెయ్యండి... రెండు కిలోమీటర్ల దూరంలో వున్నా రెండు నిముషాల్లో మీముందుంటా అని చెబుతుంటాడు. వివేకా ధోరణి కూడా అలాగే వుండేది. సాధారణంగా ఎమ్మెల్యేల సెల్‌ నెంబర్లు సామాన్య ప్రజలకు దొరకడం కష్టం. దొరికినా వీళ్ళు ఫోన్‌ చేస్తే ఎమ్మెల్యేలు ఫోన్‌ ఎత్తడం ఇంకా కష్టం. కాని వివేకా అలా కాదు. ఆయన మున్సిపల్‌ ఛైర్మెన్‌గా వున్నప్పటి నుండి కూడా ఆయన సెల్‌ నెంబర్‌ 9849459590 నెల్లూరు ప్రజల మైండ్‌లో ఎప్పుడూ వుండేది. ఎవరు ఏ సమయంలో ఏ సమస్య వచ్చి ఫోన్‌ చేసినా ఆయన ఎత్తుకునేవాడు. ఒకవేళ బిజీగా వుండి ఆ క్షణంలో ఫోన్‌ ఎత్తకపోయినా ఆయనే మిస్‌డ్‌కాల్స్‌ చూసి తిరిగి చేసేవాడు. ఇలా వివేకాతో ఫోన్‌ ద్వారా మాట్లాడినవాళ్ళు నగరంలో వేలమంది వున్నారంటే అతిశయోక్తి కాదు.

1995 నుండి 2017 దాకా...

వివేకా రాజకీయ ప్రయాణంలో అత్యంత విలువైన కాలం ఈ ఇరవైఏళ్ళే! సాధారణ రాజకీయ నాయకుడిగా వున్న ఆయనను ప్రజానాయకుడిగా, ప్రజాకర్షణ నాయకుడిగా, ప్రజానాడి తెలిసిన నాయకుడిగా, ప్రజాదరణ పొందిన నాయకుడిగా మలచింది ఈ 20ఏళ్ళ కాలమే! 1995లో మున్సిపల్‌ ఛైర్మెన్‌గా గెలుపొందాక ఆయన పూర్తిస్థాయిలో ప్రజల మధ్య తిరగసాగాడు. ప్రజల మనసులు గెలుచుకున్నాడు. ప్రజలకు అందు బాటులో వుండే నాయకుడిగా గుర్తింపు పొందాడు. ఆ ప్రజాభిమానం వల్లే వరుసగా మూడుసార్లు అసెంబ్లీ ఎన్నికల్లో విజయం సాధించి హ్యాట్రిక్‌ కొట్టాడు. 20ఏళ్ళ పాటు నెల్లూరు నగరాన్ని ఏలిన ఏకైక నాయకుడు వివేకా అనిపించుకున్నాడు.

నెంబర్‌ వన్‌ భక్తుడు

వివేకాలో భక్తి విశ్వాసాలు మెండుగా వుంటాయి. నిద్రలేస్తే ఆయన ప్రస్తానం ఏదో ఒక గుడి వద్ద నుండే మొదలవుతుంది. రంగనాథస్వామి గుడి, మూలాపేట శివాలయం, వేణుగోపాలస్వామి గుడి, సుబ్రహ్మణ్య స్వామి గుడి, రాజరాజేశ్వరమ్మ, ఇరుకళలమ్మ దేవాలయాలను ఆయన తరచూ దర్శించుకుంటుంటారు. ఆరోగ్యం బాగున్నంతకాలం శరన్నవరాత్రుల రోజుల్లో రాజరాజేశ్వరమ్మ గుడిలో రోజూ 108 ప్రదక్షిణలు చేసేవాడు. ఇక బారాషహీద్‌ దర్గా వద్ద జరిగే రొట్టెల పండుగన్నా, గుడ్‌ఫ్రైడే నాడు శిలువను మోయడం అన్నా ఆయనకు ఎంతో ఇష్టం. తరుచూ తిరుమలకు వెళ్ళి శ్రీవారి దర్శనం చేసుకునేవాడు. వెంకటేశ్వరస్వామితో పాటు ఏసు ప్రభువును కూడా అమితంగా విశ్వసిస్తాడు.

నెల్లూరు వ్యాపారులకు బ్రాండ్‌ అంబాసిడర్‌

నెల్లూరులో వాణిజ్య సంస్థల వాళ్ళు తమ షోరూంల ప్రారంభోత్సవాలకు ఇప్పుడు సినిమా యాక్టర్లను తీసుకొస్తున్నారుగాని, ఒకప్పుడు నగరంలో ఏ షోరూం అయినా, ఏ షాపైనా ఆయన చేతుల మీదుగా ప్రారంభించాల్సిందే! ఆయన చేత్తో ప్రారంభించిన వ్యాపారం ఏదైనా బాగా జరుగుతుందనే నమ్మకం నెల్లూరీయులలో వుంది. అందుకే ఆయన డేట్స్‌ తీసుకుని మరీ ఓపెనింగ్‌లు పెట్టుకునేవాళ్ళు.

సినిమా, సిగరెట్‌ ఆయన బలహీనతలు

సెకండ్‌షో సినిమా అన్నా, ''డ్రమ్‌'' సిగరెట్లన్నా ఆయనకు భలే ఇష్టం. వారంలో కనీసం 7సినిమాలన్నా చూడాల్సిందే, రోజుకి 20 సిగరెట్లన్నా తాగాల్సిందే!

కిర్రు చెప్పులు

ఏదైనా వెరైటీగా చేసే వివేకా, వేసుకునే చెప్పులు కూడా వైవిధ్యమే. ప్రత్యేకంగా తయారు చేయించుకున్న కిర్రుచెప్పులనే ఆయన ఎక్కువగా వాడేవాడు.

కాపువీధికి కాపలాదారుడు

కాపువీధిలో బంగారు షాపులు, గుడ్డల అంగళ్ళు, ఇతర వ్యాపార సంస్థలు దండిగా వుంటాయి. వాటిలో విలువైన వస్తువులుంటాయి. అయితే రాత్రిళ్ళు ఇక్కడ కాపలాదారుడు, సెక్యూరిటీ గార్డులను నియమించుకునే పనుండేది కాదు. కాపువీధికి వివేకానే కాపలాదారుడు. రాత్రిళ్ళు ఆయన వెంట అనుచరులు కూడా ఉండేవాళ్ళు. దీంతో అర్ధరాత్రి దాటాక కూడా ఈ సెంటర్‌లో జనం వుంటుండడంతో దొంగలకు ఇటువైపు దోపిడీ ఆలోచన వచ్చేది కాదు.

మీడియాకు మిత్రుడు

వివేకా రాజకీయ ప్రస్థానంలోనూ, వ్యక్తిగత జీవితంలోనూ మీడియా పాత్ర చాలా వుంది. మీడియా ప్రతినిధులను ఎంతో గౌరవించేవాడు. అభిమానించేవాడు. నెల్లూరు మీడియాలో చాలా మంది విలేకరులకు ఆయన ఆప్తమిత్రుడు. 2008లో దివంగత నేత వై.యస్‌.రాజశేఖరరెడ్డి ముఖ్యమంత్రిగా వున్న సమయంలో కొత్తూరు వద్ద 20ఎకరాల భూమిని జర్నలిస్టుల ఇళ్ళ స్థలాలకు కేటాయించడంలో వివేకా చేసిన కృషిని ఇంటి స్థలం పొందిన ఏ విలేకరి కూడా మరువలేడు.

నలుగురికీ నచ్చినదీ... నాకసలే నచ్చదులే!

నలుగురికీ నచ్చేది వివేకాకు నచ్చదు. జనానికి నచ్చనిది ఆయనకు నచ్చుతుంది. అదే ఆయన స్పెషల్‌. '8' అంకెను ఎవరూ ఇష్టపడరు. కాని వివేకా కొనే ప్రతి కారుకు '8' టోటల్‌ నెంబర్‌ వుంటుంది. ప్రతి కారుపై 116 రిజిష్టర్‌ నెంబర్‌ వుంటుంది. ఇక ఒంటెల బొమ్మలను ఇంటిలో పెట్టుకోవడం అశుభం అనుకుంటారు, కానీ వివేకా బెడ్‌రూంలోనే కాదు, ఆయన కారు వెనుక కూడా ఒంటె బొమ్మలే వుంటాయి. అమావాస్య, రాహుకాలం, యమగండం మనం అశుభం అనుకుంటే ఆయన ఆ కాలాలలోనే ఏ పనైనా మొదలుపెడతాడు.

ఆహారప్రియుడు

సాంప్రదాయ వంటలను వివేకా ఎక్కువుగా తినేవాడు. నాటుకోడి, తలకాయ కూర, చేపల పులుసు, బిర్యాని... వేణుగోపాల స్వామి గుడిలో చేసే హల్వా, పొంగలి, దద్దోజనం అంటే ఎంతో ఇష్టంగా తినేవాడు.

'గల్పిక' ద్వారా 'స్టైల్‌ ఆఫ్‌ సింహపురి'

'పద్మశ్రీ', 'పద్మభూషణ్‌' వంటి బిరుదులు ఇచ్చివున్నా వివేకాలో సంతోషం వుండేది కాదేమో... కాని 'స్టైల్‌ ఆఫ్‌ సింహ పురి' అనే బిరుదు మాత్రం ఆయనను ఎంతో సంతోషపరిచేది. ఆ పేరుతో ఆయనను సంభోదిస్తుంటే ఎంతో ఆనందపడేవాడు. 1998 నుండి 'లాయర్‌' వారపత్రికలో వస్తున్న 'గల్పిక' శీర్షిక ద్వారా ఆయనను 'స్టైల్‌ ఆఫ్‌ సింహపురి'గా పాఠకులకు పరిచయం చేసే అదృష్టం 'లాయర్‌'కు దక్కింది. క్రమేణా అది వాడుకలోకి వచ్చి ఆయన అభిమానులు, అనుచరుల మనసుల్లోకి ఎక్కిపోయింది. ఈరోజు 'స్టైల్‌ ఆఫ్‌ సింహపురి వివేకా'గా రాష్ట్ర వ్యాప్తంగా ప్రచారంలోకి వచ్చింది. 'లాయర్‌' పత్రికలో వారం వారం వచ్చే వ్యంగ్య రాజకీయ కథనం 'గల్పిక' శీర్షిక అంటే ఆయనకు ఎంతో ఇష్టం. ఈ శీర్షిక ద్వారా వెలువడిన అనేక స్టోరీలలో ఆయనదే ప్రధాన పాత్రగా వుండేది. గల్పికకు ఆయనకు అవినాభావ సంబంధముండబట్టే 2007 జూన్‌10న జరిగిన 'లాయర్‌' 26వ వార్షికోత్సవ వేడుకల్లో 'గల్పిక' శీర్షికల మొదటి భాగం పుస్తకాన్ని ఆయన చేతుల మీదుగానే ఆవిష్కరించడం విశేషం.

వివేకా జీవిత చరిత్ర చాలా పెద్దది. అతని జీవితం 67ఏళ్లే అయినా ఇంకా 67ఏళ్ళకు చెప్పుకోవడానికి సరిపడా విశేషాలు ఆయన జీవితంలో కనిపిస్తాయి. తవ్వుకుంటూ పోతుంటే తరగని జ్ఞాపకాల గని వివేకా!

vivekaనెల్లూరు నేల పొరల్లోనుండి ఏంటి ఏడుపు వినిపిస్తోంది... నెల్లూరు వీధుల్లో ఎందుకీ రోదనలు... స్వర్ణాల చెరువు ఎందుకో విషాదంతో కనిపిస్తుంది... తల్పగిరి రంగనాథస్వామి కళ్ళల్లో ఆ కన్నీళ్ళేంటి... ఇరుకళలమ్మ ఎందుకని అంతగా గుక్కపెట్టి ఏడుస్తోంది... సంతపేట చర్చిలోని ఏసుప్రభువు ఎందుకు విలపిస్తున్నాడు... దేవుళ్ళంటే సరే... మరి ఈ అవ్వలూ, తాతలేంటి అలా దిగులుగా వున్నారు, ఈ చిన్నారులేంటి వెక్కి వెక్కి ఏడుస్తున్నారు.. అసలు నెల్లూరే శోకవనంగా మారింది... ఏమైంది, ఎందుకిలా జరిగింది.

2018 ఏప్రిల్‌ 25వ తేదీ... ఒక చరిత్ర కన్ను మూసిన రోజు... నెల్లూరుజిల్లా రాజకీయ చరిత్రలో ఒక అధ్యాయం ముగిసినరోజు. రాష్ట్ర రాజకీయ వినీలాకాశంలో నుండి ఒక ధృవతార నేలరాలిన రోజు. వేలాదిమంది పేదల ఆశలు అవిరైన రోజు. అభిమానుల ఆక్రందనలు మిన్నంటిన రోజు. బడుగు వర్గాల ప్రజల గుండెలు పగిలినరోజు. స్టైల్‌ ఆఫ్‌ సింహపురి, మాజీశాసనసభ్యులు ఆనం వివేకా ఈ నేలను, ఈ నెల్లూరును, ఈ పెన్న నీళ్ళను, ఈ రంగడి గుడిని, బారాషహీద్‌ దర్గాను, తనను అభిమానించే పేదలను, బడుగులను, మైనార్టీలను, దళితులను, పిల్లలను, పెద్దలను వదిలి తనకిష్టమైన సర్వేశ్వరుని సన్నిధికి పయనమైనరోజు. అందుకే నెల్లూరంతా ఈ విషాదం... నెల్లూరీయులందరిలోనూ విచారం. సింహపురి గడ్డ ముద్దుబిడ్డ, నెల్లూరు లెజండ్‌ ఆనం వివేకానందరెడ్డి ఇక లేడనే వార్తతోనే నెల్లూరంతా ఈ విషాదం... నగరమంతా శోకమయం.

తన నలభై ఏళ్ళ రాజకీయ చరిత్రలో ఎందరో యోధానుయోధులను ఢీకొట్టి మట్టి కరిపించిన ఆనం వివేకా వ్యక్తిగత జీవితంలో మాత్రం తనపై యుద్ధానికి వచ్చిన మృత్యువును మాత్రం ప్రేమతో కౌగిలించుకున్నాడు. దాని వశమయ్యాడు. దానితో కలిసే కైలాసానికి పయనించాడు.

గత కొన్నేళ్ళుగా క్యాన్సర్‌ వ్యాధితో బాధపడు తున్న ఆయన ఏప్రిల్‌ 25వ తేదీ ఉదయం 9.30 గంటలకు హైదరాబాద్‌లోని కిమ్స్‌ ఆసుపత్రిలో తుది శ్వాస విడిచాడు. ఆయన వయసు 67సంవత్స రాలు. రాజకీయాలలో ఉపరాష్ట్రపతి యం.వెంకయ్య నాయుడు, ముఖ్యమంత్రి చంద్రబాబునాయుడు, మాజీముఖ్యమంత్రి దివంగత నేత వై.యస్‌.రాజ శేఖరరెడ్డిలకు సమకాలీకుడైన వివేకా 1950 డిసెంబర్‌ 23వ తేదీన మాజీమంత్రి ఆనం వెంకట రెడ్డి, వెంకట రమణమ్మ దంపతులకు మొదటి సంతానంగా జన్మించాడు. విద్యాభ్యాసం అంతా నెల్లూరులోనే జరిగింది. విఆర్‌ కళాశాలలో బి.కాం పూర్తి చేసాడు. తన పెద్దనాన్న స్వర్గీయ ఏ.సి.సుబ్బా రెడ్డి, తండ్రి ఆనం వెంకటరెడ్డిల శిక్షణలో రాజకీయ ఓనమాలు నేర్చుకున్నాడు.

ఇదీ ఆయన రాజకీయ ప్రస్థానం

1980లో జిల్లా యువజన కాంగ్రెస్‌ అధ్యక్షుడిగా రాజకీయంగా తొలిఅడుగులు వేసాడు. 1982లో జిల్లా ల్యాండ్‌ మర్కెంటైల్‌ బ్యాంక్‌ ఛైర్మెన్‌గా పని చేశాడు. 1987లో మున్సిపల్‌ కౌన్సిలర్‌గా గెలి చాడు. అప్పుడే మున్సిపల్‌ వైస్‌ఛైర్మెన్‌ అయ్యాడు. 1988లో జిల్లా కేంద్ర సహకార బ్యాంకు అధ్యక్షుడిగా కొంత కాలం పనిచేశాడు. 1992లో శ్రీ వేణు గోపాలస్వామి కాలేజీ కరస్పాండెంట్‌గా బాధ్యతలు చేపట్టాడు. 1993లో విఆర్‌ కళాశాల కమిటీకి జరిగిన ఎన్నికల్లో కరస్పాండెంట్‌గా ఎన్నికై ఇటీవల వరకు ఆ పదవిలోనే కొనసాగారు. 1994 నుండి శ్రీ వేణుగోపాలస్వామి దేవస్థానం ట్రస్టుబోర్డులో సభ్యుడిగాను, పలుసార్లు ఛైర్మెన్‌గానూ స్వామి సేవలో పనిచేసాడు. 1995లో జరిగిన నెల్లూరు మున్సిపల్‌ ఛైర్మెన్‌ ఎన్నికల్లో కాంగ్రెస్‌ అభ్యర్థిగా 36ఓట్లతో నెగ్గిన వివేకా రాజకీయ యాత్ర అక్కడ నుండే ఊపందుకుంది. 1983 నుండి తెలుగుదేశంలో వుండి 1985లో కొంతకాలం జిల్లా కేంద్ర సహకార బ్యాంకు ఛైర్మెన్‌గా కూడా పనిచేసిన వివేకాకు ఆ పార్టీలో వున్నంతకాలం అంతకుమించిన అవకాశాలు రాలేదు. 1985ఎన్నికల్లో నెల్లూరు సీటును ఆశిం చినా ఇవ్వలేదు. 1989ఎన్నికల్లోనూ ఆయనకు మొండిచేయే చూపారు. దీంతో 1992లో కాంగ్రెస్‌ లోకి వెళ్ళిన ఆయనకు 1995లో నెల్లూరు మున్సిపల్‌ ఛైర్మెన్‌ కాంగ్రెస్‌ అభ్యర్థిగా అవకాశం ఇచ్చింది. తెలుగుదేశం ప్రభుత్వం నడుస్తున్న ఆ కాలంలో వివేకా 36ఓట్లతేడాతో వై.టి.నాయుడుపై సంచలన విజయం సాధించాడు. నాలుగేళ్ళపాటు మున్సి పాల్టీలో చక్రం తిప్పాడు. అప్పుడే మున్సిపల్‌ ఛైర్మెన్‌ల సంఘానికి రాష్ట్ర అధ్యక్షుడిగా కూడా వ్యవహరిం చాడు. 1999ఎన్నికల ద్వారా ఎమ్మెల్యేను కావాలను కున్న తన చిరకాల స్వప్నాన్ని నెరవేర్చుకున్నాడు. 1999 అసెంబ్లీ ఎన్నికల్లో నెల్లూరు నియోజకవర్గం నుండి కాంగ్రెస్‌ అభ్యర్థిగా నేదురుమల్లి జనార్ధన్‌రెడ్డిని సైతం ఢీకొట్టి వై.యస్‌ ఆశీస్సులతో టిక్కెట్‌ తెచ్చుకు న్నాడు. బీజేపీ అభ్యర్థి డేగా నరసింహారెడ్డిపై గెలుపు సాధించారు. ఐదేళ్ళ పాటు ప్రతిపక్ష ఎమ్మెల్యేగా విలక్షణ పాత్ర పోషించారు. అధికారపక్షానికి చుక్కలు చూపించారు. 2004 ఎన్నికల్లో మళ్ళీ నెల్లూరు నుండే రెండోసారి ఎమ్మెల్యేగా భారీ మెజార్టీతో గెలుపొందారు. సరిగ్గా అప్పుడే రాష్ట్రంలోనూ కాంగ్రెస్‌ ప్రభుత్వం రావడం, వై.యస్‌.రాజశేఖరరెడ్డి ముఖ్యమంత్రి కావడంతో జిల్లా రాజకీయాల్లో ఆనం హవా మరోసారి మొదలైనట్లయ్యింది. ఆనం సోద రులు నెల్లూరుజిల్లాలో వై.యస్‌.కు ముఖ్యఅనుచరు లుగా ముద్రపడ్డారు. వై.యస్‌. అండతో పార్టీలో నేదురుమల్లి జనార్ధన్‌రెడ్డి వర్గాధిపత్యాన్ని సవాల్‌ చేస్తూ తమ వర్గాన్ని పెంచుకున్నారు. ప్రతి నియోజక వర్గంలో ఆనం వర్గం ఏర్పడింది. 2007లో వై.యస్‌. క్యాబినెట్‌లో ఆనం రామనారాయణరెడ్డి మంత్రయ్యాడు. పెద్దవాడిగా వివేకా అడిగితే మంత్రి పదవి వచ్చే అవకాశమున్నా ఆయన ఆనాడు తనకు కాకుండా తన తమ్ముడి కోసమే మంత్రి పదవి అడిగి సోదరుల పట్ల తన వాత్సల్యం చాటుకున్నారు. వై.యస్‌. కొలువులో రామనారాయణరెడ్డి మంత్రి అయ్యాక ఆనం జోరు మరింత పెరిగింది. 2009 ఎన్నికల నాటికి నేదురు మల్లిపై పైచేయి సాధించారు. 2009లో నియోజకవర్గాల పునర్విభజన జరగడంతో కొత్తగా ఏర్పడ్డ నెల్లూరురూరల్‌ నుండి పోటీ చేసిన వివేకా ప్రజారాజ్యం అభ్యర్థి తన సమీప బంధువు ఆనం వెంకటరమణారెడ్డితో గట్టిపోటీనెదుర్కొని 3131ఓట్లతో అతి కష్టం మీద గట్టెక్కారు. 2009 సెప్టెంబర్‌లో వై.యస్‌.రాజశేఖరరెడ్డి మరణం చాలా మంది కాంగ్రెస్‌ నాయకుల జీవితాలలో పెను మార్పులు తెచ్చింది. రోశయ్య, కిరణ్‌కుమార్‌రెడ్డిలు ముఖ్య మంత్రులయ్యారు. కాని, చాలామంది కాంగ్రెస్‌ నాయకులు రాజకీయంగా తెరమరుగ య్యారు. కొందరు గత వైభవాన్ని కోల్పోయారు. వారిలో ఆనం వివేకా కూడా వున్నారు. వై.యస్‌. మరణానంతరం తొలిరోజుల్లో జగన్‌కు అండగా నిలిచి ఆయన తరపున గట్టిగా పోరాడిన వివేకా ఆ తర్వాత కొద్దిరోజులకే తన వాణిని మార్చారు. జగన్‌కు వ్యతిరేకంగా గళం విప్పారు. జగన్‌ కాంగ్రెస్‌ అధినేత్రి సోనియాగాంధీని ధిక్కరించడం, 2012లో కాంగ్రెస్‌ పార్టీ నుండి బయటకొచ్చి వైయస్సార్‌ కాంగ్రెస్‌పార్టీని స్థాపించడం జరిగింది. ఈ దశలో జగన్‌పై వివేకా విమర్శలు తీవ్రస్థాయికి చేరాయి. తెలుగుదేశం నాయకులు కూడా జగన్‌పై ఆరోపణలు చేయనంతగా వివేకా ఆరోపణలు చేసారు. జగన్‌పై వివేకా చేసిన ఆరోపణలను ఆయన అనుచరులు, అభిమానులు సైతం జీర్ణించుకోలేకపోయారు. వై.యస్‌. మరణంతో ఆనంకు ఓ రకంగా రాజకీయ గ్రహణం పడితే, 2014లో జరిగిన రాష్ట్ర విభ జనతో మరోరకంగా నష్టం కలిగింది. విభజనతో ఏపిలో కాంగ్రెస్‌ పతనమైంది. 2014 ఎన్నికల చివరి వరకు సీఎం కుర్చీ మీద ఆశతో ఆనం సోదరులు కాంగ్రెస్‌లోనే వుండిపోయారు. 2014 ఎన్నికల్లో వివేకా పోటీ చేయకుండా నెల్లూరు నగరం నుండి తన కొడుకు ఏ.సి.సుబ్బారెడ్డిని కాంగ్రెస్‌ అభ్యర్ధిగా దించాడు. ఆ ఎన్నికల్లో ఆయనకు కనీసం డిపాజిట్‌ కూడా దక్కలేదు. 2014 ఎన్నికల్లో తెలుగుదేశం అధికారంలోకి రావడం జరిగింది. 2015లో ఆనం వివేకా, ఆనం రామనారాయణ రెడ్డిలు తెలుగుదేశంలో చేరారు. పార్టీలో చేరేటప్పుడు ఆనం వివేకాకు ఎమ్మెల్సీని, ఆనం రామనారాయణ రెడ్డికి ఆత్మకూరు ఇన్‌ఛార్జ్‌ హామీ ఇచ్చారు. అయితే రామనారాయణ రెడ్డికి ఆత్మకూరు ఇన్‌ఛార్జ్‌ అయితే ఇచ్చారు గాని ఎమ్మెల్సీ విషయంలో వివేకాకు మొండిచేయి చూపారు. దీనికితోడు పార్టీలో ఆనం బ్రదర్స్‌కు అవమానాలే మిగిలాయి. కాంగ్రెస్‌లో నెల్లూరు జిల్లాను ఏకఛత్రాధిపత్యంగా ఏలిన ఆనం సోదరులకు టీడీపీలో కనీసం పార్టీ సమావేశాలకు కూడా ఆహ్వానం కరువైంది. ఇలా రాజకీయ శూన్యం ఆవహించిన సమయంలోనే ఆయన తీవ్ర అనారోగ్యానికి గురై ఆసుపత్రిలో చేరారు. నిర్జీవంగా నిన్న నెల్లూరుకు తిరిగివచ్చారు.

నెల్లూరుజిల్లా రాజకీయాలంటే ఈ తరానికి గుర్తొచ్చే నాయకులు పుచ్చలపల్లి సుందరయ్య, బెజవాడ గోపాలరెడ్డి, నల్లపరెడ్డి శ్రీనివాసులురెడ్డి, ఏ.సి.సుబ్బారెడ్డి, నేదురుమల్లి జనార్ధన్‌రెడ్డి, వెంకయ్య నాయుడు... రాజకీయ చరిత్రలో వీరందరిదీ ఓ శైలి. కాని, ఆనం వివేకానందరెడ్డి... విలక్షణ రాజ కీయాలకు బ్రాండ్‌ అంబాసిడర్‌. 20ఏళ్ళ పాటు నెల్లూరు నగరాన్ని శాసించిన లీడర్‌. కుర్రాడు, వృద్ధుడు అనే తేడా లేకుండా నెల్లూరీయుల మన సుల్లో వివేకాగా ముద్రపడ్డ నాయకుడు.

మాజీమంత్రి స్వర్గీయ ఆనం వెంకటరెడ్డి నలుగురి కుమారులలో పెద్దోడు. పెద్దనాన్న ఏ.సి. సుబ్బారెడ్డి రాజకీయ వారసత్వాన్ని అందిపుచ్చుకున్న నాయకుడు. ఏ.సి.సుబ్బారెడ్డి, ఆనం వెంకటరెడ్డిల తరం తర్వాత ఆనం వంశ రాజకీయాలను నడి పించిన దమ్మున్న నేత. అలాంటి నాయకుడిని కోల్పోయింది నెల్లూరు. ఇలాంటి నాయకుడు మళ్ళీ జన్మించడానికి ఎన్నేళ్ళు పడుతుందో?

తాను నమ్మిన సిద్ధాంతమే వేదంగా, తనను నమ్మిన అనుచరగణమే ఆయుధంగా సుదీర్ఘ రాజ కీయ ప్రస్థానాన్ని కొనసాగించి అదే రాజకీయంతోనే కొనఊపిరి వొదిలిన ఆనం వివేకానందరెడ్డికి నివాళులర్పిస్తూ... వారి కుటుంబ సభ్యులకు ప్రగాఢ సానుభూతి తెలుపుతోంది 'లాయర్‌'.

vivekaసింహపురి సోగ్గాడా... స్టైల్‌ ఆఫ్‌ సింహపురీ... ఓ వివేకా... ఎన్నిరోజు లైందయ్యా నిన్ను చూసి... నిన్ను చూడక, చిరునవ్వుల లొలికే నీ ఫేసు చూడక మా వాళ్ళ ముఖం వాచిపోయిం దనుకో... నాలుగేళ్ళు మున్సిపల్‌ ఛైర్మెన్‌గా, పదిహేనేళ్ళు ఎమ్మె ల్యేగా వుంటే ఏరోజూ నెల్లూరొదిలి పోయి నోడివి కాదు... ఒకవేళ పోయినా పక్కరోజు తెల్లారు జాముకల్లా వచ్చి సండే మార్కెట్‌ టీకొట్టు కాడ కనిపించే వాడివి. ఏ రోజు ఏ డ్రస్‌ వేస్తావో, ఏ రోజు ఏ వేషం కడతావోనని నెల్లూరు జనమంతా నీ కోసం ఎదురుచూసే వాళ్ళు కదా...

నెల్లూరులో నువ్వుంటే ఎంత సందడి... ఏసి సెంటర్‌ ఎంత కళగా వుండేది. అక్కడ ఎంత బిజినెస్సు... నీ పుణ్యాన అక్కడ సోడాబండోడు, వేరుశెనక్కాయల బండోడు, మజ్జిగ బండోడు... ఇలా ఎంతమంది బ్రతుకుతుండిరి... ఆ సెంటర్‌లో నువ్వు లేకపోయేసరికి పాపం వాళ్ళ బిజినెస్సులన్నీ పడిపోయే... నీ స్టేట్‌మెంట్‌ లేకుండా పేపర్‌, నీ విజువల్‌ లేకుండా ఏసిఎన్‌లో న్యూస్‌ ఎప్పుడన్నా వచ్చాయా అబ్బయ్యా... నువ్వు ప్రెస్‌మీట్‌ పెడితే అదే పెద్ద కామెడీ షోగా వుండేది. ఆ ప్రెస్‌మీట్లలో నీ హావభావాలు చూస్తే మనసుకు ఎంత ఉల్లాసంగా వుండేది. మీటింగుల్లో నీ వ్యంగోక్తులు, ప్రత్యర్థులపై నువ్వు విసిరే విమర్శలు ఎంత నవ్వు తెప్పించేవి. ప్రత్యర్థులను కిండల్‌ చేయడంలో నువ్వు పెద్ద ముదురువు కదా!

ప్రతి ఏటా టెన్త్‌, ఇంటర్‌ పరీక్షలు రాసే పిల్లకాయలకు శుభాకాంక్షలు చెబుతూ గ్రీటింగ్‌ కార్డులు పంపే వాడివి. వాటిని అందుకుని పిల్లకాయలు ఎంత ఆనందపడే వాళ్ళో... ఆ ఆనందంతోనే పరీక్షలు రాసేవాళ్ళనుకో... కాని మూడేళ్ళ నుండి వాళ్ళను మర్చిపోయావా ఏంటి. గ్రీటింగ్‌ కార్డులు కూడా పంపడం లేదు వివేకా... వాళ్ళ దృష్టిలో నవ్వు నెల్లూరు నెహ్రూవు. మా చాచా ఎప్పుడు నెల్లూరొస్తాడా... మమ్మల్ని చిరునవ్వుతో ఎప్పుడు పలుకరిస్తాడా అని వారంతా ఎదురుచూస్తున్నారబ్బా! సంతపేటలో దోశెల బండి కాడ నువ్వు దోశెలు పోస్తుంటే చూసి ఎంతకాలమైందో... ఆ దోశల పెద్దామె కూడా మా వివేకా ఎక్కడికిపోయాడు నాయనా, కనిపిస్తే ఒక్కసారి వచ్చి తన చేతి దోశలు, బోండాలు తనిపొమ్మని చెప్పండని టిఫిన్‌ కోసం వచ్చే వాళ్ళకు చెబుతుందంట... నెల్లూరు రిక్షావాళ్ళు, ఆటోవాలాలు, తోపుడు బండ్లోళ్ళు, మెకానిక్‌లు, కార్పెంటర్‌లు, తాపీ పనోళ్ళు, చెత్త ఎత్తేవాళ్ళు... అందరూ నీ ఫ్రెండ్సే కదా! మా ఫ్రెండ్‌ ఎక్కడకు పోయాడయ్యా... ఆయనను చూసి ఎన్ని రోజులైందయ్యా అని వాళ్ళు నీ కోసం కళ్ళు కాయలు కాచేలా ఎదురుచూస్తున్నారు. ముఖ్యంగా నీ ఫ్యాన్స్‌ హిజ్రాలైతే దిగులు పెట్టుకుని వున్నారు. వాళ్ళను మనుషులుగా చూసింది నువ్వే కదా... వారితో ఆడి పాడింది నువ్వే కదా నాయనా... ఈమధ్య నెల్లూరులో వ్యాపార దుకాణాల ప్రారంభోత్సవాలకు భారీగా ఖర్చవుతుందంట... ఎందుకురా అని ఆరాతీస్తే, ఓపెనింగ్‌లకు సినిమా యాక్టర్‌లను తీసుకురావాల్సి వస్తుంది, వాళ్ళు వచ్చారంటే 5 నుండి 10లక్షల దాకా ఇచ్చుకోవాలి... అదే నెల్లూరులో మా వివేకన్న ఉండుంటే మాకింత ఖర్చెందుకవ్వుద్ది... ఆయనొక్కడే వందమంది హీరోలతో సమానం... ఆయనను పిలిచి లక్షలు ఇవ్వబల్లేదు... లక్షణంగా ఒక కేకు, సమోసా పెడితే తినిపోతాడు. అంతేనా, ఆయనది లక్కీ హ్యాండ్‌. మంచి మనసుతో ప్రారంభిస్తాడు కాబట్టి వ్యాపారాలు కూడా అలాగే జరిగేవి. ఇప్పుడేమో ఆయన నెల్లూరులో ఉండకపోతుండె.... ప్రారంభోత్సవాల ఖర్చే కాదు, బిజినెస్‌లకు గ్యారంటీ లేకుండా

పోయిందంటున్నారు. ఇదయ్యా నెల్లూరులో టాక్‌! చీరల కొట్టోళ్ళు, నగల షాపులోళ్ళు, హోటల్‌ వాళ్ళు, ఆఖరకు బార్బర్‌షాపుల వాళ్ళు కూడా నువ్వు నెల్లూరుకు ఎప్పుడొస్తావా, తమ షాపులలో ఎప్పుడు అడుగుపెడతావా అని ఎదురుచూస్తున్నారయ్యా... ఏం సుబ్బక్కా... ఏం మాధవా... ఒరే నాగా... అంటూ ఎంతో ఆత్మీయంగా వుండే ఈ పిలుపులు విని ఎన్నిరోజులైందయ్యా... నువ్వు సిగరెట్‌ మడుస్తుంటే, గాలిలోకి పొగ వదుల్తుంటే ఆ తీరే వేరుకదయ్యా.

ఒక్క నెల్లూరు జనానికే కాదయ్యో నువ్వంటే ప్రేమ... నెల్లూరు దేవుళ్ళు కూడా నీ ఫ్యాన్సే! పోయిన ముక్కోటికి లేకపోతివి, మొన్న రంగనాథస్వామి తిరునాళ్ళకు లేకపోతివి. ముక్కోటినాడు నువ్వు దేవుడి పల్లకీ మోస్తుంటే, చూడడానికి ఎంత అందంగా ఉండేదో... ఆ స్వామికి కూడా నువ్వు పల్లకీ మోయని కొరత కనిపిస్తున్నట్లుంది. రంగని తేరు ముందు నువ్వు కనిపించకుంటే ఎంత లోటనిపిస్తుందో... ఒక్క రంగడే కాదు, మూలాపేట శివుడు, వేణుగోపాలుడు, దుర్గామిట్ట రాజేశ్వరమ్మ, గ్రామదేవత ఇరుకళలమ్మ... వీళ్ళందరూ కూడా మా బిడ్డ మామీదేమన్నా అలిగిపోయాడా అని నీ కోసం ఎదురుచూస్తున్నారయ్యా... దర్గా దగ్గర రొట్టెల పండుగ జరుగుతుంటే... నువ్వు అక్కడ లేనిలోటు చాలా ఉందయ్యా... దేశవిదేశాల నుండి వచ్చినవాళ్ళు కూడా ఇక్కడ ఒక ఫకీర్‌ బాబా వుండాలే అని నీ కోసం వెదుకుతున్నారయ్యా... రొట్టెల పండుగలో నువ్వు చేసే సందడి అంతా ఇంతా కాదు కదా... ముస్లింలకు తగ్గట్లుగా నువ్వు వేసే గెటప్‌ ముందు అరబ్‌ షేక్‌లు కూడా పనికిరారుగా!

గంభీరమైన నీ గొంతు వినపడక, నిండు చంద్రుడిలా వెలిగే నీ ముఖం కనపడక నెల్లూరీయులందరూ ఏదో పోగొట్టుకున్నామనే దిగులుతో వున్నారు. మనోళ్ళకు నిన్ను చూస్తే ఆనందం... నీ మాటలు వింటుంటే పరమానందం... నీ హావభావాలు చూస్తుంటే బ్రహ్మానందం. వొళ్ళు బాగలేక హైదరాబాద్‌లో వున్నావని తెలిసింది... నువ్వు కొలిచే దేవుళ్ళే నిన్ను చల్లగా చూస్తారు. త్వరగా కోలుకుని నల్ల ఫ్యాంటు, నల్ల చొక్కా, నల్ల బూట్లు వేసుకుని, నల్లకళ్ళద్దాలు పెట్టి, నల్లకారులో నీ నెల్లూరీయుల కోసం దిగవయ్యా...

రాజకీయాలు వేరు, వ్యక్తిత్వం వేరు, పార్టీలు, కులాలు, మతాలు, వర్గాలు వదిలేస్తే అందరూ మనుషులే, అందరిదీ మానవజన్మే. రాజకీయంగా నువ్వెవరైనా కావచ్చు, వ్యక్తిగా నాకు నువ్వంటే ఇష్టం, నీ నవ్వంటే ఇష్టం, నీ నడకంటే ఇష్టం, నీ మాటంటే ఇష్టం, నీ స్టైలంటే ఇష్టం... అందుకేనయ్యా వివేకయ్యా నీ రాక కోసం నిలువెల్లా కనులై ఎదురుచూస్తున్నాను.

ఇట్లు

నీ... నెల్లూరు.

Page 1 of 5

newsbottomad

ఎక్కువగా చదివిన వార్తలు

  • ఆత్మకూరు టీడీపీకి... దిక్కెవరు?
    ఈ నెల 8వ తేదీన నాయుడుపేటలో నిర్వ హించిన ముఖ్యమంత్రి చంద్రబాబునాయుడు నవనిర్మాణదీక్ష సభకు మాజీమంత్రి ఆనం రామ నారాయణరెడ్డి రానని చెప్పడంతోనే తెలుగుదేశం శ్రేణులకు ఆయన ఉద్దేశ్యం అర్ధమైపోయింది. ఆనం రామనారాయణరెడ్డిని తెలుగుదేశంలో నిలుపుకునేందుకు జిల్లా మంత్రి పి.నారాయణ నుండి…
  • తమ్ముడు తోడొచ్చేనా?
    మాజీమంత్రి ఆనం రామనారాయణరెడ్డి త్వరలో వైసిపిలో చేరనున్నట్లు తెలుస్తోంది. మరి ఆయనతో పాటు ఆయన కుటుంబసభ్యులు ఇంకెవరెవరు పార్టీలో చేరనున్నారన్నది ప్రశ్నగా మారింది. నాలుగో సోదరుడైన ఆనం విజయ కుమార్‌రెడ్డి ఆల్‌రెడీ వైసిపిలోనే వున్నాడు కాబట్టి ఆయనతో పనిలేదు. ఇక స్వర్గీయ…
  • సైకిల్‌ దిగినట్లే! వైసిపిలో చేరడానికి ఇంకా కుదరని ముహూర్తం
    దాదాపు రెండు నెలలుగా ఒక వార్త జిల్లా రాజకీయాలలోనే కాదు, రాష్ట్ర రాజకీయాలలో కూడా హల్‌చల్‌ చేస్తోంది. అదే మాజీమంత్రి ఆనం రామనారాయణరెడ్డి తెలుగుదేశం పార్టీని వీడనున్నాడని... వైయస్సార్‌ కాంగ్రెస్‌పార్టీలో చేరనున్నాడని. ఇవన్నీ మీడియాలో మాత్రమే వచ్చాయి. ఆనం వివేకానందరెడ్డి మరణానికి…
  • బ్రదర్స్‌ దారెటు?
    ఏ.సి.సుబ్బారెడ్డి, ఆనం వెంకటరెడ్డి... ఆనం వంశంలో మొదటి తరం. ఆనం సంజీవరెడ్డి, ఆనం భక్తవత్సలరెడ్డి, ఆనం వివేకా, ఆనం రామనారాయణ రెడ్డి, ఆనం జయ, ఆనం విజయ... వీళ్ళంతా రెండోతరం నాయకులు... ఇప్పుడు మూడోతరం కూడా రంగంలో వుంది. ఆనం వెంకటరమణారెడ్డి,…
  • వైకాపాలో కుటుంబ రాజకీయం
    నెల్లూరు జిల్లాలో వైయస్సార్‌ కాంగ్రెస్‌పార్టీలో మొదటగా చేరింది, మొదటి నుండి జగన్‌కు అండగా నిలిచింది మేకపాటి కుటుంబం. పెద్ద రాజకీయ కుటుంబాలేవీ జగన్‌ వెంట రాకున్నా ఆయన పార్టీ పెట్టిన కొత్తల్లో కాంగ్రెస్‌పార్టీ ఎంపీగా వున్న మేకపాటి రాజమోహన్‌రెడ్డి, ఎమ్మెల్యేగా వున్న…

Newsletter