విభజన తర్వాత ఆంధ్రప్రదేశ్‌లో 13జిల్లాలే మిగిలాయి. కోస్తాలో 9, రాయలసీమలో 4 జిల్లాలున్నాయి. మెజార్టీ జిల్లాల్లో ఏ పార్టీకైతే రాజకీ యంగా బలమైన పునాదులు ఉన్నాయో ఆ పార్టీకే విజయావకాశాలు మెరుగ్గా వుంటాయి. కోస్తా, రాయలసీమ అన్నవి పక్కన పెడితే కృష్ణానదికి ఇవతల 7 జిల్లాలు, అవతల ఆరు జిల్లాలున్నాయి. కృష్ణా నదికి అవతలి వైపు వున్న జిల్లాల్లోనే వైయస్సార్‌ కాంగ్రెస్‌ పార్టీకి అగ్ని పరీక్ష ఎదురవుతోంది.
కృష్ణానదికి ఇవతల జిల్లాలైన కడప, కర్నూలు, నెల్లూరు, ప్రకాశం, చిత్తూరు, గుంటూరు జిల్లాల్లో వైసిపి బలంగానే వుంది. ఒక్క అనంతపురం జిల్లాలో బలం పుంజుకోవాల్సి వుంది. 2014 ఎన్నికల్లో వైయస్సార్‌ కాంగ్రెస్‌పార్టీకి వచ్చిన సీట్లలో సింహభాగం ఇక్కడివే! ఈ జిల్లాల్లో వున్నంత బలంగా కృష్ణానదికి అవతల వైపు వున్న కృష్ణ, పశ్చిమగోదావరి, తూర్పు గోదావరి, విశాఖ, విజయనగరం, శ్రీకాకుళం జిల్లాలో లేకుండా పోయింది. విశాఖపట్నం లోక్‌సభలో వై.యస్‌. సతీమణి, జగన్‌ అమ్మగారైన వై.యస్‌.విజయమ్మే ఓడిపోయారు. కృష్ణానదికి ఇవతల వైపు రాజకీయ వాతావరణం వేరు, అవతలి వైపు వాతావరణం వేరు. ఈ ఆరు జిల్లాల్లోనూ కుల సమీకరణలు బాగా పని చేస్తాయి. 2014 ఎన్నికల్లో ఈ జిల్లాల్లో బలమైన కమ్మ, కాపు, క్షత్రియ సామాజిక వర్గాలన్నీ ఒక్కటయ్యాయి. పవన్‌ కళ్యాణ్‌ మద్దతు తెలపడం వల్ల తెలుగుదేశంకు కాపుల ఓట్లు బాగానే కలిసొచ్చాయి. సాంప్రదాయ బద్ధంగా శ్రీకాకుళం, విజయనగరం, విశాఖ, కృష్ణా జిల్లాల్లో 1983 నుండి కూడా తెలుగుదేశం బలంగానే వుంది. 2014లో ఆ పార్టీ అధికారంలోకి రావడానికి ప్రధాన కారణం ఈ ఆరు జిల్లాలే!
ఈ ఆరు జిల్లాల్లో పార్టీని పటిష్ట పరిస్తేనే అధికారంపై ఆశలు నిలబడతాయి. దివంగత నేత వై.యస్‌. వున్నప్పుడు ఈ ఆరు జిల్లాల్లో తన సొంతంగా బలమైన కేడర్‌ను ఏర్పాటు చేసుకున్నాడు. ఆయన మరణించాక ఆయన ఏర్పాటు చేసిన కేడర్‌ చెల్లాచెదురైంది. ఈ ఆరు జిల్లాల్లో కుల సమీకరణలు, నాయకుల సమీకరణపై జగన్‌ దృష్టి సారించాల్సి వుంది. గతంలో వై.యస్‌. వెన్నంటి నడిచిన వాళ్లను, ప్రస్తుతం కాంగ్రెస్‌లో వున్న సీనియర్లను తన పార్టీ వైపు తీసుకురావాలి. 2014 ఎన్నికల్లో చంద్రబాబు ఋణమాఫీ కూడా ఈ జిల్లాల్లోనే బలంగా పని చేసింది. ఋణమాఫీ వైఫల్యాలను కూడా జగన్‌ ఇక్కడ ప్రజల్లోకి తీసుకెళ్లాలి. ఈ ఆరు జిల్లాల్లో తెలుగుదేశం సాంప్రదాయ ఓటు బ్యాంకుకు గండి కొట్ట గలిగితేనే వైకాపాకు అవకాశాలుంటాయి.
దేశంలోని పలు రాష్ట్రాలలో కుల రాజకీయాలు రాజ్యమేలుతున్నా నిన్న మొన్నటి వరకు ఆంధ్రప్రదేశ్‌ ఆ వాతావరణానికి దూరంగా వుండింది. ఇక్కడ పార్టీల గెలు పోటములపై కుల ప్రభావం చాలా తక్కువుగా వుండేది. కాని, రాష్ట్ర విభజన పుణ్యమా అని ఆంధ్రప్రదేశ్‌ రాజకీయాలలోనూ కుల మంటలు రేగాయి. 2014 ఎన్నికల నుండే రాష్ట్రంలో కుల రాజకీయాలు మొదలయ్యాయి. ఒక్కో పార్టీది ఒక్కో కులం అన్నట్లు వాతావరణం ఏర్పడింది. కులాలే కాదు, మతాల వారీగా కూడా ఓటర్లు విడిపోయారు.
కులాలు, మతాల విభజన వల్లే 2014 ఎన్నికల్లో కొన్ని వర్గాలు వైయస్సార్‌ కాంగ్రెస్‌పార్టీకి దూరమయ్యాయి. దీనివల్లే ఆ పార్టీ అధికారానికి కొంచెం దూరంలో ఆగిపోయింది. ముఖ్యంగా జగన్‌పై టీడీపీ అనుకూల మీడియా క్రైస్తవ ముద్రను వేసింది. అదే పనిగా ప్రచారం చేసి హిందువులలో బ్రాహ్మణ, వైశ్య వర్గాలను వైకాపాకు దూరం చేసాయి. వైకాపా అధికారంలోకి వస్తే క్రిస్టియానిటీ పెరిగిపోతుందని చేసిన ప్రచారం గత ఎన్నికల్లో బాగానే పని చేసింది. గత ఎన్నికల్లో పచ్చ మీడియా చేసిన ప్రచారం వల్ల వైకాపాకు క్షత్రియ కులస్థులు కూడా దూరమయ్యారు. ఇక చంద్రబాబు ఇచ్చిన ఋణ మాఫీ వాగ్ధానంతో రైతులు, మహిళలు కూడా వైకాపాకు ఓట్లు వేయలేదు. జనసేన అధినేత పవన్‌ కళ్యాణ్‌ మూలంగా ఈ రాష్ట్రంలో మెజార్టీ ఓటర్లయిన కాపు కులస్థులు కూడా వైకాపాకు మద్దతివ్వలేదు. వీళ్ల ఓట్లు కూడా చంద్రబాబుకే పడ్డాయి. గత ఎన్నికల్లో తనకు దూరమైన ఈ వర్గాలను దగ్గరకు చేర్చుకోవడం పైనే జగన్‌ రాజకీయ భవిష్యత్‌ ఆధారపడి వుంది. ఋణ మాఫీ అమలులో చంద్రబాబు విఫలమయ్యాడు. రైతులు, మహిళలు తెలుగుదేశం ప్రభుత్వంపై వ్యతిరేకతతో వున్నారు. రైతుల కోసం నవరత్నాలు పథకం ప్రకటించిన జగన్‌, మహిళల నమ్మకాన్ని పెంపొందించుకునే దిశగా వారికి ప్రత్యేక వరాల హామీలు ఇవ్వనున్నాడు. ఇక కాపు రిజర్వేషన్ల సెగతో చాలావరకు కాపులు చంద్రబాబుకు వ్యతిరేకంగానే వున్నారు. వచ్చే ఎన్నికల నాటికి మెజార్టీ కాపులు తెలుగుదేశంను వ్యతిరేకించే అవకాశాలున్నాయి. జగన్‌ కాపు సామాజిక వర్గం నేతలకు ఎక్కువ ప్రాధాన్యతనిస్తూ, వారి మద్దతు కోసం కృషి చేస్తున్నాడు. తమ పార్టీ అధికారంలోకి వస్తే వైశ్య కార్పొరేషన్‌ ఏర్పాటు చేస్తామని ప్రకటించడం ద్వారా జగన్‌ వారి అభిమానాన్ని చూరగొనే ప్రయత్నం చేసాడు. అలాగే హైందవ సాంప్రదాయాలను గౌరవిస్తూ, ఆచారాలను పాటిస్తూ, హిందూ మతాధిపతులు, పీఠాధిపతుల ఆశీస్సులు తీసుకుంటూ బ్రాహ్మణులకు తనపై వున్న అభిప్రాయాన్ని మార్చుకునేలా చేస్తున్నాడు. తాను ఒక కులం వాడినో, ఒక మతం వాడినో కాదని అందరివాడినని, అందరినీ కలుపుకుపోయే వాడినని, అందరి కోసం పనిచేసే వాడినని తననుతాను మలచుకునే ప్రయత్నం చేస్తున్నాడు. అందరు కూడా జగన్‌ మా వాడు అని భావిస్తే వచ్చే ఎన్నికల చిత్రపటం మరో విధంగా చూడొచ్చు.
వైయస్సార్‌ కాంగ్రెస్‌పార్టీ అధినేత వై.యస్‌.జగన్మోహన్‌రెడ్డి మంగళవారం శంషాబాద్‌లోని శ్రీశ్రీశ్రీ త్రిదండి శ్రీమన్నారాయణ రామానుజ చినజీయర్‌ స్వామి వారి ఆశ్రమ ప్రాంగణానికి వెళ్ళి స్వామివారిని కలుసుకున్నారు.
ప్రజల కష్టాలను స్వయంగా తెలుసుకుని తనకు చేతనైన మేరకు వారికి సహాయసహకారాలు అందించడానికి త్వరలో నవ్యాంధ్రలో పాదయాత్ర చేపట్టబోతున్నానని, ఈ పాదయాత్ర విజయవంతం అయ్యేలా ఆశీస్సులందించాలని స్వామివారిని జగన్‌ కోరాడు.
లాయర్ , జాతీయ తెలుగు వార పత్రిక . గత 25 సంవత్సరములకు పైగా నెల్లూరు ప్రజల పక్షాన నూతన అభ్యుదయ సమాజం కోసం పోరాడుతుంది