jaganగెలిస్తే ప్రపంచానికి నువ్వు తెలుస్తావ్‌... ఒక్కసారి ఓడిపోయి చూడు ప్రపంచమేంటో నీకు తెలుస్తుంది. రాజకీయాలలో గెలుపును ఆస్వాదించే వాడు కాదు, ఓటమిని భరించేవాడు, ఆ ఓటమితో పాఠాలు నేర్చుకునే వాడు, ఆ ఓటమిని రేపటి విజయానికి మెట్లుగా మలచుకునేవాడే నిజమైన రాజకీయ యోధుడు, ప్రజా నాయకుడు.

నంద్యాల అసెంబ్లీ, కాకినాడ కార్పొరేషన్‌లలో ఓడిపోగానే వైకాపా పనైపోయిందని, జగన్‌ ఇక పార్టీని క్లోజ్‌ చేసుకోవచ్చన్నట్లుగా తెలుగుదేశం వర్గాలు, తెలుగుదేశం అనుకూల మీడియా ప్రచారం హోరెత్తిస్తోంది. ఒక్క ఓటమితోనే ఒక పార్టీ భవిష్యత్‌కు తెరపడే టట్లయితే ఈరోజు దేశ రాజకీయ చిత్రపటంపై కాంగ్రెస్‌, బీజేపీ, టీడీపీలతో సహా చాలా పార్టీలు కనిపించవు. 1977లో కాంగ్రెస్‌ మట్టి కరిచింది. ఏడాది కల్లా సునామీలా లేచి నిలబడింది. 1984లో బీజేపీకి వచ్చింది రెండే రెండు సీట్లు. ఈరోజు తిరుగులేని ఆధిక్యతతో అధికారంలో వుంది. 1989లో ఏపిలో తెలుగుదేశం తుక్కుతుక్క యింది. 1994కల్లా ప్రభంజనమై లేచింది. కాబట్టి రాజకీయాల్లో గెలుపు శాశ్వతం కాదు, ఓటమీ శాశ్వతం కాదు. నిరంతర పోరాటం మాత్రమే శాశ్వతం.

కాకపోతే నంద్యాల, కాకినాడ ఓటముల నుండి ప్రతిపక్ష నేత వై.యస్‌.జగన్మోహన్‌రెడ్డి నేర్చుకోవాల్సిన పాఠాలు చాలానే వున్నాయి. ఈ రెండు చోట్ల గెలవడానికి చంద్రబాబు ఎన్నో ప్రయత్నాలు చేశాడు. ఎంతగా అధికార దుర్వినియోగం చేసాడో, ఎన్ని విధాలుగా ప్రలో భాలకు గురి చేసాడో అన్నది వేరే విషయం. 2019 ఎన్నికల్లో కూడా వీటన్నింటిని ప్రయోగించగల శక్తి చంద్రబాబుకు వుంది. వాటిని ఎదుర్కొనే మార్గమే ఇప్పుడు జగన్‌కు కావాలి. 2012లో ఏపిలో 17 అసెంబ్లీ స్థానాలకు జరిగిన ఉపఎన్నికల్లో వైకాపా అభ్యర్థులు 15చోట్ల భారీ మెజార్టీలతో గెలుపొందారు. ఈ గెలుపే 2014లో జగన్‌ కొంప ముంచింది. ఈ గెలుపు ఆత్మవిశ్వాసాన్ని బదులు అతివిశ్వాసాన్ని పెంచింది. ఎన్నికలు జరగడమే తరువాయి, గెలవడమే మిగిలిం దన్నంత ధీమాను పెంచింది. అందుకే వస్తామన్న సీనియర్‌ కాంగ్రెస్‌ నాయకులను పార్టీలోకి తీసుకోలేదు. వీళ్లంతా తెలుగుదేశంలోకి వెళ్లి వైకాపాకు చేయాల్సిన నష్టం చేశారు. అదేవిధంగా జగన్‌ రాజకీయ అనుభవ రాహిత్యం వల్ల కొన్ని నిర్ణయాలు తీసుకోలేక పోవడం కూడా పార్టీ పరాభవానికి కారణమైంది.

2014 ఎన్నికల్లో ఓటమిగాని, నిన్నటి నంద్యాల, కాకినాడ పరాజయాలు కాని ఒక్క విషయాన్ని స్పష్టంగా చెబుతున్నాయి. రాష్ట్రంలో ఇంకా ఒక వర్గం ప్రజలకు జగన్‌ దగ్గర కాలేక పోతున్నాడని. ఇక్కడ ఒక వర్గం అంటే ఒక కులం అనో, మతం అనో కాదు. ఎన్నికల సమయంలో పార్టీ అధి నేతల వ్యవహారశైలి, నాయకత్వ లక్షణాలు, వారి భవిష్యత్‌ కార్యాచరణను పరిశీలించి ఎవరికి ఓటు వేయాలని నిర్ణయం తీసుకునే తటస్థులని. రాష్ట్రంలో ఇలాంటి వారి శాతం తక్కువే కావచ్చు. కాని ఎన్నికలలో గెలుపోటములను నిర్దేశించే ఓట్లు ఇవేనని గుర్తుంచుకోవాలి. 2014 ఎన్నికల్లో తెలుగు దేశం అధికారంలోకి రావడానికి ఈ ఓట్లే కీలకమయ్యాయి. ఆ ఎన్నికల్లో తటస్థులు చంద్రబాబు వైపే మొగ్గు చూపారు. రాష్ట్రం విడిపోయి, అప్పుల ఊబిలో వుంది,

ఉద్యోగులకు జీతాలిచ్చే పరిస్థితి కూడా లేదు. ఈ స్థితిలో చంద్రబాబు అయితేనే ఈ రాష్ట్రాన్ని గట్టెక్కించగలడని, ఆయనకు ఆ అనుభవం ఉందని, జగన్‌కు అంతటి పరిపాలనానుభవం లేదని చెప్పి తెలుగు దేశంకు ఓట్లేసారు. ఇలా ఓట్లేసిన వాళ్లలో చంద్రబాబును అప్పటిదాకా ద్వేషించిన ఉద్యోగులు కూడా ఉండడం గమనార్హం. ఈ వర్గం వాళ్ళు మొగ్గుచూపబట్టే కేవలం 5లక్షల ఓట్ల తేడాతో అధికారం చంద్ర బాబు చేతుల్లోకి వెళ్లిపోయింది.

నిన్న నంద్యాల, కాకినాడలలో వైకా పాకు తక్కువ ఓట్లేమీ రాలేదు. చంద్ర బాబు అంతగా ప్రలోభాలు పెట్టినా వైకా పాకు 70వేల ఓట్లు వచ్చాయి. నంద్యాల ఫలితం వెల్లడయ్యాక కాకినాడ ఎన్నికలు పెట్టినా, తెలుగుదేశంకు వైకాపాకు మధ్య వచ్చిన ఓట్ల తేడా 20వేలు మాత్రమే. వైకాపాకైనా, తెలుగుదేశంకైనా పార్టీ ఓట్లు నికరంగా వుంటాయి. జగన్‌ ఏం మాట్లా డినా, చంద్రబాబు ఎలా వున్నా ఆ ఓట్లు పక్కకు పోవు. ప్రతి వందఓట్లలో 40ఓట్లు తెలుగుదేశంకు, 40ఓట్లు వైకాపాకు, ఓ 10 ఓట్లు మిగతా పార్టీలు, ఇండిపెండెంట్‌ అభ్యర్థులకు వున్నాయనుకుందాం. మిగి లిన పదిమంది ఎన్నికల సమయంలోనే నిర్ణయం తీసుకుంటారు. నాయకులనుబట్టి, నాయకులు ఇచ్చే వాగ్ధానాలను బట్టి, నాయకత్వ సమర్ధతను బట్టి ఎవరికి ఓటే యాలన్నది ఇలాంటి వాళ్లు నిర్ణయించు కుంటారు. డబ్బులతో కొనే ఓట్లనేవి ఇరు పార్టీలకు వుంటాయి కాబట్టి ఆ ఓట్లను తటస్థులతో కలపలేం. విజ్ఞులు, మేధా వులు, అభ్యర్థిని, పార్టీ రాష్ట్ర నాయకులను, వారి వ్యవహార శైలిని బట్టి తటస్థులు మారుతుంటారు. ఎన్నికల్లో గెలుపుకు వీరి ఓట్లు చాలా కీలకం. కాబట్టి వారి మనసు లకు దగ్గరయ్యేలా జగన్‌ ఇప్పటి నుండే భవిష్యత్‌ కార్యాచరణ రూపొందించు కోవాల్సివుంది.

jaganరాజకీయాలలో సర్పంచ్‌ స్థాయి నాయకులకో భాష ఉం టుంది, ఎమ్మెల్యే స్థాయి నాయకులకో భాష ఉంటుంది, ముఖ్య మంత్రుల స్థాయిలో ఓ భాష ఉంటుంది, జాతీయ స్థాయి నాయకు లకో భాష ఉంటుంది. ఇక్కడ భాష అంటే తెలుగు, తమిళం, ఆంగ్లం అని కాదు... నాయకులు మాట్లాడే పద్ధతి అని. సర్పంచ్‌ స్థాయి నాయకుడు తన్నండి, నరకండి అంటే ప్రజలు పెద్దగా పట్టించుకోరు. ఎందుకంటే అతను గ్రామస్థాయి నాయకుడు మాత్రమే! కాని, ఒక రాష్ట్రస్థాయి నాయకుడి నోటి నుండో, జాతీయ నాయకుడి నోటి నుండో అలాంటి మాటలు వస్తే ప్రజలు పట్టించు కుంటారు. రాజకీయాలలో మాట తీరు హూందాగా వుంటేనే నాయకులు రాణిస్తారు.

నేటి రాజకీయాలలో వైకాపా అధినేత జగన్‌ మొనగాడే! మహామహులే తలవంచిన సోనియాగాంధీని ఢీకొట్టాడు. 16 నెలలు జైల్లో వున్నాడు. పెద్దపెద్ద యోధులే ప్రాంతీయ పార్టీలను నడపలేని నేటి రోజుల్లో కాంగ్రెస్‌ పార్టీ నుండి బయటకొచ్చాడు. వైయస్సార్‌ కాంగ్రెస్‌పార్టీని స్థాపించాడు. 2014లో తృటిలో అధికారం తప్పిపోయినా, 70మంది ఎమ్మెల్యేలను గెలిపించు కున్నాడు. ఇక ప్రజాక్షేత్రంలోకి వెళ్లాడంటే అలుపెరుగని పయనమే! అధికార పార్టీ వాళ్లకు ఎక్కడా బెదరడం లేదు, తగ్గడం లేదు. ప్రజల్లోకి వెళ్లాడంటే వారితో మమేకమవుతున్న తీరు అభిమానం, ఆత్మీయతకు అద్దం పడుతోంది. ఈరోజుకీ ప్రజలు అభిమానంతో పోటెత్తి వచ్చే ఏకైక రాజకీయ నాయకుడు వైయస్‌ జగన్మోహన్‌రెడ్డే! రాష్ట్రంలో గత ఆరేళ్లలో అతను కలుసుకున్నంత మంది ప్రజలను, అభిమానులను ఇంకే నాయకుడు కలుసుకుని వుండడంటే అతిశయోక్తి కాదు.

జగన్‌లో రాజకీయ నాయకుడిగా, ప్రజా నాయకుడిగా అన్ని లక్షణాలు వున్నాయి. కాకపోతే మాటతీరే కొంచెం మారాలి. ప్రభుత్వం మీద, ప్రభుత్వాధినేత మీద విమర్శలు, ఆరోపణలు చేయవచ్చు. అవి అర్ధవంతంగా, ఆలోచింపజేసే విధంగా వుండాలే గాని, మన విమర్శలు మనకే చేటు తెచ్చేలా కాదు. నంద్యాల ప్రచారంలో చంద్రబాబును నడిరోడ్డుపై కాల్చినా తప్పులేదు అని ఆయన మాటలు ఎంత దూరం వెళ్లాయో చూసాము. ఇటువంటి మాటలను ప్రజలు స్వీకరించరు. అది కూడా ముఖ్యమంత్రి స్థాయికి పోటీ పడుతున్న నాయకుడంటే ఆమోదించరు. ప్రత్యర్థులే కాదు, సొంత పార్టీ వాళ్ళు, తటస్థులు, విజ్ఞులు కూడా ఇలాంటి మాటలను అంగీకరించరు. మరి ఈ మూడేళ్లలో తెలుగుదేశం వాళ్లు చాలా కారుకూతలు కూసారు కదా... అనే ప్రశ్న రావచ్చు. ఆ కారుకూతలు కూసిన వాళ్లను ప్రజలు అభిమానించడం లేదు. ఇక్కడ ప్రజలు జగన్‌ను అభిమానిస్తున్నారు. కాబట్టే ఆయన నోట అలాంటి మాటలను ఆమోదించరు.

మొన్న నంద్యాల ఫలితం రాగానే విలేకరుల ముందు జగన్‌ మాట్లాడిన మాటలు కూడా రాజకీయాల్లో ఆమోదయోగ్యం కాదు. 'మమ్మల్ని దెబ్బ కొట్టారు, మాకు గుండె ధైర్యం వుంది, మేం దెబ్బ తట్టుకుని నిలబడ్డాం, మాకూ టైం వస్తుంది, మేమూ దెబ్బ కొడతాం...' ఇలాంటి మాటలు వీధి గొడవల్లో పనికొస్తాయేమో గాని, రాజకీయ క్రీడలో కాదు. ఓటమిని అంగీకరిస్తున్నాం, ప్రజాతీర్పును గౌరవిస్తాం, అధికార పార్టీ ప్రలోభాలు పని చేసాయి. ప్రజల పరిస్థితిని మేం అర్ధం చేసుకున్నాం అని నాలుగు ముక్కలు చెప్పి సరిపెట్టి వుంటే ఎంతో హూందాగా వుండేది. దెబ్బతిన్నాం, దెబ్బ కొడతాం అనే మాటలను ప్రజలు హర్షించరు. ఎందుకంటే జగన్‌ వీధి నాయకుడు కాదు... రాష్ట్ర నాయకుడు. కాబట్టి మాట తీరు మార్చుకోవాలి.

jaganగతానికి భిన్నంగా, గతంకంటే ఉత్సాహంగా ఆంధ్రప్రదేశ్‌ నడిబొడ్డు గుంటూరు కేంద్రంగా రెండు రోజుల పాటు జరిగిన వైయస్సార్‌ కాంగ్రెస్‌పార్టీ ప్లీనరీ సమావేశాలు ప్రభుత్వంపై ప్రజల్లో వున్న వ్యతిరేకతకు, ప్రజానేత జగన్‌పై వున్న నమ్మకానికి నిదర్శనంగా నిలిచాయి.

ప్రతిఏటా ఇడుపులపాయలో వైసిపి ప్లీనరీలు జరిగేవి. అయితే అక్కడ దివంగత నేత వై.యస్‌.రాజశేఖరరెడ్డి సమాధి ఉండడం తప్ప ఆ ప్రాం తంలో ఇంకెటువంటి రాజకీయ ప్రాధాన్యత లేదు. కాని, ఈసారి ప్లీనరీకి గుంటూరును ఎంచుకుని రాజకీయ వ్యూహాత్మకంగా ముందడుగు వేసాడు వై.యస్‌.జగన్మోహన్‌రెడ్డి. కొంతకాలం క్రితమే విశాఖ కేంద్రంగా తెలుగుదేశంపార్టీ వాళ్లు నిర్వహించిన మహానాడుకు, నిన్న జరిగిన వైసిపి ప్లీనరీకి తేడా కొట్టొచ్చినట్లు కనిపించింది. మహా నాడులో అధికార ఆర్భాటం స్పష్టంగా కనిపిస్తే, వైసిపి ప్లీనరీలో మాత్రం పార్టీపై అభిమానం, ప్రభుత్వం పట్ల వున్న వ్యతిరేకత స్పష్టమైంది.

గుంటూరు ప్లీనరీని ప్రతిపక్ష నేత వై.యస్‌.జగన్మోహన్‌రెడ్డి చక్కని రాజకీయ వేదికగా మలచుకున్నాడు. భవిష్యత్‌ కార్యా చరణ ప్రణాళికను స్పష్టంగానే ప్రకటించ గలిగాడు. రాష్ట్రంలో మూడేళ్ల చంద్ర బాబు పాలనను ఎండగట్టడం లోనే కాదు, తాము అధికా రంలోకి వస్తే ఏం చేస్తామన్నది కూడా ప్రజల్లోకి తీసుకెళ్లగలిగారు. ప్లీనరీలో తెలుగుదేశం ప్రభుత్వ వైఫల్యాలకే గురిపెట్టి జగన్‌ కొత్త పథకాలను ప్రకటించాడు. ఎన్నికలు ఇంకా దాదాపు రెండేళ్ల దూరంలో వున్నాయి. ఇప్పుడే ఆయన వరాలు, పథకాలు ప్రకటించాల్సిన అవసరం లేదు. కాని, రేపు జరగబోయే నంద్యాల అసెంబ్లీ ఎన్నికలను దృష్టిలో పెట్టుకునే జగన్‌ వీటిని ప్రకటించాడనిపిస్తుంది. ముఖ్యంగా రైతులను లక్ష్యంగా చేసుకున్నాడు. 5ఎకరాల లోపున్న రైతులకు సంవత్సరానికి 50వేల సాయం ప్రకటించడం రాజకీయంగా పార్టీకి ఎంతో ప్రయోజనం కలిగించేదే! తెలుగుదేశం ప్రభుత్వంలో రైతాంగం పూర్తి నిరాశకు లోనైంది. చంద్రబాబు ఋణమాఫీ వాగ్ధానం అరకొరగానే అమలైంది. పాత ఋణాలు పూర్తి స్థాయిలో మాఫీ కాకపోగా, రైతులకు బ్యాంకులు కొత్తగా అప్పులివ్వడం లేదు. సాగునీళ్ళ సమస్య... గిట్టుబాటు ధరల సమస్య... విత్తనాలు, ఎరువుల సమస్య... ఇలా నిత్యం సమస్యలతో పోరాడుతున్న రైతులకు జగన్‌ రైతు భరోసా పథకం కొత్త ఆశలు కల్పించేదే!

ఇక మూడు దశలలో మద్య నిషేధాన్ని అమలు చేస్తానన్న జగన్‌ ప్రకటన మహిళా లోకాన్ని విశేషంగా ఆకర్షించేదే! రాష్ట్రంలో మహిళలు ఎదుర్కొంటున్న ప్రధాన సమస్య ఇదే! 2014 ఎన్నికల్లో కూడా చంద్రబాబు విడతల వారీగా మద్య నిషేధాన్ని అమలు చేస్తానని చెప్పాడు. కాని, అధికారంలోకి వచ్చాక దశలవారీగా మద్యాన్ని విస్తరింపజేశాడు. ఈరోజు 30వేల జనాభా వున్న గ్రామాల్లో కూడా బార్లు పెట్టిస్తానంటున్నాడు. మద్యం విషయంలో చంద్రబాబు ప్రభుత్వంపై మహిళల్లో బలంగానే వ్యతిరేకత వుంది. ఈ అంశాలపై జగన్‌ గురిపెట్టి కొట్టాడు. ఆరోగ్యశ్రీ, ఫీజు రీయంబర్స్‌మెంట్‌, అమ్మబడి, పింఛన్‌లు వంటివి వై.యస్‌. హయాంలో మొదలుపెట్టి అమలు చేస్తున్నవే!

అయితే ఇక్కడ నాయకుల విశ్వసనీయత ముఖ్యం. చంద్రబాబు ఆడిన మాటమీద నిలబడడన్నది జనానికి అర్ధమైపోయింది. ప్రజల్లో ఆయన పట్ల విశ్వసనీయత లేదు. కాని విశ్వసనీయతకు బ్రాండ్‌ వై.యస్‌. కుటుంబం. 2004 ఎన్నికల్లో ప్రజలకు చెప్పిన వాగ్ధానాలన్నింటిని నెరవేర్చి చూపించాడు వై.యస్‌. ఆయన కొడుకుగా జగన్‌ పట్ల కూడా ప్రజల్లో అదే విశ్వసనీయత వుంది.

ప్లీనరీ వేదికగా జగన్‌ తీసుకున్న సాహసోపేత నిర్ణయం 3వేల కిలోమీటర్ల పాదయాత్ర. అక్టోబర్‌ 27న ఇడుపులపాయలో మొదలుపెట్టి ఇచ్ఛాపురం దాకా 13జిల్లాల్లో 6 నెలల పాటు పాదయాత్ర చేయాలని సంకల్పించడం జగన్‌ పట్టుదలకు నిదర్శనం. జనంలో నిలిచేవాడు, జనంతో నడిచేవాడే నాయకుడు. 2002లో మండుటెండల్లో చేవెళ్ల నుండి ఇచ్ఛాపురం దాకా 1,472 కిలోమీటర్లు దివంగత నేత వై.యస్‌.రాజ శేఖర్‌రెడ్డి నిర్వహించిన పాదయాత్ర చరిత్రలో నిలిచిపోయింది. ఆ పాదయాత్రలో ప్రత్యక్షంగా ప్రజల కష్టాలను, కన్నీళ్లను చూడబట్టే సీఎంగా బాధ్యతను చేపట్టిన వై.యస్‌. ఎన్నో ప్రజాసంక్షేమ పథకాలను ప్రవేశపెట్టారు. నాటి తండ్రి పాదయాత్రను స్ఫూర్తిగా తీసుకునే జగన్‌ 3వేల కిలోమీటర్ల పాదయాత్రకు నడుం కట్టాడు.

మొత్తానికి గుంటూరు ప్లీనరీ వైకాపా శ్రేణుల్లో ఉత్తేజం నింపింది. భవిష్యత్‌పై బలమైన ఆశలకు పునాది వేసింది. వచ్చే ఎన్నికల్లో గట్టిగా పోరాడడానికి పార్టీ కేడర్‌కు సరికొత్త శక్తినిచ్చింది.

Page 1 of 2

newsbottomad

ఎక్కువగా చదివిన వార్తలు

  • అసలు పని వదిలేసి... అన్న క్యాంటిన్‌లు ఎందుకో?
    గుర్రం చేసే పని గుర్రం చేయాలి, గాడిద చేసే పని గాడిద చేయాలి... అని పెద్దలు చెప్పిన పాత మోటు సామెత అందరూ వినే వుంటారు. పారిశుద్ధ్య కార్మికుడి పని వీధులను శుభ్రంగా ఉంచడం... ఆ పని అతనే చెయ్యాలి. అదే…
  • తప్పెవరిది?
    నెల్లూరుజిల్లా డిఇఓగా మువ్వా రామలింగం వస్తున్నాడని తెలిసి జిల్లాలో అన్ని ఉపాధ్యాయ సంఘాలు ఆందోళనలు నిర్వహించాయి. మాకీ డిఇఓ వద్దంటూ ఉపాధ్యాయులు నెత్తి నోరు బాదుకుని చెప్పారు. 'పోకిరి' సినిమాలో మహేష్‌బాబు పోలీసు ఆఫీసర్‌ అని తెలిసాక అతని ట్రాక్‌రికార్డు గురించి…
  • ఆ పైపులతో... ఆయకట్టుకు నీళ్ళు కట్‌
    చేసే అభివృద్ధి పనులు ప్రజలకు మంచి చేసేలా వుండాలేగాని ఇంకొంచెం ఇబ్బందిగా మారకూడదు. ఒకరి సమస్య తీర్చడానికి చేస్తున్న పని ఇంకో పది మందికి సమస్య కాకూడదు. కాని, నెల్లూరు రూరల్‌ పరిధిలోని 31వ డివిజన్‌ శ్రామికనగర్‌ వద్ద కనుపూరు కాలువపై…
  • ఓటమి నేర్పిన పాఠమేంటి?
    గెలిస్తే ప్రపంచానికి నువ్వు తెలుస్తావ్‌... ఒక్కసారి ఓడిపోయి చూడు ప్రపంచమేంటో నీకు తెలుస్తుంది. రాజకీయాలలో గెలుపును ఆస్వాదించే వాడు కాదు, ఓటమిని భరించేవాడు, ఆ ఓటమితో పాఠాలు నేర్చుకునే వాడు, ఆ ఓటమిని రేపటి విజయానికి మెట్లుగా మలచుకునేవాడే నిజమైన రాజకీయ…
  • వైకాపాలోనూ... నేతలమధ్య కలతలు
    రాష్ట్రంలోనే వైయస్సార్‌ కాంగ్రెస్‌పార్టీ బలంగా వున్న జిల్లాల్లో నెల్లూరొకటి. ఒకప్పుడు కాంగ్రెస్‌కు కంచుకోట లాంటి ఈ జిల్లా ఇప్పుడు వైకాపాకు పెట్టనికోట అయ్యింది. 2014 ఎన్నికల్లో నెల్లూరు, తిరుపతి ఎంపి స్థానాలతో పాటు జిల్లాలో ఏడు అసెంబ్లీ స్థానాలను గెలుచుకుంది. ఆ…

Newsletter