pkరాజకీయాలలో నెగ్గుకు రావాలంటే ముందు నాయకుడికి సొంత వ్యూహం, సొంత అంచనా వుండాలి. ప్రజల నాడి తెలిసి వుండాలి. ప్రజల ఆలోచనలకు తగ్గట్లుగా హామీలు, మేనిఫెస్టోలు తయారు కావాలి. ప్రజల ఆలోచనలను, ఆశలను పసిగట్టలేకపోయాడు కాబట్టే 2014 ఎన్నికల్లో జగన్‌ అధికారంలోకి రాలేకపోయాడు.

ఆనాటి వైఫల్యాలను పునరావృతం కానీయకూడదనే ఉద్దేశ్యంతో రేపటి ఎన్నికల దిశగా ఆయన జాగ్రత్తగా అడుగులు వేయాలనుకుంటున్నాడు. ఆ క్రమంలో తప్పటడుగులు కూడా పడుతున్నాయి. వీటిలో ఒకటే రాజకీయ సలహాదారుగా పెట్టుకున్న ప్రశాంత్‌ కిషోర్‌ను పార్టీ వేదికలెక్కించడం. అతని సలహాలు, సూచనలు, వ్యూహాలు తెరవెనుకకు మాత్రమే పరిమితం కావాలి. అంతేగాని, అతని పనితనం లైవ్‌షో కాకూడదు.

ప్రశాంత్‌కిషోర్‌ మూలంగా ఈసారి ఎన్నికలకు పార్టీకైతే ఒక ఉపయోగముంది. 2014 ఎన్నికల్లో వైకాపా పరాభవానికి ప్రధానకారణాలలో ఒకటి అభ్యర్థుల ఎంపిక. మాట తప్పను, మడమ తిప్పను అంటూ జగన్‌ అప్పట్లో పార్టీలోకి వచ్చిన ద్వితీయశ్రేణి నాయకులందరికీ టిక్కెట్లు ఇచ్చాడు. ఆయా నియోజకవర్గాల్లో సొం తంగా బలముండి, టిక్కెట్లిస్తే పార్టీలోకి వస్తామన్న నాయకులను జగన్‌ పార్టీలోకి తీసుకోలేదు. ఇలాంటి వాళ్ళంతా తెలుగు దేశంలో చేరిపోయారు. నియోజకవర్గా లలో సత్తావున్న నాయకులు టీడీపీ టిక్కెట్లు తెచ్చుకుని గెలిచారు. 2014 ఎన్నికల్లో వైసిపి నుండి 70మంది గెలిస్తే వారిలో ఎక్కువమంది గెలుపుకు వై.యస్‌. సాను భూతే కారణం. అదే తెలుగుదేశం నుండి వందమంది గెలిస్తే... ఎక్కువ మంది గెలుపుకు వారి వ్యక్తిగత సామర్ధ్యమే కారణం. రాబోయే ఎన్నికల్లో కూడా జగన్‌ గతంలోలాగే ఎవరికి పడితే వాళ్ళకు టిక్కెట్లిస్తే పరిస్థితిలో పెద్ద మార్పుండదు. ప్రతి నియోజకవర్గంలోనూ పార్టీకి శాశ్వత ఓట్లుంటాయి. సొంతంగా ఓ పదివేల ఓట్లన్నా తెచ్చుకోగల నాయకులను అభ్య ర్థులుగా ఎంపిక చేయాలి. ఇలా చేయా లంటే 175 నియోజకవర్గాలలోనూ వడ పోత మొదలుపెట్టాలి. ఇప్పుడున్న సిటింగ్‌ ఎమ్మెల్యేలలోనూ కొందరిపై వ్యతిరేకత వుంది. అలాంటి వారిని పక్కనపెట్టాలి. ఆయా నియోజకవర్గాలకు ఏ నాయకుడైతే కరెక్టో చూడాలి. అలాగే 2014 ఎన్నికల్లో ఓడిపోయిన నియోజకవర్గాలు వందకుపైనే వున్నాయి. అక్కడ అధికారపార్టీ ఎమ్మెల్యేల మీద అంతో ఇంతో వ్యతిరేకత వుంటుంది. అక్కడ వైకాపా టిక్కెట్లను ఆశిస్తున్న అభ్య ర్థుల శక్తిసామర్ధ్యాలను అంచనా వేయాలి. కరెక్ట్‌గా ప్రతి నియోజకవర్గానికి గెలుపు గుర్రాలనే ఎంపిక చేయాలి. ఇక్కడ మొహ మాటానికి తావులేదు. ఆయన మనల్ని నమ్ముకుని ముందే పార్టీలోకి వచ్చాడు... ఈయనకు మనం సీటివ్వకపోతే ఇంకెవ రిస్తారనే ఆలోచనలకు తావుండకూడదు. గత ఎన్నికల్లో ఇలాంటి ఆలోచనలు పెట్టు కోబట్టే గెలవాల్సిన సీట్లను కూడా ఓడిపో వాల్సి వచ్చింది. ఎన్నికలంటేనే యుద్ధం. ఇక్కడ గెలవడమే ముఖ్యం. మొహమాటా లకు పోతే అసలుకే ఎసరొస్తుంది. ఇలాంటి మొహమాటాలకు పోతాననే జగన్‌ ఈసారి అభ్యర్థుల ఎంపిక బాధ్యతను పూర్తిగా ప్రశాంత్‌కిషోర్‌కు అప్పగించినట్లున్నాడు. ప్రతి నియోజకవర్గంలోనూ ప్రశాంత్‌కిషోర్‌ బృందం అభ్యర్థుల ఎంపికపై సర్వే నిర్వహి స్తోంది. ఎన్నికల్లో గెలవలేడు అని రిపోర్ట్‌ వచ్చినవాళ్ళను, జగన్‌కు ఎంత ముఖ్యమైనా సరే ఈసారి మాత్రం పీకి పక్కనపెట్ట డానికే నిర్ణయించుకున్నట్లు తెలుస్తోంది.

rkనాయకుడంటే ప్రజలకు రక్షణగా వుండాలి. ప్రజల ఆస్తులకు కాపలా దారుగా వుండాలి. ప్రజల పక్షాన ఎంత వరకైనా పోరాడాలి. ఇలాంటి పోరాటా లతోనే నాయకులు ప్రజా నాయకులవు తారు. ఈ కోవకు చెందినవాడే మంగళ గిరి ఎమ్మెల్యే ఆళ్ల రామకృష్ణారెడ్డి. చంద్రబాబు ప్రభుత్వాన్ని ముప్పతిప్పలు పెడుతూ మూడుచెరువుల నీళ్ళు తాగి స్తున్న వైయస్సార్‌ కాంగ్రెస్‌ పార్టీ శాసనసభ్యుడు.

చెన్నైలోని సదావర్తి సత్రం భూముల వేలం విషయంలో ఆర్‌కె చేసిన న్యాయ పోరాటం విజయం సాధించింది. ప్రతి పక్ష వైయస్సార్‌ కాంగ్రెస్‌పార్టీకి ఇది పెద్ద మైలేజీని సాధించింది.

చెన్నైలోని సదావర్తి భూములు 89.11 ఎకరాలకు ఈనెల 18వ తేదీన చెన్నైలోని టీటీడీ సమాచార కేంద్రంలో రెండోసారి వేలం నిర్వహించారు. కడప జిల్లా పొద్దుటూరుకు చెందిన సత్య నారాయణ బిల్డర్స్‌ అధినేత బద్వేలు శ్రీనివాసులురెడ్డి 60.30 కోట్లకు పాడి ఈ భూములను దక్కించుకున్నారు. ఏడా దిన్నర క్రితం ఇవే భూములకు వేలం పాట నిర్వహించగా అప్పుడు కాపు కార్పొరేషన్‌ ఛైర్మెన్‌ చెలమలశెట్టి రామానుజయ కేవలం 22.44 కోట్లకే ఈ భూములను వేలంలో పాడుకున్నారు. ప్రభుత్వ కను సన్నల్లో జరిగిన వేలం పాటలో పోటీ దారుల నుండి పోటీ లేకుండా చేసి రామానుజయకు మరియు ఇంకొందరికి ఈ భూములు కట్టబెట్టారన్న ఆరోపణలు వచ్చాయి. ఈ భూ కుంభకోణంపై మంగళగిరి ఎమ్మెల్యే ఆళ్ళ రామకృష్ణారెడ్డి పోరాటం మొదలుపెట్టాడు. సదావర్తి సత్రం భూములు అంతకంటే ఎక్కువకు పోవని, వేలంపాటలో వచ్చిన ధర మీద ఎవరైనా 5కోట్లు అదనంగా చెల్లిస్తే వారికే ఆ భూములిచ్చేస్తామని స్వయంగా ముఖ్య మంత్రే ప్రకటించాడు. ఈ సవాల్‌కు ఆర్కే సై అన్నాడు. తాను అదనంగా 5కోట్లు చెల్లించేందుకు సిద్ధమేనంటూ హైకోర్టులో పిటిషన్‌ వేశాడు. హైకోర్టు అతనికి అను కూలంగా తీర్పు ఇచ్చింది. వేలంపాట మొత్తానికి అదనంగా 5కోట్లు చెల్లించి భూములు స్వాధీనం చేసుకోమని చెప్పింది. హైకోర్టు ఇచ్చిన గడువు ప్రకారం ఆర్కే తనకు పరిచయం వున్న వ్యాపారవేత్తల ద్వారా డబ్బు మొత్తం కట్టించాడు. మొదటి వేలంపాట దారులు దీనిపై కోర్టుకెక్కారు. దీంతో సదావర్తి భూములకు తిరిగి వేలం పాట నిర్వహించాలని హైకోర్టు ఆదేశిం చడం, సుప్రీంకోర్టు దీనిని సమర్ధించడంతో 18వ తేదీ చెన్నైలో వేలంపాట నిర్వహిం చారు. సదావర్తి భూములకు ఈ వేలం ద్వారా గతంలోకన్నా దాదాపు 38కోట్లు అదనపు రాబడి వచ్చింది. ప్రభుత్వం పారదర్శకంగా వ్యవహరించి జాతీయ స్థాయిలో బిడ్లను ఆహ్వానించి వుండుంటే వేలంపాట మొత్తం ఇంకా పెరిగి వుండే దేమో! బిడ్డర్‌ శ్రీనివాసులురెడ్డి మళ్ళీ ఏదో రాజకీయ ఒత్తిడితో భూములు తీసుకోవడా నికి వెనక్కి తగ్గాడు. అయితే అది వేరే విషయం!

ఏదేమైనా తాను చేసిన న్యాయ పోరాటం ద్వారా సదావర్తి భూముల విలువను కొంతవరకన్నా పెంచగలిగాడు ఆర్కే. అలాగే కృష్ణానది కరకట్ట లోపల అక్రమ కట్టడాలపై కూడా ఆయన చేసిన పోరాటం ఫలించింది. గుంటూరుజిల్లా తాడేపల్లి మండలం ఉండవల్లి గ్రామ పరిధిలో కృష్ణానది కరకట్ట లోపల సీఎం చంద్రబాబు అధికార నివాసంతో పాటు ఎన్నో అక్రమ నిర్మాణాలున్నాయి. ఆర్కే వీటిపై పిటిషన్‌ వేశాడు. హైకోర్టు దీనిపై సీరియస్‌గా స్పందించింది. అక్రమ నిర్మా ణాలను ఎందుకు కూల్చడం లేదంటూ ప్రభుత్వాన్ని నిలదీసింది.

అమరావతి రాజధాని పరిధిలో ప్రతి పక్ష వైకాపాకు వున్న ఒకే ఒక ఎమ్మెల్యే ఆర్‌.కె. రాజధాని భూముల విషయం లోనూ, సదావర్తి భూముల వ్యవహారం లోనూ, ఇప్పుడు కృష్ణానది కరకట్ట అక్రమ నిర్మాణాల విషయంలోనూ ఆయన చంద్ర బాబుకు కొరకరాని కొయ్యగా మారాడు. ప్రతిపక్ష వైకాపాకు మంచి ఆయుధంగా తయారయ్యాడు.

రోత మాటలు, విపరీత చేష్టలతో వెగటు పుట్టించే రోజా వంటి వారికంటే న్యాయపోరాటాలు, ప్రజా పోరాటాల ద్వారా సత్తా చాటే ఆర్‌కె లాంటి వాళ్ళే వైకాపాకు ప్రధాన బలం కాగలరు.

jaganరాష్ట్రంలో తెలుగుదేశం నాయకులకు ఇంత కాలం ఒక ఆశ ఉండేది. అక్రమాస్తుల కేసుల్లో వైకాపా అధినేత జగన్‌ జైలుకుపోతాడని, రాష్ట్ర రాజకీయాలలో ఇక తమకు తిరుగుండదని భావిస్తూ వచ్చారు. కాని, ఇప్పుడు వారి ఆశలకు నెమ్మదిగా తెరపడబోతోందని తెలుస్తోంది.

రాష్ట్రంలో తెలుగుదేశంను, చంద్ర బాబు నాయకత్వాన్ని చేవగా ఢీకొంటున్న నాయకుడు జగన్‌! రాష్ట్రంలో కాంగ్రెస్‌ పతనమైపోయింది. బీజేపీకి గాని, ఇతర పార్టీలకు గాని అంత చేవలేదు. సొం తంగా ఒక ప్రాంతీయ పార్టీని స్థాపించి నడిపే దమ్ము ధైర్యం కూడా ఈ కాలంలో ఎవరికీ లేదు. చంద్రబాబు కూడా ఎన్టీఆర్‌ స్థాపించిన పార్టీని లాక్కుని ఒకటికి మూడు సార్లు ముఖ్యమంత్రి అయ్యాడుగాని, సొంతంగా పార్టీని స్థాపించి సీఎం అయ్యే సీన్‌ లేదు.

రాష్ట్ర రాజకీయాలలో ఇంతవరకు నందమూరి తారక రామారావు స్థాపించిన తెలుగుదేశమే బలమైన పార్టీ. ఎన్టీఆర్‌కు సినీ గ్లామర్‌ వుంది, 300కుపైగా సినిమా లలో నటించాడు. అప్పటి కాంగ్రెస్‌ ప్రభుత్వం మీద ప్రజలకు విరక్తి కలిగి వుండింది. కాబట్టి ఎన్టీఆర్‌ తెలుగుదేశం ప్రభంజనం సృష్టించగలిగింది. రాష్ట్ర రాజకీయ చరిత్రలో ఎన్టీఆర్‌ తర్వాత ఒక ప్రాంతీయపార్టీని స్థాపించి సినిమా గ్లామర్‌ లేకున్నా, రాజకీయ అనుభవం లేకున్నా రాష్ట్ర శాసనసభలో 70అసెంబ్లీ సీట్లు గెలుచుకున్నది జగన్‌ స్థాపించిన వైయస్సార్‌ కాంగ్రెస్‌పార్టీయే! ఎన్టీఆర్‌ తెలుగుదేశం 275 అసెంబ్లీలున్న ఉమ్మడి ఆంధ్ర ప్రదేశ్‌లో బలమైన ప్రాంతీయ పార్టీగా ఆవిర్భవిస్తే, జగన్‌ వైసిపి రాష్ట్ర విభజన తర్వాత 175 సీట్లు మాత్రమే వున్న ఆంధ్ర ప్రదేశ్‌లో 70సీట్లు తెచ్చుకోగలిగింది. కేవలం ఒక్క శాతం ఓట్ల తేడాతో అధికా రానికి దూరమైంది. డబ్బు, గ్లామర్‌ లేనిదే పార్టీలను నడపడం కష్టమైన ఈ కాలంలో జగన్‌ స్థాపించిన వైసిపి బలీయ శక్తిగా ఎదగడం తెలుగుదేశం శ్రేణులకు నిద్ర లేకుండా చేసింది. వైసిపిని బలహీన పర చడం వారికి సాధ్యం కావడం లేదు. లక్ష కోట్లు తిన్నాడని జగన్‌ మీద ఎన్ని ఆరోప ణలు చేసినా జనం నమ్మడం లేదు, సరి కదా అతనికి నీరాజనాలు పడుతున్నారు. రాజకీయంగా జగన్‌ చంద్రబాబుకు కంటి మీద కునుకు లేకుండా చేస్తున్నాడు.

జగన్‌ను రాజకీయంగా అణచడానికి తెలుగుదేశం వద్ద సొంత ఆయుధాలేమీ లేవు. వాళ్లు ఇంతకాలం న్యాయస్థానా లలో జగన్‌పై వున్న కేసులను నమ్ముతూ వచ్చారు. అయితే ఇటీవల కాలంలో జగన్‌ పై వున్న కేసులు ఒక్కొక్కటిగా వీగిపోతు న్నాయి. ఈ కేసులతో సంబంధం వున్న ఐఏఎస్‌ అధికారులు శ్రీలక్ష్మి, బి.పి. ఆచార్య, శ్యాంబాబు... ఇలా అందరూ కేసుల నుండి బంధవిముక్తులవుతున్నారు. ఈ కేసుల్లో అధికారులు నిబంధనల ప్రకారం వ్యవహరించారని తేలితే జగన్‌ను దోషిగా చూపించలేరు. జగన్‌ మీద పెట్టిన కేసుల్లో చాలా వరకు క్లియరయ్యాయి. ఇక కొద్ది కేసులు మాత్రమే పెండింగ్‌లో వున్నాయి. వాటిల్లో కూడా జగన్‌కు క్లీన్‌చిట్‌ లభిస్తే చంద్రబాబు లక్షకోట్ల ప్రచారం ఉత్తదే అవుతుంది. జగన్‌ను వేలెత్తి చూప డానికి దారులు మూసుకుపోతాయి.

జగన్‌ మీద కేసులన్నవి రాజకీయ కోణంలో పుట్టినవే! అతను కాంగ్రెస్‌ నుండి బయటకొచ్చి వైసిపిని స్థాపించాకే అప్పుడు యూపిఏ అధినేత్రి సోనియాగాంధీ ప్రేర ణతో జగన్‌పై కేసులు పడ్డాయి. పగబట్టి జగన్‌ను జైలుకు పంపించడమే కాకుండా 16నెలలు బెయిల్‌ రాకుండా చేసారు. ఇంత చేసినా కూడా జగన్‌ రాజీపడకుండా అటు కాంగ్రెస్‌తో, ఇటు రాష్ట్రంలో టీడీపీతో పోరు మార్గాన్నే ఎంచుకున్నాడు. ప్రతికూల పరిస్థితులను ఎదిరించి మొం డిగా నిలబడ్డాడు. వైసిపి కేడర్‌ను ఇంత కాలం కేసుల భయమే వెంటాడుతోంది. జగన్‌ ఈ కేసుల్లో జైలుకు వెళితే పార్టీకి ప్రత్యామ్నాయ నాయకత్వమే లేదు. ఇప్పుడు ఒక్కొక్కటిగా వీగిపోతున్న కేసులతో వైసిపి కేడర్‌కు ఎనలేని ఉత్సాహం వస్తోంది.

అదే సమయంలో చంద్రబాబును మాత్రం ఓటు - నోటు కేసు నీడలా వెంటా డుతోంది. ఇటీవల కేంద్రంలోని బీజేపీ నాయకత్వం రాష్ట్ర రాజకీయాలపై తమ వ్యూహాలను మార్చుకుంటూ వస్తోంది. రేపటి ఎన్నికల్లో ఎవరితో జతకడతారో చెప్పలేని పరిస్థితి. రాజకీయంగా చంద్ర బాబును తొక్కాలని భావిస్తే మాత్రం 'ఓటు-నోటు' కేసుకు ప్రాణప్రతిష్ట జరిగే అవకాశముంది. అదే జరిగితే తెలుగుదేశం పరిస్థితి... బాలకృష్ణ బాషలో చెప్పినట్లుగా దిబ్బిడిదబ్బిడే..!

Page 1 of 18

newsbottomad

ఎక్కువగా చదివిన వార్తలు

  • ల్యాండవుతున్న విమానం
    దగదర్తి విమానాశ్రయం కల సాకారానికి రోజులు దగ్గరపడ్డాయి. త్వరలోనే విమానాశ్రయం నిర్మాణానికి టెండర్లు పిలవడానికి అధికారులు రంగం సిద్ధం చేస్తున్నారు. మొదటి దశలో ఎయిర్‌పోర్టు నిర్మాణానికి అవసర మైన 1350 ఎకరాల భూసేకరణ పూర్తయ్యింది. భూసేకరణకు సంబంధించి రైతుల పరిహారానికి నిధులు…
  • కార్పొరేషన్‌లో కోల్డ్‌వార్‌
    వివాదాలకు, విభేదాలకు నెల్లూరు కార్పొరేషన్‌ కేరాఫ్‌ అడ్రస్‌ లాంటిది. నెల్లూరు నగరంలో ఎన్ని రకాల సమస్యలుంటాయో నెల్లూరు కార్పొరేషన్‌ కార్యాలయంలో కూడా అంతకంటే ఎక్కువ సమస్యలే వుంటాయి. ముఖ్యంగా ఇక్కడ పనిచేసే పాలకవర్గం వుంటే అధికారులు సహకరించరు. చిత్తశుద్ధితో పనిచేసే అధికారులున్నప్పుడు…
  • ఆనంకు చుక్కెదురు?
    నెల్లూరు నగరంలో తమ ఆధిపత్యానికి ఆయువు పట్టులాంటి విఆర్‌ విద్యాసంస్థలపై తమ పట్టు నిలుపుకోవాలని ఆనం సోదరులు చేసిన ప్రయత్నాలు బెడిసి కొట్టాయి. న్యాయస్థానంలో వరుస దెబ్బలు తగులుతూనే వున్నాయి. విఆర్‌ విద్యాసంస్థల పాలక కమిటీని రద్దు చేస్తూ ఈ ఏడాది…
  • పాదయాత్ర చేస్తున్నా... ఆశీర్వదించండి
    వైయస్సార్‌ కాంగ్రెస్‌పార్టీ అధినేత వై.యస్‌.జగన్మోహన్‌రెడ్డి మంగళవారం శంషాబాద్‌లోని శ్రీశ్రీశ్రీ త్రిదండి శ్రీమన్నారాయణ రామానుజ చినజీయర్‌ స్వామి వారి ఆశ్రమ ప్రాంగణానికి వెళ్ళి స్వామివారిని కలుసుకున్నారు. ప్రజల కష్టాలను స్వయంగా తెలుసుకుని తనకు చేతనైన మేరకు వారికి సహాయసహకారాలు అందించడానికి త్వరలో నవ్యాంధ్రలో…
  • ఎగువ జిల్లాల్లో వర్షం.. నెల్లూరు జిల్లాలో హర్షం
    నెల్లూరుజిల్లా ప్రజలకు ఈ జిల్లాలో వర్షాలు పడితేనే కాదు, ఎగువ జిల్లాలైన అనంతపురం, కడప, కర్నూలు జిల్లాల్లో భారీ వర్షాలు పడితేనే ఎక్కువ సంతోషం. ఆ జిల్లాల్లో వర్షాలు పడితే ఎక్కువ ప్రయోజనం పొందేది మనమే. నెల్లూరుజిల్లాలో భారీ వర్షాలు కురిసి…

Newsletter